ដោយ: គង់ លាងហួរ
ហុងកុង: ប្រទេសចិននៅតែជាទីផ្សារដ៏ធំដែលមិនអាចខ្វះបានសម្រាប់បណ្តាក្រុមហ៊ុននានានៅតំបន់អាស៊ី ទោះបីជាភាពតានតឹងពាណិជ្ជកម្មរវាងចិន និងបណ្តាប្រទេសលោកខាងលិចនៅតែបន្តឆាបឆេះយ៉ាងណាក្តី។

សេដ្ឋកិច្ចរបស់ប្រទេសចិនបានជួបប្រទះនូវបញ្ហាប្រឈមជាច្រើន ជាពិសេសគឺវិបត្តិអចលនទ្រព្យ ដែលវិបត្តិនេះត្រូវបានក្រុមអ្នកវិភាគចាក់ទុកជាឧបសគ្គដ៏ធំបំផុតតែមួយគត់ចំពោះការស្ទុះងើបឡើងវិញនៃសេដ្ឋកិច្ចចិន។

យោងតាមទិន្នន័យបង្ហាញថា លំហូរវិនិយោគផ្ទាល់ពីបរទេស(FDI)ចូលទៅកាន់ប្រទេសចិន បានដាំក្បាលចុះអស់២៨ភាគរយនៅក្នុងរយៈពេល៣ខែដំបូងដើមឆ្នាំ២០២៤ បើធៀបនឹងរយៈពេលដូចគ្នាកាលពីឆ្នាំមុន ទោះបីជាការបង្កើតក្រុមហ៊ុនវិនិយោគបរទេសថ្មីបានកើនឡើង១៩,២ភាគរយយ៉ាងណាក្តី។

យ៉ាងណាមិញ បណ្តាក្រុមហ៊ុនយក្សនៅតំបន់អាសុី ដូចជា ធនាគារធំទីពីររបស់សិង្ហបុរី OCBC បានថ្លែងប្រាប់សារពត៌មាន CNA ថា ខ្លួននៅតែបន្តប្តេជ្ញាចិត្តក្នុងការរកសុីនៅក្នុងប្រទេសចិនសម្រាប់រយៈពេលវែងតទៅមុខ។ ជាក់ស្តែង ធនាគារនេះកំពុងបោះទុនវិនិយោគ១៩០លានដុល្លារអាមេរិក ដើម្បីធ្វើទំនើបកម្មវេទិកា និងផលិតផលរបស់ខ្លួន ក៏ដូចជាជួលអ្នកបច្ចេកទេសថ្មីចំនួន៣០០នាក់ ដើម្បីគាំទ្រដល់កំណើនអាជីវកម្មនៅក្នុងប្រទេសចិន។

ជាមួយគ្នានេះ លោក Hyuk-Tae Kwon សហស្ថាបនិក និងជានាយកប្រតិបត្តិក្រុមហ៊ុន Pine Venture Partners បានលើកឡើងថា “ប្រទេសចិននៅតែជាទីផ្សារដែលស្ថិតនៅជិតយើងបំផុត និងជាដៃគូនាំចូល និងនាំចេញដ៏ធំបំផុតរបស់កូរ៉េខាងត្បូង”។

លោកបានបន្ថែមថា “ទីផ្សារចិនមានទំហំធំណាស់ ហើយយើងមិនអាចមើលរំលងបានទេ ទោះបីជាការព្រួយបារម្ភអំពីភូមិសាស្ត្រនយោបាយបានជំរុញឱ្យក្រុមហ៊ុនមួយចំនួនធ្វើពិពិធកម្មចេញពីចិនយ៉ាងណាក្តី”។

លោក Kwon បានបញ្ជាក់ថា ការសង្កត់ធ្ងន់របស់ប្រទេសចិនទៅលើបច្ចេកវិទ្យា AI និងការច្នៃប្រឌិតបានបញ្ជូនសញ្ញាដ៏ជោគជ័យមួយទៅកាន់វិនិយោគិន។ លោកបានកត់សម្គាល់ថា “ខ្ញុំមើលឃើញមានឱកាសជាច្រើននៅក្នុងប្រទេសចិន ដូចជា ចំនួនប្រជាជនវ័យចំណាស់ ការថែទាំសុខភាព បច្ចេកវិទ្យាចំណីអាហារ”។

ម្យា៉ងវិញទៀត ពេលវេលាគឺជាមាសប្រាក់ ខណៈថ្នាក់ដឹកនាំចិនបានបង្កើនការចូលរួម និងស្តារទំនាក់ជាមួយបណ្តាក្រុមហ៊ុនបរទេសក្នុងរយៈពេលប៉ុន្មានខែថ្មីៗនេះ។

ម្យ៉ាងវិញទៀត ការណ៍នេះក៏បាននាំឱ្យមានការរំពឹងទុកថា ការជំរុញការវិនិយោគពីបរទេស និងការស្តារកំណើនសេដ្ឋកិច្ច នឹងក្លាយជារបៀបវារៈដ៏សំខាន់នៃកិច្ចប្រជុំគណៈកម្មាធិការមជ្ឈិមបក្សកុម្មុយនីស្តចិនលើកទី៣នៅខែកក្កដាខាងមុខ៕ប្រភព:CNA៕

ដោយ: គង់ លាងហួរ
ហាណូយ: រដ្ឋាភិបាលវៀតណាមបានប្រកាសធ្វើវិសោធនកម្មទៅលើច្បាប់ភូមិបាលឆ្នាំ២០២៤ ដោយបានលុបចោលក្របខណ្ឌកំណត់តម្លៃដីធ្លីដោយរដ្ឋ ក្នុងគោលដៅអនុញ្ញាតឱ្យទីផ្សារជាអ្នកមានសិទិ្ធកំណត់ដោយខ្លួនឯងវិញ។

ជុំវិញច្បាប់ថ្មីនេះ ក្រុមជំនាញបានលើកឡើងថា ចំណាត់ការខាងលើនឹងអាចជំរុញឱ្យតម្លៃលំនៅដ្ឋាននៅក្នុងប្រទេសវៀតណាមហក់ឡើងខ្ពស់។នេះបើយោងតាមការដកស្រង់សម្តីចុះផ្សាយដោយសារពត៌មាន Vnexpress។

​ច្បាប់​ភូមិបាលនេះ​ត្រូវ​បាន​គេ​រំពឹង​ថា​ នឹង​ចូល​ជា​ធរមាន​នៅ​ថ្ងៃ​ទី​១ ខែ​កក្កដាខាងមុខ ដោយលឿន​ជាង​ការ​គ្រោង​ទុក​ចំនួន៦​ខែ។ នៅក្នុងច្បាប់នេះ មានចែងគោលនយោបាយថ្មី រួមទាំងការលុបចេញនូវក្របខណ្ឌតម្លៃដីរបស់រដ្ឋាភិបាល និងការធ្វើបច្ចុប្បន្នភាពប្រចាំឆ្នាំរបស់ខ្លួន។

លោកស្រី Giang Do នាយកផ្នែកសេវាកម្មប្រឹក្សាយោបល់ប្រចាំក្រុមហ៊ុនអចលនទ្រព្យ Savills Vietnam បានថ្លែងថា ការអនុញ្ញាតឱ្យទីផ្សារអាចកំណត់តម្លៃដីដោយខ្លួនឯង នឹងធ្វើឱ្យតម្លៃអចលនទ្រព្យកើនឡើង ហើយការ​ធ្វើ​បែប​នេះ​ ក៏នឹង​នាំ​ឱ្យ​មាន​ការ​បង់​ពន្ធ​ទៅលើដីធ្លី​កាន់​តែ​ខ្ពស់ផងដែរ។

លោកស្រីបានគូសបញ្ជាក់ឱ្យដឹងបន្ថែមទៀតថា ការដាក់ឱ្យអនុវត្តន៍ច្បាប់ថ្មីនេះនឹងបង្កើនចំនួនទុនវិនិយោគទៅលើគម្រោងអភិវឌ្ឍន៍នានា ដែលជំរុញឱ្យអ្នកអភិវឌ្ឍន៍បង្ខំចិត្តបង្កើនតម្លៃលំនៅដ្ឋានរបស់ពួកគេ។

ទន្ទឹមនឹងនេះ លោក Dinh Minh Tuan នាយកវេទិកាអចលនទ្រព្យ Batdongsan បានលើកឡើងថា “តម្លៃដីធ្លីនឹងកើនឡើងជាក់ជាមិនខាន នៅពេលដែលច្បាប់ថ្មីនេះចូលជាធរមាននាពេលឆាប់ៗខាងមុខ”។

ចំណែកឯ លោក Nguyen Van Dinh ប្រធានសមាគមអ្នកអចលនវត្ថុវៀតណាមបានមានប្រសាសន៍ឱ្យដឹងថា “តម្លៃអចលនទ្រព្យអាចនឹងកើនឡើង ក្រោយពីក្របខ័ណ្ឌកំណត់តម្លៃដីធ្លីដោយរដ្ឋត្រូវបានលុបចោល។ ប៉ុន្តែ ច្បាប់នេះនឹងមិនបង្កឱ្យមានការសម្រុកទិញដីធ្លីនោះទេ”៕ប្រភព: Vnexpress៕

ដោយ: គង់ លាងហួរ
អន្តរជាតិ: បើប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃព្រហស្បតិ៍ម្សិលមិញនេះ គេសង្កេតឃើញថា តម្លៃហាងឆេងមាសបានបន្តធ្លាក់ថ្លៃចុះបន្តិចបន្តួចប៉ុណ្ណោះ នៅល្ងាចថ្ងៃសុក្រនេះ ឬអាចនិយាយបានថា ស្ថិតនៅទ្រឹងតែម្តង ព្រោះអ្នកវិនិយោគកំពុងរង់ចាំអ៊ុតទិន្នន័យអតិផរណារបស់សហរដ្ឋអាមេរិក ដែលជាហេតុនាំឱ្យតម្លៃមាសពុំមានការប្រែប្រួលខ្លាំងនៅល្ងាចនេះ។

តួយ៉ាង តម្លៃមាស Spot Gold បានធ្លាក់ចុះ០,០១%ដល់២៣៤២,៧០ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០៥ភាគរយដល់២៣៤១,៨០ដុល្លារ ក្នុងមួយអោន គិតត្រឹមម៉ោង៤:៤៣នាទីល្ងាច។

គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ តម្លៃមាស Spot Gold បានស្ថិតនៅត្រឹម២.៣៤៣ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅត្រឹម២៣៤២,៩០ដុល្លារ ក្នុងមួយអោន។

កំណត់សម្គាល់: តម្លៃមាសបានបន្តធ្លាក់ថ្លៃចុះបន្តិចបន្តួច នៅល្ងាចថ្ងៃសុក្រនេះ បើសិនយកទៅប្រៀបធៀបនឹងតម្លៃក្នុងពេលបិទការជួញដូរកាលពីថ្ងៃព្រហស្បតិ៍ម្សិលមិញ៕

ដោយ: គង់ លាងហួរ

អន្តរជាតិ: យោងតាមរបាយការណ៍របស់ក្រុមហ៊ុន JLL បង្ហាញថា ថ្លៃជួលការិយាល័យកម្រិត A ជាមធ្យមនៅទីក្រុងតូក្យូ ប្រទេសជប៉ុន មានតម្លៃ២១៦ដុល្លារ ក្នុងមួយTsubo ក្នុងមួយខែ គិតត្រឹមចុងត្រីមាសទី១ ឆ្នាំនេះ កើនឡើង០,៩%បើធៀបនឹងត្រីមាសទី៤ ឆ្នាំមុន។(១ Tsubo=៣,៣ម៉ែត្រការ៉េ)។

របាយការណ៍បានបន្តថា ថ្លៃជួលការិយាល័យកម្រិត A បានកើនឡើងជាលើកដំបូង មិនធ្លាប់មានក្នុងរយៈពេល១៥ត្រីមាស កន្លងមកនេះ នៅក្នុងតំបន់ចំនួន២នៃទីក្រុងតូក្យូ គឺតំបន់ Akasaka និងតំបន់ Roppongi។

ចំណែក ប្រតិបត្តិការទិញការិយាល័យកម្រិតA ខ្នាតធំ នៅក្នុងត្រីមាសទី១ រួមមាន អគារពាណិជ្ជកម្មដែលមានឈ្មោះថា Toranomon Hills Business Tower ដែលក្រុមហ៊ុន United Urban Investment Corporation បានទិញយកក្នុងតម្លៃ២,៣ពាន់លានយ៉េន(ប្រហែល១៤,៦៦លានដុល្លារ)។

អត្រាការិយាល័យកម្រិតA ដែលត្រូវបានគេទំនេរចោលនៅទីក្រុងតូក្យូ ស្ថិតក្នុងរង្វង់ជាមធ្យម៤,២% ក្នុងត្រីមាសទី១ ឆ្នាំ២០២៤ ដែលជាការថយចុះ០,៤ភាគរយ បើធៀបនឹងត្រីមាសទី៤ ឆ្នាំ២០២៣ និងស្ថិតក្នុងសភាពទ្រឹង បើធៀបនឹងរយៈពេលដូចគ្នា កាលពីឆ្នាំមុន។

យ៉ាងណាមិញ គេពុំសង្កេតឃើញមានអគារការិយាល័យ កម្រិត A ណាមួយត្រូវបានផ្គត់ផ្គង់ចូលទៅក្នុងទីផ្សារ កាលពីត្រីមាសទី១នោះទេ ខណៈអត្រាស្រូបយកសុទ្ធ(Net absorption)នៅក្នុងទីផ្សារការិយាល័យកម្រិតA នៅទីក្រុងតូក្យូ បានកើនឡើងដល់ទំហំ៤៩.៧០០ម៉ែត្រការ៉េ ក្នុងត្រីមាសទី១ ដែលជំរុញដោយក្រុមហ៊ុនរកសុីក្នុងវិស័យព័ត៌មាន និងទំនាក់ទំនង ថាមពល ហិរញ្ញវត្ថុ និងការធានារ៉ាប់រង។

ទោះជាយ៉ាងណាក្តី បរិមាណ ឬទំហំនៃការជួល ត្រូវបានគេរំពឹងថា នឹងថយចុះ ធៀបនឹងឆ្នាំមុន មុនពេលស្ទុះងើបឡើងវិញនៅឆមាសទី២ ដោយសារនៅឆ្នាំនេះចំនួនការិយាល័យ ដែលគ្រោងនឹងបើកដំណើរការថ្មី មានចំនួនតិចតួចណាស់។

យោងតាមការព្យាករណ៍របស់ក្រុមហ៊ុន Oxford Economics បង្ហាញថា សេដ្ឋកិច្ចជប៉ុន នឹងកើនឡើងត្រឹមតែ០,៥%ប៉ុណ្ណោះ នៅឆ្នាំនេះ ខណៈសន្ទស្សន៍តម្លៃទំនិញប្រើប្រាស់ (CPI) នឹងស្ថិតក្នុងរង្វង់១,៩% ខណៈហានិភ័យរួមមាន ការដំឡើងអត្រាការប្រាក់ ការធ្លាក់ចុះនៃសេដ្ឋកិច្ចពិភពលោក បញ្ហាអតិផរណា និងការប្រែប្រួលនៅក្នុងទីផ្សារហិរញ្ញវត្ថុ៕ប្រភព: Real Estate Asia៕

ដោយ: គង់ លាងហួរ
សេអ៊ូល: អាកាសយានដ្ឋានអន្តរជាតិ Incheon នឹងក្លាយជាអាកាសយានដ្ឋានធំជាងគេទី៣ របស់ពិភពលោក បន្ទាប់ពីការអភិវឌ្ឍន៍ដំណាក់កាលទី៤ នឹងត្រូវបានបញ្ចប់រួចរាល់នៅចុងឆ្នាំនេះ ដែលអាចផ្ទុកអ្នកដំណើរអន្តរជាតិបានជាង១០០លាននាក់ជារៀងរាល់ឆ្នាំ។

យោងតាមប្រតិបត្តិករអាកាសយានដ្ឋានអន្តរជាតិ Incheon Corp. (IIAC) បានឱ្យដឹងថា ការពង្រីកចំណតអ្នកដំណើរទី២ (T2) របស់ព្រលានយន្តហោះ Incheon ក្នុងទំហំទឹកប្រាក់៣,៥ពាន់លានដុល្លារ ដែលបានចាប់ផ្តើមក្នុងឆ្នាំ២០១៧ សម្រេចបានវឌ្ឍនភាពប្រមាណ៩៥,៣៤%គិតត្រឹមខែមេសា។

ការពង្រីកចំណត T2 នេះ ត្រូវបានគេរំពឹងថា នឹងបញ្ចប់រួចរាល់ជាស្ថាពរនៅក្នុងខែវិច្ឆិកាខាងមុខ និងមានសមត្ថភាពទទួលស្វាគមន៍អ្នកដំណើរបានចំនួន១០៦លាននាក់ក្នុងមួយឆ្នាំៗ ប្រសិនបើគិតទាំងចំណត T1 របស់អាកាសយានដ្ឋាននេះ។សមត្ថភាពផ្ទុកអ្នកដំណើរដ៏ច្រើនសន្ធឹកសន្ធាប់នេះ នឹងធ្វើឱ្យអាកាសយានដ្ឋានអន្តរជាតិ Incheon ក្លាយជាអាកាសយានដ្ឋានធំជាងគេទី៣ នៅលើពិភពលោក បន្ទាប់ពីអាកាសយានដ្ឋានអន្តរជាតិឌូបៃ និងអាកាសយានដ្ឋានអុីស្តង់ប៊ុល។

ការអភិវឌ្ឍន៍នេះបានធ្វើឡើង ស្របពេលដែលបណ្តាប្រទេសជិតខាងរបស់កូរ៉េខាងត្បូង ក៏កំពុងសម្រុកពង្រីកអាកាសយានដ្ឋានអន្តរជាតិរបស់ពួកគេរៀងៗខ្លួនផងដែរ។

តួយ៉ាង អាកាសយានដ្ឋានអន្តរជាតិហុងកុង អាកាសយានដ្ឋាន Changi របស់សិង្ហបុរី អាកាសយានដ្ឋានអន្តរជាតិ Shanghai Pudong ក្នុងប្រទេសចិន និងអាកាសយានដ្ឋានអន្តរជាតិ Narita របស់ប្រទេសជប៉ុន សុទ្ធតែកំពុងត្រូវបានពង្រីក ដើម្បីបង្កើនសមត្ថភាពទទួលអ្នកដំណើរអន្តរជាតិឱ្យបានប្រមាណ១៣០លាននាក់ក្នុងមួយឆ្នាំ ដែលគ្រោងនឹងបញ្ចប់នៅទសវត្សរ៍ឆ្នាំ២០៣០។ក្នុងនាមជាមជ្ឈមណ្ឌលអាកាសចរណ៍ដ៏ធំ បំផុតរបស់ប្រទេសកូរ៉េខាងត្បូង អាកាសយានដ្ឋាន Incheon សម្រេចបានកំណើននៃចំនួនអ្នកដំណើរអន្តរជាតិប្រចាំឆ្នាំជាមធ្យម៧,៥ភាគរយ ចន្លោះពីឆ្នាំ២០០១ ដល់ឆ្នាំ២០១៩។

អាកាសយានដ្ឋានខ្នាតយក្សនេះត្រូវបានគេព្យាករណ៍ថា នឹងទទួលបានអ្នកដំណើរជាង១០០លាននាក់ក្នុងមួយឆ្នាំចាប់ពីឆ្នាំ២០៣១ខាងមុខ។ នេះបើយោងតាមប្រភពពីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូននៃប្រទេសកូរ៉េខាងត្បូង៕ប្រភព: Korea Times៕

ដោយ: គង់ លាងហួរ
អន្តរជាតិ: ការពន្យារពេលនៃការដឹកជញ្ជូននៅក្នុងប្រទេសសិង្ហបុរីបានកើនឡើងជាង២ដងក្នុងរយៈពេលប៉ុន្មានសប្តាហ៍ថ្មីៗនេះ ខណៈក្រុមអ្នកសង្កេតការណ៍យល់ឃើញថា ការណ៍នេះអាចនាំឱ្យតម្លៃទំនិញកើនឡើងខ្ពស់សម្រាប់អ្នកប្រើប្រាស់់។

ស្ថានភាពនេះបានកើតឡើង ដោយសារតែកង្វះខាតនៃកប៉ាល់កុងតឺន័រ ក៏ដូចជាការកកស្ទះនៅកំពង់ផែ ដែលនឹងធ្វើឱ្យវិបត្តិខ្សែសង្វាក់ផ្គត់ផ្គង់កាន់តែខិតជិតចូលមកដល់។នេះបើយោងតាមការចុះផ្សាយដោយសារពត៌មាន CNA។

ជុំវិញបញ្ហានេះ ប្រតិបត្តិករកំពង់ផែ PSA Singapore បានអះអាងថា ខ្លួនកំពុងធ្វើការយ៉ាងជិតស្និទ្ធជាមួយខ្សែបណ្តាញដឹកជញ្ជូន ដើម្បីកាត់បន្ថយការរំខាន ដោយបន្ថែមថា ខ្លួនកំពុងទាក់ទងជាមួយអ្នកបើកបរកប៉ាល់ ដើម្បីដឹងទុកជាមុនអំពីម៉ោងមកដល់ និងបរិមាណទំនិញនៅលើកប៉ាល់។ក្រុមអ្នកសង្កេតការណ៍បានលើកឡើងថា ការកកស្ទះនៅកំពង់ផែសិង្ហបុរីបណ្តាលមកពីការបង្វែរផ្លូវដឹកជញ្ជូន ដែលបង្កឡើងដោយភាពចលាចលនៅក្នុងសមុទ្រក្រហម គួបផ្សំនឹងក្រុមហ៊ុននាំចេញរបស់ចិនកំពុងសម្រុកដឹកជញ្ជូនទំនិញ មុនពេលការដំឡើងពន្ធរបស់សហរដ្ឋអាមេរិកចូលជាធរមាន។

កាលពីដើមខែឧសភា សហរដ្ឋអាមេរិកបានប្រកាសថា ខ្លួននឹងដំឡើងពន្ធលើទំនិញនាំចូលពីប្រទេសចិន ដែលមានតម្លៃ១៨ពាន់លានដុល្លារ ដោយផ្តោតលើ វិស័យយុទ្ធសាស្ត្រដូចជា រថយន្តអគ្គិសនី (EVs) អាគុយ ដែកថែប និងសារធាតុរ៉ែសំខាន់ៗ។ ដំណឹងនេះបាននាំឱ្យក្រុមហ៊ុនរបស់ចិនសម្រុកនាំចេញឱ្យបានច្រើន មុនពេលដែលវិធានការពន្ធចូលជាធរមាន។

ជាធម្មតា កប៉ាល់ទាំងនេះត្រូវបើកបរឆ្លងកាត់ច្រកសមុទ្រម៉ាឡាកា ដើម្បីចូលចតនៅកំពង់ផែសិង្ហបុរី។ ប៉ុន្តែ ការកើនឡើងយ៉ាងគំហុកនៃចំនួនកប៉ាល់បានបណ្តាលឱ្យមានការកកស្ទះ។ បច្ចុប្បន្ននេះ កប៉ាល់នីមួយៗ ត្រូវចំណាយពេលប្រហែល៧ថ្ងៃដើម្បីចូលចតបាន បើប្រៀបធៀបនឹងការចំណាយពេលត្រឹមតែ១ថ្ងៃ ឬ២ថ្ងៃប៉ុណ្ណោះ កាលពីពេលមុន។

នៅក្នុង​ខែ​ឧសភានេះ កំពង់ផែ​របស់​ប្រទេស​សិង្ហបុរី​បានទទួល​ស្វាគមន៍កប៉ាល់​ដឹកទំនិញប្រហែល១.០០០គ្រឿង​រួច​មកហើយ បើ​ប្រៀបធៀប​នឹង​ចំនួន៦៣៩គ្រឿង កាលពីខែ​មេសាកន្លងទៅ៕ប្រភព: CNA៕

ដោយៈ គង់ សូរិយា

        ព្រះសីហនុៈ ប្រធានក្រុមការងារជម្រុញការវិនិយោគ នៅខេត្តព្រះសីហនុ ដោយបានសម្រេចជាគោលការណ៍ ផ្តល់ការលើកទឹកចិត្ត ការអនុគ្រោះការសម្រួលនីតិវិធី និងការដោះស្រាយវិវាទចំនួន១៤គម្រោងជាមួយទំហំទុនវិនិយោគ៧៣៣លានដុល្លារ។

ការសម្រេចនេះ បានធ្វើឡើងក្នុងកិច្ចប្រជុំកាលពីថ្ងៃទី២៩ ឧសភា ដឹកនាំដោយលោកបណ្ឌិតសភាចារ្យ ហ៊ាន សាហ៊ីប រដ្ឋលេខា​ធិការក្រសួងសេដ្ឋកិច្ច និង ហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ។

គម្រោងទាំងនោះរួមមាន គម្រោងពាក់ព័ន្ធនឹងអគារជាប់គាំងចំនួន៧ និងគម្រោងពុំពាក់ព័ន្ធនឹងអគារជាប់គាំងចំនួន៦ ដែលដំណើ​រការបានភ្លាមក្នុងឆ្នាំ២០២៤ និងគម្រោងពង្រីកចំនួន១ ។ គម្រោងទាំង១៤នោះ រួមមាន គម្រោងបង្កើតសួនកសិ-ឧស្សាហកម្មថ្នាក់ជាតិ, គម្រោងសណ្ឋាគារផ្កាយ៥ និងកាស៊ីណូ។ គម្រោងរមណីយដ្ឋាន, អគារស្នាក់នៅរួម, អគារពហុមុខងារសម្រាប់ការិយាល័យ និងស្នាក់នៅរួម។ គម្រោងទាំងនេះ ជាគម្រោងចម្រុះ ដែលមានម្ចាស់ជាជនជាតិខ្មែរ និង បរទេស និង មានទំហំតូច មធ្យម និងធំ ។

ការសម្របសម្រួលនេះ ត្រូវបានធ្វើឡើងសម្រាប់គម្រោងដែលស្នើសុំ និងអនុវត្តក្នុងខេត្តព្រះសីហនុ ក្នុងឆ្នាំ ២០២៤ ចំពោះគម្រោង ៣ប្រភេទ រួមមាន១) គម្រោងពាក់ព័ន្ធនឹងអគារជាប់គាំង, ២) គម្រោងពុំពាក់ព័ន្ធនឹងអគារជាប់គាំង ដែលអាចដាក់ដំណើរការបានក្នុងឆ្នាំ ២០២៤ និង៣) ការពង្រីកគម្រោង/សកម្មភាពធុរកិច្ច ។

ការលើកទឹកចិត្ត និងការអនុគ្រោះនានា ក៏ផ្តល់ជូនសហគ្រាសមីក្រូតូច និងមធ្យម ។ ជាមួយនេះ, សហគ្រាស ឬគម្រោងដែលមានស្រាប់ ក៏ទទួលបានការអនុគ្រោះ និងសម្រួលនីតិវិធីលើលិខិតអនុញ្ញា​តអាជ្ញាបណ្ណ និងការតភ្ជាប់ទៅហេដ្ឋារចនាសម្ព័ន្ធរបស់រដ្ឋ ជាអាទិ៍ ទឹក ភ្លើង ផ្លូវ ជាដើម តាមលក្ខណៈភូមិសាស្រ្ត និង លទ្ធភាពរបស់រដ្ឋ និង/ឬ វិស័យឯកជន ។

ការពិនិត្យផ្តល់ការលើកទឹកចិត្តពិសេសខាងលើ ធ្វើឡើងស្របតាមកម្មវិធីពិសេស ជំរុញការវិនិយោគក្នុងខេត្តព្រះសីហនុ ឆ្នាំ ២០២៤ ដែលសម្តេចធិបតីនាយករដ្ឋមន្ត្រី បានប្រកាសដាក់ឱ្យអនុវត្តជាផ្លូវការ នាថ្ងៃទី ៣១ ខែ មករា ឆ្នាំ ២០២៤ ។

តាមរយៈនេះ និងជាបន្តបន្ទាប់គិតចាប់ពីខែ កុម្ភៈ មកដល់បច្ចុ​ប្បន្ន, ក្រុមការងារបានសម្រេចជាគោលការណ៍ ​ក្នុងការផ្តល់អត្ថប្រយោ​ជន៍ពិសេស ដល់គម្រោងវិនិយោគ/ធុរកិច្ចចំនួន៤១ ។ ក្នុងពេលខាងមុខដ៏ខ្លីនេះ, ក្រុមការងារនឹងធ្វើការពិនិត្យ លើការស្នើការលើកទឹកចិត្តពិសេសរបស់គម្រោងវិនិយោគ/ធុរកិច្ចចំនួន២៣បន្ថែមទៀត៕