ដោយ: គង់ លាងហួរ

ម៉ានីល: សេដ្ឋកិច្ចរបស់ប្រទេសហ្វីលីពីន បានកើនឡើងយ៉ាងគំហុក ក្នុងត្រីមាសទី៣ ដែលជំរុញដោយការស្ទុះងើបឡើងវិញ នៃការចំណាយរបស់រដ្ឋាភិបាល និងជំរុញឱ្យគោលដៅកំណើនសេដ្ឋកិច្ចចន្លោះពី៦ ទៅ៧%នៅឆ្នាំនេះ អាចសម្រេចទៅបាន។

ផលិតផលក្នុងស្រុកសរុប (GDP) របស់ហ្វីលីពីនបានកើនឡើង៥,៩ភាគរយនៅក្នុងត្រីមាសទី៣ បើធៀបនឹងឆ្នាំមុន ពោលគឺលើសពីការព្យាករណ៍៤,៧ភាគរយ នៅក្នុងការស្ទង់មតិរបស់សារពត៌មាន Reuters។ការចំណាយរបស់រដ្ឋាភិបាលហ្វីលីពីន បានកើនឡើង៦,៧ភាគរយក្នុងត្រីមាសទី៣ បើធៀបនឹងការធ្លាក់ចុះ០,៧ភាគរយ ក្នុងត្រីមាសទី២។

លោក Arsenio Balisacan លេខាធិការរៀបចំផែនការសេដ្ឋកិច្ចបានថ្លែងប្រាប់សន្និសីទសារព័ត៌មានមួយថា “យើងសង្ឃឹមថា នឹងរក្សាបាននូវសន្ទុះនេះ សម្រាប់រយៈពេលដែលនៅសល់នៃឆ្នាំនេះ និងឆ្នាំខាងមុខ”។លោក Balisacan បានបន្តថា អតិផរណានៅតែជាបញ្ហាប្រឈ​មមួយ ដោយសារវាបានធ្វើឱ្យការប្រើប្រាស់ ក្នុងគ្រួសារធ្លាក់ចុះ។ តួយ៉ាង ការប្រើប្រាស់ក្នុងគ្រួសារ បានកើនឡើងក្នុងល្បឿន៥ភាគរយប៉ុណ្ណោះនៅក្នុងត្រីមាសទី៣ បើធៀបនឹង៥,៥ភាគរយនៅក្នុងត្រីមាសទី២។

លោក Balisacan បានអះអាងថា “យើងសង្កត់ធ្ងន់ថា វិធានការមិនមែនរូបិយវត្ថុ ដើម្បីការពារអំណាចនៃការទិញ របស់ប្រជាជនហ្វីលីពីននៅតែមានសារៈសំខាន់ នៅពេលយើងដោះស្រាយបញ្ហានៃអត្រាអតិផរណាដ៏ខ្ពស់”៕

        ដោយៈ គង់ សូរិយា

        ភ្នំពេញៈ  រដ្ឋមន្ត្រីក្រសួងសាធារណការ និងដឹកជញ្ជូន លោក ប៉េង ពោធិ៍នា បានជំរុញដល់ក្រុមហ៊ុនបន្តចូលរួមជាមួយរដ្ឋាភិបាលក្នុងការបណ្ដាក់ទុនវិនិយោគ លើគម្រោងជាអាទិភាពផ្សេងៗទៀត ដែលរដ្ឋាភិបាលកំពុងពិនិត្យ និងត្រៀមដាក់ចេញក្នុងពេលឆាប់ៗខាងមុខ។

ថ្លែងក្នុងពិធីអបអរសាទរខួបមួយឆ្នាំ នៃការបើកឱ្យប្រើប្រាស់ជាផ្លូវការផ្លូវល្បឿនលឿនភ្នំពេញ -ក្រុងព្រះសីហនុ កាលពីថ្ងៃទី៧ ខែវិច្ឆិកា ឆ្នាំ២០២៣ លោក ប៉េង ពោធិ៍នា បានលើកឡើងថា ផ្លូវល្បឿនលឿន ដែលជាការដាក់ទុនវិនិយោគរួមគ្នា រវាងរដ្ឋាភិបាលកម្ពុជា និងក្រុមហ៊ុនចិន ដែលបានផ្ដល់ប្រយោជន៍ជាច្រើន ដល់ប្រជាពលរដ្ឋកម្ពុជាដែលទទួលបានសេវាពីផ្លូវនេះ។

លោកបន្តថា មិនតែប៉ុណ្ណោះផ្លូវនេះ ក៏ជាខ្សែផ្លូវតភ្ជាប់សេដ្ឋកិច្ច និងទេសចរណ៍របស់កម្ពុជាផងដែរ។ លោកបានចាត់ទុកគម្រោងផ្លូវល្បឿនលឿននេះ ជាគម្រូនៃហិរញ្ញប្បទាន ក្រោមទម្រង់កិច្ចសន្យាភាពជាដៃគូរវាងរដ្ឋ និងឯកជន (PPP) ឬទម្រង់សាងសង់-ប្រតិបត្តិការ (BOT) ដើម្បីប្រើប្រាស់ជាមូលដ្ឋាន ក្នុងការពិនិត្យលទ្ធភាពបន្តអនុវត្តន៍ គម្រោងសាងសង់ហេដ្ឋារចនាសម្ព័ន្ធដទៃទៀត។

ជាមួយនឹងការពេញចិត្តនេះ លោកបានលើកទឹកចិត្តដល់ក្រុមវិនិយោគរបស់ប្រទេសចិន បន្តចូលរួមជាមួយរដ្ឋាភិបាលក្នុងការបណ្ដាក់ទុនវិនិយោគផ្អែកតាមគំរូនេះផងដែរ។

លោកបញ្ជាក់ថា “ខ្ញុំបាទសូមធ្វើការគាំទ្រ និងជំរុញលើកទឹកចិត្តដល់ក្រុមហ៊ុនវិនិយោគ របស់ប្រទេសចិនដទៃទៀត ជាពិសេសក្រុមហ៊ុនសាជីវកម្មស្ពាន និងថ្នល់ចិន (CRBC) ឱ្យបន្តចូលរួមជាមួយរាជរដ្ឋាភិបាល ក្នុងការបណ្ដាក់ទុនវិនិយោគ លើគម្រោងជាអទិភាពផ្សេងៗទៀត ដែលរាជរដ្ឋាភិបាលបាននិងកំពុងពិនិត្យ និងពិភាក្សាដាក់ឱ្យអនុវត្តនាពេលឆាប់ៗនេះ”។

ផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានប្រកាសដាក់ឱ្យប្រើប្រាស់ជាផ្លូវការនៅថ្ងៃទី៩ ខែវិច្ឆិកា ឆ្នាំ២០២២។ ផ្លូវនេះមានប្រវែងសរុប១៨៧,០៥គីឡូម៉ែត្រ ដែលត្រូវបានវិនិយោគសាងសង់ដោយក្រុមហ៊ុន Cambodian PPSHV Expressway Co.,Ltd ដែលជាបុត្រសម្ព័ន្ធរបស់ក្រុមហ៊ុន សាជីវកម្មស្ពាននិងថ្នល់ចិន (CRBC) ក្រោមទម្រង់សាងសង់-ប្រតិបត្តិការ-ផ្ទេរ (BOT) និងប្រើប្រាស់ថវិការវិនិយោគប្រមាណ២០១៩លានដុល្លារអាមេរិក៕

 ដោយៈ តែម សុខុម

 បាងកកៈ ក្រុមហ៊ុនចម្រុះថៃ JKN Global Group Plc (JKN) ដែលបានទិញយកក្រុមហ៊ុនរៀបចំ ការប្រឡងបវរកញ្ញាចក្រវាល Miss Universe Organisation (MUO) កាលពីឆ្នាំមុនបានប្រកាសក្ស័យធនកាលពីថ្ងៃពុធ ទី៨ ខែវិច្ឆិកា។

ដំណឹងនៃការដាក់ពាក្យប្រកាសក្ស័យធន ដ៏គួរឱ្យភ្ញាក់ផ្អើលនេះ ធ្វើឡើងដោយសារម្ចាស់ថ្មីនេះ ជួបវិបត្តិសន្ទនិយភាព (ការគ្មានទ្រព្យសកម្មរាវ)។ នេះបើយោងតាមសារព័ត៌មាន The Nation ចុះផ្សាយកាលពីថ្ងៃព្រហស្បតិ៍ ទី៩ខែវិច្ឆិកា។
 ក្រុមហ៊ុន JKN បានជូនដំណឹងដល់ផ្សារហ៊ុនថៃ Stock Exchange of Thailand (SET) ថា ក្រមប្រឹក្សាភិបាលរបស់ខ្លួនបានរម្លាយចោលកាលពីថ្ងៃអង្គារ ទី៧ ខែវិច្ឆិកា ដើម្បីដាក់ពាក្យប្រកាសក្ស័យធនទៅតុលាការ ទទួលបន្ទុកដោះស្រាយការក្ស័យធន Central Bankruptcy Court ដើម្បីស្វះស្វែងសុំការការពារពីម្ចាស់បំណុល។  ក្រុមហ៊ុន JKN បានស្នើសុំឱ្យតុលាការជួយទទួលបន្ទុក និងអនុវត្តន៍ផែនការស្ដារក្រុមហ៊ុនរបស់ខ្លួនឡើងវិញ។

ក្រុមហ៊ុននេះ បានប្រាប់ផ្សារហ៊ុនថៃ (SET) ថា ខ្លួននឹងចាត់វិធានការស្ដារក្រុមហ៊ុនទាំង៥ចំណុចដូចខាងក្រោម ទី១- រៀបចំរចនាសម្ព័ន្ធអាជីវកម្ម និងហិរញ្ញវត្ថុឡើងវិញ ដើម្បីឆ្លើយតបទៅនឹងស្ថានភាពហិរញ្ញវត្ថុបច្ចុប្បន្នរបស់ខ្លួន និងដោះស្រាយវិបត្តិសន្ទនិយភាព (ការគ្មានទ្រព្យសកម្មរាវ)។

 ទី២– ស្វះស្វែងសុំបញ្ចុះអត្រាការប្រាក់ លើការរំលស់បំណុលដើម្បីឱ្យខ្លួន មានប្រាក់ចំណូលគ្រប់គ្រាន់ សម្រាប់បន្តដំណើរការអាជីវកម្ម ទី៣– ស្វះស្វែងរកមូលនិធិពីអ្នកវិនិយោគ និងស្ថាប័នហិរញ្ញវត្ថុថ្មីៗ។ ទី៤– លក់ចេញទ្រព្យសកម្មមិនដំណើរការ ដើម្បីបានប្រាក់ទូទាត់សងម្ចាស់បំណុល និងទី៥– ត្រៀមរៀបចំផែនការ ដើម្បីធានាបាននូវសន្ទនិយភាព៕ The Nation៕

ដោយ: គង់ លាងហួរ

បាងកក: រដ្ឋាភិបាល​ថៃបាន​បង្កើត​មជ្ឈមណ្ឌល​បញ្ជា​មួយ ​ដើម្បី​ស្វាគមន៍​ភ្ញៀវ​ទេសចរ​ មក​ពី​ប្រទេស​ឥណ្ឌា និង​កោះតៃវ៉ាន់​ក្រោម​គោល​នយោបាយ​លើកលែងទិដ្ឋាការ ដែល​គ្រោងនឹង​ចាប់​ផ្តើម​នៅ​ថ្ងៃ​សុក្រសប្តាហ៍នេះ។

ទីភ្នាក់ងារផ្សេងៗត្រូវបានណែនាំ ឲ្យចូលរួមចំណែកក្នុងគ្រប់មធ្យោបាយ ដែលពួកគេអាចធ្វើបាន ដើម្បីកាត់បន្ថយចំនួនមនុស្សច្រើនលើសលប់ នៅអាកាសយានដ្ឋានដុនមឿង និងអាកាសយានដ្ឋានសុវណ្ណភូមិ ខណៈរដូវកាលដែលមានភ្ញៀវទេសចរច្រើន(High season)ខិតជិតមកដល់។

រដ្ឋមន្ត្រីក្រសួងដឹកជញ្ជូនថៃ លោក Suriya Jungrungreangkit បានអះអាងថា លោកបានបញ្ជាដល់ភ្នាក់ងាររដ្ឋឱ្យរៀបចំខ្លួន ដើម្បីធានាភាពងាយស្រួលនៃការធ្វើដំណើរ និងសុវត្ថិភាពសម្រាប់ភ្ញៀវទេសចរបរទេស បន្ទាប់ពីរដ្ឋាភិបាលដាក់ចេញ គោលនយោបាយ ដែលអនុញ្ញាតឱ្យភ្ញៀវទេសចរឥណ្ឌា និងតៃវ៉ាន់ចូល និងស្នាក់នៅប្រទេសថៃ ដោយពុំចាំបាច់មានទិដ្ឋាការរយៈពេល៣០ថ្ងៃ។លោករដ្ឋមន្ត្រីបានបន្តថា អាកាសយានដ្ឋានថៃ (AOT) ត្រូវបានណែនាំឱ្យធ្វើការយ៉ាងជិតស្និទ្ធ ជាមួយភ្នាក់ងារផ្សេងៗ រួមទាំងអាជ្ញាធរអន្តោប្រវេសន៍ ដើម្បីសម្រួលដំណើរការ និងទប់ស្កាត់ការកកស្ទះ។

លោកបានមានប្រសាសន៍ឱ្យដឹងថា “មជ្ឈមណ្ឌលបញ្ជាត្រូវបានបង្កើតឡើង ដើម្បីសម្របសម្រួលកិច្ចខិតខំប្រឹងប្រែង ​របស់អ្នកផ្តល់សេវានៅអាកាសយានដ្ឋានទាំងអស់ ក្នុងការធានាការធ្វើដំណើរប្រក​បដោយភាពរលូនសម្រាប់ភ្ញៀវ ជាពិសេសគឺនៅអាកាសយានដ្ឋានសុវណ្ណភូមិ និងដុនមឿង”។

លោក Suriya បានឱ្យដឹងទៀតថា លោកបានណែនាំដល់ភ្នាក់ងារផ្សេងទៀត រួមទាំងផ្លូវដែក រថយន្តក្រុងអន្តរខេត្ត និងអាជ្ញាធរដែនសមុទ្រ ដើម្បីផ្តល់សេវាប្រកបដោយប្រសិទ្ធភាព និងបង្កើនការប្រុងប្រយ័ត្ន ផ្នែកសុវត្ថិភាពបន្ថែមទៀតសម្រាប់ភ្ញៀវទេសចរ។ លោកបានបន្ថែមថា គោលនយោបាយលើកលែងទិដ្ឋាការសម្រាប់ភ្ញៀវទេសចរមកពីប្រទេសឥណ្ឌា និងតៃវ៉ាន់ នឹងត្រូវបានអនុវត្ត ចាប់ពីថ្ងៃសុក្រ ទី១០ ខែវិច្ឆិកា ឆ្នាំនេះ រហូតដល់ថ្ងៃទី១០ ខែឧសភា ឆ្នាំ២០២៤ ដែលនេះជាផ្នែកមួយ នៃផែនការជំរុញវិស័យទេស​ចរណ៍ និងកំណើនសេដ្ឋកិច្ចរបស់យើង។

កាលពីមុននេះ រដ្ឋាភិបាលថៃបានយល់ព្រម ផ្តល់ការលើកលែងទិដ្ឋាការសម្រាប់ភ្ញៀវទេសចរ មកពីប្រទេសចិន និងកាហ្សាក់ស្ថាន ហើយគោលការណ៍​នេះ ​ត្រូវ​អនុវត្ត​រហូត​ដល់​ថ្ងៃ​ទី២៩ ខែ​កុម្ភៈ ឆ្នាំ២០២៤៕

ដោយៈ ហ្វីអូណា

        ភ្នំពេញៈ លោក តាន់ យុវរដ្ឋ អគ្គនាយករងនៃអគ្គនាយកដ្ឋានជំរុញពាណិជ្ជកម្ម ទទួលជួបពិភាក្សាការងារជាមួយ សភាពាណិជ្ជកម្មម៉ាឡេស៊ី-កម្ពុជា (Malaysia-Cambodia Chamber of Commerce) ។

ជំនួបនេះបានធ្វើឡើង នាព្រឹកថ្ងៃពុធ ទី៨ ខែវិច្ឆិកា ឆ្នាំ២០២៣ លោក តាន់ យុវរដ្ឋ អគ្គនាយករងនៃអគ្គនាយកដ្ឋាន ជំរុញពាណិជ្ជកម្ម បានទទួលជួបពិភាក្សាការងារ ជាមួយលោក Dato Sri Ricky Yaw  ប្រធានសភាពាណិជ្ជកម្មម៉ាឡេស៊ី-កម្ពុជា និងជាអគ្គនាយកក្រុមហ៊ុន EAKON Group និងសមាជិកប្រតិភូមកពីម៉ាឡេស៊ី នៅទីស្តីការក្រសួងពាណិជ្ជកម្ម ដោយមានការចូលរួម ពីលោកអនុប្រធាននាយកដ្ឋាន និងមន្រ្តីជំនាញ នៃនាយកដ្ឋានអភិវឌ្ឍន៍ទីផ្សារ។

គោលបំណងសំខាន់ នៃជំនួបពិភាក្សាការងារនេះ គឺដើម្បីផ្លាស់ប្តូរព័ត៌មានស្តីពីតម្រូវការទីផ្សារ និងណែនាំការផ្គូផ្គងដៃគូសហការក្នុងការវិនិយោគ រវាងវិស័យឯកជនកម្ពុជា និងម៉ាឡេស៊ី។ ភាគីម៉ាឡេស៊ី មានគម្រោងនឹងរៀបចំ ការផ្លាស់ប្តូរទស្សនកិច្ចរវាងធុរជនកម្ពុជា និងម៉ាឡេស៊ី ដោយនាំធុរជនកម្ពុជា ទៅទស្សនកិច្ចនៅម៉ាឡេស៊ីក្នុងខែមេសា និងនាំធុរជនម៉ាឡេស៊ីមកទស្សនកិច្ច នៅកម្ពុជាក្នុងខែកក្កដា ឆ្នាំ២០២៤ ដើម្បីសិក្សាស្វែងយល់ពីវិស័យអាជីវកម្ម និងវិនិយោគដែលអាចសហការគ្នាបាន។

ភាគីកម្ពុជាបានស្វាគមន៍គំនិតផ្តួចផ្តើម និងបេ្តជា្ញជួយសហការក្នុងការងារនេះ ប្រកបដោយការយកចិត្តទុកដាក់ខ្ពស់៕

        ដោយៈ គង់ ហ្វីអូណា

        ខេត្តកែបៈ អាជ្ញាធរ​ខេត្ត​កែប និង​គណៈ​កម្មាធិការ​ជាតិ​គ្រប់​គ្រង និង​អភិវឌ្ឍន៍​ឆ្នេរ​សមុទ្រ​កម្ពុជា បាន​ពិភាក្សា​គ្នា​ដើម្បី​រៀ​ប​ចំ​អភិវឌ្ឍ​ឆ្នេរ​សមុទ្រ​ក្នុង​ខេត្ត​ចំនួនបួន ក្នុង​នោះ​ខេត្ត​កែប ត្រូវ​បាន​ជ្រើស​រើស​អភិវ​ឌ្ឍន៍​មុន​គេ ក្នុង​​ការ​ធ្វើ​ឱ្យ​ឆ្នេរប្រវែង​២៧០០​ម៉ែត្រ ក្លាយ​ទៅ​ជា​ឆ្នេរ​លំដាប់​ពិភព​លោក​។

អភិបាលនៃគណៈអភិបាលខេត្តកែប លោកសោម ពិសិដ្ឋ បាន​ថ្លែង​ប្រាប់​ឱ្យ​ដឹង​នៅ​ថ្ងៃ​ទី​៨ ខែ​វិច្ឆិកា​ថា នៅ​ក្នុង​កិច្ច​ពិភាក្សា​ជា​មួយ​ប្រតិភូ​គណៈ​កម្មាធិការ​ជាតិ​គ្រប់​គ្រង និង​អភិវឌ្ឍន៍​ឆ្នេរ​សមុទ្រ​កម្ពុជា នា​ពេល​ថ្មី​នេះៗ ​​ភាគី​ទាំង​ពីរ​បាន​ជជែក​គ្នា​​ ពី​ផែន​ការ​រៀប​ចំ​អភិវឌ្ឍ​ខេត្ត​តំបន់​ឆ្នេរ​រួម​គ្នា រវាង​ខេត្ត​ព្រះសីហនុ កំពត កោះកុង និង​ខេត្ត​កែប​។ក្នុង​ផែន​ការ​រៀប​ចំ​អភិវឌ្ឍ​ខេត្ត​តំបន់​ឆ្នេរ​នេះ ប្រតិភូ​គណៈ​កម្មាធិការ​ជាតិបាន​​​ចាប់ផ្ដើម​ចុះ​ត្រួត​ពិនិត្យ​ និង​ស្រា​វជ្រាវ ដើម្បី​អភិវឌ្ឍ​ឆ្នេរ​នៅ​ក្នុង​ខេត្ត​កែប​មុន​គេ ខណៈ​ដែល​ក្នុង​ខេត្ត​នេះ កំពុង​តែ​អភិវឌ្ឍ​តំបន់​ឆ្នេរ​របស់​ខ្លួន​ជា​បណ្តើរៗ​ហើយ មាន​ដូច​ជា​ ឆ្នេរ​តាម​បណ្តា​កោះ និង​ឆ្នេរ​​អង្កោល​ជា​ដើម​។

លោកសោម ពិសិដ្ឋ បាន​ឱ្យដឹ​ង​ទៀត​ថា ក្រៅ​តែ​ពី​មាន​ការ​អភិវឌ្ឍ​​ឆ្នេរទាំ​ង​នេះ​ហើយ គណៈ​កម្មាធិការ​ជាតិ​គ្រប់​គ្រង​ និង​អភិវឌ្ឍន៍​ឆ្នេរ​សមុទ្រ​កម្ពុជា ក៏​បាន​ជ្រើស​រើស​តំបន់​ឆ្នេរ២​៧០០​ម៉ែត្រក្នុង​ខេត្ត​កែប ដែ​ល​ទើប​តែ​ចាក់​ដី​បំពេញ​ថ្មី ដើម្បី​​អភិវឌ្ឍ​​ឱ្យ​ក្លាយ​ទៅ​ជា​ឆ្នេរ​លំដាប់​ពិភព​លោកផងដែរ​​។

ទន្ទឹម​នេះ វា​ក៏​ជាកា​រ​ទាក់​ទាញ​ភ្ញៀវ​ទេសចរ ​​អន្តរ​ជាតិ​ផង​ដែរ ​ព្រោះ​គម្រោង​ផ្ដួច​ផ្ដើម​ កសាង​ផែ​ន​ការ​រៀប​ចំ​ដែនដីឆ្នេរ​កែប​នេះ ក្នុង​គោលដៅ​ធ្វើ​ឱ្យ​មាន​ភាព​ទាក់​ទាញ​ទាំង​ភ្ញៀវ​​​ជាតិ និង​​អន្តរ​ជាតិ ហើយ​ការ​អភិវឌ្ឍន៍​​ឆ្នេរ​នេះ​ដែរ វា​ក៏​មិន​មែន​រៀប​ចំ​ឡើង​ ដើម្បី​ធ្វើ​ការ​ប្រកួត​ប្រជែង​ជា​មួយ​ឆ្នេរ​សមុទ្រ ​ខេត្ត​ព្រះសីហនុ កំពត ឬ​​ខេត្ត​កោះកុង​ឡើយ ប៉ុន្តែ​ការ​រៀប​ចំ​នេះ ដើម្បី​ឱ្យ​តំបន់​ឆ្នេរ​សមុទ្រ​កម្ពុជា​ ​អាច​មាន​ការ​ប្រកួត​ប្រ​ជែ​​ង​ជា​មួយ​នឹង​ប្រទេស​នា​នា​បាន​។

អភិបាលខេត្តរូបនេះបានអះ​អាង​ថា ចំពោះ​ការ​អភិវឌ្ឍន៍​​តំបន់​ឆ្នេរ​នេះ​បែប​ណា​នោះ លោក​មិន​ដឹង​ច្បា​ស់​​នោះ​ទេ ដោយ​សារ​គណៈ​កម្មាធិការ​ជាតិ​គ្រប់​គ្រង និង​អភិវឌ្ឍន៍​ឆ្នេរ​សមុទ្រក​ម្ពុជា ​គ្រាន់​តែ​ចុះ​មក​ពិនិត្យមើ​​ល​ទីតាំង​សិន ហើយ​ក៏​មិន​ទាន់​ស្រាវ​ជ្រាវ​លម្អិត​ទាក់​ទង​នឹង​សក្ដានុពល​តំបន់​ឆ្នេរ​នេះ​នូវ​ឡើយ​ទេ​។ ប៉ុន្តែនៅ​​ក្នុង​ផែនការ​រៀប​ចំ​តំបន់​ឆ្នេរ២៧០០​ម៉ែត្រ​ក្នុង​ខេត្ត​កែប​នេះ អាច​មាន​ការ​រៀប​ចំហេដ្ឋា​រចនា​សម្ព័​ន្ធ ដូច​ជា ធ្វើ​ផ្លូវ​ថ្នើរ​ជើង ផ្លូវ​ជិះ​កង់​តាម​​បណ្តោយ​ឆ្នេរ ​កន្លែង​សម្រាប់​ទុក​ដាក់​សំរាម​ ដើម្បី​ឱ្យ​មាន​អនាម័យ​ល្អ​​នៅ​តាម​ឆ្នេរ​។​

ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីនបានមានប្រសាសន៍ថា ផែនការនេះ​ជា​ការ​ផ្ដួច​ផ្ដើម​មួយ​ដ៏​ល្អ​ស​ម្រាប់​ខេត្ត​កែប ក៏​ដូច​ជា​ប្រ​ទេស​កម្ពុជា​ទាំង​មូល​ផង​ដែរ ​ព្រោះ​​​ខេត្ត​កែប​ជា​ខេត្ត​តំបន់​ទេសចរណ៍​មួយ ​ដែល​ទាក់​ទាញ​ទាំង​ទេសចរ​ក្នុង​ស្រុក និង​ក្រៅ​ស្រុក​។

លោកស្រី​បន្ត​ថា “ក្រៅ​ពី​​នេះ​ខេត្ត​កែប​ក៏​មាន​ឆ្នេរ​ស្អាត និង​មាន​គ្រឿង​សមុទ្រ ​ដែល​មាន​រសជាតិ​ឆ្ងាញ់ ជាពិ​សេស​គឺ​មាន​ព្រៃ​កោង​កាង​”។លោក​ស្រីបន្ថែមថា ​“បើ​យើង​ប្រែ​ក្លាយ​ឱ្យ​ទៅ​ជា​តំបន់​ឆ្នេរ​លំដា​ប់​ពិភព​លោក វា​នឹង​រួម​ចំណែ​ក​ជួយ​ទៅ​ដល់ ​ការ​កើន​ឡើង​ភ្ញៀវ​​ទេសចរ​ក្នុង​ស្រុក ​និង​​ក្រៅ​ស្រុក និង​ការ​កើន​ឡើង​នៃ​សេដ្ឋកិច្ច​ជាតិ​តាម​រយៈ​អ្នក​នៅ​ក្នុង​មូលដ្ឋាន​ គាត់​អាច​ពង្រីក​អាជីវកម្ម​របស់​គាត់​បន្ថែម​ទៀត​ ដើម្បី​ទាក់ទា​ញ​ភ្ញៀវ​ទេសចរ​មក​លេង ​ហើយស្នាក់​នៅ​បាន​យូរ ខណៈ​ដែល​អ្នក​ទេសចរ​​ក្រឡេក​​ទៅ ​​ឃើញ​តែប​រិស្ថាន​ល្អ សណ្ដាប់​ធ្នាប់​ល្អ និង​សេវាកម្ម​ល្អ​ផង​ដែរ​”​៕

ដោយៈ តែម សុខុម

អាប៊ូដាប៊ីៈ ប្រទេសអារ៉ាប់រួមអេមីរ៉ាត បានធ្វើឱ្យសហរដ្ឋអាមេរិក និងសហភាពអឺរ៉ុប មិនសប្បាយចិត្តជាខ្លាំង ដោយសារការបន្តទំនាក់ទំនងរបស់ខ្លួនជាមួយរុស្ស៊ី ខណៈលោកខាងលិច ប្រឹងប្រែងដាក់ទណ្ឌកម្មសេដ្ឋកិច្ចលើក្រុងមូស្គូ ចំពោះការបញ្ឆេះសង្គ្រាមចូលឈ្លាន​ពានអ៊ុយក្រែន។

ប៉ុន្តែពេលនេះរដ្ឋាភិបាលក្រុងអាប៊ូដាប៊ី អាចនឹងធ្វើការកែសម្រួ​លគោលនយោបាយបរទេសរបស់ខ្លួនខ្លះៗ ស្របពេលមានការព្រួយបារម្ភកាន់តែខ្លាំងឡើងថា សង្គ្រាមរបស់អ៊ីស្រាអែល ទៅលើតំបន់ Gaza នៃទឹកដីប៉ាឡេស្ទីន អាចរីករាលដាលទូទាំងតំបន់មជ្ឈិមបូព៌ា។ នេះបើយោងតាមសារព័ត៌មាន Al Jazeera ចុះផ្សាយកាលពីថ្ងៃអង្គារ ទី៧ ខែវិច្ឆិកា។

កាលពីដើមខែកញ្ញា តំណាងមកពីចក្រភពអង់គ្លេស សហភាពអឺរ៉ុប និងសហរដ្ឋអាមេរិក បានធ្វើទស្សនកិច្ច ទៅកាន់ប្រទេសអារ៉ាប់រួមអេមីរ៉ាត ដើម្បីបង្ហាញពីការព្រួយបារម្ភរបស់ពួកគេ ចំពោះទំនាក់ទំនងរបស់ប្រទេសនេះជាមួយរុស្ស៊ី។

ជាពិសេសរដ្ឋាភិបាលលោកខាងលិច ទាំងនេះបានព្យាយាមរារាំងមិនឱ្យរុស្ស៊ី ទទួលបានផលិតផល ជាក់លាក់មួយចំនួនដូចជាបន្ទះឈីបកុំព្យូទ័រ និងគ្រឿងបង្គុំអេឡិចត្រូនិចជាដើម ដែលអាចត្រូវបានប្រើប្រាស់ ដើម្បីពង្រឹងការធ្វើសង្គ្រាមរបស់រុស្ស៊ី។

កាលពីដើមឆ្នាំនេះ រដ្ឋាភិបាលក្រុងវ៉ាស៊ីនតោន បានព្រមានប្រ​ទេសអារ៉ាប់រួមអេមីរ៉ាត ប្រទេសអូម៉ង់ និងប្រទេសតួកគី ប្រឆាំងនឹងការគេចវេះទណ្ឌកម្ម និងការរឹតបន្តឹងការនាំចេញ ដែលត្រូវបានដាក់ទៅលើរដ្ឋាភិបាលក្រុងមូស្គូ កាលពីឆ្នាំមុន។

បន្ទាប់មកនៅខែមេសា សហរដ្ឋអាមេរិក បានដាក់ទណ្ឌកម្មលើស្ថាប័នពីរដែលមានមូលដ្ឋាន នៅក្នុងប្រទេសអារ៉ាប់រួមអេមីរ៉ាត គែក្រុមហ៊ុនបច្ចេកវិទ្យាដ្រូន Aeromotus Unmanned Aerial Vehicles Trading LLC និងក្រុមហ៊ុនបោះដុំគ្រឿងអេឡិចត្រូនិក Hulm Al Sahra Electric Devices Trading។

យោងតាមក្រសួងរតនាគារអាមេរិកបានឱ្យដឹងថា ក្រុមហ៊ុន Aeromotus បានបញ្ជូនយន្តហោះដ្រូន និងបច្ចេកវិទ្យាមនុស្សយន្តមួយចំនួនឱ្យទៅអ្នកនាំចូលរុស្ស៊ី ក្រោយផ្ទុះសង្គ្រាមនៅក្នុងប្រទេសអ៊ុយក្រែន។

រដ្ឋាភិបាលក្រុងវ៉ាស៊ីនតោន បានដាក់ទណ្ឌកម្មលើក្រុមហ៊ុន Hulm Al Sahra Electric Devices Trading ចំពោះការបញ្ជូនបន្ទះឈីបអាមេរិក តម្លៃប្រមាណ១៩០.០០០ដុល្លារ ដែលត្រូវស្ថិតក្រោមការគ្រប់គ្រងរបស់សហរដ្ឋអាមេរិក លើការនាំចេញ ព្រមទាំងគ្រឿងចក្រ គ្រឿងអគ្គិសនី និងអុបទិកទៅឱ្យក្រុមហ៊ុនរុស្ស៊ី នៅក្នុងឆមាសទី២ ឆ្នាំ២០២២ ផងដែរ។

មិនយូរប៉ុន្មានបន្ទាប់ពីដំណើរទស្សនកិច្ច របស់ក្រុមមន្ត្រីលោកខាងលិច ទៅកាន់ប្រទេសអារ៉ាប់រួមអេមីរ៉ាត សារព័ត៌មានដ៏ល្បីល្បា​ញBloomberg បានចុះផ្សាយថា អាជ្ញាធរអារ៉ាប់រួមអីមីរ៉ាត កំពុងពិចារណាដាក់ចេញអាជ្ញាប័ណ្ណ នាំចេញលើបច្ចេកវិទ្យាជាក់លាក់មួយចំនួនរួមទាំងបន្ទះឈីបផងដែរ។

ទោះជាយ៉ាងណា រដ្ឋាភិបាលក្រុងអាប៊ូដាប៊ី មិនទាន់បានដាក់ចេញវិធានការទាំងនេះនៅឡើយទេ។ ប្រសិនបើមានចំណាត់ការណាមួយបែបនេះ នោះគឺមិនត្រឹមដោយសារ ទទួលរងសម្ពាធកាន់តែខ្លាំងឡើងពីលោកខាងលិចប៉ុណ្ណោះទេ ប៉ុន្តែក៏ដោយសារការគំរាមកំហែងកាន់តែខ្លាំងឡើង ពីសង្គ្រាមអ៊ីស្រាអែល-ក្រុមហាម៉ាស ដែលអាចរីករាលដាលទូទាំងតំបន់មជ្ឈិមបូព៌ាផងដែរ។

យោងតាមក្រុមអ្នកជំនាញឱ្យដឹងថា នៅក្នុងសេនារីយោនោះ ប្រទេសអារ៉ាប់រួមអេមីរ៉ាត នឹងចង់ជួយគាំទ្រដល់សហរដ្ឋអាមេរិក ដែលជាអ្នកធានាការពារសុវត្ថិភាពរបស់ខ្លួន។

លោក Imad Harb នាយកផ្នែកស្រាវជ្រាវ និងវិភាគនៅ Arab Center Washington DC ដែលមានមូលដ្ឋាននៅសហរដ្ឋអាមេរិក លើកឡើងថា “ប្រទេសអារ៉ាប់រួមអេមីរ៉ាត និងបណ្ដាប្រទេសនៅឈូងសមុទ្រផ្សេងទៀត មិនចង់ធ្វើឱ្យប៉ះពាល់ដល់ទំនាក់ទំនង ជាមួយប្រទេសរុស្ស៊ីប៉ុន្មានឡើយ”។

អ្នកជំនាញរូបនេះលើកឡើងទៀតថា ការដាក់ចេញអាជ្ញាប័ណ្ណនាំចេញទាំងនេះ ប្រហែលជាមិនធ្វើឱ្យប៉ះពាល់ធ្ងន់ធ្ងរ ដល់ដល់ទំនាក់ទំនងរបស់រដ្ឋាភិបាលក្រុងអាប៊ូដាប៊ី ជាមួយក្រុងមូស្គូ នោះឡើយ។

លោកបានប្រាប់សារព័ត៌មាន Al Jazeera ថា “ប្រទេសអារ៉ាប់រួមអេមីរ៉ាត តែងតែលក់បច្ចេកវិទ្យានេះ តាមរយៈប្រទេសអ៊ីរ៉ង់ ដែលមានទំនាក់ទំនងល្អ ជាមួយប្រទេសរុស្ស៊ី ហើយប្រហែលជាចង់ជួយរដ្ឋាភិបាលក្រុងម៉ូស្ពូបញ្ជៀសទណ្ឌកម្ម”៕ Al Jazeera ៕