ដោយៈ តែម សុខុម

ហុងកុងៈ អនុប្រធានាធិបតីចិន បានអះអាងកាលពីថ្ងៃពុធ ទី៨ ខែវិច្ឆិកា ថា ក្រុងប៉េកាំង ត្រៀមខ្លួនរួចជាស្រេច ដើម្បីធ្វើឱ្យប្រសើរឡើងនូវទំនាក់ទំនងជាមួយក្រុងវ៉ាស៊ីនតោន។

ដំណឹងវិជ្ជមានដ៏គួរឱ្យភ្ញាក់ផ្អើលនេះ កើតមានឡើងប៉ុន្មានថ្ងៃមុនជំនួបដែលអាចកើតមានឡើង រវាងប្រធានាធិបតីចិន លោក ស៊ី ជីងភីង និងប្រធានាធិបតីអាមេរិក លោកចូ បៃឌិន នៅ San Francisco សហរដ្ឋអាមេរិក។

អនុប្រធានាធិបតីចិន លោក Han Zheng  បានថ្លៃងប្រាប់សារព័ត៌មានដ៏ល្បីល្បាញ Bloomberg ក្នុងវេទិកាសេដ្ឋកិច្ចនៅប្រទេសសិង្ហបុរី ថា ជំនួបកម្រិតខ្ពស់កាលពីពេលថ្មីៗ នេះបានបញ្ជូន “សញ្ញាវិជ្ជមាន និងបានធ្វើឱ្យសហគមន៍អន្តរជាតិ ​កាន់តែមានក្ដីរំពឹងថា ទំនា​ក់ទំនងរវាងប្រទេសចិន និងសហរដ្ឋអាមេរិកនឹងប្រសើរឡើង”។អនុប្រធានាធិបតីចិន រូបនេះបានគូសបញ្ជាក់ថា “យើងត្រៀមខ្លួនរួចជាស្រេច ដើម្បីពង្រឹងការទំនាក់ទំនង និងការសន្ទនាជាមួយសហរដ្ឋអាមេរិកនៅគ្រប់កម្រិត លើកកម្ពស់កិច្ចសហប្រតិបត្តិការដែលផ្ដល់ផលប្រយោជន៍ ដល់គ្នាទៅវិញទៅមក គ្រប់គ្រងភាពខុសប្លែកគ្នាឱ្យបានត្រឹមត្រូវ និងរួមគ្នាដោះស្រាយបញ្ហាប្រឈមនានារបស់ពិភពលោក”។

លោកបានបន្ថែមថា ទំនាក់ទំនងល្អប្រសើរ ប្រកបដោយស្ថិរភាព គឺជាក្ដីរំពឹងរួមដែលពលរដ្ឋ នៃប្រទេសទាំងពីរប្រាថ្នាចង់បាន។

ប្រធានាធិបតីអាមេរិក លោកចូ បៃឌិន នឹងធ្វើដំណើរទៅកាន់ San Francisco នៅថ្ងៃទី១៤ ខែវិច្ឆិកា ដើម្បីទទួលធ្វើជាម្ចាស់ផ្ទះស្វាគមន៍តំណាងមកពី២១ប្រទេស ដែលជាសមាជិកនៃអង្គការកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC)៕ CNN៕

ដោយ: គង់ លាងហួរ

អន្តរជាតិ: សហរដ្ឋអាមេរិក បានប្រកាសគម្រោងក្នុងទំហំទឹកប្រាក់៥៥៣លានដុល្លារ កាលពីថ្ងៃពុធ ដើម្បីសាងសង់ស្ថានីយកុងតឺន័រដឹកជញ្ជូនទឹកជ្រៅមួយ នៅក្នុងកំពង់ផែកូឡុំបូ (Colombo) របស់ប្រទេសស្រីលង្កា ដើម្បីទប់ទល់នឹងឥទ្ធិពលចិននៅក្នុងតំបន់។

គម្រោងនេះត្រូវបានចាត់ទុក ជាការផ្តល់នូវហេដ្ឋារចនាសម្ព័ន្ធដ៏សំខាន់ សម្រាប់ប្រទេសស្រីលង្កា ដែលមានសក្តានុពល ដើម្បីប្រែក្លាយទីក្រុងColombo ទៅជាមជ្ឈមណ្ឌលដឹកជញ្ជូន លំដាប់ពិភពលោកនៅត្រង់ចំនុចប្រសព្វ នៃផ្លូវដឹកជញ្ជូនសំខាន់ៗ និងប្រទេសទីផ្សារដែលកំពុងរីកចម្រើន។

ទឹកប្រាក់ចំនួន៥៥៣លានដុល្លារអាមេរិកនេះ គឺជាប្រាក់កម្ចី ដែលផ្តល់ដោយទីភ្នាក់ងារ សាជីវកម្ម​ហិរញ្ញវត្ថុ​អភិវឌ្ឍន៍​អន្តរជាតិ​របស់​សហរដ្ឋ​អាមេរិក​ (DFC)។លោក​ Scott Nathan ​នាយក​ប្រតិបត្តិ​ DFC ​ បាន​លើកឡើងថា ការបោះទុនចំនួន៥៥៣លានដុល្លារនេះ នឹងជួយពង្រីកសមត្ថភាពដឹកជញ្ជូនរបស់កំពង់ផែកូឡុំបូ បង្កើតវិបុលភាពកាន់តែច្រើន សម្រាប់ប្រទេសស្រីលង្កា ដោយមិនបន្ថែមបន្ទុកបំណុលជាតិ ព្រមទាំងពង្រឹងជំហររបស់សម្ព័ន្ធមិត្តរបស់យើងនៅទូទាំងតំបន់។

ការផ្តល់ហិរញ្ញប្បទានដែលគាំទ្រ ដោយសហរដ្ឋអាមេរិកកើតឡើង ស្របពេលដែលស្រីលង្កាកំពុងខិតខំតស៊ូ ដើម្បីងើបឡើងវិញពីវិបត្តិហិរញ្ញវត្ថុ និងវិបត្តិសេដ្ឋកិច្ចធ្ងន់ធ្ងរ ដែលប្រទេសមួយនេះកំពុងជួបប្រទះ។

DFC ​បាន​អះអាងថា​ កំពង់ផែ​កូឡុំបូ​ បាន​ដំណើរការ​ស្ទើរ​តែ​ពេញ​ចំណុះ​ផែ ​ចាប់តាំង​ពី​ឆ្នាំ​២០២១មក​ម្ល៉េះ ​ហើយ​​ការស្ថាបនាស្ថានីយកុងតឺន័រថ្មី​​នេះ នឹង​បំពេញ​តាមតម្រូវការ​សេដ្ឋកិច្ច​ ដែល​កំពុង​រីក​ចម្រើន​នៅ​ឈូង​សមុទ្រ​បេងហ្គាល់​​។​

ចំណែក ដៃគូ​សហការក្នុងគម្រោង រួមមានក្រុមហ៊ុនស្រី​លង្កា​​ John Keells Holdings ​​និង​ក្រុម​ហ៊ុន​ឥណ្ឌា​​ Adani Ports & Special Economic Zones Limited។

លោក​ Nathan ​បាន​អះអាងថា​ DFC ​នឹងផ្តល់​ប្រាក់​កម្ចី​ដោយ​ផ្ទាល់​ដល់​ក្រុម​ហ៊ុន ​ដែល​ពាក់​ព័ន្ធ​ក្នុង​ការ​សាង​សង់​ ដោយ​លោកបន្ថែ ម​ថា​ “វា​ជា​អាទិភាព​ខ្ពស់​សម្រាប់​សហរដ្ឋ​អាមេរិក ​ក្នុង​ការ​ធ្វើ​សកម្ម ភាព​នៅ​ក្នុង​តំបន់​ឥណ្ឌូ​​-​ប៉ាស៊ីហ្វិក​ ខណៈតំបន់​នេះ​គឺ​ជា​ម៉ាស៊ីន​នៃកំណើន​សេដ្ឋកិច្ច​របស់​ពិភព​លោក ​និងមា​ន​សក្តានុពល​ដ៏​ធំ​មួយ ​ក្នុង​ការ​បង្កើត​ផល​​ប្រយោជន៍​សម្រាប់​ការ​អភិវឌ្ឍន៍​”៕

ដោយៈ គង់ សូរិយា

        ភ្នំពេញៈ រដ្ឋលេខាធិការប្រចាំការក្រសួងផែនការ លោកទួន ថាវរៈ បានជួបពិភាក្សាជាមួយលោកJOSEPH SCHEUER ប្រធានអ្នកសម្របសម្រួល អង្គការសហប្រជាជាតិប្រចាំនៅកម្ពុជា ដើម្បីពិភាក្សាពីការត្រៀមចាកចេញ ពីឋានៈប្រទេសអភិវឌ្ឍន៍តិចតួចរបស់កម្ពុជា។

កិច្ចប្រជុំពិភាក្សានេះ គឺដើម្បីសិក្សាស្វែងយល់ និងពិភាក្សាបន្ថែ​មលើប្រធានបទសំខាន់ៗមួយចំនួន ដែលពាក់ព័ន្ធនឹងការចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍតិចតួច ដែលក្នុងគោលបំណងដូចជា ទី១.ដំណើរការនៃការចាកចេញ ទី២.លទ្ធផលបឋមនៃការពិនិត្យវាយតម្លៃ៣ឆ្នាំម្តងជាលើកទី២ ទី៣ សកម្មភាព និងកាលបរិច្ឆេទ នៃដំណើរការពិនិត្យវាយតម្លៃលើកទី២ សម្រាប់កម្ពុជា ទី៤យុទ្ធសាស្ត្រអន្តរកាលដោយរលូន។

កិច្ចប្រជុំនេះ ពិតជាមានសារៈសំខាន់ណាស់របស់កម្ពុជា និងសម្រាប់សមាជិក សមាជិកា ដែលទើបតែត្រូវបានតែងតាំងក្នុងគណៈកម្មាធិការជាតិ សម្រាប់ការត្រៀមចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍន៍តិចតួច តាមរយៈកិច្ចប្រជុំនេះ គណៈកម្មាធិការជាតិអាចទទួលបាន បន្ថែមនូវព័ត៌មានសំខាន់ៗថ្មីៗ ពាក់ព័ន្ធនឹងការត្រៀម និងការរៀបចំចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍតិចតួច ដោយផ្ទាល់ពីប្រព័ន្ធអង្គការសហប្រជាជាតិ ជាពិសេ​សព័ត៌មានដែលពាក់ព័ន្ធ នឹងការងារអាទិភាព ដែលកម្ពុជាត្រូវចូលរួមក្នុងការពិនិត្យវាយតម្លៃ៣ឆ្នាំម្តងលើកទី២ នៅឆ្នាំ២០២៤ខាងមុខនេះ។

ក្រសួងផែនការ ក្នុងនាមជាសេនាធិការរបស់រាជរដ្ឋាភិបាលកម្ពុជា និងជាប្រធានគណៈកម្មាធិការជាតិ សម្រាប់ការត្រៀមចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍន៍តិចតួច ដែលមានលោក ប៊ិន ត្រឈៃ រដ្ឋមន្ត្រីក្រសួងផែនការ ជាប្រធាន មានភារកិច្ចដឹកនាំ និងសម្របសម្រួលគ្រប់ស្ថាប័នពាក់ព័ន្ធ ទាំងស្ថាប័នជាតិ ទាំងស្ថាប័នអន្តរជាតិ លើការងារត្រៀមការចាកចេញ ការចាកចេញ និងក្រោយការចាកចេញរបស់ប្រទេសកម្ពុជា ពីចំណាត់ក្រុមប្រទេសអភិវឌ្ឍន៍តិចតួច ជាពិសេសគឺការតម្រង់ទិសការរៀបចំ គោលនយោបាយពាក់ព័ន្ធ និងផែនការសកម្មភាព ដែលក្នុងនោះជាចម្បង មានការរៀបចំយុទ្ធសាស្ត្រ នៃការចាកចេញដោយរលូន សម្រាប់អនុវត្តក្រោយការចាកចេញ និងការតាមដានការអនុវត្ត។

ជាមួយគ្នានេះ អង្គការសហប្រជាជាតិ ដែលមានការិយាល័យអ្នកសម្របសម្រួលនៅក្នុងប្រទេសកម្ពុជា គឺជាអ្នកសម្របសម្របសម្រួលរវាងស្ថាប័ន សហប្រជាជាតិនៅក្នុងប្រទេស និងមានក្រុមការងារអន្តរភ្នាក់ងារ ជាអ្នកសម្របសម្រួល រវាងស្ថាប័នសហប្រជាជាតិនៅក្រៅប្រទេស រួមទាំងដៃគូអភិវឌ្ឍន៍ ដើម្បីសហការនិងគាំទ្របច្ចេកទេសដល់ប្រទេសកម្ពុជា ក្នុងការត្រៀមនិងរៀបចំការចាកចេញរបស់កម្ពុជា ពីចំណាត់ក្រុមប្រទេសអភិវឌ្ឍតិចតួចផងដែរ៕

ដោយៈ ជេស៊ីកា

        កណ្តាលៈ ការសម្ភោធដាក់ឲ្យដំណើរការ កំណាត់ផ្លូវក្រវ៉ាត់ក្រុងទី៣ និងការបង្ហាញពីផែនការអភិវឌ្ឍន៍ផ្លូវក្រវ៉ាត់ក្រុងនេះ នៅភាគខាងកើតប្រវែង៣៣គីឡូម៉ែត្រ ដែលបានបញ្ចប់ការសិក្សាដោយក្រុមហ៊ុនស្ពានថ្នល់ ប្រទេសចិន បាននិងកំពុងបង្ហាញនូវសក្តានុពលនៃការរីកចម្រើនហេដ្ឋារចនាសសម្ព័ន្ឋ និងអចលនទ្រព្យនៅតំបន់នេះ។

នៅពេលនិយាយពីកំណាត់ផ្លូវក្រវ៉ាត់ក្រុងទី៣ គេក៏មិនភ្លេចពីកា​រសាងសង់ផ្លូវក្រវ៉ាត់ក្រុងទី៤ នាពេលអនាគតឆាប់ៗនេះផងដែរ ដែលផ្លូវនេះ នឹងដើរតួនាទីកាន់តែសំខាន់បន្ថែមទៀត ដល់ការរីកចម្រើននៅតំបន់អមសងខាងផ្លូវនេះ ស្របពេលក្រុមហ៊ុនCRBCបានបញ្ចប់ការសិក្សាផ្លូវនេះរួចហើយ។អ្នកជំនាញសារធារណៈការ និងដឹកជញ្ជូនបានលើកឡើងក្នុងលក្ខខ័ណ្ឌមិនបញ្ចេញឈ្មោះថា ការសាងសង់ផ្លូវក្រវ៉ាត់ក្រុងទី៤នាពេលអនាគត ជាផ្នែកមួយនៃការដឹកជញ្ជូនផង ការធ្វើសមាហរណកម្មតំបន់ជាយក្រុង ខិតកាន់តែជិតមកកាន់ទីក្រុង ពិសេសផ្លូវនេះនឹងដើរតួនាទីកាន់តែសំខាន់ ក្នុងការតភក្ជាប់ហេដ្ឋារចនាសម្ព័ន្ឋដឹកជញ្ជូនមកកាន់ព្រលានយន្តហោះ តេជោក្រុងតាខ្មៅ និងការតភ្ជាប់ពីភាគពាយ័ព្យប្រទេស មកកាន់តំបន់ភូមិភាគកណ្តាល មានខេត្តកណ្តាល កំពង់ស្ពឺ និងខេត្តព្រៃវែងផងដែរ។

លោកបន្តថា “វាជាផ្លូវយុទ្ឋសាស្រ្ត ដែលតភ្ជាប់ពីភាគខាងលិច ផ្លូវជាតិលេខ២ លេខ៣ លេខ៤ តភ្ជាប់មកកាន់ផ្លូវជាតិលេខ១ និងសម្រួលឲ្យមានលំហូរទំនិញ តភ្ជាប់ជាមួយតំបន់អាស៊ាន ដែលនៅជិតខាងកម្ពុជាផងដែរ”។

មានចម្ងាយត្រឹមប្រមាណ៣០គីឡូម៉ែត្រ ពីរាជធានីភ្នំពេញ គំរោងផ្លូវក្រវ៉ាត់ក្រុងទី៤ ប្រវែងជាង១៩៥គីឡូម៉ែត្រ ឆ្លងកាត់ខេត្តកណ្តាល កំពង់ស្ពឺតាកែវ ព្រៃវែង គំរោងផ្លូវនេះត្រូវបានដាក់ឲ្យសិក្សាដោយដ្ឋាភិបាលហើយ និងបានបញ្ចប់រួចរាល់ផងដែរ។

មន្ត្រីជាន់ខ្ពស់របស់ក្រសួងសាធារណការ និងដឹកជញ្ជូនបានអះអាងថា  ផ្លូវខ្សែក្រវាត់ក្រុងទី៤ ដែលក្រសួងបានឱ្យក្រុមហ៊ុនសាជីវកម្មស្ពាន ថ្នល់ចិន បានសិក្សាចប់សព្វគ្រប់តាំងពីឆ្នាំ២០២០ ដោយផ្លូវនេះមានប្រវែង១៩៥គីឡូម៉ែត្រ និងឆ្លងកាត់ខេត្តចំនួន៤ គឺខេត្តកំពង់ស្ពី តាកែវ កណ្តាល និងខេត្តព្រៃវែង។

រដ្ឋលេខាធិការក្រសួងសាធារណៈការ និងដឹកជញ្ជូន លោកលីម ស៊ីដេនីន ធ្លាប់បានបញ្ជាក់នៅក្នុងសិក្ខាសាលា ពិគ្រោះយោបល់ស្តីពីការជ្រើសរើសផ្លូវក្រវាត់ក្រុងទី៤ ការគ្រប់គ្រង និងការទប់ស្កាត់ការទន្ទ្រានដីចំណីផ្លូវតម្រូវការហេដ្ឋានរចនា សម្ព័ន្ធ នៃប្រព័ន្ធចម្រោះទឹកកខ្វក់ថា ក្នុងចំណោមខេត្តទាំង៤នេះ ដោយឆ្លតកាត់ខេត្តកំពង់ស្ពី ចំនួន៣ស្រុក ខេត្តតាកែវចំនួន១ស្រុក ខេត្តកណ្តាល៨ស្រុក និងខេត្តព្រៃវែង២ស្រុក។

ជាមួយនឹងការផ្តល់ហិរញ្ញប្បទាន សម្បទានពីរដ្ឋាភិបាលចិនក្នុងទំហំទឹកប្រាក់៣៣៤០លានដុល្លារ ដែលបានប្រកាសដោយលោកឧបនាយករដ្ឋមន្រ្តីស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍ​ន៍កម្ពុជាកាលពីថ្ងៃទី៧ វិច្ឆិកាកន្លងមក ប្រជាពលរដ្ឋរស់នៅតាមបណ្តោយផ្លូវក្រវ៉ាត់ក្រុងទី៤ (ផ្លូវពង្រាង) កំពុងដាក់ក្តីសង្ឃឹមថា ផ្លូវក្រវ៉ាត់ក្រុងទី៤ នឹងសាងសង់នាពេលឆាប់ៗខាងមុខនេះ។

ការសាងសង់ផ្លូវនេះ នឹងជួយលើកកំពស់សេដ្ឋកិច្ច និងជីវភាព​ប្រជាពលរដ្ឋនៅក្នុងតំបន់ជាច្រើន រួមមាន ទី១ ជួយសម្រួលលំហូរ និងកាត់បន្ថយការកកស្ទះចរាចរណ៍ ទី២ ជួយលើកកំពស់សេដ្ឋកិច្ចមូលដ្ឋាន តាមរយៈការឡើងថ្លៃដីធ្លី និងអចលនទ្រព្យក្នុងតំបន់ ទី៣ ទាក់ទាញការវិនិយោគពីអ្នកវិនិយោគជាតិ អន្តរជាតិ ខណៈបច្ចុប្បន្នមានអ្នកអភិវឌ្ឍន៍មួយចំនួន បានសាងសង់ផ្ទះលំហែរ និងរីហ្សតនៅតំបន់នេះបណ្តើរៗរួចហើយ។

ទី៤ ជាការចំណេញដល់គោលនយោ​បាយ របស់រាជរដ្ឋាភិបាល ក្នុងការកាត់បន្ថយគម្លាតអភិវឌ្ឍន៍រវាងទីក្រុង និងតំបន់ជនបទ និងទី៥ ជាការចូលរួមកាត់បន្ថយភាពក្រីក្រ របស់ប្រជាពលរដ្ឋ។

ការអភិវឌ្ឈន៍តំបន់ក្រវ៉ាត់ក្រុង ត្រូវបានអ្នកជំនាញអចលនទ្រព្យ​មើលឃើញថា វាកំពុងផ្តល់នូវការលើកកំពស់ ការរីកចម្រើននៅតំបន់ ជុំវិញនោះ ហើយការវិនិយោគហេដ្ឋារចនាសម្ព័ន្ឋរបស់រដ្ឋាភិបាល ជាការចូលរួមចំណែកមួយផ្នែ​ក ក្នុងការអភិវឌ្ឍវិស័យសំណង់ និងអច​លនទ្រព្យផងដែរ។

អ្នកស្រីអាន សុធីតាអគ្គនាយិកាក្រុមហ៊ុនPropNex Cambodiaបានមានប្រសាសន៍ថា ការអភិវឌ្ឍហេដ្ឋារចនាសម្ព័ន្ឋរបស់រដ្ឋាភិបាលក្នុងរយៈពេលប៉ុន្មានឆ្នាំចុងក្រោយនេះ បានគាំទ្រដល់វិស័យអចលនទ្រព្យយ៉ាងច្រើន ជាក់ស្តែងតំបន់ភាគខាងត្បូងរាជធានី ពិសេសនៅតំបន់ផ្លូវក្រវ៉ាត់ក្រុងទី៣ និងទី៤ បាននិងកំពុងមានសកម្មភាពទិញ លក់ជាប្រចាំផងដែរ ប៉ុន្តែមិនទាន់មានសភាពពុះកញ្រ្ជោល ដូចមុនវិបត្តិនៅឡើយទេ។

អ្នកស្រីបន្តថា “ដោយសារជាតំបន់មានផ្ទៃដីនៅធំទូលាយ តម្លៃដីធ្លីមិនទាន់មានសញ្ញាកើនឡើងនៅឡើយទេ ប៉ុន្តែអ្វីៗនឹងប្រសើរឡើងនាពេលអនាគត”៕

ដោយៈ តែម សុខុម

ប៉េកាំងៈ មហាយក្សចិន កាលពីថ្ងៃអាទិត្យ ចុងសប្តាហ៍កន្លងទៅបានចាប់ផ្ដើមដំណើរការ ជាផ្លូវការនូវវាលខួងយករ៉ែប្រេង មានជម្រៅជ្រៅបំផុត និងធំបំផុតរបស់ខ្លួន។

យោងតាមកាសែត China Daily ចុះផ្សាយនៅថ្ងៃពុធ ទី៨ ខែវិច្ឆិកា នេះបានឱ្យដឹងថា វាលខួងប្រេង Fuman Oilfield ដែលមានជម្រៅជ្រៅបំផុត និងធំបំផុតប្រចាំប្រទេសចិន មានផ្ទុកកំណប់ប្រេង និងឧស្ម័នដ៏ច្រើនមហាសាល។

ទីវាលខួងប្រេងនេះ មានភូមិសាស្ត្រស្ថិតនៅវាលខ្សាច់ Taklamakan Desert ក្នុងតំបន់ស្វយ័តស៊ីនជាំង (Xinjiang) ទីដែលជនជាតិដើមភាគតិចវីហ្គួ (Uyghur) កាន់សាសនាអ៊ីស្លាម រស់នៅ។សាខានៃក្រុមហ៊ុន PetroChina ដែលជាក្រុមហ៊ុនផលិតប្រេង និងឧស្ម័នឈានមុខគេរបស់ប្រទេសចិន បានទម្លាយឱ្យដឹងថា ទីវាលខួងប្រេងនេះ ត្រូវគេជឿថាមានផ្ទុកកំណប់រ៉ែប្រេង និងឧស្ម័នជាង១ពាន់លានតោន ដែលភាគច្រើនត្រូវបានរកឃើញក្រោមដី ក្នុងជម្រៅចន្លោះពី៧.៥០០ ទៅ១០.០០០ម៉ែត្រ។

ទីវាលខួងប្រេង Fuman Oilfield ត្រូវបានរំពឹងថា នឹងអាចផលិតប្រេង និងឧស្ម័នបានប្រមាណ៥លានតោន ក្នុងមួយឆ្នាំៗនៅឆ្នាំ២០២៥៕ China Daily ៕

ដោយៈ ហ្វីអូណា

        ភ្នំពេញៈ សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជានឹងអញ្ជើញសម្ភោធ ដាក់ឲ្យប្រើប្រាស់ជាផ្លូវការកំណាត់ផ្លូវជាតិលេខ៥ ប្រវែងជាង២៤៦គីឡូម៉ែត្រ នៅថ្ងៃទី២២ វិច្ឆិកាខាងមុខនេះ។

ព៌តមាននេះ ត្រូវបានលើកឡើងក្នុងកិច្ចប្រជុំ ត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ (ព្រែកក្តាម – បាត់ដំបង) និងបើកការដា្ឋន កំណាត់ចុងក្រោយ (សិរីសោភ័ណ-ប៉ោយប៉ែត) ដឹកនាំដោយលោកតូច ចាន់កុសល រដ្ឋលេខាធិការ និងជាប្រធានគណ:កម្មការរៀបចំពិធី នាព្រឹកថ្ងៃពុធ ទី៨ ខែវិច្ឆិកា ឆ្នាំ២០២៣។

កិច្ចប្រជុំនេះធ្វើឡើងក្នុងគោលបំណង ពិនិត្យមើលវឌ្ឍនភាពការងារ របស់គណៈកម្មការ និងអនុគណៈកម្មការទទួលបន្ទុកនីមួយៗ លើការងាររៀបចំពិធី ដើម្បីធានាការរៀបចំបានរលូន សុវត្ថិភាព និងប្រសិទ្ធភាពខ្ពស់។ពិធីសម្ពោធបើកឱ្យប្រើប្រាស់ជាផ្លូវការ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ (ព្រែកក្តាម-បាត់ដំបង) ប្រវែងសរុប ២៤៦,១៥ គ.ម និងបើកការដ្ឋានគម្រោង ធ្វើឱ្យប្រសើរឡើងវិញ កំណាត់ផ្លូវជាតិលេខ៥ កំណាត់ចុងក្រោយ (សិរីសោភ័ណ-ប៉ោយប៉ែត) ប្រវែង ៣៥,១៤ គ.ម គ្រោងនឹងប្រព្រឹត្តទៅនៅថ្ងៃទី២២ ខែវិច្ឆិកា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

ដោយ: គង់ លាងហួរ

ភ្នំពេញ: យើងសាកស្រមៃមើលពិភពលោកមួយ ដែលការវិនិ​យោគរបស់យើងរីកចម្រើន ដោយឥតឈប់ឈរ ដែលផ្តល់មិនត្រឹមតែសន្តិសុខហិរញ្ញវត្ថុប៉ុណ្ណោះទេ ប៉ុន្តែថែមទាំងរួមចំណែកដល់អនា​គតប្រកបដោយនិរន្តរភាពផងដែរ។

ក្រុមហ៊ុន Strategic Realty Investment (SRI) ដែលជាឈ្មោះមានអត្ថន័យប្រៀប ដូចទៅនឹងការច្នៃប្រឌិត និងការជឿទុកចិត្ត បានចាប់ផ្តើមបើកដំណើរការ ក្នុងខែកុម្ភៈ ឆ្នាំ២០២២។បច្ចុប្បន្ន ក្រុមហ៊ុននេះបានប្រែក្លាយ ទៅជាក្រុមហ៊ុនខ្នាតធំមួយ ដែលប្រើប្រាស់ជំនាញជាសាកល ដើម្បីបង្ហាញលក្ខណៈពិសេសរបស់ខ្លួនទៅក្នុងទីផ្សារនៅកម្ពុជា។ ដំណើររបស់ក្រុមហ៊ុន SRI ត្រូវបានកំណត់ឡើង ប្រកបដោយមហិច្ឆតាដ៏ឥតឈប់ឈរ ដើម្បីឆ្ពោះទៅរកការរីកចម្រើន។លើសពីនេះ ក្រុមហ៊ុន SRI បានត្រួសត្រាយយុទ្ធសាស្ត្រអភិវឌ្ឍន៍ប្រកបដោយភាពច្នៃប្រឌិត ដោយក្រុមហ៊ុនតែងតែបោះជើងមួយជំហានមុន ហើយវិធីសាស្រ្តគិតឆ្ពោះទៅមុខបែបនេះ បាននាំឱ្យមានការបង្កើតនូវគម្រោងទីក្រុងខ្នាតយក្សមួយ។

ជាក់ស្តែង ក្រុមហ៊ុន Strategic Realty Investment(SRI) កំពុងសាងសង់ គម្រោងប្រើប្រាស់ចម្រុះខ្នាតយក្សមួយ ដែលមានឈ្មោះថា Banteay Srey Eco City ដើម្បីបំពេញក្តីស្រមៃទាំងនេះរបស់មនុស្សគ្រប់រូបឱ្យក្លាយជាការពិត។សម្រាប់អ្នកវិនិយោគដែលយល់ច្បាស់ គម្រោង Banteay Srey Eco City បានតំណាងឱ្យឱកាសដ៏អស្ចារ្យមួយ ដែលមិនដូចទៅនឹងគម្រោងផ្សេងទៀតឡើយ។ នៅទីនេះ ការវិនិយោគមិនមែនគ្រាន់តែជាឱកាសស្វែងរកកំណើន ផ្នែកហិរញ្ញវត្ថុប៉ុណ្ណោះទេ ប៉ុន្តែក៏ជាការរួមចំណែកដល់អនាគត ប្រកបដោយនិរន្តរភាពផងដែរ។ក្រុមហ៊ុន SRI អះអាងថា “យើងមិនត្រឹមតែបង្កើតទីក្រុងនោះទេ យើងក៏កំពុងបង្កើតសហគមន៍ របៀបរស់នៅLifestyle និងអនាគតផងដែរ ហើយយើងកំពុងអញ្ជើញ អ្នករាល់គ្នាឱ្យចូលរួមជាផ្នែកមួយ នៃដំណើរនេះ ដើម្បីចូលរួមជាមួយយើង ក្នុងការរៀបចំផ្លូវជីវិតថ្មី និងការរួមរស់ជាមួយគ្នា ប្រកបដោយនិរន្តរភាព និងប្រណីតភាព”។

លោកបណ្ឌិត Alexander Evengroen ដែលជាដៃគូ និងជានាយកអភិវឌ្ឍន៍គម្រោងនៃក្រុមហ៊ុន Strategic Realty Investment Co., Ltd បានបញ្ជាក់ថា “ក្នុងអំឡុងវិបត្តិសេដ្ឋកិច្ចនេះ ឱកាសសក្តានុពលនៅតែមានជានិច្ច ប៉ុន្តែចាំបាច់យើងត្រូវវាយតម្លៃឡើងវិញ បង្កើតឡើងវិញ និងអភិវឌ្ឍឡើងវិញ ដើម្បីធានានូវឱកាសជោគជ័យខ្ពស់បំផុត”។​លោកបានជំរុញឱ្យអ្នកអភិវឌ្ឍន៍ និងអ្នកវិនិយោគ ក៏ដូចជាឧស្សា​​ហកម្មអចលនទ្រព្យទូទៅ គួរតែចេះច្នៃប្រឌិត កែសម្រួល និងសិក្សាពីតម្រូវការទីផ្សារ នៅកម្ពុជាទាំងមូល ហើយហ៊ានងាកចេញពីគម្រោងមុនៗ ដោយសារទីផ្សារកំពុងមានការផ្លាស់ប្តូរ យ៉ាងឆាប់រហ័ស។

លោក Alexander រៀបរាប់ថា គម្រោង Banteay Srei Eco City ផ្តល់ជូននូវកញ្ចប់សរុបទៅកាន់ទីផ្សារ ដូចជា វីឡា ផ្ទះលក់ទំនិញ ផ្លូវ៣០ម៉ែត្រ សហគ្រាសធុនតូច និងមធ្យម ធនាគារ សាលារៀន សាកលវិទ្យាល័យ ភោជនីយដ្ឋាន មជ្ឈមណ្ឌលអាពាហ៍ពិពាហ៍ និងសន្និបាត កីឡដ្ឋានបាល់ទាត់ កន្លែងកីឡា ផ្សារទំនើប មន្ទីពេទ្យ តំបន់កសិកម្ម  សួនច្បារ ផ្ទះប្រពៃណីខ្មែរ ផ្ទះវិស្សមកាល កន្លែងញុាំអាហារ កន្លែងលេងកីឡាទឹក និងរបស់របរជាច្រើនទៀត។
លោក Alexander Evengroen បានមានប្រសាសន៍បន្តទៀតថា ក្រុមហ៊ុនបាន និងកំពុងអភិវឌ្ឍមួយជំហានម្តងៗ ហើយរហូតមកដល់ពេលនេះ យើងបាននិងកំពុងអភិវឌ្ឍជាច្រើនជំហាន នៅក្នុងគម្រោងរបស់យើង ប៉ុន្តែយើងនឹងបន្តការយកចិត្តទុកដាក់ ទៅលើការបង្កើតតម្លៃបន្ថែមសម្រាប់តំបន់ ប្រជាជន សេដ្ឋកិច្ចកម្ពុជា ការបង្កើតរបៀបរស់នៅថ្មី ផ្សាភ្ជាប់មនុស្សជាមួយនឹងធម្មជាតិ ជុំវិញប្រកប​ដោយភាពច្នៃប្រឌិត ការអភិវឌ្ឍដែលមិនប៉ះពាល់ដល់បរិស្ថាន និងការកម្សាន្តដ៏គួរឱ្យចាប់អារម្មណ៍ ជាច្រើនសម្រាប់កុមារ និងមនុស្សចាស់។

លោកបណ្ឌិតបានលើកឡើងថា យើងកំពុងអភិវឌ្ឍគម្រោងនេះឡើង ដើម្បីបង្កើត និងផ្តល់ឱកាសដល់យុវជនជំនាន់ក្រោយ ដូចជាអ្នករចនាឌីហ្សាញ អ្នកម៉ៅការ និងស្ថាបត្យករវ័យក្មេង។លោកបណ្ឌិត Alexander បានបន្ថែមថា ដោយមានចក្ខុវិស័យច្បាស់លាស់ បេសកកម្ម និងមូលដ្ឋានដ៏រឹងមាំ យើងកំពុងផ្តល់ឱកាសសម្រាប់អ្នកវិនិយោគក្នុងស្រុក និងអន្តរជាតិ ព្រមទាំងសាធារ​ណជនទូទៅ ដើម្បីចូលរួមជាមួយយើង ក្នុងឱកាសវិនិយោគឈ្នះ-ឈ្នះ និងឈ្នះ-ឈ្នះសម្រាប់ក្រុមហ៊ុន ប្រជាជន និងសេដ្ឋកិច្ច ដើម្បីជំរុញការអភិវឌ្ឍសង្គម-សេដ្ឋកិច្ច-នវានុវត្តន៍៕

ដោយៈ គង់ សូរិយា

        ភ្នំពេញៈ តំបន់​ស្ថិតនៅស្របតាមបណ្តោយ មហាវិថីសម្តេចតេជោ ឬផ្លូវ៦០ម៉ែត្រ ​​និងតំបន់ជុំវិញ នៅតែមានសក្ដានុពល​ និងការអភិវឌ្ឍ។

ទោះបីជា​តំបន់​ផ្លូ​វ​៦០​ម៉ែត្រ ឬមហា​វិថី​សម្ដេច​តេជោ​ហ៊ុន សែន បច្ចុប្បន្ននេះ មាន​ការ​អភិ​វឌ្ឍ​ជាមួយ នឹងវត្តមានសំណង់អគារ​ខ្ពស់​ៗ ​ផ្សារទំនើប លំនៅឋានបែបប្រណីតក្ដី ប៉ុន្តែតំបន់នេះ​នៅតែមានសក្ដានុពល​ធំធេងស​ម្រា​ប់ការវិនិយោគ ជាពិសេស​វិស័យដីធ្លីនៅតំបន់នេះនៅតែមាន​ទំហំធំសម្រាប់គម្រោងអភិវឌ្ឍន៍។​

តំបន់ផ្លូវ៦០ម៉ែត្រ កំពុង​ទាក់ទាញ​ការវិនិយោគបន្ថែមទៀត ស្របពេល​អាកាស​យានដ្ឋានអន្តរជាតិ​ភ្នំពេញ​ថ្មី ឬព្រលានយន្តហោះអន្តរជាតិ​តេជោ​ នៅស្រុកកណ្ដាល​ស្ទឹង​ កំពុងមមាញឹក​ក្នុងការសាងសង់​ ដើម្បីពន្លឿន​​ឱ្យ​ទាន់ពេលវេលា​កំណត់ ​​និងគ្រោងដាក់ឲ្យដំណើរការនៅដើមឆ្នាំ២០២៥ខាងមុខ។

តំបន់​ជុំវិញ​ផ្លូវ​៦​០ម៉ែត្រ​នេះដែរ ក៏ឃើញថា​កំពុង​មានការអភិវឌ្ឍ​លើ​ហេដ្ឋា​រច​នា​ស​ម្ព័​​ន្ធ​ខ្វាត់ខ្វែង រួមមានផ្លូវជាតិលេខ​២ បានបញ្ចប់​ការសាងសង់​រួចរាល់ហើយ ផ្លូវ​ក្រវាត់​ក្រុងទី​៣ ក៏​បា​នប​ញ្ច​ប់​ការ​​សាងសង់ទាំងស្រុង និងកំពុង​ទាក់ទាញ​អាជីវកម្ម​ទៅ​កាន់​ទី​នោះ ជា​បន្តបន្ទាប់ រួមជាមួយផ្លូវថ្មីៗជាច្រើនទៀត ​នៅក្នុង​ខណ្ឌ​​ដង្កោ​ ​​និង​​ខណ្ឌមានជ័យ ។នៅក្នុង​គម្រោង​របស់​សាលា​រាជធានីភ្នំពេញ ក៏គ្រោងអភិវឌ្ឍ​ន៍​ស្ពាន​តភ្ជាប់​ពី​ព្រែកប្រា​ ក្នុងខណ្ឌច្បារ​អំពៅ​ ឆ្លងកាត់ទន្លេបាសាកទៅកាន់​ផ្លូ​វជាតិលេ​ខ២ ក្នុងសង្កាត់ចាក់​អង្រែ​ រួច​ឆ្ពោះ​ទៅកាន់​តំបន់​ផ្លូវ​៦០ម៉ែត្រ ដែល​នឹង​ធ្វើឱ្យផ្លូវ​៦០​ម៉ែត្រ ​កាន់​​តែទាក់ទាញ​ដល់វិនិយោគិនជាតិ និងអន្តរជាតិ​បន្ថែមទៀត។

តាមការសង្កេតរបស់អ្នកជំនាញបានបង្ហាញថា លើសពីនេះ​ គម្រោ​ងស្ពាន​អាកាស​ព្រះ​មុនីវង្ស​ថ្មី​ ក៏កំពុងមមាញឹក​ក្នុងកា​រសាងសង់ ដោយ​ដំណាក់​កាលទី​១ ស្ពាន​នេះនឹង​ដាក់ដំណើរការ​ នៅ​មុន​ចូល​ឆ្នាំ​ខ្មែរខាងមុខនេះ ។អ្នកស្រី អាន សុធីតា នាយិកា​ប្រតិបត្តិ​ក្រុមហ៊ុន​អចលនទ្រព្យ​ PropNex Cambodia បាន​លើកឡើងថា​ តំបន់​​ប៉ែក​ខាងត្បូង​ភ្នំពេញ​ ក្នុងនោះរួមមានតំបន់​ផ្លូវ​៦០ម៉ែត្រ ​នឹង​ក្លាយជា​តំបន់​លំនៅឋាន និង​ពាណិជ្ជកម្មដ៏មាន​សក្ដា​នុពល។​ ​ជាក់ស្ដែងបច្ចុប្បន្ននេះឃើញថា ​មានក្រុមហ៊ុនអភិវឌ្ឍន៍​លំនៅឋានធំៗ ​កំពុង​លេច​រូបរាង​​នៅក្នុង​តំបន់នេះ។ កា​រអភិវឌ្ឍ​ហេដ្ឋារចនាសម្ព័ន្ធផ្លូវ​ថ្មីៗ ជា​បន្តបន្ទាប់​នៅក្នុង​តំបន់ បានទាក់​ទាញឱ្យ​វិនិយោគិន​ថ្មីៗ ចាប់អារម្មណ៍​ចូលទៅ​អភិវឌ្ឍន៍​ទីតាំង​នោះ។​អ្នកស្រីបានបន្តថា​ សម្រាប់ដីធ្លីនៅតំបន់​នេះ ប្រហែលជានឹង​មិនឡើង​ថ្លៃខ្ពស់បន្តទៀត​ទេ ក្នុង​រយៈពេល​ប៉ុន្មាន​ឆ្នាំ​ខាងមុខនេះ ប៉ុន្តែ​ផ្សារទំនើប​ធំចំនួន២​នៅក្នុងតំបន់ រួមមាន ផ្សារ​ជីបម៉ុង Megamall 271 និងផ្សារទំនើបអ៊ីអន​មានជ័យ កំពុង​ធ្វើឱ្យតំបន់​ផ្លូវ​៦០ម៉ែត្រ ​និងតំបន់ជុំវិញនោះកាន់តែ​មានសក្ដានុពល​ខ្លាំង ក្នុងការទាក់ទាញមនុស្ស​ទៅ​រស់​នៅទី​នោះកាន់តែច្រើន ហើយវិនិយោគិន ក៏​នឹងបំពេញ​តម្រូវការ​ដោយនឹង​អភិវឌ្ឍន៍ ​គម្រោង​លំនៅ​ឋាន​​បន្ថែមទៀតផងដែរ​។

ជាមួយនឹងការបោះទុនវិនិយោគរាប់រយលានដុល្លារនៅកម្ពុជា លោកបណ្ឌិតBen Li អគ្គនាយកក្រុមហ៊ុនUrban Land ដែលកំពុងវិនិយោគខុនដូUrban Villageបានមានប្រសាសន៍ថា តំបន់បឹងកេងកង១ ជាតំបន់ដ៏ល្បីល្បាញនៅរាជធានីភ្នំពេញ ប៉ុន្តែតំបន់ភាគខាងត្បូងរាជធានី ពិសេសនៅតាមបណ្តោយផ្លូវ៦០ម៉ែត្រ នឹងក្លាយជាតំបន់ថ្មីមួយ ដែលនឹងជំនួសតំបន់បឹងកេងកង១ នាពេលអនាគត ដោ​យសារតំបន់នេះ ជាតំបន់ថ្មីងាយស្រួល ក្នុងការអភិវឌ្ឍហេដ្ឋារចនាសម្ព័ន្ឋ និងរៀចំទីក្រុងថ្មី។

កាលពីឆ្នាំ២០២២ សាលាបារាំងចុងបូព៌ា បានសហការជាមួយ​រដ្ឋបាលរាជធានីភ្នំពេញ ដើម្បីរៀបចំហេដ្ឋារចនាសម្ព័ន្ឋ និងតំបន់បតងនៅភាគខាងត្បូងរាជធានី ដោយសារតំបន់នេះមានការរីកចម្រើនលឿន និងលំហូរប្រជាសាស្រ្តកើនឡើង៕

        ដោយៈ គង់ ហ្វីអូណា

        ភ្នំពេញៈ ក្នុងជំនួបជាមួយលោក Martin Vávra ឯកអគ្គរដ្ឋទូតឆែកប្រចាំកម្ពុជា លោកសុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួង់ការបរទេស និងសហប្រតិបត្តិការអន្តរជាតិ បានស្នើឲ្យអ្នកធុរកិច្ចឆែក មកវិនិយោគនៅកម្ពុជា។

លោកសុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួង ការបរទេស និងសហប្រតិបត្តិការអន្តរជាតិ បានទទួលជំនួបសម្ដែងការគួរសមរបស់ ឯកឧត្តម Martin Vávra ឯកអគ្គរដ្ឋទូតឆែកប្រចាំកម្ពុជា នៅទីស្ដីការក្រសួង។

ភាគីទាំងពីរបានរំលឹកឡើងវិញ នូវចំណងមិត្តភាពដ៏វិសេសវិសាល និងកិច្ចសហប្រតិបត្តិការជា ប្រពៃណីដ៏ជិតស្និទ្ធ រវាងព្រះរាជាណាចក្រកម្ពុជា និងសាធារណរដ្ឋឆែក ដោយផ្អែកលើគោលការណ៍ទុកចិត្ត គ្នា និងការយោគយល់គ្នាទៅវិញទៅមក។ ភាគីទាំងពីរក៏បានសម្តែងការពេញចិត្តយ៉ាងជ្រាលជ្រៅចំពោះ ការរីកចម្រើននៃកិច្ចសហប្រតិបត្តិការទ្វេភាគី រវាងប្រទេសទាំងពីរ ហើយបានប្ដេជ្ញាឥតងាករេជំរុញបន្ថែមនូវ ការផ្លាស់ប្តូរទស្សនកិច្ចជាន់ខ្ពស់ និងពង្រឹងបន្ថែមនូវភាពជាដៃគូពាណិជ្ជកម្ម និងការវិនិយោគឱ្យកើន ឡើងមួយកម្រិតទៀត តាមរយៈសកម្មភាពផ្សព្វផ្សាយនានា ដើម្បីជាប្រយោជន៍រួមសម្រាប់ប្រជាជាតិ ទាំងពីរ។

លោកឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលឆែកចំពោះការ ផ្តល់ជំនួយដល់កម្ពុជាដែលបានរួមចំណែកយ៉ាងសំខាន់ ដល់ការអភិវឌ្ឍសង្គម-សេដ្ឋកិច្ច រួមទាំងវិស័យ ផលិតកម្ម និងបានលើកទឹកចិត្តអ្នកវិនិយោគឆែក ក្នុងបណ្តាប្រទេសអាស៊ានផ្សេងទៀតឱ្យចាត់ទុកឬជា អប់រំ និងសុខាភិបាល។

លោកបានបន្ត សង្កត់ធ្ងន់លើសារៈសំខាន់ នៃការធ្វើពិពិធកម្ម គោលដៅវិនិយោគ។ជាមួយគ្នានេះ លោកMartin Vávra បានយល់ស្របតាមទស្សនៈរបស់ ឯកឧត្តមឧបនាយករដ្ឋមន្ត្រី អំពីទំនាក់ទំនងល្អរវាងប្រទេសទាំងពីរ និងបានអះអាងនូវការប្ដេជ្ញាចិត្ត ក្នុងការប្រើប្រាស់ឱ្យអស់ពីលទ្ធភាពនូវ វិស័យសក្តានុពលដែលមានស្រាប់។

លោកទូតបានសង្កត់ធ្ងន់ លើតម្រូវការក្នុងការទាក់ ទាញអ្នកវិនិយោគឆែកមកកម្ពុជា តាមរយៈសកម្មភាព ផ្សព្វផ្សាយនានា ជាពិសេ​សក្នុងវិស័យសុខាភិបាល និងអប់រំ៕

HONG KONG :HSBC Group CEO Noel Quinn on Tuesday said wealth flow from mainland China to Hong Kong has grown by three to four times this year.

Speaking at the Global Financial Leaders Investment Summit hosted by the Hong Kong Monetary Authority, Quinn said the so-called Great Bay Area (GBA) offered great business opportunities with the flow of capital and talent within the region, while he had seen “a strong commitment from all of the people I speak to” to develop the GBA into an important economic zone.The area, covering Hong Kong, Macau and parts of China’s southeastern Guangdong province alongside the Pearl River, is recognised by a Chinese national plan to be developed into a regional economic hub.

Quinn said the financial strength of Hong Kong and manufacturing base in Guangdong, as well as research capabilities in both regions, would generate a powerful combination and his bank is tapping into the opportunities.

New retail banking activity in the Greater Bay Area has risen 70 per cent since the end of the COVID-19 pandemic, while new banking activity among small and mid-sized enterprises in Hong Kong has surged 90 per cent, he said. Source: Reuters