ដោយ: គង់ លាងហួរ
ហាណូយ: វិស័យអចលនទ្រព្យលំនៅដ្ឋាន និងការិយាល័យសម្រាប់ក្រុម Digital nomads ក្លាយជាផ្នែកមួយដ៏មានសក្តានុពលសម្រាប់ទីផ្សារអចលនទ្រព្យវៀតណាម ដែលវាផ្តល់ឱកាសសម្រាប់អ្នកអភិវឌ្ឍន៍ដើម្បីទាញយកផលចំណេញ។

យោងតាមក្រុមហ៊ុនសេវាកម្មអចលនទ្រព្យ Savills បានឱ្យដឹងថា កត្តាជាច្រើនកំពុងធ្វើឱ្យប្រទេសវៀតណាមក្លាយជាគោលដៅដ៏ទាក់ទាញសម្រាប់ក្រុម Digital nomads ដូចជាការអភិវឌ្ឍបច្ចេកវិទ្យាព័ត៌មាន និងអុីនធឺណិត ដែលផ្តល់លក្ខខណ្ឌអំណោយផលសម្រាប់ការធ្វើការងារពីចម្ងាយ។លើសពីនេះ ថ្លៃចំណាយលើការរស់នៅសមរម្យ បរិយាកាសអាជីវកម្មល្អប្រសើរ រួមជាមួយ លក្ខខណ្ឌអំណោយផលសម្រាប់ក្រុមហ៊ុនទើបចាប់ផ្តើមអាជីវកម្ម និងក្រុមហ៊ុនបច្ចេកវិទ្យា ទេសភាពដ៏ស្រស់ស្អាត និងវប្បធម៌ចម្រុះ គឺជាកត្តាសំខាន់ៗ ដែលទាក់ទាញក្រុម Digital nomads មកកាន់ប្រទេសវៀតណាម។

ជាក់ស្តែង កាលពីដើមឆ្នាំ២០២២កន្លងទៅ ទស្សនាវដ្តីកាណាដា The Travel ធ្លាប់បានផ្តល់ចំណាត់ថ្នាក់ទី៨ ដល់ប្រទេសវៀតណាម ក្នុងបញ្ជីគោលដៅកំពូលទាំង១០របស់ពិភពលោកសម្រាប់ក្រុម Digital nomads។ចំណែក នៅដើមឆ្នាំនេះ គេហទំព័រសហគមន៍ Digital Nomads បានចាត់ចំណាត់ថ្នាក់ទីក្រុងហូជីមិញជាទីក្រុងមួយ ក្នុងចំណោមទីក្រុងកំពូលទាំង១០របស់ពិភពលោកសម្រាប់អ្នកចូលចិត្តធ្វើការពីចម្ងាយ ដោយសារថ្លៃចំណាយនៃការរស់នៅមានភាពសមរម្យ។

ថ្លៃចំណាយលើការរស់នៅក្នុងប្រទេសវៀតណាម មានតម្លៃថោកបំផុតបើធៀបនឹងប្រទេសដទៃទៀតក្នុងតំបន់អាស៊ីអាគ្នេយ៍ដោយជាប់ចំណាត់ថ្នាក់ទី១៣៨ក្នុងចំណោមបណ្តាប្រទេសចំនួន១៩៧នៅលើពិភពលោក។ ក្រុម Digital Nomads គឺជាឃ្លាដែលសំដៅលើមនុស្សវ័យក្មេង ដែលជីវិតរបស់ពួកគេត្រូវបានផ្សារភ្ជាប់ជាមួយនឹងការធ្វើដំណើរ ចូលចិត្តបទពិសោធន៍ ស្វែងយល់ពីវប្បធម៌ថ្មីៗ និងផ្សារភ្ជាប់ទៅនឹងឧបករណ៍បច្ចេកវិទ្យា៕

ក្រុមប្រឹក្សាអភិវឌ្ឍន៍កម្ពុជា៖ នាព្រឹកថ្ងៃពុធ ១០រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៨ ខែវិច្ឆិកា ឆ្នាំ២០២៣ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យក្រុមហ៊ុន Evercore ដឹកនាំដោយលោក Keith Magnus ជាប្រធានក្រុមហ៊ុន ចូលជួបសម្ដែងការគួរសម និងពិភាក្សាការងារ។

តាមរយៈជំនួបនេះ លោកប្រធានក្រុមហ៊ុនបានសម្ដែងការអបអរសាទរជូនឯកឧត្តមឧបនាយករដ្ឋមន្ត្រី និងពិសេសសម្រាប់រាជរដ្ឋាភិបាលកម្ពុជានីតិកាលទី៧ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវផែនការអភិវឌ្ឍន៍ថ្មីៗជាច្រើនដែលទាំងនេះបង្ហាញឱ្យឃើញពីចក្ខុវិស័យវែងឆ្ងាយលើភាពរីកចម្រើនរបស់កម្ពុជា ដែលជាសញ្ញាណវិជ្ជមានសម្រាប់រដ្ឋាភិបាលថ្មីនេះ។ជាមួយគ្នានេះ ឯកឧត្តមឧបនាយករដ្ឋមន្ត្រី បានផ្ដល់ការស្វាគមន៍យ៉ាងកក់ក្ដៅជូនចំពោះក្រុមហ៊ុន និងបានថ្លែងអំណរគុណលើការផ្ដល់ទំនុកចិត្តខ្ពស់មកកាន់រាជរដ្ឋាភិបាលកម្ពុជាក្នុងនីតិកាលថ្មីនេះ។ ជាការសង្កត់ធ្ងន់នៅក្នុងជំនួបនេះ ឯកឧត្តមឧបនាយករដ្ឋមន្ត្រី បានបង្ហាញអំពីចក្ខុវិស័យរបស់រាជរដ្ឋាភិបាល ដែលចង់ប្រែក្លាយកម្ពុជាពីឧស្សាហកម្មប្រើកម្លាំងពលកម្មទៅជាឧស្សាហកម្មជំនាញតាមរយៈការបង្កើនធនធានមនុស្ស ការរៀបចំឱ្យមានតំបន់ឧស្សាហកម្មបច្ចេកវិទ្យាកម្រិតខ្ពស់ ការកសាងហេដ្ឋារចនាសម្ព័ន្ធតភ្ជាប់ពាសពេញផ្ទៃប្រទេសសម្រាប់បម្រើឱ្យការដឹកជញ្ជូន និងពិសេសសម្រាប់នីតិកាលថ្មីនេះបានបន្តយកចិត្តទុកដាក់លើការបង្កើតច្រករបៀងត្រី និងស្រូវ និងការរៀបចំគម្រូថ្មីៗជម្រុញវិស័យទេសចរណ៍កម្ពុជា។
ឯកឧត្តមឧបនាយករដ្ឋមន្ត្រី ក៏បានបង្ហាញជំហររបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ក្នុងការទទួលស្វាគមន័៍រាល់កិច្ចការងារវិនិយោគ និងកិច្ចសហប្រតិបត្តិការលើគ្រប់វិស័យ និងពិសេសចំពោះកិច្ចការងាររៀបចំឱ្យមានតំបន់ឧស្សាហកម្មនៅកម្ពុជា ក្រុមប្រឹក្សាអភិវឌ្ឍន៍កម្ពុជាបានត្រៀមខ្លួនរួចរាល់ក្នុងការសម្របសម្រួល ឱ្យកិច្ចការងាររៀបចំនេះអាចអនុវត្តទៅបានដោយរលូន ដើម្បីជាប្រយោជន៍សម្រាប់ប្រជាពលរដ្ឋកម្ពុជាទាំងមូល។

បន្ថែមក្នុងឱកាសនេះ លោកប្រធានក្រុមហ៊ុនក៏បានជម្រាបជូនឯកឧត្តមឧបនាយករដ្ឋមន្ត្រីផងដែរអំពីសេវាកម្មនានា និងសកម្មភាពការងាររបស់ក្រុមហ៊ុន Evercore ដែលធ្លាប់បានអនុវត្តជោគជ័យនាពេលកន្លងមក ពិសេសនៅក្នុងប្រទេសសិង្ហបុរី។ និងដោយមានការគាំទ្រពីរាជរដ្ឋាភិបាលកម្ពុជា ក្រុមហ៊ុននឹងពិនិត្យលទ្ធភាពលើការរៀបចំឱ្យមានកិច្ចសហប្រតិបត្តិការរួមគ្នាដើម្បីពង្រីកវិស័យឧស្សាហកម្ម ទេសចរណ៍ និងវិស័យពាក់ព័ន្ធផ្សេងទៀត ឱ្យកាន់តែរីកចម្រើនឡើងបន្ថែមទៀត៕

ដោយ: គង់ លាងហួរ

អន្តរជាតិ: យោងតាមនាយករដ្ឋមន្ត្រីម៉ាឡេស៊ី លោក Anwar Ibrahim បានឱ្យដឹងថា ការចំណាយលើការអភិវឌ្ឍជាក់ស្តែងរបស់ប្រទេសម៉ាឡេស៊ី កំពុងធ្លាក់ចុះជារៀងរាល់ឆ្នាំ ទោះបីជាការបែងចែកនៅក្រោមថវិកាជាតិប្រចាំឆ្នាំ មានការកើនឡើងយ៉ាងណាក្តី។

តួយ៉ាង ទឹកប្រាក់ចំនួន៩០ពាន់លានរីងហ្គីត ត្រូវបានបែងចែកសម្រាប់ការចំណាយអភិវឌ្ឍជាក់ស្តែង នៅក្នុងថវិកាជាតិឆ្នាំ២០២៤ ពោលគឺធ្លាក់ចុះ បើប្រៀបធៀបទៅនឹង៩៧ពាន់លានរីងហ្គីត នៅក្នុងថវិកាជាតិឆ្នាំ២០២៣។

លោក Anwar ដែលកាន់តំណែងជារដ្ឋមន្ត្រីហិរញ្ញវត្ថុផងដែរនោះបានអះអាងថា ការរកឃើញនេះ ត្រូវបានធ្វើឡើងនៅក្នុងកិច្ចប្រជុំក្រុមប្រឹក្សា សកម្មភាពសេដ្ឋកិច្ចជាតិ ដោយលោកបន្ថែមថា ការថយចុះ នៃការចំណាយលើការអភិវឌ្ឍជាក់ស្តែង អាចជះឥទ្ធិពលរយៈពេលវែង ដល់កំណើនសេដ្ឋកិច្ចរបស់ប្រទេសម៉ាឡេស៊ី។លើសពីនេះ លោក Anwar បានបញ្ជាក់ថា ការអនុវត្តគម្រោងអភិវឌ្ឍន៍ដែលមានបញ្ហា និងប្រឈមមុខនឹងការពន្យារពេល បានបណ្តាលឱ្យថ្លៃចំណាយមានការកើនឡើង និងជះឥទ្ធិពលអវិជ្ជមានដល់កំណើនសេដ្ឋកិច្ច។

ជាការឆ្លើយតប នាយករដ្ឋមន្ត្រីម៉ាឡេស៊ីរូបនេះ Anwar បានលើកឡើងថា រដ្ឋាភិបាលនឹងចាត់វិធានការគោ ​លនយោបាយជាបន្ទាន់មួយចំនួន ដើម្បីកែលម្អការអនុវត្តគម្រោង និងជំរុញការចំណា​យលើការអភិវឌ្ឍជាក់ស្តែង។

ថ្លែងអំពីប្រាក់រីងហ្គីត លោក Anwar បានអះអាងថា “ការធ្លាក់ថ្លៃនៃរូបិយប័ណ្ណក្នុងស្រុក ដែលបណ្តាលមកពីការរំពឹងទុកថា អត្រាការប្រាក់របស់សហរដ្ឋអាមេរិក នឹងនៅតែមានកម្រិតខ្ពស់ ក្នុងរយៈពេលយូរ ក៏ដូចជាកត្តាភូមិសាស្ត្រនយោបាយ មិនត្រូវបានគេរំពឹងថា នឹងជះផលប៉ះពាល់ ដល់កំណើនសេដ្ឋកិច្ចម៉ាឡេស៊ីនោះទេ។

លោកបានកត់សម្គាល់ថា ធនាគារកណ្តាលម៉ាឡេស៊ី (Bank Negara Malaysia) ប្តេជ្ញាចិត្តក្នុងការទប់ស្កាត់ ការប្រែប្រួលហួសហេតុ ដើម្បីធានាថាទីផ្សារប្តូរប្រាក់រីងហ្គីត នៅតែមានសណ្តាប់ធ្នាប់៕

ដោយៈ តែម សុខុម

ជប៉ុនៈ គម្រោងសណ្ឋាគារ និងរីហ្សតលំដាប់ផ្កាយ៥ ដំបូងបង្អស់ប្រចាំតំបន់Sanin នៃប្រទេសជប៉ុន គ្រោងសាងសង់នៅឆ្នាំក្រោយ។

ក្រុមអ្នកធ្វើផែនការគម្រោងនេះនិយាយថា សណ្ឋាគារ និងរីហ្ស​តនេះនឹងត្រូវសាងសង់ជិត Tottori Sand Dunes ដែលជាភ្នំខ្សាច់ជាប់សមុទ្រធំបំផុតប្រចាំប្រទេសជប៉ុន ដោយភ្ញៀវអាចគយគន់ទេស​ភាពសមុទ្រជប៉ុនពីគ្រប់បន្ទប់គេង។ នេះបើយោងតាមសារព័ត៌មាន Asa​hi Shimbun ចុះផ្សាយកាលពីថ្ងៃច័ន្ទ ទី៦ ខែវិច្ឆិកា។

ក្រុមហ៊ុនសណ្ឋាគារអាមេរិកលំដាប់ប្រណីត Marriott International Inc រដ្ឋបាលក្រុង Tottori និងក្រុមអ្នកអភិវឌ្ឍន៍បានឈានដល់កិច្ចព្រមព្រៀង សាងសង់សណ្ឋាគារប្រណីតនេះ នៅជិតភ្នំខ្សាច់ជាប់សមុទ្រ Tottori Sand Dunes។ភ្នំខ្សាច់ជាប់សមុទ្រTottori Sand Dunes មានទទឹង២,៤គីឡូម៉ែត្រ និងមានប្រវែង១៤គីឡូម៉ែត្រ។ក្រុមហ៊ុន Marriott និងក្រុមហ៊ុន dhp Urban Development នៅអូសាកា (Osaka) ដែលដឹកនាំក្រុមអ្នកអភិវឌ្ឍន៍និយាយថា សណ្ឋាគារ និងរីហ្សតលំដាប់ផ្កាយ៥ ដែលមានកម្ពស់៤ជាន់នេះ នឹងមានបន្ទប់គេងចន្លោះពីរ១០០ទៅ១១០បន្ទប់។

នៅពេលសាងសង់បញ្ចប់ជាស្ថាពរ បន្ទប់សណ្ឋាគារនេះនឹងមានតម្លៃចាប់ពី៣៩៦ដុល្លារ ទៅ៦៦៨ដុល្លារក្នុងមួយយប់។តាមការប៉ាន់ប្រមាណ ការសាងសង់សណ្ឋាគារនេះគ្រោងចំណាយអស់ប្រមាណ១០០លានដុល្លារ ហើយប្រជាជនក្នុងមូលដ្ឋានប្រមាណ១៨០នាក់ រំពឹងទទួលបានឱកាសធ្វើការ ជាបុគ្គលិកនៅសណ្ឋាគារនេះ។

សណ្ឋាគារ និងរីហ្សតផ្កាយ៥ ដែលមិនទាន់មានឈ្មោះដាក់នៅឡើយនេះ នឹងធ្វើប្រតិបត្តិការក្រោមក្រុមហ៊ុន Luxury Collection ដែលជាបុត្រសម្ព័ន្ធរបស់ក្រុមហ៊ុន Marriott៕ Asahi Shimbun៕

ដោយ: គង់ លាងហួរ

បាងកក: លោក Korn Narongdej នាយកប្រតិបត្តិនៃក្រុមហ៊ុនអភិវឌ្ឍន៍អចលនទ្រព្យប្រណីត Raimon Land បានមានប្រសាសន៍ឱ្យដឹងថា វិស័យអចលនទ្រព្យលំដាប់ប្រណីតបំផុត ឬលំដាប់អភិជន របស់ប្រទេសថៃ នឹងបន្តរីកចម្រើន ក្នុងពេលអនាគតដ៏ខ្លីខាងមុខនេះ។

លោក Korn បានបន្តថា ទោះបីជាជួបបញ្ហាប្រឈមមួយចំនួន ដូចជាបញ្ហាអតិផរណា ការកើនឡើងថ្លៃចំណាយលើការរស់នៅ ការថយចុះនៃសេដ្ឋកិច្ច និងភាពមិនប្រាកដប្រជា នៃភូមិសាស្ត្រនយោបា យយ៉ាងណាក្តី ប៉ុន្តែជាធម្មតា សង្គមពួកអ្នកមាន ឬអភិជន មិនបានរងផលប៉ះពាល់នោះទេ ហើយពួកគេនៅតែបន្តការចំណាយ ក្នុងកម្រិតធម្មតា ឬលើសពីធម្មតាទៅទៀត។លោក​បាន​បន្ថែម​ថា​ “នៅពេល​ដែលសម្រេចចិត្ត​ទិញ​ផលិតផល​ប្រណីត ក្រុមអតិថិជន​ ដែលជាអ្នកមាន​ទ្រព្យស្តុកស្តម្ភ អាច​ធ្វើ​ការសម្រេចចិត្ត​ ដោយ​មិន​ស្ទាក់ស្ទើរ ជាមួយ​នឹងលក្ខខណ្ឌ​ណាមួយ​ឡើយ​”។

លោក Korn Narongdej ក៏បានវាយតម្លៃផងដែរថា កំណើននៃវិស័យអចលនទ្រព្យ លំដាប់ខ្ពស់ប្រណីតនេះ បណ្តាលមកពីជនបរទេស ដែលកំពុងស្វែងរកផ្ទះទី២របស់ពួកគេនៅក្នុងប្រទេសថៃ។លោកបានអះអាងថា លក្ខណៈសម្បត្តិរបស់ប្រទេសថៃ ដូចជាប្រជាជនរួសរាយរាក់ទាក់ ការអត់ឱនខាងសាសនា ម្ហូបឆ្ងាញ់ពិសារ និងវប្បធម៌ដ៏សម្បូរបែប បានធ្វើឱ្យប្រទេសនេះ ក្លាយជាគោលដៅដ៏ទាក់ទាញសម្រាប់អ្នកវិនិយោគ ដែលមានទ្រព្យសម្បត្តិមហាសាល។

ចំពោះ​ គម្រោង​ខុនដូ​ប្រណីត​ថ្មី ចុងក្រោយ​បង្អស់ដែលមានឈ្មោះថា “Tait Sathorn 12”របស់ក្រុមហ៊ុន Raimon Land  លោក Korn បាន​គូសបញ្ជាក់ថា​ ជាង៤០%នៃ​យូនីត​សរុប ក្នុងគម្រោងនេះ ត្រូវ​បាន​ទិញយកដោយក្រុមជនបរទេស​។ជនបរទេសដែលទិញខុនដូច្រើនជាងគេ នៅក្នុងគម្រោង Tait Sathorn 12 រួមមាន ដូចជា ជនជាតិចិន សិង្ហបុរី តៃវ៉ាន់ និងអូស្ត្រាលី ខណៈជនបរទេសភាគច្រើន ទិញខុនដូទាំងនេះសម្រាប់ការប្រើប្រា ស់ផ្ទាល់ខ្លួន ហើយជនបរទេសមួយចំនួនទៀត ទិញខុនដូសម្រាប់ការវិនិយោគ៕

ដោយៈ គង់ ហ្វីអូណា

        កំពតៈ ខេត្តកំពត ជាខេត្តមួយក្នុងចំណោមខេត្តទាំងបួន ដែលជាប់នឹងតំបន់ឆ្នេរ ខេត្តមួយនេះសម្បូរទៅដោយព្រែកជាច្រើន ដែលអាចកែច្នៃ ទៅជាតំបន់ទេសចរណ៍ធម្មជាតិទាក់ទាញបំផុត។

ផែនការនេះធ្វើឡើងក្នុងន័យ ដើម្បីពង្រីកបន្ថែមតំបន់ទេសច​រណ៍ និងទាក់ទាញភ្ញៀវទេសចរ អាជ្ញាធរខេត្តគ្រោងនឹងអភិរក្សនូវរុក្ខជាតិសមុទ្រ ក៏ដូចជាកែច្នៃព្រែកទាំងអស់ ឱ្យទៅជាតំបន់ទេចរណ៍ធម្មជាតិ បន្ថែមពីលើតំបន់ទេសចរណ៍ធម្មជាតិដែលមានបច្ចុប្បន្ន។អភិបាលនៃគណៈអភិបាលខេត្តកំពត លោក ម៉ៅ ធនិនបានថ្លែងក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នាព្រឹកថ្ងៃទី៧ ខែវិច្ឆិកា ឆ្នាំ២០២៣ បានលើកឡើងថា ខេត្តកំពតសម្បូរទៅដោយតំបន់ទេសចរណ៍ដ៏គួឱ្យទាក់ទាញ។ វិស័យទេសចរណ៍ជាឧស្សាហកម្មគ្មានផ្សែង និងជាប្រភពចំណូលមិនចេះរីងស្ងួត។ ដូច្នេះត្រូវតែមានគំនិតក្នុងការកែច្នៃនូវទីតាំងនានា ដែលអំណោយផលដល់វិស័យនេះ ពិសេ​សព្រែកនៅក្នុងខេត្តទាំងអស់។លោកបានបញ្ជាក់ថា “រដ្ឋបាលខេត្តគ្រោងនឹងសិក្សា ពិនិត្យលើព្រែកទាំង១៣ ដែលមាននៅក្នុងខេត្ត ដើម្បីកែច្នៃធ្វើយ៉ាងណាឱ្យក្លាយទៅជាតំបន់ទេសចរណ៍បែបធម្មជាតិ ហើយក្នុងនោះការអភិរក្សនូវរុក្ខជាតិសមុទ្រ កុំឱ្យបាត់បង់ជាការចាំបាច់”។ លោកបន្តថា “ចំណីព្រែកដែលជាដីសាធារណៈរបស់រដ្ឋ មិនត្រូវឱ្យបាត់បង់ ហើយដីចំណីព្រែកទាំងអស់ នឹងត្រូវយកមកបម្រើផលប្រយោជន៍សាធារណៈ និងសម្រាប់ពង្រីកជាតំបន់ ទេសចរណ៍នៅលើព្រែកទាំងនោះ”។

បច្ចុប្បន្នខេត្តកំពត មានការកើនឡើងនូវតំបន់លម្ហែរ សម្រាប់ទទួលភ្ញៀវទេសចររហូតដល់៣៦កន្លែង។ មណ្ឌលកម្សាន្តទាំងនោះ រួមមាន រមណីយដ្ឋានវប្បធម៌ប្រវត្តិសាស្ត្រ រមណីយដ្ឋានធម្មជាតិ រមណីយដ្ឋានកែច្នៃ សហគមន៍ទេសចរណ៍ ព្រមទាំងគោលដៅទេសចរណ៍ដ៏ទាក់ទាញ ក៏ដូចជាទីតាំងបោះតង់ សម្រាប់បម្រើភ្ញៀវជាតិ និងអន្តរជាតិទៀតផង៕

ដោយៈ គង់ សូរិយា

        ភ្នំពេញៈ អបអរសាទរខួប១ឆ្នាំ នៃការបើកឱ្យប្រើប្រាស់ជាផ្លូវការផ្លូវល្បឿនលឿនភ្នំពេញ -ក្រុងព្រះសីហនុ ជាមួយនឹងការបន្តបញ្ចុះតម្លៃ២០% (រក្សាតម្លៃដដែល) សម្រាប់រយៈពេល១ឆ្នាំទៀត លើការប្រើប្រាស់គន្លងETC និងគន្លង ANPR និងសម្រាប់រយៈពេល ៦ខែ ចំពោះការទូទាត់ជាសាច់ប្រាក់សុទ្ធ (MTC)។

លោកឧបនាយករដ្ឋមន្រ្តីស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពង់សម្ដេចមហាបវរធិបតីនាយករដ្ឋមន្ត្រី បានចូលរួមក្នុងពិធីអបអរសាទរខួប១ឆ្នាំ នៃការបើកឱ្យប្រើប្រាស់ជាផ្លូវការផ្លូវល្បឿនលឿនភ្នំពេញ -ក្រុងព្រះសីហនុ ដោយក្នុងពិធីនេះក៏មានការចូលរួម ពីលោកវ៉ាង វ៉ិនធាន ឯកអគ្គរាជទូតចិនប្រជាកម្ពុជា លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន លោក ចាវ យ៉ុង (Zhou Yong) នាយកសាខាក្រុមហ៊ុនសាជីវកម្មស្ពាន និងថ្នល់ចិនប្រចាំកម្ពុជា និងមន្រ្តីពាក់ព័ន្ឋ។

ជាការចូលរួមអបអរសាទរខួប១ឆ្នាំ នៃការបើកឱ្យប្រើប្រាស់ជាផ្លូវការផ្លូវល្បឿនលឿនភ្នំពេញ-ក្រុងព្រះសីហនុ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានផ្ញើសារលិខិតអបអរសាទរជូន ចំពោះលោក ចាវ យ៉ុង តាមរយៈឯកឧត្តមឧបនាយករដ្ឋមន្ត្រី បង្ហាញអំពីការកោតសរសើរ និងការគាំទ្រដល់ក្រុមហ៊ុនដែលបានវិនិយោគផ្លូវល្បឿនលឿន ជាប្រវត្តិសាស្ត្រដំបូងរបស់កម្ពុជា។ការវិនិយោគរបស់ក្រុមហ៊ុន លើការកសាងផ្លូវល្បឿនលឿននេះ បានបង្ហាញអំពីអត្ថប្រយោជន៍ជាក់ស្តែង ដែលកម្ពុជាទទួលបានពីគំនិតផ្តួចផ្តើម “ខ្សែក្រវាត់ និងផ្លូវ” និងកិច្ចសហប្រតិបត្តិការមិត្តដែកថែបមិនអាចកាត់ថ្លៃបានរវាងកម្ពុជា និងសាធារណរដ្ឋប្រជាមានិតចិន ដែលបានជួយលើកកម្ពស់ ប្រព័ន្ធហេដ្ឋារចនាសម្ព័ន្ធដឹកជញ្ជូន ជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋកម្ពុជា។

លោកស៊ុន ចាន់ថុលបានបញ្ជាក់ថា ផ្លូវល្បឿនលឿនខ្សែទី១របស់កម្ពុជានេះ បានរៀបចំបើកឱ្យប្រើប្រាស់ជាផ្លូវការ នៅវិមានសន្តិភាពកាលពីថ្ងៃទី៩ ខែវិច្ឆិកា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងឯកឧត្តម លី ខឺឈាង អតីតនាយករដ្ឋមន្រ្តី នៃសាធារណរដ្ឋប្រជាមានិតចិន ដែលបានទទួលមរណភាពកាលពីថ្ងៃទី២៧ ខែតុលា ឆ្នាំ២០២៣កន្លងទៅនេះ។

លោកក៏បានបន្ថែមផងដែរ ជូនចំពោះ លោក ចាវ យ៉ុង ដោយបានស្នើសុំឱ្យក្រុមហ៊ុន ពិនិត្យលទ្ធភាពទទួលនិស្សិតពីវិទ្យាស្ថានតេជោសែនសាធារណការ និងដឹកជញ្ជូនឱ្យចូលបម្រើការងារក្នុងក្រុមហ៊ុន CRBC បានផងដែរ។អាស្រ័យលើភាពរឹងមាំនៃកិច្ចសហប្រតិបត្តិការ រវាងដៃគូទាំងពីរ លោកឧបនាយករដ្ឋមន្ត្រី បានសំណូមពរដល់ឯកឧត្តម វ៉ាង វិនធៀន មេត្តាជួយជំរុញនីតិវិធីផ្តល់កម្ចីសម្បទាន ដើម្បីធ្វើការជួសជុលផ្លូវជាតិលេខ៣ កំណាត់កំពត-វាលរិញ ប្រវែងប្រមាណ២០គីឡូម៉ែត្រ ដែលរងការខូចខាតយ៉ាងធ្ងន់ធ្ងរ និងបានបង្កការលំបាកដល់បងប្អូនប្រជាពលរដ្ឋក្នុងការធ្វើដំណើរបច្ចុប្បន្ននេះ។

ជាមួយគ្នានេះ គម្រោងសាងសង់ផ្លូវជាតិលេខ៧ កិច្ចការងាររៀបចំប្រព័ន្ធចម្រោះទឹកកខ្វក់ ក្នុងក្រុងព្រះសីហនុ គម្រោងសាងសង់ផ្លូវល្បឿនលឿនភ្នំពេញ-បាវិត សុទ្ធសឹងតែជាគម្រោងដែលកំពុងអនុវត្តនាពេលបច្ចុប្បន្ន ដែលឯកឧត្តមឧបនាយករដ្ឋមន្ត្រី បានស្នើសុំជំរុញពន្លឿនកិច្ចការងារអនុវត្តន៍ លើគម្រោងការងារទាំងនេះបន្ថែមទៀត។

ដើម្បីជាការអបអរសាទរនូវគម្រប់ខួប១ឆ្នាំ នៃការបើកឱ្យប្រើប្រាស់ផ្លូវល្បឿនលឿនភ្នំពេញ- ក្រុងព្រះសីហនុ និងដោយមានការសម្របសម្រួលពីរាជរដ្ឋាភិបាលកម្ពុជា ក្រុមប្រឹក្សាអភិវឌ្ឍន៍កម្ពុជា ក្រសួងសេដ្ឋកិច្ចនិងហិរញ្ញវត្ថុ និងក្រសួងសាធារណការ និងដឹកជញ្ជូ​ន ក្រោមការយកចិត្តទុកដាក់ខ្ពស់ ពីសម្តេចមហាបវរធិបតីនាយ​​ករដ្ឋមន្ត្រីនៃកម្ពុជា ក្រុមហ៊ុនផ្លូវល្បឿនលឿន បានសម្រេចបន្តរក្សាតម្លៃដដែល (បញ្ចុះតម្លៃ២០%) ក្នុងរយៈពេលពេញ១ឆ្នាំ ចំពោះអ្នកប្រើប្រាស់គន្លង ETC និងគន្លង ANPR ដោយគិតពីថ្ងៃទី១ ខែវិច្ឆិកា ឆ្នាំ២០២៣ ដល់ថ្ងៃទី៣១ ខែតុលា ឆ្នាំ២០២៤។ចំពោះអ្នកប្រើប្រាស់ផ្លូវ ដែលទូទាត់ជាសាច់ប្រាក់សុទ្ធ (MTC) ក្រុមហ៊ុននឹងរក្សាតម្លៃនៅដដែល (បញ្ចុះតម្លៃ២០%) សម្រាប់រយៈពេល ៦ខែ គិតចាប់ពីថ្ងៃទី១ ខែវិច្ឆិកា ឆ្នាំ២០២៣ ដល់ថ្ងៃទី៣០ ខែមេសា ឆ្នាំ២០២៤។ ចំពោះសេវាធ្វើដំណើរ នឹងត្រូវគណនាតាមចម្ងាយជាក់ស្តែងនៃការបើកបរ និងតាមប្រភេទយានយន្ត។

គិតពីថ្ងៃទី១ វិច្ឆិកា ២០២២ ដល់ថ្ងៃទី៣១ តុលា ២០២៣ កន្លងមកនេះ មានយានយន្តប្រមាណ៤,៦៨លានគ្រឿង បានធ្វើដំណើរលើផ្លូវល្បឿនលឿនថ្មីនេះ ហើយថវិកាដែលក្រុមហ៊ុនទទួលបានរយៈពេល១ឆ្នាំនេះគឺប្រមាណ៣៥លានដុល្លារ៕

        ដោយៈ ជេស៊ីកា

        ភ្នំពេញៈ លោកឧបនាយករដ្ឋមន្ត្រីស៊ុន ចាន់ថុលអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងថា មិត្តចិនបាននិងកំពុងផ្តល់ហិរញ្ញប្បទានជាង៣៣៤០លានដុល្លារ ដើម្បីអភិវឌ្ឍន៍ហេដ្ឋារចនាសម្ព័ន្ឋធំៗនៅកម្ពុជា រួមមានស្ពាន ផ្លូវជាតិ និងផ្លូវនៅតាមបណ្តាខេត្តនានា។

លោកស៊ុន ចាន់ថុលបានមានប្រសាសន៍បែបនេះ ក្នុងពេលអញ្ជើញប្រារពខួបមួយឆ្នាំ នៃការដាក់ឲ្យដំណើរការផ្លូវល្បឿនលឿនភ្នំពេញ ព្រះសីហនុ កាលពីថ្ងៃទី៧ វិច្ឆិកាកន្លងមកនេះ។លោកបានបង្ហាញឱ្យឃើញ អំពីបច្ចុប្បន្នភាពនៃគម្រោងហេដ្ឋារចនាសម្ព័ន្ធផ្លូវថ្នល់ ក្រោមឥណទានសម្បទាន និងជំនួយឥតសំណងរបស់មិត្តចិន ដែលបានសាងសង់រួចមានចំនួន ៣១ខ្សែ ប្រវែងសរុប៣.០៧៧,៥០គីឡូម៉ែត្រ ដោយប្រើប្រាស់ថវិកាប្រមាណ២.១៨០,៧៩លានដុល្លារ។

លោកស៊ុន ចាន់ថុលបានបន្តថា គម្រោងសាងសង់ផ្លូវថ្នល់ ដែលកំពុងដំណើរការមានចំនួន០៦ខ្សែ មានប្រវែងសរុប៥៥៧,៦២គីឡូម៉ែត្រ ប្រើប្រាស់ថវិកាប្រមាណ៦៧៥.៨៧លានដុល្លារ។ ស្ពានធំៗដែលបានសាងសង់រួច មានចំនួន១០ស្ពាន ប្រវែងសរុប១០.៨៩៧​ម៉ែត្រ ប្រើប្រាស់ថវិកាប្រមាណ៣៧២,១៥លានដុល្លារ និងកំពុងសាងសង់ស្ពាន ឆ្លងកាត់ទន្លេមេគង្គខេត្តក្រចេះប្រវែង១.៧៦១ម៉ែត្រ ប្រើប្រាស់ថវិកាប្រមាណ១១១,៩៨លានដុល្លារ។

លោកបន្ថែមទៀតថា គម្រោងដែលប្រើប្រាស់ឥណទានសម្ប​ទាន និងជំនួយឥតសំណងរបស់មិត្តចិន ដែលបានសាងសង់រួច និងកំពុងសាងសង់ មានទឹកប្រាក់សរុបប្រមាណ៣.៣៤០លានដុល្លារ។

ក្រៅពីហេដ្ឋារចនាសម្ព័ន្ធផ្លូវថ្នល់ លោកឧបនាយករដ្ឋមន្ត្រី ក៏បានជម្រាបជូនលោកវ៉ាង វិនធៀន អំពីវឌ្ឍនភាពនៃគម្រោងផ្លូវនាវាចរណ៍ “ព្រែកជីកហ្វូណនតេជោ” ដែលបានចុះហត្ថលេខាលើកិច្ចព្រមព្រៀងក្របខ័ណ្ឌ(FA)រួចរាល់ កាលពីថ្ងៃទី១៧ ខែតុលា ឆ្នាំ២០២៣ នៅសាធារណរដ្ឋប្រជាមានិតចិន ដោយលោកឧបនាយករដ្ឋមន្ត្រីក៏បានស្នើជំរុញឱ្យក្រុមហ៊ុនបញ្ជូន អ្នកជំនាញពីប្រទេសចិនឱ្យបានច្រើន ដើម្បីបញ្ចប់សិក្សាសមិទ្ធិលទ្ធភាព លម្អិតឱ្យបានហ្មត់ចត់ និងឆាប់រហ័ស។

បន្ថែមពីនេះ គម្រោងសំខាន់ៗផ្សេងទៀត គឺគម្រោងសិក្សាសមិទ្ធិ​​លទ្ធភាពផ្លូវល្បឿនលឿនខ្សែទី៣ ភ្នំពេញ-សៀមរាប-ប៉ោយប៉ែត ក៏ជាអាទិភាពមួយ ដែលលោកឧបនាយករដ្ឋមន្ត្រី បានអំពាវនាវឱ្យក្រុមហ៊ុនពន្លឿនកិច្ចការងារសិក្សា ដើម្បីអាចឈានទៅនីតិវិធីបន្តបន្ទាប់ទៀត សំដៅយ៉ាងណាអាចឱ្យគម្រោងនេះ ចេញជាលទ្ធផលសម្រាប់នីតិកាលទី៧នេះ៕