ដោយៈ គង់ សូរិយា

        ភ្នំពេញៈ អ្នកនាំពាក្យក្រសួងសាធារណការ និងដឹកជញ្ជូន លោកផន រឹមបានបង្ហើបឱ្យដឹងថា រថភ្លើងប្រភេទ DMU (Diesel Multiple Unit) ចំនួន ១១គ្រឿង ដែលបានទិញមកពីប្រទេសជប៉ុន នឹងដាក់ឱ្យដំណើរការរត់លើផ្លូវដែក ក្នុងពេលឆាប់ៗខាងមុខ។

តាមផែនការរថភ្លើងសម្រាប់អ្នកដំណើរនេះ បានកំណត់ឱ្យរត់នៅលើផ្លូវរថភ្លើងភាគខាងត្បូង (ភ្នំពេញ-ព្រះសីហនុ) តម្រូវឱ្យរត់៨០km/h និងផ្លូវរថភ្លើងភាគខាងជើង (ភ្នំពេញ-ប៉ោយប៉ែត) តម្រូវឱ្យរត់ចន្លោះពី៣០-៥០km/h។

លោក ផន​ រីម បានបន្តឲ្យដឹងទៀតថា នៅពេលនេះ ក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន និងក្រុមហ៊ុន Royal Railway Cambodia (RRC) ព្រមទាំងក្រុមជាងជំនាញពីបរទេស បានចុះពិនិត្យរួមគ្នា និងធ្វើការងារលើការងារកែតម្រូវ កង់រថភ្លើងដឹកអ្នកដំណើរ ពីទទឹងផ្លូវដែក 1067មម (ស្តង់ដារផ្លូវដែកជប៉ុន) មកទទឹងផ្លូវដែក1000មម (សម្រាប់ស្តង់ដារផ្លូវដែកកម្ពុជា) និងប្រព័ន្ធហ្រ្វាំងរថភ្លើង សម្រាប់ប្រើប្រាស់ ដើម្បីធានាសុវត្ថិភាព ប្រសិទ្ធភាព និរន្តរភាព។

ក្រុមការងារបច្ចេកទេសក្រសួងសាធារណការ និងដឹកជញ្ជូន ក៏បានណែនាំក្រុមហ៊ុន Royal Railway Cambodia បន្ទាប់ពីកែតម្រូវរួច ត្រូវធ្វើការសាកល្បងរត់នៅលើផ្លូវដែក រហូតដល់ប្រាកថា មានសុវត្ថិភាព សម្រាប់ដឹកជញ្ជូនអ្នកដំណើរ មុននឹងដាក់ឱ្យដំណើរការជាផ្លូវការ ចំពោះវឌ្ឍនភាពនៃការកែសម្រួលបច្ចេកទេស ទូររថភ្លើងនេះ កំពុងបន្ត និងសម្រេចលទ្ធផលបានច្រើនហើយ។

លោក ផន​ រីម បានបញ្ជាក់ដែរថា ក្នុងស្មារតីទទួលខុសត្រូវខ្ពស់ និងធានាធ្វើឱ្យប្រសើរឡើង វិស័យផ្លូវដែកនៅកម្ពុជា លោកប៉េង ពោធិ៍នា រដ្ឋមន្ត្រីក្រសួង​សាធារណការ និងដឹងជញ្ជូន ក៏បានផ្តល់អនុសា​សន៍ឱ្យក្រុមហ៊ុន Royal Railway Cambodia យកចិត្តទុកដាក់ខ្ពស់លើការធានាសុវត្ថិភាព និងផាសុកភាពរបស់បងប្អូនអ្នកដំណើរ។

លោកបន្តថា លោករដ្ឋមន្ត្រីបានសង្កត់ធ្ងន់ លើការលើកកម្ពស់សុវត្ថិភាព នៃដំណើរប្រតិបត្តិការប្រចាំថ្ងៃរបស់ក្រុមហ៊ុន ដោយរាប់ទាំងការផ្សព្វផ្សាយបញ្ជ្រាបការយល់ដឹង ដល់សាធារណជន ការបណ្តុះបណ្តាលអ្នកបើកបរ ការបំពាក់ផ្លាកសញ្ញា និងរបារសុវត្ថិភាព ជាពិសេសនៅត្រង់ចំណុចប្រសព្វជាមួយផ្លូវថ្នល់ និងតំបន់ទីប្រជុំជន ដែ​លមានចរាចរណ៍មមាញឹក ដើម្បីទប់ស្កាត់គ្រោះថ្នាក់ ដែលអាចកើតមានជាយថាហេតុឱ្យអស់ពីលទ្ធភាព និងសមត្ថភាពដែលអាចធ្វើបាន។

ក្រុមហ៊ុន Royal Railway Cambodia បានទិញរថភ្លើងប្រភេទ DMU (Diesel Multiple Unit) ចំនួន១១គ្រឿងពីប្រទេសជប៉ុន។ ការទិញរថភ្លើងប្រភេទDMU នេះ ស្ថិតនៅក្នុងផែនការវិនិយោគរបស់ក្រុមហ៊ុនផ្ទាល់តែម្តង៕

ដោយ: គង់ លាងហួរ

អន្តរជាតិ: ក្រុមហ៊ុនបច្ចេកវិទ្យាយក្ស Apple Inc គ្រោងបើកទីតាំងលក់រាយដំបូងរបស់ខ្លួន នៅក្នុងប្រទេសម៉ាឡេស៊ី នៅខែមិថុនាខាងមុខ ក្នុងគោលដៅពង្រីកវត្តមានរបស់ Apple ក្នុងតំបន់អាស៊ាន ដើម្បីបង្កើនទាំងការលក់ និងប្រតិបត្តិការនៅខាងក្រៅប្រទេសចិន។

ហាងលក់រាយដំបូងទី១ របស់ក្រុមហ៊ុនApple ប្រចាំនៅប្រទេសម៉ាឡេស៊ី នឹងមានទីតាំងនៅក្នុងផ្សារទំនើប The Exchange TRX ក្នុងទីក្រុងគូឡាឡាំពួ។  ក្រុមហ៊ុនបានប្រកាសថា ទីតាំងនេះនឹងបើកដំណើរការនៅថ្ងៃទី២២ ខែមិថុនាខាងមុខ នាវេលាម៉ោង១០ព្រឹក(ម៉ោងក្នុងស្រុក)។

បច្ចុប្បន្ននេះ ក្រុមហ៊ុនខ្នាតយក្ស Apple របស់សហរដ្ឋអាមេរិក មាន​ទីតាំង ហាង​លក់រាយមួយ​ចំនួន​រួច​ទៅហើយ ​នៅ​ក្នុង​តំបន់​អាស៊ាន រួម​មាន​ដូចជា ហាងនៅក្នុង​ ប្រទេសថៃ និង​ប្រទេសសិង្ហបុរី។ប្រទេសម៉ាឡេស៊ី​ កំពុង​ក្លាយ​ជា​ប្រទេស​ដ៏សំខាន់​មួយ សម្រាប់ក្រុមហ៊ុន Apple ទាំង​ផ្នែក​ផលិតកម្ម និង​ផ្នែក​លក់។  ក្រុមហ៊ុនអាមេរិកមួយនេះ បានចាប់ផ្តើមផលិតផលិតផល Macs មួយចំនួននៅក្នុងប្រទេសម៉ាឡេស៊ីកាលពីប៉ុន្មានឆ្នាំមុន ខណៈដែលក្រុមហ៊ុននេះក៏កំពុងផលិតទូរស័ព្ទ iPhone មួយចំនួននៅក្នុងប្រទេសឥណ្ឌា និងផលិតកាសឥតខ្សែ AirPods នៅក្នុងប្រទេសវៀតណាមផងដែរ។

ទីតាំង​ហាង​លក់រាយថ្មី​នេះ ​បាន​ស្ថិត​ក្នុង​ការ​អភិវឌ្ឍ​ន៍អស់ជាច្រើន​ឆ្នាំ​មក​ហើយ ដោយ​ក្នុងនោះ ការ​កក់ជួល​ហាង​នេះ​បានចាប់​ផ្ដើម​តាំងពីដើម​ឆ្នាំ​មុនមកម្ល៉េះ។ នេះបើយោងតាមការចុះផ្សាយដោយសារពត៌មាន Bloomberg។

សារពត៌មាន Bloomberg News បានចុះទៅរាយការណ៍អំពីទីតាំងនេះកាលពីឆ្នាំមុន ខណៈដើមឡើយ ហាងនេះគ្រោងនឹងបើកដំណើរការនៅខែកុម្ភៈ ឆ្នាំ២០២៤ ប៉ុន្តែបែរជាជួបប្រទះការពន្យារពេលទៅវិញ។

កាលពីខែមេសាកន្លងទៅ លោកមហាសេដ្ឋី Tim Cook នាយកប្រតិបត្តិក្រុមហ៊ុន Apple ក៏បានធ្វើដំណើរទៅកាន់តំបន់អាស៊ានផងដែរ។ នាពេលនោះ លោកបានអញ្ជើញទៅទស្សនា ប្រទេសសិង្ហបុរី ឥណ្ឌូនេស៊ី និងវៀតណាម ដើម្បីជំរុញកំណើននៃការលក់នៅក្នុងតំបន់៕ប្រភព: Bloomberg៕

ដោយ: គង់ លាងហួរ

អន្តរជាតិ: អ្នកជំនាញផ្នែកប្រជាសាស្ត្រ កំពូលមួយរូបបានលើកឡើងថា កំណើនយ៉ាងឆាប់រហ័សនៃចំនួនប្រជាជន ដែលមានវ័យ ចំណាស់ នឹងក្លាយជាឧបសគ្គចំពោះកំណើនសេដ្ឋកិច្ចចិន ដែលនឹងវ៉ាដាច់ ដោយសហរដ្ឋអាមេរិកក្នុងរយៈពេលប៉ុន្មានឆ្នាំខាងមុខនេះ។

លោក Fu-Xian Yi អ្នកឯកទេសខាងវិទ្យាសាស្ត្របន្តពូជនៅសា កលវិទ្យាល័យ Wisconsin-Madison និងជាអ្នកជំនាញខាងប្រជាសាស្រ្តរបស់ប្រទេសចិន បានចង្អុលបង្ហាញថា ចំនួនប្រជាជនចិន ដែលមានអាយុលើសពី៦៥ឆ្នាំ បានកើនឡើងដល់១៥,៤%នៃចំនួនប្រជាជនសរុប ក្នុងឆ្នាំ២០២៣ បើធៀបនឹងកម្រិត៧% ក្នុងឆ្នាំ១៩៩៨ ។

លោកបានបន្តថា “បើយើងក្រឡេកទៅមើលប្រវត្តិសាស្ត្រ នោះយើងសង្កេតឃើញថា គ្មានប្រទេសណាមួយ អាចសម្រេចបានកំណើ  នសេដ្ឋកិច្ចក្នុងរង្វង់៤%បានឡើយ ក្នុងរយៈពេល១២ឆ្នាំបន្ទាប់ ក្រោ យពីចំនួនមនុស្សចាស់ គ្របដណ្តប់ចំណែក១៥% នៃចំនួនប្រជាជនសរុប”។

លោកគូសបញ្ជាក់ថា “អត្រាកំណើនសេដ្ឋកិច្ចជាមធ្យម សម្រាប់បណ្តាប្រទេស ដែលមានប្រាក់ចំណូលខ្ពស់ ក្នុងអំឡុងរយៈពេល១២ឆ្នាំ បន្ទាប់ពីអត្រាចំនួនមនុស្សចាស់ កើនឡើងដល់១៥% គឺស្ថិតក្នុងរង្វង់ត្រឹមតែ១,៨ភាគរយប៉ុណ្ណោះ”។

បច្ចុប្បន្ន សហរដ្ឋអាមេរិក នៅតែជាប្រទេសមានទំហំសេដ្ឋកិច្ចធំជាងគេបំផុតទី១របស់ពិភពលោក ទោះបីជាអត្រាកំណើនសេដ្ឋកិច្ចអាមេរិក មានកម្រិតទាបជាងចិនយ៉ាងណាក្តី។ តួយ៉ាងកាលពីឆ្នាំ២០២៣កន្លងទៅ សេដ្ឋកិច្ចរបស់ប្រទេសចិន បានកើនឡើង៥,២ភាគរយ បើប្រៀបធៀបទៅនឹងកំណើនសេដ្ឋកិច្ច របស់សហរដ្ឋអាមេរិកក្នុងរង្វង់ត្រឹមតែ២,៥ភាគរយប៉ុណ្ណោះ។

ប៉ុន្តែលោក Yi មើលឃើញថា ចំណុចរបត់មួយនឹងកើតឡើងនៅទសវត្សរ៍ក្រោយ។ លោកបានលើកឡើងពីចំណុចស្រដៀងគ្នា គឺការកើនឡើង នៃចំនួនប្រជាជនចាស់ជរានៅប្រទេសជប៉ុន និងប្រទេសអាល្លឺម៉ង់ ដែលនាំឱ្យកំណើនសេដ្ឋកិច្ច របស់ប្រទេសទាំង២នេះមានការធ្លាក់ចុះ។

លោកបានព្យាករណ៍ថា “ដោយផ្អែកលើនិន្នាការប្រវត្តិសាស្ត្រទាំងនេះ អត្រាកំណើនសេដ្ឋកិច្ចរបស់ប្រទេសចិន អាចនឹងធ្លាក់ចុះមកត្រឹម៣% នៅឆ្នាំ២០២៨ ហើយកំណើនសេដ្ឋកិច្ចចិន នឹងបន្តធ្លាក់ចុះមកនៅត្រឹមកម្រិតណាមួយ ដែលទាបជាងសហរដ្ឋអាមេរិក ចន្លោះពីឆ្នាំ២០៣១ ដល់ឆ្នាំ២០៣៥ខាងមុខ៕ប្រភព: Fortune៕

ដោយ: គង់ លាងហួរ

បាងកក: រដ្ឋមន្ត្រីក្រសួងការបរទេសថៃលោក Maris Sangiampongsa គ្រោងនឹងមកបំពេញទស្សនកិច្ចនៅកម្ពុជា ដើម្បីចរចាតំបន់ទាមទារត្រួតស៊ីគ្នា (OCA) ក្នុងតំបន់ឈូងសមុទ្រថៃ។ នេះបើយោងតាមសារពត៌មាន Bangkok Post បានចុះផ្សាយនៅថ្ងៃព្រហស្បតិ៍នេះ។

លោក Maris បានមានប្រសាសន៍ឱ្យដឹងថា ដំណើរទស្សនកិច្ចនេះ នឹងពង្រឹងទំនាក់ទំនងទ្វេរភាគី ព្រមទាំងផ្តល់ឱកាស ក្នុងការដោះស្រាយបញ្ហានានា ដូចជា ការស្ថាបនាទំនប់បាំងរលកសមុទ្រក្នុងកំពង់ផែ (Breakwater) ដែលស្ថិតនៅកៀកនឹងបង្គោលព្រំដែនទី៧៣ ស្ថិតជាប់នឹងច្រកព្រំដែន Klong Yai។

លោក Maris ត្រូវបានសាកសួរថា តើក្រសួងការបរទេសថៃបានគិតគូរ អំពីការបន្តការតវ៉ារបស់ខ្លួនដែរឬទេ?។ លោករដ្ឋមន្ត្រី បានឆ្លើយតបថា “នេះជារឿងដែលយើងអាចយកទៅពិភាក្សាគ្នាឱ្យបានហ្មត់ចត់ ដោយបន្ថែមថា លោកមិនទាន់បានកំណត់ពេលវេលាជាក់លាក់ សម្រាប់ដំណើរទស្សនកិច្ចនេះនៅឡើយទេ”។លោក Maris ក៏បានអះអាងឱ្យដឹងផងដែរថា អនុស្សរណៈនៃការយោគយល់គ្នា (MoU) រវាងថៃ និងកម្ពុជា ដែលត្រូវបានចុះហត្ថលេខាក្នុងឆ្នាំ២០០១ ស្តីពីការអភិវឌ្ឍន៍រួមគ្នានៅឈូងសមុទ្រថៃ ពុំមែនជាសន្ធិសញ្ញា និងមិនមានប្រយោគណាមួយ ដែលចងជាកាតព្វ កិច្ចនោះឡើយ។

លោក​បាន​គូសបញ្ជាក់​ ដោយសង្កត់ធ្ងន់ថា អនុស្សរណៈ​យោគយល់​គ្នា​នេះ ​មិន​រំលោភទៅលើអធិបតេយ្យភាព​របស់​ប្រទេស​ថៃ ​លើ​កោះ​កូដនោះទេ(Koh Kood) ព្រោះ​ពុំមាន​កិច្ច​ព្រមព្រៀង​ណា​មួយ​ត្រូវ​បាន​ធ្វើ​ឡើងឡើយ។កាលពីពេលកន្លងទៅ កម្ពុជា និងថៃ បានឯកភាពគ្នាទាញយកផលប្រេងកាត លើតំបន់ទាមទារត្រួតស៊ីគ្នា (OCA) ដើម្បីទទួលបានអត្ថប្រយោជន៍រួមគ្នា ពីប្រភពប្រេងថ្មីក្នុងតំបន់នេះ ដែលចូលរួមក្នុងការកាត់បន្ថយផលប៉ះពាល់ នៃការប្រែប្រួលតម្លៃប្រេង និងថាមពល បន្ទាប់ពីពន្យារពេល ក្នុងការចរចាអស់រយៈពេលជាង២០ឆ្នាំកន្លងមកនេះ។

តំបន់ទាមទារត្រួតស៊ីគ្នា (OCA) មានផ្ទៃក្រឡាទំហំជាង២៦.០០០គីឡូម៉ែត្រការ៉េ ដែលត្រូវបានគេធ្វើការប៉ាន់ប្រមាណថា តំបន់នេះអាចមានធនធានប្រេង និងឧស្ម័នជាច្រើនលានបារ៉ែលនៅបាតសមុទ្រ៕ប្រភព:Bangkok Post៕

        ដោយៈ​ ជេស៊ីកា

        ភ្នំពេញៈ រដ្ឋបាលរាជធានីភ្នំពេញ បានរកឃើញតម្រាយផ្លូវថ្មីដែលតភ្ជាប់ពីផ្លូវជាតិលេខ១ មកកាន់ស្ពានចក្រអង្រែក្រោម ព្រែកប្រាហើយ ដោយផ្លូវនេះនឹងកាត់តាមបុរីប៉េង ហួតបឹងស្នោ។

អភិបាលនៃគណៈអភិបាលរាជធានីភ្នំពេញ លោកឃួង ស្រេងបានមានប្រសាសន៍ឲ្យដឹង ក្នុងពេលចុះពិនិត្យទីតាំងគម្រោងផ្លូវ និងស្ពានឆ្លងកាត់ទន្លេបាសាក់ ស្ថិតនៅក្នុងសង្កាត់ចាក់អង្រែក្រោម នៅរសៀលថ្ងៃទី៣០ ខែឧសភា ឆ្នាំ២០២៤ថា ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ក្រោយស្ថាបនារួច នឹងអាចដោះស្រាយការកកស្ទះចរាចរណ៍ លើ​កំណាត់ផ្លូវជាតិលេខ១ កាន់តែប្រសើរថែមទៀត ដោយសាររដ្ឋបាលរាជធានីភ្នំពេញ នឹងបង្កើតផ្លូវមួយខ្សែទៀត តភ្ជាប់ពីផ្លូវជាតិលេខ១ កាត់តាមបុរី ប៉េង ហួត បឹងស្នោរ រហូតដល់គល់ស្ពាននេះតែម្តង។

លោកបន្តថា “ស្ពានកោះនរាក្រោយស្ថាបនាហើយ ដោះស្រាយការកកស្ទះចរាចរណ៍លើកំណាត់ផ្លូវជាតិលេខ១ ចូលមកភ្នំពេញ បានប្រមាណ៣០ភាគរយប៉ុណ្ណោះ ដោយវានៅតែបង្កការកកស្ទះចរាច​រណ៍ជៀសមិនរួច តែនៅពេលយើងបើកផ្លូវថ្មី តភ្ជាប់ពីផ្លូវជាតិលេខ១ កាត់តាមបុរី ប៉េង ហួត បឹងស្នោរ រហូតដល់គល់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) នេះមួយខ្សែទៀតវានឹងដោះស្រាយការកកស្ទះចរាចរណ៍ លើកំណាត់ផ្លូវជាតិលេខ១ កាន់តែប្រសើរឡើងមួយកំរិតទៀត”។

ផ្លូវថ្មីតភ្ជាប់ពីផ្លូវជាតិលេខ១ រហូតដល់គល់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) អាចដោះចរាចណ៍ពីផ្លូវជាតិលេខ១ ទៅផ្លូវ៦០ម៉ែត្រខណ្ឌមានជ័យ និងបន្តឆ្ពោះទៅ២១៧ (ផ្លូវចំការដូង)។

អភិបាលនៃគណៈអភិបាលខណ្ឌច្បារអំពៅ លោកចេង មុនីរ៉ាបានមានប្រសាសន៍អោយដឹងផងដែរថា គម្រោងផ្លូវថ្មីតភ្ជាប់ពីផ្លូវជាតិលេខ១ កាត់តាមបុរី ប៉េង ហួត បឹងស្នោរ រហូតដល់គល់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា)នេះ មានផលប៉ះពាក់ដីប្រជាពលរដ្ឋមួយចំនួន តែការងារនេះយើងបាន នឹងកំពុងខិតខំដោះស្រាយជាមួយប្រជាពលរដ្ឋ ដើម្បីធ្វើយ៉ាងណាអោយគម្រោងនេះទទួលបានជោគជ័យ ដោះស្រាយបាននូវការកកស្ទះចរាចរណ៍ ពីផ្លូវជាតិលេខ១។

គម្រោងស្ថាបនាស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចការសាងសង់បានជាង១០%ហើយ ដោយបច្ចុប្បន្ននេះ សសរគ្រឹះចំនួន២៤ដើម បានចាក់បេតុងរួចរាល់១០០% និងកំពុងបន្តរៀបចំដំឡើងពុម្ពជើងតាង ព្រមទាំងការងារសំខាន់ៗមួយចំនួនទៀត។

ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ក្រោយស្ថាបនារួច នឹងអាចដោះស្រាយការកកស្ទះចរាចរណ៍ លើ​កំណាត់ផ្លូវជាតិលេខ១ កាន់តែប្រសើរថែមទៀត ដោយសាររដ្ឋបាលរាជធានីភ្នំពេញនឹងបង្កើតផ្លូវមួយខ្សែទៀត តភ្ជាប់ពីផ្លូវជាតិលេខ១ កាត់តាមបុរី ប៉េង ហួត បឹងស្នោរ រហូតដល់គល់ស្ពាននេះតែម្តង។ នេះបើតាមការលើកឡើងរបស់លោក ឃួង ស្រេង អភិបាលរាជធានីភ្នំពេញ ខណៈលោកចុះពិនិត្យទីតាំងគម្រោងផ្លូវ និងស្ពានឆ្លងកាត់ទន្លេបាសាក់ ស្ថិតនៅក្នុងសង្កាត់ចាក់អង្រែក្រោម នៅរសៀលថ្ងៃទី៣០ ខែឧសភា ឆ្នាំ២០២៤នេះ។

គម្រោងសាងសង់ស្ពានឆ្លងកាត់ទន្លេ បាសាក់នេះ មានប្រវែងសរុប១.៦៥០ម៉ែត្រ (ប្រវែងស្ពាន ៨៤៥,៧០ម៉ែត្រ ទទឹងផ្លូវ២៧ម៉ែត្រ, ផ្លូវតភ្ជាប់ក្បាលស្ពានប្រវែង៨០៤,៣០ម៉ែត្រ, ទទឹងផ្លូវ២៧ម៉ែត្រ) សាងសង់ដោយក្រុមហ៊ុន សំណង់សៀងហៃ និងទីប្រឹក្សាគម្រោងដោយក្រុមហ៊ុនក្វាងចូវវ៉ានអាន។

ស្ពានចាក់អង្រែ ក្រោម-ព្រែកប្រា ត្រូវបានបើកការដ្ឋានសាងសង់កាល ពីថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានបន្តធ្លាក់ថ្លៃចុះនៅល្ងាចថ្ងៃព្រហស្បតិ៍នេះ បើធៀបនឹងតម្លៃក្នុងពេលបិទការជួញដូរកាលពីថ្ងៃពុធម្សិលមិញនេះ ខណៈដែលប្រាក់ដុល្លារអាមេរិកបានងើបឡើងថ្លៃ ក្រោយពីក្រុមមន្ត្រីធនាគារកណ្តាលអាមេរិក(Fed)មួយចំនួនបង្ហាញមតិជំទាស់មិនឱ្យបញ្ចុះអត្រាការប្រាក់ក្នុងពេលឆាប់ៗនេះនោះទេ។

តួយ៉ាង តម្លៃមាស Spot Gold បានធ្លាក់ចុះ០,០៨%ដល់២៣៣៦,៩៤ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៣៧ភាគរយដល់២៣៣២,៦០ដុល្លារ ក្នុងមួយអោន គិតត្រឹមម៉ោង៤:១៤នាទីល្ងាច។

គិតត្រឹមពេលបិទការជួញដូរកាលពីថ្ងៃពុធម្សិលមិញ តម្លៃមាស Spot Gold បានស្ថិតនៅត្រឹម២៣៣៨,៧៧ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅត្រឹម២៣៤១,២០ដុល្លារ ក្នុងមួយអោន។

កំណត់សម្គាល់: តម្លៃមាសបានបន្តធ្លាក់ថ្លៃចុះ នៅល្ងាចថ្ងៃព្រហស្បតិ៍នេះ បើសិនយកទៅប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃពុធម្សិលមិញ៕

        ដោយៈ គង់ សូរិយា

        ព្រះសីហនុៈ លោកគួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញចូលរួមដាំកូនក្ងោកចំនួន៨៨៤ដើម ធ្វើការដាំដុះអមសងខាងផ្លូវជាតិលេខ៤ ចាប់ពីខាងមុខផ្លូវល្បឿនលឿនមកដល់រោងចក្រក្រោន។

កម្មវិធីនេះ មានការសម្របសម្រួលដោយមន្ទីរកសិកម្មររុក្ខាប្រមាញ់ និងនេសាទខេត្តព្រះសីហនុ ដោយមានការចូលរួមពីឯកឧត្តម លោកជំទាវ អភិបាលរងខេត្ត អភិបាលក្រុងស្រុក ប្រធានមន្ទីរ អង្គភាព ស.ស.យ.ក យុវជនកាកបាទក្រហមកម្ពុជា យុវជនកាយរិទ្ធ អ.ម.ត និងសិក្សានុសិស្សមេបញ្ជាការ កងពលតូចអន្តរាគមន៍លេខ៤ ទិសឧត្តរមានជ័យ។

លោក នេន ចំរើន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ បានធ្វើរបាយការណ៍សង្ខេបអំពីសាវតា និងមូលហេតុ នៃការដាំដើមក្ងោក កាលពីថ្ងៃទី០៥ ខែមេសា ឆ្នាំ២០២៣ ប្រតិភូខេត្តព្រះសីហនុ ដឹកនាំដោយ ឯកឧត្តម គួច ចំរើន អញ្ជើញចុះសួរសុខទុក្ខនាយទាហាន នាយទាហានរង និងពលទាហាន នៃកងពលតូចអន្តរាគមន៍លេខ៤ ទិសឧត្តរមានជ័យ ជាកងពលសម្ព័ន្ធមេត្រីភាពជាមួយរដ្ឋបាលខេត្តព្រះសីហនុ។ បានចាត់តាំងមន្ទីរកសិកម្ម ខេត្តព្រះសីហនុ បេះផ្លែទុំ និងរើសយកមកបណ្តុះ ដើម្បីដាំតាមដងផ្លូវជាតិក្នុងក្រុងព្រះសីហនុ ក្នុងគោលបំណងបង្កើតសោភ័ណ្ឌភាពតាមដងផ្លូវ និងជាអនុស្សាវរីយ៍មិនអាចបំភ្លេចបាន រវាងរដ្ឋបាលខេត្តព្រះសីហនុ និងកងពលតូចអន្តរាគមន៍លេខ៤ ទិសឧត្តរមានជ័យ។

មន្ត្រីបច្ចេកទេសមន្ទីរ ធ្វើការបណ្តុះដើមក្ងោកបានចំនួន១២ ៥០០ដើម មកទល់ពេលនេះមានរយៈពេល១ឆ្នាំ កូនក្ងោកមានកំពស់ប្រមាណ១ម៉ែត្រ ទៅ១ម៉ែត្រកន្លះ គ្រោងយកទៅដាំតាមដងផ្លូវជាតិលេខ៤ ចាប់ពីចំណុចរង្វង់មូលនាគកងកេង មកទល់ច្រកចូលទី១ នៃកំពង់ផែស្វ័យតក្រុងព្រះសីហនុ ចំនួន១០ ០០០ដើម។

លោកគួច ចំរើន អភិបាលខេត្តព្រះសីហនុ បានបញ្ជាក់ថា ដោយការចុះសួរសុខទុកកងទ័ព គ្រួសារទ័ពកងពលតូចអន្តរាគមន៍លេខ៤ ទិសឧត្តរមានជ័យ ជាកងពលសម្ព័ន្ធមេត្រីភាព ជាមួយរដ្ឋបាលខេត្តព្រះសីហនុ មុនចូលឆ្នាំខ្មែរ ឆ្នាំ២០២៣កន្លងមក ឃើញដើមក្ងោកចេញផ្កាមានភាពស្រស់ស្អាត ទើបឱ្យប្រធានមន្ទីរកសិកម្មរើសយកគ្រាប់មកធ្វើការបណ្តុះ ដាំដុះនៅខេត្តព្រះសីហនុ បណ្តុះបានរហូតដល់ ១២ ៥០០ដើម ហើយអ្វីដែលយើងបានសុំមេបញ្ជាការកងពលតូចអន្តរាគមន៍លេខ៤ យកផ្លែក្ងោកមកបណ្តុះនាពេលនេះ បានដុះល្អ។

លោកបន្តថា “យើងធ្វើការដាំដុះនៅកណ្តាល ក្រុងព្រះសីហនុ របស់យើងការដាំដើមក្ងោកថ្ងៃនេះ ជានិមិត្តរូបនៃចំណងសម្ព័ន្ធមេត្រីភាពព្រះសីហនុ កងពលតូចអន្តរាគមន៍លេខ៤ ទិសឧត្តមមានជ័យ “។

លោកបន្តថា ថ្ងៃនេះ ក៏មានតំណាងកងពលតូចអន្តរាគមន៍លេខ៤ បានចូលរួមក្នុងការដាំដុះ ក្នុងការទំនាក់ទំនងគ្នា ដែលជានិមិត្តរូប ហើយអ្នកឧកញ៉ា លោកឧកញ៉ាមួយចំនួន បានចូលរួមក្នុងព្រឹត្តការ​ណ៍ជាមួយគ្នា រហូតដល់ពេលដាំដុះកូនក្ងោកថ្ងៃនេះ ធ្វើឱ្យនិមិត្តរូបសម្ព័ន្ធមេត្រីភាពរវាងខេត្តព្រះសីហនុ និងកងពលតូចអន្តរាគមន៍លេខ៤កាន់តែមានភាពជិតស្និតជាមួយ និងខេត្តព្រះសីហនុ។

លោកបន្តថា នេះជាអ្វីដែលយើងបានដំណើរការ ទាក់ទងនឹងដើមក្ងោក ពីដើមឡើយមិនមែនជារុក្ខជាតិរបស់កម្ពុជា យើងនោះទេ ជារុក្ខាជាតិមួយ ដុះលូតលាស់ក្នុងតំបន់អាព្រិក តែនៅក្នុងតំបន់ត្រូពិកដូចគ្នា នៅជំនាន់សម័យបារាំង បារាំងធ្វើអាណានិគមនៅកម្ពុជា បារាំងក៏បានយកមកចែកចាយនៅតំបន់ឥណ្ឌូចិន បារាំងពង្រាយការដាំដុះនៅកម្ពុជា នៅខេត្តធំៗដូចរាជធានីភ្នំពេញ កំពង់ចាម បាត់ដំបង និងកន្លែងសាធារណមួយចំនួន ឥឡូវក្ងោករីកសាយភាពពេញទូទាំងប្រទេស ហើយថ្ងៃនេះយើងយកពូជក្ងោក មកធ្វើការដាំដុះនៅខេត្តព្រះសីហនុ មកពីទីតាំង កងពលតូចអន្តរាគមន៍លេខ៤ ទិសឧត្តមមានជ័យ៕