ភ្នំពេញ ថ្ងៃទី ១៩ ខែវិច្ឆិកា ឆ្នាំ ២០២៣៖ ធនាគារ ហត្ថា ដែលជាក្រុមហ៊ុនបុត្រសម្ព័ន្ធរបស់ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទីប្រាំនៅក្នុងព្រះរាជាណាចក្រថៃ និងជាសមាជិកមួយនៃ MUFG Financial Group របស់ប្រទេសជប៉ុន បានប្រកាសដាក់សម្ពោធជាផ្លូវការនូវប័ណ្ណវីសា​ ហត្ថា នៅផ្សារទំនើប អ៊ីអនម៉ល មានជ័យ (អ៊ីអនម៉លទី ៣)។ នៅក្នុងកម្មពិធីសម្ពោធនេះ មានការអញ្ជើញចូលរួមជាកត្តិយសពីសំណាក់ លោកឧកញ៉ា ហួត អៀងតុង ប្រធាននាយកនៃ ធនាគារ ហត្ថា និងលោកស្រី Ivana Tranchini អ្នកគ្រប់គ្រងនៃក្រុមហ៊ុន Visa ប្រចាំប្រទេសកម្ពុជា រួមជាមួយថ្នាក់ដឹកនាំ ជាន់ខ្ពស់មក ពីស្ថាប័នទាំងពីរ និងដៃគូយុទ្ធសាស្ត្រផ្សេងៗជាច្រើនអ្នកផងដែរ។

ព្រឹត្តិការណ៍ថ្ងៃនេះបានបង្ហាញពីការប្ដេជ្ញាចិត្តរបស់ធនាគារ ហត្ថា ក្នុងការផ្តល់ជូនអតិថិជនរបស់ខ្លួននូវបទពិសោធថ្មីៗនៃការទូទាត់បែប     ឌីជីថលប្រកបដោយភាពងាយស្រួល លឿនរហ័ស មានសុវត្ថិភាពខ្ពស់ និងប្រើប្រាស់បានទូលំទូលាយជាសកល ។ ព្រឹត្តិការណ៍នេះ គឺជាភាពជោគជ័យថ្មីមួយទៀតសម្រាប់ធនាគារ ហត្ថា ដែលកំពុងប្រតិបត្តិការអាជីវកម្មរបស់ខ្លួនប្រកបដោយភាពរីកចម្រើន មានវិជ្ជាជីវៈ  មានទំនួលខុសត្រូវខ្ពស់ចំពោះអតិថិជន និងតែងតែបំពេញតម្រូវការរបស់អតិថិជនជាអាទិភាពចម្បង។លោកឧកញ៉ា ហួត អៀងតុង បានសម្តែងការសាទរចំពោះសមិទ្ធិផលដ៏សំខាន់នេះ ដោយលោកមានប្រសាសន៍ថា “យើងមានសេចក្តីរំភើបរីករាយក្នុងការផ្តល់ជូននូវសេវាទូទាត់ប្រាក់តាមបែបឌីជីថលជាសាកលដល់អតិថិជនបច្ចុប្បន្ន និងអនាគតរបស់ យើង។ នេះបង្ហាញពីវឌ្ឍនភាពដ៏សំខាន់នៅក្នុងផែនការផ្លាស់ប្តូរឌីជីថលរបស់យើង នៅពេលដែលយើងពង្រីកប្រព័ន្ធ អេកូធនាគារឌីជីថល របស់យើងដើម្បីឆ្លើយតបនឹងតម្រូវការរបស់អតិថិជនទូទៅ និងម្ចាស់អាជីវកម្ម។ លោកបានពន្យល់បន្ថែមថា “តាមរយៈការប្រើប្រាស់ ប័ណ្ណឥណពន្ធ​ វីសា អតិថិជនអាចធ្វើការទូទាត់ប្រាក់តាមអនឡាញ ឬក្នុងហាងទំនិញណាមួយបានយ៉ាងងាយ ស្រួល និងមានសុវត្ថិភាពខ្ពស់នៅទីកន្លែងជាច្រើនជុំវិញពិភពលោក ដែលមាននិមិត្តសញ្ញា Visa”។លោកស្រី Ivana Tranchini បានមានប្រសាសន៍ថា “យើងមានក្តីរំភើបក្នុងការធ្វើជាដៃគូជាមួយធនាគារ ហត្ថា ដើម្បីផ្តល់ជូនអ្នកប្រើប្រាស់នៅកម្ពុជានូវសុវត្ថិភាព និងភាពងាយស្រួលនៃប័ណ្ណឥណពន្ធ វីសា”។ “យោងតាមការសិក្សាអំពី ឥរិយាបទ របស់អតិថិជន បានបង្ហាញថាការប្រើប្រាស់ប័ណ្ណឥណពន្ធ និងប័ណ្ណឥណទាននៅក្នុងប្រទេសកម្ពុជា មានការកើនឡើងជាលំដាប់ ក្នុងរយៈពេលប៉ុន្មានឆ្នាំចុងក្រោយនេះ រួមជាមួយនឹងការចាប់អារម្មណ៍លើប័ណ្ណដែលមាន Contactless និងប័ណ្ណនិម្មិត។ យើងនៅតែបន្ត ប្តេជ្ញាចិត្តក្នុងការជំរុញដំណើរការផ្លាស់ប្តូរឌីជីថលរបស់ប្រទេសកម្ពុជាតាមរយៈការធ្វើឱ្យបទពិសោធននៃការទូទាត់របស់អ្នកប្រើប្រាស់កាន់តែប្រសើរឡើង ជាមួយនឹងដំណោះស្រាយទូទាត់បែបឌីជីថលប្រកបដោយភាពច្នៃប្រឌិតបំផុត។ ដើម្បីអបអរសាទរសមិទ្ធិផលដ៏គួរឱ្យកត់សម្គាល់នេះ ធនាគារ ហត្ថា ក៏មានការផ្តល់ជូនពិសេសសម្រាប់អ្នកកាន់ប័ណ្ណ វីសា ថ្មី របស់ធនាគារផងដែរ។ ការផ្តល់ជូនពិសេសទាំងនេះរួមមានការលើកលែងថ្លៃសេវាប័ណ្ណប្រចាំឆ្នាំរហូតដល់ ៥ ​​ឆ្នាំ និងផ្តល់ជូន ទឹកប្រាក់ ត្រឡប់មកវិញ 10% បន្ថែមពីលើមុខងារពិសេសនៃប័ណ្ណនេះ។ ជាមួយនឹងប័ណ្ណ ហត្ថា វីសា អតិថិជនអាចរីករាយ ជាមួយនឹង ភាពងាយស្រួលនៃការទូទាត់តាមអនឡាញ និងនៅក្នុងហាងនានាទូទាំងពិភពលោក គ្រប់ទីកន្លែងដែលមាននិមិត្តសញ្ញា Visa​។ រាល់ការធ្វើប្រតិបត្តិការតាមរយៈប័ណ្ណ វីសា ហត្ថា គឺមានសុវត្ថិភាពខ្ពស់ ដោយទទួលបានការជូនដំណឹងត្រឡប់តាមរយៈសារ SMS និងលេខកូដសម្ងាត់(OTP) ដើម្បីធ្វើការផ្ទៀងផ្ទាត់បន្ថែមទៅលើប្រតិបត្តិការសម្រាប់ការទូទាត់តាមអនឡាញផងដែរ។ លើសពីនេះ ធនាគារ ហត្ថា ក៏បានផ្តល់សិទ្ធិផ្តាច់មុខសម្រាប់ម្ចាស់ប័ណ្ណ វីសា Platinum រួមមានការចូលសម្រាកនៅក្នុងបន្ទប់រង់ចាំពិសេស របស់ អាកាសយានដ្ឋានជាង១៣០កន្លែងទូទាំងពិភពលោក និងការធានារ៉ាប់រងលើការធ្វើដំណើរក្រៅប្រទេសរហូតដល់ ១.០០០.០០០ ដុល្លារអាមេរិក។

ដើម្បីរីករាយជាមួយអត្ថប្រយោជន៍ទាំងអស់ដែលបានរៀបរាប់ខាងលើ អតិថិជនអាចដាក់ពាក្យស្នើសុំប័ណ្ណ ហត្ថា វីសា នៅសាខាណាមួយ ដែលជិតលោកអ្នកបំផុត ឬតាមរយៈទូរសព្ទទៅលេខ 1800 212 222 ឬ 023 999 266។អំពីធនាគារ ហត្ថា៖
ធនាគារ ហត្ថា ជាធនាគារពាណិជ្ជដែលមានវត្តមាននៅក្នុងប្រទេសកម្ពុជាអស់រយៈពេលជិត ៣០ ឆ្នាំមកហើយ និងបានផ្តល់ជូននូវ សេវាហិរញ្ញវត្ថុយ៉ាងទូលំទូលាយដល់អតិថិជនរបស់ខ្លួន។ គិតត្រឹមត្រីមាសទីពីរនៃឆ្នាំ ២០២៣នេះ ធនាគារ ហត្ថា គឺជាធនាគារពាណិជ្ជ ធំលំដាប់ទីបីក្នុងប្រទេសកម្ពុជា។ លើសពីនេះ ធនាគារ ហត្ថា បានរក្សាជំហររឹងមាំរបស់ខ្លួនដោយជោគជ័យ ជាមួយចំណាត់ថ្នាក់ទី ៤ ទាំងសមតុល្យឥណទាន និងសមតុល្យប្រាក់បញ្ញើសន្សំ ក្នុងចំណោមធនាគារធំទាំងដប់ក្នុងប្រទេសកម្ពុជា។ ធនាគារ ហត្ថា ធ្វើប្រតិបត្តិការ ក្នុងនាមជាក្រុមហ៊ុនបុត្រសម្ព័ន្ធរបស់ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ ទីប្រាំនៅក្នុង ព្រះរាជាណាចក្រថៃ និងមានប្រវត្តិអស់រយៈពេល 77 ឆ្នាំ។ ធនាគារ ក្រុងស្រ៊ី ជាសមាជិកមួយនៃ MUFG Financial Group របស់ប្រទេសជប៉ុន និងជាក្រុមហ៊ុនធំបំផុតមួយនៅទូទាំងពិភពលោក។

អំពីក្រុមហ៊ុន Visa Inc.
Visa Inc. (NYSE: V) គឺជាក្រុមហ៊ុននាំមុខគេក្នុងបច្ចេកវិទ្យាទូទាត់សាច់ប្រាក់តាមរយៈឌីជីថល ដែលជួយសម្រួលដល់ប្រតិបត្តិការ រវាងអ្នកប្រើប្រាស់ ពាណិជ្ជករ ស្ថាប័នហិរញ្ញវត្ថុ និងស្ថាប័នរដ្ឋាភិបាលដែលពាក់ព័ន្ធ ច្រើនជាង ២០០ ប្រទេស និង តំបន់ ជារៀងរាល់ឆ្នាំ។ បេសកកម្មរបស់យើងគឺផ្សាភ្ជាប់ពិភពលោកទាំងមូល តាមរយៈការតភ្ជាប់បណ្តាញទូទាត់ប្រាក់ប្រកបដោយភាពច្នៃប្រឌិតថ្មី ងាយស្រួល អាចទុកចិត្តបាន និងមានសុវត្ថិភាពបំផុត ដែលអនុញ្ញាតឲ្យអ្នកប្រើប្រាស់ អាជីវករ និង​សេដ្ឋកិច្ចមានការរីកចម្រើន។ យើងជឿជាក់ថាសេដ្ឋកិច្ចដែលរួមបញ្ចូលមនុស្សគ្រប់រូប នៅគ្រប់តំបន់ នឹងជួយដល់ការអភិវឌ្ឍនៅគ្រប់ទីកន្លែង ហើយយើងមើលឃើញថា នេះគឺជាមូលដ្ឋានគ្រឹះនៃចរន្តសាច់ប្រាក់។ ស្វែងយល់បន្ថែមតាមរយៈVisa.com។

ដោយ: គង់ លាងហួរ

សៀមរាប:  លោក លី រតនា ដែលជាអាជីវករលក់វត្ថុអនុស្សាវរីយ៍ បង្ហាញសុទិដ្ឋិនិយមថា អាកាសយានដ្ឋានអន្តរជាតិសៀមរាប អង្គរ (SAI) នឹងនាំភ្ញៀវទេសចរអន្តរជាតិ កាន់តែច្រើនមកកាន់ខេត្តសៀមរាប ដែលជាទឹកដីនៃឧទ្យានបុរាណអង្គរ ដែលធ្វើឲ្យអាជីវកម្មរបស់លោកនឹងរីកចម្រើនឡើងវិញ។

អាជីវកររូបនេះ ដែលបានលក់វត្ថុអនុស្សាវរីយ៍ជាច្រើនមុខ នៅផ្សារចាស់ ក្នុងក្រុងសៀមរាប អស់រយៈពេលជាងមួយទស្សវត្សរ៍មកនោះ បានអះអាងថា អាជីវកម្មរបស់គាត់បានរងការខូចខាតយ៉ាងធ្ងន់ធ្ងរ ក្នុងអំឡុងជំងឺរាតត្បាតកូវីដ-១៩ ហើយសូម្បីតែពេលនេះចំនួនភ្ញៀវទេសចរណ៍ អន្តរជាតិ មកកាន់ខេត្តសៀមរាប នៅមានកម្រិតទាបនៅឡើយ បើធៀបនឹងសម័យមុនជំងឺរាតត្បាត។

លោកបានបញ្ជាក់ប្រាប់សារពត៌មានXinhua កាលពីថ្ងៃព្រហ​ស្បតិ៍ថា “ការបើកព្រលានយន្តហោះថ្មីនេះ គឺជាការរំពឹងទុករបស់អ្នកស្រុកខេត្តសៀមរាប ដែលពឹងផ្អែកលើវិស័យទេសចរណ៍” ។

លោកជឿ​ជាក់​ថា ព្រលាន​យន្តហោះ​ថ្មី​នេះ ​មាន​សក្ដានុពល​ខ្លាំង​ក្នុង​ការ​ទាក់​ទាញ​ភ្ញៀវ​ទេសចរណ៍ ​កាន់​តែ​ច្រើនមកកាន់ប្រទេសកម្ពុជា។លោក​បាន​បន្ថែមថា​ “អាកាសយានដ្ឋាន​ថ្មី​នេះ ​ធំ​ជាង​អាកាសយានដ្ឋាន​ចាស់ឆ្ងាយណាស់។ ដូច្នេះ​វាប្រហែល​ជា​នឹង​មាន​ជើងហោះហើរ​ត្រង់​ជាច្រើន​ទៀត​ ដែល​នឹង​នាំ​ភ្ញៀវ​ទេសចរ​កាន់តែ​ច្រើន​មកកាន់ខេត្តសៀមរាប”។

ចំណែកអ្នកនាង លាត ម៉ានីន វ័យ២២ឆ្នាំ ជាបុគ្គលិកនៅហាងលក់វត្ថុអនុស្សាវរីយ៍ Lyly Art Painting ក្នុងទីរួមខេត្តសៀមរាប មានទំនុកចិត្តថា ព្រលានយន្តហោះថ្មីនេះ នឹងនាំមកនូវការអភិវឌ្ឍន៍យ៉ាងឆាប់រហ័ស ដល់ខេត្តសៀមរាប ជាពិសេសលើវិស័យទេសចរណ៍ ពាណិជ្ជកម្ម និងការវិនិយោគ។

អ្នកនាងបានប្រាប់ថា “ខ្ញុំសង្ឃឹមថា ព្រលានយន្តហោះថ្មីនេះនឹងទាក់ទាញភ្ញៀវទេសចរ កាន់តែច្រើនមកកាន់ខេត្តសៀមរាប។ ដូច្នេះទេសចរណ៍ និងអាជីវកម្មរបស់យើងនៅទីនេះ នឹងកើនឡើងសារជាថ្មីម្តងទៀត”។អ្នកនាងក៏បានអំពាវនាវ ឱ្យមានការវិលត្រឡប់មកវិញនៃភ្ញៀវទេសចរចិន ដោយអះអាងថា វត្តមានរបស់ភ្ញៀវទេសចរចិន បានរួមចំណែកដល់ការអភិវឌ្ឍន៍ទេសចរណ៍ និងការកាត់បន្ថយភាពក្រីក្រនៅក្នុងប្រទេសកម្ពុជា។

អ្នកនាងបន្ថែមថា​ “ប្រទេស​កម្ពុជា​មាន​សុវត្ថិភាព​ខ្លាំង ​សម្រាប់​ភ្ញៀវ​ទេសចរ ហើយ​នៅ​ខេត្តសៀមរាប ​មាន​សម្បត្តិ​វប្បធម៌​ជាច្រើន​ ជាពិសេស​គឺប្រាសាទអង្គរវត្ត​ ហើយខ្ញុំ​សូមអំពាវនាវ​ដល់​អ្នក​វិនិយោគ និង​ភ្ញៀវ​ទេសចរ​ចិន ​ឲ្យ​មក​ទស្សនា​ប្រទេស​កម្ពុជា”។

លោក Gong Shuai ជំនួយការអ្នកគ្រប់គ្រងទូទៅនៃក្រុមហ៊ុន Angkor International Airport Investment (Cambodia) បានមានប្រសាសន៍ឱ្យដឹងថា បច្ចុប្បន្ន អាកាសយានដ្ឋានអន្តរជាតិសៀម​រាបអង្គរ (SAI) មានបុគ្គលិកកម្ពុជាជិត៤០០នាក់។

លោកបានបន្តថា “អាកាសយានដ្ឋានអន្តរជាតិ ដ៏ធំមួយនេះ គ្រោងនឹងបើកផ្លូហោះហើរ អន្តរជាតិចម្ងាយឆ្ងាយបន្ថែមទៀត ក្នុងគោលបំណងទាក់ទាញភ្ញៀវទេសចរ កាន់តែច្រើនមកពីប្រទេសចិន និងជុំវិញពិភពលោក ដូច្នេះវានឹងជំរុញការងើបឡើងវិញ នៃឧស្សាហកម្មទេសចរណ៍ និងវិបុលភាពសេដ្ឋកិច្ចរបស់កម្ពុជា”។

ជាមួយគ្នានេះ លោក ម៉ៅ ហាវណ្ណាល់ រដ្ឋមន្ត្រីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិលកម្ពុជា បានមានប្រសាសន៍ឱ្យដឹងថា អាកាសយានដ្ឋានអន្តរជាតិសៀមរាប អង្គរ (SAI) នឹងអាចទទួលអ្នកដំណើរ តាមផ្លូវអាកាស៧លាននាក់ក្នុងមួយឆ្នាំចាប់ពីឆ្នាំ២០២៤ និងរហូតដល់១២លាននាក់ ក្នុងមួយឆ្នាំចាប់ពីឆ្នាំ២០៤០។

លោក​បាន​បន្ត​ថា​ “វា​នឹង​ផ្តល់​ការ​ជំរុញ​ដល់​កំណើន​សេដ្ឋកិច្ច​ ជំរុញ​វិស័យអាកាសចរណ៍ ទេសចរណ៍ និង​ការ​វិនិយោគ និង​រួម​ចំណែក​បន្ថែម​ទៀត ​ដល់​ការ​កាត់​បន្ថយ​ភាព​ក្រីក្រ​នៅកម្ពុជា”។

លោក​ម៉ៅ ហាវណ្ណាល់ បាន​បន្ថែម​ថា​ “យើង​មាន​ទំនុក​ចិត្ត​ថា​ ព្រលាន​យន្តហោះ​ថ្មី​នេះ ​នឹង​ក្លាយ​ជា​ស្ពាន​តភ្ជាប់​ប្រទេស​កម្ពុជា ​ទៅ​កាន់​ពិភពលោក​ទាំងមូលកាន់តែ​ទូលំទូលាយ”។

រីឯលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា បានមានប្រសាសន៍ឱ្យដឹងមានប្រសាសន៍ថា អាកាសយានដ្ឋានអន្តរជាតិសៀមរាបអង្គរ (SAI) គឺជាការអភិវឌ្ឍន៍ដ៏សំខាន់មួយនៅក្នុងឧស្សាហកម្មអាកាសចរណ៍របស់កម្ពុជា។

លោកបានប្រាប់សារពត៌មាន Xinhua ថា “អាកាសយានដ្ឋាននេះ នឹងជួយសម្រួលដល់ការចូល ទៅកាន់ឧទ្យានបុរាណវិទ្យាអង្គរ កែលម្អហេដ្ឋារចនាសម្ព័ន្ធ ព្រមទាំងសម្រួលពាណិជ្ជកម្ម និងការវិនិយោគនៅកម្ពុជាផងដែរ”។

លោកបណ្ឌិត គិន ភា បានបន្ថែមថា អាកាសយានដ្ឋាននេះក៏ជួយលើកកម្ពស់កម្រិតជីវភាព បង្កើតការងារ សម្រួលដល់ចលនាមនុស្ស និងទំនិញ ព្រមទាំងផ្តល់លទ្ធភាពទទួលបានការអប់រំ និងថែទាំសុខភាពសម្រាប់ប្រជាជនកម្ពុជា ដែលធ្វើឱ្យវាក្លាយជានិមិត្តរូបនៃវឌ្ឍនភាពរបស់ប្រទេសកម្ពុជា ក្នុងវិស័យអាកាសចរណ៍ និងទេស​ចរណ៍៕

ដោយៈ គង់ សូរិយា

        ព្រះសីហនុៈ មន្រ្តីជាន់ខ្ពស់រដ្ឋបាលខេត្ត បានធ្វើបទបង្ហាញស្តីអំពីសក្តានុពល និងកាលានុវត្តភាព នៃការវិនិយោគក្នុងខេត្តព្រះសីហនុ ជូនប្រតិភូជាតិ និងអន្តរជាតិ ក្នុងដំណើរទស្សនកិច្ចការងារ ដែលរៀបចំដោយសភាពាណិជ្ជកម្មអាមេរិកប្រចាំកម្ពុជា (Amcham) សរុបសមាសភាពប្រមាណ៤៣រូបកាលពីសប្តាហ៍មុន។

ការធ្វើបទបង្ហាញនេះ បានធ្វើឡើងដោយលោកឡុង ឌីម៉ង់អភិបាលរងខេត្តព្រះសីហនុ។ បទបង្ហាញនេះ ធ្វើឡើងក្នុងគោលបំណង ចូលរួមបង្កើនពិពិធកម្មវិនិយោគិន ចូលរួមជំរុញ និងលើកកម្ពស់ទំហំពាណិជ្ជកម្មទ្វេរភាគីរវាងកម្ពុជា និងអាមេរិក។

ក្នុងបទបង្ហាញជូន ដល់គណៈប្រតិភូធុរកិច្ចប្រធាន អគ្គនាយក និងតំណាងក្រុមហ៊ុន ប្រមាណ២០ក្រុមហ៊ុននេះ លោកអភិបាលរងបានលើកឡើង អំពីស្ថានភាពទូទៅនៃខេត្ត ហេដ្ឋារចនាសម្ព័ន្ធ និងឱកាសនៃការវិនិយោគ លើវិស័យអាទិភាពសំខាន់ៗ ដែលមានសក្តានុពល តែនៅមិនទាន់ទទួលបានការវិនិយោគ គ្រប់គ្រាន់ស័ក្តិសមនៅឡើយ។លើសពីនេះទៀត លោកអភិបាលរងខេត្ត ក៏បានពន្យល់អំពីស្ថានភាពបច្ចុប្បន្ន វិធានការនានាក្នុងការដោះស្រាយ គម្រោងវិនិយោគជាប់គាំង ដែលបានដាក់ចេញដោយរាជរដ្ឋាភិបាលកម្ពុជា និងបានស្នើឱ្យវិនិយោគិន ងាកមកចាប់អារម្មណ៍មកវិនិយោគបន្ត នូវអគារដែលមិនទាន់រួចរាល់ ជាស្ថាពរក្នុងខេត្តព្រះសីហនុផងដែរ។

លោកឡុង ឌីម៉ង់បានបន្ថែមថា តាមទិន្នន័យដែលទទួលបានពីកំពង់ផែស្វយ័តក្រុងព្រះសីហនុ សហរដ្ឋអាមេរិកគឺជាគោលដៅនាំចេញទំនិញធំជាងគេបំផុត ដែលមានបរិមាណប្រមាណ៣៤%នៃទំនិញនាំចេញសរុបរបស់កម្ពុជា។លោកបញ្ជាក់ថា “ខេត្តព្រះសីហនុ បានត្រៀមខ្លួនរួចជាស្រេច សម្រាប់ទទួលស្វាគ​មន៍ វិនិយោគិនបរទេសបន្ថែមទៀត ជាពិសេសគណៈប្រតិភូពាណិជ្ជករដែលមានវត្តមាននៅក្នុងនេះតែម្តង”។ តាមរយៈការសម្របសម្រួលពីរដ្ឋបាល ខេត្តព្រះសីហនុ ប្រតិភូ​Amcham បានធ្វើទស្សនកិច្ចទៅ កាន់ទីតាំងសំខាន់ៗរបស់ខេត្ត មានដូចជា កំពង់ផែស្វយ័តក្រុងព្រះសីហនុ តំបន់ភណ្ឌាគារគយ តំបន់អភិវឌ្ឍBay of lights, តំបន់សេដ្ឋកិច្ចពិសេសក្រុងព្រះសីហនុ និងរោងចក្រផលិតក្តារកម្រាលAHFផងដែរ៕

តែម សុខុម

សិង្ហបុរី: កំពូលមហាសេដ្ឋី Jack Ma សហស្ថាបនិកក្រុមហ៊ុនយក្ស Alibaba “មានសុទិដ្ឋិនិយមខ្លាំង” ចំពោះក្រុមហ៊ុន ហើយបានប្ដេជ្ញារក្សាទុកភាគហ៊ុនក្នុងក្រុមហ៊ុននេះ។

នេះបើយោងតាមសារព័ត៌មាន South China Morning Post បានចុះផ្សាយកាលពីថ្ងៃសុក្រ ទី១៧ ខែវិច្ឆិកា ដោយដកស្រង់សេចក្ដីថ្លែងការណ៍ពីការិយាល័យរបស់លោក។

ការអត្ថាធិប្បាយពីការិយាល័យរបស់លោក Jack Ma នេះកើតមានឡើងមួយថ្ងៃបន្ទាប់ពីឯកសារមួយរបស់និយ័តករបានបង្ហាញថា មូលនិធិគ្រួសាររបស់លោកគ្រោងលក់ចេញ១០លានភាគហ៊ុននៃក្រុមហ៊ុន Alibaba Group Holdings ដែលរក្សាទុកនៅធនាគារអាមេរិក ក្នុងតម្លៃប្រមាណ៨៧១លានដុល្លារ។ការិយាល័យរបស់លោក Jack Ma បាននិយាយថា “យើងជឿថា តម្លៃភាគហ៊ុនបច្ចុប្បន្នគឺស្ថិតក្រោមតម្លៃសមរម្យរបស់វា”។ ទោះជាយ៉ាងណា ពេលទីភ្នាក់ងារព័ត៌មាន Reuters ទាក់ទងទៅដើម្បីសុំការឆ្លើយបំភ្លឺ ក្រុមហ៊ុន Alibaba មិនបានឆ្លើយតបនោះទេ។

ការលក់ដូរភាគហ៊ុននេះនឹងធ្វើឡើងនៅថ្ងៃទី២១ ខែវិច្ឆិកា ដោយក្រុមហ៊ុន JSP Investment និងក្រុមហ៊ុន JC Properties ដែលជាផ្នែកមួយនៃមូលនិធិគ្រួសាររបស់លោក Jack Ma៕ Reuters ៕

តែម សុខុម
ហូជីមិញ: គម្រោងអភិវឌ្ឍន៍កាស៊ីណូ និងរីហ្សតខ្នាតយក្ស Ho Tram តម្លៃ៤,២៣ពាន់លានដុល្លារអាមេរិក នៅប្រទេសវៀតណាម ភាគខាងត្បូង ត្រូវបានពន្យារពេលបញ្ចប់ការសាងសង់ជាស្ថាពរដល់ឆ្នាំ២០២៧។

នេះមិនមែនជាការពន្យារពេលលើកទី១ នោះទេ ពោលគឺជាលើកទី១១ ហើយ។ នេះបើយោងតាមសារព័ត៌មាន VN Express ចុះផ្សាយកាលពីថ្ងៃសុក្រ ទី១៧ ខែវិច្ឆិកា។

ក្រុមហ៊ុនអភិវឌ្ឍន៍ Ho Tram Project Company Ltd ទទួលបានលិខិតអនុញ្ញាតក្នុងឆ្នាំ២០០៨ ដើម្បីអភិវឌ្ឍគម្រោងកាស៊ីណូ និងរីហ្សត Ho Tram ដែលមានកាស៊ីណូមួយ សណ្ឋាគារលំដាប់ផ្កាយ៥ មួយដែលមាន៩.០០០បន្ទប់គេង ទីលានវាយកូនហ្គោលដែលមាន១៨រន្ធ វីឡាមួយចំនួន និងតំបន់លក់ទំនិញមួយ។កាស៊ីណូ និងទីលានវាយកូនហ្គោលក្នុងគម្រោងនេះបានបើកដំណើរការហើយនៅពេលនេះ។ ប៉ុន្តែគម្រោងទាំងមូលមិនទាន់បានសាងសង់បញ្ចប់ជាស្ថាពរនៅឡើយទេ ពោលគឺនៅសល់ច្រើនទៀត។

យោងតាមក្រសួងផែនការ និងវិនិយោគនៃប្រទេសវៀតណាម ឱ្យដឹងថា គិតត្រឹមខែមិថុនា ឆ្នាំនេះ ក្រុមហ៊ុនអភិវឌ្ឍន៍ Ho Tram Project Company Ltd បានចំណាយអស់១,៣ពាន់លានដុល្លារ ឬស្មើនឹង៣០,៩%នៃថ្លៃចំណាយសរុបសម្រាប់គម្រោងកាស៊ីណូ និងរីហ្សតនេះ។

ក្រុមហ៊ុនបានពន្យារពេលបញ្ចប់គម្រោងនេះជាច្រើនលើកច្រើនសាដោយលើកហេតុផលថារងផលប៉ះពាល់ពីវិបត្តិកូវីដ-១៩ និងហេដ្ឋារចនាសម្ព័ន្ធដឹកជញ្ជូនមិនគ្រប់គ្រាន់រវាងក្រុងហូជីមិញ និងក្រុងបាហ្សៀ (Ba Ria) ខេត្តវង់តៅ (Vung Tau) ដែលកំពុងស្ថិតក្រោមការអភិវឌ្ឍនៅឡើយ៕ VN Express៕

ដោយ: គង់ លាងហួរ
ម៉ានីល: ប្រទេសជប៉ុន កូរ៉េខាងត្បូង និងឥណ្ឌា បានបង្ហាញឆន្ទៈ ក្នុងការផ្តល់ហិរញ្ញប្បទានដល់គម្រោងផ្លូវដែកហ្វីលីពីនចំនួន៣ ដែលមានតម្លៃជិត៥ពាន់លានដុល្លារអាមេរិក បន្ទាប់ពីទីក្រុងម៉ានីលបានប្រកាសឈប់ស្វែងរកមូលនិធិពីប្រទេសចិន។

លោក Jaime Bautista រដ្ឋមន្ត្រីដឹកជញ្ជូនហ្វីលីពីន បានមានប្រសាសន៍ឱ្យដឹងថា រដ្ឋាភិបាលហ្វីលីពីនអាចទាញយកសក្តានុពលពីប្រទេសទាំង៣សម្រាប់ជំនួយអភិវឌ្ឍន៍ផ្លូវការ (ODA) តាមដែលអាចធ្វើទៅបាន។លោកបានបន្តថា រដ្ឋាភិបាលក៏អាចផ្តល់មូលនិធិមួយផ្នែកដល់គម្រោងផ្លូវដែកទាំងនេះ ឬក៏ស្វែងរកការវិនិយោគ ពីវិស័យឯកជនផងដែរ។លោក Bautista បានបញ្ជាក់ប្រាប់វេទិកាប្រព័ន្ធផ្សព្វផ្សាយមួយថា “យើងកំពុងរុករកមូលនិធិទាំងនេះ ប៉ុន្តែយើងមិនអាចផ្តល់ព័ត៌មានលម្អិតណាមួយនៅឡើយទេ”។

គម្រោងផ្លូវដែកទី១របស់ហ្វីលីពីន មានប្រវែង៣៨០គីឡូម៉ែត្រ តភ្ជាប់ពីខេត្ត Laguna ភាគខាងត្បូងនៃទីក្រុងម៉ានីល ទៅកាន់ខេត្ត Bicol ដែលស្ថិតនៅចុងភាគខាងត្បូងនៃកោះ Luzon ។

គម្រោងផ្លូវដែកទី២ មានប្រវែង៧១គីឡូម៉ែត្រ ដែលគ្រោងស្ថាបនាឡើង ដើម្បីតភ្ជាប់តំបន់កំពង់ផែសេរី Subic Bay ទៅកាន់តំបន់កំពង់ផែសេរី Clark Freeport ។ ចំណែកឯ គម្រោងទី៣ គឺជាការសាងសង់កំណាត់ផ្លូវ ក្នុងដំណាក់កាលដំបូងនៃគម្រោងផ្លូវដែក Mindanao Railway។

កាលពីឆ្នាំមុន ប្រធានាធិបតីហ្វីលីពីន លោក Ferdinand Marcos Jr បានបញ្ជាដល់ក្រុមមន្ត្រីឱ្យចរចាឡើងវិញនូវកិច្ចព្រមព្រៀងប្រាក់កម្ចីជាមួយប្រទេសចិន បន្ទាប់ពីរដ្ឋាភិបាលចិនមិនបានធ្វើសកម្មភាពលើសំណើផ្តល់មូលនិធិនេះឡើយ។

ប៉ុន្តែ លោករដ្ឋមន្ត្រី Bautista បានអះអាងថា រដ្ឋាភិបាលបានស្វែងរកជម្រើសប្រភពហិរញ្ញប្បទាន មកពីប្រទេសផ្សេងទៀត ខណៈការចរចាលើប្រាក់កម្ចីជាមួយប្រទេសចិន មិនមានការរីកចម្រើននោះឡើយ ចាប់តាំងពីឆ្នាំ២០១៨ ក្នុងអាណត្តិរបស់អតីតលោកប្រធានាធិបតី Rodrigo Duterte៕

តែម សុខុម

បាងកកៈ ប្រទេសថៃ និងឥណ្ឌូនេស៊ី ដែលជាគូប្រជែងជើងខ្លាំងក្នុងតំបន់អាស៊ាន កំពុងប្រជែងគ្នាទាក់ទាញការវិនិយោគពីក្រុមហ៊ុនធំៗរបស់សហរដ្ឋអាមេរិក អំឡុងកិច្ចប្រជុំកំពូល APEC ដែលកំពុងតែប្រព្រឹត្តទៅនៅ San Francisco សហរដ្ឋអាមេរិក។

ជាលទ្ធផលរហូតមកទល់ពេលនេះ ប្រទេសទាំងពីរបានចុះកិច្ចព្រមព្រៀងធំៗដែលមានទំហំច្រើនពាន់លានដុល្លារ។ នេះបើយោងតាមសារព័ត៌មាន The Nation ចុះផ្សាយនៅថ្ងៃសុក្រ ទី១៧ ខែវិច្ឆិកា នេះ។

ប្រធានាធិបតីឥណ្ឌូនេស៊ី លោក Joko Widodo នៅមុននេះបានព្យាយាមទាក់ទាញការវិនិយោគពីក្រុមហ៊ុនផលិតរថយន្តអគ្គិសនីអាមេរិក Tesla អំឡុងជំនួបជាមួយកំពូលមហាសេដ្ឋី Elon Musk ដែលជានាយកប្រតិបត្តិក្រុមហ៊ុននេះអំឡុងខែឧសភា ឆ្នាំ២០២២។

ទន្ទឹមនេះ នាយករដ្ឋមន្ត្រីថៃ លោក Srettha Thavisin ក៏បានព្យាយាមទាក់ទាញការវិនិយោគពីក្រុមហ៊ុន Tesla ផងដែរ ហើយថែមទាំងបានបើកបរសាកល្បងរថយន្ត Tesla នៅវិមានរដ្ឋាភិបាលកាលពីខែមុនទៀតផង។

អំឡុងកិច្ចប្រជុំកំពូល APEC នៅសប្តាហ៍នេះ លោក Srettha Thavisin សម្រេចបានកិច្ចព្រមព្រៀងជាមួយក្រុមហ៊ុនធំៗរួមមានក្រុមហ៊ុន Google ក្រុមហ៊ុន Microsoft និងក្រុមហ៊ុន Amazon ដែលបូកបញ្ចូលគ្នាមានទំហំទុនវិនិយោគប្រមាណ៣០០ពាន់លានបាត (៨,៥១ពាន់លានដុល្លារអាមេរិក)។

ការវិនិយោគទាំងនេះមានគោលដៅបង្កើនហេដ្ឋារចនាសម្ព័ន្ធឌីជីថលរបស់ប្រទេសថៃ ដោយផ្ដោតលើគោលនយោបាយនវានុវត្តន៍ថ្មី និងគោលនយោបាយសេវាកម្ម Cloud។

ក្រុមហ៊ុន Google កំពុងសម្លឹងជ្រើសយកប្រទេសថៃ ធ្វើជាទីតាំងមជ្ឈមណ្ឌលរក្សាទុកទិន្នន័យទី៤ របស់ខ្លួនប្រចាំអាស៊ី។ ការសហការគ្នានេះត្រូវបានចាត់ទុកថាមានសារៈសំខាន់ខ្លាំងសម្រាប់ប្រទេសថៃ ដែលមានបំណងបោះជំហានឆ្ពោះទៅរកសេដ្ឋកិច្ចឌីជីថល និងបញ្ញាសិប្បនិម្មិត AI។

ទន្ទឹមនេះ ក្រុមហ៊ុន Microsoft គ្រោងបោះទុនវិនិយោគ១០០ពាន់លានបាត (២,៨៤ពាន់លានដុល្លារអាមេរិក) នៅក្នុងប្រទេសថៃ ក្នុងដំណាក់កាលដំបូងនៃការផ្ដោតលើការសាងសង់មជ្ឈមណ្ឌលរក្សាទុកទិន្នន័យ និងថាមពលស្អាត។

ប្រទេសថៃ បានប្រកួតប្រជែងឈ្នះប្រទេសម៉ាឡេស៊ី និងវៀតណាម នៅក្នុងការទាក់ទាញបានការវិនិយោគរបស់ក្រុមហ៊ុន Microsoft។

ចំណែកឯប្រទេសឥណ្ឌូនេស៊ី ទទួលបានជោគជ័យនៅក្នុងការសម្រេចបានកិច្ចព្រមព្រៀងជាមួយក្រុមហ៊ុនប្រេងខ្នាតយក្សរបស់អាមេរិក ExxonMobil ដោយទាក់ទាញបានការវិនិយោគក្នុងទំហំ១៥ពាន់លានដុល្លារអាមេរិក លើគីមីឥន្ធនៈ បន្ទាប់ពីប្រធានាធិបតី Joko Widodo បានជួបជាមួយប្រធានក្រុមហ៊ុននេះ គឺលោក Darren Woods។

ក្រុមហ៊ុន ExxonMobil គ្រោងបោះទុនវិនិយោគលើគម្រោងគីមីឥន្ធនៈ និងការសាងសង់រោងចក្រផ្ទុកគីមីឥន្ធនៈក្នុងប្រទេសឥណ្ឌូនេស៊ី។ រោងចក្រផ្ទុកគីមីឥន្ធនៈនេះត្រូវបានរំពឹងថាមឹងមានទំហំធំបំផុតប្រចាំអាស៊ីអាគ្នេយ៍។

ប្រទេសឥណ្ឌូនេស៊ី ដែលជាសេដ្ឋកិច្ចធំបំផុតទី១ និងប្រទេសថៃ ដែលជាសេដ្ឋកិច្ចធំបំផុតទី២ ប្រចាំតំបន់អាស៊ាន កំពុងធ្វើការប្រកួតប្រជែងគ្នាទាក់ទាញការវិនិយោគពីក្រុមហ៊ុនឈានមុខគេលំដាប់ពិភពលោក ជាពិសេសក្រុមហ៊ុនដែលរកស៊ីខាងឧស្សាហកម្មបច្ចេកវិទ្យាជាន់ខ្ពស់ តាមរយៈការបង្អួតបង្ហាញពីឱកាសវិនិយោគដល់ទាក់ទាញនៅក្នុងតំបន់៕ The Nation៕

ដោយ: គង់ លាងហួរ

អន្តរជាតិ: ប្រទេសសិង្ហបុរីបានចេញលិខិត អនុញ្ញាតឱ្យក្រុមហ៊ុន ក្នុងស្រុកនាំចូល អគ្គិសនីចំនួន១,២ជីហ្គាវ៉ាត់ ពីប្រទេសវៀតណាម ដែលនេះជាផ្នែកមួយ នៃផែនការរបស់សិង្ហបុរី ក្នុងការនាំចូលអគ្គិសនីឱ្យបាន៤ជីហ្គាវ៉ាត់នៅត្រឹមឆ្នាំ២០៣៥។ នេះបើយោងតាមសារពត៌មានវៀតណាម VNExpress ចុះផ្សាយកាលពីពេលថ្មីៗកន្លងទៅនេះ។

អាជ្ញាធរទីផ្សារថាមពលសិង្ហបុរី បានរាយការណ៍ថា ក្រុមហ៊ុនក្នុងស្រុក Sembcorp Utilities Pte Ltd របស់សិង្ហបុរី នឹងធ្វើការនាំចូលថាមពលអគ្គិសនី ដែលផលិតចេញពីរោងចក្រថាមពលខ្យល់នៅឆ្នេរសមុទ្រ និងប្រភពថាមពលស្អាតផ្សេងទៀត របស់ក្រុមហ៊ុនវៀតណាម Petrovietnam Technical Services Corporation។យោងតាមប្រភពខាងលើនេះបានឱ្យដឹងទៀតថា ថាមពលអគ្គិសនីទាំងនេះ នឹងត្រូវបញ្ជូនពីប្រទេសវៀតណាម ទៅកាន់សិង្ហបុរី តាមរយ:ខ្សែកាបក្រោមសមុទ្រថ្មីមួយ ដែលមានប្រវែងប្រហែល១.០០០គីឡូម៉ែត្រ។ជាមួយគ្នានេះ កាសែតសិង្ហបុរី The Straits Times បានរាយការណ៍ថា ការនាំចូលអគ្គិសនីពីប្រទេសវៀតណាម អាចបង្កើតបាន១០% នៃតម្រូវការសរុបរបស់សិង្ហបុរី។ តួយ៉ាង ប្រទេសវៀតណាម និងសិង្ហបុរីបានចុះហត្ថលេខាលើអនុស្សរណៈយោគយល់គ្នា សម្រាប់កិច្ចសហប្រតិបត្តិការថាមពលកាលពីខែតុលាឆ្នាំ២០២២កន្លងទៅ។

នៅឆ្នាំ២០២១ រដ្ឋមន្ត្រីក្រសួងពាណិជ្ជកម្ម និងឧស្សាហកម្មរបស់ប្រទេសសិង្ហបុរី លោក Gan Kim Yong ក៏ធ្លាប់បានប្រកាសផងដែរអំពីផែនការនាំចូលអគ្គិសនី ដែលមានកាបូនទាបរហូតដល់៤ជីហ្គាវ៉ាត់នៅឆ្នាំ២០៣៥។

ផែនការរបស់ប្រទេសសិង្ហបុរី ក្នុងការនាំចូលអគ្គិសនីឱ្យបាន៤ ជីហ្គាវ៉ាត់ នៅត្រឹមឆ្នាំ២០៣៥ ក្នុងនោះ រួមមានការនាំចូលអគ្គិសនី២ជីហ្គាវ៉ាត់ ពីប្រទេសឥណ្ឌូនេស៊ី និង១ជីហ្គាវ៉ាត់ ពីប្រទេសកម្ពុជារបស់យើងផងដែរ៕