ដោយៈ គង់ សូរិយា

        កំពតៈ ក្រសួងសាធារណៈការ និងដឹកជញ្ជូន និងធនាគារអភិ​វឌ្ឍន៍អាស៊ី(ADB) បានសិក្ខាសាលាស្តីពី “ការប្រើប្រាស់កម្មវិធីប្រព័ន្ធព័ត៌មាន BRUTIS សម្រាប់គ្រប់គ្រងទិន្នន័យ ហេដ្ឋារចនាសម្ព័ន្ធក្រុង ក្នុងខេត្តកំពត”។

សិក្ខាសាលានេះបានប្រារពធ្វើកាលពីសប្តាហ៍មុន ក្រោមអធិបតីភាព លោកវង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន ដែលបានរៀបចំដោយធនាគាអភិវឌ្ឍអាស៊ី (ADB) នៃគម្រោងអភិវឌ្ឍន៍ក្រុងរបៀង ក្នុងមហាអនុតំបន់ទន្លេមេគង្គទី២។គម្រោងនេះនឹងគាំទ្រដល់ការគ្រប់គ្រង និងអនុវត្តការរចនាប្លង់លម្អិត និងការត្រួតពិនិត្យការសាងសង់ (កញ្ចប់ទី១) និងការពង្រីកសមត្ថភាព (កញ្ចប់ទី២) សហការជាមួយ អគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការ និងដឹកជញ្ជូន។គោលបំណងនៃសិក្ខាសាលានេះ ផ្តោតសំខាន់លើការចែករំលែកបទពិសោធន៍ បច្ចេកវិទ្យាថ្មីៗ ពិសេសសារៈសំខាន់នៃការប្រើប្រាស់កម្មវិធី BRUTIS ដែលបានប្រើនៅប្រទេសហូឡង់ដ៏ និងបណ្តាប្រទេសមួយចំនួន ពាក់ព័ន្ធប្រព័ន្ធចម្រោះទឹកកខ្វក់ ការគ្រប់គ្រងប្រព័ន្ធលូ ការផ្សព្វផ្សាយសមិទ្ធិផលថ្មី ថែមទៀតលើបទដ្ឋានគតិយុត្ត និងពង្រឹងបន្ថែមសមត្ថភាព ដល់មន្ត្រីពាក់ព័ន្ធថ្នាក់ជាតិ ថ្នាក់ក្រោមជាតិតាមរាជធានី-ខេត្ត និងជាការប្រើប្រាស់សាកល្បង អនុវត្តន៍ក្នុងក្រុងកំពតផងដែរ។

អ្នកជំនាញបានធ្វើបទបង្ហាញ ពីអ្នកជំនាញបច្ចេកទេស ការគ្រប់​គ្រងប្រព័ន្ធរំដោះទឹកកខ្វក់ មកពីប្រទេសហូឡង់ដ៍ និងមានការចូលរួមពីថ្នាក់ដឹកនាំ មន្រ្តីបច្ចេកទេស របស់អគ្គនាយកដ្ឋានប្រព័ន្ធចម្រោះទឹកកខ្វក់ និងមន្ទីរសាធារណការនិងដឹកជញ្ជូនខេត្ត និងអង្គភាពក្រោមឱវាទក្រសួង ដែលមានជំនាញពាក់ព័ន្ធផងដែរ៕

ដោយៈ គង់ សូរិយា

        ភ្នំពេញៈ អនុរដ្ឋលេខាធិការ និងជាអ្នកនាំពាក្យ​រដ្ឋលេខាធិកា​រដ្ឋា​ន​អាកាសចរណ៍​ស៊ីវិល លោក ស៊ិន ចាន់​សេរី​វុត្ថា បាន​មានប្រសាសន៍ឲ្យដឹងថា ក្រុមហ៊ុន​អាកាសចរណ៍​ជាច្រើន ​បាន​បន្ថែម​ជើងហោះហើរ​ទៅមក​រវាង​ប្រទេស​ចិន និង​កម្ពុជា។

កំណើននេះ កើតមានឡើងស្រប​ពេលដែល​ប្រទេស​កម្ពុជា ទើបតែ​ដាក់ឱ្យ​ប្រើប្រាស់ ​អាកាសយាន​ដ្ឋា​ន​អន្តរជាតិ​សៀមរាប​ អង្គរ​ថ្មី និង​ដាក់ចេញ​ “ផែនការ​ពិសេស​” ដើម្បី​ទាក់ទាញ​ភ្ញៀវទេសចរ​។

លោកស៊ិន ចាន់​សេរី​វុត្ថា បាន​ថ្លែង​ប្រាប់ថា ដើម្បី​លើកកម្ពស់​កិច្ចសហប្រតិបត្តិការ​សេដ្ឋកិច្ច និង​ពាណិជ្ជកម្ម និង​ការផ្លាស់ប្តូរ​វប្បធម៌​រវាង​ចិន និង​កម្ពុជាចាប់ពី​ខែធ្នូ ឆ្នាំនេះ ក្រុមហ៊ុន​អាកាសចរណ៍ China Southern Airlines នឹង​បន្ថែម​ជើងហោះហើរ​ត្រង់​ មកកាន់​ប្រទេស​កម្ពុជា​ចំនួន៤ជើង​ក្នុង​មួយ​សប្តាហ៍ ដោយ​ផ្អែកលើ​មូលដ្ឋាន​នៃ​ជើងហោះហើរ​ដើម​ចំនួន២ជើង​ក្នុង​មួយថ្ងៃ​។ ​យោងតាម​ការចេញផ្សាយ ​ដោយសារ​ព័ត៌មាន​China News Service ក្រុមហ៊ុន​អាកាសចរណ៍ China Southern Airlines នឹង​បន្ថែម​ជើងហោះហើរ​ត្រង់​ចំនួន៤ មកកាន់​ប្រទេស​កម្ពុជា​រៀងរាល់​សប្តាហ៍ ដោយ​ចាប់ផ្តើម​ពីថ្ងៃ​ទី១ ខែធ្នូ​។ ចាប់ពី​ខែធ្នូ​តទៅ ជើងហោះហើរ​ក្វាង​ចូ​វ​-​ភ្នំពេញ របស់​ក្រុមហ៊ុន​អាកាសចរណ៍ China Southern Airlines ជើងហោះហើរ CZ៦០៥៩ និង CZ៣២៣ នឹង​ដំណើរការ​មួយថ្ងៃ​ម្តង​​។​

លោក​បាន​បន្តថា ខណៈពេលដែល​ពិធីបុណ្យ​ចូលឆ្នាំ​ចិន និង​ការផ្លាស់ប្តូរ ​ទំនាក់ទំនង​រវាង​ប្រជាជន​ចិន​-​កម្ពុជា​ឆ្នាំ ២០២៤​ កំពុង​ខិតជិត​មកដល់ ​ក្រុមហ៊ុន​អាកាសចរណ៍​មួយចំនួន​ បានប្រកាស​ពី​ការបន្ថែម​ជើងហោះហើរ​ រវាង​ប្រទេស​ចិន និង​កម្ពុជា​ចាប់ពី​ខែធ្នូ ដើម្បី​សម្រួល​ ដល់​ការធ្វើដំណើរ​របស់​ជន​ជាតិចិន ភ្ញៀវទេសចរ​អន្តរជាតិ និង​អ្នកវិនិយោគ ដែល​ទៅសួរសុខទុក្ខ​សាច់ញាតិ និង​ការធ្វើដំណើរ​កម្សាន្ត និង​ការធ្វើ​ទស្សនកិច្ច​អាជីវកម្ម​រវាង​ប្រទេស​ទាំងពីរ​។​លោក សេរី​វុត្ថា ក្រុមហ៊ុន​អាកាសចរណ៍ China Southern Airlines នឹង​បន្ថែម​ថ្មី​នូវ​ជើងហោះហើរ​ក្វាង​ចូ​វ​-​ភ្នំពេញ CZ៨៣១៣  នឹង​ដំណើរការ​មួយថ្ងៃ​ម្តង រៀងរាល់ថ្ងៃ​ចន្ទ ពុធ សុក្រ និង​ថ្ងៃអាទិត្យ​។នៅពេលនោះ ក្រុមហ៊ុន​អាកាសចរណ៍ China Southern Airlines នឹងមាន​ជើងហោះហើរ​ ប្រចាំ​សប្តាហ៍​ចំនួន៣៦ ជើង​រវាង​ទីក្រុង​ក្វាង​ចូ​វ និង​រាជធានី​ភ្នំពេញ​។ លោក​បាន​បញ្ជាក់ទៀតថា​  ​ក្រុមហ៊ុន​អាកាសចរណ៍ ខេ​ម​បូ​ឌា អ៊ែរ​ឡាញ នឹង​បើក​ដំណើរការ​ជើងហោះហើរ ​ទៅមក​ពី​ភ្នំពេញ​ទៅ​ជី​ណាន ខេត្ត​សាន​ទុង នៅ​ថ្ងៃទី​ ២៣ ខែធ្នូ​។ ក្នុងចំណោម​នោះ ជើងហោះហើរ​ ពី​ជី​ណាន​មក​ភ្នំពេញ នឹងធ្វើ​ដំណើរ នៅ​ម៉ោង៣​រសៀល រៀងរាល់ថ្ងៃ​សៅរ៍ ហើយ​មកដល់​ភ្នំពេញ​នៅ​ម៉ោងជិត​៧​ល្ងាច ម៉ោង​ក្នុងស្រុក​។នៅ​ឆ្នាំ២០២៤ខាងមុខ ក្រុមហ៊ុន​អាកាសចរណ៍ ខេ​ម​បូ​ឌា អ៊ែរ​វ៉េ ក៏មាន​គម្រោង​បើក​ជើងហោះហើរ​ថ្មី​ពី​ភ្នំពេញ​ទៅ ហៃ​គូ ហៃ​ណាន និង​សាន់​យ៉ា​។

បច្ចុប្បន្ន ទីក្រុង​របស់​ប្រទេសចិន ​ដែលមាន​ជើងហោះហើរ​ត្រង់​មក​ទីក្រុង​ភ្នំពេញ ប្រទេស​កម្ពុជា រួមមាន ​ទីក្រុង​ប៉េកាំង សៀង​ហៃ ក្វាង​ចូ​វ ណាន​នី​ង ឆេង​ទូ គុន​មីង និង​កន្លែង​ផ្សេងៗ​ទៀត​។ នៅពេលដែល​ជំងឺ​កូ​វីដ​ ១៩​ បាន​ធូរស្រាល​បន្តិច​ម្តងៗ ភ្ញៀវទេសចរ​អន្តរជាតិ និង​អ្នកវិនិយោគ​កាន់តែ​ច្រើនឡើងៗ ​បាន​វិល​ត្រឡប់មក​កម្ពុជា​វិញ​។​

យោងតាមរបាយការណ៍​ ពី​រដ្ឋលេខាធិការដ្ឋាន​អាកាសចរណ៍​ស៊ីវិល បាន​បង្ហាញថា អាកាសយានដ្ឋាន​អន្តរជាតិ​សៀមរាប ​អង្គរ​ថ្មី មាន អ្នកដំណើរ​ទៅដល់​ជា​មធ្យម កើន​ពី២៦០០ នាក់ ទៅ ​៣​២០០​ នាក់ ក្នុង​​១ ថ្ងៃ ដោយមាន​ការហោះហើរ​ជា​មធ្យម៤៤​ជើង​ក្នុង​មួយថ្ងៃ (ទ្វេរ​ទិស​)​។ ភាគច្រើន​ជើងហោះហើរ​មកពី​តំបន់​អាស៊ាន និង​ចិន ដោយ​ក្នុងនោះ​មាន​ភ្ញៀវ​ចម្រុះ​ជាតិ​សាសន៍ អាស៊ាន​៧៥​ភាគរយ និង​អឺរ៉ុប ២៥​ ភាគរយ​៕

ដោយ: គង់ លាងហួរ
ប៉េកាំងៈ ធនាគារកណ្តាល និងនិយតករហិរញ្ញវត្ថុរបស់ប្រទេសចិន បានប្តេជ្ញាធានាការគាំទ្រផ្នែកហិរញ្ញវត្ថុ សម្រាប់វិស័យអចលនទ្រព្យ និងធ្វើការរួមគ្នា ដើម្បីដោះស្រាយហានិភ័យបំណុលរបស់រដ្ឋបាលក្នុងតំបន់មូលដ្ឋាន។

ក្រុមថ្នាក់ដឹកនាំចិន កំពុងព្យាយាមស្តារសេដ្ឋកិច្ចឡើងវិញ និងទប់ស្កាត់ហានិភ័យហិរញ្ញវត្ថុ ដែលអាចកើតមាន ពីការដាំក្បាលចុះនៃវិស័យអចលនទ្រព្យ និងបំណុលរដ្ឋបាលក្នុងតំបន់ សរុបចំនួន៩២ពាន់ពាន់លានយ័ន (ប្រហែល១២,៧៧ពាន់ពាន់លានដុល្លារ)។

បន្ទាប់ពីចូលរួមកិច្ចប្រជុំ ដែលរៀបចំឡើងដោយធនាគារកណ្តាល និងនិយតករហិរញ្ញវត្ថុ ក្រុមនិយតករមូលបត្របានបញ្ជាក់ឱ្យដឹងកាលពីពេលថ្មីៗនេះថា បណ្តាស្ថាប័នហិរញ្ញវត្ថុ នឹងបំពេញតាមតម្រូវការហិរញ្ញប្បទាន ដែលសមហេតុផល របស់ក្រុមហ៊ុនអចលនទ្រព្យ ហើយបញ្ឈប់ការកាត់បន្ថយប្រាក់កម្ចីដល់ពួកគេ។

គណៈកម្មការនិយតកម្មមូលបត្រចិនបានបញ្ជាក់ថា កិច្ចខិតខំប្រឹងប្រែងនាពេលថ្មីៗនេះ ដើម្បីរក្សាស្ថិរភាពហិរញ្ញវត្ថុ សម្រាប់វិស័យអចលនទ្រព្យ តាមរយៈឥណទានធនាគារ ប័ណ្ណបំណុល និងការបោះផ្សាយលក់ភាគហ៊ុនកំពុងទទួលបានការចាប់អារម្មណ៍។

លើសពីនេះ ប្រទេសចិននឹងជំរុញការពង្រីកឥណទាន ប្រកប ដោយស្ថិរភាព ដើម្បីគាំទ្រដល់កំណើនសេដ្ឋកិច្ចរបស់ខ្លួន ហើយស្ថាប័នហិរញ្ញវត្ថុ នឹងធ្វើការជាមួយរដ្ឋបាលក្នុងតំបន់ ដើម្បីដោះស្រាយហានិភ័យបំណុល តាមរយៈការពន្យារពេលទូទាត់ សងបំណុលជាដើម៕

        ដោយៈ គង់ សូរិយា

        ភ្នំពេញៈ ការដ្ឋានសាងសង់គម្រោងអាកាសយាន្តដ្ឋានអន្ដរជាតិ តេជោ ក្រុងតាខ្មៅតម្លៃ១.៥ពាន់លានដុល្លារ បានបញ្ចប់១០០ភាគរយហើយ លើផ្លូវរត់របស់ព្រលានលំដាប់អន្តរជាតិនេះ។

អាកាសយានដ្ឋាននេះ បាននិងកំពុងអភិវឌ្ឍលើផ្ទៃដីទំហំ២ ៦០០ហិកតា ស្ថិតនៅចម្ងាយប្រមាណ២០គីឡូម៉ែត្រពីភាគខាងត្បូងភ្នំពេញ។

ព្រលានយន្តហោះអន្តរជាតិភ្នំពេញថ្មី ជាប្រភេទ 4F ដែលមានសមត្ថភាពអាចឱ្យប្រភេទ យន្តហោះហោះធុនយក្ស ដូចជា Airbus A380-800 និង Boeing 747-800 អាចចុះចតបាន ដែលអាចទទួលអ្នកដំណើរបាន១៥លាននាក់ នៅពេលបញ្ចប់ដំណាក់កាលទី១ និងអាចទទួលអ្នកដំណើរ បាន​៣០លាននាក់នៅដំណាក់កាលទី២៕

ដោយៈ តែម សុខុម

វ៉ាស៊ីនតោន: លោកដូណាល់ ត្រាំ បានប្រកាសគួរឱ្យភ្ញាក់ផ្អើលកាលពីថ្ងៃសៅរ៍ ចុងសប្តាហ៍កន្លងទៅថា លោកនឹងលុបចោលកិច្ចព្រមព្រៀងពាណិជ្ជកម្ម ថ្នាក់តំបន់ប៉ាស៊ីហ្វិកមួយ ដែលបន្តដោយលោកចូ បៃឌិន ប្រសិនបើលោកជាប់ឆ្នោតក្នុងឆ្នាំ២០២៤ និងវិលត្រលប់មកសេតវិមានវិញ។

ថ្លែងទៅកាន់ក្រុមអ្នកគាំទ្រនៅរដ្ឋ Iowa លោក ដូណាល់ ត្រាំ ដែលជាបេក្ខភាពប្រធានាធិបតីឈានមុខគេ នៃគណបក្សសាធារណរដ្ឋបានប្រកាសថា លោកជំទាស់នឹងកិច្ចព្រមព្រៀងពាណិជ្ជកម្មថ្នាក់តំបន់នេះ ដែលរដ្ឋការលោក ចូ បៃឌិន កំពុងចរចាជាមួយប្រទេសចំនួន១៣ផ្សេងទៀត។

​លោកបានលើកឡើងថា “កិច្ចព្រមព្រៀងនេះ នឹងបំផ្លាញផលិត​កម្មរបស់សហរដ្ឋអាមេរិក ហើយនឹងបណ្ដាលឱ្យបាត់បង់ការងារយ៉ាងច្រើន”។

ការចរចាជុំវិញផ្នែកពាណិជ្ជកម្ម នៃកិច្ចព្រមព្រៀងក្របខណ្ឌសេដ្ឋកិច្ចឥណ្ឌូប៉ាស៊ីហ្វិក (IPEF)) ដែលមានគោលដៅផ្ដល់ជម្រើសដល់តំបន់ឱ្យងាកចេញ ពីឥទ្ធិពលពាណិជ្ជកម្ម ដែលរីកកាន់តែធំរបស់មហាយក្សចិន បានជួបឧបសគ្គរាំងស្ទះ ក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីប្រទេសមួយចំនួន រួមមាន វៀតណាម និងឥណ្ឌូនេស៊ី បានបដិសេធមិនប្ដេជ្ញាគោរពតាមស្តង់ដារការងារ និងបរិស្ថានដ៏តឹងរ៉ឹង។

លោក ដូណាល់ ត្រាំ ដែលបានដកសហរដ្ឋអាមេរិក ចេញពីកិច្ចព្រមព្រៀងពាណិជ្ជកម្មសេរី “ភាពជាដៃគូអន្តរប៉ាស៊ីហ្វិក” (TPP) ដែលត្រូវបានចុះហត្ថលេខា ជាមួយប្រទេសជាច្រើន ក្រោយពីលោកចូលកាន់តំណែងនៅខែមករា ឆ្នាំ២០១៧ បានប្រកាសថា លោកនឹងលុបចោលកិច្ចព្រមព្រៀងនេះ ដែលលោកហៅថា “TPP Two” ពេលលោកចូលកាន់តំណែងភ្លាមៗ។

រដ្ឋការលោក ចូ បៃឌិន សង្ឃឹមថា នឹងបង្ហើយជំពូកសំខាន់ៗនៃគំនិតផ្ដួចផ្ដើម “ក្របខណ្ឌពាណិជ្ជកម្មសេដ្ឋកិច្ចឥណ្ឌូប៉ាស៊ីហ្វិក” (IPEF) របស់ខ្លួនឱ្យទាន់កិច្ចប្រជុំ សហប្រតិបត្តិការសេដ្ឋកិច្ចអាស៊ី-ស៊ីហ្វិក (APEC)។
រដ្ឋការរបស់លោក ចូ បៃឌិន បានប្ដេជ្ញាបន្តចរចាជុំវិញកិច្ចព្រមព្រៀងប្រកបដោយមហិច្ឆតានេះ។

ទោះជាយ៉ាងណា ក្រុមអ្នកជំនាញពាណិជ្ជកម្ម និងធុរកិច្ចបានលើកឡើងថា សម្ពាធឆ្នាំបោះឆ្នោត និងការជំទាស់មិនព្រមធ្វើការប្ដេជ្ញាចិត្ត ដោយមោះមុតពីប្រទេសមួយចំនួន ប្រហែលជាធ្វើឱ្យកិច្ចព្រមព្រៀងមិនអាចសម្រេចទៅបានឡើយ៕ The Edge Markets៕

ដោយៈ គង់ សូរិយា

        ភ្នំពេញៈ ប្រធានKW Cambodia និងជាអ្នកអភិវឌ្ឍន៍បុរីវិមានសំណាងបានឲ្យដឹងថា គំរោងអភិវឌ្ឍន៍អចលនទ្រព្យ សំណាង ថោន (SAMNANG TOWN) តម្លៃជាង៥០០លានដុល្លារបានបញ្ចប់ការសិក្សារួចហើយ។

លោកឧកញ៉ាបានសរសេរលើបណ្តាញទំនាក់ទំនងសង្គមកាលពីចុងសប្តាហ៍មុនថា “SAMNANG TOWN គឺគំរោងបន្ទាប់របស់ខ្ញុំបាទ គីម ហ៊ាង ដែលបានបញ្ចប់ការសិក្សាពីតម្រូវការ ការផ្គត់ផ្គង់ ការធ្វើទីផ្សារ ការលក់ និងប្លង់មេសំខាន់ៗ  ដោយរួមមានសាលារៀន មន្ទីរពេទ្យ សណ្ឋាគារ ផ្សារទំនើប ផ្ទះអាជីវកម្ម និងខុនដូ សម្រាប់មនុស្សជាង៣០,០០០នាក់ ស្នាក់នៅប្រចាំថ្ងៃ”។លោកឧកញ៉ាបានបញ្ជាក់ថា គំរោងនេះនឹងត្រូវចាប់ផ្តើមពេលណានោះ​ ក៏ខ្ញុំបាទ គីម ហ៊ាង មិនដឹងទេ! No one would know for when the SAMNANG TOWN $500M can be started, including Dr. Kim Heang”។លោកឧកញ៉ាបណ្ឌិតគីម ហ៊ាងបានលើកឡើងកន្លងមកថា លោកយល់ពីតម្រូវការរបស់អតិថិជន និងដឹងពីអ្វីដែលអតិថិជនត្រូវការ ដែលធ្វើឲម្យលោកដឹងថា លោកអាចលក់គម្រោងខុនដូបាន១០០០យូនីតក្នុងមួយឆ្នាំ ឬច្រើនជាងនេះ ខណៈទីផ្សារអចលនវត្ថុ កំពុងមានភាពប្រសើរឡើង នៅឆ្នាំ២០២៣នេះ ធៀបនឹងបណ្តាឆ្នាំកន្លងមក ហើយវាជាឱកាសល្អសម្រាប់វិនិយោគក្នុងវិស័យនេះ ដោយ​សារមានអ្នកលក់ច្រើន ដែលធ្វើឲ្យអ្នកមានលទ្ឋភាពទិញ អាចជ្រើសរើសគំរោង ឬទីតាំងដីបានល្អ៕

        ដោយៈ ជេស៊ីកា

        ភ្នំពេញៈ នៅកម្ពុជាការចុះបញ្ជីដីធ្លី បែងចែកជាទម្រង់ខុសៗគ្នា ដោយមានការបែងចែកជា៣ទម្រង់ តាមនិតិវិធីច្បាប់ជាធរមាន។ ការចុះបញ្ជីដីធ្លីនៅកម្ពុជា មានការបែងចែងជាបីប្រភេទ រួមមាន ទី១ ការចុះបញ្ជីដីធ្លីមានលក្ខណៈជាប្រព័ន្ធ ទី២ ការចុះបញ្ជីបំពេញបន្ថែម និងទី៣ ការចុះបញ្ជីដីធ្លីមានលក្ខណៈដាច់ដោយដុំ។
តើគេចុះបញ្ជីដីធ្លីទាំងបីប្រភេទ មានលក្ខណៈដូចម្តេច? ដែលគេហទំព័រPropertyarea.asia សូមលើកយកមកបង្ហាញដូចជា

ទី១. ការចុះបញ្ជីដីធ្លីមានលក្ខណៈជាប្រព័ន្ធ
ការចុះបញជីរបែបនេះ ជាការចុះបញ្ជីដីធ្លីដែលធ្វើឡើង ដោយឡើងដោយមន្រ្តីសុរិយោដី ធ្វើជាភូមិឃុំសង្កាត់ ដោយជាការចំណាយទាំងស្រុងរបស់រដ្ឋ។
ជាធម្មតាការចុះបញ្ជីនេះ នឹងត្រូវផ្តល់ជាព័ត៌មានទៅដល់ម្ចាស់ដី ដោយធ្វើការពន្យល់ និងភ្ជាប់ជាមួយឯកសារសំខាន់ៗរួមមាន លិខិតកាន់កាប់ដី កិច្ចសន្យាទិញលក់ ឬញឯកសារប្លង់នានា តួយ៉ាងប្លង់ទន់ ឬប្លង់ដែលអាចប្រើប្រាស់ជាការផ្សេងៗ។ ការចុះបញ្ជីនេះលោកអ្នក នឹងទទួលបាននូវវិញ្ញាបនបត្រសម្គាល់ម្ចាស់អលចនវត្ថុL-Mapឬប្លង់រឹង​។

ទី២ ការចុះបញ្ជីបំពេញបន្ថែម
ការចុះបញ្ជីដីធ្លីបែបនេះ ជាទូទៅការចុះបញ្ជីបំពេញបន្ថែម ត្រូវបានធ្វើឡើងដោយម្ចាស់ដីធ្លី ដែលបានខកខានក្នុងការចុះបញ្ជីដីដែល មានលក្ខណជាប្រព័ន្ធ។ ហើយការខកខានមិនបានចុះបញ្ជី ដោយ​សារមានមូលហេតុជាច្រើន រួមមាន ការទទួលដំណឹងយឺត ឬមិនបានទទួល មានជំលោះព្រំដី ឬវិវាទដីធ្លី អំឡុងពេលក្នុងការធ្វើនីតិវិធីកំណត់ព្រំនៃ នីតិវិធីចុះបញ្ជីដីធ្លីមានលក្ខណៈជាប្រព័ន្ធ។
ការស្នើសុំចុះបញ្ជីបំពេញបន្ថែមនេះ ម្ចាស់សំណើត្រូវបង់សេវារដ្ឋបាល ទៅអង្គភាពច្រកចេញចូលតែមួយ ដើម្បីស្នើសុំចុះបញ្ជីដោយកម្រៃសេវាត្រូវគិតផ្អែកលើទីតាំងដី និងទំហំដី។

ទី៣. ការចុះបញ្ជីដីធ្លីមានលក្ខណៈដាច់ដោយដុំ
ក្នុងតំបន់ខ្លះ ឬករណីដែលដីធ្លីនោះមិនទាន់ ត្រូវបានកំណត់ចុះបញ្ជីដីធ្លីមានលក្ខណៈជាប្រព័ន្ធ ម្ចាស់កម្មសិទ្ធិបានស្នើសុំធ្វើប្លង់ដោយខ្លួនឯង ដោយត្រូវបានគេហៅថា ការចុះបញ្ជីដីធ្លីមានលក្ខណៈដាច់ដោយដុំ។ រាល់ការប្រតិបត្តិការឯកសារនានា ក៏ដូចជាកម្រៃជើងសារ សេវារដ្ឋបាល ម្ចាស់ដីគឺជាអ្នករ៉ាប់រងចំណាយដោយខ្លួនឯង៕

ចុះហេតុអ្វីយើងត្រូវស្នើចុះបញ្ជីដីធ្លី?
ការចុះបញ្ជីដីធ្លីអាចចាត់ទុកបានថា ជាដំណើរការនៃការទៅមុខនៃការក្លាយជាម្ចាស់កម្មសិទ្ធិដីធ្លីស្របច្បាប់។ បន្ទាប់ពីអ្នកស្នើសុំចុះបញ្ជីរួចរាល់ជាស្ថាពរ អ្នកនឹងទទួលបាននូវ វិញ្ញាបនប្រសម្គាល់ម្ចាស់អលចនវត្ថុ ដែលរួមមានអត្ថប្រយោជន៍ដូចជា ១. ភាពច្បាស់លាស់នៃកម្មសិទ្ធិ ជាម្ចាស់កម្មសិទ្ធិដោយទទួលបានសិទ្ធិផ្តាច់មុខ និងស្របច្បាប់។ ២. មានភាពច្បាស់លាស់នៃព្រំដី ជារួមមានការកាន់កាប់ដីបានច្បាស់លាស់ និងសុវត្ថិភាពពេញទី៕