ដោយៈ ម៉ាណា

    ភ្នំពេញៈ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកហាស់ សារ៉េត អញ្ជើញជាអធិបតីភាពក្នុង​កិច្ច​ប្រជុំបូកសរុបការងារអនុវត្ត “គម្រោងជលផលសមុទ្រ និង​តំបន់​ឆ្នេរប្រកបដោយចីរភាព (SCMF) ឆ្នាំ២០២៥ និងលើកទិស​ដៅ​អនុវត្តឆ្នាំ២០២៦”។

លោកហាស់ សារ៉េត រដ្ឋលេខា​ធិការ​ក្រសួងកសិកម្ម រុក្ខាប្រមាញ់ និងនេសាទ និងជាសហ​ប្រធាន​គណៈកម្មការ តម្រង់ទិសគម្រោងSCMF បានអញ្ជើញជាអធិប​តី​ភាព និងដឹកនាំកិច្ចប្រជុំបូកសរុបការងារអនុវត្តគម្រោង “ជលផល​សមុទ្រ និងតំបន់ឆ្នេរប្រកបដោយចីរភាព (SCMF)ឆ្នាំ ២០២៥ និង​លើក​ទិសដៅអនុវត្ត ឆ្នាំ២០២៦ ក្រោមក្របខណ្ឌហិរញ្ញប្បទាន​របស់​ធនាគារអភិវឌ្ឍន៍អាស៊ី (ADB) និងទីភ្នាក់ងារបារាំង​សម្រាប់​ការអភិវឌ្ឍ (AFD)។

កិច្ចប្រជុំធ្វើឡើង ដោយមានការ​អញ្ជើញ​​ចូលរួមដោយផ្ទាល់ និងតាមប្រព័ន្ធវីដេអូពីចម្ងាយ ពីថ្នាក់​ដឹកនាំគម្រោងនៃរដ្ឋបាលជលផល (FiA/PMU) ក្រុមការងារអនុវត្ត​គម្រោងថ្នាក់ខេត្ត នៃតំបន់ឆ្នេរទាំង៤ (PPIU) និងទីប្រឹក្សាបច្ចេក​ទេស​គម្រោង។

នាឱកាសនោះ លោកហាស់ សារ៉េត បានវាយតម្លៃខ្ពស់ចំពោះ​លទ្ធផលការងារ ដែលគម្រោងសម្រេចបាន និងបានផ្តល់អនុសាសន៍​ណែនាំក្រុមការងារអនុវត្តគម្រោង បង្កើនការយកចិត្តទុកដាក់​លើការ​ពង្រឹងសមត្ថភាព និងសកម្មភាពសេដ្ឋកិច្ចរបស់សហគមន៍នេសាទ ពន្លឿនការងារកសាងហេដ្ឋារចនាសម្ព័ន្ធគាំទ្រ ដល់វិស័យជលផលសមុទ្រ និងការធ្វើបច្ចុប្បន្នភាពព្រៃកោងកាង ព្រមទាំងជំរុញការលើក​កម្ពស់ខ្សែច្រវាក់តម្លៃ និងទីផ្សារផល ផលិតផលជលផលសមុទ្រ ដោយ​​បង្កើនកិច្ចសហការ យ៉ាងជិតស្និតជាមួយក្រសួង ស្ថាប័ន​ពាក់​ព័ន្ធ ដៃគូអភិវឌ្ឍ និងវិស័យឯកជន សំដៅបន្តធានានិរន្តរភាព​ធនធាន​ជលផល និងរួមចំណែកកាន់តែប្រសើរក្នុងការអភិវឌ្ឍ​សេដ្ឋកិច្ច​ជាតិ៕

ដោយៈ ចំណាន

    កណ្តាលៈ មូលនិធិសម្រាប់កិច្ចសហប្រតិបត្តិការ អភិវឌ្ឍន៍សេដ្ឋកិច្ច របស់ធនាគារអាហរ័ណ-នីហរ័ណនៃសាធារណរដ្ឋកូរ៉េ បានគាំទ្រគម្រោងអភិវឌ្ឍន៍ប្រព័ន្ធប្រព្រឹត្តកម្ម ទឹកកខ្វក់នៅក្នុងក្រុងតាខ្មៅ ខេត្តកណ្តាល។

ព័ត៌មាននេះត្រូវបានបង្ហើបឲ្យដឹង នៅពេលោករស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ នៅក្នុងក្រុងតាខ្មៅ បានអញ្ជើញដឹកនាំក្រុមការងារអនុវត្តគម្រោង ចុះពិនិត្យការងារនៅក្នុងក្រុងតាខ្មៅ ខេត្តកណ្តាល។

គោលបំណងនៃដំណើរបេសកកម្មនេះគឺ ដើម្បីចុះពិនិត្យវឌ្ឍនភាពការងារនៅតាមការដ្ឋាន និងប្រជុំពិភាក្សាអំពីវឌ្ឍនភាពការងារប្រចាំខែធ្នូ ឆ្នាំ២០២៥ នៃគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅក្នុងក្រុងតាខ្មៅ ខេត្តកណ្តាល ក្រោមហិរញ្ញប្បទាន ដោយមូលនិធិសម្រាប់កិច្ចសហប្រតិបត្តិការអភិវឌ្ឍន៍សេដ្ឋកិច្ច របស់ធនាគារអាហរ័​ណ-នីហរ័ណនៃសាធារណរដ្ឋកូរ៉េ។

ក្នុងដំណើរបំពេញបេសកកម្មនេះ ក៏មានការអញ្ជើញចូលរួមពីលោកអនុរដ្ឋលេខាធិការ ប្រធានគ្រប់គ្រងគម្រោង សមាជិក-សមាជិកាគម្រោង តំណាងមន្ទីរសាធារណការ និងដឹកជញ្ជូនខេត្តកណ្តាល តំណាង EDCF ក្រុមការងារទីប្រឹក្សាគម្រោង Consultant Dohwa-Seoyoung Joint Venture ក្រុមការងារក្រុមហ៊ុនសាងសង់ Joint Venture of KUMHO-TECHCROSS និងមានការចូលរួមពីភាគីពាក់ព័ន្ធមួយចំនួនផងដែរ៕

ដោយៈ គង់ សូរិយា

    ភ្នំពេញៈ សមិទ្ឋិផលជាប្រវត្តិសាស្រ្ត និងត្រចេះត្រចង់ គឺអាកាស​យានដ្ឋានអន្តរជាតិតេជោ លំដាប់ពិភពលោកបានដាក់ដំណើរការនៅឆ្នាំ២០២៥ និងសមិទ្ឋផលមួយទៀត ដែលត្រៀមអភិវឌ្ឍគឺច្រកទ្វារទឹកប្រវត្តិសាស្ត្រ ហ្វូណនតេជោ ជាអ្វីដែលជាមោទនភាពកម្ពុជា។

ប៉ុន្តែក្តីសុបិនកម្ពុជាមិនបញ្ចប់ត្រឹមនេះទេ រាជរដ្ឋាភិបាលបាននិងកំពុងអនុញ្ញាត្តឲ្យក្រុមហ៊ុនជាច្រើនសិក្សា លើការសាងសង់ផ្លូវរថភ្លើងល្បឿនលឿនភ្នំពេញ សៀមរាប សៀមរាប ប៉ោយប៉ែត និងភ្នំពេញ ភ្ជាប់ជាមួយប្រទេសឡាវ ជាសមិទ្ឋិផលដ៏ធំមួយទៀត ដែលរំពឹងនឹងចាប់ផ្តើមនៅឆ្នាំ២០២៨ខាងមុខ។

ចូរយើងចាប់ផ្តើម “ការបំផ្លិចបំផ្លាញប្រកបដោយភាពច្នៃប្រឌិត” ដើម្បីបង្កើតផ្លូវដែកកម្ពុជាឡើងវិញ សម្រាប់ប្រទេសកម្ពុជាថ្មីនៅសតវត្សរ៍ទី២១ ដើម្បីឱ្យសមនឹងចក្ខុវិស័យឆ្នាំ២០៥០ ដែលព្រះរាជាណាចក្រមានគោលបំណងក្លាយជាសេដ្ឋកិច្ច ដែលមានប្រាក់ចំណូលខ្ពស់នៅឆ្នាំ២០៥០។

ចូរយើងរចនាក្រុមហ៊ុនរួមគ្នាមួយ ដែលមានការត្រួតពិនិត្យយ៉ាងរឹងមាំពីរដ្ឋាភិបាល និងអំណាចគ្រប់គ្រង ព្រមទាំងភាពជាម្ចាស់កម្មសិទ្ធិច្បាស់លាស់លើទ្រព្យសម្បត្តិរដ្ឋ។

ចូរយើងមានសហគ្រាសរដ្ឋមួយដើម្បីកាន់កាប់ “ចំណែកមាស” ជាមួយនឹងអំណាចវេតូ នៅក្នុងក្រុមហ៊ុនរួមគ្នា ដែលគួរតែមានក្រុមហ៊ុនយុទ្ធសាស្ត្រ ដែលមានកេរ្តិ៍ឈ្មោះល្អលើឆាកអន្តរជាតិ និងសមត្ថភាពបច្ចេកទេស។

អាជ្ញាធរបទប្បញ្ញត្តិផ្លូវដែក ក៏ត្រូវការស្ថាប័នដ៏រឹងមាំ ឬកម្រិតខ្ពស់ជាងនេះ ដែលមានសមត្ថភាពដោះស្រាយដំណើរការរចនា និងអភិវឌ្ឍន៍នៃគម្រោងផ្លូវដែកប្រវត្តិសាស្ត្រថ្មីនេះ។

អាជ្ញាធរកាន់តែរឹងមាំត្រូវបានទាមទារ ដើម្បីដោះស្រាយការសម្របសម្រួលអន្តរក្រសួង សម្រាប់គម្រោងស្មុគស្មាញបែបនេះ ទាំងផ្នែកវិស្វកម្ម និងការរចនាហិរញ្ញវត្ថុ។

ទាំងអាជ្ញាធររដ្ឋ ឬសហគ្រាសរដ្ឋគួរ តែមានសមត្ថភាពរចនាស្ថាប័នមួយដែលមានកម្លាំងពលកម្មកម្ពុជាពេញលេញ ចាប់ពីអ្នកបច្ចេកទេ​ស រហូតដល់វិស្វករ រហូតដល់ការគ្រប់គ្រង ដែលអាចដំណើរការផ្លូវដែកកម្ពុជាដែលមានស្តង់ដារអន្តរជាតិ ជាមួយនឹងពេលវេលាសមស្របសម្រាប់ប្រាក់ចំណូលសម្រាប់រដ្ឋ ឧទាហរណ៍10 ឬ20 ឆ្នាំបន្ទាប់ពីប្រតិបត្តិការ៕

(ភ្នំពេញ)៖ តាមរយៈសេចក្តីប្រកាសលទ្ធផលនៃកិច្ចប្រជុំចិន-កម្ពុជា-ថៃ នៅថ្ងៃទី២៩ ខែធ្នូ ឆ្នាំ២០២៥ មហាយកស្សចិន បានត្រៀមរួចជាស្រេចដើម្បីផ្ដល់ជំនួយមនុស្សធម៌ជាបន្ទាន់ សម្រាប់តម្រូវការជីវភាពនៃជនភៀសសឹក នៅក្នុងតំបន់ព្រំដែនដែលរងផលប៉ះពាល់។

នៅក្នុងចំណុចទី១ នៃលទ្ធផលកិច្ចប្រជុំ បានលើកឡើងពីអាទិភាពបន្ទាន់បំផុត គឺពង្រឹងបទឈប់បាញ់ ហើយធានាការអនុវត្តពេញលេញ និងប្រកបដោយប្រសិទ្ធភាព នៃសេចក្តីថ្លែងការណ៍រួម។ ចិនគាំទ្រការប្តេជ្ញារបស់កម្ពុជានិងថៃក្នុងគោលដៅនេះ តាមរយៈកិច្ចប្រឹងប្រែងរួម ជាមួយទស្សនៈដើម្បីធានាថា វាមានលក្ខណៈគ្រប់ជ្រុងជ្រោយនិងយូរអង្វែង ហើយផ្តល់នូវមូលដ្ឋានការកសាងសន្តិភាពឡើងវិញ។

ពាក់ព័ន្ធនឹងបញ្ហានេះ ភាគីទាំង៣គាំទ្រគណៈកម្មការចម្រុះខណ្ឌសីមាព្រំដែនគោក (JBC) អនុលោមតាមសេចក្ដីថ្លែងការណ៍រួមនៃកិច្ចប្រជុំពិសេស GBC លើកទី៣ កាលពីថ្ងៃទី២៧ ខែធ្នូ ឆ្នាំ២០២៥។ ចិនត្រៀមរួចជាស្រេច ដើម្បីផ្ដល់រាល់ការគាំទ្រចាំបាច់នានាដល់កម្ពុជា និងថៃ នៅក្នុងការជំរុញការបោសសម្អាតមីនមនុស្សធម៌ តាមរយៈក្រុមការងារសម្របសម្រួលចម្រុះ និងកិច្ចព្រមព្រៀងទ្វេភាគី ព្រមទាំងផ្ដល់ជំនួយសំខាន់ៗសម្រាប់ក្រុម អ្នកសង្កេតការណ៍អាស៊ាន AOT ដើម្បីធានានូវការដំណើរការប្រកបដោយប្រសិទ្ធភាព។ យោធាចិននឹងរក្សាការទំនាក់ទំនងជាមួយយោធាកម្ពុជា និងថៃដើម្បីផ្ដល់ការគាំទ្រសម្រាប់ការពង្រឹងបទឈប់បាញ់ នៅពេលចាំបាច់ និងនៅពេលមានសំណើពីភាគីទាំង២កម្ពុជា និងថៃ។

សេចក្តីប្រកាសរួមនៃកិច្ចប្រជុំត្រីភាគី បានឱ្យដឹងទៀតថា «ជំហានគន្លឹះបន្ទាប់ នោះគឺដើម្បីធ្វើការឆ្ពោះទៅរកការផ្ដើមការផ្តោះប្ដូរគ្នាជាប្រក្រតី។ ចិនស្វាគមន៍កិច្ចប្រឹងប្រែងរបស់កម្ពុជា និងថៃ ក្នុងការព្យាយាមចាប់ផ្ដើមឡើងវិញនូវការផ្ដោះប្ដូរគ្នា និងការទំនាក់ទំនងគ្នាលើគ្រប់វិស័យ និងគ្រប់កម្រិត ជាមួយទស្សនៈដើម្បីស្ដារការផ្ដោះប្ដូរ និងកិច្ចសហប្រតិបត្តិការ ក៏ដូចជាស្ដារជីវភាពរស់នៅរបស់ជនភៀសសឹកនៅតាមបណ្ដោយព្រំដែនស្របទៅតាមសេចក្ដីថ្លែងការណ៍រួមនៃកិច្ចប្រជុំ GBC លើកទី៣ កាលពីថ្ងៃទី២៧​​ ខែធ្នូ ឆ្នាំ២០២៥។ ចិនត្រៀមរួចជាស្រេចដើម្បីផ្ដល់ជំនួយមនុស្សធម៌ជាបន្ទាន់សម្រាប់តម្រូវការជីវិតភាពនៃជនភៀសសឹកនៅក្នុងតំបន់ព្រំដែនដែលរងផលប៉ះពាល់»។

សូមបញ្ជាក់ថា នាថ្ងៃទី២៨ និងទី២៩ ខែធ្នូ ឆ្នាំ២០២៥នេះ រដ្ឋមន្រ្តីការបរទេស និងមន្រ្តីយោធាជាន់ខ្ពស់ចិន កម្ពុជា និងថៃ បានបើកកិច្ចប្រជុំមួយ នៅខេត្តយូណាន ប្រទេសចិន។ កិច្ចប្រជុំនេះ ធ្វើឡើងខណៈដែលកម្ពុជា-ថៃ បានឯកភាពគ្នាលើបទឈប់បាញ់ជាបន្ទាន់ ដោយអនុវត្តចាប់ពីម៉ោង ១២៖០០ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥តទៅ។ ជាមួយនឹងបទឈប់បាញ់នេះ ភាគីទាំងពីរនឹងរក្សាការឈរជើងនៅទីតាំងដែលខ្លួនឈរជើងនាបច្ចុប្បន្ន និងអត់ធ្មត់រយៈពេល ៧២ម៉ោង ខណៈដែលភាគីថៃ សន្យាថានឹងដោះលែងយោធិនទាំង១៨នាក់ ដែលថៃចាប់ខ្លួនផងដែរ។

នៅក្នុងកិច្ចប្រជុំត្រីភាគី ចិនស្វាគមន៍សេចក្តីថ្លែងការណ៍រួម នៃកិច្ចប្រជុំពិសេសលើកទី៣ គណៈកម្មការព្រំដែនទូទៅ (GBC) ដែលត្រូវបានចុះហត្ថលេខារវាងកម្ពុជានិងថៃ កាលពីថ្ងៃទី២៧ ខែធ្នូ ឆ្នាំ២០២៥។

ភាគីទាំងបី​ បានសង្កត់ធ្ងន់ថា សេចក្តីថ្លែងការណ៍រួមនោះ បម្រើដល់ផលប្រយោជន៍មូលដ្ឋាននិងរយៈពេលវែង នៃប្រជាជនរបស់ប្រទេសទាំងពីរ ហើយបញ្ជូនសញ្ញាវិជ្ជមាន និងផ្តល់លក្ខណៈអំណោយផល សម្រាប់សន្តិភាពនិងស្ថិរភាពក្នុងតំបន់។ វាបង្ហាញយ៉ាងពេញលេញថា កិច្ចសន្ទនានិងការប្រឹក្សាយោបល់ គឺជាមធ្យោបាយជាក់ស្តែង និងមានប្រសិទ្ធភាព ដើម្បីដោះស្រាយ​បញ្ហាជម្លោះដែលស្មុគស្មាញ។

ភាគីទាំងបី បានធ្វើការផ្លាស់ប្តូរយោបល់គ្នាស៉ីជម្រៅ អំពីការពង្រឹងបទឈប់បាញ់ និងការធ្វើការពីមួយជំហានទៅមួយជំហាន តាមរយៈកិច្ចប្រឹងប្រែងរួម ដើម្បីបន្តការធ្វើទំនាក់ទំនងប្រក្រតីឡើងវិញ, កសាងការជឿទុកចិត្តទៅវិញទៅមកផ្នែកនយោបាយ, ធ្វើឱ្យទំនាក់ទំនងទ្វេភាគីកម្ពុជា-ថៃប្រសើរឡើង និងរក្សាការពារស្ថិរភាពក្នុងតំបន់ផងដែរ៕