ដោយៈ គង់ សូរិយា

        អន្តរជាតិៈ របាយការណ៍ថ្មី សិក្សាដោយក្រុមហ៊ុនប្រឹក្សាការធ្វើចំណាកស្រុកHenley & Partners(UK)បានរកឃើញថា មហាសេដ្ឋី ប្រហែល១២៨,០០០នាក់នៅក្នុងពិភពលោក ត្រូវបានគេរំពឹងថា នឹងធ្វើចំណាកស្រុកនៅឆ្នាំនេះ ដែលជាចំនួនដ៏ខ្ពស់មួយ។

យោងតាមរបាយការណ៍ទាំងនេះ មហាសេដ្ឋីទាំងនោះជាបុគ្គល ដែលមានទ្រព្យសម្បត្តិចាប់ពី១លានដុល្លារ ឬច្រើនជាងនេះ ដែលត្រូវបានគេស្គាល់ថា ជាបុគ្គលដែលមានទ្រព្យសម្បត្តិសុទ្ធច្រើន(HNWI)។

អ្នកជំនាញ Dominic Volek នៃ Henley & Partners បានធ្វើអត្ថាធិប្បាយថា នៅពេលដែលពិភពលោក តស៊ូជាមួយភាពតានតឹងភូមិសាស្ត្រនយោបាយ អស្ថិរភាពសេដ្ឋកិច្ច និងសង្គមមហាសេដ្ឋីកាន់តែច្រើនឡើង កំពុងស្វែងរកទីជម្រកសុវត្ថិភាពសម្រាប់ទ្រព្យសម្បត្តិ និងអត្ថប្រយោជន៍សម្រាប់ខ្លួន និងមនុ​ស្ស​ជាទីស្រឡាញ់របស់ពួកគេ។

កាលពីថ្ងៃទី១៩ខែមិថុនា ស្ថានីយទូរទស្សន៍ CNBC បានដកស្រង់របាយការណ៍ដែលនិយាយថា អារ៉ាប់រួម(UAE)គឺជាគោលដៅដ៏ពេញនិយមបំផុត សម្រាប់មហាសេដ្ឋីនៅឆ្នាំនេះ នៅពេលដែលវាត្រូវបានគេរំពឹងថា នឹងទាក់ទាញមហាសេដ្ឋីចំនួន៦,៧០០នាក់។ នេះជាឆ្នាំទី៣ជាប់ៗគ្នា ដែលUAE បានឈរនៅលំដាប់កំពូលក្នុងបញ្ជីនេះ ដោយសារកត្តាមួយចំនួនដូចជា គោលនយោបាយពន្ធទីតាំងយុទ្ធសាស្ត្រ ហេដ្ឋារចនាសម្ព័ន្ធ… ប្រទេសមជ្ឈិមបូព៌ានេះក៏មានកម្មវិធី “ទិដ្ឋាការមាស”ដើម្បីទាក់ទាញអ្នកវិនិយោគ អ្នកជំនួញ និងអ្នកមានទេពកោសល្យ មនុស្សមកពីខាងក្រៅ។

នៅពីក្រោយUAEគឺសហរដ្ឋអាមេរិក និងសិង្ហបុរី ដែលរំពឹងថា នឹងទាក់ទាញមហាសេដ្ឋី៣៨០០ និង៣,៥០០នៅឆ្នាំនេះរៀងគ្នា។ ឈ្មោះដែលនៅសល់ចំនួន៧ នៅក្នុងកំពូលទាំង១០គឺកាណាដា អូស្ត្រាលី អ៊ីតាលី ស្វីស ក្រិក ព័រទុយហ្គាល់ និងជប៉ុន។ ផ្ទុយទៅវិញ យោងតាមរបាយការណ៍ប្រទេសចិនត្រូវបានគេរំពឹងថា នឹងកត់ត្រានូវមហាសេដ្ឋី ដែលចាកចេញពីប្រទេសនេះ ច្រើនជាងគេក្នុងឆ្នាំនេះ(១៥,២០០នាក់) បន្ទាប់មកគឺចក្រភពអង់គ្លេស (៩,៥០០នាក់) និងឥណ្ឌា (៤,៣០០នាក់) ។កត្តាសេដ្ឋកិច្ច និងភាពតានតឹងភូមិសាស្ត្រនយោបាយ បានរួមចំណែកធ្វើឱ្យមហាសេដ្ឋីចិនជាច្រើន ជ្រើសរើសចាកចេញដោយសហរដ្ឋអាមេរិក ជាគោលដៅកំពូល។

ទន្ទឹមនឹងនោះអ្នកជំនាញខ្លះនិយាយថា ភាពចលាចលផ្នែកសេដ្ឋកិច្ច និងនយោបាយ ធ្វើឱ្យចក្រភពអង់គ្លេសលែងជាគោលដៅកំពូល សម្រាប់អ្នកមានលើពិភពលោកទៀតហើយ។លើសពីនេះ មហាសេដ្ឋីឥណ្ឌាជាច្រើននាក់ ចង់ទៅក្រៅប្រទេស ដើម្បីស្វែងរកជីវិតប្រសើរជាងមុន សុវត្ថិភាពជាង និងបរិស្ថានស្អាត៕

ដោយ: គង់ លាងហួរ

អន្តរជាតិ: គម្រោងអគារអាផាតម៉ិនថ្មី មួយចំនួន​បានបើក​ដាក់ឱ្យដំណើរការនៅក្នុងទីក្រុងហូជីមិញ នៅឆមាសទីមួយ ឆ្នាំ២០២៤ ដោយក្នុងនោះអាផាតម៉ិនភាគច្រើន​ មានតម្លៃ​ជាង​១០០លានដុង (៣.៩៣០ដុល្លារអាមេរិក) ក្នុងមួ​យម៉ែត្រ​ការ៉េ។

ក្នុងចំណោមនោះ គម្រោងទំហំ៣,៨ហិកតា ដែលមា​ន​អាផាតម៉ិនចំនួន២.០០០យូនីត នៅលើផ្លូវ Mai Chi Tho ក្នុងសង្កាត់ Thu Duc ត្រូវបានបើកដំណើរការលក់​ក្នុងខែឧសភា​ក្នុងតម្លៃ១៣០លានដុង (៥.១១០ដុល្លារអាមេរិក) ក្នុងមួយម៉ែ​ត្រការ៉េ។

ហេតុដូច្នេះ​ យូនីតអាផាតម៉ិន​ ដែលមាន​បន្ទប់​គេង​ចំនួន​មួយ​ មាន​តម្លៃ​ចាប់ពី៦ ទៅ៧ពាន់​លាន​ដុង និង​យូនីតអាផា​ម៉ិន​​ដែលមានបន្ទប់គេងចំនួន២ មានតម្លៃចាប់ពី៩ទៅ១០ពាន់​លាន​ដុង។ ជាមួយគ្នានេះតម្លៃយូនីតអាផាតម៉ិនថ្មី នៅក្នុងគម្រោង​ដែលមានស្រាប់ ក៏កំពុងហក់ឡើងខ្ពស់កប់ពពកផងដែរ។តួយ៉ាងអាផាតម៉ិន នៅក្នុងគម្រោងមួយនៅលើផ្លូវ Nguyen Co Thach និងផ្លូវ Tran Bach Dang ក្នុងសង្កាត់ Thu Thiem ត្រូវបានដាក់លក់ក្នុងតម្លៃ១២៥ ទៅ១៧៥លានដុងក្នុងមួយ​ម៉ែត្រ​ការ៉េនៅដើមខែឧសភា។

ចំណែក កាលពីខែមីនាកន្លងទៅ អគារអាផាតម៉ិនថ្មីមួយ​នៅក្នុងគម្រោងដែលមានស្រាប់ នៅក្នុងសង្កាត់លេខ៧ ក្នុងទី​ក្រុងហូជីមិញដដែល ត្រូវបានគេប្រកាសដាក់លក់ ក្នុង​តម្លៃចា​ប់ពី៨៨ទៅ១០០លានដុង ក្នុងមួយម៉ែត្រការ៉េ។

នៅក្នុងពេលវេលាឆាប់ៗខាងមុខនេះ អ្នកអភិវឌ្ឍន៍ ក៏គ្រោ ងនឹងបើកដាក់ឱ្យដំណើរការ គម្រោងលក់អាផាតម៉ិន​នៅក្នុង​សង្កាត់ Thi Duc ក្នុងតម្លៃ១២៧លានដុងក្នុងមួយម៉ែត្រការ៉េ។

យោងតាមរបាយការណ៍ពីក្រុមហ៊ុនអចលនទ្រព្យ Dat Xanh Service បានឱ្យដឹងថា តម្លៃអាផាតម៉ិនថ្មី​ជាមធ្យមនៅទី​ក្រុង​ហូជីមិញ បានកើនឡើងចន្លោះពី៣%ទៅ៥% ចាប់តាំង​ពីចុងត្រីមាសទី១ ឆ្នាំ២០២៤ដល់ទំហំទឹកប្រាក់​៨២លានដុង​ក្នុង​មួយម៉ែត្រការ៉េ។

លោក David Jackson នាយកប្រតិបត្តិទីភ្នាក់ងារអ​ចលន​ទ្រព្យពាណិជ្ជ​កម្ម Avison Young Vietnam បានលើកឡើងថា ការកើនឡើងនៃតម្លៃអាផាតម៉ិននេះ គឺដោយសារតែកង្វះ​ការ​ផ្គត់ផ្គង់ថ្មីក្នុងរយៈពេលវែង ព្រោះនៅក្នុងរយៈពេល៤ត្រីមា​ស​ចុងក្រោយនេះ ការផ្គត់ផ្គង់អាផាតម៉ិន​ថ្មីភាគច្រើន មានប្រភព​ចេញមកពីគម្រោងដែលមានស្រាប់៕ប្រភព: Vnexpress៕

ដោយៈ ស៊ីវ ម៉េង

        ភ្នំពេញៈ ការវាយតម្លៃអចលនទ្រព្យ ជាផ្នែកសំខាន់មួយនៅក្នុងវិស័យនេះ ក៏ដូចជា ទិដ្ឋភាពដទៃទៀតទាក់ទងនឹងហិរញ្ញវត្ថុ។

អគ្គនាយកក្រុមហ៊ុនអចលនទ្រព្យ CAMTOP លោកខាត់ សុវណ្ណបានមានប្រសាសន៍ឲ្យដឹង តាមបណ្តាញតេឡេក្រាម​កាល​ពីចុងសប្តាហ៍មុនថា ការវាយតម្លៃអចលនទ្រព្យ មានសា​រៈសំខាន់គ្រប់គោលបំណង និងកាលវេលា ទោះជាសេដ្ឋ​កិច្ច​កំពុងកើនឡើង សេដ្ឋកិច្ចស្ថិតក្នុងសភាពទ្រឹង ឬធ្លាក់ចុះ។

 លោកបញ្ជាក់ថា “វិជ្ជាជីវៈរបស់អ្នកវាយតម្លៃ វាដូចជាវិជ្ជា​ជីវៈគ្រូបង្រៀន គ្រូពេទ្យ ឬវិស្វករដែរ ព្រោះយើងត្រូវ​មាន​ចំណេះ ជំនាញ និងក្រមសីលធ៌មខ្ពស់ក្នុងការបំពេញការងារ”។ លោកបន្ថែមថា “ការវាយតម្លៃចូលរួមសំខាន់ ក្នុងការការពារ​ហានិភ័យក្នុង​វិស័​យ​ហិរញ្ញវត្ថុព្រោះថាការវាយតម្លៃជូនអតិថិជន សម្រាប់ធ្វើជា​មួល​ដ្ឋានសម្រេចចិត្ត”។

លោកខាត់ សុវណ្ណបានបន្តថា អ្វីៗនាពេលនេះ តើអ្នកលក់ អ្នកទិញ ឬម្ចាស់អចលនវត្ថុ​ទទួលយកការពិតឬនៅ? ព្រោះពី​មុននៅពេលសេដ្ឋកិច្ចមានកំណើនល្អ ម្ចាស់អចលនទ្រព្យ​គាត់​មានតម្លៃរបស់គាត់ ដែលការពិតស្ថានភាពបានផ្លាស់ប្តូរនាពេ​ល​នេះ ហេតុនេះធនា​គារក្តី អ្នកទិញ អ្នកលក់ក្តី គួរតែប្រើ​ប្រា​ស់សេវាកម្មវាយតម្លៃ​ពី​ក្រុមហ៊ុនជំនាញណាមួយ ប៉ុ​ន្តែក៏ត្រូវប្រុ​ង​ប្រយ័ត្នផងដែរ ព្រោះក្រុមហ៊ុនខ្លះ បានប្រកាន់យកក្រម​សីល​ធ៌ម ​នៅមានកម្រិ​ត និងចំណេះដឹងរបស់ខ្លួន មិនគ្រប់ជ្រុង​ជ្រោ​យផងដែរ។

លោកបន្តថា បច្ចុប្បន្នទីផ្សារវាយតម្លៃ ក៏បានរងផលប៉ះ​ពាល់ផងដែរ ដោយសារធនាគារ និងគ្រឹះស្ថានមីក្រូហិរញ្ញវត្ថុ​មួយចំនួន បានកាត់បន្ថយការបញ្ចេញឥណទាន និងក្រុមហ៊ុន​វាយ​តម្លៃមានចំនួនច្រើនជាងតម្រូវការទីផ្សារ៕

ដោយៈ គង់ សូរិយា

        ភ្នំពេញៈ ភាពលោភលន់ និងបញ្ហាដីឡើងថ្លៃ បានធ្វើឲ្យ​អ្នកអភិវឌ្ឈន៍ជាច្រើនសាងសង់ផ្ទះ និងអាគារពាណិជ្ជកម្ម មិន​គោរពតាមច្បាប់ បទដ្ឋានគតិយុត្តិរបស់រដ្ឋាភិបាលនោះទេ។

យោងតាមច្បាប់ស្តីពីផ្លូវថ្នល់ ដែលបានអនុម័តឲ្យប្រើប្រា​ស់នៅឆ្នាំ២០១៤ កន្លងមកបាន​បង្ហាញថា រាល់ការសាងសង់សំណង់ ដែលមានច្រកផ្លូវចេញ ចូលជាប់នឹងផ្លូវល្បឿនលឿន ផ្លូវជាតិ ឬផ្លូវខេត្ត គឺតម្រូវឱ្យទុកគម្លាតពីសំណង់ទៅព្រំដីចំណីផ្លូវ ក្នុងកម្រិតណាមួយជាក់លាក់ អាស្រ័យទៅលើទំហំ និងប្រភេទនៃសំណង់នោះ។

ច្បាប់បានចែងលើចំណុចលំអិតជាច្រើន ដួចជា ទី១. ការសាងសង់សំណង់ដូចជា ស្ថានីយប្រេងឥន្ធនៈ ស្ថានីយ៍​ហ្គា​​ស កន្លែងលាងយានយន្ត យានដ្ឋាន ឬសំណង់ប្រហាក់ប្រហែលផ្សេងៗទៀត ដែលមានមនុស្សជួបជុំគ្នាមធ្យម ត្រូវស្ថិតក្នុងចម្ងាយយ៉ាងតិច១៥ម៉ែត្រ ពីខ្សែបន្ទាត់ព្រំដីចំណីផ្លូវ។

ទី២ ចំណែកការសាងសង់មជ្ឈមណ្ឌលពាណិជ្ជកម្ម ពហុកីឡដ្ឋាន ទីលានប្រកួត រោងមហោស្រពមន្ទីរ ពេទ្យ គ្រឹះស្ថានសិក្សា ការរៀបចំផ្សារ ផ្សារណាត់ ពិព័រណ៍ទំនិញ ឬកិច្ចការផ្សេងទៀត ដែលមានមនុស្សជួបជុំគ្នាច្រើន ត្រូវស្ថិតក្នុងចម្ងាយយ៉ាងតិចបំផុត៥០ម៉ែត្រ ពីខ្សែបន្ទាត់ព្រំដីចំណីផ្លូវ។

ច្បាប់ស្តីពីផ្លូវថ្នល់ដដែលបានបញ្ជាក់ថា រាល់ការចាក់ដី ឬធ្វើអ្វីមួយលើដីចំណីផ្លូវ ដើម្បីធ្វើផ្លូវចេញចូលគេហដ្ឋាន ក្រុមហ៊ុន រោងចក្រ សហគ្រាស ឬកន្លែងផ្សេងៗជាប់ផ្លូវថ្នល់ ម្ចាស់គម្រោងត្រូវដាក់ពាក្យស្នើសុំការអនុញ្ញាត ទៅសមត្ថកិច្ចគ្រប់គ្រងផ្លូវថ្នល់ជាមុនសិន។

ចំណែកការជីកកប់ ជីកគាស់ ចោះខួង ឬសកម្មភាពផ្សេងទៀតសម្រាប់បម្រើការងារអាជីវកម្ម និងការដំឡើងផ្ទាំងផ្សាយពាណិជ្ជកម្ម ឬប៉ាណូផ្សេងៗ ដែលអាចបង្កឱ្យខូចខាតនិងប៉ះពាល់តួផ្លូវ ទ្រូងផ្លូវ ចិញ្ចើមផ្លូវ ឬ ចំណីផ្លូវ ក៏ត្រូវសុំការអនុញ្ញាតពីសមត្ថកិច្ចគ្រប់គ្រងផ្លូវថ្នល់ផងដែរ។

មានសំណង់បុរី និងអាគារពាណិជ្ជកម្មរបស់​អ្នកអភិ​វឌ្ឍ​ន៍ធំៗជាច្រើន បាននិងកំពុងសាងសង់លំនៅដ្ឋាន និងអាគារពាណិជ្ជកម្មរបស់ខ្លួន មិនគោរពតាមច្បាប់បទដ្ឋានគតិយុត្តិរបស់រដ្ឋាភិបាល ដែលបង្កឲ្យមានបញ្ហា ដល់ការអភិវឌ្ឍន៍សេដ្ឋកិច្ច សង្គមជាតិ៕

        ដោយៈ គង់ សូរិយា

        ភ្នំពេញៈ ការសិក្សាថ្មីមួយបានរកឃើញថា រាជធានីភ្នំពេញជាប់ចំណាត់ថ្នាក់លេខ២ ក្នុងនាមជាប្រទេសដែលការរស់នៅត្រូវចំណាយខ្ពស់ ធៀបនឹងប្រទេសដទៃក្នុងតំបន់អាស៊ាន។

         យោងតាមស្ថាប័នវាយតម្លៃ Mercer’s 2024 Cost of Living Dataបានឲ្យដឹងថា ទីក្រុងភ្នំពេញរបស់កម្ពុជា ជាប់ចំណាត់ថ្នាក់លេខ២  បន្ទាប់ពីសាំងហ្គាពួ នៅក្នុងទ្វីបអាស៊ានថា ជាប្រទេស ដែលការរស់នៅមានតម្លៃថ្លៃខ្ពស់ ជាងប្រទេសដទៃលើសសមាជិកក្នុងប្រទេស ASEAN។

ការសិក្សានេះបានបញ្ជាក់ថា “នេះចង់មានន័យថា នៅកម្ពុជារបស់របរសព្វយ៉ាង មានតម្លៃខ្ពស់សម្រាប់ការរស់នៅ”។

លោកសាស្រ្តាចារ្យបណ្ឌិតទួស សាភឿនអគ្គលេខាធិការ​រងគណស្ថាបត្យកម្មកម្ពុជា និងអ្នកអភិវឌ្ឍន៍អចលនទ្រព្យដ៏ធំ​មួយរូបបានលើកជាមតតិថា ងាយស្រួលគិតទេ ផលិតផលកសិកម្មយើងទាបលក់ថ្លៃជាងនាំចូល។  ចំណែកសម្ភារៈប្រើប្រាស់រាប់ម៉ឺនមុខនាំចូល ក៏នាំចូលមិនខិតខំជម្រុញផលិតខ្លួនឯង  ឯការនាំចេញផលិតផលធំទៅក្រៅ គឺមិនមែនជាសម្ភារះប្រើប្រាស់ចាំបាច់ក្នុងស្រុក ។ល។លោកបញ្ជាក់ថា “ទេសចរណ៏គឺជាលុយគ្មានផ្សែង កើបបានស្រួល ជាលុយចំណូលសម្រាប់ទប់ទល់ អតិផរណាសាច់ប្រាក់ដុល្លាកំពុងខ្វះខាតក្នុងស្រុក ជាចំណូលដុលសម្រាប់យកមកទ្រទ្រង់សេដ្ឋកិច្ចសង្គម ចឹញ្ចឹមសង្គម ដល់ពេលទេសចរណ៏យើងធ្លាក់គេកើនជុំវិញ និងធ្វើឲ្យយើងមានវិបត្តិទំនិញឡើងថ្លៃ”។

លោកសាស្រ្តាចារ្យទួស សាភឿនបានបន្តថា ចំណូលរដ្ឋពឹងទាំងស្រុងលើពន្ឋដារ និងគយ ពេលប្រទេសជាតិជួបការលំបាកវិបត្តិសេដ្ឋកិច្ចសាកល រដ្ឋមិនហ៊ានផ្អាការយកពន្ឋទេ មានតែបន្តឹង និងបន្ថែមពន្ឋអោយខ្ពស់ទៀត នេះហើយជាហេតុផល។ប្រធានសមាគមសហគ្រិន សារព័ត៌មានសេដ្ឋកិច្ចកម្ពុជា លោកយិន លាងគង់ ដែលបានតាមដានលើការវិវត្តនៃសេដ្ឋ​កិច្ច សង្គមបានលើកឡើងថា បញ្ហាការិយាធិបតេយ្យរបស់ក្រុម​មន្រ្តីគយ និងរដ្ឋាករ និងក្រុមហ៊ុនដឹកជញ្ជូនធំៗ ដែលបន្ថែ​ម​បញ្ហាដល់តម្លៃទំនិញនេះ ដែលក្រៅពីការយកពន្ឋតាមតារាង​តម្លៃ ដែលរដ្ឋបានដាក់ចេញ ពួកគេបានបន្ថែមការយកពន្ឋ​ផ្ទា​ល់​ខ្លួន ដោយដាក់តម្លៃតាមពួកគេចង់បាន លើទំនិញនាំ​ចូល​ពីបរទេស ដែលនេះជាមូលហេតុសំខាន់ ធ្វើឲ្យតម្លៃទំនិញ និង​សេវាកម្មនៅកម្ពុជាមានតម្លៃខ្ពស់។

លោកបញ្ជាក់ថា “វាហាក់ដូចជារឿងអស់សំណើចណាស់ ដែលប្រទេសមួយ ដែលប្រជាជនមានប្រាក់ចំណូល២០៧១​ដុល្លារក្នុងម្នាក់ បែរជាទំនិញមានតម្លៃខ្ពស់ ធៀបជាមួយប្រ​ទេ​សថៃ ដែលប្រាក់ចំណូលរបស់ប្រជាជនម្នាក់ ទទូលបានប្រាក់ចំណូលជាង៨០០០ដុល្លារ សឹង្ហបុរីជាង៨០,០០០ដុល្លារ ឬប្រ​ទេ​សខ្លះ មានចំ​ណូលខ្ពស់ជាងនេះ ប៉ុន្តែតម្លៃទំនិញលើ​ទីផ្សា​ររបស់ពូក​គេ​ថោកជាងកម្ពុជា។

លោកយិន លាងគង់បានបន្ថែមថា លោកបានជួបមិត្តភ័ក្ត​ជាជនជាតិសឹង្ហបុរី ម៉ាឡេស៊ី ថៃ វៀតណាមជាដើម ពួកគេ​ពិតជាអស់សំណើចនឹងតម្លៃ នៃការរស់នៅនៅកម្ពុជា មានតម្លៃ​ថ្លៃជាងប្រទេសរបស់ពួកគេ៕

        ដោយៈ គង់ សូរិយា

        កោះកុងៈ  ថ្នាក់ដឹកនាំតំបន់​សេដ្ឋកិច្ច​ពិសេស​កោះកុង Zhejiang ដែល​ស្ថិត​នៅ​ស្រុក​ស្រែ​អំបិល ខេត្ត​កោះកុង​បាន​សន្យា​ទាក់ទាញ​ក្រុមហ៊ុន​វិនិយោគ ​ឱ្យ​មក​បណ្ដាក់​ទុន​ក្នុង​តំបន់​នេះ ​ឱ្យ​បាន​ចំនួន​១០០​ក្រុមហ៊ុន​នៅ​ក្នុង​ឆ្នាំ​២០២៤នេះ។បច្ចុប្បន្នតំបន់​សេដ្ឋកិច្ច​នេះ ​មាន​ក្រុមហ៊ុន​មក​បណ្ដាក់​ទុន​វិនិយោគ​ចំនួន​២៨​ក្រុមហ៊ុន។

លោក ជូ ចាងជីន ប្រធាន​ក្រុមហ៊ុន ចេជាង អេសអ៊ីហ្សេត (Koh Kong Zhejiang SEZ) បាន​ថ្លែង​ឲ្យដឹងកាលពីចុងសប្តាហ៍មុនថា តំបន់​សេដ្ឋកិច្ច​ពិសេស​កោះកុង ចេជាង បច្ចុប្បន្ន មាន​ការ​បណ្ដាក់​ទុន​វិនិយោគ​ចំនួន​២៨​ក្រុមហ៊ុន ហើយ​នឹង​បន្ត​ទាក់ទាញ​ក្រុមហ៊ុន​វិនិយោគ​ផ្សេង ​ឱ្យ​មក​បណ្ដាក់​ទុន​ក្នុង​តំបន់​នេះ​ឱ្យ​បាន​១០០​ក្រុមហ៊ុន​នៅ​ក្នុង​ឆ្នាំ​២០២៤នេះ។

លោក​ថ្លែង​ដូច្នេះ ​ក្នុង​កិច្ចប្រជុំ​នា​ថ្ងៃ​ទី២១ ខែ​មិថុនា រវាង​មន្ត្រី​នៃ​ក្រុមប្រឹក្សា​អភិវឌ្ឍន៍​កម្ពុជា (CDC) ដែល​ដឹកនាំ​ដោយ​លោក ជា វុទ្ធី អគ្គ​លេខាធិការ​គណៈកម្មាធិការ​វិនិយោគ​កម្ពុជា​នៃCDC ជាមួយ​គណៈ​ប្រតិភូ​ក្រុមហ៊ុន​ចិន​ចំនួន​១១ មកពី​ទីក្រុង​សៀងហៃ ឆឹងទូ ហាងចូវ និង​ខេត្ត​ចេជាងដឹកនាំ​ដោយ​លោក ជូ ចាងជីន។

ក្រុមហ៊ុន​ទាំង​១១​នេះ ​មាន​អាជីវកម្ម​ក្នុង​វិស័យ​សណ្ឋាគារ ថ្នាំពេទ្យ សម្ភារៈ​វេច​ខ្ចប់ (កេស​កាតុង និង​សម្ភារៈ​ប្លាស្ទិក) ឧស្សាហកម្ម​គីមី អេប៉ុង និង​ផលិត​ខ្មៅដៃ និង​គ្រឿង​សង្ហារិម។

លោក ជូ ចាងជីន ថ្លែង​ថា ក្រុមហ៊ុន​អភិវឌ្ឍន៍​តំបន់​សេដ្ឋកិច្ច​ពិសេស កោះកុង ចេជាង នឹង​ចាប់ផ្ដើម​សាងសង់​មជ្ឈ​មណ្ឌល​បណ្ដុះបណ្ដាល​ផ្នែក​ភាសា និង​ផ្នែក​ជំនាញ​បច្ចេកទេ​ស​នៅ​ពេលឆាប់ៗ​ខាង​មុខ​នេះ ដើម្បី​ចូលរួម​ចំណែក​ជាមួយ​រាជរដ្ឋាភិបាល ​ក្នុង​ការ​អភិវឌ្ឍ​ធនធាន​មនុស្ស។

លោក​បន្ថែម​ថា “ការ​អភិវឌ្ឍន៍​ឧស្សាហកម្ម​ទាមទារ​ឱ្យ​មាន​និរន្តរភាព​នៃ​ការ​ផ្គត់ផ្គង់​អគ្គិសនី ប្រព័ន្ធ​ដឹកជញ្ជូន​ដែល​មាន​ភាព​អំណោយ​ផល និង​ការ​ទាក់ទាញ​ឱ្យ​បាន​ច្រើន​ថែមទៀត​នូវ​ឧស្សាហកម្ម​គាំទ្រ ​ដែល​នឹង​ជួយ​ធានា​ដល់​ខ្សែ​ច្រវាក់​ផ្គត់ផ្គង់”។

ជាមួយគ្នានេះ លោក ជា វុទ្ធីបានជំរុញលើកទឹកចិត្តដល់ក្រុមហ៊ុនវិនិយោគទាំង១១នេះ សម្រេច​ចិត្ត​វិនិយោគ​នៅ​កម្ពុជា​ដើម្បី​ច្បាម​យក​ផល​ចំណេញ​រួមគ្នា ដោយ​លោក​បញ្ជាក់​ថា នៅ​ CDC មាន​តុ​ចិន (China Desk) សម្រាប់​រង់ចាំ​ផ្ដល់​ការ​ប្រឹក្សា និង​កិច្ច​សម្រួល​នានា ​ជូន​វិនិយោគិន​ចិន​ផង​ដែរ។ លោក​កត់​សម្គាល់​ពី​កំណើន​វិនិយោគ​ចិន​នៅ​កម្ពុជា។

លោក​បន្ថែម​ថា លោក​ជូ ចាងជីន បាន​ចូលរួម​អភិវឌ្ឍន៍​សង្គម-សេដ្ឋកិច្ច​កម្ពុជា តាម​រយៈ​ការ​បង្កើត​តំបន់​សេដ្ឋកិច្ច​ពិសេស​ចំនួន​ពីរ​នៅ​កម្ពុជា ទី១​​តំបន់​សេដ្ឋកិច្ច​ពិសេស​ខេមបូឌាន ចេជាង ហ្គ័រជី (Cambodian Zhejiang Guoji SEZ) ស្ថិត​នៅ​ស្រុក​ព្រៃនប់ ខេត្ត​ព្រះសីហនុ ដែល​ទទួល​បាន​គោលការណ៍​អនុញ្ញាត​ប្រតិបត្តិការ​នៅ​ឆ្នាំ២០១៨ និង​ទី២​តំបន់​សេដ្ឋកិច្ច​ពិសេស​កោះកុង ដែល​ទើប​ទទួល​បាន​គោលការណ៍​អនុញ្ញាត​ពី CDC កាល​ពី​ខែ​ឧសភា ឆ្នាំ​២០២៤។  តំបន់​សេដ្ឋកិច្ច​ពិសេស ខេមបូឌាន ចេជាង ហ្គ័រជី បច្ចុប្បន្ន​មាន​ការ​បណ្ដាក់​ទុន​វិនិយោគ​ពេញ​ក្នុង​តំបន់​៕

ដោយ: គង់ លាងហួរ
អន្តរជាតិ: ការ​លក់​ផ្ទះ​ថ្មី​នៅក្នុងប្រទេសសិង្ហបុរី​បាន​ធ្លាក់​ចុះ​អស់រយៈ​ពេល​២ខែជាប់ៗគ្នា គិតត្រឹមខែឧសភាកន្លងទៅ ដែលនិន្នាការនេះអាចនឹងបន្តធ្លាក់ចុះបន្ថែមទៀតនៅខែមិថុនានេះ។

ការធ្លាក់ចុះនៃការលក់ផ្ទះ បានបណ្តាលមក​ពី​តម្រូវ​ការ​ទិញផ្ទះដាំក្បាលចុះ និង​កង្វះ​នៃការ​បើក​ដំណើរការ​គម្រោងធំៗ។ កត្តាទាំងនេះ​បាន​បន្ត​ជះផលប៉ះពាល់មកលើ​ទីផ្សារអចលនទ្រព្យនៅសិង្ហបុរី។

យោងតាមទិន្នន័យដែលបានចេញផ្សាយដោយអាជ្ញាធរអភិវឌ្ឍន៍ទីក្រុង (URA) បង្ហាញថា អ្នកអភិវឌ្ឍន៍បានលក់ផ្ទះដាច់ចំនួន២២១យូនីតប៉ុណ្ណោះក្នុងខែឧសភា បើធៀបនឹង៣០១យូនីតនៅក្នុងខែមេសា។ ប្រសិនបើប្រៀបធៀបទៅនឹងឆ្នាំមុន ការលក់ផ្ទះនៅសិង្ហបុរីបានធ្លាក់ចុះ៧៩%។

ម្យា៉ងទៀត ការដំឡើងអត្រាការប្រាក់ខ្ពស់ និងវិធានការដំឡើងពន្ធប្រថាប់ត្រា បានធ្វើឱ្យទីផ្សារលំនៅដ្ឋាននៅសិង្ហបុរីធ្លាក់ចុះ។ ក្នុងរយៈពេលប៉ុន្មានត្រីមាសខាងមុខនេះ ការផ្គត់ផ្គង់ថ្មីៗនឹងត្រូវបានដាក់ចូលទៅក្នុងទីផ្សារ ដើម្បីដោះស្រាយកង្វល់អំពីលទ្ធភាពទិញផ្ទះ។

លោកស្រី Christine Sun ប្រធានផ្នែកស្រាវជ្រាវ និងជាអ្នកយុទ្ធសាស្រ្តនៅទីភ្នាក់ងារអចលនទ្រព្យ OrangeTee Group បានលើកឡើងថា “ការលក់ផ្ទះថ្មីនៅក្នុងខែមិថុនាហាក់មិនអាចកើនឡើងវិញនោះទេ ព្រោះនេះគឺជាពេលវេលា ដែលគ្រួសារនានាចូលចិត្តធ្វើដំណើរកំសាន្តជាមួយកូនៗ ក្នុងអំឡុងថ្ងៃឈប់សម្រាកពីការសិក្សារយៈពេល១ខែ”។

ថ្មីៗនេះ ក្រុមហ៊ុនប្រឹក្សាអចលនទ្រព្យ Knight Frank បានព្យាករណ៍ថា សិង្ហបុរីនឹងលក់ចេញផ្ទះថ្មីបានសរុបប្រមាណតែ៧.០០០យូនីតប៉ុណ្ណោះ នៅឆ្នាំ២០២៤ទាំងមូល បើធៀបនឹងការព្យាករណ៍ពីមុនចំនួន៩.០០០យូនីត លុះត្រាតែមានការកាត់អត្រាការប្រាក់ ឬវិធានការរបស់រដ្ឋាភិបាលត្រូវបានបន្ធូរបន្ថយ។

យ៉ាងណាមិញ តម្លៃ​ផ្ទះនៅ​តែ​មាន​ការ​កើន​ឡើងជាប់ជានិច្ច ទោះ​បី​ជា​ការ​លក់ ឬតម្រូវការបានធ្លាក់​ចុះ​យ៉ាងគំហុកយ៉ាងណាក្តី។ ក្នុងនោះ តម្លៃផ្ទះឯកជននៅសិង្ហបុរី បានកើនឡើងរយៈពេល៣ត្រីមាសជាប់ៗគ្នាមកហើយ។

តួយ៉ាង កាលពីខែឧសភាកន្លងទៅ អាផាតមុិនចំនួន១យូនីតស្ថិតនៅក្នុងគម្រោងអភិវឌ្ឍន៍អគារប្រណីត Skywaters Residences ត្រូវបានទិញយកដោយជនបរទេសម្នាក់ ដែលមិនស្គាល់សញ្ជាតិក្នុងតម្លៃទឹកប្រាក់ចំនួន៣៥លានដុល្លារអាមេរិក។

ទន្ទឹមនឹងនេះ អ្នកអភិវឌ្ឍន៍ក៏កំពុងកាត់បន្ថយការបើកដំណើរការលក់ផ្ទះនៅក្នុងគម្រោងថ្មីៗផងដែរ។ ជាក់ស្ដែង កាលពីខែឧសភា ឆ្នាំនេះ អ្នកអភិវឌ្ឍន៍បានប្រកាសដាក់លក់ផ្ទះឯកជនថ្មីត្រឹមតែ២៤៨យូនីតប៉ុណ្ណោះ ដែលមានការធ្លាក់ចុះយ៉ាងខ្លាំង បើធៀបនឹងការបើកដំណើរការលក់ផ្ទះជិត១.៦០០យូនីតកាលពីខែឧសភាឆ្នាំមុន៕ប្រភព: Bloomberg៕