ដោយៈ គង់ ហ្វីអូណា

        វៀតណាមៈ ក្រុមហ៊ុន Hung Hua Group ដែលមានអាយុកាលវិនិយោគប្រមាណ៥០ឆ្នាំរបស់ប្រទេសវៀតណាម បានសិក្សាលទ្ឋភាពក្នុងការវិនិយោគនៅកម្ពុជា។

ព័ត៌មាននេះត្រូវបានលើកឡើង កាលពីថ្ងៃទី៨ ខែមិថុនា ឆ្នាំ២០២៤ ដែលត្រូវនឹងថ្ងៃទី២ នៃដំណើរទស្សនកិច្ចផ្សព្វផ្សាយ និងទាក់ទាញការវិនិយោគលើវិស័យកសិ -ឧស្សាហកម្មនៅកម្ពុជានៅប្រទេសវៀតណាម ប្រតិភូគណៈកម្មាធិការវិនិយោគកម្ពុជា ដឹកនាំដោយ លោកជា វុទ្ធី អគ្គលេខាធិការក្រុម​ប្រឹក្សាអភិវឌ្ឍន៍កម្ពុជា។

ក្រុមហ៊ុន Hung Hua Group ដែលមានអាយុកាលវិនិយោគប្រមាណ៥០ឆ្នាំ និងមានការទទួលស្គាល់គុណភាពជាអន្តរជាតិ លើផលិផលចំណីអាហារ ដោយផ្តោតលើមុខសញ្ញាអាទិភាព ដូចជា បង្គា ត្រី កាហ្វេ ស្វាយចន្ទី បន្លែផ្លែឈើ។ល។ ដែលឈានមុខគេផ្គត់ផ្គង់លើទីផ្សារនៅ សហរដ្ឋអាមេរិក អឺរ៉ុប ជប៉ុន កូរ៉េ អូស្ត្រាលី ប្រទេសនៅមជ្ឈឹមបូព៌ា និងបណ្តាប្រទេសផ្សេងៗទៀតនៅអាស៊ី។

គណៈប្រតិភូ បានទស្សនកិច្ចឃ្លាំងត្រជាក់ ផ្ទុកដាក់ផលិតផលសម្រេចសម្រាប់ត្រៀមនាំចេញ និងសហគ្រាសកែច្នៃផលិតផលកសិផលនិងចំណីអាហារចំនួន៣ ដែលជាបុត្រសម្ព័ន្ធរបស់ក្រុមហ៊ុន ដែលមានសកម្មភាពផលិត និងកែច្នៃផលិតផលគ្រាប់ស្វាយចន្ទី ស្វាយ ចេក ឱឡឹក និងចំណីអាហារផ្សេងៗ ដែលជាតម្រូវការខ្ពស់នៅលើទីផ្សារចំណីអាហារ។

ក្នុងឱកាសទស្សនកិច្ចនេះ គណៈប្រតិភូបានស្វែងយល់បន្ថែមពីកិច្ចការនានា ដែលទាក់ទងនឹងសកម្មភាពវិនិយោគ និងដំណើរប្រតិ​បត្តិការរបស់ក្រុមហ៊ុន ដែលមានដូចជា៖ ការសុំច្បាប់សាងសង់, ការរៀបចំអាងប្រព្រឹត្តកម្មទឹកកខ្វក់ ផលិតភាពការងារនិងកម្រៃពលកម្មប្រចាំខែ, ប្រភពផ្គត់ផ្គង់និងការប្រមូលទិញបន្លែផ្លែឈើ ត្រីសាច់សម្រាប់ធ្វើការកែច្នៃ, ខ្សែច្រវ៉ាក់ផលិតកម្ម និងការទទួលបាននូវការទទួលស្គាល់ជាអន្តរជាតិពីសុវត្ថិភាព គុណភាព និងអនាម័យនៃចំណីអាហារដែលផលិតរួច, នីតិវិធី និងរយៈពេលនៃការនាំចេញទៅកាន់ផ្សារនៅក្រៅប្រទេស, និងការផ្តល់ការគាំទ្រនានា ពីសំណាក់រដ្ឋាភិបាល។

ស្របតាមអនុស្សារណៈយោគយល់គ្នា រវាងក្រុមហ៊ុន Rithy Granith Cambodia Co., Ltd. និងក្រុមហ៊ុន Hung Hua Corporation ដែលបានចុះហត្ថលេខា ក្នុងអំឡុងដំណើរទស្សនកិច្ចរបស់សម្តេចធិបតីនាយករដ្ឋមន្ត្រី នៅប្រទេសវៀតណាម កន្លងទៅ  ក្រុមហ៊ុន Hung Hua បាននិងកំពុងសិក្សា ជ្រើសរើសទីតាំងវិនិយោគនៅកម្ពុជា ដើម្បីពង្រីកការវិនិយោគ ក្នុងវិស័យកែច្នៃកសិផលនិងចំណីអាហារ។

អ្នកតំណាងក្រុមហ៊ុន បានកោតសរសើរ និងវាយតម្លៃខ្ពស់ចំពោះសក្តានុពល ផលិតផលកសិកម្មរបស់កម្ពុជា ជាពិសេសស្វាយ​ចន្ទី ស្វាយកែវរមៀត និងដំណាំកសិផលផ្សេងៗទៀត។

ក្រុមហ៊ុន Hung Hua បានអះអាងថា នឹងពន្លឿនការសិក្សារៀប​ចំជំរុញខ្សែច្រវ៉ាក់កែច្នៃ ផលិតផលកសិផលនៅកម្ពុជា ឱ្យទទួលបានជោគជ័យ និងបានថ្លែងអំណរគុណ ដល់ការគាំទ្ររបស់ក្រុមប្រឹក្សាអភិវឌ្ឍន៍កម្ពុជា ក្នុងការផ្តល់នូវព័ត៌មាននានាបន្ថែម ក្នុងឱកាសដំណើរទស្សនកិច្ចនេះ និងការត្រៀមជួយដល់ការវិនិយោគ របស់ក្រុមហ៊ុននៅកម្ពុជា៕

ដោយ: គង់ លាងហួរ

ហ្សាការតា: ប្រទេសឥណ្ឌូនេស៊ី គ្រោងតេស្តសាកល្បងតាក់ស៊ីហោះដំបូងរបស់ខ្លួននៅឯរដ្ឋធានីថ្មី Nusantara នាខែកក្កដាខាងមុខ មុនពេលសម្រេច ដាក់ឱ្យហោះហើរជាផ្លូវការ ក្នុងពិធីប្រារព្ធបុណ្យឯករាជ្យជាតិនៅថ្ងៃទី១៧ ខែសីហា។

លោក Bambang Susantono ប្រធានអាជ្ញាធរទីក្រុង Nusantara (IKN) បានមានប្រសាសន៍ឱ្យដឹងកាលពីពេលថ្មីៗនេះថា “គ្រឿងបន្លាស់ និងថ្មអាគុយរបស់តាក់ស៊ីហោះនេះ ត្រូវបានដឹកជញ្ជូនមកដល់ទីក្រុង Balikpapan ក្នុងខេត្ត East Kalimantan រួចជាស្រេចហើយ”។

ការតេស្តសាកល្បង នឹងរៀបចំធ្វើឡើង នៅឯព្រលានយន្តហោះ Samarinda បន្ទាប់ពីអាជ្ញាធរឥណ្ឌូនេស៊ី ត្រូវចំណាយពេល១ខែ ដើម្បីត្រួតពិនិត្យ និងផ្គុំគ្រឿងបន្លាស់ ហើយតាក់ស៊ី ដែលដើរដោយថាមពលអគ្គិសនីនេះ អាចផ្ទុកមនុស្សបានចំនួន៥នាក់។ការផលិតតាក់ស៊ីហោះនេះ កើតចេញពីកិច្ចសហការគ្នារវាងវិទ្យាស្ថានស្រាវជ្រាវអវកាសកូរ៉េ (KARI) និងក្រុមហ៊ុន Hyundai Motors។ កាលពីឆ្នាំ២០២២កន្លងទៅ អាជ្ញាធរទីក្រុង Nusantara និងក្រុមហ៊ុន Hyundai បានចុះអនុស្សរណៈនៃការយោគយល់គ្នា ដើម្បីអភិវឌ្ឍន៍ប្រព័ន្ធ អេកូចល័តផ្លូវអាកាសដ៏ទំនើប នៅក្នុងប្រទេសឥណ្ឌូនេស៊ី។

ប្រព័ន្ធផ្សព្វផ្សាយក្នុងស្រុកបានរាយការណ៍ថា “ក្តីស្រមៃក្នុងការចង់ធ្វើដំណើរលើតាក់ស៊ីហោះលើអាកាស កំពុងក្លាយជាការពិតហើយ ដោយក្នុងនោះឥណ្ឌូនេស៊ី ស្ថិតក្នុងចំណោមបណ្តាប្រទេសមួយចំនួននៅលើពិភពលោក ដូចជា អារ៉ាប់រួម ស្លូវ៉ាគី និងជប៉ុន ដែលបានចាប់ផ្តើមតេស្តសាកល្បងតាក់ស៊ីប្រភេទនេះ”។

ការដាក់ឱ្យដំណើរការ សាកល្បងតាក់ស៊ីហោះនេះ គឺស្របតាមមហិច្ឆិតារបស់រដ្ឋាភិបាល​ឥណ្ឌូណេស៊ី​ ដែលបាន​ចាត់ទុក​​រដ្ឋធានីថ្មី Nusantara ជា​ទីក្រុង​ ដែលប្រកាន់គោលការណ៍ស្តីពី អព្យាក្រឹត​កាបូន​ដំបូង​គេ​បង្អស់ នៅក្នុងប្រទេសរបស់ខ្លួន៕ប្រភព: CNA៕

ដោយ: គង់ លាងហួរ

អន្តរជាតិ: លោកស្រី Gina Raimondo រដ្ឋមន្ត្រីក្រសួងពាណិជ្ជកម្មអាមេរិក បានថ្លែងថា ក្រុមហ៊ុនមូលធនឯកជន KKR និងក្រុមហ៊ុន Global Infrastructure Partners (GIP) និងទីភ្នាក់ងារនៃភាពជាដៃគូឥណ្ឌូ-ប៉ាស៊ីហ្វិក ដើម្បីវិបុលភាព បាននិងកំពុងបង្កើតសម្ព័ន្ធមួយ ដើម្បីបោះទុនវិនិយោគ២៥ពាន់លានដុល្លារ លើវិស័យហេដ្ឋារចនាសម្ព័ន្ធនៅក្នុងតំបន់នេះ។

លោកស្រី Raimondo បានបញ្ជាក់បន្ថែមថា ការវិនិយោគទាំងនេះ នឹងរួមមានដូចជា ការសាងសង់មជ្ឈមណ្ឌលទិន្នន័យបៃតងនៅក្នុងប្រទេសឥណ្ឌូនេស៊ី គម្រោងផលិតថាមពលកកើតឡើងវិញ នៅក្នុងប្រទេសហ្វីលីពីន ព្រមទាំងហេដ្ឋាសម្ព័ន្ធនៅក្នុងប្រទេសឥណ្ឌា។

ជាមួយគ្នានេះ ទីក្រុងវ៉ាស៊ីនតោន កំពុងបោះទុនវិនិយោគបន្ថែមទៀតទៅលើប្រព័ន្ធអ៊ីនធឺណេត បច្ចេកវិទ្យាបញ្ញាសិប្បនិម្មិត(AI) និងការការពារក្រោមសមុទ្រ ជាមួយសម្ព័ន្ធមិត្តរបស់ខ្លួននៅក្នុងតំបន់។

លើសពីនេះទៀត សហរដ្ឋអាមេរិកក៏បានបង្កើតសម្ព័ន្ធភាព នៃលទ្ធិប្រជាធិបតេយ្យ ជាមួយនឹងគោលដៅសេដ្ឋកិច្ច និងសន្តិសុខរួមគ្នា តាមរយៈការបង្កើតក្រុមប្រទេស Quad ដែលមានសមាជិកដូចជា អូស្ត្រាលី ឥណ្ឌា និងជប៉ុនផងដែរ។ឥណ្ឌូប៉ាស៊ីហ្វិកគឺជាតំបន់ ដែលមានប្រជាជនរស់នៅជាងពាក់កណ្តាល នៃចំនួនប្រជាជនសរុបរបស់ពិភពលោក និងគ្របដណ្តប់ចំណែ​ក៦០ភាគរយ នៃសេដ្ឋកិច្ចសកល ដែលលាតសន្ធឹងលើឆ្នេរសមុទ្រប៉ាស៊ីហ្វិក និងមហាសមុទ្រឥណ្ឌា។

រដ្ឋបាលលោកប្រធានាធិបតីអាមេរិក ចូ បៃដិន បានដាក់ចេញយុទ្ធសាស្ត្រឥណ្ឌូប៉ាស៊ីហ្វិករបស់ខ្លួន កាលពី២ឆ្នាំមុន ដោយធ្វើការរួមគ្នាជាមួយដៃគូក្នុងតំបន់នេះ ដើម្បីធានាឱ្យមានការតភ្ជាប់ វិបុលភាព សុវត្ថិភាព និងមានភាពធន់។ យុទ្ធសាស្ត្រនេះ ក៏មានគោលដៅប្រជែងឥទ្ធិពលរបស់ទីក្រុងប៉េកាំង នៅក្នុងតំបន់ផងដែរ។

សហរដ្ឋអាមេរិកបានបង្ហាញក្តីកង្វល់របស់ខ្លួន ផ្នែកសន្តិសុខនៅក្នុងតំបន់នេះ ជាពិសេសកូរ៉េខាងជើង និងការគាំទ្ររបស់កូរ៉េខាងជើង ចំពោះប្រទេសរុស្ស៊ី ក៏ដូចជា មហិច្ឆិតារបស់ប្រទេសចិន លើកោះតៃវ៉ាន់ ដែលទីក្រុងប៉េកាំងចាត់ទុកត្រឹមតែ ជាផ្នែកមួយនៃទឹកដីរបស់ខ្លួន៕ប្រភព: Reuters៕

        ដោយៈ គង់ ហ្វីអូណា

សៀមរាបៈ ក្រុមហ៊ុន Management Venture Asia (Cambodia) Ltd នៃប្រទេសម៉ាឡេស៊ី បានស្នើសុំការសម្របសម្រួលលើគំរោងវិនិយោគការដឹកជញ្ជូនតាមផ្លូវអាកាសពីព្រលានយន្តហោះសៀមរាប អង្គរមកកាន់ទីក្រុងសៀមរាប។

គំរោងនេះជាផ្នែកមួយអាចចូលរួមចំណែក អភិវឌ្ឍវិស័យទេស​ចរណ៍ និងវិស័យកសិកម្មឱ្យកាន់ល្អប្រសើរ និងរីកចម្រើនក្នុងប្រទេសកម្ពុជា ក៏ដូចជាក្នុងខេត្តសៀមរាបផងដែរ។

ព័ត៌មាននេះត្រូវបានលើកឡើងកាលពីសប្តាហ៍មុន ក្នុងពេលលោក សុខ ថុល អភិបាលរងខេត្ត តំណាងដ៏ខ្ពង់ខ្ពស់លោកប្រាក់ សោភ័ណ អភិបាល នៃគណៈអភិបាលខេត្តសៀមរាប បានទទួលជួបសម្តែងការគួរសម និងពិភាក្សាការងារជាមួយក្រុមហ៊ុនManagement Venture Asia (Cambodia) Ltd នៃប្រទេសម៉ាឡេស៊ី ដឹកនាំដោយ លោក Michael Tan Shyue Jing ប្រធានផ្នែកវិនិយោគ និងមានការចូលរូមពីមន្រ្តីពាក់ព័ន្ឋ។

លោក Michael បានស្នើសុំការគាំទ្រ និងការសម្របសម្រួលពីរដ្ឋបាល លើការវិនិយោគនានា ដូចជា វិស័យដឹកជញ្ជូនតាមផ្លូវអាកាស ពីអាកាសយានដ្ឋានអន្តរជាតិសៀមរាប អង្គរ ដែលជាផ្នែកមួយអាចចូលរួមចំណែក អភិវឌ្ឍវិស័យទេសចរណ៍ និងវិស័យកសិ​កម្មឱ្យកាន់ល្អប្រសើរ និងរីកចម្រើនក្នុងប្រទេសកម្ពុជា ក៏ដូចជាក្នុងខេត្តសៀមរាបផងដែរ។

លោកអភិបាលរងខេត្ត ក៏បានថ្លែងអំណរគុណ និងស្វាគមន៍ យ៉ាងកក់ក្តៅ ចំពោះដំណើរបំពេញទស្សនកិច្ច ក៏ដូចជាជំនួបសម្តែងការគួរសម និងពិភាក្សាការងារនាឱកាសដ៏វិសេសវិសាលនេះ។

លោក អភិបាលរងខេត្ត ក៏សូមសម្តែងការស្វាគមន៍ និងគាំទ្រដ៏កក់ក្តៅជាទីបំផុត ចំពោះចំណាប់អារម្មណ៍ លើការបណ្តាក់ទុនវិនិយោគ លើវិស័យដឹកជញ្ជូនតាមផ្លូវអាកាសរបស់ក្រុមហ៊ុន ដើម្បីរួមគ្នាជម្រុញ និងអភិវឌ្ឍវិស័យទេសចរណ៍ និងវិស័យកសិកម្មឱ្យកាន់ល្អប្រសើរ  ក៏ជារួមចំណែកអភិវឌ្ឍសេដ្ឋកិច្ចជាតិ ឱ្យកាន់តែរីកចម្រើន នាពេលអនាគតផងដែរ៕

ភ្នំពេញ៖ នាព្រឹកថ្ងៃសៅរ៍ ទី៨ ខែមិថុនា ឆ្នាំ២០២៤នេះ ក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន បានចុះពិនិត្យ តាមដានការធ្វើតេស្តសាកល្បងរថភ្លើងប្រភេទ Kiha-183 ដែលត្រូវបានកែសម្រួលប្រព័ន្ធហ្វ្រាំង និងទទឹងកង់ពី ១០៦៧ មិល្លីម៉ែត្រ មក១០០០ មិល្លីម៉ែត្រ រួចរាល់ចំនួន ៤គ្រឿង នៅខេត្តព្រះសីហនុ។

ក្រុមហ៊ុន Royal Railway Cambodia បានដាក់ឱ្យបើកសាកល្បងនៅថ្ងៃទី៨ ខែមិថុនា ឆ្នាំ២០២៤ នេះតែម្តង លើផ្លូវដែកភាគខាងត្បូង ព្រះសីហនុ-ភ្នំពេញ ដោយត្រូវពិនិត្យដំណើរការកង់ ប្រព័ន្ធហ្វ្រាំង និងការងារផ្សេងៗទៀតបណ្តើរៗតាមដំណាក់កាល នៃការរត់លើផ្លូវដែក ដើម្បីប្រាកដថាមានសុវត្ថិភាពសម្រាប់ដឹកជញ្ជូនអ្នកដំណើរ មុននឹងដាក់ឱ្យដំណើរការជាផ្លូវការ។

គួរបញ្ជាក់ថា ក្រោយដឹកពីជប៉ុនតាមកប៉ាល់មកដល់កម្ពុជា ក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន និងក្រុមហ៊ុន Royal Railway Cambodia បានចុះពិនិត្យរួមគ្នា លើការងារកែតម្រូវកង់ និងប្រព័ន្អហ្វ្រាំងរថភ្លើងដឹកអ្នកដំណើរឱ្យស្របតាមស្តង់ដារផ្លូវដែកកម្ពុជាដើម្បីធានាសុវត្ថិភាព ប្រសិទ្ធភាព និងនិរន្តរភាព។

ចំពោះការដាក់ឱ្យដំណើរការជាផ្លូវការ ក្រុមហ៊ុន RRC នឹងជម្រាបជូននាពេលបន្ទាប់ ដោយត្រូវបែងចែកការបើកបរសម្រាប់អ្នកដំណើរជាពីរ ក្នុងនោះផ្លូវរថភ្លើងភាគខាងត្បូង ភ្នំពេញ-ព្រះសីហនុ តម្រូវឱ្យរត់ ៨០km/h និងសម្រាប់ផ្លូវរថភ្លើងភាគខាងជើង ភ្នំពេញ-ប៉ោយប៉ែត តម្រូវឱ្យរត់ចន្លោះពី ៣០-៥០ km/h៕

ដោយ: គង់ លាងហួរ

ប៉េកាំងៈ ក្រុមហ៊ុន​ពាណិជ្ជកម្ម​អេឡិចត្រូនិក​យក្ស​Alibaba រប ស់​ប្រទេសចិន ដែលមានលោកJack Ma ជាស្ថាបនិក កំពុង​បង្កើន​ការ​ពង្រីក​វត្តមានរបស់ខ្លួនជា​សកល​ តាមរយៈការបម្រើសេវាកម្ម​ថ្មី​ ក្នុង​គោល​បំណង​ ទាក់ទាញ​អាជីវកម្ម​ខ្នាត​តូច ​នៅ​សហរដ្ឋអាមេរិក និង​តំបន់អឺរ៉ុប។

វេបសាយ Alibaba.com ដែលជាវេទិកាអាជីវកម្មមួយរបស់ក្រុមហ៊ុន Alibaba បានប្រកាសថា ខ្លួននឹងចាប់ផ្តើមសេវាកម្មថ្មី ដែលមានឈ្មោះថា “Alibaba Guaranteed” ដើម្បីផ្តល់នូវភាពប្រាកដប្រជាកាន់តែខ្លាំងលើការដឹកជញ្ជូន ការទូទាត់ និងការដោះស្រាយវិវាទ។

វេទិកានេះ គឺជាផ្នែកមួយនៃអាជីវកម្មអន្តរជាតិ ដែលកំពុងរីកចម្រើនយ៉ាងឆាប់រហ័សរបស់ក្រុមហ៊ុន Alibaba តាមរយៈលក់ទំនិញដោយផ្ទាល់ ទៅកាន់អ្នកប្រើប្រាស់នៅក្រៅប្រទេស តាមរយៈគេហទំព័រនានាដូចជា គេហទំព័រ AliExpress ជាដើម។

ក្រុមហ៊ុនបានគូសបញ្ជាក់ នៅក្នុងសេចក្តីប្រកាសព័ត៌មានមួយថា សេវាកម្មថ្មីរបស់វេបសាយ Alibaba.com មានគោលបំណងផ្តល់ឱ្យអតិថិជន ដែលកម្មង់ទិញទំនិញតាមអនឡាញ នូវកាលបរិច្ឆេទដឹកជញ្ជូនកាន់តែច្បាស់លាស់បន្ថែមទៀត។

លោក Kuo Zhang ប្រធានវេបសាយ Alibaba.com បានថ្លែងនៅក្នុងបទសម្ភាសន៍មួយ ជាមួយសារពត៌មាន CNBC កាលពីថ្ងៃព្រហស្បតិ៍ម្សិលមិញនេះថា “យើងគិតថា សេវាកម្មថ្មីនេះគឺស្របតាមនិន្នាការពិភពលោកនាពេលបច្ចុប្បន្ន”។

វេទិកាអនឡាញមួយនេះ បានប្រមូលផលិតផលភាគច្រើនពីបណ្តាក្រុមហ៊ុនផ្គត់ផ្គង់ ដែលមានមូលដ្ឋាននៅប្រទេសចិន ដើម្បីលក់ទៅកាន់អាជីវកម្មខ្នាតតូច នៅតំបន់អឺរ៉ុប សហរដ្ឋអាមេរិក និងបណ្តាប្រទេសផ្សេងទៀតនៅលើពិភពលោក។

លោក Zhang បានអះអាងទៀតថា “ក្នុងរយៈពេល៥ឆ្នាំចុងក្រោយនេះ ចំនួនអ្នកទិញនៅលើវេបសាយ Alibaba.com បានកើនឡើងយ៉ាងតិចណាស់ចំនួន៣ដង ដោយក្នុងនោះ ការទិញទំនិញសរុបមានទំហំទឹកប្រាក់ ប្រហែល៥០ពាន់លានដុល្លារ”៕ប្រភព:CNBC៕

ដោយ: គង់ លាងហួរ

សៀងហៃ: យោងតាមការស្ទង់មតិឯកជនមួយ បានបង្ហាញថា តម្លៃផ្ទះថ្មីនៅក្នុងប្រទេសចិន បានកើនឡើងបន្តិចបន្តួច នៅក្នុងខែឧស​ភា ដែលត្រូវបានជំរុញ ដោយការដាក់ឱ្យអនុវត្តន៍វិធានការគាំទ្រមួយចំនួនរបស់រដ្ឋាភិបាលចិន។

យោងតាមទិន្នន័យ ពីក្រុមហ៊ុនស្រាវជ្រាវអចលនទ្រព្យ China Index Academy បានបង្ហាញថា តម្លៃផ្ទះថ្មីជាមធ្យមនៅទូទាំងទីក្រុងចំនួន១០០នៅប្រទេសចិន បានកើនឡើងក្នុងអត្រាប្រចាំខែចំនួន០,២៥ភាគរយ កាលពីខែខែឧសភា បន្ទាប់ពីកើនឡើង០,២៧%ក្នុងខែមេសា។

វិស័យអចលនទ្រព្យ ដែលជាសសរស្តម្ភនៃសេដ្ឋកិច្ចចិន បានធ្លាក់ចូលទៅក្នុងវិបត្តិ ចាប់តាំងពីឆ្នាំ២០២១ បន្ទាប់ពីរដ្ឋាភិបាលចិនបានរឹតបន្តឹងបទប្បញ្ញត្តិស្តីពី ការផ្តល់ប្រាក់កម្ចីដល់អ្នកអភិវឌ្ឍន៍ ដែលការណ៍នេះ បានបង្កឱ្យមានវិបត្តិសាច់ប្រាក់។

យ៉ាងណាមិញ ក្នុងរយៈពេលប៉ុន្មានខែកន្លងមកនេះ រដ្ឋាភិបាលចិនបាននិងកំពុងខិតខំ ដាក់ចេញវិធានការថ្មី ក្នុងការជំរុញការលក់ផ្ទះ ឬបង្កើនសាច់ប្រាក់ងាយស្រួល តាមរយៈការបន្ធូរបន្ថយលក្ខខណ្ឌនានាជាបន្តបន្ទាប់។

កាលពីពាក់កណ្តាលខែឧសភា ប្រទេសចិនបានប្រកាសចំណា​ត់ការជាប្រវត្តិសាស្ត្រ ដើម្បីស្តារវិស័យនេះឱ្យមានស្ថិរភាព ដោយក្នុងនោះ ធនាគារកណ្តាលចិនបានបន្ធូរបន្ថយច្បាប់ និងសម្របសម្រួលការផ្តល់មូលនិធិបន្ថែម ចំនួន១៤០ពាន់លានដុល្លារ ខណៈរដ្ឋបាលក្នុងតំបន់មូលដ្ឋាន បានប្តេជ្ញាចិត្តក្នុងការទិញអាផាតម៉ិន ដែលមានស្រាប់នៅក្នុងទីផ្សារ ប៉ុន្តែលក់មិនដាច់។

ក្រុមអ្នកវិនិយោគមានក្តីសង្ឃឹមថា ការដាក់ចេញនូវវិធានការលើកទឹកចិត្តទាំងនេះ បានបង្ហាញឱ្យឃើញពីការចាប់ផ្តើមធ្វើអន្តរា​គមន៍ដោយរដ្ឋាភិបាលចិន ដើម្បីជំរុញតម្រូវការអ្នកទិញផ្ទះ និងទប់ស្កាត់ការធ្លាក់ចុះនៃតម្លៃផ្ទះ។

ក្រុមហ៊ុន China Index Academy បានបញ្ជាក់នៅក្នុងរបាយការណ៍ស្ទង់មតិថា “បន្ទាប់ពីការអនុវត្តន៍គោលនយោបាយថ្មី ចំនួនអតិថិជន ដែលបានអញ្ជើញទៅដើរមើល គម្រោងអចលនទ្រព្យមួយចំនួនបានកើនឡើង។ ប៉ុន្តែវានៅតែត្រូវការពេលវេលាយូរជាងនេះ មុនពេលដែលពួកគេអាចសម្រេចចិត្តទិញ”។

ក្រុមហ៊ុនស្រាវជ្រាវអចលនទ្រព្យខាងលើបន្ថែមថា “នាពេលអនាគត ល្បឿននៃការស្ទុះងើបឡើងវិញ នៃទីផ្សារអចលនទ្រព្យចិន នៅតែបន្តអាស្រ័យទៅលើ ស្ថានភាពប្រាក់ចំណូលរបស់ប្រជាជនក្នុងស្រុក”៕ប្រភព: New Straits Times៕