ដោយ: គង់ លាងហួរ

វៀងច័ន្ទន៍: ផ្លូវរថភ្លើងល្បឿនលឿនឡាវ -ចិន​បាន​បម្រើឱ្យការដឹក​ទំនិញ​ចំនួន​២,៣​លាន​តោន ​ក្នុង​រយៈពេល​៥​ខែ​ដំបូងដើមឆ្នាំ​២០២៤នេះ កើនឡើង​៣១% បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន។

យោងតាមទីភ្នាក់ងារគយ នៅទីក្រុងគុនមីងរបស់ប្រទេសចិន បានឱ្យដឹងថា គិតចាប់ពីខែមករា ដល់ខែឧសភា ឆ្នាំនេះ រថភ្លើងល្បឿនលឿន តភ្ជាប់រវាងប្រទេសឡាវ និងប្រទេសចិន បានធ្វើដំណើរចំនួន៣.០៧៦ជើង កើនឡើង៣០,៦% បើធៀបនឹងរយៈពេលដូចគ្នាក្នុងឆ្នាំ២០២៣។

លើសពីនេះទៀត ក្រុមហ៊ុនគ្រប់គ្រងផ្លូវដែកល្បឿនលឿនឡាវ-ចិន បានបើកដំណើរការរថភ្លើង ដឹកអ្នកដំណើរជាង១០.០០០ជើង គិតចាប់តាំងពីដើមឆ្នាំ២០២៤នេះ ដោយថែមទាំងបានដឹកអ្នកដំណើរយ៉ាងច្រើនសន្ធឹកសន្ធាប់។

យោងតាមរបាយការណ៍ស្ថិតិ ពីក្រុមហ៊ុនគ្រប់គ្រងផ្លូវដែកឡាវ-ចិន នៅសាខាទីក្រុង Kunming បានបង្ហាញថា ចាប់ពីថ្ងៃទី១ ខែមករា ដល់ថ្ងៃទី៣១ ខែឧសភា ផ្លូវដែកខាងលើបានបើកដំណើរការរថភ្លើងចំនួន១០.៦៤២ជើង ដែលផ្ទុកអ្នកដំណើរសរុបចំនួន៨,៧២លាននាក់។

សមិទ្ធិផលនេះ បានក្លាយជាជម្រើសដ៏សំខាន់ នៃការធ្វើដំណើរសម្រាប់ភ្ញៀវទេសចរណ៍ ព្រមទាំងសិស្ស និស្សិត និងពាណិជ្ជករ។ ម្យ៉ាងទៀត ផ្លូវហេដ្ឋារចនាសម្ព័ន្ធមួយនេះ ក៏កំពុងជំរុញការផ្លាស់ប្តូរវប្បធម៌ និងបង្កើតវិបុលភាពសេដ្ឋកិច្ចក្នុងតំបន់។

ផ្លូវរថភ្លើងល្បឿនលឿនវៀងចន្ទន៍-គុនមីង គឺជានិមិត្តរូបដ៏សំខាន់មួយ នៃទំនាក់ទំនងមិត្តភាពរវាងប្រទេសឡាវ និងប្រទេសចិន និងបានក្លាយជាកម្លាំងចលករ ជំរុញយុទ្ធនាការ“ទស្សនាប្រទេសឡាវឆ្នាំ២០២៤”។

គិតចាប់តាំងពីចុងឆ្នាំ២០២៣មក ក្រុមហ៊ុនគ្រប់គ្រងផ្លូវដែកឡាវ-ចិន និងក្រសួងព័ត៌មាន វប្បធម៌ និងទេសចរណ៍នៃប្រទេសឡាវ បានសហការគ្នាជំរុញវិស័យទេសចរណ៍ តាមរយៈការស្រូបទាញយក សក្តានុពលផ្លូវដែកឱ្យកាន់តែប្រសើរឡើង៕ប្រភព:The Vientiane Times៕

ដោយ: គង់ លាងហួរ

អន្តរជាតិ: យោងតាមការស្ទង់មតិរបស់កាសែត Reuters ប្រចាំខែមិថុនានេះ បានបង្ហាញថា បណ្តាក្រុមហ៊ុនផលិតកម្មជប៉ុន ហាក់មិនសូវមានទំនុកចិត្ត លើអាជីវកម្មរបស់ពួកគេ ដោយសារតម្លៃសម្ភារៈវត្ថុធាតុដើមមានការកើនឡើង។

ការស្ទង់មតិទៅលើក្រុមហ៊ុនផលិតកម្ម ដែលជាសូចនាករ និងជាមូលដ្ឋាន នៃការសម្រេចចិត្តដ៏សំខាន់ សម្រាប់ធនាគារកណ្តាលជប៉ុន (BOJ) បានបង្ហាញថា ការស្ទុះងើបឡើងវិញនៃសេដ្ឋកិច្ចជប៉ុនហាក់ពុំមានតុល្យភាពនោះទេ។

សន្ទស្សន៍ទំនុកចិត្ត របស់ក្រុមហ៊ុនផលិតកម្មជប៉ុន បានធ្លាក់ចុះដល់៦ពិន្ទុ ក្នុងខែមិថុនានេះ បើធៀបនឹង១០ពិន្ទុកាលពី៣ខែមុន និងធ្លាក់ចុះពី៩ពិន្ទុ ក្នុងខែឧសភា។ ក្រុមហ៊ុនផលិត កម្មបានរងផលប៉ះពាល់ ដោយសារការដាំក្បាលចុះ នៃតម្លៃប្រាក់យ៉េន និងការកើនឡើងតម្លៃវត្ថុធាតុដើម ដែលត្រូវការនាំចូលមក​ពី​ក្រៅ​ប្រទេស។

អ្នកគ្រប់គ្រងក្រុមហ៊ុនផលិតគ្រឿងម៉ាស៊ីនមួយរូប បានសរសេរបញ្ចេញមតិយោបល់ថា “កំណើនថ្លៃសម្ភារៈ និងការកើនឡើង នៃថ្លៃចំណាយលើកម្លាំងពលកម្ម កំពុងបង្ខំឱ្យក្រុមហ៊ុនកាត់បន្ថយ ការចំណាយដើមទុនវិនិយោគ និងការចំណា យផ្សេងៗទៀត”។

ក្រុមហ៊ុនផលិតកម្មមួយចំនួន ក៏បានសម្តែងការព្រួយបារម្ភផងដែរ អំពីផលប៉ះពាល់នៃបញ្ហារឿងអាស្រូវ នៅក្នុងឧស្សាហកម្មរថយន្ត ក្រោយពីក្រុមហ៊ុន Toyota ក្រុមហ៊ុន Mazda និងក្រុមហ៊ុនផ្សេងទៀត បានទទួលស្គាល់ភាពមិនប្រក្រតី ឬកំហុសនៅក្នុងការធ្វើតេស្ត លើសុវត្ថិភាពយានយន្តដែលពួកគេផលិត។

អ្នកគ្រប់គ្រងមួយរូប នៅក្នុងវិស័យរថយន្តបានសរសេរថា “បរិយាកាសអាជីវកម្ម ជុំវិញឧស្សាហកម្មគ្រឿងម៉ាស៊ីនកំពុងផ្លាស់ប្តូរយ៉ាងច្បាស់ណាស់ ខណៈស្ថានភាពកាន់តែវិវត្តន៍អាក្រក់ទៅៗ។ ប៉ុន្តែយើងមិនដឹងច្បាស់ថា តើបញ្ហានេះនឹងអាចជះផលប៉ះពាល់ ដល់អាជីវកម្មរបស់យើងខ្លាំង កម្រិតណានោះទេ”។

យ៉ាងណាមិញ ក្រុមសេដ្ឋវិទូបានលើកឡើងថា ការដំឡើងប្រាក់ឈ្នួល និងការកាត់បន្ថយអត្រាពន្ធ លើប្រាក់ចំណូលចាប់ពីខែមិថុនានេះ នឹងធ្វើឱ្យទំនុកចិត្តលើអាជីវកម្ម នៅក្នុងវិស័យសេវាកម្មស្ទុះងើបឡើងវិញ៕ប្រភព: Reuters ៕

ដោយៈ គង់ សូរិយា

        ព្រះសីហនុៈ  អគ្គនាយកដ្ឋានពន្ធដារ បានរំលឹកអំពីការលើកទឹកចិត្តផ្នែកពន្ធដារ និងការសម្រួលនីតិវិធីផ្សេងទៀតជាច្រើនទៀត ជូនដល់វិនិយោគិន ដែលមានបំណងវិនិយោគនៅខេត្តព្រះសីហនុ។

តាមរយៈព្រឹត្តិបត្រព័ត៌មានប្រចាំសប្ដាហ៍ អគ្គនាយកដ្ឋានពន្ធដារបានឲ្យដឹងថា គម្រោងវិនិយោគ៣ប្រភេទ ដែលផ្តល់ការលើកទឹកចិត្តជាច្រើន រួមទាំងការលើកទឹកចិត្តផ្នែកពន្ធដារ ព្រមទាំងសម្រួលនីតិវិធីផ្សេងរួមមាន ទី១/ គម្រោងវិនិយោគពាក់ព័ន្ធអគារជាប់គាំង ពោលគម្រោងនានា ដែលបានសាងសង់ហើយបានផ្អាកពន្យារ ឬបញ្ឈប់ការសាងសង់ ក្នុងខេត្តព្រះសីហនុ ចាប់ពីឆ្នាំ២០១៦។ ទី២/ គម្រោងវិនិយោគដែលអាចចាប់ផ្តើមអនុវត្តបានភ្លាមៗ ក្នុងឆ្នាំ២០២៤ និងទី៣/ ការពង្រីកគម្រោងដែលមានស្រាប់។អគ្គនាយកដ្ឋានពន្ធដារបានបញ្ជាក់ថា គម្រោងទាំង៣ប្រភេទ នឹងទទួលបានការលើកទឹកចិត្ត ផ្នែកពន្ធដារជាច្រើន ជាអាទិ៍មាន ការលើកលែងនូវប្រភេទពន្ធ អាករសំខាន់ៗមួយចំនួន លើកលែងកម្រៃសេវាចុះបញ្ជី សម្រួលនីតិវិធីបង់ពន្ធជាកញ្ចប់ តាមដំណាក់កាល លើកលែងទណ្ឌកម្មរដ្ឋបាល ចំពោះការធ្វើសវនកម្មពន្ធដារ ព្រមទាំងផ្តល់ការលើកទឹកចិត្ត ដោយពន្ធអាករជាបន្ទុករបស់រដ្ឋលើការផលិត និង/ឬការផ្សព្វផ្សាយអំពីផលិតផលទេសចរណ៍ គោលដៅទេសចរណ៍ ក្នុងខេត្តព្រះសីហនុផងដែរ។

ដើម្បីទទួលបានលើកទឹកចិត្ត ក្រោមកម្មវិធីពិសេសនេះ វិនិយោគិនខ្មែរ និងបរទេស និវាសនជន ឬអនិវាសនជន អាចដាក់ពាក្យស្នើសុំ មកក្រុមការងារជំរុញការវិនិយោគ ក្នុងខេត្តព្រះសីហនុ ដែលមានទីតាំង២កន្លែងគឺ នៅខេត្តព្រះសីហនុ ស្ថិតនៅផ្លូវជាតិលេខ៤ ភូមិ៣ សង្កាត់លេខ១ ក្រុងព្រះសីហនុ ឬនៅរាជធានីភ្នំពេញ ស្ថិតនៅអគារមជ្ឈមណ្ឌលអភិវឌ្ឍន៍ធុរកិច្ច ជាន់ទី២១ សង្កាត់ជ្រោយចង្វារ៕

ដោយៈ គង់ សូរិយា

        ភ្នំពេញៈ ក្រុមអ្នកជំនាញបានទទួលស្គាល់ ពីភាពប្រសើរឡើងនៃការទិញ លក់អចលនទ្រព្យ ប៉ុន្តែអ្នកវិនិយោគនៅតែបន្តផ្តោតលើប្រភេទទ្រព្យតម្លៃក្រោមទីផ្សារ។

អគ្គនាយិកាក្រុមហ៊ុនKAT APPRAISALលោកស្រីចេវ សុឃុន បានមានប្រសាសន៍ឲ្យដឹង តាមបណ្តាញតេឡេក្រាមកាលពីថ្ងៃច័ន្ទទី២៤ មិថុនាថា សកម្មភាព ទិញ លក់អចលនទ្រព្យនៅតែមិនទាន់ មានតម្លៃកើនឡើងនោះទេ ដោយអ្នកទិញនៅតែស្វែងរកអចលនទ្រព្យតម្លៃក្រោមទីផ្សារ។លោកស្រីបញ្ជាក់ថា “ការទិញ លក់បានកើនឡើង បើធៀបនឹងឆ្នាំមុន ដែលចរន្តនៃការទិញលក់ នៅតែកើតមាននៅក្នុងទីផ្សារ”។

ជាមួយគ្នានេះ លោកស្រីតាំង ហួរអគ្គនាយិកាក្រុមហ៊ុនAMATAK Property Service Co, Ltdបានមានប្រសាសន៍ឲ្យដឹងកាលពី​ចុងសប្តាហ៍មុនផងដែរថា មានសកម្មភាពទិញ លក់​ងចលនទ្រព្យ ពិសេសដីធ្លីនៅតំបន់ផ្លូវ៦០ម៉ែត្រ តំបន់ព្រែកព្នៅ បឹងកប់ស្រូវ និងតំបន់ផ្លូវក្រវ៉ាត់ក្រុងទី៣ជាដើម។លោកស្រីបន្តថា “បងអើយ ព័ត៌មានដដែលៗទេ ដោយសា​រស្ថានភាពពេលនេះ ការលក់អចលនទ្រព្យ អាចមានការទិញ ក្នុងតម្លៃក្រោមទីផ្សារ”។

លើសពីនេះ លោកប៉ូ អ៊ាវគង់អគ្គនាយកក្រុមហ៊ុនAdvance Real Estateបានមានប្រសាសន៍ឲ្យដឹងផងដែរថា ស្ថានភាពនេះ ទាមទារឲ្យអ្នកវិនិយោគ មានការប្រុងប្រយ័ត្នច្រើនជាងមុន។ ប្រសិនជាមានលំហូរសាច់ប្រាក់ល្អ អ្នកវិនិយោ​គគួរតែទិញ ដោយសិក្សាលើតំបន់ជាយក្រុង និងទីតាំងដែលមានការរៀបចំហេដ្ឋារចនាសម្ព័ន្ឋថ្មីៗរបស់រដ្ឋាភិបាល។លោកបន្តថា “ទីផ្សារទាមទារឲ្យមានភាពអត់ធ្មត់ វាត្រូវការពេលវេលាបន្ថែមទៀត”៕

ដោយ: គង់ លាងហួរ

ប៉េកាំង: មន្ត្រីរដ្ឋបាលមូលដ្ឋានមួយរូបបានអះអាងថា តួមេ(Main body) នៃព្រែកជីកតភ្ជាប់ផ្លូវទឹក នៅក្នុងតំបន់ស្វយ័ត Guangxi ជាមួយនឹងឈូងសមុទ្រ Beibu ត្រូវបានគេរំពឹងថា នឹងបញ្ចប់ការសាងសង់រួចរាល់ នៅចុងឆ្នាំ២០២៦ខាងមុខ។

លោក Xu Yongke អនុប្រធានរដ្ឋបាលក្នុងតំបន់ស្វយ័តខាងលើ បានថ្លែងនៅឯសន្និសីទសារព័ត៌មានមួយ ក្នុងទីក្រុងប៉េកាំងថា ការសាងសង់ព្រែកជីក Pinglu កំពុងដំណើរការយ៉ាងរលូន បន្ទាប់ពីបានចាប់ផ្តើមបើកការដ្ឋាន នៅខែសីហា ឆ្នាំ២០២២។

ព្រែកជីកនេះ មានប្រវែងសរុបជាង១៣៤គីឡូម៉ែត្រ ដែលត្រូវបានគេរំពឹងថា នឹងតភ្ជាប់ទីក្រុង Hengzhou ក្នុងតំបន់ Guangxi ជាមួយនឹងឈូងសមុទ្រ Beibu ទៅកាន់ភាគខាងត្បូង ដែលអនុញ្ញាតឱ្យនាវា អាចជញ្ជូនដឹកទំនិញ ក្នុងចម្ងាយខ្លីជាងមុន ពេលទៅដល់សមុទ្រ។

លោក Xu បានមានប្រសាសន៍ឱ្យដឹងបន្តទៀតថា “ប្រសិន បើនាវាដឹកជញ្ជូនទំនិញ ចាកចេញពីភាគនិរតី នៃប្រទេសចិនទៅកាន់សមុទ្រតាមព្រែកជីកនេះ នោះវានឹងជួយកាត់បន្ថយចម្ងាយផ្លូវធ្វើដំណើរ ប្រមាណ៥៦០គីឡូម៉ែត្រ បើធៀបនឹងផ្លូវទឹកបច្ចុប្បន្ន”។

គម្រោងព្រែកជីកនេះគឺជាផ្នែកមួយ នៃកិច្ចខិតខំប្រឹងប្រែងរបស់រដ្ឋបាលក្នុងតំបន់ ក្នុងការទាក់ទាញ និងសម្រួលដល់អាជីវកម្ម និងពាណិជ្ជកម្មក្នុងស្រុក ក៏ដូចជាលំហូរនៃការដោះដូរពាណិជ្ជកម្មអន្តរជាតិ។

លោក Lan Tianli ប្រធានរដ្ឋបាលក្នុងតំបន់ស្វយ័ត Guangxi បានលើកឡើងថា តំបន់ស្វយ័តGuangxi ដែលមានទីតាំងនៅជិតបណ្តាប្រទេសសមាជិកអាស៊ាន នឹងធ្វើការដើម្បីកសាងបណ្តាញដឹកជញ្ជូន ប្រកបដោយប្រសិទ្ធភាព និងខ្សែសង្វាក់ផ្គត់ផ្គង់ឧស្សាហកម្មឆ្លងដែន និងឆ្លងតំបន់។

លោកក៏បានបញ្ជាក់ផងដែរថា តំបន់ Guangxi កំពុងពន្លឿនការសាងសង់កំពង់ផែឆ្លាតវៃ នៅព្រំដែនរបស់ខ្លួនជាមួយប្រទេ សវៀតណាម ដែលនឹងអនុញ្ញាតឱ្យមានការដឺកជញ្ជូន ទំនិញគ្មានមនុស្សបើករយៈពេល២៤ម៉ោងក្នុងមួយថ្ងៃ។

លោក Lan បានបន្ថែមថា តំបន់ស្វយ័ត Guangxi ក៏នឹងសម្រ បខ្លួនយ៉ាងពេញលេញ ជាមួយនឹងច្បាប់ពាណិជ្ជកម្មក្រោមកិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយក្នុងតំបន់(RCEP) និងបន្តធ្វើឱ្យបរិយាកាសអាជីវកម្មរបស់ខ្លួន កាន់តែមានភាពប្រសើរឡើង។

នៅពេលការសាងសង់បញ្ចប់រួចរាល់ ព្រែកជីក Pinglu នឹងតភ្ជាប់តំបន់ស្វយ័ត Guangxi ទៅកាន់ឈូងសមុទ្រតុងកឹង ឬឈូងសមុទ្រ Beibu។ ព្រែកជីកនេះ នឹងជួយសន្សំសំចៃថ្លៃចំណាយប្រចាំឆ្នាំសរុប របស់ក្រុមហ៊ុនដឹកជញ្ជូន និងកប៉ាល់កុងតឺន័រ ដែលធ្វើដំណើរទៅកាន់ប្រទេសវៀតណាម ម៉ាឡេស៊ី សិង្ហបុរី ឥណ្ឌូនេស៊ី និងបណ្តាប្រទេសអាស៊ានផ្សេងទៀត៕ប្រភព:State Council Information Office៕

ដោយ: គង់ លាងហួរ
អន្តរជាតិ: បើយកប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃសុក្រសប្តាហ៍មុន គេសង្កេតឃើញថា តម្លៃហាងឆេងមាសបានបន្តងើបឡើងថ្លៃនៅល្ងាចថ្ងៃច័ន្ទនេះ។

តួយ៉ាង តម្លៃមាស Spot Gold បានងើបឡើង០,២៣%ដល់២៣២៥,៧២ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៣២ភាគរយដល់២៣៣៨,៧០ដុល្លារ ក្នុងមួយអោន គិតត្រឹមម៉ោង៥:៥១នាទីល្ងាច។

គិតត្រឹមពេលបិទការជួញដូរកាលពីថ្ងៃសុក្រសប្តាហ៍មុន តម្លៃមាស Spot Gold បានស្ថិតនៅត្រឹម២៣២០,៣៤ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅត្រឹម២៣៣១,២០ដុល្លារ ក្នុងមួយអោន៕

ដោយ: គង់ លាងហួរ

អន្តរជាតិ: យោងតាមរបាយការណ៍ស្តីពី និន្នាការទិញអចលនទ្រព្យឆ្លងដែនអាស៊ី- ប៉ាស៊ីហ្វិកពីក្រុមហ៊ុន Juwai IQI Holdings បង្ហាញថា ម៉ាឡេស៊ី គឺជាប្រទេស ដែលបានបណ្តាក់ទុនទៅលើអចលនទ្រព្យ នៅក្រៅប្រទេសច្រើនជាងទី៣ ប្រចាំតំបន់អាស៊ី បន្ទាប់ពីប្រទេសចិនដីគោក និងទីក្រុងហុងកុង។

របាយការណ៍បានបន្តថា ចំណាត់ថ្នាក់នេះបង្ហាញសញ្ញាពីការកើនឡើង នៃអំណាចនៃការទិញ របស់ពលរដ្ឋម៉ាឡេស៊ី និងសន្ទុះនៃការចាប់អារម្មណ៍ លើការវិនិយោគអចលនទ្រព្យឆ្លងដែន។

គោលដៅ​លំដាប់កំពូល​ ដែល​ពលរដ្ឋ​ម៉ាឡេស៊ី​ បាន​បង្ហា​ញ​ការ​ចាប់​អារម្មណ៍​ខ្លាំងជាងគេ គឺ​ការទិញអចលនទ្រព្យនៅប្រទេស​ថៃ អូស្ត្រាលី វៀតណាម ឥណ្ឌូនេស៊ី សិង្ហបុរី អេស្ប៉ាញ ​អង់គ្លេស ក្រិក ជប៉ុន និង​សហរដ្ឋអាមេរិក​។

របាយការណ៍ដដែលវាយតម្លៃថា “កត្តាសំខាន់ៗមួយចំនួន ដែលជំរុញឱ្យពលរដ្ឋម៉ាឡេស៊ី ងាកមកទិញអចលនទ្រព្យនៅបរទេស រួមមាន កំណើនសេដ្ឋកិច្ច និងការកើនឡើងនៃវណ្ណៈកណ្តាល ដែលការណ៍នេះបានជួយបង្កើន ប្រាក់ចំណូលរបស់ពលរដ្ឋម្នាក់ៗ ដែលអាចអនុញ្ញាតឱ្យពួកគេ មានលទ្ធភាពធ្វើការវិនិយោគលើអចលនទ្រព្យនៅបរទេស”។

លោក Kashif Ansari នាយកប្រតិបត្តិក្រុមហ៊ុន Juwai IQI Holdings បានលើកឡើងថា “ម៉ាឡេស៊ីគឺជាតួអង្គដ៏ស្វាហាប់ក្នុងការវិនិយោគនៅក្រៅប្រទេស។ កំណើនសេដ្ឋកិច្ចរបស់យើង និងការកើនឡើងនៃវណ្ណៈកណ្តាល កំពុងបង្កើនចំណាប់អារម្ម​ណ៍យ៉ាងខ្លាំង ចំពោះទីផ្សារអចលនទ្រព្យបរទេស”។លោកបញ្ជាក់ថា វិនិយោគិនម៉ាឡេស៊ី កំពុងពង្រីកការយល់ដឹងរបស់ពួកគេ និងធ្វើពិពិធកម្មផលប័ត្ររបស់ពួកគេ ស្របពេលដែលទីផ្សារនៅលើពិភពលោក កំពុងមានការវិវឌ្ឍន៍ឆ្ពោះទៅមុខឥតឈប់ឈរ”។

យ៉ាងណាមិញ ប្រទេសម៉ាឡេស៊ី​ ក៏​ជា​គោលដៅ​វិនិយោគ​អចលនទ្រព្យ​​ដ៏​ពេញ​និយម ​សម្រាប់ជនបរទេសផង​ដែរ។ យោងតាមរបាយការណ៍បានបង្ហាញថា ម៉ាឡេស៊ីគឺជាគោលដៅពេញនិយមបំផុតទី២ សម្រាប់អតិថិជនមកពីប្រទេសសិង្ហបុរី ទី៦សម្រាប់អតិថិជនមកពីហុងកុង និងទី៧សម្រាប់អតិថិជនមកពីចិនដីគោក។

កត្តានានា ដែលជំរុញឱ្យជនបរទេស មានការចាប់អារម្មណ៍លើទីផ្សារអចលនទ្រព្យ លំនៅដ្ឋាន របស់ប្រទេសម៉ាឡេស៊ី រួមមាន ទីតាំងយុទ្ធសាស្ត្ររបស់ប្រទេសនេះ គម្រោងហេដ្ឋារចនាសម្ព័ន្ធសំខាន់ថ្មីៗ បរិយាកាសវិនិយោគអំណោយផល ឱកាសផលចំណេញខ្ពស់សមរម្យ។

ក្រៅ​ពី​កត្តាទាំងនោះ ការ​ងើបឡើង​ថ្លៃ​នៃ​រូបិយប័ណ្ណ​បរទេស​ ធៀបទៅនឹង​រូបិយប័ណ្ណ​រីងហ្គីតរបស់ម៉ាឡេស៊ី​ ក៏​ជាកត្តាជួយរួម​ចំណែក​មួយទៀត ក្នុងការបង្កើន​លទ្ធភាព​ទិញ​ ក្នុង​ចំណោម​ពលរដ្ឋ​ក្នុង​តំបន់អាស៊ីផងដែរ៕ប្រភព: The edge Malaysia ៕