ដោយៈ ចំណាន

   ភ្នំពេញៈ មន្រ្តីជាន់ខ្ពស់ក្រសួងសាធារណការ បានជួបពិភាក្សាការងារជាមួយក្រុមការងារ ស្ថានទូតព្រើនថេនប្រចាំនៅកម្ពុជា ពាក់ព័ន្ធនឹងការធ្វើអាទិភាវូបនីយកម្ម លើគម្រោងហេដ្ឋារចនាសម្ព័ន្ធនៅកម្ពុជា។

ជំនួបនេះដឹកនាំដោយលោកឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំក្រុមការងារនៃអគ្គនាយកដ្ឋានភស្តុភារកម្ម ទទួលជួបពិភាក្សាការងារ ជាមួយក្រុមការងារស្ថានទូតព្រើនថេនប្រចាំនៅកម្ពុជា ដែលមានតំណាងពីក្រុមហ៊ុនARUP និងTBI ដែលដឹកនាំដោយ លោក Andy Hodgson, Global Advisory Leader (ARUP) និង លោកស្រី Kathleen Kho, Director – Asia Pacific​ (TBI)។

ជំនួបពិភាក្សានេះរៀបចំឡើងក្នុងគោលបំណង សិក្សាស្វែងយល់ពី (១) ផែនការយុទ្ធសាស្ត្រ ផែនការអភិវឌ្ឍន៍វិស័យដឹកជញ្ជូន និងភស្តុភារកម្ម (២) ការធ្វើអាទិភាវូបនីយកម្ម លើគម្រោងហេដ្ឋារចនាសម្ព័ន្ធ (៣) ការពិនិត្យលទ្ធភាពក្នុងគាំទ្រ និងការអភិវឌ្ឍន៍គម្រោងអាទិភាព និង(៤) ផ្សេងៗ៕

ដោយ: សហសេវិក
អន្តរជាតិ: ការរីកចម្រើននៃវិស័យបញ្ញាសិប្បនិម្មិត (AI) កំពុងជំរុញឱ្យក្រុមហ៊ុនបច្ចេកវិទ្យាបង្កើនចំនួនបុគ្គលិកយ៉ាងឆាប់រហ័ស ហើយការណ៍នេះកំពុងឃះឥទ្ធិពលយ៉ាងខ្លាំងទៅលើទីផ្សារការិយាល័យ។

យោងតាមរបាយការណ៍ថ្មីមួយរបស់ក្រុមហ៊ុន CBRE បានឱ្យដឹងថា ទីក្រុងញូវយ៉កមានកម្លាំងពលកម្មបច្ចេកវិទ្យាច្រើនជាងគេនៅសហរដ្ឋអាមេរិក ដោយមានបុគ្គលិកធ្វើការនៅតាមក្រុមហ៊ុនបច្ចេកវិទ្យាប្រហែល៣៩៤.៣០០នាក់។

តួលេខនេះមានកម្រិតខ្ពស់ជាងបន្តិចបើធៀបនឹងតំបន់សាន់ហ្វ្រាន់ស៊ីស្កូ ដែលមានចំនួន៣៧៥.៧៣០នាក់។ នេះជាលើកដំបូងដែលទីក្រុងញូវយ៉កជាប់ចំណាត់ថ្នាក់លេខមួយនៅក្នុងការវិភាគរយៈពេល១៣ឆ្នាំរបស់ក្រុមហ៊ុន CBRE។

ការ​ផ្លាស់​ប្តូរ​នេះ​មួយ​ផ្នែក​បណ្តាលមកពី​កម្លាំង​ពលកម្ម​បច្ចេកវិទ្យា​របស់​ទីក្រុង​សាន់ហ្វ្រាន់ស៊ីស្កូ​បាន​ធ្លាក់​ចុះ ខណៈ​ដែល​ក្រុមហ៊ុនបច្ចេកវិទ្យានៅ​ទីក្រុង​ញូវយ៉បុគ្គលិកធ្វើការក្នុងវិស័យបញ្ញា​សិប្បនិម្មិត​ (AI) បន្ថែម​ទៀត។

ការងារ​ពាក់ព័ន្ធ​នឹង​បច្ចេកវិទ្យា AI កំពុង​កើនឡើង​យ៉ាង​ឆាប់រហ័ស។ ការងារ​ពាក់ព័ន្ធ​នឹង​បច្ចេកវិទ្យា AI នៅ​សហរដ្ឋអាមេរិក និង​កាណាដា​បាន​ហក់ឡើង៤៥% ក្នុង​រយៈពេល​មួយឆ្នាំ​កន្លងមក ដោយ​ចំនួនបុគ្គលិកបានកើនដល់ ៧៥១.០០០ នាក់​គិត​ត្រឹម​ខែមិថុនា។

ការរីកចម្រើន​នៃ​បញ្ញា​សិប្បនិម្មិត (AI) ក៏​កំពុង​ជំរុញ​តម្រូវការ​ការិយាល័យ​ផងដែរ។ នៅ​ទីក្រុង​សាន់ហ្វ្រាន់ស៊ីស្កូ ក្រុមហ៊ុន​បញ្ញា​សិប្បនិម្មិត (AI) មាន​ចំណែក៥៨% នៃ​ការ​ជួល​ការិយាល័យ​ក្នុង​ឆមាស​ទីមួយ​នៃ​ឆ្នាំ​នេះ។

ក្រុមហ៊ុន AI មានទំនោរពេញចិត្តនឹងការបំពេញការងារដោយផ្ទាល់ ជាពិសេសដោយសារកិច្ចសហការ និងនវានុវត្តន៍មានសារៈសំខាន់ចំពោះការអភិវឌ្ឍ AI។ នេះកំពុងជួយទីផ្សារការិយាល័យរបស់ទីក្រុងសាន់ហ្វ្រាន់ស៊ីស្កូឱ្យងើបឡើងវិញ៕

ដោយៈ ចំណាន

ស្ទឹងត្រែងៈ លោកប៉ាល់ ចន្ទតារា រដ្ឋលេខាធិការ ក្រសួងសាធា​រណការនិងដឹកជញ្ជូន និងជានាយកគម្រោង បានដឹកនាំក្រុមការងារជំនាញចុះពិនិត្យស្ថានភាពជាក់ស្តែង នៃកំណាត់ផ្លូវជាតិលេខ៧ ប្រវែង ៩៦,៦៣គម ចាប់ពីអូរគ្រៀង ខេត្តក្រចេះ រហូតដល់ត្រពាំងក្រៀល ខេត្តស្ទឹងត្រែង។

បេសកកម្មនេះមានការចូលរួមពីថ្នាក់ដឹកនាំ មន្រ្តីបច្ចេកទេស វិស្វករក្រុមហ៊ុនទីប្រឹក្សាគម្រោង និងមន្ទីរសាធារណការនិងដឹកជញ្ជូនខេត្តក្រចេះ និងខេត្តស្ទឹងត្រែង។

ការចុះពិនិត្យនេះ ធ្វើឡើងក្នុងគោលបំណងសិក្សា និងវាយតម្លៃស្ថានភាពផ្លូវជាក់ស្តែង ប្រមូលទិន្នន័យបច្ចេកទេស និងពិភាក្សាជាមួយអាជ្ញាធរ និងស្ថាប័នពាក់ព័ន្ធ ដើម្បីប្រមូលធាតុចូលបន្ថែមសម្រាប់ការសិក្សា និងអនុវត្តន៍គម្រោងធ្វើឱ្យប្រសើរឡើងវិញ នូវកំណាត់ផ្លូវជាតិលេខ៧ ក្រោមក្របខណ្ឌហិរញ្ញប្បទានឥតសំណង ពីរដ្ឋាភិបាលនៃសាធារណរដ្ឋប្រជាមានិតចិន។

កំណាត់ផ្លូវនៃគម្រោងនេះ មានចំណុចចាប់ផ្តើមពី ឃុំអូរគ្រៀង ខេត្តក្រចេះ ត្រង់គ.ម៤២៤+៦៩០ តភ្ជាប់ទៅច្រកព្រំដែនអន្តរជាតិកម្ពុជា–ឡាវ ត្រពាំងក្រៀល–ណងណុកឃៀន ដោយមានប្រវែងសរុបប្រមាណ៩៦,៦៣គីឡូម៉ែត្រ ដែលជាខ្សែផ្លូវយុទ្ធសាស្ត្រដ៏សំខាន់សម្រាប់ការធ្វើដំណើរ និងដឹកជញ្ជូនទំនិញ ជំរុញកំណើនសេដ្ឋកិច្ច តភ្ជាប់រាជធានីភ្នំពេញ ទៅនឹងភូមិភាគឦសាន្ដនៃប្រទេស៕

ដោយៈ ចំណាន

   ភ្នំពេញៈ លោកប្រាក់ សុណ្ណារ៉ា រដ្ឋលេខាធិការនិងជាតំណាង លោកជំទាវបណ្ឌិតសភាចារ្យរដ្ឋមន្ត្រី ក្រសួងវប្បធម៌ និងវិចិត្រសិល្បៈ អញ្ជើញបើកសិក្ខាសាលាណែនាំស្ដីពី “ការរៀបចំសៀវភៅណែនាំគ្រូបង្រៀនទាក់ទងនឹងប្រវត្តិសាស្ត្រខ្មែរក្រហម សម្រាប់មធ្យមសិក្សាចំណេះទូទៅ”។

កិច្ចប្រជុំនេះ មានការចូលរួមពីគ្រូបង្រៀនប្រវត្តិសាស្ត្រ មកពីបណ្ដារាជធានីខេត្ត និងតំណាងក្រសួងស្ថាប័ន​ពាក់ព័ន្ធ លើការអប់រំប្រវត្តិសាស្ត្រខ្មែរក្រហម និងមន្ទីរស-២១ សរុបចំនួន៤១​នាក់។
គម្រោងនេះ សហការអនុវត្តដោយក្រសួងវប្បធម៌ និងវិចិត្រសិល្បៈ ក្រសួងអប់រ យុវជន និងកីឡា និងអង្គការយូណេស្កូភ្នំពេញ ព្រមទាំងមានការគាំទ្រពីសារមន្ទីរ US Holocaust Memorial Museum។

សិក្ខាសាលាណែនាំ ស្ដីពី “ការរៀបចំសៀវភៅណែនាំគ្រូបង្រៀនទាក់ទងនឹងប្រវត្តិសាស្ត្រខ្មែរក្រហម សម្រាប់មធ្យមសិក្សាចំណេះទូទៅ” រៀបចំឡើងក្នុងបំណងប្រមូលធាតុចូល និងបទពិសោធន៍របស់លោកគ្រូ-អ្នកគ្រូបង្រៀនប្រវត្តិសាស្ត្រ លើកកម្ពស់សមត្ថភាព និង ទំនុកចិត្តដល់គ្រូបង្គោល ព្រមទាំងផ្ដល់វិធីសាស្ត្របែបសកម្ម ដើម្បីប្រើប្រាស់ក្នុងការបង្រៀន ឲ្យមានភាពទាក់ទាញចំណាប់អារម្មណ៍ និងផុសផុល។ ជាងនេះទៅទៀត គឺការបញ្ចូលការអប់រំសន្តិភាព និងភាពជាពលរដ្ឋសាកល៕

ដោយៈ ចំណាន

   ក្រចេះ,សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជាបានបញ្ជាក់ថា ក្រោមកម្មវិធីពិសេស សម្រាប់ការវិនិយោគនៅខេត្តភាគឦសាន ពេលនេះទទួលបានគម្រោងចំនួន៧២គម្រោង ដោយមានទុនវិនិយោគ សរុបជិត៣ពាន់លានដុល្លារ ក្នុងនោះខេត្តក្រចេះទទួលបានរហូត១៩គម្រោង។

សម្តេចបានបញ្ជាក់បែបនេះ ធ្វើឡើងក្នុងឱកាសដែល សម្តេចអញ្ជើញសម្ពោធដាក់ឱ្យប្រើប្រាស់ជាផ្លូវការ ផ្លូវចំនួន៣ខ្សែប្រវែងសរុបជិត១០០គីឡូម៉ែត្រ តម្លៃជិត៤៤លានដុល្លារ ស្ថិតក្នុងភូមិសាស្ត្រខេត្តត្បូងឃ្មុំ និងខេត្តក្រចេះ នាព្រឹកថ្ងៃអង្គារ ទី២៥ ខែសីហា ឆ្នាំ២០២៦។

សម្តេចមហាបវរធិបតី បានបញ្ជាក់ថា “គឹតត្រឹមថ្ងៃទី០៧ ខែសីហា កន្លងទៅនេះ គម្រោងវិនិយោគសរុប មានចំនួន៧២គម្រោង ក្នុងនោះ គម្រោងចំនួន៥៧ ត្រូវបានពិនិត្យ និងបន្ដនីតិវិធី ដែលមានទុនសរុបនៅក្នុងគម្រោងទាំងនោះ ២,៧០០លានដុល្លារ”។

បន្ថែមពីនោះទៀត សម្តេចមហាបវរធិបតី ហ៊ុន ម៉ាណែត បានគូសបញ្ជាក់ថា គម្រោងស្នើសុំទាំង៧២គម្រោងនេះ អាចបង្កើតឱកាសការងារ ជូនប្រជាពលរដ្ឋជិត៨ម៉ឺនកន្លែង។

ដោយឡែក សម្រាប់ខេត្ដក្រចេះ មានចំនួន១៩គម្រោង ក្នុងនោះ គម្រោងចំនួន១៤ ត្រូវបានពិនិត្យ និងបន្ដនីតិវិធី សរុបទុន១,១០០លានដុល្លារ ដែលគ្រោងប្រើប្រាស់កម្មករ ជាង២,៦០០នាក់ ពេលគម្រោងទាំងនោះ ដាក់ឲ្យដំណើរការ។ នេះជាការបញ្ជាក់បន្ថែម របស់សម្តេចមហាបវរធិបតី ហ៊ុន ម៉ាណែត។

សម្តេចមហាបវរធិបតី ហ៊ុន ម៉ាណែត ក៏បានឲ្យដឹងផងដែរថា ទៅថ្ងៃមុខនឹងមានផែពហុបំណង នៅក្នុងខេត្តក្រចេះ ដើម្បីបម្រើការដឹកជញ្ជូនតាមផ្លូវទឹក។ ផែពហុបំណងនេះ ស្ថិតនៅក្នុងស្រុកប្រែកប្រសព្វ។

រាជរដ្ឋាភិបាលកម្ពុជា បានដាក់ចេញនូវ  “កម្មវិធីពិសេសជំរុញការវិនិយោគក្នុងខេត្តទាំងបួន នៅភូមិភាគឦសាន ឆ្នាំ២០២៥-២០២៥”  ដែលត្រូវបានប្រកាសដាក់ឱ្យអនុវត្តជាផ្លូវការ នៅថ្ងៃទី៩ ខែមេសា ឆ្នាំ២០២៥ ដោយសម្ដេចមហាបវរធិបតី ហ៊ុន ម៉ាណែត។

កម្មវិធីនេះ មានគោលបំណងប្រែក្លាយភូមិភាគឦសាន រួមមានខេត្ត ក្រចេះ ស្ទឹងត្រែង រតនគិរី និងមណ្ឌលគិរី ទៅជាប៉ូលសេដ្ឋកិច្ចថ្មីដ៏មានសក្តានុពល។ កម្មវិធីពិសេសនេះ ត្រូវបានរៀបចំឡើងដោយឈរលើទស្សនទានចំនួនបីសំខាន់ៗ ទី១ កែប្រែមុខមាត់ខេត្តទាំងបួនឱ្យក្លាយជាខេត្ត ដែលមានមូលដ្ឋានសេដ្ឋកិច្ចពឹងផ្អែកលើ កសិកម្ម កសិ-ឧស្សាហកម្ម និងទេសចរណ៍។

ទី២ ដោះស្រាយបញ្ហាប្រឈមជាក់ស្ដែង ដែលនាំមកនូវលទ្ធផលរហ័ស ជាពិសេសកត្តាជំរុញការទាក់ទាញវិនិយោគឯកជន។ ទី៣ ជំរុញសហថាមពលដែលកើតចេញពីការប្រមូលផ្តុំ (Clustering Effects) ដើម្បីឈានទៅអភិវឌ្ឍសេដ្ឋកិច្ចមាត្រដ្ឋាន (Economies of Scale)។

ដើម្បីលើកទឹកចិត្តដល់ការវិនិយោគ រាជរដ្ឋាភិបាល ផ្ដល់ការគាំទ្រតាមរយៈវិធានការសំខាន់ៗចំនួនបីប្រភេទ រួមមាន៖ វិធានការផ្នែកពន្ធដារ និងពន្ធគយ ការផ្ដល់ហិរញ្ញប្បទាន ក្រោមអត្រាការប្រាក់សមរម្យ និងការជួយកាត់បន្ថយថ្លៃដើមផលិតកម្ម ការសម្រួលនីតិវិធី និងការគាំទ្រសកម្មភាពវិនិយោគឯកជន៕