តម្លៃហាងឆេងមាសបានងើបឡើងថ្លៃនៅថ្ងៃអង្គារនេះ

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃអង្គារនេះ ខណៈធនាគារកណ្តាលរបស់ប្រទេសចិន(PBOC)បានទិញមាសដើម្បីចាក់បញ្ចូលទុនបម្រុងកាលពីខែវិច្ឆិកា បន្ទាប់ពីផ្អាកអស់រយៈពេល៦ខែ គួបផ្សំនឹងការកើនឡើងនៃភាពតានតឹងនយោបាយនៅក្នុងប្រទេសសុីរី។

តួយ៉ាង តម្លៃមាស Spot Gold បានងើបឡើង០,៣៧ភាគរយដល់២៦៦៨,៦៩ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១៦ភាគរយដល់២.៦៩០ដុល្លារក្នុងមួយអោន គិតត្រឹមម៉ោង១០:៣៥នាទីព្រឹក។

គិតត្រឹមពេលបិទការជួញដូរកាលពីថ្ងៃច័ន្ទម្សិលមិញ តម្លៃមាស Spot Gold បានបិទនៅត្រឹម២៦៥៨,៧៨ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៦៨៥,៨០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨៥,៨ភាគរយ ដែលធនាគារកណ្តាលអាមេរិក(Fed) អាចទម្លាក់អត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំនៅថ្ងៃទី១៨ ខែធ្នូនេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៦,១៩ពិន្ទុនៅព្រឹកថ្ងៃអង្គារនេះ បន្ទាប់ពីបានបិទការជួញដូរក្នុងរង្វង់១០៦,១៤ពិន្ទុកាលពីថ្ងៃច័ន្ទម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ០,១៩%ដល់៣២,៥៥ដុល្លារ ក្នុងមួយអោន ខណៈតម្លៃផ្លាទីនបានធ្លាក់ចុះ១%ដល់៩៤៤,៥ដុល្លារក្នុងមួយអោន ហើយតម្លៃ palladium បានធ្លាក់ចុះ១%ដល់៩៨៦,៥ដុល្លារក្នុងមួយអោនគិតត្រឹមម៉ោង១០:៣៧នាទីព្រឹក៕

អ្នកជំនាញបង្ហើបពីដីធ្លីដែលអាចនឹងមានតម្រូវការខ្ពស់នៅឆ្នាំ២០២៥

ដោយ៖ គង់ សូរិយា

ភ្នំពេញ៖ អ្នកជំនាញ និងអ្នកវិភាគអចលនទ្រព្យបានបង្ហាញសុទិដ្ឋិនិយមលើទីផ្សារដីធ្លីពីរបែប ដែលនឹងអាចមានតម្រូវការខ្ពស់នៅឆ្នាំ២០២៥ខាងមុខ។

អគ្គនាយកក្រុមហ៊ុនAdvance Realty លោកប៉ូ អ៊ាវគង់បានមានប្រសាសន៍ឲ្យដឹង តាមបណ្តាញតេឡេក្រាមកាលពីថ្ងៃទី៩ ធ្នូថា យើងសង្កេតឃើញមានចលនាទិញ លក់ដី និងកាសាងសង់តំបន់ឧស្សាហកម្មមួយចំនួនបានកើនឡើង នៅតាមចំណុចផ្លូវសំខាន់ៗ។ លើសពីនេះ យើងសង្កេតឃើញមានការសាងសង់កាស៊ីណូច្រើន នៅតាមតតំបន់ជាប់ព្រំដែនមួយចំនួន ដូចជា ទីក្រុងបាវិត ប៉ោយប៉ែត ជ្រៃធំ តំបន់រលាំងជ្រៃ ក្នុងខេត្តព្រៃវែង តំបន់ព្រំដែនម៉ឺនជ័យ តំបន់ដាក់ដាំ ក្នុងខេត្តមណ្ឌលគិរីជាដើម ដែលធ្វើឲ្យទីផ្សារដីធ្លីនៅតំបន់នោះមានតម្រូវការកើនឡើង។

លោកបន្តថា “ទោះបីមានចលនាទិញ លក់ដី នៅតំបន់មួយចំនួនក្តី ប៉ុន្តែតម្រូវការដី និងទំហំដីនៅមានកម្រិតតូចៗនៅឡើយ ដែលវាមិនធ្វើឲ្យតម្លៃដីធ្លីកើនឡើងនោះទេ”។ លោកបន្តថា “ស្ថានភាពកកស្ទះនូវចលនាទិញ លក់មានសភាពយឺតយ៉ាវរយៈពេលបី បួនឆ្នាំកន្លងមកនេះ នឹងមិនធ្វើឲ្យទីផ្សារនេះងើបឡើងខ្ពស់នៅឡើយទេ”។

លោកប៉ូ អ៊ាវគង់បានបន្តថា អ្នកវិនិយោគតំបន់ឧស្សាហកម្ម មួយចំនួនបានងាកទៅតំបន់ជាយក្រុង ដែលគេសង្កេតឃើញនៅតាមតំបន់ជាប់ផ្លូវជាតិមួយចំនួន ដែលធ្វើឲ្យមានសកម្មភាពផុសផុលមួយចំនួនផងដែរ ប៉ុនតែវាមិនធ្វើឲ្យទីផ្សារងើបឡើងលឿន ឬកំណើនតម្លៃដីធ្លីនៅឡើយទេ ស្របពេលស្ថាប័នហិរញ្ញវត្ថុភាគច្រើន នៅបន្តរឹតបន្តឹងលើការផ្តល់ហិរញ្ញប្បទានចូលក្នុងវិស័យនេះ៕

រដ្ឋបាលក្រុងតូក្យូពិចារណាបង្កើតមូលនិធិដើម្បីសាងសង់លំនៅដ្ឋានតម្លៃសមរម្យ ខណៈតម្លៃខុនដូកំពុងហក់ឡើងយ៉ាងគំហុក

ដោយ: គង់ លាងហួរ
អន្តរជាតិ: យោងតាមប្រភពពីសារព័ត៌មាន Japan Times បានឱ្យដឹងថា រដ្ឋបាលក្រុងតូក្យូរបស់ប្រទេសជប៉ុនកំពុងពិចារណាបង្កើតមូលនិធិដើម្បីគាំទ្រការសាងសង់លំនៅដ្ឋានសម្រាប់ប្រជាជនវណ្ណៈកណ្តាល ខណៈតម្លៃខុនដូនៅចំកណ្តាលទីក្រុងតូក្យូកំពុងកើនឡើងយ៉ាងលឿន។

ប្រភពដដែលបានឱ្យដឹងបន្តថា រដ្ឋបាលទីក្រុងតូក្យូមានបំណងរួមបញ្ចូលការចំណាយពាក់ព័ន្ធនឹងមូលនិធិនេះនៅក្នុងសំណើថវិកាដំបូងរបស់ខ្លួនសម្រាប់ឆ្នាំសារពើពន្ធ២០២៥ ដែលនឹងចាប់ផ្តើមនៅក្នុងខែមេសាខាងមុខ។

យោងតាមការស្ទង់មតិដោយវិទ្យាស្ថានស្រាវជ្រាវសេដ្ឋកិច្ចអចលនទ្រព្យបានបង្ហាញថា តម្លៃជាមធ្យមនៃខុនដូដែលទើបនឹងសាងសង់ថ្មីនៅក្នុងសង្កាត់ចំនួន២៣នៃទីក្រុងតូក្យូ បានកើនឡើងដល់ចំនួន១០០លានយ៉េនក្នុងមួយយូនីត។

មន្ត្រីរដ្ឋបាលក្រុងតូក្យូមួយរូបបានលើកឡើងថា ស្ថានភាពនេះបង្កក្តីលំបាកសម្រាប់មនុស្សជំនាន់ក្រោយក្នុងការទិញផ្ទះធំៗនៅក្នុងទីក្រុងតូក្យូ ដែលបណ្តាលឱ្យកុមារថ្នាក់មត្តេយ្យសិក្សា និងឪពុកម្តាយរបស់ពួកគេត្រូវរើទីលំនៅចេញពីទីក្រុង។

អភិបាលក្រុងតូក្យូ លោកស្រី Yuriko Koike បានប្តេជ្ញាក្នុងអំឡុងពេលធ្វើយុទ្ធនាការឃោសនាបោះឆ្នោតសម្រាប់តំណែងជាអភិបាលក្រុងកាលពីខែកក្កដា ដើម្បីពង្រឹងវិធានការដោះស្រាយបញ្ហានេះ។

បច្ចុប្បន្ន រដ្ឋបាលទីក្រុងតូក្យូកំពុងពិចារណាលើការដាក់ចេញគោលនយោបាយលំនៅដ្ឋានតម្លៃសមរម្យ ដែលមានគម្រូស្រាប់នៅសហរដ្ឋអាមេរិក និងទ្វីបអឺរ៉ុប ដើម្បីធ្វើយ៉ាងណាឱ្យប្រជាជនដែលមានប្រាក់ចំណូលមធ្យមកាន់តែងាយស្រួលទទទួលបានទីលំនៅក្នុងទីក្រុងតូក្យូ។

តាមរយៈផែនការបង្កើតមូលនិធិនេះ រដ្ឋបាលទីក្រុងតូក្យូគ្រោងនឹងផ្តល់ជំនួយផ្នែកហិរញ្ញវត្ថុដល់ក្រុមហ៊ុនឯកជនដើម្បីយកទៅអភិវឌ្ឍន៍លំនៅដ្ឋានដែលមានតម្លៃសមរម្យ។ យ៉ាងណាមិញ ទំហំទុនវិនិយោគជាក់លាក់ កាលបរិច្ឆេទនៃការចាប់ផ្តើមអនុវត្តន៍ និងព័ត៌មានលម្អិតផ្សេងទៀតមិនទាន់ត្រូវបានបង្ហើបឱ្យដឹងនៅឡើយទេ៕ប្រភព: Japan Times៕

អ្នកជំនាញអន្តរជាតិអះអាងថា ទីផ្សារខុនដូនៅកម្ពុជាមានភាពទុំជោរ ដែលទាមទារឱ្យអ្នកអភិវឌ្ឍន៍មានគំនិតច្នៃប្រឌិតថ្មី

ដោយ: គង់ លាងហួរ
ភ្នំពេញ: ទីផ្សារខុនដូនៅប្រទេសកម្ពុជាកំពុងស្ថិតក្នុងដំណាក់កាលដ៏សំខាន់មួយ ស្របពេលដែលការលក់ និងការវិនិយោគលើទីផ្សារអចលនទ្រព្យនៅកម្ពុជាបានដាំក្បាលចុះដល់កម្រិតទាបបំផុតមិនធ្លាប់មាន។

ទោះជាយ៉ាងណាក្តី ក្រុមអ្នកជំនាញអន្តរជាតិមួយចំនួនដូចជា លោកបណ្ឌិត Alexander Evengroen ស្ថាបនិក និងជានាយកប្រតិបត្តិក្រុមហ៊ុន ASEAN Realtor Inc. បានសម្លឹងឃើញពីឱកាសក្នុងកំឡុងដែលមានបញ្ហាប្រឈម។

តើនេះជាពេលវេលាដ៏ល្អឥតខ្ចោះក្នុងការទិញខុនដូនៅកម្ពុជាឬយ៉ាងណា?

លោកបណ្ឌិត Alexander Evengroen បានលើកឡើងថា ការធ្លាក់ចុះនាពេលបច្ចុប្បន្ននៃទីផ្សារខុនដូនៅកម្ពុជាពុំមែនជាសញ្ញាបង្ហាញពីការជាប់គាំងនោះទេ។ ប៉ុន្តែ ស្ថានភាពនេះទាមទារឱ្យមានការច្នៃប្រឌិតបង្កើតថ្មី(Innovation)។

ក្នុងរយៈពេល៥ឆ្នាំកន្លងមកនេះ ទីផ្សារបានឆ្អែតឆ្អន់ចំពោះការអភិវឌ្ឍន៍ ដែលមិនអាចបំពេញតាមក្តីស្រមៃរបស់បណ្តាអ្នកវិនិយោគ និងអ្នកទិញ ហើយការប្រើប្រាស់យុទ្ធសាស្រ្តដដែលៗបានធ្វើឱ្យផលចំណេញធ្លាក់ចុះ។

យោងតាមរបាយការណ៍ទីផ្សារបង្ហាញថា ការលក់ក្នុងទីផ្សារខុនដូបានដាំក្បាលចុះជាង២០ភាគរយ ក្នុងឆ្នាំ២០២៤នេះ បើប្រៀបធៀបនឹងឆ្នាំមុន។

ទោះជាយ៉ាងណាក្តី លោកបណ្ឌិត Alexander Evengroen បានគូសបញ្ជាក់ថា ការធ្លាក់ចុះយ៉ាងគំហុកនេះបង្ហាញពីឱកាសមាសសម្រាប់ការផ្លាស់ប្តូរយុទ្ធសាស្រ្ត។

លោកបណ្ឌិត Alexander Evengroen សង្កត់ធ្ងន់ថា នេះជាពេលវេលាសម្រាប់បណ្តាអ្នកអភិវឌ្ឍន៍ និងអ្នកវិនិយោគដើម្បីសម្របខ្លួន និងរិះរកគំនិតច្នៃប្រឌិតថ្មី។

លោកបណ្ឌិតបានបន្តថា“អ្នកមិនអាចបន្តធ្វើរឿងដដែលៗម្តងហើយម្តងទៀត ហើយរំពឹងថា នឹងទទួលបានលទ្ធផលល្អប្រសើរជាងមុននោះទេ។ ទីផ្សារនៅកម្ពុជាមានភាពទុំជោរ ដែលត្រូវការវិធីសាស្រ្តថ្មី ដើម្បីកំណត់ឡើងវិញនូវគុណតម្លៃសម្រាប់បណ្តាអ្នកទិញក្នុងស្រុក និងអ្នកវិនិយោគអន្តរជាតិ”។

លោកបណ្ឌិតអះអាងបន្ថែមថា ការធ្លាក់ចុះនៃតម្លៃខុនដូនាពេលបច្ចុប្បន្នបានធ្វើឱ្យទីផ្សារខុនដូនៅកម្ពុជាក្លាយជាគោលដៅដ៏ទាក់ទាញសម្រាប់បណ្តាវិនិយោគិនបរទេស ដោយលោកសង្ឃឹមថា ក្រុមហ៊ុន ASEAN Realtor Inc នឹងសម្រេចបានអត្រាកំណើននៃការលក់ខុនដូប្រមាណ៣៥ភាគរយនៅឆ្នាំក្រោយ បើប្រៀបធៀបទៅនឹងឆ្នាំ២០២៤នេះ។

លោកបណ្ឌិតជឿជាក់ថា “ទីផ្សារខុនដូនៅកម្ពុជាអាចប្រឈមមុខនឹងពេលវេលាដ៏លំបាកមួយ។ ប៉ុន្តែ ប្រសិនបើយើងមានចក្ខុវិស័យ និងដាក់ចេញយុទ្ធសាស្ត្រត្រឹមត្រូវ នោះទីផ្សារខុនដូនៅកម្ពុជាអាចក្លាយជាទីផ្សារដ៏មានសក្តានុពលមួយនៅក្នុងតំបន់អាស៊ាន”។

លោកបណ្ឌិតបានអះអាងទៀតថា “ឱកាសមានច្រើន ខណៈសក្ដានុពលមានទំហំធំធេង ហើយនេះជាពេលវេលា ដែលយើងត្រូវធ្វើសកម្មភាព។ បណ្តាអ្នកអភិវឌ្ឍន៍ត្រូវយល់ថា ទីផ្សារខុនដូនៅកម្ពុជាទាមទារឱ្យមានការផ្លាស់ប្តូរឆ្ពោះទៅរកនវានុវត្តន៍ ឬការច្នៃប្រឌិតថ្មីដ៏ពេញលក្ខណៈមួយ”៕ប្រភព: LinkedIn៕

វិភាគ: តើកម្ពុជាគួរត្រៀមខ្លួនដូចម្តេចដើម្បីរក្សាសន្ទុះសេដ្ឋកិច្ច នៅពេលលោកដូណាល់ត្រាំឡើងមកកាន់អំណាចវិញ?

ដោយ: គង់ លាងហួរ
អន្តរជាតិ: ការឡើងកាន់តំណែងជាប្រធានាធិបតីអាមេរិកជាលើកទីពីររបស់លោកដូណាល់ត្រាំបានបង្កឱ្យមានការជជែកគ្នាក្នុងចំណោមបណ្តាអ្នកវិនិយោគអំពីឥទ្ធិពលដែលអាចកើតមានលើទិដ្ឋភាពសេដ្ឋកិច្ចរបស់បណ្តាប្រទេសនៅតំបន់អាស៊ាន រួមទាំងកម្ពុជា។

សហរដ្ឋអាមេរិកក្រោមការដឹកនាំរបស់លោកត្រាំ ត្រូវបានក្រុមអ្នកវិភាគព្យាករណ៍ថា នឹងធ្វើឱ្យមានការកើនឡើងនូវលទ្ធិគាំពារនិយម និងការផ្លាស់ប្តូរគោលនយោបាយពាណិជ្ជកម្ម។

តួយ៉ាង នាពេលថ្មីៗនេះ ក្រុមហ៊ុនប្រឹក្សាយោបល់ផ្នែកអចលនទ្រព្យ CBRE បាមចេញផ្សាយរបាយការណ៍វិភាគថ្មីមួយ ដែលបង្ហាញពីហានិភ័យ និងឱកាសសម្រាប់ប្រទេសកម្ពុជា ក្នុងបរិបទមួយដែលបរិយាកាសពិភពលោកកំពុងផ្លាស់ប្តូរ។

ការវិភាគរបស់ក្រុមហ៊ុន CBRE បង្ហាញថា ការផ្លាស់ប្តូរគោលនយោបាយសេដ្ឋកិច្ចរបស់សហរដ្ឋអាមេរិកអាចរារាំងអ្នកវិនិយោគបរទេស ដែលនាំទៅដល់ការកាត់បន្ថយលំហូរវិនិយោគផ្ទាល់ពីបរទេស (FDI) ចូលមកកាន់កម្ពុជា។

និន្នាការនេះអាចជះឥទ្ធិពលយ៉ាងខ្លាំងដល់សេដ្ឋកិច្ចកម្ពុជា ជាពិសេសនៅក្នុងវិស័យឧស្សាហកម្មស្នូលដូចជា ផលិតកម្ម ដែលជាកត្តាជំរុញដ៏សំខាន់សម្រាប់កំណើនសេដ្ឋកិច្ចរបស់ប្រទេសកម្ពុជាក្នុងរយៈពេលប៉ុន្មានឆ្នាំថ្មីៗនេះ។

ដើម្បីទប់ទល់នឹងហានិភ័យទាំងនេះ CBRE បានជំរុញឱ្យកម្ពុជាផ្តោតលើសារៈសំខាន់នៃការធ្វើពិពិធកម្មសេដ្ឋកិច្ច។

របាយការណ៍លើកឡើងថា ការពង្រឹងទំនាក់ទំនងសេដ្ឋកិច្ចរវាងកម្ពុជាជាមួយទីផ្សារក្នុងតំបន់អាស៊ាន ចិន និងអឺរ៉ុប ជាយុទ្ធសាស្ត្រដើម្បីកាត់បន្ថយការពឹងផ្អែកលើទំនាក់ទំនងពាណិជ្ជកម្មជាមួយសហរដ្ឋអាមេរិក។ CBRE ចង្អុលបង្ហាញថា កម្ពុជាបាននិងកំពុងស្វែងរកយ៉ាងសកម្មនូវភាពជាដៃគូពាណិជ្ជកម្មថ្មី ដែលអាចជួយកាត់បន្ថយផលប៉ះពាល់ពីការផ្លាស់ប្តូរគោលនយោបាយរបស់សហរដ្ឋអាមេរិក។

ចំណែក វិស័យអចលនទ្រព្យក៏ត្រូវបានគូសរំលេចនៅក្នុងរបាយការណ៍ខាងលើផងដែរ។ CBRE អះអាងថា វិស័យអចលនទ្រព្យកម្ពុជាអាចប្រឈមមុខនឹងកំណើនយឺត ប្រសិនបើលំហូរនៃការវិនិយោគផ្ទាល់ពីបរទេសធ្លាក់ចុះ។

ការវិភាគបង្ហាញថា បណ្តាវិនិយោគិនអន្តរជាតិអាចប្រកាន់យកវិធីសាស្រ្តប្រុងប្រយ័ត្នបន្ថែមទៀត ជាពិសេសក្រុមអ្នកវិនិយោគពីសហរដ្ឋអាមេរិក និងបណ្តាប្រទេសលោកខាងលិច ដោយសារតែហានិភ័យភូមិសាស្ត្រនយោបាយកើនឡើង។

CBRE បានជំរុញឱ្យបណ្តាអ្នកអភិវឌ្ឍន៍អចលនទ្រព្យនៅកម្ពុជាផ្តោតលើការជំរុញតម្រូវការក្នុងស្រុក និងធ្វើពិពិធកម្មផលប័ត្ររបស់ពួកគេ ដោយផ្តោតលើផ្នែក ដែលមានសក្តានុពលដូចជា ការអភិវឌ្ឍន៍លំនៅដ្ឋានតម្លៃសមរម្យជាដើម។ វិធីសាស្រ្តនេះអាចជួយទប់ទល់នឹងការប្រែប្រួលនៃការវិនិយោគពីបរទេស ដើម្បីគាំទ្រដល់ស្ថិរភាពក្នុងវិស័យអចលនទ្រព្យ៕ប្រភព: CBRE៕

Vietnam province proposes using flying taxis for tourism

Central Binh Dinh Province, home Quy Nhon beach city, has proposed introducing flying taxis to boost tourism and enhance sustainable development in the region.

The provincial People’s Committee on Tuesday requested the Ministry of Transport seek approval from the Prime Minister to allow the trial use of electric vertical take-off and landing (eVTOL) aircraft. These aircraft, known as flying taxis, are envisioned as an eco-friendly transportation option for tourists.

According to the committee, eVTOLs, which can accommodate 4-5 passengers, are similar to helicopters but run on electricity.

The proposed flying taxis would offer tourists aerial views of Binh Dinh’s landscapes and attractions, while contributing to the province’s environmental goals by reducing emissions compared to traditional cars and trains.

The committee said trials to evaluate the feasibility of the vehicles are needed, and necessary legal frameworks must be established.

Several countries, including China, the U.S., Germany, Singapore and South Korea, are currently researching the development and application of eVTOL technology.

Source: Vnexpress

តើទីផ្សារលំនៅដ្ឋាននៅទូទាំងសហរដ្ឋអាមេរិកនឹងជួបប្រទះនិន្នាការបែបណានៅឆ្នាំ២០២៥?

ដោយ: គង់ លាងហួរ
អន្តរជាតិ: យោងតាមទិន្នន័យពីក្រុមហ៊ុនស្រាវជ្រាវអចលនទ្រព្យ Zillow បានឱ្យដឹងថា នៅខែតុលា ឆ្នាំ២០២៤ តម្លៃផ្ទះជាមធ្យមនៅសហរដ្ឋអាមេរិកបានកើនឡើងដល់ចំនួន៣៥៩.០៩៩ដុល្លារក្នុងមួយយូនីត កើនឡើង២,៦ភាគរយធៀបនឹងឆ្នាំមុន។

ខណៈឆ្នាំ២០២៤ជិតឈានដល់ទីបញ្ចប់ ក្រុមហ៊ុនស្រាវជ្រាវអចលនទ្រព្យ Zillow ក៏បានធ្វើការព្យាករណ៍និន្នាការចំនួន៤ សម្រាប់ទីផ្សារលំនៅដ្ឋានអាមេរិកក្នុងឆ្នាំ២០២៥ខាងមុខផងដែរ។

និន្នាការទី១: ការកើនឡើងនៃការលក់ផ្ទះ។

លោក Skylar Olsen ប្រធានក្រុមសេដ្ឋវិទូរបស់ក្រុមហ៊ុន Zillow បានអះអាងថា ទីផ្សារលំនៅដ្ឋានអាមេរិកកំពុងងើបឡើងវិញបន្តិចម្តងៗ ហើយនិន្នាការនឹងបន្តកើតមាន ស្របពេលដែលតម្លៃផ្ទះកើនឡើងក្នុងកម្រិតសន្សឹមៗ។

ក្រុមហ៊ុន Zillow បានព្យាករណ៍ថា តម្លៃផ្ទះនៅសហរដ្ឋអាមេរិកនឹងកើនឡើង២,៦% នៅឆ្នាំ២០២៥ ខណៈការលក់ផ្ទះដែលមានស្រាប់នឹងកើនឡើងដល់ចំនួន៤,៣លានយូនីត។

និន្នាការទី២: ការប្រែប្រួលនៃអត្រាការប្រាក់លើប្រាក់កម្ចីទិញផ្ទះ។

Zillow បានព្យាករណ៍ថា អត្រាការប្រាក់លើប្រាក់កម្ចីទិញផ្ទះរបស់សហរដ្ឋអាមេរិកនឹងកើនឡើងពេញមួយឆ្នាំ២០២៥ខាងមុខ។

Zillow បានលើកឡើងថា នាពេលថ្មីៗនេះ អត្រាការប្រាក់ថេររយៈពេល៣០ឆ្នាំលើប្រាក់កម្ចីទិញផ្ទះបានធ្លាក់ចុះ មុនពេលកើនឡើងដល់ជិត៧%នៅឆ្នាំ២០២៥ ខណៈទីផ្សារបានកែសម្រួលការរំពឹងទុកលើគោលនយោបាយអត្រាការប្រាក់របស់ធនាគារកណ្តាលអាមេរិក ស្របពេលដែលមានក្តីព្រួយបារម្ភចំពោះកំណើននៃអត្រាអតិផរណា នៅពេលដែលលោកដូណាល់ត្រាំ ដាក់ពន្ធលើការនាំចូលគ្រប់មុខទំនិញពីបរទេស បន្ទាប់ពីលោកចូលគ្រប់គ្រងសេតវិមាននៅខែមករា ឆ្នាំក្រោយ។

និន្នាការទី៣: ទីផ្សាររបស់អ្នកទិញស្ថិតនៅភាគនិរតីនៃប្រទេស។

យោងតាមទិន្នន័យរបស់ក្រុមហ៊ុន Zillow បង្ហាញថា បច្ចុប្បន្ន ទីផ្សាររបស់អ្នកទិញ(Buyer’s market)ភាគច្រើនស្ថិតនៅភាគអាគ្នេយ៍នៃសហរដ្ឋអាមេរិក។

ប៉ុន្តែ Zillow បានព្យាករណ៍ថា នៅឆ្នាំ២០២៥ អ្នកទិញអាចងាកទៅស្វែងរកឱកាសកាន់តែច្រើននៅភាគនិរតី ដោយសារតែស្តុកលំនៅដ្ឋានដែលមានស្រាប់នៅទីនោះត្រូវបានលក់ចេញជាបណ្តើរៗ។

ទីផ្សាររបស់អ្នកទិញ(Buyer’s market)ជាស្ថានភាពមួយ ដែលអ្នកទិញមានប្រៀបជាងអ្នកលក់។ លើសពីនេះ អ្នកទិញមានជម្រើសច្រើនក្នុងការជ្រើសរើស ខណៈអ្នកលក់ត្រូវតែរក្សាតម្លៃឱ្យនៅកម្រិតទាប ហើយអ្នកទិញមានប្រៀបដើម្បីចរចា។

និន្នាការទី៤: ការសាងសង់ផ្ទះដែលមានទំហំតូចជាងមុន(Smaller homes)។

Zillow បានព្យាករណ៍ថា គម្រោងសាងសង់ផ្ទះតូចៗនឹងបន្តកើនឡើង ខណៈអ្នកទិញអាចចាប់អារម្មណ៍ចំពោះការទិញផ្ទះប្រភេទនេះ ព្រោះវាមានតម្លៃសមរម្យជាងផ្ទះដែលមានទំហំធំ៕ប្រភព: Yahoo Finance៕

អ្នកវិនិយោគមកពីប្រទេសចំនួន៦ចូលរួមវេទិកាធុរកិច្ចក្នុងកិច្ចប្រជុំកំពូលសភាពាណិជ្ជកម្មអាស៊ាន ម៉ាឡេស៊ី

ដោយៈ គង់ ម៉ាលីនណា

ភ្នំពេញៈ កាលពីចុងសប្តាហ៍មុន លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានអញ្ជើញជាកិត្តិយសថ្លែងសុន្ទរកថាគន្លឹះក្នុងកិច្ចប្រជុំកំពូលសភាពាណិជ្ជកម្មអាស៊ាន ម៉ាទ្បេស៊ី (ASEAN Malaysian Business Chambers Summit) ដែលរៀបចំទ្បើងដោយសភាពាណិជ្ជកម្មម៉ាទ្បេស៊ីនៅកម្ពុជា (Malaysian Business Chamber of Cambodia, MBCC)។

កិច្ចប្រជុំកំពូលនេះ មានការចូលរួមពីសំណាក់លោក Shaharuddin Bin Onn ឯកអគ្គរដ្ឋទូតម៉ាទ្បេស៊ីប្រចាំកម្ពុជា ឧកញ៉ា តាន់ គីម៉េង ប្រធានសភាពាណិជ្ជកម្មម៉ាទ្បេស៊ីនៅកម្ពុជា តំណាងស្ថានទូតនៅតាមបណ្តាប្រទេសអាស៊ានមួយចំនួន ព្រមទាំងវិនិយោគិនក្នុងស្រុក និងវិនិយោគិនម៉ាឡេស៊ីនៅប្រទេសឡាវ មីយ៉ាន់ម៉ា ថៃ វៀតណាម ហ្វីលីពីន និងឥណ្ឌូនេស៊ី។

លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជាបានសម្តែងនូវសេចក្តីសោមន្សរីករាយ ដែលបានចូលរួមថ្លែងសុន្ទរកថាគន្លឹះ ក្នុងកិច្ចប្រជុំកំពូលដ៏មានសារៈសំខាន់នេះ និងបានវាយតម្លៃខ្ពស់ចំពោះសភាពាណិជ្ជកម្មម៉ាទ្បេស៊ីនៅកម្ពុជាដែលបានរៀបចំវេទិកាធុរកិច្ចកម្ពុជា-ម៉ាទ្បេស៊ីឆ្នាំ២០២៤ នៅទីក្រុងកូទ្បាទ្បាំពួរ ប្រទេសម៉ាទ្បេស៊ី ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីដើមឆ្នាំ២០២៤ ប្រកបដោយជោគជ័យ ដែលវេទិកានេះ បានចូលរួមជំរុញផ្សព្វផ្សាយពីបរិស្ថាន និងសក្តានុពលវិនិយោគនៅកម្ពុជា ទៅដល់ធុរជននិងវិនិយោគិនម៉ាឡេស៊ី។

ឆ្លៀតក្នុងឱកាសនេះ លោកជា វុទ្ឋី បានជម្រាបជូនពីកត្តាសំខាន់ៗមួយចំនួន និងលក្ខខណ្ឌអំណោយផល ដែលបានទាក់ទាញក្រុមហ៊ុនម៉ាទ្បេស៊ី មកបណ្តាក់ទុនវិនិយោគនៅកម្ពុជា នាពេលកន្លងមក ព្រមទាំងបានគូសរំលេចបន្ថែមថា កម្ពុជាជាប្រទេសដែលជាទីតាំងយុទ្ធសាស្ត្រនៅក្នុងអាស៊ាន មានបរិយាកាសវិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន មានកម្លាំងពលកម្មវ័យក្មេង, ព្រមទាំងបាននិងកំពុងបន្តកសាង ហេដ្ឋារចនាសម្ព័ន្ធរូបវន្តចាំបាច់ សម្រាប់សម្រួលដល់ការដឹកជញ្ជូន ដែលការណ៍នេះបានរួមចំណែកធ្វើឱ្យកម្ពុជា ក្លាយជាគោលដៅវិនិយោគ ដ៏ទាក់ទាញនៅក្នុងតំបន់៕

ទីផ្សារលំនៅដ្ឋាននៅក្នុងទីក្រុងបាងកករំពឹងដាំក្បាលចុះនៅឆ្នាំ២០២៤នេះ

ដោយ: គង់ លាងហួរ
បាងកក: មជ្ឈមណ្ឌលស្រាវជ្រាវ SCB EIC បានព្យាករណ៍ថា ចំនួននៃការផ្ទេរលំនៅដ្ឋានថ្មីគិតជាយូនីតនៅទីក្រុងបាងកក នឹងធ្លាក់ចុះ១០%នៅឆ្នាំនេះ ហើយនឹងបន្តធ្លាក់ចុះបន្ថែមទៀតចាប់ពី១%ទៅ៣%នៅឆ្នាំ២០២៥ ដោយសារការធ្លាក់ចុះនៃសេដ្ឋកិច្ចថៃ។

ជាមួយគ្នានេះ ចំនួននៃការផ្ទេរលំនៅដ្ឋានថ្មីគិតជាទំហំទឹកប្រាក់នឹងដាំក្បាលចុះ៩ភាគរយនៅឆ្នាំ២០២៤ មុននឹងធ្លាក់ចុះចន្លោះពី០%ទៅដល់២% នៅឆ្នាំក្រោយ។នេះបើយោងតាមមជ្ឈមណ្ឌលស្រាវជ្រាវ SCB EIC។

ការធ្លាក់ចុះនៃទីផ្សារលំនៅដ្ឋានក្នុងទីក្រុងបាងកកបណ្តាលមកពីបញ្ហាប្រឈមផ្នែកសេដ្ឋកិច្ច រួមទាំងការកើនឡើងនៃថ្លៃចំណាយលើការរស់នៅ ការធ្លាក់ចុះអំណាចនៃការទិញ កំណើនបំណុលក្នុងគ្រួសារ ការកើនឡើងនៃអត្រាការប្រាក់ និងការរឹតបន្តឹងលក្ខណៈវិនិច្ឆ័យក្នុងការផ្តល់ប្រាក់កម្ចីទិញផ្ទះ។

កត្តាទាំងនេះកំពុងធ្វើឱ្យប្រជាជនថៃ ដែលមានបំណងទិញផ្ទះនាពេលអនាគត ជាពិសេសអ្នកទិញដែលមានប្រាក់ចំណូលកម្រិតទាបទៅកម្រិតមធ្យម ពន្យារពេលលើការសម្រេចចិត្តទិញផ្ទះក្នុងក្តីស្រមៃ។

លើសពីនេះទៀត ស្ថាប័ន SCB EIC បានព្យាករណ៍ថា ចំនួនលំនៅដ្ឋានថ្មី ដែលបើកដំណើរការលក់នៅក្នុងឆ្នាំ២០២៤ នឹងដាំក្បាលចុះ២៨ភាគរយធៀបនឹងឆ្នាំមុន។ប៉ុន្តែ តួលេខនេះត្រូវបានគេរំពឹងថា នឹងស្ទុះងើបឡើងវិញនៅឆ្នាំ២០២៥។

ដើម្បីឆ្លើយតបចំពោះលក្ខខណ្ឌមិនអំណោយផល អ្នកអភិវឌ្ឍន៍អចលនទ្រព្យកំពុងធ្វើពិពិធកម្មការវិនិយោគរបស់ខ្លួនទៅកាន់គម្រោងលំនៅដ្ឋានសម្រាប់អ្នកទិញដែលមានប្រាក់ចំណូលកម្រិតមធ្យម និងអ្នកទិញមានចំណូលកម្រិតខ្ពស់ ខណៈអំណាចនៃការទិញរបស់អតិថិជនទាំងនេះនៅតែមានភាពរឹងមាំ។

ជាមួយគ្នានេះ បណ្តាធនាគារក្នុងស្រុកធំៗរបស់ថៃបានរាយការណ៍ពីការធ្លាក់ចុះនៃការផ្តល់ប្រាក់កម្ចីទិញផ្ទះក្នុងអំឡុងរយៈពេលប្រាំបួនខែដំបូងដើមឆ្នាំនេះ ដោយសារតែការរឹតបន្តឹងលក្ខណៈវិនិច្ឆ័យក្នុងការផ្តល់ប្រាក់កម្ចីដល់អតិថិជន៕ប្រភព: Bangkok Post៕

Bangkok housing market set to decline amid poor economy

SCB EIC, the research centre of Siam Commercial Bank, predicts that the transfer of new residential units in Greater Bangkok will decline by 10% this year, with a further contraction of 1-3% projected for 2025, mainly due to the country’s sluggish economy.

In terms of value, the decrease is estimated at 9% for 2024, but it may stabilise to between 0-2% next year, according to the research house.

The downturn in the residential market is attributed to economic challenges, including rising living costs, weakened purchasing power, a high level of household debt, increasing interest rates, and stricter mortgage approval criteria.

These factors are causing prospective homebuyers, particularly in the lower- to middle-income segments, to postpone purchasing decisions.

Additionally, SCB EIC forecasts that the number of newly launched residential units in 2024 will decrease by 28% year-on-year, with the figure expected to cover in 2025 with a projected contraction of 2-4%.

Source: Bangkok Post

1...479480481...3,378 Page 480 of 3,378