ដោយៈ និស្ស័យ

        កំពង់ស្ពឺៈ សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានបង្ហើបថា រដ្ឋាភិបាលគ្រោងសាងសង់ផ្លូវថ្មី មួយខ្សែតភ្ជាប់ ខេត្តកំពង់ស្ពឺ ទៅកាន់ខេត្តកោះកុង។

សម្តេចបានថ្លែងបែបនេះ នៅក្នុងពិធីសម្ភោធ មជ្ឈមណ្ឌលពុទ្ឋសាសនានៅលើភ្នំគិរីរម្យ ក្នុងខេត្តកំពង់ស្ពឺកាលពីសប្តាហ៍មុនថា ការសាងសង់ផ្លូវថ្មីនេះ នឹងជម្រុញសក្តានុពលខេត្តកំពង់ស្ពឺ ឲ្យរីកចម្រើនលឿន ឲ្យមាន​ការអភិវឌ្ឍលឿនដូចនៅរាជធានីភ្នំពេញ។សម្តេចបន្ថែមថា “ផ្លូវថ្មីមួយខ្សែនេះ នឹងពង្រឹងសក្តានុពលខេត្តនេះឲ្យកាន់តែខ្លាំង ប៉ុន្តែបើខេត្តនេះមិនមានធនធានមនុស្ស ក៏ចាប់យកឱកាសនេះមិនបានដែរ”។

សម្តេចធិបតីហ៊ុន ម៉ាណែតបានបន្តជម្រុញឲ្យយុវជនខេត្តកំពង់ស្ពឺពង្រឹងសមត្ថភាព ដើម្បីចាប់យកឱកាស និងពង្រីកសក្តានុពលនៅ​ខេត្តរបស់ខ្លួនផងដែរ។

តាមផែនការផ្លូវថ្មីមួយខ្សែនេះ មានប្រវែងប្រមាណ១១៤គីឡូ​ម៉ែត្រ ដែលតភ្ជាប់ពីស្រុកឱរ៉ាល់ ខេត្តកំពង់ស្ពឺ តភ្ជាប់ទៅកាន់ស្រុកកោះកុង ខេត្តកោះកុង ដែលមានចំណុចប្រសព្វគ្នា នឹងផ្លូវជាតិលេខ៤៨ នៅចំណុចគីឡូម៉ែត្រលេខ៦៨៕

        ដោយៈ និស្ស័យ

        សៀមរាបៈ ក្រុមមន្រ្តីកម្ពុជា ថៃបានបើកកិច្ចប្រជុំទ្វេភាគីកម្ពុជា-ថៃ  ពិភា​ក្សាលើសេចក្តីព្រាង កិច្ចព្រមព្រៀងគ្រប់គ្រង ថែទាំ និងប្រើប្រាស់ស្ពានមិត្តភាពកម្ពុជា-ថៃ ស្ទឹងបត់-បានណងអៀន។

កិច្ចប្រជុំកាលពីសប្តាហ៍មុននេះ ដឹកនាំដោយលោកហេង រត្នពិសិដ្ឋ អគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូន និងជាប្រធានក្រុមការងារចរចា កិច្ចព្រមព្រៀងស្ពានមិត្ត​ភាពកម្ពុជា-ថៃ(ស្ទឹងបត់-បានណងអៀន) បានដឹកនាំគណៈប្រតិភូកម្ពុជា  ជួបប្រជុំជាមួយគណ:ប្រតិភូថៃ  ដើម្បីពិភាក្សាលើសេចក្តីព្រាងកិច្ចព្រមព្រៀងគ្រប់គ្រង ថែរទាំ និងប្រើប្រាស់ស្ពានមិត្តភាពកម្ពុជា-ថៃ ( ស្ទឹងបត់-បានណងអៀន) ដែលប្រព្រឹត្តិធ្វើឡើងនៅខេត្តសៀមរាប។

កិច្ចប្រជុំនេះ មានការចូលរួមពីភាគី ខាងព្រះរាជាណាចក្រថៃ ដឹកនាំដោយ លោក Tunwin Svasdisant នាយកនៃនាយកដ្ឋានសហប្រតិបត្តិការផ្លូវហាយវេអន្តរជាតិ នៃអគ្គនាយកដ្ឋានផ្លូវហាយវេនៃព្រះរាជណាចក្រថៃ និងតំណាងគ្រប់អង្គភាពពាក់ព័ន្ធរបស់ភាគីថៃ ព្រមទាំងមានការចូលរួម ពីគ្រប់ភាគីពាក់ព័ន្ធខាងកម្ពុជាផងដែរ។

គោលបំណងនៃកិច្ចប្រជុំនេះធ្វើឡើង ដើម្បីពិនិត្យ និងពិភាក្សាលើការកំណត់ថ្លៃសេវាដឹកជញ្ជូន ឆ្លងកាត់ស្ពានមិត្តភាពនេះតាមសំណើរបស់ខាងភាគីថៃ ដើម្បីក្រសួង អាចលើកសំណើនេះ ជូនថ្នាក់ដឹកនាំ រាជរដ្ឋាភិបាល ពិនិត្យសម្រេច៕

ដោយ: គង់ លាងហួរ
ភ្នំពេញ: យោងតាមលោកបណ្ឌិត Alexander Evengroen នាយកប្រតិបត្តិនៃក្រុមហ៊ុន ASEAN Realtor Inc. បានមានប្រសាសន៍ឱ្យដឹងថា ឧស្សាហកម្មអចលនទ្រព្យនៅកម្ពុជាកំពុងបង្ហាញសញ្ញាវិជ្ជមានបន្តិចម្តងៗ។

លោកបណ្ឌិតបានបន្តថា ស្ថានភាព​ទីផ្សារអចលន​ទ្រព្យ​នៅ​កម្ពុជា​ក្នុង​ឆ្នាំ​២០២៤នេះ នៅតែបន្ត​ប្រឈម​មុខ​នឹង​ផលលំបាក ដោយ​សារទីផ្សារ​នៅ​តែ​រងសម្ពាធ។ លោកបណ្ឌិត Alexander Evengroen បានព្យាករណ៍ថា ទីផ្សារអចលនទ្រព្យនៅកម្ពុជាអាចនឹងកម្រើកឡើងវិញ នៅឆមាសទី២ ឆ្នាំ២០២៥។

ទោះបីជាយ៉ាងណាក្តី លោកបណ្ឌិតកត់សម្គាល់ឃើញថា ការចុះផ្សាយព័ត៌មានផ្ទុយគ្នាស្តីអំពីសុខភាពទីផ្សារអចលនទ្រព្យនៅកម្ពុជា ពីសំណាក់បណ្តាក្រុមហ៊ុន អង្គការ និងសមាគមផ្សេងៗ បានបង្កឱ្យមានភាពមិនច្បាស់លាស់ និងរារាំងដល់វឌ្ឍនភាព។លោកបណ្ឌិតអះអាងថា អង្គភាព ឬស្ថាប័នជាច្រើន កំពុងព្យាយាមជះឥទ្ធិពលទៅលើទីផ្សារ ដោយផ្អែកលើការបញ្ចេញគំនិតផ្ទាល់ខ្លួនជាជាងការពិត ដែលការណ៍នេះនាំឱ្យខ្វះភាពច្បាស់លាស់ និងទិសដៅត្រឹមត្រូវ។

លោកបណ្ឌិត បញ្ជាក់ថា “វាមានសារៈសំខាន់ណាស់សម្រាប់អ្នកពាក់ព័ន្ធទាំងអស់ក្នុងការរួបរួមគ្នា និងធ្វើការឆ្ពោះទៅរកគោលដៅរួមនៃកំណើន និងការអភិវឌ្ឍន៍ប្រកបដោយនិរន្តរភាពនៅក្នុងវិស័យអចលនទ្រព្យនៅកម្ពុជា។

ជាមួយគ្នានេះ ស្របពេលដែលគម្រោងអចលនទ្រព្យកាន់តែច្រើន កំពុងត្រូវបានអភិវឌ្ឍន៍ឡើង នោះតម្រូវការនៃការប្រើប្រាស់អគ្គិសនី ក៏នឹងមានការកើនឡើងផងដែរ ដែលការណ៍នេះនាំឱ្យមានការបំភាយឧស្ម័នកាបូនកាន់តែច្រើនចូលទៅក្នុងបរិយាកាសរបស់ផែនដី។

ត្រង់ចំណុចនេះ លោកបណ្ឌិតបានអំពាវនាវឱ្យវិស័យផ្សេងៗគ្នាត្រូវសហការ និងស្វែងរកដំណោះស្រាយដើម្បីកាត់បន្ថយផលប៉ះពាល់បរិស្ថានទាំងនេះ និងធានាឱ្យបាននូវការអភិវឌ្ឍន៍ប្រកបដោយចីរភាព។

លោកបណ្ឌិត Evengroen បានសង្កត់ធ្ងន់លើភាពចាំបាច់ ក្នុងការបង្វែរការយកចិត្តទុកដាក់ពីបញ្ហាប្រឈម ដែលបង្កឡើងដោយជំងឺរាតត្បាតកូវីដ-១៩ ទៅកាន់អនាគត និងដំណោះស្រាយក្នុងរយៈពេលវែង ដើម្បីពង្រឹងឧស្សាហកម្មអចលនទ្រព្យនៅកម្ពុជា។

លោកបណ្ឌិតបានផ្តល់អនុសាសន៍ថា ចំណុចដែលយើងគួរតែផ្តោតជាសំខាន់ រួមមាន ការសាងសង់លំនៅដ្ឋានដែលមានតម្លៃសមរម្យ សំណង់ដែលមានគុណភាពខ្ពស់ ការកាត់បន្ថយការបំភាយឧស្ម័នកាបូន ការកែលម្អការគាំទ្រផ្នែកហិរញ្ញវត្ថុ និងការរឹតបន្តឹងបទប្បញ្ញត្តិលើសំណង់អគារ។

លោកបណ្ឌិតជឿជាក់ថា តាមរយៈការដោះស្រាយបញ្ហាសំខាន់ៗទាំងនេះ និងការធ្វើការរួមគ្នាឆ្ពោះទៅរកគោលដៅរួមមួយ វិស័យអចលនទ្រព្យនៅកម្ពុជាអាចយកឈ្នះលើបញ្ហាប្រឈមនាពេលបច្ចុប្បន្ន និងត្រួសត្រាយផ្លូវសម្រាប់កំណើន និងការអភិវឌ្ឍន៍ប្រកបដោយចីរភាព។អ្នកជំនាញអន្តរជាតិរូបនេះសង្កត់ធ្ងន់ថា វាជាការចាំបាច់ណាស់ សម្រាប់ភាគីពាក់ព័ន្ធទាំងអស់ ក្នុងការសម្របសម្រួលកិច្ចខិតខំប្រឹងប្រែងរបស់ពួកគេឱ្យដើរទន្ទឹមគ្នា និងផ្តល់អាទិភាពដល់និរន្តរភាពយូរអង្វែងនៃទីផ្សារអចលនទ្រព្យនៅកម្ពុជា។

លោកបណ្ឌិតបញ្ជាក់បន្ថែមថា “លុះត្រាតែមានកិច្ចសហការ និងការធ្វើផែនការយុទ្ធសាស្រ្តប៉ុណ្ណោះ ទើបឧស្សាហកម្មអចលនទ្រព្យអាចរីកចម្រើនទៅមុខបាន និងចូលរួមចំណែកដល់ការអភិវឌ្ឍន៍សេដ្ឋកិច្ចទាំងមូលរបស់ប្រទេសកម្ពុជា”៕

ដោយ: គង់ លាងហួរ
អន្តរជាតិ: ទីក្រុងសិង្ហបុរី និងទីក្រុងហុងកុង ត្រូវបានគេចាត់ទុកជាទីផ្សារអចលនទ្រព្យដ៏ទាក់ទាញបំផុតនៅតំបន់អាស៊ី។ ប៉ុន្តែ ថ្មីៗនេះ ទីក្រុងមួយចំនួនផ្សេងទៀតក៏កំពុងប្រកួតប្រជែងជាមួយមជ្ឈមណ្ឌលទាំង២ខាងលើផងដែរ។

លោក Roddy Allanប្រធានផ្នែកស្រាវជ្រាវនៅតំបន់អាស៊ីប៉ាស៊ីហ្វិករបស់ក្រុមហ៊ុនប្រឹក្សាអចលនទ្រព្យ JLL បានលើកឡើងថា “យើងនៅតែមានសុទិដ្ឋិនិយមក្នុងរយៈពេលវែងជានិច្ចចំពោះទីផ្សារអភិវឌ្ឍន៍ធំៗដូចជា ទីក្រុងហុងកុងជាដើម”។

ប៉ុន្តែ លោកបានគូសបញ្ជាក់ថា “ យើងបានសង្កេតឃើញកាន់តែច្បាស់អំពីកំណើននៃថ្លៃជួលលំនៅដ្ឋាននៅក្នុងទីផ្សារដែលកំពុងអភិវឌ្ឍន៍មួយចំនួនក្នុងតំបន់អាស៊ាន រួមមានដូចជា ទីក្រុងហូជីមិញ ទីក្រុងហ្សាការតា ទីក្រុងបាងកក និងទីក្រុងម៉ានីល”។

យោងតាមរបាយការណ៍របស់ក្រុមហ៊ុន JLL បានអះអាងថា ទីផ្សារលំនៅដ្ឋាននៅតាមទីក្រុងមួយចំនួនក្នុងតំបន់អាស៊ានមានការរីកចម្រើនយ៉ាងខ្លាំង ដោយសារតែភាពធន់នៃតម្រូវការជួលអចលនទ្រព្យដែលមានគុណភាពខ្ពស់ និងការស្ទុះងើបឡើងវិញនៃលំហូរភ្ញៀវទេសចរណ៍បរទេស។

ខាងក្រោមនេះគឺជាបណ្តាទីក្រុងទាំង៤នៅតំបន់អាស៊ាន ដែលសម្រេចបានកំណើនថ្លៃជួលលំនៅដ្ឋានខ្ពស់ជាងគេនៅត្រីមាសទី១ ឆ្នាំនេះ៖

ទី១: ទីក្រុងបាងកក ប្រទេសថៃ៖ ថ្លៃជួលលំនៅដ្ឋាននៅរាជធានីមួយនេះបានកើនឡើងក្នុងអត្រាប្រចាំឆ្នាំ១៨,១% និងមានតម្លៃជួលជាមធ្យមប្រហែល២២៦ដុល្លារក្នុងមួយម៉ែត្រការ៉េ។

ទី២: ទីក្រុងហូជីមិញ ប្រទេសវៀតណាម៖ ថ្លៃជួលលំនៅដ្ឋាននៅទីក្រុងមួយនេះបានកើនឡើងក្នុងអត្រាប្រចាំឆ្នាំ៥,៩% និងមានតម្លៃជួលជាមធ្យមប្រហែល១២០ដុល្លារក្នុងមួយម៉ែត្រការ៉េ។

ទី៣: ទីក្រុងហ្សាការតា ប្រទេសឥណ្ឌូនេសុី៖ ថ្លៃជួលលំនៅដ្ឋាននៅទីក្រុងមួយនេះបានកើនឡើងក្នុងអត្រាប្រចាំឆ្នាំ៤,៨% និងមានតម្លៃជួលជាមធ្យមប្រហែល២០០ដុល្លារក្នុងមួយម៉ែត្រការ៉េ។

ទី៤: ទីក្រុងម៉ានីល ប្រទេសហ្វីលីពីន៖ថ្លៃជួលលំនៅដ្ឋាននៅទីក្រុងមួយនេះបានកើនឡើងក្នុងអត្រាប្រចាំឆ្នាំ០,៨% និងមានតម្លៃជួលជាមធ្យមប្រហែល១៧២ដុល្លារក្នុងមួយម៉ែត្រការ៉េ៕ប្រភព: CNBC៕

ដោយ: គង់ លាងហួរ
ហុងកុង: ប្រទេសចិននៅតែជាទីផ្សារដ៏ធំដែលមិនអាចខ្វះបានសម្រាប់បណ្តាក្រុមហ៊ុននានានៅតំបន់អាស៊ី ទោះបីជាភាពតានតឹងពាណិជ្ជកម្មរវាងចិន និងបណ្តាប្រទេសលោកខាងលិចនៅតែបន្តឆាបឆេះយ៉ាងណាក្តី។

សេដ្ឋកិច្ចរបស់ប្រទេសចិនបានជួបប្រទះនូវបញ្ហាប្រឈមជាច្រើន ជាពិសេសគឺវិបត្តិអចលនទ្រព្យ ដែលវិបត្តិនេះត្រូវបានក្រុមអ្នកវិភាគចាក់ទុកជាឧបសគ្គដ៏ធំបំផុតតែមួយគត់ចំពោះការស្ទុះងើបឡើងវិញនៃសេដ្ឋកិច្ចចិន។

យោងតាមទិន្នន័យបង្ហាញថា លំហូរវិនិយោគផ្ទាល់ពីបរទេស(FDI)ចូលទៅកាន់ប្រទេសចិន បានដាំក្បាលចុះអស់២៨ភាគរយនៅក្នុងរយៈពេល៣ខែដំបូងដើមឆ្នាំ២០២៤ បើធៀបនឹងរយៈពេលដូចគ្នាកាលពីឆ្នាំមុន ទោះបីជាការបង្កើតក្រុមហ៊ុនវិនិយោគបរទេសថ្មីបានកើនឡើង១៩,២ភាគរយយ៉ាងណាក្តី។

យ៉ាងណាមិញ បណ្តាក្រុមហ៊ុនយក្សនៅតំបន់អាសុី ដូចជា ធនាគារធំទីពីររបស់សិង្ហបុរី OCBC បានថ្លែងប្រាប់សារពត៌មាន CNA ថា ខ្លួននៅតែបន្តប្តេជ្ញាចិត្តក្នុងការរកសុីនៅក្នុងប្រទេសចិនសម្រាប់រយៈពេលវែងតទៅមុខ។ ជាក់ស្តែង ធនាគារនេះកំពុងបោះទុនវិនិយោគ១៩០លានដុល្លារអាមេរិក ដើម្បីធ្វើទំនើបកម្មវេទិកា និងផលិតផលរបស់ខ្លួន ក៏ដូចជាជួលអ្នកបច្ចេកទេសថ្មីចំនួន៣០០នាក់ ដើម្បីគាំទ្រដល់កំណើនអាជីវកម្មនៅក្នុងប្រទេសចិន។

ជាមួយគ្នានេះ លោក Hyuk-Tae Kwon សហស្ថាបនិក និងជានាយកប្រតិបត្តិក្រុមហ៊ុន Pine Venture Partners បានលើកឡើងថា “ប្រទេសចិននៅតែជាទីផ្សារដែលស្ថិតនៅជិតយើងបំផុត និងជាដៃគូនាំចូល និងនាំចេញដ៏ធំបំផុតរបស់កូរ៉េខាងត្បូង”។

លោកបានបន្ថែមថា “ទីផ្សារចិនមានទំហំធំណាស់ ហើយយើងមិនអាចមើលរំលងបានទេ ទោះបីជាការព្រួយបារម្ភអំពីភូមិសាស្ត្រនយោបាយបានជំរុញឱ្យក្រុមហ៊ុនមួយចំនួនធ្វើពិពិធកម្មចេញពីចិនយ៉ាងណាក្តី”។

លោក Kwon បានបញ្ជាក់ថា ការសង្កត់ធ្ងន់របស់ប្រទេសចិនទៅលើបច្ចេកវិទ្យា AI និងការច្នៃប្រឌិតបានបញ្ជូនសញ្ញាដ៏ជោគជ័យមួយទៅកាន់វិនិយោគិន។ លោកបានកត់សម្គាល់ថា “ខ្ញុំមើលឃើញមានឱកាសជាច្រើននៅក្នុងប្រទេសចិន ដូចជា ចំនួនប្រជាជនវ័យចំណាស់ ការថែទាំសុខភាព បច្ចេកវិទ្យាចំណីអាហារ”។

ម្យា៉ងវិញទៀត ពេលវេលាគឺជាមាសប្រាក់ ខណៈថ្នាក់ដឹកនាំចិនបានបង្កើនការចូលរួម និងស្តារទំនាក់ជាមួយបណ្តាក្រុមហ៊ុនបរទេសក្នុងរយៈពេលប៉ុន្មានខែថ្មីៗនេះ។

ម្យ៉ាងវិញទៀត ការណ៍នេះក៏បាននាំឱ្យមានការរំពឹងទុកថា ការជំរុញការវិនិយោគពីបរទេស និងការស្តារកំណើនសេដ្ឋកិច្ច នឹងក្លាយជារបៀបវារៈដ៏សំខាន់នៃកិច្ចប្រជុំគណៈកម្មាធិការមជ្ឈិមបក្សកុម្មុយនីស្តចិនលើកទី៣នៅខែកក្កដាខាងមុខ៕ប្រភព:CNA៕

ដោយ: គង់ លាងហួរ
ហាណូយ: រដ្ឋាភិបាលវៀតណាមបានប្រកាសធ្វើវិសោធនកម្មទៅលើច្បាប់ភូមិបាលឆ្នាំ២០២៤ ដោយបានលុបចោលក្របខណ្ឌកំណត់តម្លៃដីធ្លីដោយរដ្ឋ ក្នុងគោលដៅអនុញ្ញាតឱ្យទីផ្សារជាអ្នកមានសិទិ្ធកំណត់ដោយខ្លួនឯងវិញ។

ជុំវិញច្បាប់ថ្មីនេះ ក្រុមជំនាញបានលើកឡើងថា ចំណាត់ការខាងលើនឹងអាចជំរុញឱ្យតម្លៃលំនៅដ្ឋាននៅក្នុងប្រទេសវៀតណាមហក់ឡើងខ្ពស់។នេះបើយោងតាមការដកស្រង់សម្តីចុះផ្សាយដោយសារពត៌មាន Vnexpress។

​ច្បាប់​ភូមិបាលនេះ​ត្រូវ​បាន​គេ​រំពឹង​ថា​ នឹង​ចូល​ជា​ធរមាន​នៅ​ថ្ងៃ​ទី​១ ខែ​កក្កដាខាងមុខ ដោយលឿន​ជាង​ការ​គ្រោង​ទុក​ចំនួន៦​ខែ។ នៅក្នុងច្បាប់នេះ មានចែងគោលនយោបាយថ្មី រួមទាំងការលុបចេញនូវក្របខណ្ឌតម្លៃដីរបស់រដ្ឋាភិបាល និងការធ្វើបច្ចុប្បន្នភាពប្រចាំឆ្នាំរបស់ខ្លួន។

លោកស្រី Giang Do នាយកផ្នែកសេវាកម្មប្រឹក្សាយោបល់ប្រចាំក្រុមហ៊ុនអចលនទ្រព្យ Savills Vietnam បានថ្លែងថា ការអនុញ្ញាតឱ្យទីផ្សារអាចកំណត់តម្លៃដីដោយខ្លួនឯង នឹងធ្វើឱ្យតម្លៃអចលនទ្រព្យកើនឡើង ហើយការ​ធ្វើ​បែប​នេះ​ ក៏នឹង​នាំ​ឱ្យ​មាន​ការ​បង់​ពន្ធ​ទៅលើដីធ្លី​កាន់​តែ​ខ្ពស់ផងដែរ។

លោកស្រីបានគូសបញ្ជាក់ឱ្យដឹងបន្ថែមទៀតថា ការដាក់ឱ្យអនុវត្តន៍ច្បាប់ថ្មីនេះនឹងបង្កើនចំនួនទុនវិនិយោគទៅលើគម្រោងអភិវឌ្ឍន៍នានា ដែលជំរុញឱ្យអ្នកអភិវឌ្ឍន៍បង្ខំចិត្តបង្កើនតម្លៃលំនៅដ្ឋានរបស់ពួកគេ។

ទន្ទឹមនឹងនេះ លោក Dinh Minh Tuan នាយកវេទិកាអចលនទ្រព្យ Batdongsan បានលើកឡើងថា “តម្លៃដីធ្លីនឹងកើនឡើងជាក់ជាមិនខាន នៅពេលដែលច្បាប់ថ្មីនេះចូលជាធរមាននាពេលឆាប់ៗខាងមុខ”។

ចំណែកឯ លោក Nguyen Van Dinh ប្រធានសមាគមអ្នកអចលនវត្ថុវៀតណាមបានមានប្រសាសន៍ឱ្យដឹងថា “តម្លៃអចលនទ្រព្យអាចនឹងកើនឡើង ក្រោយពីក្របខ័ណ្ឌកំណត់តម្លៃដីធ្លីដោយរដ្ឋត្រូវបានលុបចោល។ ប៉ុន្តែ ច្បាប់នេះនឹងមិនបង្កឱ្យមានការសម្រុកទិញដីធ្លីនោះទេ”៕ប្រភព: Vnexpress៕

ដោយ: គង់ លាងហួរ
អន្តរជាតិ: បើប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃព្រហស្បតិ៍ម្សិលមិញនេះ គេសង្កេតឃើញថា តម្លៃហាងឆេងមាសបានបន្តធ្លាក់ថ្លៃចុះបន្តិចបន្តួចប៉ុណ្ណោះ នៅល្ងាចថ្ងៃសុក្រនេះ ឬអាចនិយាយបានថា ស្ថិតនៅទ្រឹងតែម្តង ព្រោះអ្នកវិនិយោគកំពុងរង់ចាំអ៊ុតទិន្នន័យអតិផរណារបស់សហរដ្ឋអាមេរិក ដែលជាហេតុនាំឱ្យតម្លៃមាសពុំមានការប្រែប្រួលខ្លាំងនៅល្ងាចនេះ។

តួយ៉ាង តម្លៃមាស Spot Gold បានធ្លាក់ចុះ០,០១%ដល់២៣៤២,៧០ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០៥ភាគរយដល់២៣៤១,៨០ដុល្លារ ក្នុងមួយអោន គិតត្រឹមម៉ោង៤:៤៣នាទីល្ងាច។

គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ តម្លៃមាស Spot Gold បានស្ថិតនៅត្រឹម២.៣៤៣ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅត្រឹម២៣៤២,៩០ដុល្លារ ក្នុងមួយអោន។

កំណត់សម្គាល់: តម្លៃមាសបានបន្តធ្លាក់ថ្លៃចុះបន្តិចបន្តួច នៅល្ងាចថ្ងៃសុក្រនេះ បើសិនយកទៅប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃព្រហស្បតិ៍ម្សិលមិញ៕

ដោយ: គង់ លាងហួរ

អន្តរជាតិ: យោងតាមរបាយការណ៍របស់ក្រុមហ៊ុន JLL បង្ហាញថា ថ្លៃជួលការិយាល័យកម្រិត A ជាមធ្យមនៅទីក្រុងតូក្យូ ប្រទេសជប៉ុន មានតម្លៃ២១៦ដុល្លារ ក្នុងមួយTsubo ក្នុងមួយខែ គិតត្រឹមចុងត្រីមាសទី១ ឆ្នាំនេះ កើនឡើង០,៩%បើធៀបនឹងត្រីមាសទី៤ ឆ្នាំមុន។(១ Tsubo=៣,៣ម៉ែត្រការ៉េ)។

របាយការណ៍បានបន្តថា ថ្លៃជួលការិយាល័យកម្រិត A បានកើនឡើងជាលើកដំបូង មិនធ្លាប់មានក្នុងរយៈពេល១៥ត្រីមាស កន្លងមកនេះ នៅក្នុងតំបន់ចំនួន២នៃទីក្រុងតូក្យូ គឺតំបន់ Akasaka និងតំបន់ Roppongi។

ចំណែក ប្រតិបត្តិការទិញការិយាល័យកម្រិតA ខ្នាតធំ នៅក្នុងត្រីមាសទី១ រួមមាន អគារពាណិជ្ជកម្មដែលមានឈ្មោះថា Toranomon Hills Business Tower ដែលក្រុមហ៊ុន United Urban Investment Corporation បានទិញយកក្នុងតម្លៃ២,៣ពាន់លានយ៉េន(ប្រហែល១៤,៦៦លានដុល្លារ)។

អត្រាការិយាល័យកម្រិតA ដែលត្រូវបានគេទំនេរចោលនៅទីក្រុងតូក្យូ ស្ថិតក្នុងរង្វង់ជាមធ្យម៤,២% ក្នុងត្រីមាសទី១ ឆ្នាំ២០២៤ ដែលជាការថយចុះ០,៤ភាគរយ បើធៀបនឹងត្រីមាសទី៤ ឆ្នាំ២០២៣ និងស្ថិតក្នុងសភាពទ្រឹង បើធៀបនឹងរយៈពេលដូចគ្នា កាលពីឆ្នាំមុន។

យ៉ាងណាមិញ គេពុំសង្កេតឃើញមានអគារការិយាល័យ កម្រិត A ណាមួយត្រូវបានផ្គត់ផ្គង់ចូលទៅក្នុងទីផ្សារ កាលពីត្រីមាសទី១នោះទេ ខណៈអត្រាស្រូបយកសុទ្ធ(Net absorption)នៅក្នុងទីផ្សារការិយាល័យកម្រិតA នៅទីក្រុងតូក្យូ បានកើនឡើងដល់ទំហំ៤៩.៧០០ម៉ែត្រការ៉េ ក្នុងត្រីមាសទី១ ដែលជំរុញដោយក្រុមហ៊ុនរកសុីក្នុងវិស័យព័ត៌មាន និងទំនាក់ទំនង ថាមពល ហិរញ្ញវត្ថុ និងការធានារ៉ាប់រង។

ទោះជាយ៉ាងណាក្តី បរិមាណ ឬទំហំនៃការជួល ត្រូវបានគេរំពឹងថា នឹងថយចុះ ធៀបនឹងឆ្នាំមុន មុនពេលស្ទុះងើបឡើងវិញនៅឆមាសទី២ ដោយសារនៅឆ្នាំនេះចំនួនការិយាល័យ ដែលគ្រោងនឹងបើកដំណើរការថ្មី មានចំនួនតិចតួចណាស់។

យោងតាមការព្យាករណ៍របស់ក្រុមហ៊ុន Oxford Economics បង្ហាញថា សេដ្ឋកិច្ចជប៉ុន នឹងកើនឡើងត្រឹមតែ០,៥%ប៉ុណ្ណោះ នៅឆ្នាំនេះ ខណៈសន្ទស្សន៍តម្លៃទំនិញប្រើប្រាស់ (CPI) នឹងស្ថិតក្នុងរង្វង់១,៩% ខណៈហានិភ័យរួមមាន ការដំឡើងអត្រាការប្រាក់ ការធ្លាក់ចុះនៃសេដ្ឋកិច្ចពិភពលោក បញ្ហាអតិផរណា និងការប្រែប្រួលនៅក្នុងទីផ្សារហិរញ្ញវត្ថុ៕ប្រភព: Real Estate Asia៕