ដោយ: គង់ លាងហួរ

ប៉េកាំង: ប្រទេសចិន បានចាប់ផ្តើមងាកទៅដាក់ឱ្យអនុវត្តន៍ ការប្រមូលពន្ធលើប្រាក់ចំណេញ ពីការវិនិយោគនៅក្រៅប្រទេស របស់ក្រុមអ្នកមានជាជនជាតិចិន បន្ទាប់ពីខ្លួនបានមើលរំលងវិធានការនេះជាយូរមកហើយ។

ក្នុងរយៈពេលប៉ុន្មានខែថ្មីៗនេះ អាជ្ញាធរពន្ធដារចិនបានធ្វើការកោះហៅបុគ្គល ដែលមានទ្រព្យសម្បត្តិស្តុកស្តម្ភមួយចំនួននៅតាមទីក្រុងធំៗរបស់ប្រទេសចិន ឱ្យចូលរួមកិច្ចប្រជុំ ដើម្បីវាយតម្លៃលើទំហំទឹកប្រាក់ត្រូវបង់ពន្ធ រួមទាំងអ្នកជំពាក់ពន្ធផងដែរ។

ការដាក់ចេញនូវចំណាត់ការនេះ បានស្ដែងឱ្យឃើញពីភា​ពបន្ទាន់របស់រដ្ឋាភិបាលចិន ក្នុងការពង្រីកប្រភពប្រាក់ចំណូលរបស់ខ្លួន ស្របពេលដែលការលក់ដីធ្លីរដ្ឋ និងកំណើនសេដ្ឋកិច្ចកំពុងធ្លាក់ចុះ។

ចំណាត់ការនេះ ក៏មានទិសដៅស្របតាមយុទ្ធនាការ “វិបុ​លភាពរួម” របស់លោកប្រធានាធិបតីចិន ស៊ី ជីនពីង ដែលមានគោលដៅបែងចែកទ្រព្យសម្បត្តិ ដោយស្មើភាពគ្នានៅក្នុងប្រទេសមានសេដ្ឋកិច្ចធំបំផុតទី២របស់ពិភពលោក។

ក្រុមអ្នកមាននៅប្រទេសចិន ត្រូវប្រឈមមុខនឹងការបង់ពន្ធចំនួន២០ភាគរយ លើប្រាក់ចំណេញពីការវិនិយោគ ហើយមនុស្សមួយចំនួនទៀត ក៏បានទទួលរងនូវការផាកពិន័យ ដោ​យ​សារការបង់ពន្ធមិនទាន់កាលកំណត់ផងដែរ។

កាលពីឆ្នាំ២០១៨កន្លងទៅ រដ្ឋាភិបាលចិនបានដាក់ឱ្យអនុវត្តន៍ស្តង់ដាររបាយការណ៍ទូទៅ (CRS) ដែលជាប្រព័ន្ធចែករំលែកព័ត៌មានជាសកល ក្នុងគោលបំណងទប់ស្កាត់ការគេចពន្ធ។

យ៉ាងណាមិញ គេមិនទាន់ដឹងច្បាស់ទេថា តើចំណាត់ការនេះ នឹងមានវិសាលភាពធំកម្រិតណា និងបន្តអូសបន្លាយដល់ពេលណានោះទេ?។

យោងតាមប្រភពនានាបានទម្លាយឱ្យដឹងថា អាជ្ញាធរចិនបានកំណត់គោលដៅលើជនជាតិចិន ដែលមានទ្រព្យសម្បត្តិយ៉ាងតិច១០លានដុល្លារអាមេរិកនៅបរទេស ខណៈគោលដៅផ្សេងទៀត ជាម្ចាស់ភាគហ៊ុនរបស់ក្រុមហ៊ុន ដែលបានចុះបញ្ជីនៅក្នុងទីក្រុងហុងកុង និងសហរដ្ឋអាមេរិក។

នៅក្នុងរយៈពេល៦ឆ្នាំកន្លងមក ប្រទេសចិនបាននឹងកំពុងផ្លាស់ប្តូរព័ត៌មាន ដោយស្វ័យប្រវត្តិជាមួយដែនសមត្ថកិច្ចរបស់បណ្តាប្រទេសសមាជិកនីមួយៗ នៃប្រព័ន្ធCRS អំពីគណនី ដែលជាកម្មសិទ្ធិរបស់ជនជាតិចិន ដែលត្រូវជាប់កាតព្វកិច្ចបង់ពន្ធ៕ប្រភព: Bloomberg៕

ប្អូននិស្សិតអាហារូបករណ៍ ប៉េង ហួត គ្រុប ចំនួន ៥០នាក់ រួមទាំងសិស្សវិទ្យាល័យនៃអង្គការទ្រទ្រង់កុមារកម្ពុជា-CCF ប្រមាណជាង ២០០នាក់ បានទទួលការចែករំលែកក្នុងកម្មវិធីពង្រឹងចំណេះដឹងបន្ថែមសម្រាប់ការសិក្សា

ក្រោមប្រធានបទ “ការត្រៀមខ្លួន និងចាប់យកឱកាសក្នុងបរិបទបច្ចេកវិទ្យាឌីជីថល”​ ពីក្រុមហ៊ុន ប៉េង ហួត គ្រុប ស្ថិតនៅទីតាំងសាលា Neeson Cripps Academy ស្ទឹងមានជ័យ រាជធានីភ្នំពេញ។

កម្មវិធីនេះគឺធ្វើឡើងក្នុងគោលបំណងបង្ហាញគំនិតដល់ពួកគេឱ្យយល់ដឹង និងចេះប្រើប្រាស់បច្ចេកវិទ្យាឌីជីថលដើម្បីជួយសម្រួលក្នុងការសិក្សា និងអាចបង្កើតប្រភពចំណូលផ្សេងៗ ជាពិសេសគឺដើម្បីឆ្លើយតបទៅនឹងការសម្របខ្លួនក្នុងនិន្នាការសង្គមបច្ចុប្បន្ន និងអនាគត។ ​

សូមរំលឹកថាក្រុមហ៊ុន ប៉េង ហួត គ្រុប បានផ្ដល់អាហារូបករណ៍ថ្នាក់បរិញ្ញាបត្រ ដល់សិស្សវិទ្យាល័យអង្គការទ្រទ្រង់កុមារកម្ពុជា ដែលទទួលបានលទ្ធផលល្អសម្រាប់ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២១-២០២២ ចំនួន ៥០នាក់ កន្លងមក។ ហើយជាបន្តបន្ទាប់ក្រុហ៊ុនមានការរៀបចំកម្មវិធីពង្រឹងចំណេះដឹងបន្ថែមក្នុងការសិក្សា និងកម្មវិធីផ្សេងទៀតដើម្បីផ្ដល់ឱ្យពួកគេនូវចំណេះដឹងឱ្យកាន់តែទូលំទូលាយសម្រាប់ការត្រៀមខ្លួនក្នុងអាជីពការងារ និងអនាគត។

ដោយ: គង់ លាងហួរ

អន្តរជាតិ: រដ្ឋមន្ត្រីក្រសួងដឹកជញ្ជូនឥណ្ឌូនេស៊ីលោក Budi Karya Sumadi បានប្រកាសថា ផ្លូវរថភ្លើងលើអាកាសដ៏វែងបំផុតរបស់ឥណ្ឌូនេស៊ី ស្ថិតនៅចំណុចប្រសព្វJoglo នៅក្នុងទីក្រុង Solo នៃខេត្ដ Central Java គ្រោងនឹងចាប់ផ្តើមដំណើរការ នៅថ្ងៃទី១ ខែវិច្ឆិកាខាងមុខ។

លោកបានធ្វើសេចក្តីថ្លែងការណ៍ ឱ្យដឹងបែបនេះ ក្នុងកំឡុងពេលលោកបានចុះ ពិនិត្យមើលវឌ្ឍនភាពនៃការអភិវឌ្ឍន៍ ដោយលោក បានធ្វើដំណើរចាកចេញពីស្ថានីយ៍ Kadipiro ដើម្បីត្រួតពិនិត្យមើលផ្លូវដែក។

យ៉ាងណាមិញ លោកបានកត់សម្គាល់ថា ក្រសួងរបស់លោក នឹងសហការជាមួយក្រសួងសាធារណការ និងលំនៅដ្ឋានសាធារណៈជាមុនសិន ដើម្បីធ្វើការតេស្តទម្ងន់នៅថ្ងៃទី២៣ និងទី២៤ ខែតុលា ដើម្បីធានាបាននូវសមត្ថភាពផ្ទុកទម្ងន់របស់ផ្លូវដែក។

លោក​បាន​បន្ថែម​ថា “កាលបរិច្ឆេទ នៃការគ្រោងបើកដាក់ឱ្យប្រើប្រាស់​នៅ​ថ្ងៃ​ទី១ ខែ​វិច្ឆិកា ​អាស្រ័យ​លើ​លទ្ធផល​នៃ​ការ​តេស្តសាកល្បង”។

​លោក Sumadi បានបង្ហាញក្តីសង្ឃឹមថា ការកកស្ទះចរាចរណ៍ ដែលកើតឡើងនៅចំណុចប្រសព្វ Joglo នៅក្នុងទីក្រុង Solo នៃខេត្ដ Central Java នឹងត្រូវបានកាត់បន្ថយ នៅពេលផ្លូវដែកលើអាកាសបើកដំណើរការ និងនៅពេលផ្លូវក្រោមដីត្រូវបានសាងសង់បញ្ចប់រួចរាល់។

លោក Sumadi បានលើកឡើងថា គម្រោងផ្លូវដែកលើអាកាសនេះ ត្រូវបានសាងសង់ឡើង ​ក្រោមទុនវិនិយោគប្រមា​ណ៧៦,៧លានដុល្លារអាមេរិក  ដែលនឹងជួយសម្រួលដល់ការធ្វើដំណើររវាងទីក្រុងSolo និងទីក្រុង Semarang របស់ខេត្ត Central Java។

យោងតាមគេហទំព័រ របស់ក្រសួងដឹកជញ្ជូនឥណ្ឌូនេស៊ីបានឱ្យដឹងថា ផ្លូវរថភ្លើងលើអាកាសនេះ លាតសន្ធឹងប្រវែង១,៨គីឡូម៉ែត្រ ដោយក្លាយជាផ្លូវដែកលើអាកាស ដែលវែងជាងគេបំផុតនៅក្នុងប្រទេសឥណ្ឌូនេស៊ី។

លោក​បាន​បន្ថែម​ថា ផ្លូវ​រថភ្លើង​លើអាកាស​នេះ ​ត្រូវ​បាន​រចនា​ឡើង ​ដើម្បី​បង្ហាញ​នូវ​និមិត្តសញ្ញា​ នៃ​បេតិកភណ្ឌ​វប្បធម៌​របស់​ទីក្រុង Solo ដូចជា ក្រណាត់សូត្រ Sidomukti batik ផ្សារ Klewer Market និងរាជវាំង Keraton៕ប្រភព: Antara News៕

ដោយៈគង់ សូរិយា

       បន្ទាយមានជ័យៈ ប្រជាពលរដ្ឋនៅក្រុងប៉ោយប៉ែត ពិសេ​សអ្នករស់នៅ ជាប់នឹងបណ្តាញផ្លូវតូចៗផ្សេងៗ ដែលភ្ជាប់មកកាន់ផ្លូវ “ក៥”បានស្នើឲ្យអាជ្ញាធរពិនិត្យ លើការសាងសង់ផ្លូវនេះ ដើម្បីសម្រួលការធ្វើដំណើររបស់ពួកគាត់។

       បណ្តាញផ្កូវតូចៗជាច្រើន ដែលតភ្ជាប់មកកាន់ផ្លូវ“ក៥”បានរងការខូចខាត ពិសេសពេលធ្លាក់ភ្លៀងមកម្តងៗ សភាពផ្លូវដូចជាថ្លុកត្រពាំង ដែលអាជ្ញាធរសង្កាត់ និងទីក្រុងប៉ោយប៉ែតហាក់មិនបានចាប់អារម្មណ៍ នឹងបញ្ហានេះនៅឡើយទេ។

ជាក់ស្តែងតាមរយៈការធ្វើដំណើរចុះ ទៅកាន់តំបន់នេះ កាលពីពេលថ្មីៗនេះ របស់ក្រុមអ្នកសារព័ត៌មាន បានសង្កេតឃើញថា បន្ទាប់ពីមានការផ្សព្វផ្សាយ ដោយបណ្តាញសារព័ត៌​មានមួយចំនួន អាជ្ញាធរបានចាក់ថ្មម៉ិច ប្រមាណ២គីឡូ​ម៉ែត្រលើផ្លូវ “ក៥” ជាចំណុចពិបាកធ្វើដំណើរខ្លាំង ប៉ុន្តែផ្លូវតូចៗ ដែលភ្ជាប់ជាមួយផ្លូវនេះ និងកំណាត់ផ្លូវទៅកាន់ច្រកអូរនាងមិនបានធ្វើឡើយ ដោយផ្លូវមានសភាពពិបាកខ្លាំង សូម្បីរថយន្ត​ម៉ាកSUVក៏មិនអាចធ្វើដំណើរបានឡើយ។

ផ្លូវ “ក៥” ស្ថិតនៅក្នុងសង្កាត់​ចំនួន៣ គឺអូរជ្រៅ​ សង្កាត់ប៉ោយ​ និងសង្កាត់អូរឬស្សី។

ប្រជាពលរដ្ឋរស់នៅតាមបណ្តាញផ្លូវនេះ និងផ្លូវតូចៗជាច្រើន ដែលធ្វើដំណើរមកកាន់កន្លែងធ្វើការ នៅភោជនីយដ្ឋាន សណ្ឋាគារ កាស៊ីណូនានា កណ្តាលក្រុងប៉ោយប៉ែត បានត្អូ​ញត្អែរ ប្រាប់អ្នកសារព័ត៌មានរបស់យើង លើទុក្ខលំបាករបស់ពួកគេ ដែលអ្នកខ្លះត្រូវដួលម៉ូតូរថរបួស និងត្រូវប្រឡាក់សម្លៀកបំពាក់ ដោយសារពេលភ្លៀងធ្លាក់ម្តងៗបែកភក់ រអិលដួលច្រង៉ាប់ច្រងិល។

ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA) លោកយិន លាងគង់ ដែលបានចុះសិក្សាសក្តានុពល និងបញ្ហាប្រឈមផ្នែកសេដ្ឋកិច្ច នៅទីក្រុងប៉ោយប៉ែតកា​លពីពេលថ្មីៗនេះបានលើកឡើងថា ក្រុងប៉ោយប៉ែតប្រៀបដួចគ្រាប់ពេជ្រមួយ នៅតំបន់ភូមិភាគពាយ័ព្យប្រទេស ដែលមិនទាន់មានការកែច្នៃ ប៉ុន្តែដោយសារគោលនយោបាយសេដ្ឋកិច្ចដ៏ត្រឹមត្រូវរបស់រដ្ឋាភិបាល ការអភិវឌ្ឍសេដ្ឋកិច្ចដ៏លឿនក្នុងរយៈពេលជាង២ទសវត្សរ៍ចុងក្រោយនេះ បានធ្វើឲ្យទីក្រុងនេះ មានឱកាសរីកចម្រើនលឿន ជាមួយនឹងតំបន់សេដ្ឋកិច្ចពិសេស កំណើនប្រជាសាស្រ្ត ការរីកចម្រើនផ្នែកកាស៊ីណូ វិស័យបដិសណ្ឋារកិច្ច និងវិស័យសំណង់ជាដើម។

លោកបន្តថា ប៉ុន្តែទីក្រុងនេះ មានបញ្ហាប្រឈមជាច្រើនលើបញ្ហាដូចជាទឹកស្អាត ហេដ្ឋារចនាសម្ព័ន្ឋ(ផ្លូវ) និងចរន្តអគ្គិសនីដែលគ្មានគុណភាព ដែលបញ្ហានេះត្រូវបានប្រជាពលរដ្ឋក្រុងប៉ោយប៉ែតសំណូមពរ ដល់ប្រមុខរាជរដ្ឋាភិបាលគិតគូរដល់ប្រជាពលរដ្ឋ អាជីវករ និងអ្នកធ្វើធុរកិច្ចជាតិ អន្តរជាតិនៅទីក្រុងនេះ ហើយបញ្ហានេះ ស្ថិតនៅក្នុងគោលនយោបាយអាទិភាព ដែលរាជរដ្ឋាភិបាលតែងតែគិតគូរជាប្រចាំផងដែរ។

លោកយិន លាងគង់បានបន្តថា ក្រៅពីផ្លូវជាតិលេខ៥ ផ្លូវ “ក៥“ ក៏ជាបណ្តាញគមនាគមន៍ដ៏សំខាន់ ស្ថិតនៅប្របជាមួយ ព្រំដែនប្រទេសថៃ ដែលមានប្រជាពលរដ្ឋរស់នៅច្រើន និងធ្វើដំណើរច្រើន ប៉ុន្តែផ្លូវដ៏សំខាន់មួយនេះ បណ្តាញផ្លូវភ្ជាប់មកកាន់ផ្លូវធំនេះ បានរងការខូចខាតយ៉ាងច្រើន ពិសេសនៅពេលភ្លៀងមកដល់តែងតែបែកភក់ និងរអិល ដែលអ្នកធ្វើដំណើរជួបការលំបាកជាប់ជាប្រចាំ៕

ដោយៈ គង់ សូរិយា

       ភ្នំពេញៈ អ្នកជំនាញអន្តរជាតិបានលើកឡើងថា អ្នកវិនិយោគចិន និងជនបរទេសមួយចំនួនទៀត បានឈានជើងនិងកំពុងមើលឃើញឱកាស ក្នុងទីផ្សារកម្ពុជាបណ្តើរៗហើយ។

នាយកប្រតិបត្តិក្រុមហ៊ុនPropNex Cambodia លោកAlan Neoបានមានប្រសាសន៍ឲ្យដឹង កាលពីរសៀលថ្ងៃទី១៥ តុលានេះថា ស្របពេលទីផ្សារនេះ កំពុងមានសភាពយឺតយ៉ាវ ហើយអ្នកវិនិយោគក្នុងស្រុក ពួកគេកំពុងមានវិបត្តិលំហូរសាច់ប្រាក់ លោកបានងាកទៅកាន់ទីផ្សារបរទេស ដើម្បីផ្សព្វផ្សាយនិងទាក់ទាញអ្នកវិនិយោគអន្តរជាតិមកកាន់កម្ពុជា។

លោកបន្តថា “ក្រុមហ៊ុនភ្នាក់ងារអចលនវត្ថុចិនមួយចំនួន បានឈានជើង មកកាន់រាជធានីភ្នំពេញ ហើយពួកគេមានអា​រម្មណ៍ភ្ញាក់ផ្អើល និងមើលឃើញឱកាសក្នុងទីផ្សារនេះ”។​លោកបន្តថា “អ្នកវិនិយោគបរទេសមួយចំនួនទៀត ពួកគេកំពុងសម្លឹ​ងមកកាន់កម្ពុជាផងដែរ”។

លោកAlan Neoបានបន្តថា ស្របពេលមានបាក្យចចា​មអារ៉ាមជាច្រើន បាននិយាយមិនល្អពីកម្ពុជា យើងត្រូវបង្កើនការផ្សព្វផ្សាយពីភាពវិជ្ជមាននៅទីនេះ ពីឱកាសរីកចម្រើន និងការស្វែងរកផលចំណេញបានពីទីផ្សារនេះ។

លោកបញ្ជាក់ថា “អ្នកវិនិយោគចិនកាន់តែច្រើន នឹងឈានជើងមកកម្ពុជានៅឆ្នាំ២០២៥ ២០២៦ខាងមុខកាន់តែច្រើន”។ លោកបន្តថា “ទីផ្សារនេះមានឱកាសរីកចម្រើនជាថ្មី ស្របពេលអ្នកអភិវឌ្ឍន៍ជាច្រើន ពួកគេនៅតែមានទំនុកចិត្តលើទីផ្សារកម្ពុជា ដែលនឹងមានឱកាសងើបឡើង នាពេលអនាគតឆាប់ៗនេះ”។

ជាមួយគ្នានេះ លោកបណ្ឌិតAlbert Tan ស្ថាបនិកស្ថាប័នAPC ដែលមានមូលដ្ឋាននៅប្រទេសម៉ាឡេស៊ី និងតែងតែនាំអ្នកវិនិយោគពីប្រទេសចិន តៃវ៉ាន់ កូរ៉េ សឹង្ហបុរីមកកាន់កម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា យុគមាសនឹងកើតមាននៅកម្ពុជាជាថ្មីម្តងទៀត សម្រាប់ទីផ្សារអចលនវត្ថុកម្ពុជា ស្របពេលប្រទេសនេះ មានភាពអំណោយផលដ៏ច្រើនលើច្បាប់វិនិយោគ ដែលអនុញ្ញាត្តឲ្យជនបរទេស មានសិទ្ឋបើកក្រុមហ៊ុន១០០ភាគរយ អ្នកវិនិយោគអាចយកលុយចំណេញចេញបាន កំណើនសេដ្ឋកិច្ច ស្ថេរភាពនយោបាយ កំណើនប្រជាសាស្រ្តនៅប្រទេសនេះ ការចាយប្រាក់ដុល្លារយ៉ាងទូលំទូលាយ និងភាពទាក់ទាញផ្នែកភូមិសាស្រ្ត៕

ដោយៈ គង់ សូរិយា

      ភ្នំពេញៈ សម្តេចមហាបវរធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជា បានអញ្ជើញជាអធិបតី ក្នុងពិធីអបអរសាទរខួបអនុស្សាវរីយ៍៣០ឆ្នាំ ថ្ងៃបង្កើតកងពលតូចលេខ៧០ នៃកងទ័ពជើងគោក។

សម្តេចបវរធិបតី បានកោតសរសើរ ចំពោះសកម្មភាពដ៏រស់រវើក ស្មោះត្រង់របស់ថ្នាក់ដឹកនាំ និងមេបញ្ជាការគ្រប់លំដាប់ថ្នាក់ ព្រមទាំងនាយទាហាន នាយទាហានរង ពលទាហាន ទូទាំងកងពលតូចលេខ៧០ ក្នុងបុព្វហេតុរួមចំណែកអភិវឌ្ឍកម្ពុជា និងការចូលរួមថែរក្សាការពារ ដល់សុខសន្តិភាព ស្ថិរភាពជាតិ សណ្ដាប់ធ្នាប់សង្គម ដែលស័ក្តិសម ជាទីពឹងរបស់ប្រជាជន និងសង្គមជាតិកម្ពុជា។

​ក្នុងពិធីដ៏មហោទ្បារិកនោះ សម្តេចនាយករដ្ឋមន្រ្តី បានសង្កត់បញ្ជាក់ថា កងយោធពលខេមរភូមិន្ទ មិនត្រឹមតែជាកម្លាំ​ងស្នូល ទទួលរ៉ាប់រងការងារថែរក្សា ការពារបូរណភាពទឹកដី និងរួមចំណែក ក្នុងការអភិវឌ្ឍសង្គម-សេដ្ឋកិច្ចជាតិប៉ុណ្ណោះទេ ប៉ុន្តែបានក្លាយខ្លួន ជាកម្លាំងយ៉ាងរ៉ឹងមាំ ជួយរក្សាសន្តិភាពនៅបណ្តាប្រទេសមួយចំនួន តាមការស្នើរបស់អង្គការសហប្រជាជាតិ ដែលគិតចាប់តាំងពីឆ្នាំ២០០៥ មកដល់ពេលនេះ កងទ័ពមួកខៀវកម្ពុជា ប្រមាណជិត១ម៉ឺននាក់ បានបញ្ជូនទៅកាន់១០ប្រទេស ដើម្បីចូលរួមបេសកកម្មរក្សាសន្តិភាពពិភពលោក ។

ទន្ទឹមនេះ ខណៈដែលមានប្រទេសមួយចំនួន កំពុងជួបបញ្ហាសង្គ្រាម និងអសន្តិសុខ សម្តេចមហាបរវធិបតី បានលើកឡើងពីភាពចាំបាច់ ដល់ការថែរក្សាសុខសន្តិភាព ឱ្យបានជាដាច់ខាតនៅកម្ពុជា ព្រោះនេះជាមូលដ្ឋានគ្រឹះសំខាន់បំផុតសម្រាប់ការអភិវឌ្ឍ និងភាពសុខសាន្តរបស់ប្រជាជន ជាមួយនឹងការចូលរួមចំណែក ដ៏សំខាន់ពីសំណាក់កងទ័ព ដែលជាតួអង្គមួយទាំងក្នុងការបង្កើតសង្គ្រាម បញ្ចប់សង្គ្រាម និងការពារសុខសន្តិភាព ។

សម្តេចមហាបរវធិបតីនាយករដ្ឋមន្រ្តី បានលើកឡើងថា រាជរដ្ឋាភិបាលកម្ពុជា តែងយកចិត្តទុកដាក់ជានិច្ច ចំពោះប្រជាជន ក៏ដូចជា កងទ័ពកម្ពុជាដែលកំពុងស្នាក់នៅ និងបំពេញបេសកកម្ម នៅក្នុងបណ្តាប្រទេស ដែលកំពុងមានសង្គ្រាម ។ ជាពិសេស ក្នុងពេលថ្មីៗនេះ សម្តេចបវរធិបតី បានបញ្ជាឱ្យផ្អាកការបញ្ជូននិស្សិតខ្មែរ ទៅធ្វើកម្មសិក្សានៅប្រទេសអ៊ីស្រាអែល និងបានណែនាំឱ្យតាមដានជាប់ជាប្រចាំ ពីសុវត្ថិភាពរបស់និស្សិតខ្មែរ ដែលកំពុងស្នាក់នៅប្រទេសអ៊ីស្រាអែលចំនួន ២២០នាក់ និងត្រៀមផែនការមួយចំនួន ក្នុងករណីចាំបាច់ ពិសេសសម្រាប់អ្នករស់នៅ ក្នុងតំបន់ដែលមានហានិភ័យខ្លាំង។

ជាមួយគ្នានេះ សម្តេចនាយករដ្ឋមន្រ្តី បានផ្តល់គោលការ​ណ៍ទៅក្រសួងការពារជាតិ ពាក់ព័ន្ធកងទ័ពមួកខៀវកម្ពុជានៅប្រទេសលីបង់ ក្នុងករណីមានការជម្លៀស កម្លាំងចេញពីតំបន់មានសង្គ្រាម ដោយធ្វើយ៉ាងណាធានា ឱ្យបានសុវត្ថិភាពអាយុជីវិតកងកម្លាំងរបស់យើងនៅទីនោះ ។

ពាក់ព័ន្ធនឹងការបណ្តុះបណ្តាល ធនធានមនុស្សក្នុងកងយោធពលខេមរភូមិន្ទ សម្តេចបវរធិបតី បានស្នើក្រសួងការពារជាតិ បន្តយកចិត្តទុកដាក់លើការហ្វឹកហ្វឺន ជាកត្តាអាទិភាព ព្រោះការហ្វឹកហ្វឺនជាការផ្ទេរបទពិសោធន៍ និងចំណេះដឹងក្នុងជួរកងទ័ព តាមរយៈការពង្រឹងឯកសារយោធាចារ្យ និងសាលាហ្វឹកហ្វឺន  ជាពិសេសក្បាច់គុនកងយោធពលខេមរភូមិន្ទ ដែលផ្តល់ផលយ៉ាងហោច៣យ៉ាង គឺ៖ ១. ដើម្បីបំពេញលើយុទ្ធវិធីសំខាន់ៗ ដោយប្រើប្រាស់អាវុធធម្មជាតិ ក្នុងកាលៈទេសៈចាំបាច់, ២. ដើម្បីរក្សាសុខភាពរឹងមាំ និង៣ ដើម្បីចូលរួមភិរ័ក្ស និងជំរុញការផ្សព្វផ្សាយនូវក្បាច់គុនរបស់បុព្វបុរសយើង ។

សម្តេចមហាបរវធិបតី បានបញ្ជាឱ្យកងទ័ពជើងគោកត្រៀមចូលរួមជាមួយកងរាជអាវុធហត្ថ និងកងនគរបាលជាតិ ដើម្បីទប់ស្កាត់នូវរាល់បទល្មើស ធនធានធម្មជាតិ និងបទល្មើសនានា ។

សម្តេចបវរធិបតីបានសង្កត់ធ្ងន់ថា “ដើម្បីធានាដល់សន្តិសុខជាតិ នាពេលខាងមុខ ដែលឆ្លើយតបទៅនឹងការប្រែប្រួលស្ថានភាពនៃបទល្មើស ទាមទាឱ្យមានការយកចិត្តទុកខ្ពស់ និងបង្កើនកម្លាំងអនុវត្តន៍ ច្បាប់ឱ្យកាន់តែមានប្រសិទ្ធភាព ក្នុងការប្រយុទ្ធប្រឆាំងនឹងបទល្មើសទាំងនោះ ដែលនាំមកនូវហានិភ័យ និងប៉ះពាល់យ៉ាងខ្លាំងដល់សន្តិសុខជាតិ”៕