ដោយ: គង់ លាងហួរ

អន្តរជាតិ: ស្ពានដ៏វែងបំផុតរបស់ប្រទេសហ្វីលីពីន ដែលមានឈ្មោះថា Panguil Bay សម្រេចបានការសាងសង់ប្រមាណ៩០ភាគរយហើយ ដោយគ្រោងនឹងបញ្ចប់រួចរាល់ត្រឹមឆ្នាំ២០២៤នេះ។

ស្របពេលដែលការសាងសង់ជិតបញ្ចប់ អ្នកស្រុក និងភ្ញៀវទេសចរកំពុងរង់ចាំដោយអន្ទះសារ នូវការបើកសម្ពោធស្ពាននេះ ដែលនឹងតភ្ជាប់ខេត្ត Lanao Del Norte និងខេត្ត Misamis Occidental យ៉ាងរលូន ដែលនឹងជួយបង្កើនចរាចរណ៍ធ្វើដំណើរឆ្លងកាត់កោះ Mindanao ។

ស្ពានដ៏វែងអន្លាយមួយនេះ មានប្រវែង៣,៧៧គីឡូម៉ែត្រ និងចំណាយថវិកាសាងសង់ ចំនួន១១៤លានដុល្លារអាមេរិក ដោយមានទីតាំងលើកោះMindanao ដែលសម្បូរទៅដោយធនធាន ស្ថិតនៅភាគខាងត្បូងនៃប្រទេសហ្វីលីពីន។ស្ពាននេះត្រូវបានចាប់ផ្តើមសាងសង់ជាផ្លូវការ នៅថ្ងៃទី២៨ ខែកុម្ភៈ ឆ្នាំ២០២០ បន្ទាប់ពីគម្រោងត្រូវបានពន្យារពេលអស់មួយរយៈ ដោយសារតែជំងឺរាតត្បាតកូវីដ-១៩ និងបញ្ហាអាកាសធាតុ រួមជាមួយនឹងបញ្ហាថវិកា។

ប៉ុន្តែនៅពេលនេះ ដោយសារតែការសាងសង់ កំពុងបោះជំហានទៅមុខក្នុងល្បឿនដ៏លឿន។ ដូច្នេះស្ពាន Panguil Bay នេះអាចត្រូវបានសាងសង់បញ្ចប់ និងបើកសម្ពោធដាក់ឱ្យប្រើប្រាស់ នៅដំណាច់ឆ្នាំ២០២៤នេះ។

នៅពេលបញ្ចប់ការសាងសង់រួចរាល់ជាស្ថាពរ ស្ពានPanguil Bay នឹងវ៉ាដាច់ស្ពានស្ពាន San Juanico ដែលជាស្ពានវែងបំផុតនៅក្នុងប្រទេសហ្វីលីពីន នាពេលបច្ចុប្បន្ន។

យោងតាមរបាយការណ៍ប្រចាំខែកុម្ភៈ ឆ្នាំ២០២៤ របស់នាយកដ្ឋានសាធារណការ និងផ្លូវហាយវេហ្វីលីពីន (DPWH) បង្ហាញថា ស្ពាននេះ នឹងជួយបង្កការធ្វើដំណើរកាន់តែរលូន និងការតភ្ជាប់កាន់តែលឿនរវាងខេត្តចំនួនពីរខាងលើ និងកោះ Mindanaoទាំងមូល។

ការ​បញ្ចប់​គម្រោង​សាងសង់ស្ពាន Panguil Bay នឹង​ក្លាយជាព្រឹត្តិការណ៍ដ៏សំខាន់​មួយ​ នៅក្នុង​ការ​អភិវឌ្ឍ​ន៍ហេដ្ឋារចនាសម្ព័ន្ធ​របស់​កោះ Mindanao។

ភាពអស្ចារ្យផ្នែកវិស្វកម្មនេះ នឹងកាត់បន្ថយពេលវេលាធ្វើដំណើរយ៉ាងច្រើន ជំរុញកំណើនសេដ្ឋកិច្ច និងលើកកម្ពស់ទំនាក់ទំនងដឹកជញ្ជូនរវាងខេត្តភាគខាងជើង និងភាគកណ្តាលនៃកោះMindanao និងឧបទ្វីប Zamboanga៕

        ដោយៈ គង់ សូរិយា

កំពតៈ ខេត្តកំពត ដែលមានសក្តានុពលលើវិស័យទេសចរណ៍ធម្មជាតិ និងប្រវត្តិសាស្រ្តផងដែរនោះ នៅតែទាក់ទាញការចាប់អារ​ម្មណ៍លើការទិញ លក់ដីធ្លីឬយ៉ាងណានៅដើមឆ្នាំ២០២៤នេះ?។

អ្នកជំនាញដីធ្លីនៅមូលដ្ឋាន លោកគឹម សង្រ្គាមនាយកប្រតិបត្តិក្រុមហ៊ុន​HIPPO Project Salesបានមានប្រសាសន៍ឲ្យដឹងតាមបណ្តាញតេឡេក្រាមកាលពីថ្ងៃទី៦ មិនាថា គិតរហូតមកទល់ពេលនេះការទិញលក់ដីឡូត៍ ដីលំហែរមានសភាពស្ងប់ស្ងាត់នៅឡើយ ប៉ុន្តែមានចរន្តទិញលក់ដីបែបរមណីយដ្ឋាន ដែលអ្នកទិញភាគច្រើនមកពី​រាជធានីភ្នំពេញ។

លោកបន្តថា “មានសកម្មភាពទិញលក់លើដី ដែលអាចសាងសង់ជារមណីយដ្ឋានតូចធំខ្លះៗ ដែលទំហំទឹកប្រាក់វិនិយោគមានតូច ធំអាស្រ័យលើទីតាំងអំណោយផល”។ លោកបន្តថា “តម្លៃដីនៅក្នុងខេត្តកំពតមិនសូវមានការធ្លាក់ចុះទេ លើកលែងតែម្ចាស់ប្រញាប់លុយ ដែលបានដាក់លក់បន្ទាន់”។

អភិបាលនៃគណៈអភិបាលខេត្តកំពត លោកម៉ៅ ធនិនកាលពីពេលថ្មីៗនេះ បានប្រកាសរៀបចំព្រែកទាំងអស់ក្នុងខេត្តកំពត ជាតំបន់អភិវឌ្ឈន៍ និងទាក់ទាញភ្ញៀវទេសចរណ៍ជាតិ អន្តរជាតិ។

ចំណែកលោក យឺ វណ្ណី អ្នកជំនាញដីធ្លីនៅខេត្តកំពត និងធ្លាប់បានអភិវឌ្ឈន៍ដីឡូត៍ផ្ទាល់ខ្លួន ​បានមានប្រសាសន៍ឲ្យដឹងនៅថ្ងៃដដែលថា សម្រាប់អ្វី ដែលលោកផ្តោតនាពេលបច្ចុប្បន្ននេះ គឺផលិតវីដេអូផ្សព្វផ្សាយ ឲ្យម្ចាស់រមណីយដ្ឋាននានា ដើម្បីទាក់ទាញភ្ញៀវទេសចរណ៍ជាតិ អន្តរជាតិ ស្របពេលទីផ្សារ និងចរន្តទិញលក់ដីធ្លី នៅតែបន្តស្ងប់ស្ងាត់នៅដើមឆ្នាំ២០២៤នេះ។

លោកបន្តថា “យើងសង្ឃឹមថាអ្វីៗ នឹងប្រសើរឡើងនាពេលខាងមុខ ខណៈសេដ្ឋកិច្ចរបស់ប្រទេស កំពុងបង្ហាញកំណើនល្អប្រសើរបណ្តើរៗ។

ក្រៅពីដងព្រែកដ៏ខ្វាត់ខ្វែង ខេត្តកំពតក៏មានសក្តានុពលលើតំបន់កំពូលភ្នំបូកគោ ដែលក្រុមហ៊ុនSokha Real Estateកំពុងសាងសង់ពុទ្ឋបដិមាកំពស់១០៨ម៉ែត្រ នៅចំណុចវាលស្រែ៥០០ ដែលពេល​សាងសង់រួច ពុទ្ឋបដិមានេះ នឹងទាក់ទាញភ្ញៀវទេសចរណ៍ជាតិ អន្តរជាតិជាច្រើនទៅទស្សនា និងបន់ស្រន់សុំសេចក្តីសុខ ចម្រើននៅក្នុងខេត្តនេះ៕

ដោយ: គង់ លាងហួរ

អន្តរជាតិ: ការខូចខាតខ្សែកាបក្រោមបាតសមុទ្រ ក្នុងសមុទ្រក្រហម កំពុងរំខានដល់បណ្តាញទូរគមនាគមន៍ និងបង្ខំឱ្យអ្នកផ្តល់សេវាត្រូវប្តូរទិស ចំនួនមួយភាគបួននៃចរាចរណ៍រវាងទ្វីបអាស៊ី ទ្វីបអឺរ៉ុប និងតំបន់មជ្ឈិមបូព៌ា រួមទាំងចរាចរណ៍អ៊ីនធឺណេតផងដែរ។

យោងតាមប្រភពពីក្រុមហ៊ុនទូរគមនាគមន៍ហុងកុង HGC Global Communications បានឱ្យដឹងថា ខ្សែកាប ដែលជាកម្មសិទ្ធិរបស់បណ្តាញទូរគមនាគមន៍ធំៗចំនួន៤ ត្រូវបានកាត់ផ្តាច់ ដែលបណ្តាលឱ្យមានការរំខាន ដល់បណ្តាញទំនាក់ទំនង នៅតំបន់មជ្ឈិមបូព៌ា។ក្រុមហ៊ុន HGC បានគូសបញ្ជាក់នៅក្នុងសេចក្តីថ្លែងការណ៍មួយ ដោយធ្វើការប៉ាន់ប្រមាណថា “ចំនួន២៥ភាគរយ នៃចរាចរណ៍អ៊ីនធឺណេតរវាងទ្វីបអាស៊ី និងទ្វីបអឺរ៉ុប ព្រមទាំងតំបន់មជ្ឈិមបូព៌ាត្រូវបានរងផលប៉ះពាល់”។

ក្រុមហ៊ុនបានបន្តឱ្យដឹងទៀតថា ខ្លួនកំពុងប្តូរផ្លូវចរាចរណ៍អ៊ីនធឺណេត ដើម្បីកាត់បន្ថយការរំខានដល់អតិថិជន និងពង្រីកការផ្តល់ជំនួយទៅដល់អាជីវកម្មាទាំងឡាយណា ដែលរងផលប៉ះពាល់ផងដែរ។

ទោះជាយ៉ាងណាក្តី ក្រុមហ៊ុន HGC មិន​បាន​បញ្ជាក់ថា​ តើ​ខ្សែ​កាបក្រោមបាតសមុទ្រ បានរងការខូច​ខាតដោយ​របៀប​ណា ឬ​អ្នក​ណា​ជា​អ្នក​ទទួល​ខុស​ត្រូវ​នោះ​ទេ។ក្រុមហ៊ុនទូរគមនាគមន៍អាហ្វ្រិកខាងត្បូង Seacom ដែលជាម្ចាស់ប្រព័ន្ធខ្សែកាបមួយ ដែលរងផលប៉ះពាល់ដែរនោះ បានថ្លែងប្រាប់កាសែត CNN ថា “ការជួសជុលនឹងមិនទាន់ចាប់ផ្តើមទេ ហើយយើងត្រូវរង់ចាំយ៉ាងហោចណាស់១ខែទៀត ដោយសារតែយើងត្រូវរង់ចាំយូរ មុននឹងទទួលបានការអនុញ្ញាត ឱ្យដំណើរការជួសជុលនៅក្នុងតំបន់នេះ”។

ខ្សែកាបក្រោមបាតសមុទ្រ គឺជាកម្លាំងមើលមិនឃើញ ដែលជំរុញអ៊ីនធឺណេត ដោយខ្សែកាបជាច្រើនទទួលបានមូលនិធិ នារយៈពេលប៉ុន្មានឆ្នាំថ្មីៗនេះ ពីក្រុមហ៊ុនអ៊ីនធឺណេតខ្នាតយក្ស ដូចជា Google  Microsoft  Amazon និងMeta។

ការខូចខាតបណ្តាញខ្សែកាបបាតសមុទ្រទាំងនេះ អាចបណ្តាលឱ្យមានការដាច់អ៊ីនធឺណេតយ៉ាងទូលំទូលាយ ដូចដែលធ្លាប់បានកើតឡើង បន្ទាប់ពីការរញ្ជួយដីនៅកោះតៃវ៉ាន់ក្នុងឆ្នាំ២០០៦។

ការខូចខាតខ្សែកាបនៅក្នុងសមុទ្រក្រហម កើតឡើងប៉ុន្មានសប្តាហ៍ បន្ទាប់ពីរដ្ឋាភិបាលប្រទេសយេម៉ែន បានព្រមានអំពីលទ្ធភាព ដែលក្រុមឧទ្ទាម Houthi នឹងកំណត់គោលដៅវាយប្រហារទៅលើខ្សែកាប។ នៅពេលនេះ ក្រុមសកម្មប្រយុទ្ធ Houthi ដែលគាំទ្រដោយអ៊ីរ៉ង់ បានបង្អាក់ខ្សែសង្វាក់ផ្គត់ផ្គង់សកល ដោយវាយប្រហារលើកប៉ាល់ពាណិជ្ជកម្មនៅក្នុងផ្លូវទឹកដ៏សំខាន់។

យោងតាមរបាយការណ៍ កាលពីសប្តាហ៍មុនពីទីភ្នាក់ងារសារព័ត៌មានរបស់អ៊ីស្រាអែល Globes បានចោទប្រកាន់ថា ក្រុម Houthi បានស្ថិតនៅពីក្រោយការបំផ្លាញខ្សែកាបទាំងនេះ។

ឆ្លើយតបនឹងរឿងនេះ មេដឹកនាំក្រុមឧទ្ទាមយេម៉ែន លោក Abdel Malek al-Houthi បានបដិសេធការចោទប្រកាន់នេះ ដោយលើកឡើងថា​ “យើង​មិន​មាន​ចេតនា ​ក្នុង​ការ​កំណត់​គោលដៅ​ខ្សែកាប​ក្រោមសមុទ្រ​ ដែល​ផ្តល់​អ៊ីនធឺណេត​ ទៅដល់​បណ្តាប្រទេស​នៅក្នុង​តំបន់​នោះ​ទេ”៕

        ដោយៈ គង់ សូរិយា

        សៀមរាបៈ គណៈកម្មាធិការទីក្រុងឆ្លាតវៃ និងគណៈកម្មាធិការសម្របសម្រួលរួមបើកកិច្ចប្រជុំលើកទី៥​ នៃគម្រោងអនុវត្តវិធីសាស្ត្រទីក្រុងឆ្លាតវៃ ដើម្បីដោះស្រាយបញ្ហាទីក្រុងក្នុងខេត្តសៀមរាប។

កិច្ចប្រជុំគណៈកម្មាធិការទីក្រុងឆ្លាតវៃ(SCC)​ និងគណៈកម្មាធិការសម្របសម្រួលរួម(JCC) កាលពីដើមសប្តាហ៍នេះ បានបើកកិច្ចប្រជុំលើកទី៥ នៃគម្រោងអនុវត្តវិធីសាស្ត្រទីក្រុងឆ្លាតវៃ ដើម្បីដោះស្រាយបញ្ហាទីក្រុង ក្នុងខេត្តសៀមរាប និងចុះហត្ថលេខាលើកំណត់ត្រា នៃកិច្ចប្រជុំ MR រវាងរដ្ឋបាលខេត្តសៀមរាប និងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA)​។

ការចុះហត្ថលេខានេះ ធ្វើឡើងក្នុងគោលបំណង ដើម្បីត្រួតពិនិត្យវឌ្ឍនភាពនៃគម្រោង សកម្មភាពនាពេលអនាគតនៃគម្រោង ដោ​យក្រោមអធិបតីភាព លោក យុន លីនណេ អភិបាលរងខេត្ត​ និង លោកTanaka Yukinari ប្រធានក្រុមទី២​ នៃក្រុមការងារអភិវឌ្ឍទីក្រុង និងតំបន់ នៃនាយកដ្ឋានអភិវឌ្ឍហេដ្ឋារចនាសម្ព័ន្ធប្រចាំទីស្នាក់ការកណ្តាលនៃទីភ្នាក់ងារ សហប្រតិបត្តិការអន្តរជាតិជប៉ុន (JICA)។

លោក​យុន លីនណេ អភិបាលរងខេត្តសៀមរាប បានមានប្រ​សាសន៍ថា រដ្ឋបាលខេត្តសៀមរាប បានទទួលនូវជំនួយកិច្ចសហប្រតិ​បត្តិការបច្ចេកទេស ពីទីភ្នាក់ងារសហប្រតិបត្តិការអន្តរជាតិជប៉ុន(JICA) អស់រយៈពេលជាង៤ឆ្នាំមកហើយលើការសិក្សា និងរៀបចំផែនការយុទ្ធសាស្រ្តអភិវឌ្ឍន៍ ទីក្រុងសៀមរាប នៃខេត្តសៀមរាប ឱ្យក្លាយទៅជាទីក្រុងឆ្លាតវៃ តាមរយៈការសិក្សាស្វែងរកបញ្ហាប្រឈម និងបានរៀបចំជាផែនទីបង្ហាញផ្លូវ “សៀមរាបឆ្លាតវៃ”។

លោកបានបន្តថា ទីភ្នាក់ងារសហប្រតិបត្តិការអន្តរជាតិ នៃប្រទេ​សជប៉ុន ក៏បានសហការ និងគាំទ្រយ៉ាងពេញទំហឹង ដល់រដ្ឋបាលខេត្ត ក្នុងការដាក់ឲ្យអនុវត្តន៍ គម្រោងសាកល្បងទីក្រុងឆ្លាតវៃចំនួន៦ ក្នុងក្រុងសៀមរាប ដែលក្នុងនោះគម្រោងមួយចំនួនបានបញ្ចប់ ហើយគម្រោងមួយចំនួនទៀត បាននិងកំពុងអនុវត្ត និងដំណើរការស្របតាមផែនការរបស់គម្រោង។

ជាមួយគ្នានេះ រដ្ឋបាលខេត្តសៀមរាប និងភ្នាក់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន បាននឹងកំពុងសិក្សាលើគម្រោងសាកល្បងសម្រាប់វគ្គទី២ បន្ថែមថ្មីចំនួន២ទៀត ដូចជាទី១ការប្រមូល និងដឹកជញ្ជូនកាកសំណល់ឆ្លាតវៃ និងទី២ ការអភិវឌ្ឍប្រព័ន្ធថ្នាលទិន្ន​ន័យ(Data platform) ដើម្បីអនុវត្តនាពេលខាងមុខផងដែរ។

លោកអភិបាលរងខេត្ត បានបន្ថែមថា ការរៀបចំក្រុងសៀមរាបជាទីក្រុងឆ្លាតវៃ គឺទាមទារនូវការកសាងសមត្ថភាព ដល់មន្រ្តីរបស់រដ្ឋបាលខេត្តសៀមរាប មន្ទីរ អង្គភាពពាក់ព័ន្ធ ក៏ដូចជារដ្ឋបាលក្រុងសៀមរាប ក្នុងរយៈពេលយូរបន្ថែមទៀត ពីព្រោះទីក្រុងឆ្លាតវៃនេះ គឺជាបរិបទមួយថ្មីសម្រាប់ប្រទេសកម្ពុជា។

ជាមួយគ្នានេះដែរ ការរៀបចំប្រព័ន្ធ និងរចនាសម្ព័ន្ធរបស់រដ្ឋបាលខេត្ត ក៏ដូចជារដ្ឋបាលក្រុងសៀមរាប សម្រាប់ការកសាងទំនាក់ទំនងរវាងរដ្ឋបាលខេត្តជាមួយឯកជន និងបណ្តាសាកលវិទ្យាល័យនានា ក៏ដូចជាប្រជាពលរដ្ឋ អំពីទីក្រុងឆ្លាតវៃ ក៏ជាចំណុចដ៏សំខាន់ ក៏ប៉ុន្តែចំណុចនេះយើងនៅខ្វះខាតនៅឡើយ។

ម្យ៉ាងវិញទៀត គម្រោងកិច្ចសហប្រតិបត្តិការបច្ចេកទេសរវាងរដ្ឋបាលខេត្តសៀមរាប និងទីភ្នាក់ងារ JICA ក៏គ្រោងនឹងបញ្ចប់ក្នុងឆ្នាំ ២០២៥ ខាងមុខនេះដែរ ដែលបញ្ហានេះគឺជាការព្រួយបារម្ភមួយយ៉ាងខ្លាំងសម្រាប់រដ្ឋបាលខេត្តសៀមរាប។

ឆ្លៀតក្នុងឱកាសនោះដែរលោក អភិបាលរងខេត្ត​ ក៏បានមានប្រសាសន៍សំណូមពរដល់ ក្រុមការងារទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន សូមពិនិត្យលទ្ធភាពក្នុងការបន្តការអនុវត្តគម្រោង នៃកិច្ចសហប្រតិបត្តិការបច្ចេកទេស សម្រាប់ការជួយរៀបចំទីក្រុងសៀមរាបជាទីក្រុងឆ្លាតវៃ នៅក្នុងដំណាក់កាលទី២ បន្តទៀត បន្ទាប់ពីជំហានទី១ ដែលនឹងត្រូវបញ្ចប់នៅក្នុងខែឧសភា ឆ្នាំ២០២៥ខាងមុខ ដោយលោកសង្ឃឹមយ៉ាងមុតមាំថា ថ្នាក់ដឹកនាំ នៃទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន( JICA )នឹងពិនិត្យទៅលើសំណើនេះដោយក្តីអនុគ្រោះជាទីបំផុតផងដែរ។

នៅក្នុងកិច្ចប្រជុំក៏មានការធ្វើបទបង្ហាញ ពីក្រុមការងារជំនាញនៃទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន និងក្រុមការងា​ររដ្ឋបាលខេត្តសៀមរាប ដោយបានធ្វើបទបង្ហាញនូវចំណុចលំអិតជាច្រើនទាក់ទងនឹងការអ​នុវត្តនិតិវិធីនានា ដើម្បីធ្វើឲ្យទីក្រុងសៀមរាបក្លាយជាទីក្រុងឆ្លាតវៃ និងមានការអភិវឌ្ឍប្រកបដោយចីរភាព៕

ដោយ: គង់ លាងហួរ

ប៉េកាំង: នាយករដ្ឋមន្ត្រីចិន លោកLi Qiang បានមានប្រសាស ន៍ឱ្យដឹង កាលពីថ្ងៃអង្គារ ថា ប្រទេសចិនគ្រោងនឹងកំណត់គោលដៅកំណើនសេដ្ឋកិច្ច ក្នុងរង្វង់ប្រហែល៥ភគរយនៅឆ្នាំ២០២៤នេះ។

លោក Li អះអាងថា ប្រទេសចិនកំពុងធ្វើការផ្លាស់ប្តូរ គំរូនៃការអភិវឌ្ឍន៍របស់ខ្លួន ទប់ស្កាត់ការលើសចំណុះផ្នែកឧស្សាហកម្ម កាត់បន្ថយហានិភ័យនៃវិស័យអចលនទ្រព្យ និងកាត់បន្ថយការចំណាយខ្ជះខ្ជាយរបស់រដ្ឋបាលក្នុងតំបន់។

លោក Li បានថ្លែងសុន្ទរកថាបែបនេះ នៅក្នុងកិច្ចប្រជុំសភាប្រជាជនចិនប្រចាំឆ្នាំ (NPC) ដែលរៀបចំឡើងនៅសាលធំប្រជាជន ក្នុងរដ្ឋធានីប៉េកាំង ចាប់ពីថ្ងៃទី៥ ខែមីនា ដល់ថ្ងៃទី១១ ខែមីនា។

លោក Li បានបន្តថា “យើងមិនគួរមើលរំលង ឬបំភ្លេចចោលករណីសេណារីយ៉ូដ៏អាក្រក់បំផុតនោះទេ ហើយយើងគួរតែត្រៀមរៀបចំខ្លួនឱ្យបានល្អសម្រាប់ហានិភ័យ និងបញ្ហាប្រឈមទាំងអស់”

លោកបន្ថែមថា “ជាពិសេស យើងត្រូវតែជំរុញទៅមុខ ជាមួយនឹងការផ្លាស់ប្តូរគំរូកំណើនសេដ្ឋកិច្ច ព្រមទាំងធ្វើឱ្យមានការកែសម្រួលរចនាសម្ព័ន្ធ ការកែលម្អគុណភាព និងការលើកកម្ពស់ការអនុវត្ត”។

ជាមួយគ្នានេះ លោក Ben Bennett អ្នកយុទ្ធសាស្រ្តផ្នែកវិនិយោគប្រចាំតំបន់អាស៊ីប៉ាស៊ីហ្វិក នៅក្រុមហ៊ុន Legal And General Investment Management បានមានប្រសាសន៍ឱ្យដឹងថា អ្នកបង្កើតគោលនយោបាយ ហាក់ដូចជាសប្បាយចិត្ត ជាមួយនឹងគន្លងបច្ចុប្បន្ន ដោយលោកបន្ថែមថា គោលដៅសេដ្ឋកិច្ចដែលចិនបានកំណត់នៅឆ្នាំនេះ គឺស្របតាមការរំពឹងទុក។

លោកនាយករដ្ឋមន្ត្រីចិន Li Qiang បានអះអាងទៀតថា “ក្នុងការកំណត់គោលដៅកំណើនសេដ្ឋកិច្ច អ្នកបង្កើតគោលនយោបាយបានគិតគូរពីតម្រូវការក្នុងការជំរុញការងារ និងប្រាក់ចំណូល ព្រមទាំងការពារ និងកាត់បន្ថយហានិភ័យ ដោយបន្ថែមថា ប្រទេសចិនមានបំណងប្រកាន់ជំហរសារពើពន្ធសកម្ម និងគោលនយោបាយរូបិយវត្ថុប្រកបដោយភាពប្រុងប្រយ័ត្ន”។

បើក្រឡេកមកមើលពីបញ្ហាកោះតៃវ៉ាន់វិញ ទីក្រុងប៉េកាំងអះអា​ងថា ខ្លួននឹងប្រកាន់ជំហររឹងមាំ ក្នុងការជំរុញបុព្វហេតុនៃការបង្រួបបង្រួមប្រទេសចិនឡើងវិញ ដោយទម្លាក់ចោលការលើកឡើងអំពីការបង្រួបបង្រួមដោយសន្តិភាព។

ក្រុមមន្ត្រី​ចិនបាន​ប្តេជ្ញា​ថា​ នឹង​ប្រឆាំង​យ៉ាង​ដាច់​អហង្ការ​ចំពោះ​សកម្មភាព​បំបែក​ខ្លួន​ ដែល​មាន​គោល​បំណង ​ដើម្បីប្រកាសឯករាជ្យ​ភាព​របស់តៃវ៉ាន់ និង​ការ​ជ្រៀត​ជ្រែក​ពី​ខាង​ក្រៅ។ ជាមួយគ្នានេះ ប្រទេសចិន នឹងបង្កើនការចំណាយលើវិស័យការពារជាតិ ចំនួន៧,២ភាគរយនៅឆ្នាំនេះ ដែលជាអត្រាដូចគ្នាកាលពីឆ្នាំមុន។

លោក Li បានឱ្យដឹងទៀតថា “ប្រទេសចិននឹងបន្តចាក់ធនធានចូលទៅក្នុងការច្នៃប្រឌិតបច្ចេកវិទ្យា និងការផលិតកម្រិតខ្ពស់ ស្របតាមផែនការរបស់លោកប្រធានាធិបតី ស៊ី ជីនពីង ដើម្បីជំរុញឱ្យមានកម្លាំងផលិតភាពថ្មី”។

ប្រទេសចិនគ្រោងនឹងលុបចោល ការរឹតបន្តឹងលើការវិនិយោគបរទេសទាំងអស់នៅក្នុងវិស័យផលិតកម្ម និងបន្ធូរបន្ថយការរឹតបន្តឹងការចូលទៅកាន់ទីផ្សារ នៅក្នុងឧស្សាហកម្មសេវាកម្ម ដូចជាទូរគម​នាគមន៍ និងសេវាវេជ្ជសាស្រ្ត។

លើសពីនេះទីក្រុងប៉េកាំង ក៏នឹងបង្កើតផែនការអភិវឌ្ឍន៍សម្រាប់ឧស្សាហកម្មដែលកំពុងរីកចម្រើន រួមមាន វិទ្យាសាស្រ្តកំព្យូរទ័រ ទិន្ន​ន័យធំ និងបញ្ញាសិប្បនិម្មិត ហើយប្រទេសចិននឹងបន្តខិតខំឆ្ពោះទៅរកការសម្រេចបាន នូវការពឹងផ្អែកលើខ្លួនឯងគ្រប់គ្រាន់ នៅក្នុងវិស័យបច្ចេកវិទ្យា៕

        ដោយៈ គង់ ហ្វីអូណា

        ភ្នំពេញៈ គ្រោងបញ្ចប់ការងារតួផ្លូវចាក់ AC នៅខែមិថុនា ខាងមុខ ការស្តារនិងលើកកំពស់គុណភាពផ្លូវជាតិលេខ៣១ សម្រេចបាន៦០ភាគរយហើយ។

ក្រោមការយកចិត្តទុកដាក់ខ្ពស់ ពីលោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានចង្អុលបង្ហាញឱ្យលោកខាន់ ម៉ាណេរ រដ្ឋលេខាធិការ ក្រសួងសាធារណការ និងដឹកជញ្ជូន ដឹកនាំក្រុមការងារជំនាញចុះពិនិត្យ គម្រោងស្តារ និងលើកកម្រិតគុណភាពផ្លូវជាតិលេខ៣១ មានប្រវែងសរុប៥៣,៥៣គ.ម (ចាប់ពីបែកគុស ចំណុចប្រសព្វផ្លូវជាតិលេខ៣ រហូតទៅដល់ទីរួមស្រុកកំពង់ត្រាច ចំណុចតភ្ជាប់ផ្លូវជាតិលេខ៣៣) បានលេចចេញវឌ្ឍនភាពជាមោទ​កភាព។

ដំណើរចុះពិនិត្យនេះ អមដំណើរដោយអនុរដ្ឋលេខាធិការ និងមន្ត្រីបច្ចេកទេសពាក់ព័ន្ធ និងមានការចូលរួមពីភាគីក្រុមហ៊ុនសាងសង់ CRBC និងក្រុមហ៊ុនត្រួតពិនិត្យលក្ខណៈបច្ចេកទេស ក្វាងចូវវ៉ានអាន ដោយបានពិនិត្យធ្វើតេស្តដោយម៉ាស៊ីន FWD ផ្ទៀងផ្ទាត់ភាពធន់នៃគ្រឹះរង Subbase ស្រទាប់គ្រឹះសំខាន់ Basecourse (ជាមធ្យមលទ្ធផល453MPa-507MPa) ស្រទាប់កម្រាលកៅស៊ូបេតុងACស្រទាប់ទី១( 439MPa-536MPa) និងខួងពិនិត្យកម្រាស់ស្រទាប់ACទី១(លទ្ធផល4,2cm-5cm) ដើម្បីអនុញ្ញាតឱ្យបន្តការងារទៅមុខទៀត។

ក្រោយពីបានចុះពិនិត្យផ្ទាល់ លោករដ្ឋលេខាធិការ បានបញ្ជាក់ថា៖ លទ្ធផលការងារជារួម នៃគម្រោងស្ដារ និងលើកកម្រិតផ្លូវជាតិលេខ៣១ សម្រេចបាន៦០ភាគរយហើយ។ នៅដំណាច់ខែ មិថុនា ការងារចាក់បេតុងកៅស៊ូស្រទាប់ទី១ និងទី២ និងរួចរាល់ដែល អាចឱ្យបងប្អូនប្រជាពលរដ្ឋ ធ្វើដំណើរបានទៅមកដោយរលូន។

ចំណែកការងារផ្សេងៗទៀតដូចជា៖ ការបំពាក់បរិក្ខារផ្លូវថ្នល់ បន្ថែមប្រព័ន្ធបង្ហូរទឹកសងខាងផ្លូវ និងការងារមួយចំនួនផ្សេងទៀត នឹងអាចនឹងបញ្ជប់នៅចុងឆ្នាំ ២០២៤នេះ ដោយ បញ្ចប់មុនកិច្ចសន្យា១ឆ្នាំ។

ការចុះពិនិត្យជាប្រចាំនេះ បានធ្វើឡើងក្នុងគោលបំណងតាមដានការងារបច្ចេកទេសសាងសង់ របស់ក្រុមហ៊ុនសំដៅឱ្យការសាងសង់ប្រព្រឹត្តទៅ ស្របតាមបទដ្ឋានបច្ចេកទេស និងកិច្ចសន្យាសាងសង់ ធានាឱ្យបានការសាងសង់មានគុណភាពរឹងមាំ អាចប្រើប្រាស់ជាប់បានយូរអង្វែង៕

        ដោយៈ ជេស៊ីកា

        ភ្នំពេញៈ ស្ថានភាពទីផ្សារខុនដូនៅកម្ពុជា បាននិងកំពុងចាប់   ផ្តើមបង្ហាញសញ្ញាវីជ្ជមានបណ្តើរៗផងដែរ ស្របពេលស្ថានភាពសេដ្ឋកិច្ចត្រូវបានព្យាករណ៍ជាមួយកំណើន៦,៦ភាគរយ។

អគ្គនាយកក្រុមហ៊ុនERA Cambodia លោកខន គង្គា បានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា ស្ថានភាពនៃការទិញ លក់ខុនដូ មិនសូវមានការប្រែប្រួលខ្លាំងនៅឡើយទេ ប៉ុន្តែមានសកម្ម​ភាពទិញ លក់ គួរឲ្យកត់សំគាល់ បើធៀបនឹងឆ្នាំ២០២៣កន្លងមកនេះ។លោកបន្តថា “យើងរំពឹងថា គំរោងចំនួន២ទៅ៣នឹងចាប់ផ្តើមសាងសង់នៅឆ្នាំនេះ ស្របពេលសញ្ញាវិជ្ជមាន បានចាប់ផ្តើមជាមួយរំហូរទុនវិនិយោគពីបរទេស”។

កាលពីចុងឆ្នាំមុន គំរោងខុនដូធំៗចំនួន២បានបើកការដ្ឋានសាងសង់ រួមមានគំរោងឧត្តម ស្ថិតនៅលើមហាវិថីព្រះនរោត្តម កំពស់៤៥ជាន់ ដែលគំរោងនេះបាននិងកំពុងសាងសង់ ជាមួយទម្រង់មជ្ឈមណ្ឌ​លពាណិជ្ជកម្មចម្រុះ និងគំរោងJ Tower3 ដែលវិនិយោគរួមគ្នាដោយវិនិយោគិនក្នុងស្រុក និងជប៉ុន។J Tower3 មានកំពស់៧៧ជាន់ ជាខុនដូខ្ពស់ជាងគេនៅទីក្រុងភ្នំពេញ ពេលគំរោងនេះសាងសង់រួច។ គំរោងនេះស្ថិតនៅទីតាំងខាងក្រោយស្ថានីយ៍ប្រេងឥន្ឋនៈCaltex ក្នុងសង្កាត់បឹងកេងកង១ ខ័ណ្ឌបឹងកេងកង រាជធានីភ្នំពេញ។

ជាមួយគ្នានេះ លោកបណ្ឌិត Ben Li អគ្គនាយកក្រុមហ៊ុនUrban Hub ដែលកំពុងអភិវឌ្ឈន៍ខុនដូUrban Village ខ្ពស់ជាងគេលើផ្លូវ៦០ម៉ែត្រ និងThe Factory Phnom Penhបានមានប្រសាសន៍ឲ្យដឹងថា ទីផ្សារខុនដូនៅកម្ពុជាមានសញ្ញាវិជ្ជមាន ពីការទិញរបស់ប្រជាជនក្នុងស្រុក និងជនបរទេស។ ជាក់ស្តែងគំរោងខុនដូUrban Village បានលក់អស់ជិត២០០០យូនីត ក្នុងអំឡុងវិបត្តិកូវីដកន្លងមកនេះ។
លោកបន្តថា “អ្នកវិនិយោគចិន ជប៉ុន ឥណ្ឌា និងមកពីតំបន់មជ្ឈឹមបូព៌ា ពួកគេបាននិងកំពុងមកកាន់កម្ពុជា ហើយជម្រើសរបស់ពួកគេ គឺទិញខុនដូ”។ លោកបន្តថា “ជាមួយគ្នានេះ អត្រាប្រជាជនវ័យក្មេងកម្ពុជា ដែលមានអាយុ៣០ឆ្នាំចុះ មានចំនួន៧០ភាគរយនៃប្រជាជនសរុប ពួកគេនឹង​បង្កើតគ្រួសារ ពួកគេត្រូវការកន្លែងស្នាក់នៅ ហើយខុនដូ នឹងជាជម្រើសនាពេលអនាគតសម្រាប់ពួកគេ”។

លោកបណ្ឌិតBen Liបានលើកឡើងនូវលក្ខខ័ណ្ឌនៃការររស់នៅខុនដូល្អៗជាច្រើន ដែលធ្វើឲ្យអ្នកស្នាក់នៅខុនដូរស់នៅ មានសុខសុវត្ថិភាព ផាសុខភាព និងភាពស៊ីវិល័យ៕

        ដោយៈ គង់ ហ្វីអូណា

        មណ្ឌលគិរីៈ ក្រុមហ៊ុនទទួលសិទ្ធិសិក្សា គម្រោងវិនិយោគព្រលានយន្តហោះ និងទីក្រុងរណបនៅខេត្តមណ្ឌលគិរី កំពុងដំណើរការសិក្សាលម្អិត មុនឈានដល់ការសម្រេចបោះទុនវិនិយោគ។

អនុរដ្ឋលេខាធិការ និងអ្នកនាំពាក្យអាកាសចរស៊ីវិល លោកស៊ីន ចាន់សិរីវុត្ថាបានមានប្រសាសន៍ឲ្យដឹង កាលពីថ្ងៃទី០៦ ខែមីនា ឆ្នាំ២០២៤នេះ បានបញ្ជាក់ថា សម្ព័ន្ធក្រុមហ៊ុន FOCUS Consortium ជាក្រុមហ៊ុនចម្រុះជាតិសាសន៍ ដែលទទួលការអនុញ្ញាតពីរាជរដ្ឋាភិបាលកម្ពុជា ឲ្យសិក្សាគម្រោងវិនិយោគព្រលានយន្តហោះ និងទីក្រុងរណបនៅខេត្តមណ្ឌលគិរី នាពេលបច្ចុប្បន្ននេះ កំពុងធ្វើការជាមួយរដ្ឋលេខាធិការដ្ឋានអាកាសចរស៊ីវិល ដំណើរការសិក្សាលម្អិតទាំងគម្រោងអភិវឌ្ឍន៍ និងទំហំទុនដែលត្រូវវិនិយោគ។

លោកបញ្ជាក់ថា “រដ្ឋលេខាធិការដ្ឋានអាកាសចរស៊ីវិល បាននិងកំពុងសហការជាមួយសម្ព័ន្ធក្រុមហ៊ុនFocus ក្នុងការរៀបចំអភិវឌ្ឍន៍គម្រោងស្របតាមច្បាប់ និងនិតីវិធីជាធរមានកម្ពុជា”។

លោកបានឲ្យដឹងថា ក្រុមហ៊ុននឹងទទួលបានសិទ្ធិសិក្សា និងវិនិយោគ លើគម្រោងអាកាសយានដ្ឋានមណ្ឌលគិរីថ្មី ក្នុងទម្រង់សាងសង់-ធ្វើអាជីវកម្ម និងផ្ទេរ (BOT) និងការអភិវឌ្ឍន៍ទីក្រុងរណបពហុបំណង និងមជ្ឈមណ្ឌលទំនិញផ្លូវអាកាស នៅខេត្ដមណ្ឌលគិរី។

ក្រុមហ៊ុន Focus ដែលដឹកនាំដោយក្រុមហ៊ុន ហ្វូខឺស ត្រេន គ្លូប៊ល វេនឈ័រឯ.ក គឺជាក្រុមហ៊ុនចម្រុះជាតិសាសន៍ ដែលមានចូលរួមពីវិនិយោគមកពីម៉ាឡេស៊ី ចិន និងអារ៉ាប់។

លោកបញ្ជាក់ថា ការឈានទៅដល់ការដាក់ទុនវិនិយោគ លើគម្រោងអាកាសយានដ្ឋានមណ្ឌលគិរីថ្មី និងការអភិវឌ្ឍទីក្រុងរណបពហុបំណង នៅខេត្តមណ្ឌលគិរី គឺអាស្រ័យទៅលើការសិក្សា ប្រសិនបើក្រុមហ៊ុននេះសិក្សារកឃើញថា ដំណើរការល្អនោះនឹងឈានទៅដល់ការវិនិយោគ។

រាជរដ្ឋាភិបាលធ្លាប់បានអនុញ្ញាត ឱ្យក្រុមហ៊ុនចិនChina Power ធ្វើការសិក្សាលើគម្រោងវិនិយោគអាកាសយានដ្ឋាន នៅខេត្តមណ្ឌល គិរីនេះ។ នៅពេលនោះ ព្រលានយន្ដហោះខេត្តមណ្ឌលគីរី គ្រោងសាងសង់លើផ្ទៃដី៣០០ហិកតា មានចម្ងាយប្រហែល ២០គីឡូម៉ែត្រ ពីទីក្រុងសែនមនោរម្យ ​ដែលតាមការប៉ាន់ស្មានអាចនឹងចំណាយទុន វិនិយោគប្រមាណ៨០លានដុល្លារ។

ទោះជាយ៉ាងណា កាលពីពេលថ្មីៗនេះ លោកស៊ីន ចាន់សិរីវុត្ថាបានបញ្ជាក់ប្រាប់គេហទំព័រPropertyarea.asiaថា គំរោងនេះត្រូវការចំណាយពេលសិក្សារយៈពេលប្រមាណ១ឆ្នាំ ទើ​បក្រុមហ៊ុនអាចសិក្សាលំអិត និងសម្រេចថា អាចបោះទុនវិនិយោគបានឬយ៉ាងណា ហើយអ្វីៗត្រូវដាក់ឆ្លងកាត់រដ្ឋាភិបាល​ពិនិត្យ និងសម្រេចតាមនិតិវិធី ជាច្រើនទៀត៕

ដោយៈ គង់ ហ្វីអូណា

        ភ្នំពេញៈ

  កិច្ចសម្រួលវិនិយោគប្រកបដោយភាពកក់ក្តៅ កញ្ចប់លើកទឹកចិត្តដែលមានភាពអនុគ្រោះ និងសេវាថែទាំវិនិយោគ ដែលគួរជាទីទុកចិត្ត គឺជាអភិក្រមគន្លឹះនៃច្បាប់ស្តីពី វិនិយោគនៅកម្ពុជា។នេះបើតាមការបញ្ជាក់ពីលោកសួន សុផលអគ្គលេខាធិការរងគណកម្មការវិនិយោគកម្ពុជា។

លោកសួន សុផលបានលើកឡើងបែបនេះ កាលពីព្រឹកថ្ងៃទី៦ ខែមីនា ឆ្នាំ២០២៤ ក្នុងពេលលោកអញ្ជើញចូលរួមជាវាគ្មិន ក្នុងកម្មវិធីផ្គូផ្គងធុរកិច្ច ដែលសហការរៀបចំឡើង ដោយសមាគមវិនិយោគិននវានុវត្តន៍ និងអភិវឌ្ឍន៍ (IDI) និងសភាពាណិជ្ជកម្ម និងឧស្សាហកម្មនៃរដ្ឋវិចតូរៀ។

កម្មវិធីនេះត្រូវបានរៀបចំឡើង ក្នុងគោលបំណងធ្វើសន្ធានកម្មរវាងធុរជន និងវិនិយោគិនក្នុងស្រុកជាមួយដៃគូបរទេស ដែលមានមូលដ្ឋាននៅប្រទេសអូស្ត្រាលី សំដៅពង្រឹង និងពង្រីកការផ្សារភ្ជាប់បណ្តាញលើប្រតិបត្តិការធុរកិច្ច។

លោកសួន សុផលបានថ្លែងអំណរគុណជូនចំពោះភាគីពាក់ព័ន្ធដែលបានខិតខំរៀបចំកម្មវិធី ដ៏មានសារៈសំខាន់នាឱកាសនេះ ក្នុងគោលដៅលើកកម្ពស់ការយល់ដឹងអំពីសក្តានុពល និងកាលានុវត្តភាពវិនិយោគ ធុរកិច្ច និងពាណិជ្ជកម្មនៃព្រះរាជាណាចក្រកម្ពុជា។

ជាមួយគ្នានេះ លោកក៏បានបរិយាយអំពីភាពទាក់ទាញនៃបរិយាកាសវិនិយោគកម្ពុជា ដែលមានភាពបើកចំហ និងមានលក្ខណៈអំណោយផល សម្រាប់ការរីកលូតលាស់នៃវិស័យឯកជន។

បន្ថែមពីនេះ លោកសួន សុផលក៏បានពិពណ៌នាអំពីបច្ចុប្បន្នភាពថ្មីនៃរបបវិនិយោគក្នុងស្រុក ដែលមានសង្គតិភាពជាមួយនឹងឧត្តមានុវត្តន៍អន្តរជាតិ សំដៅផ្តល់នូវកិច្ចសម្រួលវិនិយោគ ប្រកបដោយភាពកក់ក្តៅ កញ្ចប់លើកទឹកចិត្តដែលមានភាពអនុគ្រោះ និងសេវាថែទាំវិនិយោគដែលគួរជាទីទុកចិត្ត។

ភាពជាដៃគូជាមួយសហគមន៍ធុរកិច្ច និងវិស័យឯកជនត្រូវបានប្រតិបត្តិជាប្រចាំ ដោយគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា សំដៅធានាបានថាវិនិយោគិន និងធុរជនត្រូវបានគាំទ្រប្រកបដោយប្រសិទ្ធភាព និងប្រសិទ្ធផល៕