ដោយៈ តែម សុខុម

បាងកកៈ វាជាដំណឹងដ៏គួរភ្ញាក់ផ្អើលមួយ ដែលព្រះអង្គម្ចាស់ នរោត្តម រ៉ាវីចក្រ បានទិញយកក្លឹបបាល់ទាត់ នៃក្របខណ្ឌកំពូលរបស់ថៃ Police Tero FC។

ក្លឹបបាល់ទាត់ Police Tero FC បានប្រកាសកាលពីថ្ងៃច័ន្ទ ទី៦ ខែវិច្ឆិកា ថា ព្រះអង្គម្ចាស់ នរោត្តម រ៉ាវីចក្រ បានទិញយកក្លឹបរបស់ខ្លួនក្រោមកិច្ចព្រមព្រៀងបណ្ដាក់ទុនរួមគ្នា ដោយព្រះអង្គម្ចាស់គឺជាភាគហ៊ុនធំ និងជាអ្នកដឹកនាំក្លឹបនេះ។ នេះបើយោងតាមកាសែតថៃ The Nation ចុះផ្សាយនៅថ្ងៃអង្គារ ទី៧ ខែវិច្ឆិកា នេះ។

អ្នកគ្រប់គ្រងក្លឹបនេះលោក Thanya Wongnak និយាយថា ព្រះអង្គម្ចាស់ បានប្ដេជ្ញាអភិវឌ្ឍន៍វិស័យបាល់ទាត់ និងដឹកនាំក្លឹបបាល់ទាត់ Police Tero FC ឱ្យខ្លាំងឡើងវិញ ដែលស្របនឹងគោលដៅរបស់គណៈគ្រប់គ្រងក្លឹបបច្ចុប្បន្ន។អ្នកគ្រប់គ្រងរូបនេះបានបន្ថែមថា គោលដៅរបស់ក្លឹបគឺដើម្បីឈានឡើង ទៅចំណាត់ថ្នាក់កំពូលទាំង៣ នៃក្របខណ្ឌកំពូលរបស់ថៃនៅឆ្នាំក្រោយ និងចូលរួមក្នុងក្របខណ្ឌជើងឯក AFC Champions League។

ព្រះអង្គម្ចាស់ នរោត្តម អមរិទ្ធិវង្ស ដែលជាតំណាងព្រះអង្គម្ចាស់ នរោត្តម រ៉ាវីចក្រ មានបន្ទូលថា ព្រះអង្គផ្ទាល់មានចំណាប់អារម្មណ៍លើការគ្រប់គ្រងក្លឹបបាល់ទាត់ ហើយទ្រង់យល់ថា ការបណ្ដាក់ទុនរួមគ្នានេះគឺជាឱកាសដ៏ល្អ ដើម្បីអភិវឌ្ឍវិស័យបាល់ទាត់ទាំងក្នុងប្រទេសថៃ និងតំបន់អាស៊ានទាំងមូល។ព្រះអង្គម្ចាស់មួយព្រះអង្គទៀត ដែលចូលរួមក្នុងការបណ្ដាក់ទុនរួមគ្នានេះដែរ គឺព្រះអង្គម្ចាស់ នរោត្តម ណារិទ្ធិពង្ស។យោងតាមកាសែតដដែលបង្ហាញថា ព្រះអង្គម្ចាស់ទាំង៣ព្រះអង្គខាងលើ បានរួមគ្នាទិញក្លឹប Police Tero FC និងក្លាយជាម្ចាស់ភាគហ៊ុនធំ៕ The Nation ៕

ដោយ: គង់ លាងហួរ

អន្តរជាតិ: សារពត៌មាន Laotian Times បានចុះផ្សាយថា ព្រលាន​យន្តហោះ​អន្តរជាតិ ​ដ៏ថ្មី​ស្រឡាង​មួយ​ក្នុង​ខេត្ត​បរកែវ​ ប្រទេសឡាវ ដែល​មាន​តម្លៃ​១៧៥​លាន​ដុល្លារ​អាមេរិក​ នឹង​ចាប់ផ្តើម​បើកដំណើរការ​នៅ​ដំណាច់ឆ្នាំ​២០២៣នេះ​។

គម្រោងនេះ ត្រូវបានផ្តួចផ្តើមនៅខែកញ្ញា ឆ្នាំ២០២០ និងផ្តល់ហិរញ្ញប្បទានដោយក្រុមហ៊ុន Greater Bay Area Investment and Development Limited ។

ចាប់តាំងពីពេលនោះមក ការសាងសង់មានការរីកចម្រើនគួរឱ្យកត់សម្គាល់ ដូចជា ការសាងសង់បញ្ចប់ផ្លូវរត់ ផ្លូវតាក់ស៊ី និងចំណតរថយន្ត។  បច្ចុប្បន្ននេះ ដំណាក់កាលចុងក្រោយគឺនៅសល់តែ ការតុបតែងខាងក្នុង និងការដំឡើងគ្រឿងបរិក្ខារសំខាន់ៗប៉ុណ្ណោះ។ ព្រលាន​យន្តហោះ​អន្តរជាតិ ​ដ៏ថ្មី​ស្រឡាង​មួយនេះ មានទីតាំងយុទ្ធសាស្ត្រ នៅជិតតំបន់សេដ្ឋកិច្ចពិសេសត្រីកោណមាស ហើយព្រលានយន្តហោះនេះ បានត្រៀមលក្ខណៈដើម្បីស្វាគមន៍ភ្ញៀវទេសចរ ដោយផ្តោតជាពិសេសទៅលើភ្ញៀវមកពីប្រទេសចិន។

ព្រលាន​យន្តហោះនេះ ត្រូវបានរចនាឡើងដើម្បីផ្ទុកយន្តហោះខ្នាតធំដូចជា យន្តហោះBoeing 747 និងយន្តហោះ Airbus 320។ គម្រោងនេះ ដំណើរការក្រោមគំរូសាងសង់-ប្រតិបត្តិការ-ផ្ទេរ (Build-Operate-Transfer) ហើយអ្នកអភិវឌ្ឍន៍កាន់កាប់សម្បទានរយៈពេល៥០ឆ្នាំ។

ព្រលាន​យន្តហោះ​អន្តរជាតិ​ថ្មីនេះ​ គឺជា​ការ​បោះជំហាន​ទៅមុខ​ដ៏​សំខាន់​មួយ​សម្រាប់​ខេត្ត​បរកែវ ប្រទេសឡាវ ដោយ​បើកទ្វារ​ដល់​ការពង្រឹង​ការតភ្ជាប់​ទូទាំង​តំបន់ និង​ក្រៅ​តំបន់៕

ដោយ: គង់ លាងហួរ

អន្តរជាតិ: បណ្តាក្រុមហ៊ុនសកល ដែលមានវត្តមាននៅក្នុងប្រទេសអ៊ីស្រាអែល បានផ្អាកប្រតិបត្តិការ ឬស្នើឱ្យបុគ្គលិកធ្វើការពីផ្ទះ ខណៈដែលប្រទេសនេះ កំពុងបើកការវាយលុក ទៅលើក្រុមហាម៉ាសនៅតំបន់ហ្គាហ្សាស្ទ្រីប។

ខាងក្រោមនេះគឺជាជំហានមួយចំនួន ដែលកំពុងត្រូវបានអនុវត្តដោយក្រុមហ៊ុនជាច្រើន នៅក្នុងឧស្សាហកម្មនានា រាប់ចាប់តាំងពីការធ្វើដំណើររហូតដល់វិស័យហិរញ្ញវត្ថុ។

ការធ្វើដំណើរ
បណ្តាក្រុមហ៊ុនអាកាសចរណ៍ នៅតំបន់អាស៊ី អឺរ៉ុប និងអាមេរិកជាច្រើនបានផ្អាកជើងហោះហើរ ត្រង់ទៅកាន់ទីក្រុង Tel Aviv។វិស័យថាមពល
ក្រសួងថាមពលរបស់ប្រទេសអ៊ីស្រាអែល បានបញ្ជាដល់ក្រុមហ៊ុន Chevron ដែលជាក្រុមហ៊ុនផលិតប្រេង និងឧស្ម័នធំជាងគេទី២របស់សហរដ្ឋអាមេរិក ឱ្យបិទកន្លែងឧស្ម័នធម្មជាតិ Tamar នៅឆ្នេរសមុទ្រភាគខាងជើងរបស់ប្រទេសនេះ។

វិស័យធនាគារ
ធនាគារវិនិយោគអាមេរិក Goldman Sachs បានស្នើឱ្យបុគ្គ​លិកនៅការិយាល័យរបស់ខ្លួនក្នុងទីក្រុង Tel Aviv ធ្វើការពីផ្ទះ។

ចំណែក ធនាគារ JPMorgan Chase បានស្នើឱ្យបុគ្គលិកជាង២០០នាក់របស់ខ្លួន នៅក្នុងប្រទេសអ៊ីស្រាអែលធ្វើការពីផ្ទះ។ នេះបើយោងតាមប្រភព ដែលដកស្រង់ដោយទីភ្នាក់ងារសារព័ត៌មាន Reuters។

ធនាគារ Bank of America បានបិទការិយាល័យនៅទីក្រុង Tel Aviv របស់ខ្លួន ខណៈធនាគារ Morgan Stanley បានប្រាប់បុគ្គលិករបស់ខ្លួន នៅប្រទេសអ៊ីស្រាអែលឱ្យធ្វើការពីផ្ទះ។

ប្រភពមួយបានប្រាប់សារពត៌មាន Reuters ថា ធនាគារ Citigroup ដែលមានវត្តមានធំបំផុត ក្នុងចំណោមស្ថាប័នហិរញ្ញវត្ថុបរទេសក្នុងប្រទេសអ៊ីស្រាអែល បានផ្តល់ភាពបត់បែនសម្រាប់បុគ្គ​លិក ក្នុងប្រទេសអាចជ្រើសរើសធ្វើការពីផ្ទះ ឬការិយាល័យ។

វិស័យភស្តុភារ
ក្រុមហ៊ុន Adani Ports របស់មហាសេដ្ឋីឥណ្ឌាលោក Gautam Adani បានអះអាងថា កំពង់ផែHaifa ដែលស្ថិតនៅភាគខាងជើងប្រទេសអ៊ីស្រាអែល នៅតែបន្តដំណើរការ ប៉ុន្តែក្រុមហ៊ុនកំពុងតាមដានយ៉ាងដិតដល់នូវស្ថានភាព និងបានរៀបចំផែនការបន្តអាជីវកម្ម។ ចំណែក ក្រុមហ៊ុនដឹកជញ្ជូនសកល FedEx បានផ្អាកសេវាកម្មរបស់ខ្លួននៅក្នុងប្រទេសអ៊ីស្រាអែល។

វិស័យបច្ចេកវិទ្យា
ក្រុមហ៊ុន Nvidia ដែលជាក្រុមហ៊ុនផលិតបន្ទះឈីបដ៏ធំបំផុតរបស់ពិភពលោក ដែលប្រើប្រាស់សម្រាប់បញ្ញាសិប្បនិម្មិត និងក្រាហ្វិកកុំព្យូទ័រ បានលុបចោលកិច្ចប្រជុំកំពូលAI នៅទីក្រុង Tel Aviv។

អ្នកប្រើប្រាស់ និងការលក់រាយ
ក្រុមហ៊ុនសម្លៀកបំពាក់ខ្នាតយក្ស H&M បានបិទហាងទាំងអស់ជាបណ្ដោះអាសន្ន ក្នុងប្រទេសអ៊ីស្រាអែល រីឯក្រុមហ៊ុន Inditex ដែលជាម្ចាស់ហាងលក់រាយសម្លៀកបំពាក់ Zara បានបិទហាងចំនួន៨៤របស់ខ្លួនជាបណ្ដោះអាសន្ន ក្នុងប្រទេសអ៊ីស្រាអែលផងដែរ។

វិស័យឱសថ
ក្រុមហ៊ុនឱសថ Eli Lilly and Co បានរាយការណ៍ថា ខ្លួនកំពុងតាមដានស្ថានការណ៍យ៉ាងដិតដល់ ហើយនឹងចាត់វិធានការចាំបាច់ទាំងអស់ ដើម្បីធានាសុវត្ថិភាពរបស់បុគ្គលិក នៅពេលកំពុងធ្វើការ ដើម្បីធានាការផ្គត់ផ្គង់ថ្នាំ ដែលគ្មានការរំខានដល់អ្នកជំងឺ នៅក្នុងតំបន់៕

ដោយ: គង់ លាងហួរ

ហុងកុង: នាយកប្រតិបត្តិធនាគារ HSBC Group លោក Noel Quinn បានមានប្រសាសន៍ឱ្យដឹង នៅថ្ងៃអង្គារនេះថា លំហូរទ្រព្យសម្បត្តិពីតំបន់ចិនដីគោក ចូលទៅកាន់ទីក្រុងហុងកុង បានកើនឡើងពី៣ទៅ៤ដង នៅឆ្នាំនេះ។

ថ្លែងនៅក្នុងកិច្ចប្រជុំកំពូលGlobal Financial Leaders Investment ដែលរៀបចំឡើង ដោយអាជ្ញាធររូបិយវត្ថុហុងកុង លោក Noel Quinn បានអះអាងថា តំបន់ Great Bay Area (GBA) បានផ្តល់ឱកាសអាជីវកម្មដ៏អស្ចារ្យ ជាមួយនឹងលំហូរនៃដើមទុន និងទេពកោសល្យនៅក្នុងតំបន់។លោកបានបន្តថា “ខ្ញុំមើលឃើញពីការប្តេជ្ញាចិត្ត យ៉ាងមុតមាំពីគ្រប់មនុស្សទាំងអស់ ដែលខ្ញុំបានជួបនិយាយជាមួយ ដើម្បីអភិវឌ្ឍតំបន់ Great Bay Area ទៅជាតំបន់សេដ្ឋកិច្ចដ៏សំខាន់មួយ”។

តំបន់ Great Bay Area ដែលគ្របដណ្ដប់ទីក្រុងហុងកុង ម៉ាកាវ និងផ្នែកខ្លះនៃខេត្តក្វាងទុង  ភាគអាគ្នេយ៍របស់ប្រទេសចិន ស្ថិតតាមបណ្តោយទន្លេគុជ (Pearl River) ត្រូវបានដាក់បញ្ចូលទៅក្នុងផែន ការជាតិរបស់ប្រទេសចិន ដើម្បីអភិវឌ្ឍទៅជាមជ្ឈមណ្ឌលសេដ្ឋកិច្ចក្នុងតំបន់។

លោក Quinn បានលើកឡើងថា ភាពរឹងមាំផ្នែកហិរញ្ញវត្ថុរបស់ហុងកុង និងមូលដ្ឋានផលិតកម្មនៅក្វាងទុង ក៏ដូចជាសមត្ថភាពស្រាវជ្រាវនៅក្នុងតំបន់ទាំង២ នឹងបង្កើតបានការរួមបញ្ចូលគ្នាដ៏មានឥទ្ធិពលមួយ ហើយធនាគាររបស់លោក កំពុងចាប់យកឱកាសទាំងនេះ។

លោកបន្ថែមថា “សកម្មភាពធនាគារលក់រាយថ្មី (Retail banking) នៅក្នុងតំបន់ Greater Bay Area បានហក់ឡើង៧០ភាគរយ ចាប់តាំងពីការបញ្ចប់ ទៅនៃជំងឺរាតត្បាតកូវីដ-១៩ ខណៈដែលសកម្មភាពធនាគារថ្មី ក្នុងចំណោមសហគ្រាសធុនតូច និងមធ្យមនៅទីក្រុងហុងកុងបានហក់ឡើង៩០ភាគរយ”៕

ដោយៈ ជេស៊ីកា

        ព្រះសីហនុៈ ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជាបានអះអាងថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេច ​កំពុងដាក់ចេញផែនការមេ សម្រាប់អភិវឌ្ឍន៍ខេត្តព្រះសីហនុ និងខេត្តជាប់សមុទ្រ។

ប៉ុន្ដែទោះជាយ៉ាងណា សម្តេចមិនយកខេត្តជាប់សមុទ្រដទៃទៀត មកប្រកួតប្រជែងជាមួយខេត្តព្រះសីហនុនោះឡើយ។

ក្នុងពិធីជួបសំណេះសំណាលជាមួយកម្មករ កម្មការិនី ប្រមាណ១៥,១៩៤នាក់នៅ តំបន់សេដ្ឋកិច្ចពិសេស ស្ថិតក្នុងស្រុកព្រៃនប់ ខេត្តព្រះសីហនុ នាព្រឹកថ្ងៃទី៧ ខែវិច្ឆិកា ឆ្នាំ២០២៣នេះ សម្ដេចធិបតី ហ៊ុន ម៉ាណែត បានអះអាងថា ខេត្តព្រះសីហនុ បើអភិវឌ្ឍន៍បានត្រឹមត្រូវនាំសេដ្ឋកិច្ចឲ្យជាតិច្រើនណាស់ ពិសេសខេត្តជាប់ខេត្តព្រះសីហនុតែម្ដង។សម្ដេចធិបតីនាយករដ្ឋមន្ដ្រីបានបញ្ជាក់ថា ខេត្តព្រះសីហនុ មានសក្តានុពលធំណាស់ សម្រាប់ជាតិកម្ពុជា ហើយពាក់ព័ន្ធផែនការអភិវឌ្ឍន៍ដ៏មានសក្ដានុពលមួយនេះ គឺរាជរដ្ឋាភិបាលបានប្រគល់ភារកិច្ចជូន ឧបនាយករដ្ឋមន្ដ្រី ស៊ុន ចាន់ថុល។

សម្ដេចធិបតីហ៊ុន ម៉ាណែត បានបញ្ជាក់ថា “យើងកំពុងធ្វើផែនការមេ ដើម្បីអភិវឌ្ឍន៍ខេត្តព្រះសីហនុ និងខេត្តជាប់សមុទ្រ”។សម្តេចបន្ថែមថា “ខ្ញុំឲ្យមានការគិតគូររួម កុំឲ្យគិតគូរដាច់ដោយដុំ ត្រូវគិតគូរជាកញ្ចប់ជាមាត្រដ្ឋាន។ បើយើងគិតតែខេត្តព្រះសីហនុ យកខេត្តបីទៀត ជាគូរប្រជែងយើងអត់យកសក្ដានុពលបានទេ។ យើងត្រូវយកខេត្ត៤របស់យើង (ជាប់សមុទ្រ) ប្រកួតប្រជែងជាមួយប្រទេសផ្សេងៗ»។

សម្ដេចធិបតីនាយករដ្ឋមន្ដ្រី បានណែនាំឲ្យរៀបចំ និងពិនិត្យគិតគូរអំពីកំពង់សមុទ្រ ដែលកំពុងមានចំនួន៤ ក្នុងនោះខេត្តព្រះសីហនុ មួយ, ខេត្តកំពត ពីរ និងខេត្តកោះកុងមួយ ដោយត្រូវធ្វើយ៉ាងណាឲ្យប្រទាក់ក្រឡាគ្នា តែមិនប្រកួតប្រជែងគ្នានោះទេ ហើយមានគោលដៅរួមដូចគ្នា គឺប្រកួតប្រជែងជាមួយប្រទេសជិតខាង។ក្នុងនោះ ត្រូវបែងចែកគ្នាឲ្យច្បាស់ថា កំពង់ផែណាសម្រាប់ទេសចរណ៍ និងកំពង់ផែណាសម្រាប់ទំនិញ។សម្ដេចធិបតី ហ៊ុន ម៉ាណែត បានបន្ថែមថា ខេត្តជាប់សមុទ្រទាំង៤របស់កម្ពុជា សុទ្ធតែមានសក្ដានុពលទេសចរណ៍ទាំងអស់ ដោយត្រូវដាក់ចេញទិសដៅវិនិយោគឲ្យចំទិសដៅ។ ឧទាហរណ៍ ខេត្តព្រះសីហនុ មានតំបន់កោះច្រើន ត្រូវវិនិយោគទៅលើកោះ ខេត្តកំពត មានធនធានធម្មជាតិច្រើន ត្រូវវិនិយោគឲ្យចំអ្វីដែលមាន។

ដោយឡែក វិស័យអចលនទ្រព្យ ក៏ត្រូវពង្រឹងឡើងវិញផងដែរ ដែលកន្លងមក កម្ពុជាហាក់បានដើរលឿនលើវិស័យនេះ ប៉ុន្ដែមួយ រយៈកាលចុងក្រោយនេះ ត្រូវបានជាប់គាំង ក្នុងនោះទាំងកម្ពុជា និងសកលតែម្ដង ដែលនេះហាក់ដូចជាវត្តន៍រយៈពេល១០ឆ្នាំ ត្រូវជួបប្រទះនូវការជាប់គាំងម្ដង។

ប៉ុន្ដែទោះជាយ៉ាងណា បញ្ហាជាប់គាំងលើវិស័យអចនលទ្រព្យនេះ ក្រុមការងាររាជរដ្ឋាភិបាលកំពុងដោះស្រាយ ជាប់ជាប្រចាំ ពិសេសនៅខេត្តព្រះសីហនុតែម្ដង។

បន្ថែមពីនេះ ការពង្រឹងលើការងារសន្ដិសុខ សណ្ដាប់ធ្នាប់ ក៏ជាកត្តាមួយសំខាន់ផងដែរ នៅទូទាំងប្រទេសទាំងអស់ ពិសេសនៅតំបន់ទេសចរណ៍ និងឧស្សាហ៍កម្ម ព្រោះទេសចរមិនអាចទៅកម្សាន្ដបានទេ នៅកន្លែងគ្មានសន្ដិសុខល្អ គ្មានសណ្ដាប់ធ្នាប់ ហើយអ្នកវិនិយោគក៏ដូចគ្នាដែរ ដូច្នេះការងារពង្រឹងសន្ដិសុខ សណ្ដាប់ធ្នាប់ និងស្ថេរភាព គឺជារឿងដែលចាំបាច់បំផុត។

សម្តេចធិបតី​បានបន្តថា ជាមួយគ្នានេះ ការភ្ជាប់នូវការហោះហើរត្រង់ រវាងខេត្តព្រះសីហនុ និងតំបន់ទេសចរណ៍ល្បីៗនៅក្នុងតំបន់ ក៏ត្រូវគិតគូរផងដែរ ដែលម្សិលមិញ សម្ដេចបានណែនាំអំពីការងារនេះ ក្នុងកិច្ចប្រជុំផ្នែករាជរដ្ឋាភិបាល និងផ្នែកឯកជន ពិភាក្សាការងារលើវិស័យទេសចរណ៍នៅកម្ពុជា។

សម្តេចបន្ថែមថា ទាំងអស់នេះ សំដៅធ្វើយ៉ាងណាទាក់ទាញវិនិយោគ បង្កើតការងារ និងបង្កើនប្រាក់ចំណូល ដល់ប្រជាពលរដ្ឋផងដែរ៕

ដោយៈ តែម សុខុម

ហាណូយៈ ធនាគារនានានៅប្រទេសវៀតណាម បាននិងកំពុងព្យាយាមលក់ឡាយឡុងផ្ទះ រីហ្សត និងរោងចក្រដែលខ្លួនរឹបអូសបានពីកូនបំណុល ប៉ុន្តែរកអ្នកទិញមិនបានសោះ ទោះបីជាលក់បញ្ចុះតម្លៃច្រើនយ៉ាងណាក្ដី។

ចាប់តាំងពីចុងឆ្នាំ២០២២ ធនាគារនានាបានដាក់លក់ឡាយ​ឡុងយ៉ាងគំហុក នូវអចលនទ្រព្យរួមមានដីធ្លី ផ្ទះ និងវីឡានៅតាមតំបន់ដែលមានហាងឆេងខ្ពស់ សណ្ឋាគារ រីហ្សត និងរោងចក្រដើម្បីកាត់កងបំណុល។ នេះបើយោងតាមសារព័ត៌មាន VN Express ចុះផ្សាយកាលពីថ្ងៃអាទិត្យ ទី៥ ខែវិច្ឆិកា។

តួយ៉ាងធនាគារ Agribank ជាថ្មីម្ដងទៀតកំពុងស្វែងរកអ្នកទិញផ្ទះចំនួនពីរ ក្នុងសង្កាត់ចាស់នៃក្រុងហាណូយ ដោយផ្ទះមួយលក់ក្នុងតម្លៃចាប់ពី២,៥លានដុល្លារអាមេរិក ហើយផ្ទះមួយទៀតលក់ក្នុងតម្លៃចាប់ពី១,៤លានដុល្លារអាមេរិក។

ផ្ទះពីរខាងលើត្រូវបានធនាគារប្រកាស ដាក់លក់ឡាយឡុងប្រមាណ១០ដងមកហើយ រហូតមកទល់ពេលនេះ ប៉ុន្តែនៅតែលក់មិនចេញ។

ទន្ទឹមនេះ ធនាគារ BIDV បានព្យាយាមជាលើកទី៦ ក្នុងការលក់ឡាយឡុង រោងចក្រផលិតស៊ីមង់ត៍មួយកន្លែង នៅខេត្តភាគខាងត្បូង Binh Phuoc និងជាង១០ដង ក្នុងការលក់ឡាយឡុងដីមួយកន្លែងដែលមានទំហំ១.១០០ម៉ែត្រការ៉េនៅក្រុងហូជីមិញ។

នៅខែតុលា ធនាគារ VietinBank បានប្រកាសលក់ឡាយឡុងជាថ្មីនូវដីចំនួន២០កន្លែង ក្នុងខេត្តភាគខាងត្បូង Dong Nai ជាមួយនឹងតម្លៃចាប់ពី១០,៩លានដុល្លារអាមេរិក ដោយបញ្ចុះតម្លៃ២,៤៦លានដុល្លារអាមេរិក បើធៀបនឹង៣ខែមុន។

ដីទាំងនោះត្រូវបានក្រុមហ៊ុនសាងសង់មួយ នៅទីក្រុងហូជីមិញ យកទៅដាក់បញ្ចាំដើម្បីខ្ចីប្រាក់ពីធនាគារ។ធនាគារមួយទៀត បានបញ្ចុះតម្លៃ៤,១១លានដុល្លារអាមេរិក មកនៅត្រឹម៤១,១២លានដុល្លារអាមេរិក សម្រាប់អចលនទ្រព្យក្នុងក្រុង Nha Trang។

អចលនទ្រព្យជាច្រើន ក្នុងគម្រោងទេសចរណ៍មួយមានតម្លៃ១ពាន់លានដុល្លារអាមេរិក ដែលពាក់ព័ន្ធនឹងក្រុមហ៊ុនអភិវឌ្ឍន៍ Tan Hoang Minh ក៏ត្រូវបានបញ្ចុះតម្លៃ រាប់លានដុល្លារអាមេរិក ពីការប្រកាសលក់ឡាយឡុងមុនៗផងដែរ។

យោងតាមសមាគមភ្នាក់ងារ អចលនទ្រព្យវៀតណាម បានឱ្យដឹងថា នៅមុនពេលធនាគាររឹបអូស យកមកលក់ឡាយឡុង គឺធនា​គារទុកពេលឱ្យកូនបំណុល រយៈពេលពី៣ទៅ៦ខែ សម្រាប់ឱ្យពួកគេលក់អចលនទ្រព្យទាំងនោះដោយខ្លួនឯង។

ប៉ុន្តែដោយសារទីផ្សារអចលនទ្រព្យបច្ចុប្បន្ន កំពុងដាំក្បាលចុះ ទើបធ្វើឱ្យកូនបំណុលលក់មិនចេញ ព្រោះពួកគេចង់លក់វាចេញក្នុងតម្លៃខ្ពស់ ខណៈអ្នកទិញរង់ចាំឱ្យតម្លៃចុះថោក។

តាមរយៈរបាយការណ៍មួយ ដែលផ្ញើជូនរដ្ឋសភាវៀតណាម កាលពីដើមខែនេះ ធនាគារកណ្ដាលវៀតណាមបានបញ្ជាក់ថា អនុបាតបំណុលខូច ឬបំណុលពិបាកទារ (Bad Debt) ក្នុងវិស័យអចលនទ្រព្យ មានក្នុងរង្វង់២,៥៨%គិតត្រឹមដំណាច់ខែកក្កដា ដោយកើនឡើងខ្លាំងបើធៀបនឹង១,៨% ក្នុងឆ្នាំ២០២២ ហើយកំពុងតែកើនឡើងបន្តទៀត។

សមាគមខាងលើរំពឹងថា អនុបាតបំណុលខូចនឹងកើនឡើងបន្ថែមទៀត ពីព្រោះទីផ្សារអចលនទ្រព្យវៀតណាម នៅមិនទាន់រើបឡើងវិញនោះទេ៕ VN Express ៕

        ដោយៈ គង់ សូរិយា

        ព្រះសីហនុៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី៧ ខែវិច្ឆិកា ឆ្នាំ២០២៣នេះ បានណែនាំឲ្យរៀបចំផ្លូវដែក អាចឲ្យរត់បានល្បឿន៨០គីឡូម៉ែត្រក្នុងមួយម៉ោង។ ជាមួយគ្នានេះ សម្តេចក៏គាំទ្រគំរោងសាងសង់កំពង់ផែទឹកជ្រៅ នៅខេត្តព្រះសីហនុ ដែលអនុញ្ញាត្តឲ្យកប៉ាល់ធំៗ អាចចូលចតបាននាពេលខាងមុខផងដែរ។

ការណែនាំបែបនេះ ធ្វើឡើងក្នុងឱកាសដែល សម្តេចធិបតី ហ៊ុន ម៉ាណែត អញ្ជើញជួបសំណេះសំណាល ជាមួយកម្មករ-និយោជិតប្រមាណ១៥,១៩៤នាក់។ កិច្ចសំណេះសំណាលនេះ ធ្វើឡើងនៅតំបន់សេដ្ឋកិច្ចពិសេស ខេមបូឌា ចេជាង ហ្គ័រជី អេសអ៉ីហ្សេត ស្ថិតក្នុងស្រុកព្រៃនប់ ខេត្តព្រះសីហនុ។ សម្ដេចធិបតី ហ៊ុន ម៉ាណែត បានបញ្ជាក់ថា “រឿងផ្លូវដែកដឹកទំនិញ ឥលូវផ្លូវដែករបស់យើង នាពេលបច្ចុប្បន្ន បើកបានត្រឹម៥០គីឡូម៉ែត្រក្នុងមួយម៉ោង ឥលូវយើងធ្វើយ៉ាងម្ដេចឲ្យ អាចរត់បានល្បឿ​ន៨០គីឡូម៉ែត្រក្នុងមួយម៉ោង ដឹកទំនិញបានមួយចំនួន។

បន្ថែមពីនោះទៀត សម្ដេចធិបតី ហ៊ុន ម៉ាណែត បានគូសបញ្ជាក់ថា សម្ដេចនឹងឲ្យសិក្សា អំពីការកាត់បន្ថយតម្លៃ ដឹកជញ្ជូនតាមផ្លូវ ហើយបើសិនជាផ្លូវដែកនេះ ធ្វើរួចរាល់ យើងនឹងដឹកទំនិញបានច្រើន។សម្ដេចធិបតី ហ៊ុន ម៉ាណែត បានឲ្យដឹងថា ឡានមួយដឹកបានតែមួយទូ ប៉ុន្ដែមួយរទះភ្លើងដឹកបានទូច្រើន ដែលមានប្រវែងពី១គីឡូ ទៅ២គីឡូដី ដែលនេះជាយុទ្ធសាស្ដ្រ ក្នុងការបង្កើនការដឹកទំនិញ ដើម្បីជំរុញកំណើនសេដ្ឋកិច្ច។លើសពីនោះទៀត សម្ដេចធិបតី ហ៊ុន ម៉ាណែន បានបញ្ជាក់ថា រាជរដ្ឋាភិបាល នឹងបន្ដធ្វើហេដ្ឋារចនាសម្ព័ន្ធ ព្រោះថាហេដ្ឋារចនាសម្ព័ន្ធ វាជួយនៅក្នុងការកាត់បន្ថយ តម្លៃដឹកជញ្ជូន និងជួយឲ្យសេដ្ឋកិច្ច មានការកើនឡើងផងដែរ។

ជាមួយគ្នានេះ សម្តេចធិបតី ហ៊ុន ម៉ាណែត ក៏បានថ្លែងការសាទរ និងរីករាយចំពោះការចាប់ផ្តើម ដំណើរការការដ្ឋានសាងសង់កំពង់ផែទឹកជ្រៅខេត្តព្រះសីហនុ ដំណាក់កាលទី១ មុនដាច់ឆ្នាំ២០២៣។ ការពង្រីកកំពង់ផែទឹកជ្រៅនេះ គឺជាចំណតកប៉ាល់ធំ ផ្តល់ភាពងាយស្រួលក្នុងការដឹកជញ្ជូន និងកាត់បន្ថយការដឹកជញ្ជូន ឱ្យមានតម្លៃទាបនាពេលអនាគត។

សម្តេចធិបតីបានបញ្ជាក់ថា ខេត្តព្រះសីហនុ ជាមួយខេត្តជាប់មាត់សមុទ្រ មានសក្តានុពល ក្នុងការអភិវឌ្ឍកំពង់ផែទឹកជ្រៅ ហើយក៏ជាផែមួយដ៏សំខាន់របស់កម្ពុជា តាមពីមុនសម័យសង្គ្រាម។ ដូច្នេះហើយរាជរដ្ឋាភិបាលកម្ពុជា នឹងខិតខំអភិវឌ្ឍកំពង់ផែខេត្តព្រះសីហនុនេះឱ្យកាន់តែមានភារីចម្រើនបន្ថែមទៀត។

សម្តេចធិបតីបន្តថា កំពង់ផែព្រះសីហនុ មានការចរាចរណ៍កុងតឺន័រ ខណៈដែលការគ្រោងទុក នឹងមានកុងតឺន័រតែ៥៥ម៉ឺននោះទេ ក្នុងមួយឆ្នាំ ប៉ុន្តែ ប៉ុន្មានឆ្នាំនេះមានកុងតឺន័រ ចល័តជាង៧៥ម៉ឺនកុងតឺន័រ។ ដូច្នេះ ដើម្បីបំពេញសេចក្តីត្រូវការ រាជរដ្ឋាភិបាលពង្រីកកំពង់ផែនេះឱ្យមានទំហំធំ និងជ្រៅជាងមុន។

សម្តេចធិបតី ហ៊ុន ម៉ាណែត បានបញ្ជាក់ថា “កន្លងទៅយើងបានធ្វើច្រើន អីឡូវយើងកំពុងតែកែប្រែកន្លែងកុងតឺន័រ ដើម្បីចូលកប៉ាល់​បប៉ុន្តែអ្វីដែលសំខាន់ យើងបានធ្វើការជាមួយជប៉ុន ដើម្បីយកមកវិនិយោគពង្រីកផែទឹកជ្រៅរបស់យើង ដំណាក់កាលទី១ ខ្ញុំសង្ឃឹមថានឹងបានបុកគ្រឹះមុនដាច់ឆ្នាំ២០០២៣”។

សម្តេចធិបតី ហ៊ុន ម៉ាណែត បានបន្ថែមថា ទេសរដ្ឋមន្ត្រី ស៊ុន ចាន់ថុល បានជួបពិភាក្សាជាមួយប្រធានJICA ដើម្បីជំរុញការចរចាបញ្ចប់ការទម្លាក់ថវិកា សម្រាប់បុកគ្រឹះជំហានទី១ ក្នុងការពង្រីកផែទឹកជ្រៅខេត្តព្រះសីហនុ ឱ្យបានមុនដំណាច់ឆ្នាំ២០២៣ ដែលជាឆ្នាំដ៏សំខាន់សម្រាប់កម្ពុជា និងជប៉ុន គឺខួបអនុស្សាវរីយ៧០ឆ្នាំ នៃការបង្កើតចំណងទំនាក់ទំនងការទូតរវាងប្រទេសទាំងពីរ។សម្តេចធិបតីបន្តថា កម្ពុជា និងជប៉ុន នឹងរួមគ្នាធ្វើ ដើម្បីពង្រីកកំពង់ផែទឹកជ្រៅ នៅខេត្តព្រះសីហនុនេះ ឱ្យមានលេចចេញជារូបរាងឡើង។ ខណៈកំពង់ផែខេត្តព្រះសីហនុ បច្ចុប្បន្ននេះ អាចឱ្យកុងតឺន័រដឹកទំនិញចូលចតបានតែ៩.៥០ម៉ែត្រ។ ដូច្នេះកំពង់ផែខេត្តព្រះសីហនុ ទទួលទំនិញបានតែជាង១៨ភាគរយនៃទំនិញប៉ុណ្ណោះ។

សម្តេចធិបតី ហ៊ុន ម៉ាណែត ក៏បានប្រកាសដាក់ចេញមហិច្ឆតាប្រែក្លាយកំពង់ផែព្រះសីហនុ ជាកន្លែងផ្ទេរទំនិញ។ ប្រសិនបើការពង្រីកកំពង់ផែទឹកជ្រៅ ដំណាក់កាលទី១នេះ ទទួលបានជោគជ័យនោះកំពង់ផែទឹកជ្រៅនេះ អាចមានលទ្ធភាពទទួលកុងតឺន័រដឹកទំនិញប្រមាណ៩៣ភាគរយ វានឹងកាត់បបន្ថយតម្លៃការការដឹកជញ្ជូន តាមផ្លូវទឹក ដែលពីមានតម្លៃចន្លោះ៤០០ ឬ៥០០ដុល្លារ មកត្រឹម២០០ដុល្លារ ក្នុងមួយកុងតឺន័រ។

បន្ថែមពីនេះ សម្តេចធិបតី នាយករដ្ឋមន្ត្រីនៃកម្ពុជា បានគូសបញ្ជាក់ថា ប្រសិនបើថ្ងៃអនាគតកម្ពុជា អាចពង្រីកកំពង់ទឹកជ្រៅជំហា​នទី២ ឬជំហានទី៣នោះ នៅថ្ងៃអនាគតកំពង់ផែ នឹងអាចទទួលបានកុងតឺន័រកាន់តែច្រើន ដែលដឹកទំនិញឆ្លងកាត់ ដែលវានឹងផ្តល់ឱកាសការងារកាន់តែច្រើនឡើងដល់ប្រជាពលរដ្ឋ ជាពិសេសជំរុញកំណើនសេដ្ឋកិច្ចជាតិ។

សម្តេចធិបតី ហ៊ុន ម៉ាណែត បានអះអាងថា “ការពង្រីកកំពង់ផែទឹកជ្រៅនៅខេត្តព្រះសីហនុ គឺត្រូវតែបន្តទៅមុនជានិច្ច ព្រោះវាជាគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា”។ គម្រោងអភិវឌ្ឍន៍កំពង់ផែទឹកជ្រៅនេះ អាចជាចំណតកប៉ាល់ធំ ផ្តល់ភាពងាយស្រួលក្នុងការដឹកជញ្ជូន និងកាត់បន្ថយការដឹកជញ្ជូនឱ្យមានតម្លៃទាបនាពេលអនាគតផងដែរ។

ចំណតកំពង់ផែស្វយ័តក្រុងព្រះសីហនុ ក្នុងជំហានទី១ ដែលមានប្រវែង៣៥០ម៉ែត្រ និងជម្រៅទឹក១៤.៥ម៉ែត្រ ដោយទទួលបានប្រាក់កម្ចីជាង ២០០លានដុល្លារពីជប៉ុន នឹងចាប់ផ្តើមដំណើរការសាងសង់នៅឆ្នាំ២០២២ និងបញ្ចប់ការសាង់សង់នៅដើមឆ្នាំ២០២៥ ខណៈបច្ចុប្បន្ននេះ សម្រេចបានការគូសប្លង់រួចរាល់ហើយ និងកំពុងដំណើរការដេញថ្លៃ។

នៅពេលដែលកំពង់ផែទឹកជ្រៅនេះ សាងសង់រួចរាល់នៅឆ្នាំ២០២៥ នឹងអាចអនុញ្ញាតឲ្យកប៉ាល់ដែលសមត្ថភាពផ្ទុក កុងតឺន័ររហូតដល់ជាង ៤ពាន់កុងតឺន័រ អាចចូលចតដែលពេលនោះកប៉ាល់ប្រមាណ៩៣% នៃកប៉ាល់ក្នុងតំបន់អាស៉ី ចូលចតនៅកម្ពុជាបាន ដែលនឹងធ្វើឱ្យតម្លៃដឹកជញ្ជូនទាបជាងមុន ដែលតាមការប៉ាន់ស្មានតម្លៃដឹកជញ្ជូន អាចចុះជាង ២០០ដុល្លារក្នុងមួយកុងតឺន័រ៕

ដោយៈ តែម សុខុម

ញូវដេលីៈ ផ្សារទំនើបប្រណីតដំបូងគេបង្អស់ សម្រាប់សេដ្ឋីៗក្នុងទីក្រុង Mumbai ប្រទេសឥណ្ឌា ត្រូវបានសម្ពោធជាផ្លូវការយ៉ាងឱឡារិកកាលពីពេលថ្មីៗនេះ។

តារាកម្រិតAស្ទើរតែទាំងអស់ នៃផលិតកម្មភាពយន្តBollywood ដែលគ្រងសម្លៀកបំពាក់ស្រស់ឆើតឆាយ បានចូលរួមយ៉ាងច្រើនកុះ​ករ ក្នុងពិធីសម្ពោធក្រាលកម្រាលព្រំក្រហម រួមជាមួយជាងថតរូបជាច្រើនដែលស្រដៀង នឹងព្រឹត្តិការណ៍ប្រចាំឆ្នាំ Met Gala ក្នុងទីក្រុងញូវយ៉ក សហរដ្ឋអាមេរិក។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃច័ន្ទ​ ទី៦ ខែវិច្ឆិកា។ម៉ាកយីហោ (Brand) ទំនិញប្រើប្រាស់ប្រណីតៗលំដាប់ពិភពលោកចំនួន៦៦ រួមមាន ទាំងម៉ាកយីហោ Balenciaga, Saint Laurent, Versace និង Tiffany & Co ផងនោះបានបង្កើតហាងរបស់ខ្លួនក្នុងផ្សារទំនើបដ៏ប្រណីត ដែលមានសេវាកម្មជាកញ្ចប់ Jio World Plaza នៅក្នុងទីក្រុងមានបំផុតរបស់ឥណ្ឌា Mumbai ដែលមានសេដ្ឋីលានដុល្លារ (Millionaire) ចំនួន៥៩.០០០នាក់ និងសេដ្ឋីពាន់លានដុល្លារ (Billionaire) ចំនួន១៦៩នាក់។

ស្របពេលកំណើនសេដ្ឋកិច្ច របស់មហាយក្សចិនថមថយ ម៉ាកយីហោទំនិញប្រណីតៗរបស់ពិភពលោក បានកំណត់ចក្ខុវិស័យជាមួយនឹងគោលបំណង ចូលប្រឡូកក្នុងទីផ្សារប្រទេសឥណ្ឌា ដែលត្រូវបានរំពឹងថា នឹងសម្រេចបានកំណើតសេដ្ឋកិច្ចប្រមាណ៧% ក្នុងមួយឆ្នាំ និងជាសេដ្ឋកិច្ចធំបំផុតទី៥ របស់ពិភពលោក។របាយការណ៍ទ្រព្យសម្បត្តិចេញផ្សាយ ដោយទីភ្នាក់ងារអចលនទ្រព្យ Knight Frank កាលពីឆ្នាំមុនបានដាក់ចំណាត់ថ្នាក់ ប្រទេសឥណ្ឌាឱ្យជាប់លេខ៣ក្នុងពិភពលោក សម្រាប់ចំនួនមហាសេដ្ឋីរបស់ខ្លួន បន្ទាប់ពីសហរដ្ឋអាមេរិក និងប្រទេសចិន៕ South China Morning Post ៕