ដោយ: គង់ លាងហួរ

អន្តរជាតិ: ប្រទេសសិង្ហបុរីបានចេញលិខិត អនុញ្ញាតឱ្យក្រុមហ៊ុន ក្នុងស្រុកនាំចូល អគ្គិសនីចំនួន១,២ជីហ្គាវ៉ាត់ ពីប្រទេសវៀតណាម ដែលនេះជាផ្នែកមួយ នៃផែនការរបស់សិង្ហបុរី ក្នុងការនាំចូលអគ្គិសនីឱ្យបាន៤ជីហ្គាវ៉ាត់នៅត្រឹមឆ្នាំ២០៣៥។ នេះបើយោងតាមសារពត៌មានវៀតណាម VNExpress ចុះផ្សាយកាលពីពេលថ្មីៗកន្លងទៅនេះ។

អាជ្ញាធរទីផ្សារថាមពលសិង្ហបុរី បានរាយការណ៍ថា ក្រុមហ៊ុនក្នុងស្រុក Sembcorp Utilities Pte Ltd របស់សិង្ហបុរី នឹងធ្វើការនាំចូលថាមពលអគ្គិសនី ដែលផលិតចេញពីរោងចក្រថាមពលខ្យល់នៅឆ្នេរសមុទ្រ និងប្រភពថាមពលស្អាតផ្សេងទៀត របស់ក្រុមហ៊ុនវៀតណាម Petrovietnam Technical Services Corporation។យោងតាមប្រភពខាងលើនេះបានឱ្យដឹងទៀតថា ថាមពលអគ្គិសនីទាំងនេះ នឹងត្រូវបញ្ជូនពីប្រទេសវៀតណាម ទៅកាន់សិង្ហបុរី តាមរយ:ខ្សែកាបក្រោមសមុទ្រថ្មីមួយ ដែលមានប្រវែងប្រហែល១.០០០គីឡូម៉ែត្រ។ជាមួយគ្នានេះ កាសែតសិង្ហបុរី The Straits Times បានរាយការណ៍ថា ការនាំចូលអគ្គិសនីពីប្រទេសវៀតណាម អាចបង្កើតបាន១០% នៃតម្រូវការសរុបរបស់សិង្ហបុរី។ តួយ៉ាង ប្រទេសវៀតណាម និងសិង្ហបុរីបានចុះហត្ថលេខាលើអនុស្សរណៈយោគយល់គ្នា សម្រាប់កិច្ចសហប្រតិបត្តិការថាមពលកាលពីខែតុលាឆ្នាំ២០២២កន្លងទៅ។

នៅឆ្នាំ២០២១ រដ្ឋមន្ត្រីក្រសួងពាណិជ្ជកម្ម និងឧស្សាហកម្មរបស់ប្រទេសសិង្ហបុរី លោក Gan Kim Yong ក៏ធ្លាប់បានប្រកាសផងដែរអំពីផែនការនាំចូលអគ្គិសនី ដែលមានកាបូនទាបរហូតដល់៤ជីហ្គាវ៉ាត់នៅឆ្នាំ២០៣៥។

ផែនការរបស់ប្រទេសសិង្ហបុរី ក្នុងការនាំចូលអគ្គិសនីឱ្យបាន៤ ជីហ្គាវ៉ាត់ នៅត្រឹមឆ្នាំ២០៣៥ ក្នុងនោះ រួមមានការនាំចូលអគ្គិសនី២ជីហ្គាវ៉ាត់ ពីប្រទេសឥណ្ឌូនេស៊ី និង១ជីហ្គាវ៉ាត់ ពីប្រទេសកម្ពុជារបស់យើងផងដែរ៕

ដោយ: គង់ លាងហួរ

ភ្នំពេញ: សភាពាណិជ្ជកម្មកម្ពុជា បានចូលរួមពិធីបើកជាផ្លូវការពិព័រណ៍ពាណិជ្ជកម្មកម្ពុជា ដែលប្រព្រឹត្តទៅនៅទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក។

ពិធីនេះត្រូវបានរៀបចំឡើង ក្រោមអធិបតីភាព លោកបួន សារៈមុនី រដ្ឋលេខាធិការក្រសួងពាណិជ្ជកម្មកម្ពុជា និងមានការអញ្ជើញចូលរួមពីតំណាងក្រសួងស្ថាប័នពាក់ព័ន្ធ តំណាងអភិបាលក្រុងឡុងប៊ិច តំណាងអភិបាលក្រុងឡូសអាន់ជែលឡេស (Los Angeles) មន្ត្រីក្រសួងពាណិជ្ជកម្មអាមេរិក សភាពាណិជ្ជកម្មក្រុងឡុងប៊ិច សភាពាណិ​​ជ្ជកម្មក្រុងឡូសអាន់ជែលឡេស ព្រមទាំងធុរជនអាមេរិក និងកម្ពុជាសរុបជាង៥០០នាក់។ ថ្លែងក្នុងឱកាសនៃពិធីបើកជាផ្លូវការ ពិព័រណ៍ពាណិជ្ជកម្មនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា(CCC) បានគូសបញ្ជាក់ថា ពិព័រណ៍ពាណិជ្ជកម្មកម្ពុជា នៅទីក្រុងឡុងប៊ិច គឺជាព្រឹត្តិការណ៍ដំបូងបង្អស់ ដែលនឹងជួយផ្សព្វផ្សាយអំពីផលិតផល វប្បធម៌ និងសក្តានុពលកម្ពុជា ទៅកាន់ទីផ្សារសហរដ្ឋអាមេរិក ដែលជាទីផ្សារដ៏ធំមួយសម្រាប់កម្ពុជា។អ្នកឧកញ៉ាបានបន្តថា “ព្រឹត្តិការណ៍នេះ ផ្តល់ឱកាសដល់ធុរជនអាមេរិក បានស្វែងយល់ និងទទួលយកនូវបទពិសោធន៍ នៃគុណភាពផលិតផល សេវាកម្ម នវានុវត្តន៍ និងបដិសណ្ឋារកិច្ចរបស់សហគ្រិនកម្ពុជា”។អ្នកឧកញ៉ា លឹម ហេង បានមានប្រសាសន៍ឱ្យដឹងថា សភាពាណិជ្ជកម្មកម្ពុជា បានបង្កើតការិយាល័យសភាពាណិជ្ជកម្ម តំណាងនៅរដ្ឋកាលីហ្វរញ៉ា សហរដ្ឋអាមេរិក និងការិយាល័យតំណាងមួយទៀតនៅទីក្រុងម៉ុងរ៉េអាល់ ប្រទេសកាណាដា កាលពីពេលថ្មីៗនេះ។

អ្នកឧកញ៉ាបន្តថា “នៅសហរដ្ឋអាមេរិក យើងបានបង្កើតការិ​យាល័យតំណាងផង និងជំនួបពាណិជ្ជកម្មជាមួយកំពង់ផែឡុងប៊ិច ដែលកំពង់ផែនេះ ចង់បានការដឹកទំនិញ ដោយផ្ទាល់ពីកម្ពុជាមកកាន់ទីក្រុងឡុងប៊ិច ដែលជាទីក្រុងកំពង់ផែធំបំផុតទី២នៅអាមេរិក”។ អ្នកឧកញ៉ាបញ្ជាក់ថា នាពេលកន្លងមក ការដឹកជញ្ជូនទំនិញរបស់យើងភាគច្រើន ត្រូវឆ្លងកាត់តាមប្រទេសចិតខាង ដូច្នេះពុំមានឈ្មោះកម្ពុជានោះទេ ប៉ុន្តែយើងជឿជាក់ថា នៅពេលដែលកំពង់ផែទឹកជ្រៅរបស់យើងបើកដំណើរការរួចរាល់ នោះយើងនឹងអាចដឹកជញ្ជូនទំនិញជាច្រើនទៅកាន់ទីក្រុងឡុងប៊ិច សហរដ្ឋអាមេរិកដោយផ្ទាល់ ដោយមិនចាំបាច់ ឆ្លងកាត់ប្រទេសផ្សេងៗតទៅទៀតឡើយ”។

លើសពីនេះ អ្នកឧកញ៉ា ក៏បានជំរុញឲ្យធុរជនអាមេរិក ភ្ជាប់ទំនាក់ទំនង ជាមួយធុរជនកម្ពុជា ដែលជាអ្នកផលិត និងអ្នកតាំងពិព័រ​ណ៍ ហើយសង្ឃឹមថា ធុរជនទាំងពីរប្រទេសនឹងអាចស្វែងរកដៃគូសហការធ្វើធុរកិច្ចរួមគ្នា។

ជាមួយគ្នានេះ អ្នកឧកញ៉ាអះអាងថា យើងទទួលបានភាពជោគជ័យដ៏គាប់ប្រសើរ ក្នុងការរៀបចំការតាំងពិព័រណ៍លើកទី១របស់សភាពាណិជ្ជកម្មកម្ពុជា ដែលសហការជាមួយអគ្គកុងស៊ុល។ ក្នុងពិព័រណ៍នេះ មានការដាក់តាំងនូវផលិតផលរបស់ខ្មែរ ហើយខាងសហរដ្ឋអាមេរិក ក៏បានដាក់តាំងផលិតផល របស់ពួកគេផងដែរ ដែលមានជិត១០០ស្តង់។អ្នកឧកញ៉ាបានឱ្យដឹងទៀតថា ដូច្នេះការតាំងពិព័រណ៍នេះសម្រេ​ចបានផ្លែផ្កាដោយជោគជ័យ ហើយក្រុមពាណិជ្ជករអាមេរិក ដែលបានទទួលទិញផលិតផលផ្សេងៗ ពីបណ្តាប្រទេសជិតខាងរបស់កម្ពុជា ដូចជាប្រទេសថៃ និងវៀតណាម បានសង្កេតឃើញថា វត្ថុធាតុដើមមួយចំនួនគឺជារបស់កម្ពុជា ដូច្នេះពាណិជ្ជករអាមេរិកចង់បានការតភ្ជាប់ការដឹកជញ្ជូន ទំនិញដោយផ្ទាល់ពីកម្ពុជា ដោយពុំចាំបាច់ឆ្លងកាត់អ្នកកណ្តាល ឬប្រទេសផ្សេងៗ។

អ្នកឧកញ៉ាបានបន្ថែមថា “ក្រុមពាណិជ្ជករ ដែលបានអញ្ជើញមកជួបយើង ក្នុងជំនួបពាណិជ្ជកម្មមួយកាលពីល្ងាចថ្ងៃទី៨ ខែវិច្ឆិកា គឺពួកគេបានទាក់ទង ជាមួយយើងដោយផ្ទាល់ ដើម្បីប្រមូលទិញទំនិញពីកម្ពុជា ទៅកាន់សហរដ្ឋអាមេរិកដោយផ្ទាល់ ដែលនេះជាភាពជោគ​ជ័យនៃការតាំងពិព័រណ៍ខាងលើ ហើយផលិតផលខ្មែរជាច្រើនបានទទួលការចាប់អារម្មណ៍ ពីអ្នកចូលរួមទស្សនា ក៏ដូចជាពាណិជ្ជករជាដៃគូ ដើម្បីបន្តទាក់ទងគ្នា ក្នុងគោលបំណងតភ្ជាប់ការនាំចេញ និងនាំចូលរវាងសហរដ្ឋអាមេរិក និងកម្ពុជា”៕

        ដោយៈ គង់ ហ្វីអូណា

        ភ្នំពេញៈ  ថ្នាក់ដឹកនាំ​ខេត្ត​ព្រះសីហនុ និង​ថ្នាក់ដឹកនាំ​ខេត្ត​ជាំ​ង​ស៊ូ របស់​ប្រទេស​ចិន បានបង្ហាញ​ឆន្ទៈ​រៀងៗ​ខ្លួន​ នឹង​បន្ត​ពង្រីក​កិច្ចសហប្រតិបត្តិការ​លើ​វិស័យ​អាទិភាព ​រវាង​ខេត្ត​ទាំង​២​ឱ្យ​ឈា​នៅ​សម្រេចបាន​លទ្ធផល​ជា​ផ្លែផ្កា និង​បន្ត​ខ្លាំង​ក្លាត​ទៅមុខទៀត ​រួមមាន​លើ​វិស័យ​ឧស្សាហកម្ម ពាណិជ្ជកម្ម និង​ការវិនិយោគ។

ការបង្ហាញ​ជំហរ​នេះ ​ធ្វើឡើង​នាឱកាស​ដែល​អភិបាលខេត្ត​ព្រះសីហនុ​លោក គួច ចំរើន បាន​ដឹកនាំ​គណៈប្រតិភូ​ទៅ​បំពេញ​ទស្សនកិច្ច​នៅ​ខេត្ត​ជាំ​ង​ស៊ូ ​នៃ​សាធារណរដ្ឋ​ប្រជាមានិត​ចិន​ និង​បាន​សម្តែង​ការគួរសម ពិភាក្សា​ការងារ​ជាមួយ​អភិបាលខេត្ត​ ​លោក ស៊ី ឃុន​លីន កាលពី​ថ្ងៃទី​១៤ ខែវិច្ឆិកា ឆ្នាំ​២០២៣​។​យោងតាម​រដ្ឋបាលខេត្ត​ព្រះសីហនុ​ ក្នុងឱកាស​នោះ លោកស៊ី ឃុនលី បាន​ណែនាំ​អំពី​ការអភិវឌ្ឍ​សេដ្ឋកិច្ច និង​សង្គម នៃ​ខេត្ត​ជាំ​ង​ស៊ូ និង​បាន​បញ្ជាក់ថា សាធារណរដ្ឋ​ប្រជាមានិត​ចិន និង​ព្រះរាជាណាចក្រ​កម្ពុជា មាន​ទំនាក់ទំនង​មិត្ត​ភាពជា​ប្រពៃណី​ យ៉ាង​ជ្រាលជ្រៅ ហើយ​ការឯកភាព​ដ៏​សំខាន់​ ដែល​សម្រេចបាន​ដោយ​មេដឹកនាំ​នៃ​ប្រទេស​ទាំង​២ ​បានចង្អុលបង្ហាញ​ទិសដៅ ​សម្រាប់​កិច្ចសហប្រតិបត្តិការ​ក្នុង​តំបន់​ឱ្យ​កាន់តែ​ស៊ីជម្រៅ​។​ពាក់ព័ន្ធ​សក្តានុពល​ខេត្ត ​ព្រះសីហនុ​វិញ​លោក​ថ្លែងថា​ ខេត្ត​ព្រះសីហនុ​ ជា​ច្រក​ដ៏​សំខាន់​សម្រាប់​កម្ពុជា ក្នុងការ​បើកចំហ​ទៅកាន់​ពិភព​ខាងក្រៅ ហើយ​ខេត្ត​ព្រះសីហនុ ​គឺជា​ខេត្ត​មិត្តភាព​របស់​ខេត្ត​ជាំ​ង​ស៊ូ និង​ជា​ដៃគូ​ដ៏​សំខាន់​សម្រាប់​ខេត្ត​ជាំ​ង​ស៊ូ  ក្នុងការ​ចូលរួម​ក្នុង​ការកសាង​រួមគ្នា​នៃ “​ខ្សែក្រវាត់ និង​ផ្លូវ​” ហើយ​កិច្ចសហប្រតិបត្តិការ​រ​វាង​ខេត្ត​ទាំង​២​ សម្រេចបាន​លទ្ធផល​ជា​ផ្លែផ្កា និង​បន្ត​ខ្លាំងក្លា​ត​ទៅមុខទៀត​​។

លោក​បាន​បញ្ជាក់ថា ខេត្ត​ជាំ​ង​ស៊ូ មាន​ឆន្ទៈ​ក្នុងការ​បន្តធ្វើ​ការរួម​គ្នា ដើម្បី​អនុវត្ត​ជាក់ស្តែង​នូវ​ការផ្លាស់ប្តូរ និង​កិច្ចសហប្រតិបត្តិការ​លើ​គ្រប់​វិស័យ​អាទិភាព ពិសេស​បន្ត​ពង្រីក​ការផ្លាស់ប្តូរ​សេដ្ឋកិច្ច និង​ពាណិជ្ជកម្ម ពង្រឹង និង​ពង្រីក​ការផ្លាស់ប្តូរ​វប្បធម៌ រួមគ្នា​លើកកម្ពស់​ការអភិវឌ្ឍ​ ប្រកបដោយ​គុណភាព​ខ្ពស់ ដើម្បី​ផលប្រយោជន៍​ទៅវិញទៅមក​។ជាការ​ឆ្លើយតប លោក គួច ចំរើន បាន​ថ្លែងអំណរគុណ​ដល់​ខេត្ត​ជាំ​ង​ស៊ូ សម្រាប់​ការគាំទ្រ​ដល់​ការអភិវឌ្ឍ នៅ​ខេត្ត​ព្រះសីហនុ​កន្លងមក ជាពិសេស​គាំទ្រ​ដល់​តំបន់​សេដ្ឋកិច្ច ​ពិសេស​ក្រុងព្រះសីហនុ ខណៈ​លោក​ថា ខេត្ត​ព្រះសីហនុ គឺជា​ចំណុច​សំខាន់​នៃ “គំរោងគំនិត​ផ្តួចផ្តើម​ខ្សែក្រវាត់ និង​ផ្លូវ​” ​ហើយ​ការសាងសង់​តំបន់​សេដ្ឋកិច្ច​ពិសេ​ស​ក្រុងព្រះសីហនុ បានទទួល​ការយកចិត្តទុកដាក់​យ៉ាងខ្លាំង​ពី​ថ្នាក់ដឹកនាំ​នៃ​ប្រទេស​ទាំង​២​។

លោក​​បង្ហាញ​ក្តី​សង្ឃឹមថា​ “ខេត្ត​ទាំង​២​ នឹង​សហការគ្នា​យ៉ាង​ជិតស្និទ្ធ​លើ​វិស័យសេដ្ឋកិច្ច ពាណិជ្ជកម្ម និង​មនុស្សធម៌ ហើយ​សហគ្រាស​ខេត្ត​ជាំ​ង​ស៊ូ កាន់តែច្រើន​នឹង​មក​បណ្តាក់ទុន​ នៅ​ខេត្ត​ព្រះសីហនុ ដើម្បី​សម្រេចបាន​នូវ​វិបុលភាព​រួម និង​ផ្តល់​ប្រយោជន៍​ដល់​ប្រជាជន​នៃ​ខេត្ត​ទាំង​២។អ្នកជំនាញ​សេដ្ឋកិច្ច ​នៃ​វិទ្យាស្ថាន​ទំនាក់ទំនង​អន្តរជាតិ​នៃ​រាជ​បណ្ឌិត្យសភាកម្ពុជា លោក ហុង វណ្ណៈ បានបង្ហាញ​ការគាំទ្រ​ចំពោះ​ខេត្ត​ទាំង​២ ដែលមាន​ឆន្ទៈ​ដើម្បី​ជំរុញ និង​លើកកម្ពស់​កិច្ចសហប្រតិបត្តិការ​លើ​វិស័យ​អាទិភាព​រួមគ្នា ដែល​នឹង​ផ្តល់​ផលប្រយោជន៍​ឱ្យ​គ្នា​ទៅវិញទៅមក​។​

លោក​បន្តថា​ “ប្រសិនបើ​វិនិយោគិន​ចិន មក​សិក្សា​ស្វែងយល់​ពី​សក្ដានុពល​ពី​ខេត្ត​ព្រះសីហនុ​បន្ថែម ហើយ​ចង់​ធ្វើការ​វិនិយោគ​នៅ​កម្ពុជា​ពិតមែន នោះ​ជាស​ញ្ញា​ល្អ​ និង​បង្ហាញ​ពី​ការរួមចំណែក​ធានា​ ដល់​និរន្តរភាព​សេដ្ឋកិច្ច​រយៈពេល​វែងរ​បស់​កម្ពុជា​”​៕

ដោយៈ តែម សុខុម

អន្តរជាតិៈ ធនាគារធំៗមួយចំនួនក្នុងពិភពលោករំពឹងថា សេដ្ឋកិច្ចពិភពលោក នឹងបាត់បង់សន្ទុះកំណើនបន្ថែមទៀត ក្នុងឆ្នាំ២០២៤ ប៉ុន្តែទំនងជាជៀសផុតពីវិបត្តិ។

ការបាត់បង់សន្ទុះកំណើនសេដ្ឋកិច្ចនេះ គឺដោយសារកត្តាសំខាន់ៗមួយចំនួន ដូចជា ការដំឡើងអត្រាការប្រាក់ ការឡើងថ្លៃថាមពល និងការបាត់បង់ សន្ទុះកំណើនសេដ្ឋកិច្ច ក្នុងសហរដ្ឋអាមេរិក និងមហាយក្សចិន។ នេះបើយោងតាមទីភ្នាក់ងារព័ត៌មាន Reuters ចុះផ្សាយការពីថ្ងៃព្រហស្បតិ៍ ទី១៦ ខែវិច្ឆិកា។

ការស្ទង់មតិដោយទីភ្នាក់ងារព័ត៌មាន Reuters បានបង្ហាញថា សេដ្ឋកិច្ចពិភពលោកត្រូវបានព្យាករថា នឹងសម្រេចបានកំណើន២,៩%ក្នុងឆ្នាំនេះ ហើយកំណើននេះ នឹងបាត់បង់សន្ទុះបន្ថែមទៀតក្នុងឆ្នាំ២០២៤ មកនៅត្រឹម២,៦%។

អ្នកជំនាញសេដ្ឋកិច្ចភាគច្រើនរំពឹងថា សេដ្ឋកិច្ចពិភពលោកនឹងជៀសផុតពីវិបត្តិ ប៉ុន្តែបានព្រមានពីលទ្ធភាពដែលអាចផ្ទុះ “វិបត្តិកម្រិ​តស្រាល” នៅអឺរ៉ុប និងចក្រភពអង់គ្លេស។

កំណើនសេដ្ឋកិច្ចក្នុងសហរដ្ឋអាមេរិក នៅពេលនេះគ្រាន់តែបង្អង់ល្បឿនបន្តិចប៉ុណ្ណោះ ទោះបីជាភាពមិនប្រាកដប្រជាជុំវិញការរឹតបន្តឹងរូបិយវត្ថុ របស់ធនាគារកណ្ដាលអាមេរី (Federal Reserve) ធ្វើឱ្យប៉ះពាល់ដល់ទស្សនវិស័យសេដ្ឋកិច្ចយ៉ាងណាក្ដី។

កំណើនសេដ្ឋកិច្ចក្នុងប្រទេសចិន ក៏កំពុងដាំក្បាលចុះផងដែរ ហើយការដាំក្បាលចុះនេះកាន់តែលឿន ដោយសារក្រុមហ៊ុនកាន់តែច្រើន ស្វះស្វែងរកគោលដៅផលិតកម្មផ្សេងៗក្រៅពីប្រទេសចិន៕ Reuters៕

ដោយៈ គង់ សូរិយា

        ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានអនុញ្ញាតឱ្យលោកវ៉ាង អ៊ីប៉ (Wang Yubo) អភិបាលខេត្តយូណាន នៃសាធារណរដ្ឋប្រជាមានិតចិន ចូលជួបសម្តែងការគួរសម និងពិភាក្សាការងារ ក្នុងឱកាសនៃការអញ្ជើញចូលរួមក្នុង ”ពិធីសម្ពោធដាក់ឱ្យប្រើប្រាស់ជាផ្លូវការ អាកាសយានដ្ឋានអន្តរជាតិសៀម​រាប-អង្គរ” ។

ក្នុងជំនួបនេះ លោកវ៉ាង អ៊ីប៉ បានថ្លែងអំណរគុណ សម្តេចធិបតី ដែលបានចំណាយពេលវេលា ដ៏មមាញឹកអនុញ្ញាតឱ្យរូបលោក និងសហការី ចូលជួបសម្តែងការគួរសម និងពិភាក្សាការងារ នាឱកាសនៃការសម្ពោធដាក់ឱ្យប្រើប្រាស់ជាផ្លូវការ អាកាសយានដ្ឋានអន្តរជាតិសៀមរាប-អង្គរ ដ៏អធិកអធមនេះ ។

លោកអភិបាលខេត្ត បានធ្វើការបញ្ជាក់ផងដែរថា ខេត្តយូណានបានយកចិត្តទុកដាក់ខ្ពស់ ក្នុងការអភិវឌ្ឍអាកាសយានដ្ឋាននេះ ទ្បើង ក្នុងក្របខ័ណ្ឌនៃការវិនិយោគ គម្រោងអាកាសយានដ្ឋានអន្តរជាតិលើកដំបូងបំផុត ក្រោម“គំនិតផ្តួចផ្តើមខ្សែក្រវាត់ និងផ្លូវ” និងជាអាកាសយានដ្ឋានអន្តរជាតិ ដែលត្រូវបានអនុវត្តដោយសហគ្រាសចិននៅក្រៅប្រទេស តាមរបៀប “សាងសង់ អាជីវកម្ម និងផ្ទេរ (BOT Project)” ។លើសពីនេះ លោកវ៉ាង អ៊ីប៉ ក៏បានសម្តែងនូវការជឿជាក់ថា ក្រោមការដឹកនាំប្រកបដោយគិតិបណ្ឌិតរបស់ សម្តេចធិបតី ប្រទេសកម្ពុជានឹងកាន់តែរីកចម្រើនរុងរឿង និងជឿនលឿនទៅមុខ ហើយទំនាក់ទំនងកិច្ចសហប្រតិបត្តិការកម្ពុជា-ចិន និយាយជារួម និងខេត្តយូណាននិយាយដោយទ្បែក នឹងកាន់តែមានភាពជិតស្និទ្ធ រឹងមាំ និងយូរអង្វែងបន្ថែមទៀត។

ជាការឆ្លើយតប សម្តេចធិបតី បានសម្តែងនូវកិច្ចស្វាគមន៍យ៉ាងកក់ក្តៅជូនចំពោះ អភិបាលខេត្តយូណាន និងគណៈប្រតិភូ ដែលបានអញ្ជើញមកចូលរួមក្នុង “ពិធីសម្ពោធដាក់ឱ្យប្រើប្រាស់ជាផ្លូវការអាកា​សយានដ្ឋានអន្តរជាតិសៀមរាបអង្គរ” ដែលកំពុងប្រព្រឹត្តទៅស្របពេលដែលឆ្នាំ២០២៣ នេះ គឺជាខួបលើកទី៦៥ នៃចំណងការទូតកម្ពុជា-ចិន និងការកំណត់យកឆ្នាំ២០២៤ ជាឆ្នាំនៃការផ្លាស់ប្តូររវាងប្រជាជន និងប្រជាជន ។ដូចគ្នានេះ សម្តេចធិបតី ក៏បានបញ្ជាក់ទៀតថា ថ្ងៃនេះ គឺជាថ្ងៃប្រវត្តិសាស្ត្រមួយសម្រាប់ខេត្តសៀមរាប ក៏ដូចជាព្រះរាជាណាចក្រកម្ពុជាទាំងមូល ដែលសមិទ្ធផលដ៏ធំ និងថ្មីសន្លាង បានលេចត្រដែតឡើងជានិមិត្តរូប នៃការអភិវឌ្ឍក្នុងសម័យទំនើប។ ទន្ទឹមនឹងតម្រូវការនៃការថែរក្សា ការពារបេតិកភ័ណ្ឌវប្បធម៌របស់កម្ពុជា ហើយពិតណាស់សមិទ្ធផលនេះ គឺជាផ្លែផ្កានៃទំនាក់ទំនងកិច្ចសហប្រតិបត្តិការល្អរវាងកម្ពុជា-ចិន ។

ជាមួយគ្នានេះ សម្តេចធិបតីហ៊ុន ម៉ាណែតក៏បានថ្លែងអំណរគុណចំពោះក្រុមហ៊ុនរដ្ឋទាំង៣ របស់ខេត្តយូណាន ដែលមានជំនឿទុកចិត្ត នៅក្នុងការបោះទុនវិនិយោគនៅកម្ពុជា ជាពិសេសការវិនិយោគសាងសង់អាកាសយានដ្ឋានខ្នាតអន្តរជាតិនេះ ។

សម្តេចធិបតី ក៏បានគូសរំលេចផងដែរថា ក្រោមការដឹកនាំរបស់ សម្តេចតេជោ អតីតនាយករដ្ឋមន្ត្រី លោកតែងបានយកចិត្តទុកដាក់លើការលើកកម្ពស់ទំនាក់ទំនងកម្ពុជា-ចិន និងការគាំទ្រចំពោះគំនិតផ្តួចផ្តើម “ខ្សែក្រវាត់ និងផ្លូវ” ដែលបានចូលរួមចំណែកក្នុងការជួយដល់ប្រទេសកំពុងអភិវឌ្ឍ ឱ្យមានការរីកចម្រើន ។ជាក់ស្តែង នៅកម្ពុជាផ្ទាល់ នៅក្រោមក្របខ័ណ្ឌកិច្ចសហប្រតិ​បត្តិការ “ខ្សែក្រវាត់ និងផ្លូវ” គឺគម្រោងអភិវឌ្ឍន៍ហេដ្ឋារចនាសម្ព័ន្ធធំៗជាច្រើន បានលេចចេញជារូបរាងឡើង រួមមាន (១) ការអភិវឌ្ឍតំបន់សេដ្ឋកិច្ចពិសេសខេត្តព្រះសីហនុ; (២) ផ្លូវល្បឿនលឿនភ្នំពេញ-ព្រះសីហនុ (៣) គម្រោងសាងសង់ផ្លូវល្បឿនលឿនភ្នំពេញ -បាវិត និង (៤) អាកាសយានដ្ឋានអន្តរជាតិសៀមរាប អង្គរថ្មីនេះ ជាដើម ។

សម្តេចធិបតី ក៏បានគាំទ្រ និងលើកទឹកចិត្តឱ្យក្រុមហ៊ុនពង្រីកផែនការវិនិយោគ នៅក្នុងខេត្តសៀមរាបបន្ថែមទៀត ដើម្បីឱ្យខេត្តនេះក្លាយជាប៉ូលអភិវឌ្ឍន៍ ពហុបំណងនៅក្នុងព្រះរាជាណាចក្រកម្ពុជា៕

ដោយៈ តែម សុខុម

ប៉េកាំងៈ ដំណាក់កាលដំបូង នៃផ្លូវបញ្ជូនទឹកភាគខាងកើតក្នុងគម្រោងបង្វែរទិសបញ្ជូនទឹក ពីភាគខាងត្បូង ឆ្ពោះទៅភាគខាងជើង (South-to-North Water Diversion Project) បានបម្រើផលប្រ​យោ​ជន៍ដល់ប្រជាជនជាង៦៨លាននាក់ ក្នុងខេត្តសានតុង (Shandong) ប្រទេសចិន។

ក្រុមហ៊ុន China South-to-North Water Diversion Co., Ltd ដែលជាអ្នកគ្រប់គ្រងគម្រោងនេះ បាននិយាយកាលពីថ្ងៃពុធ ទី១៥ ខែវិច្ឆិកា ថា ខ្លួនបានបញ្ជូនទឹក ក្នុងមរិមាណ៦,១៤ពាន់លានម៉ែត្រគូបទៅកាន់ខេត្តសានតុង ចាប់តាំងពីខ្លួនបានចាប់ផ្ដើមផ្គត់ផ្គង់ទឹក នៅខែវិច្ឆិកា ឆ្នាំ២០១៣។គម្រោងបង្វែរទិសបញ្ជូនទឹកដ៏ធំនេះ មានផ្លូវបញ្ជូនទឹកចំនួន៣ គឺផ្លូវបញ្ជូនទឹកភាគខាងកើត ផ្លូវបញ្ជូនទឹកចំណុចកណ្ដាល និងផ្លូវបញ្ជូនទឹកភាគខាងលិច។ផ្លូវបញ្ជូនទឹកភាគខាងកើតបញ្ជូនទឹក ពីខេត្តភាគខាងកើតជាំងស៊ូ (Jiangsu) ឆ្ពោះទៅកាន់តំបន់នានា រួមទាំងខេត្តសានតុង ខេត្តហឺប៉ី (Hebei) និងក្រុងធានជីង (Tianjing) ផងដែរ។

ដោយមានប្រវែង១.៤៦៧គីឡូម៉ែត្រ ដំណាក់កាលដំបូងនៃផ្លូវបញ្ជូនទឹកភាគខាងកើត នៃគម្រោងនេះបញ្ជូនទឹកពីទន្លេរយ៉ាងចឺ (Yangtze River) ឆ្ពោះទៅខេត្តសានតុង ដោយប្រើប្រាស់ព្រែកជីក និងស្ថានីយបូមទឹក។ផ្លូវបញ្ជូនទឹកចំណុចកណ្ដាល គឺជាផ្លូវបញ្ជូនទឹកដ៏សំខាន់បំផុត ដោយចាប់ផ្ដើម ពីចំណុចអាងស្តុកទឹកតានជាំងខូវ (Danjiangkou Reservoir) ក្នុងខេត្តហ៊ូប៉ី (Hubei) ប្រទេសចិន ភាគកណ្ដាល និងរត់ឆ្លងខេត្តហឺណាន (Henan) និងខេត្តហឺប៉ី (Hebei) មុនពេលទៅដល់ក្រុងប៉េកាំង និងក្រុងធានជីង (Tianjing)។ ផ្លូវបញ្ជូនទឹកនេះបានចាប់ផ្ដើមផ្គត់ផ្គង់ទឹកនៅខែធ្នូ ឆ្នាំ២០១៤។ ផ្លូវបញ្ជូនទឹកភាគខាងលិច កំពុងស្ថិតក្នងដំណាក់កាលធ្វើផែន​ការនៅឡើយ៕ Xinhua៕

ដោយៈ ម៉ាលីនណា

ភ្នំពេញៈ អគ្គនាយកនិយ័តករមូលបត្រ និងបញ្ចាំ លោកស៊ូ សុជាតិ បានគូសបញ្ជាក់ថា ទីផ្សារមូលបត្រ គឺជាច្រកវិនិយោគដ៏សំខាន់មួយផ្សេងទៀត ដែលផ្តល់ឱកាសដល់ប្រជាជនកម្ពុជា ក្នុងការវិនិយោគជាមួយនឹងដើមទុនតិចតួច ប៉ុន្តែអាចពង្រីកនូវសំ​ណុំ​វិនិយោគរបស់ខ្លួន ដើម្បីបង្កើនចំណូលអកម្មបន្ថែម ប្រកបដោយជំនឿទុកចិត្ត។

លោកបបានមានប្រសាសន៍យ៉ាងដូច្នេះ ក្នុងពិព៌ណផ្សារហ៊ុនកាលពីថ្ងៃទី១៦ វិច្ឆិកា ថា “ដូច្នេះយើងគួរគប្បីរៀន និងចាប់ផ្តើមធ្វើការវិនិ​យោគចាប់ពីថ្ងៃនេះតទៅ ក៏ប៉ុន្តែត្រូវប្រើប្រាស់ប្រាក់សន្សំ យកមកវិនិយោគ ចៀសវាងប្រើប្រាស់កញ្ចប់ថវិកា ប្រើប្រាស់ប្រចាំថ្ងៃ យកមកវិនិយោគ”។ចំណែកលោកបណ្ឌិតសភាចារ្យ ហ៊ាន សាហ៊ីប បានគូសរំលេចជូនអង្គពិធីថា ផ្សារមូលបត្រកម្ពុជា តែងផ្តល់អាទិភាពខ្ពស់លើការធ្វើទំនើបកម្ម និងការប្រើប្រាស់ប្រព័ន្ធបច្ចេកវិទ្យា ក្នុងវិស័យមូលបត្រ។ ជាក់ស្តែង ការដាក់សម្ពោធឱ្យប្រើប្រាស់ជាផ្លូវការ កម្មវិធីទូរសព្ទដៃ “CSX Trade” កាលពីខែឧសភា ឆ្នាំ២០២២ ដែលជាកម្មវិធីមួយផ្តល់ភាពងាយស្រួលទៅដល់វិនិយោគិន ក្នុងការជួញដូរមូលបត្រ ជាពិសេ​សផ្តល់ភាពងាយស្រួលក្នុងការតាមដាន និងទទួលបានព័ត៌មាន ពាក់ព័ន្ធនឹងវិស័យមូលបត្រ បានទាន់ពេលវេលា និងគ្រប់ទីកន្លែង។

ការសម្ពោធដាក់ឱ្យប្រើប្រាស់ជាផ្លូវការនូវ ប្រព័ន្ធបើកគណនីជួញដូរតាមអនឡាញជំនាន់ទី២ តាមរយៈការតភ្ជាប់ជាមួយ ថ្នាលផ្លាស់ប្ដូរទិន្នន័យកម្ពុជា (CamDX) និងប្រព័ន្ធផ្តល់លេខអត្តសញ្ញានវិនិយោគិនតាមអនឡាញ (Investor ID Online) របស់និយ័តករមូលបត្រកម្ពុជា, វិនិយោគិនអាចទទួលបានគណនីជួញដូរភ្លាមៗ នៅគ្រប់ទីកន្លែង និងដោយស្វ័យប្រវត្តិផងដែរ៕

ដោយ: គង់ លាងហួរ

សៀមរាប: កម្ពុជាកំពុងសាង់សង់ អាកាសយានដ្ឋានចំនួន២ និងលើកកម្រិតស្តង់ដារអាកាសយានដ្ឋានចំនួន១ ព្រមទាំងគ្រោងសាងសង់អាកាសយានដ្ឋានចំនួន២បន្ថែមទៀត ដើម្បីប្រែក្លាយទៅជាស្ពា​​នតភ្ជាប់ទំនាក់ទំនងរវាងកម្ពុជា ទៅកាន់ពិភពលោកឲ្យកាន់តែទូលំទូលាយ និងក្លាយជាជន្ទល់ដ៏រឹងមាំ សម្រាប់ទ្រទ្រង់វិស័យទេសចរណ៍។

រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោកម៉ៅ ហាវណ្ណាល់បានមានប្រសាសន៍ក្នុងពិធីសម្ពោធដាក់ឱ្យប្រើប្រាស់ ជាផ្លូវការអាកាសយានដ្ឋានអន្តរជាតិសៀមរាបអង្គរ (SAI)កាលពីថ្ងៃទី១៦ វិច្ឆិកា ថា រដ្ឋលេខាធិការដ្ឋានអាកាសចរណ៍ស៊ីវិល បានធ្វើបច្ចុប្បន្នភាព លើគោលនយោបាយជាគន្លឹះឆ្នាំ២០២៣-២០២៨ ដែលជាធាតុចូលសម្រាប់អភិវឌ្ឍវិស័យអាកាសចរណ៍ស៊ីវិល ស្របនឹងគោលការណ៍ណែនាំ នៃគោលនយោ​បាយរបស់រាជរដ្ឋាភិបាលនីតិកាលទី៧ មានភាពឆ្លើយតបនឹងបន្ស៊ីគ្នា ទៅនឹងយុទ្ធសាស្ត្របញ្ចកោណ ក្នុងការជំរុញ និងកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០។លោកបានបន្តថា បច្ចុប្បន្ននេះ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រដ្ឋាភិបាលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ក្នុងការបន្តស្ដារលើកស្ទួយ និងអភិវឌ្ឍលើវិស័យផ្សេងៗ ជាពិសេសគឺវិស័យអាកាសចរណ៍ស៊ីវិល ដោយបច្ចុប្បន្ន កម្ពុជាបាននឹងកំពុងបន្តសាងសង់អាកាសយា​នដ្ឋានចំនួន២ លើកកម្រិតអាកាសយានដ្ឋានចំនួន១ និងគ្រោងសាងសង់អាកាសយានដ្ឋាន២បន្ថែមទៀត ដើម្បីធ្វើយ៉ាងណាឱ្យវិស័យអាកាសចរណ៍កាន់តែរីកចម្រើន និងជំរុញកំណើនសេដ្ឋកិច្ចកម្ពុជាទាំងមូល ស្របតាមបាវចនាទាំង៥ នៃយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី៧ រួមមាន៖ កំណើន ការងារ សមធម៌ ប្រសិទ្ធភាព និងចីរភាព ។

បន្ថែមពីលើអាកាសយានដ្ឋានសៀមរាបអង្គរ ដែលបានដាក់សម្ពោធឱ្យប្រើប្រាស់ជាផ្លូវការកាលពីម្សិលម៉ិញនេះ កម្ពុជាបាននិងកំពុងសាងសង់ អាកាសយានដ្ឋានអន្តរជាតិចំនួន២បន្ថែមទៀត គឺអាកាសយានដ្ឋានអន្តរជាតិភ្នំពេញ និងតារាសាគរ និងលើកកម្រិតស្តង់ដារអាកាសយានដ្ឋានអន្តរជាតិចំនួន១ គឺអាកាសយានដ្ឋានអន្តរជាតិខេត្តព្រះសីហនុ ។

លោក ម៉ៅ ហាវណ្ណាល់ បានអះអាងថា ជាមួយគ្នានេះ យើងក៏មានគម្រោងអភិវឌ្ឍន៍ អាកាសយានដ្ឋានខេត្តមណ្ឌលគិរី និងអាកាសយានដ្ឋានកោះរ៉ុង ដែលស្ថិតក្នុងរបៀបវារៈ នៃការអភិវឌ្ឍរបស់រាជរដ្ឋាភិបាល ក្នុងការចូលរួមចំណែកលើការអភិវឌ្ឍ វិស័យទេសចរណ៍ ហើយបានធ្វើទំនើបកម្ម លើប្រព័ន្ធគ្រប់គ្រងត្រួតពិនិត្យ និងបញ្ជាចរាចរណ៍ដែនអាកាស ដែលធ្វើការផ្លាស់ប្តូរពីប្រព័ន្ធAISធម្មតា ទៅជាAIN និងប្រព័ន្ធឌីជីថល រួមជាមួយសមិទ្ធផលជាច្រើនផ្សេងៗទៀត នៅក្នុងវិស័យអាកាសចរណ៍ស៊ីវិល។

បច្ចុប្បន្ន កម្ពុជាកំពុងសាងសង់ អាកាសយានដ្ឋានអន្តរជាតិភ្នំពេញថ្មី ស្ថិតនៅក្នុងខេត្តកណ្តាល និងខេត្តតាកែវ លើផ្ទៃដីទំហំ២.៦០០ហិកតា ដែលស្ថិតនៅចម្ងាយ២០គីឡូម៉ែត្រ ភាគខាងត្បូងនៃរាជធានីភ្នំពេញ។ ចំណែកឯ អាកាសយានដ្ឋានអន្តរជាតិតារាសាគរ មានទីតាំង ស្ថិតនៅក្នុងខេត្តកោះកុង ដែលអភិវឌ្ឍឡើងលើផ្ទៃដីទំហំ២១៨ហិកតា និងមានដីបម្រុងទំហំ១ពាន់ហិកតាបន្ថែម៕