ដោយៈ គង់ ម៉ាលីនណា

        ព្រះសីហនុៈ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានថ្លែងថា ការកាត់បន្ថយតម្លៃឡូជីស្ទីក និងការស្តារវិស័យសំណ​ង់នៅខេត្តព្រះសីហនុ នឹងជួយ​ដល់ការរីកចម្រើន​សេដ្ឋកិច្ចកម្ពុជា ព្រមទាំងជួយគាំទ្រដល់វិស័យផ្សេងៗ និងបញ្ហានៅ​ខេត្តដទៃទៀត។​

សម្តេចធិបតី ហ៊ុន ម៉ាណែត ថ្លែងបែបនេះ ធ្វើឡើងក្នុងឱកាសដែលសម្តេចអញ្ជើញ ប្រកាសដាក់ឱ្យអនុវត្តន៍ “កម្មវិធីពិសេសជំរុញការវិនិយោគ​ក្នុងខេត្តព្រះសីហនុឆ្នាំ២០២៤” នាព្រឹកថ្ងៃទី៣១ ខែមករា ឆ្នាំ២០២៤។

សម្តេចធិបតីបានថ្លែងថា ខេត្តព្រះសីហនុ គឺជាខេត្តមួយ​ប៉ូលសេដ្ឋកិច្ចដ៏សំខាន់ ​ដែលមានលក្ខណៈពហុវិស័យ ​និងជាខេត្ត​ដែលដើរតួនាទីសំខាន់ណាស់ ​ក្នុងការគាំទ្រទៅដល់ខេត្តផ្សេង។ ហេតុដូច្នេះហើយ ការពង្រឹងឡូជីស្ទីក នៅ​ក្នុងខេត្តនេះ និងការ​កាត់បន្ថយតម្លៃដឹកជញ្ជូន នឹងធ្វើឱ្យសេដ្ឋកិច្ចកម្ពុជារីកចម្រើន​ ​ក៏ដូចជាជួយគាំទ្រទៅដល់វិស័យកសិកម្មនៅកន្លែងផ្សេងទៀត។

សម្តេចបានគូសបញ្ជាក់ពីការជួយស្តារឡើងវិញ នូវវិស័យសំណ​ង់ឡើងវិញនៅខេត្តព្រះសីហនុ ក៏នឹងចូលរួមចំណែកគាំទ្រទៅដល់សកម្មភាពសេដ្ឋកិច្ចនៅខេត្តផ្សេងទៀត។

សម្តេចធិបតីហ៊ុន ម៉ាណែតបានបញ្ជាក់ថា “អ៊ីចឹងគ្រាប់កាំភ្លើងធំយើងមានតិច យើងត្រូវបាញ់ឱ្យចំគោលដៅ នៅណាមុន នៅណាក្រោយ”។ សម្តេចបន្ថែមថា “អ៊ីចឹងបានឆ្នាំ២០២៤នេះ យើងសម្រេចជ្រើសយកខេត្តព្រះសីហនុ និងខេត្តសៀមរាប ហើយនៅក្នុងវិស័យសំខាន់ដែលពាក់ព័ន្ធនឹងសក្តានុពលនេះ ដើម្បីធ្វើយ៉ាងណាជំរុញ ពន្លឿននៃការវិវត្តកន្លែងនេះ ដើម្បីអាចជាប៉ូលមួយអាចយោងឡើងខ្ពស់ អាចទាញការវិវត្តទូទាំងប្រទេស”។

ដោយសារខេត្តនេះ ជាប៉ូលសេដ្ឋកិច្ចដ៏សំខាន់ ហេតុនេះហើយ ទើបសម្តេចប្រកាសសដាក់ឱ្យអនុវត្ត “កម្មវិធីពិសេសជំរុញការវិនិយោគ ក្នុងខេត្តព្រះសីហនុឆ្នាំ២០២៤” នៅថ្ងៃទី៣១ ខែមករានេះ។ កម្មវិធីពិសេសនេះ មានគោលបំណងលើកកម្ពស់សកម្មភាពវិនិយោគ និងធុរកិច្ច ក្នុងខេត្តព្រះសីហនុ សម្រាប់ឆ្នាំ២០២៤ ឱ្យកាន់តែច្រើន និង មានសម្ទុះលឿន ដោយផ្តោតលើគម្រោងវិនិយោគ ឬសកម្មភាពធុរកិច្ចចំនួន៣ប្រភេទ រួមមាន១ គម្រោងវិនិយោគ ឬ សកម្មភាពធុរកិច្ច ពាក់ព័ន្ធនឹងអគារកំពុងជាប់គាំង និងចាប់ផ្តើមដំណើរការអនុវត្តភ្លាម នៅក្នុងឆ្នាំ ២០២៤ ទី២ គម្រោងវិនិយោគ ឬ សកម្មភាពធុរកិច្ច មិនជាប់ពាក់ព័ន្ធនឹងអគារជាប់គាំង ប៉ុន្តែចាប់ផ្តើមដំណើរការបានភ្លាម នៅក្នុងឆ្នាំឆ្នាំ ២០២៤។ ២. គម្រោងវិនិយោគ ឬ សកម្មភាពធុរកិច្ច មិនជាប់ពាក់ព័ន្ធនឹងអគារជាប់គាំង ប៉ុន្តែចាប់ផ្តើមដំណើរការបានភ្លាម នៅក្នុងឆ្នាំ ២០២៤ ។

ទី៣ ការពង្រីកគម្រោងវិនិយោគ ឬ សកម្មភាព ធុរកិច្ចមានស្រាប់ ស្របតាមលក្ខណៈវិនិច្ឆ័យជាក់លាក់ ដែលត្រូវចាប់ផ្តើមដំណើរការ នៅក្នុងឆ្នាំ២០២៤។

កម្មវិធីពិសេសជំរុញ វិនិយោគក្នុងខេត្តព្រះសីហនុ ២០២៤ នេះ ក៏បានកំណត់ដាក់ចេញ នូវវិធានការគន្លឹះមួយចំនួន ដែលមានសារៈសំខាន់ សម្រាប់ការជំរុញលើកទឹកចិត្ត សកម្មភាពនៃការវិនិយោគ និងធុរកិច្ច នៅក្នុងខេត្ត រួមមានជាអាទិ៍ ការសម្រួលនីតិវិធី និងការបំពេញបែបបទ ពាក់ព័ន្ធនឹងការវិនិយោគ និងការធ្វើធុរកិច្ច, ការសម្រួលក្នុងការផ្តល់លិខិតអនុញ្ញាត និងទិដ្ឋាការ, ការផ្តល់ការលើកទឹកចិត្តពន្ធអាករ, ការលើកលែងកម្រៃសេវាសាធារណៈ ឬការអនុគ្រោះផ្សេងៗ ពាក់ព័ន្ធនឹងការសាងសង់។

ការរៀបចំតំបន់អភិវឌ្ឍន៍តាមភូមិសង្កាត់ និងផ្លូវសំខាន់ៗ ការវិនិយោគលើគម្រោងហេដ្ឋារចនាសម្ព័ន្ធ ការអភិវឌ្ឍតំបន់ឧស្សាហកម្ម និង ការអភិវឌ្ឍដីដែលមានសក្តានុពល សម្រាប់តំបន់ប្រមូលផ្តុំឧស្សា​ហកម្ម ឬ សហគ្រាស និង/ឬតំបន់ទេសចរណ៍​៕​

ដោយ: គង់ លាងហួរ

អន្តរជាតិ: ទីភ្នាក់ងារសារពត៌មាន Kyodo បានចុះផ្សាយថា គណៈប្រតិភូធុរកិច្ចជប៉ុន បានអំពាវនាវឱ្យប្រទេសចិន លុបចោលការហាមឃាត់របស់ខ្លួន លើការនាំចូលអាហារសមុទ្រពីប្រទេសជប៉ុន។

ជាមួយគ្នានេះ ក្រុមបេសកកម្ម​ធុរកិច្ចជប៉ុន ក៏​បាន​ជំរុញ​ឱ្យ​ប្រទេសចិន​ អនុវត្ត​ន៍ច្បាប់​ប្រឆាំង​អំពើ​ចារកម្ម​របស់ខ្លួន ​ប្រកបដោយ​តម្លាភាព និង​ខិតខំ​កែលម្អ​ទំនាក់ទំនង​ដ៏​តានតឹង ​របស់ខ្លួន​ជាមួយ​សហរដ្ឋអាមេរិកផងដែរ។

ការអំពាវនាវនេះបានធ្វើឡើង នៅក្នុងកិច្ចប្រជុំមួយ កាលពីសប្តាហ៍មុន ជាមួយនាយករដ្ឋមន្ត្រីចិន លោក Li Qiang ប៉ុន្តែលោកLi មិនបានឆ្លើយតបច្បាស់លាស់ចំពោះសំណើនេះឡើយ។កិច្ចប្រជុំនេះ មានការចូលរួមពីសំណាក់ ក្រុមបេសកកម្ម​ធុរកិច្ច​ ដែល​មាន​សមាជិក​ចំនួន២០០នាក់​ ដែល​រៀបចំឡើង​នៅ​មហាសាល​ប្រជាជន​ក្នុង​ទីក្រុង​ប៉េកាំង។ ទោះជាយ៉ាងណាក្តី លោកនាយករដ្ឋមន្ត្រីចិន Li Qiang បានអំពាវនាវឱ្យមានកិច្ចសហប្រតិបត្តិការ កាន់តែស៊ីជម្រៅរវាងប្រទេសជិតខាងទាំងពីរ។នៅដើមដំបូងនៃកិច្ចប្រជុំលើកដំបូង ក្នុងរយៈពេល៤ឆ្នាំរវាងគណៈប្រតិភូធុរកិច្ចជប៉ុន និងនាយករដ្ឋមន្ត្រីចិន លោក Li បានលើកឡើងថា ទំនាក់ទំនងរវាងចិន និងជប៉ុន ស្ថិតក្នុងពេលវេលាដ៏សំខាន់មួយ ដើម្បីគ្រប់គ្រងអតីតកាល និងបង្កើតអនាគតកាល។

លោក​បាន​បន្ថែមថា “វា​មានសារៈសំខាន់ណាស់ សម្រាប់​ប្រទេ​ស​ទាំង​ពីរ​ ដែលត្រូវខិត​ខំ​ប្រឹង​ប្រែង​រួម​គ្នា​ ដើម្បី​លើក​កម្ពស់​ទំនាក់​ទំនង​ និង​កិច្ច​សហប្រតិបត្តិការ​លើ​វិស័យ​ផ្សេងៗទៀត”។

ប្រទេសចិនបានដាក់បម្រាមហាមឃាត់ មិនឱ្យនាំចូលអាហារសមុទ្រពីប្រទេសជប៉ុន ដើម្បីឆ្លើយតបនឹងការសម្រេចចិត្ត របស់រដ្ឋាភិបាលជប៉ុន ក្នុងការបញ្ចេញទឹកវិទ្យុសកម្ម ចេញពីរោងចក្រថាមពលនុយក្លេអ៊ែរ Fukushima ចូលទៅក្នុងសមុទ្រ៕

        ដោយៈ គង់ ហ្វីអូណា

        ភ្នំពេញៈ ប្រមុខរដ្ឋាភិបាលកម្ពុជាសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា កម្ពុជាកំពុងពិចារណា បង្កើតតំបន់សេដ្ឋកិច្ចពិសេស ដែលសម្រាប់តែអ្នកវិនិយោគ មកពីប្រទេសតែមួយ។

ការលើកឡើងបែបនេះ ធ្វើឡើងក្នុងឱកាសដែល សម្តេចធិបតី ហ៊ុន ម៉ាណែត អញ្ជើញជាអធិបតីប្រកាសដាក់ឲ្យអនុវត្តជាផ្លូវការ “កម្មវិធីពិសេស ជំរុញការវិនិយោគក្នុងខេត្តព្រះសីហនុ ឆ្នាំ២០២៤” នាព្រឹកថ្ងៃទី៣១ ខែមករា ឆ្នាំ២០២៤នេះ។សម្តេចធិបតីបានបញ្ជាក់ថា “យើងបានកំពុងតែរៀបចំដាក់ឲ្យអនុវត្ដ ​និងកសាងរៀបចំនូវ​ប្រភេទ តំបន់សេដ្ឋកិច្ចពិសេស ដើម្បីបំពេ​ញបន្ថែមទៅតំបន់សេដ្ឋកិច្ចពិសេស រូបមន្ដដែលយើងមានស្រាប់”។

សម្តេចធិបតីហ៊ុន ម៉ាណែតបានបន្ដថា តំបន់សេដ្ឋកិច្ចពិសេស ដែលយើងរៀបចំ ទៅថ្ងៃអនាគត គឺជាតំបន់សេដ្ឋកិច្ចពិសេស ដែលអាចសម្រួចទៅប្រភេទឧស្សាហកម្មណាមួយ។ យើងកំពុងតែរៀបចំ គោលនយោបាយ និងរៀបចំសាកល្បងនៅតំបន់សេដ្ឋកិច្ច សម្រាប់ទាក់ទាញការវិនិយោគ ទៅលើបច្ចេកវិទ្យាបៃតង, ឧស្សាហកម្មបៃតង និងផ្នែកឌីជីថល។

សម្តេចធិបតី ហ៊ុន ម៉ាណែតបានឲ្យដឹងទៀតថា តំបន់សេដ្ឋកិច្ចពិសេសនេះ គឺសម្រាប់តែការវិនិយោគ លើបច្ចេកវិទ្យាបៃតង ឧស្សា​ហកម្មបៃតង និងផ្នែកឌីជីថលតែប៉ុណ្ណោះ។បន្ថែមពីនោះទៀត សម្តេចធិបតី ហ៊ុន ម៉ាណែត បានគូសបញ្ជាក់ថា កម្ពុជាក៏កំពុងសិក្សា និងរៀបចំនូវតំបន់សេដ្ឋកិច្ចពិសេស សម្រាប់វិនិយោគិន ពីប្រទេសមួយតែម្ដង ដែលសម្រាប់វិនិយោគ ពីប្រទេសណាមួយ តាមការជាក់ស្ដែង ដែលកម្ពុជាអាចធ្វើ។

សម្តេចធិបតីបានលើកឡើងថា បច្ចុប្បន្នកម្ពុជាមានតំបន់សេដ្ឋកិច្ច គឺសម្រាប់គ្រប់ឧស្សាហកម្ម និងគ្រប់ប្រទេសទាំងអស់ ដូច្នេះការរៀបចំបន្ថែមនេះ ដើម្បីបំពេញបន្ថែម ដោយមិនមែនទៅជំនួស ឬក៏ប្រកួតប្រជែងនោះទេ៕

        ដោយៈ ជេស៊ីកា

ព្រះសីហនុៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានប្រកាសបញ្ចប់ សម្លេងស្នូរកាំភ្លើងនៅខេត្ត ពិសេសក្រុងព្រះសីហនុ។

សម្តេចបានថ្លែងក្នុងពិធី ប្រកាសដាក់ចេញកម្មវិធីជម្រុញការវិនិ​យោគនៅខេត្តព្រះសីហនុ នាព្រឹកថ្ងៃទី៣១ មករា ឆ្នាំ២០២៤នេះថា អាជ្ញាធរខេត្តព្រះសីហនុ ត្រូវបិទទីតាំងបាញ់កាំភ្លើងចំនួន២ និងធ្វើយ៉ាងណាគ្រប់គ្រងអាវុធជាតិផ្ទុះឲ្យបាន ពិសេសការរក្សាឲ្យបាននូវសន្តិសុខ សម្រាប់ភ្ញៀវទេសចរណ៍ជាតិ អន្តរជាតិ និងអ្នកវិនិយោគនានា។

សម្តេចបញ្ជាក់ថា “មិនបាច់ឲ្យភ្ញៀវទេសចរណ៍ មកបាញ់កាំភ្លើងទេ គឺជម្រុញឲ្យពួកគេទៅទស្សនា តាមបណ្តាកោះនានាប្រសើរជាង”។សម្តេចបន្តថា “ការងារសន្តិសុខ ត្រូវតែធ្វើឲ្យបាន ព្រោះបើយើងគ្មានសន្តិសុខទេ យើងមិនអាចទៅមុខបានលឿនទេ”។

សម្តេចធិបតីហ៊ុន ម៉ាណែតបានរម្លឹកថា កន្លងមកមានសារព័ត៌មាន និងប្រព័ន្ឋផ្សព្កវផ្សាយមួយចំ​នួន បាននិយាយនិងផ្សព្វផ្សាយមិនល្អពីកម្ពុជា ប៉ុន្តែរដ្ឋាភិបាលបាននិងកំពុងធ្វើការងារ ជាមួយបណ្តាញសារព័ត៌មាន  និងអ្នកពាក់ព័ន្ឋមួយចំនួន ដើម្បីដោះស្រាយបញ្ហានេះ៕

        ដោយៈ គង់ សូរិយា

        ភ្នំពេញៈ ប្រមុខរដ្ឋាភិបាលកម្ពុជាសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៣១ ខែមករា ឆ្នាំ២០២៤នេះ បានអញ្ជើញប្រកាសដាក់ឱ្យអនុវត្តន៍ “កម្មវិធីពិសេសជំរុញការវិនិយោគ ​ក្នុងខេត្តព្រះសីហនុឆ្នាំ២០២៤”។

កម្មវិធីពិសេសនេះ មានគោលបំណងលើកកម្ពស់ សកម្មភាពវិនិយោគ និងធុរកិច្ច ក្នុងខេត្តព្រះសីហនុ សម្រាប់ឆ្នាំ២០២៤ ឱ្យកាន់តែច្រើន និងមានសម្ទុះលឿន ដោយផ្តោតលើគម្រោងវិនិយោគ ឬសកម្មភាពធុរកិច្ចចំនួន៣ប្រភេទ រួមមាន ទី១ គម្រោងវិនិយោគ ឬ សកម្ម​ភាពធុរកិច្ច ពាក់ព័ន្ធនឹងអគារកំពុងជាប់គាំង និងចាប់ផ្តើមដំណើរការអនុវត្តភ្លាម នៅក្នុងឆ្នាំ ២០២៤ ទី២ គម្រោងវិនិយោគ ឬ សកម្មភាពធុរកិច្ច មិនជាប់ពាក់ព័ន្ធនឹងអគារជាប់គាំង ប៉ុន្តែចាប់ផ្តើមដំណើរការបានភ្លាម នៅក្នុងឆ្នាំ ២០២៤។ទី៣ ការពង្រីកគម្រោងវិនិយោគ ឬ សកម្មភាពធុរកិច្ចមានស្រាប់ ស្របតាមលក្ខណៈវិនិច្ឆ័យជាក់លាក់ ដែលត្រូវចាប់ផ្តើមដំណើរការ នៅក្នុងឆ្នាំ២០២៤។

កម្មវិធីពិសេសជំរុញវិនិយោគ ក្នុងខេត្តព្រះសីហនុ ២០២៤ នេះ ក៏បានកំណត់ដាក់ចេញនូវវិធានការគន្លឹះមួយចំនួន ដែលមានសារៈសំខាន់ សម្រាប់ការជំរុញលើកទឹកចិត្ត សកម្មភាពនៃការវិនិយោគ និងធុរកិច្ច នៅក្នុងខេត្តរួមមានជាអាទិ៍ ការសម្រួលនីតិវិធី និងការបំពេញបែបបទ ពាក់ព័ន្ធនឹងការវិនិយោគ និងការធ្វើធុរកិច្ច, ការសម្រួលក្នុងការផ្តល់លិខិតអនុញ្ញាត និងទិដ្ឋាការ ការផ្តល់ការលើកទឹកចិត្តពន្ធអាករ, ការលើកលែងកម្រៃសេវាសាធារណៈ ឬការអនុគ្រោះផ្សេងៗ ពាក់ព័ន្ធនឹងការសាងសង់ ការរៀបចំតំបន់អភិវឌ្ឍន៍តាមភូមិសង្កាត់ និងផ្លូវសំខាន់ៗ ការវិនិយោគលើគម្រោងហេដ្ឋារចនាសម្ព័ន្ធ ការអភិវ​ឌ្ឍតំបន់ឧស្សាហកម្ម និងការអភិវឌ្ឍដីដែលមានសក្តានុពល សម្រាប់តំបន់ប្រមូលផ្តុំឧស្សាហកម្ម ឬ សហគ្រាស និង/ឬ តំបន់ទេសចរណ៍។

សម្តេចធិបតី ហ៊ុន ម៉ាណែត បានប្រកាសអំពីនៅព្រឹកថ្ងៃទី៣១មករានេះ បានបង្ហាញពីអត្ថប្រយោជន៍ពិសេស ដែលរាជរដ្ឋាភិបាលបានសម្រេចដាក់ចេញ នៅក្នុងក្របខណ្ឌនៃ “កម្មវិធីពិសេស” ដូចជា
ទី១ គម្រោងវិនិយោគពាក់ព័ន្ធនឹងអគារជាប់គាំង នឹងទទួលបានអត្ថប្រយោជន៍ដូចខាងក្រោម ៖ការលើកលែងពន្ធលើប្រាក់ចំណូល, ប្រាក់រំដោះពន្ធលើប្រាក់ចំណូល និងពន្ធអប្បបរមា រយៈពេល៣ឆ្នាំបន្ថែម។

ការលើកលែងអាករលើតម្លៃបន្ថែម តាមអត្រាសូន្យភាគរយ ចំពោះការសាងសង់បញ្ចប់ និងការជួសជុលកែលម្អលើអគារដែលជាប់គាំង។ ការលើកលែងពន្ធកាត់ទុក លើការជួលអចលនទ្រព្យរយៈពេល៥ឆ្នាំ ការលើកលែងពន្ធអចលនទ្រព្យ និងការលើកលែងទណ្ឌក​ម្មរដ្ឋបាល។ ការលើកលែងការបង់ថ្លៃសេវាសាធារណៈ និងថ្លៃលើសសន្ទស្សន៍ប្រើប្រាស់ដី ចំពោះការស្នើសុំលិខិតអនុញ្ញាតពាក់ព័ន្ធនឹងការសាងសង់។

ការសម្រួលនីតិវិធី និងបែបបទ នៃការស្នើសុំលិខិតអនុញ្ញាត ពីអាជ្ញាធរមានសមត្ថកិច្ច ពាក់ព័ន្ធនឹងការងារសំណង់។ ការផ្តល់ការអនុគ្រោះលើថ្លៃត្រួតពិនិត្យ និងការបញ្ជាក់ផ្សេងៗពាក់ព័ន្ធសំណង់, ការសម្រួលបែបបទ និងនីតិវិធីវិនិយោគ និងធុរកិច្ច រួមទាំងការស្នើសុំអាជ្ញាបណ្ណ វិញ្ញាបនបត្រ និងលិខិតអនុញ្ញាតនានា។

ការរៀបចំគោលការណ៍ និងការសម្របសម្រួលបង្កើតទីផ្សារលក់ឡៃឡុងអចលនទ្រព្យ ព្រមទាំងការផ្តល់សេវាផ្គូផ្គងវិនិយោគិន រួមទាំងការកំណត់តម្លៃយោង (Reference Price) សម្រាប់អចលនទ្រព្យក្នុងខេត្តព្រះសីហនុ។ ការជំរុញការប្រើប្រាស់យន្តការដោះស្រាយវិវាទក្រៅប្រព័ន្ធតុលាការ ស្របតាមបទប្បញ្ញតិច្បាប់ ចំពោះវិវាទដែលពាក់ព័ន្ធនឹងការវិនិយោគ។

ទី២ គម្រោងវិនិយោគ ដែលមិនជាប់ពាក់ព័ន្ធនឹងអគារជាប់គាំង នឹងទទួលបានអត្ថប្រយោជន៍ដូចខាងក្រោម៖
* ការសម្រួលបែបបទ និង នីតិវិធីវិនិយោគ និង ធុរកិច្ច រួមទាំងការស្នើសុំអាជ្ញាបណ្ណ វិញ្ញាបនបត្រ និង លិខិតអនុញ្ញាតនានា។
* ការផ្តល់ការលើកទឹកចិត្តពិសេស និងការអនុគ្រោះនានា ដូចជា ពន្ធអាករនាំចូល, ពន្ធប៉ាតង់, ពន្ធលើផ្ទាំងផ្សព្វផ្សាយ, ពន្ធកាត់ទុកលើការជួលអចលនទ្រព្យ និងកម្រៃសេវាចុះបញ្ជីជាដើម ដល់សហគ្រាសដែលមកវិនិយោគ ឬធ្វើធុរកិច្ចក្នុងខេត្ដព្រះសីហនុ។

ការផ្ដល់ការលើកទឹកចិត្តលើកលែងពន្ធ លើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បបរមារយៈពេល ៣ឆ្នាំបន្ថែម សម្រាប់គម្រោងវិនិយោគមាន លក្ខណៈសម្បត្តិគ្រប់គ្រាន់ និងសហគ្រាសធុនតូច និងមធ្យម ដែលបានចុះបញ្ជីពន្ធដារ និងការអនុញ្ញាតឱ្យអនុវត្តអាករលើតម្លៃបន្ថែមអត្រាសូន្យភាគរយ សម្រាប់សហគ្រាស ធុនតូច និងមធ្យម ដែលបានចុះបញ្ជីពន្ធដារ ចំពោះការទិញធាតុចូលផលិតកម្ម ដែលផលិតក្នុងស្រុក ។

ទី៣ ការពង្រីកគម្រោងវិនិយោគ និងធុរកិច្ច នឹងទទួលបានអត្ថប្រយោជន៍ដូចខាងក្រោម៖
* ការសម្រួលនីតិវិធី, បែបបទ និងការអនុញ្ញាតផ្សេងៗ សម្រាប់បម្រើដល់ការអនុវត្ត គម្រោង ឬសកម្មភាពពង្រីកការវិនិយោគ និង/ឬធុរកិច្ច។

* ការផ្ដល់ការលើកទឹកចិត្ត និងការអនុគ្រោះនានា ដូចជា ពន្ធអាករនាំចូល, ពន្ធប៉ាតង់, ពន្ធលើផ្ទាំងផ្សព្វផ្សាយ និង ពន្ធកាត់ទុកលើការជួលអចលនទ្រព្យ ជាដើម ដល់សហ គ្រាសដែលអនុវត្តគម្រោង ឬ សកម្មភាពពង្រីកការវិនិយោគ និង/ឬ ធុរកិច្ច។

* ការអនុញ្ញាតឱ្យយក ១៥០% គុណនឹងប្រាក់ចំណូល ដែលត្រូវទទួលបានការលើកទឹកចិត្ត លើកលែងពន្ធលើប្រាក់ចំណូល សម្រាប់ធ្វើជាមូលដ្ឋានក្នុងការគណនាពន្ធ លើប្រាក់ចំណូល។

* ការលើកទឹកចិត្តលើកលែងពន្ធ លើប្រាក់ចំណូល រយៈពេល ៣ឆ្នាំ ផ្អែកតាមសមាមាត្រនៃអត្រាទុនពង្រីក និងការអនុញ្ញាតឱ្យយក ១៥០% គុណនឹងប្រាក់ចំណូល ដែលត្រូវទទួលបានការលើកទឹកចិត្តលើកលែងពន្ធលើប្រាក់ចំណូល សម្រាប់ធ្វើជាមូលដ្ឋាន ក្នុងការគណនាពន្ធលើប្រាក់ចំណូល។

សម្តេចធិបតីបានបន្តថា ទន្ទឹមនឹងការផ្តល់ “អត្ថប្រយោជន៍ពិសេស” ដល់គម្រោង ឬសកម្មភាពទាំង ៣ប្រភេទខាងលើនេះ រាជរដ្ឋាភិបាលក៏បានដាក់ចេញ នូវវិធានការចាំបាច់មួយចំនួនទៀត ដើម្បីគាំទ្រ និងជំរុញលើកទឹកចិត្តបន្ថែមជារួម ដល់ការទាក់ទាញការវិនិយោគ និងការអភិវឌ្ឍ ឧស្សាហកម្ម នៅក្នុងខេត្តព្រះសីហនុ។ វិធានការទាំងនោះរួមមាន៖ ការរៀបចំតំបន់គម្រោងវិនិយោគ និង/ឬ តំបន់អភិវឌ្ឍនៅតាមភូមិ, សង្កាត់ និងផ្លូវសំខាន់ៗ ដូចជាតំបន់ទេសចរណ៍ពិសិដ្ឋ តំបន់លក់ទំនិញរួចពន្ធ ដែលគ្រប់ជាតិ សាសន៍អាចទិញទំនិញបាន, វិថីអាហារ និងរមណីយដ្ឋាន/កន្លែងកម្សាន្តជាដើម ជាជំហានៗ ស្របតាមសក្តានុពល និង ភូមិសាស្ត្រជាក់ស្ដែង។

* ការផ្តល់ទិដ្ឋាការពិសេស រយៈពេល៣ឆ្នាំ សម្រាប់វិនិយោគិនដែលទិញ ឬជួលអចលនទ្រព្យរយៈពេលវែង ក្នុងខេត្តព្រះសីហនុ ដែលមានតម្លៃលើសពី១០០,០០០ដុល្លារ ដោយប្រភេទនៃទិដ្ឋាការពិសេសនេះត្រូវកំណត់ដោយអនុក្រឹត្យដោយឡែក។

* ការពន្លឿនការត្រួតពិនិត្យគយ ក៏ដូចជាការកែសម្រួល និងការផ្តល់សេវាល្អ ជូនដល់ភ្ញៀ.វទេសចរ និងវិនិយោគិន, ទាំងនៅពេលមកដល់, ពេលស្នាក់នៅ និងពេលត្រឡប់ទៅវិញ។

* ការរៀបចំ និងការអនុវត្តយុទ្ធនាការ “ទីក្រុងសុវត្ថិភាព” ព្រឹត្តិ​ការណ៍ និងកម្មវិធីនានា ដើម្បីស្ដារ និងពង្រឹងកិត្តិនាមរបស់ខេត្តព្រះសីហនុ លើឆាកអន្តរជាតិ។

* ការពន្លឿនការអនុម័ត និងការប្រកាសដាក់ឱ្យប្រើប្រាស់ផែន​ការមេ ប្រែក្លាយខេត្ត ព្រះសីហនុជាតំបន់សេដ្ឋកិច្ចពិសេសគំរូពហុបំណង។

* ការកំណត់អាទិភាព និងការវិនិយោគលើគម្រោងហេដ្ឋារចនាសម្ព័ន្ធ ដែលចាំបាច់សម្រាប់គាំទ្រ ដល់ការអភិវឌ្ឍឧស្សាហកម្ម, ការអភិវឌ្ឍទេសចរណ៍ និងការទាក់ទាញការវិនិយោគ។

* ការអភិវឌ្ឍតំបន់ឧស្សាហកម្ម និងសួនឧស្សាហកម្មធំៗ ជាពិសេសការពង្រឹង តំបន់សេដ្ឋកិច្ចពិសេស ដែលមានស្រាប់ ឱ្យឈានដល់កម្រិតស្តង់ដាអន្តរជាតិ លើគ្រប់ទិដ្ឋភាពរួមមាន ការអភិវឌ្ឍហេដ្ឋារចនាសម្ព័ន្ធ; ការផ្គត់ផ្គង់អគ្គិសនី ទឹកស្អាត វត្ថុ- ធាតុដើម និង ធាតុចូលផ្សេងៗ, កិច្ចសម្រួលការដឹកជញ្ជូន និង ពាណិជ្ជកម្ម, ការលើកទឹកចិត្ត និង វិធានការគាំទ្រ ផ្សេងទៀត;។

* ការសម្របសម្រួលក្នុងការអភិវឌ្ឍដី ដែលមានសក្តានុពល (ដីកម្មសិទិ្ធរដ្ឋ ឬ ឯកជន) ដើម្បីប្រែក្លាយដីទាំងនេះ ទៅជាតំបន់ប្រមូលផ្ដុំឧស្សាហកម្ម ឬ សហគ្រាស និង/ឬតំបន់ទេសចរណ៍ ដែលរាជរដ្ឋាភិបាលនឹងចូលរួមគាំទ្រ ផ្នែកគោលនយោបាយលើកទឹកចិត្ត ការអនុ​គ្រោះ និង ហេដ្ឋារចនាសម្ព័ន្ធនានា។

* ការអនុវត្តតំបន់សាកល្បងគំរូមួយ ឬច្រើន ដែលជាតំបន់សេដ្ឋកិច្ចពិសេស, តំបន់ទេសចរណ៍ពិសិដ្ឋ តំបន់ពាណិជ្ជកម្មសេរី តំបន់ប្រមូលផ្តុំឧស្សាហកម្ម ឬភណ្ឌាគារគយ ដើម្បីប្រមូលផ្ដុំធនធាន និងជំរុញការអភិវឌ្ឍឱ្យបានលឿន និងមានប្រសិទ្ធភាព ដែលអាចជ្រើសរើសចេញពីតំបន់ដែលត្រូវពង្រីកបន្ថែម, ឬនៅស្ទឹងហាវ ឬកន្លែងដទៃទៀត តាមរយៈកិច្ចសហការរវាងរដ្ឋ និងវិស័យឯកជន, និង ការសាងសង់ហេដ្ឋារចនាសម្ព័ន្ធរួម និងសកម្មភាពផ្សេងៗរួមគ្នា។

សម្តេចនាយករដ្ឋមន្ត្រីបន្ថែមថា យន្តការដែលរាជរដ្ឋាភិបាលបានចេញទាំងអស់នេះ គឺដើម្បីធ្វើពិពិធកម្មនៃជម្រើសការវិនិយោគ។ ជាមួយគ្នានេះ សម្តេចធិបតីបានជំរុញឱ្យអង្គភាពពាក់ព័ន្ធ ប្រឹងប្រែងថែរក្សាសន្តិសុខ ក្នុងឱ្យបានល្អ បើគ្មានសន្តិសុខទេ ការអភិវឌ្ឍរបស់ខេត្តនេះ មិនអាចទៅមុខបាននោះទេ៕

ដោយ: គង់ លាងហួរ
អន្តរជាតិ: ហានិភ័យចំពោះវិបត្តិសេដ្ឋកិច្ចសកល នៅឆ្នាំ២០២៤នេះ គឺមានកម្រិតទាបជាងឆ្នាំមុន ប៉ុន្តែហានិភ័យអតិផរណានៅតែមានកម្រិតខ្ពស់ ដោយសារតែទិដ្ឋភាពនយោបាយ ដែលមិនអាចទាយទុកជាមុនបាន។

លោក David Solomon នាយកប្រតិបត្តិក្រុមហ៊ុន Goldman Sachs បានសង្កត់ធ្ងន់ថា សេដ្ឋកិច្ចពិភពលោក កំពុងឈានជើងចូលដល់ឆ្នាំ២០២៤ ក្នុងបរិយាកាសមួយ ដែលមានលក្ខណៈស្ថាបនាជាងមុន។ ទោះជាយ៉ាងណាក្តី  ការបញ្ជាក់បែបនេះ របស់លោកនាយកប្រតិ​បត្តិក្រុមហ៊ុន Goldman Sachs ពុំមែនមានន័យថា វិបត្តិសេដ្ឋកិច្ច នឹងគ្មានឱកាសកើតឡើងនោះទេ ។លោកបាន​បន្តថា​ “អតិផរណា​ពិតជា​បាន​ថមថយ​ចុះ ពិតមែន ប៉ុន្តែ​ខ្ញុំ​នៅ​តែ​គិត​ថា​ មាន​បញ្ហាដដែល។ តួយ៉ាង ប្រសិនបើក្រឡេកមើលពីភាពតានតឹងភូមិសាស្ត្រនយោបាយ ដែលអាចប៉ះពាល់ដល់តម្លៃថាមពល ខ្ញុំគិតថា អតិផរណាអាចនឹងមានភាពតានតឹង ខ្លាំងជាងការគិតរបស់ទីផ្សារនាពេលបច្ចុប្បន្ន”។

យោងតាមនាយកប្រតិបត្តិរូបនេះ គេសង្កេតឃើញមានឱកាសកាន់តែច្រើន ដែលធនាគារកណ្តាលអាមេរិក នៅតែមានភាពប្រុងប្រយ័ត្នជាប់ជានិច្ចចំពោះអតិផរណា ហើយការសម្រេចចិត្តរបស់ធនា​គារកណ្តាលអាមេរិក នឹងរងផលប៉ះពាល់ពីបរិយាកាស នយោបាយដែលកំពុងបន្តកើតមាន។

លោកបានបញ្ជាក់ទៀតថា “ខ្ញុំមិនមានសុទិដ្ឋិនិយមខ្ពស់ដូចអ្នកវិភាគផ្សេងទៀតទេ ដែលយល់ថា ធនាគារកណ្តាលអាមេរិក(Fed) នឹងកាត់បន្ថយអត្រា ការប្រាក់ជាបន្តបន្ទាប់នៅឆ្នាំនេះឡើយ”។លោក ​បន្ថែម​ថា “យើងនៅ​មាន​បញ្ហាប្រឈមជាច្រើនទៀត ​ដែល​នឹង​ធ្វើឱ្យសហរដ្ឋអាមេរិកពិចារណា រក្សា​ទុកអត្រា​ការ​ប្រាក់​ឱ្យ​ស្ថិតក្នុងកម្រិ​តខ្ពស់​ដដែល ក្នុង​រយៈ​ពេល​យូរ​ជាង​នេះទៅមុខ”។

លើសពីនេះ លោកបានលើកឡើងថា សកម្មភាពនៃការច្របាច់ក្រុមហ៊ុនបញ្ចូលគ្នា និងការទិញយកក្រុមហ៊ុន នៅទូទាំងពិភពលោក ត្រូវបានគេរំពឹងថា នឹងកើនឡើងនៅឆ្នាំ២០២៤ និងឆ្នាំ២០២៥ បើធៀបនឹងឆ្នាំមុន៕

ដោយ: គង់ លាងហួរ

អន្តរជាតិ: ការសាងសង់ស្ពានថ្មើរជើងតភ្ជាប់សង្កាត់លេខ១ និងទីក្រុង Thu Duc ដោយឆ្លងកាត់ទន្លេ Saigon គ្រោងនឹងចាប់ផ្តើមនៅឆ្នាំ២០២៥ ក្រោមទុនវិនិយោគប្រហែល៤១,២លានដុល្លារអាមេរិក ជាថវិកាទទួលបានពីក្រុមហ៊ុនក្នុងស្រុក។

ក្រុមហ៊ុន Nutifood Nutrition Food JSC បានចុះហត្ថលេខាលើកិច្ចព្រមព្រៀង ជាមួយអាជ្ញាធរទីក្រុងហូជីមិញ ដើម្បីផ្តល់មូលនិធិសម្រាប់ការសាងសង់ស្ពាននេះ ដែលនឹងសាងសង់ឡើងតាមលំនាំស្រដៀងនឹង “ស្លឹកចា” ដែលជារុក្ខជាតិដ៏ពេញនិយម ដុះនៅភាគខាងត្បូងនៃប្រទេសវៀតណាម។ការរចនាឌីហ្សាញស្ពានជារូបរាងស្លឹកចានេះ គឺជាសមិទិ្ធផលកើតចេញពីការបណ្តាក់ទុនរួមគ្នា រវាងក្រុមហ៊ុនជប៉ុន Takashi Niwa Architects និងក្រុមហ៊ុនសំណង់ Chodai Kisojiban Vietnam។

គណៈកម្មាធិការ​ជ្រើសរើស​បាន​លើកឡើងថា ការ​រចនា​បែបនេះ​នឹង​អនុញ្ញាត​ឱ្យ​សសរ​ស្ពាន ​បោះនៅជិត​ច្រាំង​ទន្លេរ។ ដូច្នេះ វាអាចឱ្យនាវា​ឆ្លងកាត់ក្រោមស្ពានបាន ហើយរថយន្តសង្គ្រោះ ក៏នឹងអាចប្រើប្រាស់ស្ពាននេះ នៅពេលមានភាពចាំបាច់ផងដែរ។លោក Tran Bao Minh អនុប្រធានក្រុមហ៊ុន Nutifood បានមានប្រសាសន៍ឱ្យដឹងថា ក្រុមហ៊ុនចង់បង្ហាញពីការដឹងគុណរបស់ខ្លួនចំពោះប្រជាជនក្នុងទីក្រុង ដែលបានជួយក្រុមហ៊ុននេះ ឱ្យរីកចម្រើនពីអាជីវកម្មខ្នាតតូច ទៅជាម៉ាកយីហោធំដូចសព្វថ្ងៃនេះ។

លោក Phan Van Mai  ប្រធានគណៈកម្មាធិការប្រជាជននៅទីក្រុងហូជីមិញ បានថ្លែងនៅក្នុងពិធីចុះហត្ថលេខា លើកិច្ចព្រមព្រៀងថា យើងតែងតែផ្តល់អាទិភាព ដល់គម្រោងហេដ្ឋារចនាសម្ព័ន្ធ ក្នុងទីក្រុង ប៉ុន្តែដោយសារធនធាននៅមានកម្រិត។ ដូច្នេះការអំពាវនាវឱ្យមានមូលនិធិវិនិយោគឯកជន គឺជាគោលនយោបាយដែលទីក្រុងហូជីមិញបានអនុវត្តជាញឹកញាប់។យោងតាមសារពត៌មាន VNexpress បានចុះផ្សាយឱ្យដឹងថា ស្ពាន​ថ្មើរជើង​ ដែល​មិន​ទាន់​បញ្ចេញ​ឈ្មោះ​មួយនេះ នឹង​ត្រូវ​បានសាងសង់​ឡើងនៅ​ចន្លោះ​ស្ពាន Ba Son និង​ផ្លូវរូងក្រោមដី Thu Thiem៕