ដោយ: គង់ លាងហួរ

តូក្យូ: លោក Kazuo Ueda ទេសាភិបាលធនាគារកណ្តាលជប៉ុន (BOJ) បានអះអាងកាលពីថ្ងៃពុធម្សិលមិញនេះថា ការធ្វើឌីជីថលនីយកម្ម ផ្នែកហិរញ្ញវត្ថុលឿនពេកនៅតំបន់អាស៊ី អាចបង្កទៅជាហានិភ័យថ្មី ដល់ស្ថិរភាពប្រព័ន្ធហិរញ្ញវត្ថុ។

ទេសាភិបាលធនាគារកណ្តាលជប៉ុនរូបនេះ បានសង្កត់ធ្ងន់ថា ការថ្លឹងថ្លែងឱ្យបានត្រឹមត្រូវ រវាងអត្ថប្រយោជន៍ និងការចំណាយលើការច្នៃប្រឌិតហិរញ្ញវត្ថុ គឺមានសារៈសំខាន់ជាចាំបាច់ណាស់។ នេះបើយោងតាមការចុះផ្សាយដោយសារពត៌មាន Reuters។

តួយ៉ាង បច្ចុប្បន្ននេះ សេវាហិរញ្ញវត្ថុឌីជីថលបានរីករាលដាលយ៉ាងខ្លាំងនៅក្នុងតំបន់អាស៊ីប៉ាស៊ីហ្វិក ខណៈប្រជាជនជាច្រើន ដែលរស់នៅក្នុងបណ្តាប្រទេសកំពុងរីកចម្រើន បានងាកទៅប្រើប្រាស់ស្មាតហ្វូនក្នុងការទូទាត់ប្រាក់ប្រចាំថ្ងៃ។

លោក Ueda បានលើកឡើងថា “ស្របពេលដែលការវិវឌ្ឍន៍ទាំងនេះបានពង្រឹងបរិយាប័នហិរញ្ញវត្ថុ ប៉ុន្តែក្នុងបរិបទបែបនេះ ក៏ទាម ទារឱ្យអ្នកបង្កើតគោលនយោបាយ ត្រូវខិតខំគ្រប់គ្រងហានិភ័យសុវត្ថិភាពអុីនធឺណេត និងពង្រឹងបទប្បញ្ញត្តិ ប្រឆាំងនឹងការលាងលុយកខ្វក់ផងដែរ”។

លោក Ueda បានថ្លែងសុន្ទរកថាទៅកាន់កិច្ចប្រជុំជាន់ខ្ពស់អាស៊ីប៉ាស៊ីហ្វិកស្តីពី ការត្រួតពិនិត្យធនាគារ ថា “ទ្រព្យសកម្មគ្រីបតូ បច្ចេកវិទ្យា Tokenisation បញ្ញាសិប្បនិម្មិត (AI) និងបច្ចេកវិទ្យាថ្មីផ្សេងទៀតអាចនាំមកនូវឱកាស ប៉ុន្តែពួកគេក៏អាចបង្កហានិភ័យដល់ប្រព័ន្ធ​ហិរញ្ញវត្ថុផងដែរ”។

លោកបានមានប្រសាសន៍ឱ្យដឹងទៀតថា “បញ្ហាប្រឈមដ៏សំខា​ន់មួយ សម្រាប់ក្រុមអាជ្ញាធរហិរញ្ញវត្ថុ គឺត្រូវទាញយកអត្ថប្រយោជន៍ពីឌីជីថលនីយកម្មហិរញ្ញវត្ថុផង និងត្រូវខិតខំគ្រប់គ្រងហានិភ័យប្រកបដោយប្រសិទ្ធភាពផង ដើម្បីធានាស្ថិរភាពនៃប្រព័ន្ធហិរញ្ញវត្ថ”។

លោក Ueda បានបញ្ជាក់បន្ថែមថា “ស្របពេលដែលសេវាហិរញ្ញវត្ថុ និងអ្នកផ្តល់សេវាបន្តធ្វើពិពិធកម្ម ហេតុនេះ ការអនុម័តយកគោលការណ៍ នៃការអនុវត្តបទប្បញ្ញត្តិដោយស្មើភាពគ្នា សម្រាប់ប្រភេទដូចគ្នានៃសកម្មភាពហិរញ្ញវត្ថុ និងហានិភ័យ គឺមានសារៈសំខាន់កាន់តែខ្លាំងឡើង”៕

        ដោយៈ និស្ស័យ

        ភ្នំពេញៈ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំតម្រោងបញ្ជរតែមួយជាតិ “គ.ជ.ប. ជ” បានដឹកនាំកិច្ចប្រជុំលើកទី៤ គណៈកម្មាធិការដឹកនាំគម្រោងបញ្ជរតែមួយជាតិ។

កិច្ចប្រជុំកាលពីថ្ងៃទី៧ មិនា មានការចូលរួមពីថ្នាក់ដឹកនាំក្រសួងពាណិជ្ជកម្ម, ក្រសួងកសិកម្ម រុក្ខាប្រមាញ់ និងនេសាទ។ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ក្រុមប្រឹក្សាអភិវឌ្ឍន៍កម្ពុជា អគ្គនាយកដ្ឋានគយ និងរដ្ឋាករកម្ពុជា និងមន្ត្រីតំណា​ងក្រសួង-ស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍។

គោលបំណងសំខាន់ នៃកិច្ចប្រជុំតីដើម្បីពិនិត្យ វឌ្ឍនភាពនៃការអនុវត្តគម្រោងបញ្ជរតែមួយជាតិ ដំណាក់កាលទី៣ និងប្រកាសដាក់ឱ្យ អនុវត្តគម្រោងបញ្ជរតែមួយជាតិដំណាក់កាលទី៤ ព្រមទាំងលើកទិសដៅអនុវត្តបន្ត និងពិនិត្យ តាមដាន វឌ្ឍនភាពការងារ និងដោះស្រាយបញ្ហាប្រឈមនៃការ អនុវត្តគម្រោងបញ្ជរតែមួយជាតិ យោងអនុក្រឹត្យលេខ ៦៦ អនក្រ.បក ចុះថ្ងៃទី១៤ ខែមីនា ឆ្នាំ២០២៣ ស្តីពីការកែសម្រួលអនុក្រឹត្យលេខ ២៥ អនក្រ.បក ចុះថ្ងៃទី១១ ខែមីនា ឆ្នាំ២០១៥ ស្តីពីការបង្កើតគណៈកម្មាធិការដឹកនាំគម្រោង បញ្ជរតែមួយជាតិ។

លោកអគ្គបណ្ឌិតសភាចារ្យប្រធានអង្គប្រជុំ បានសំដែងកិច្ចស្វាគមន៍ចំពោះតំណាង ក្រសួង-ស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍ ដែលបានចូលរួមកិច្ចប្រជុំតាមការអញ្ជើញ និងបានលើក ឡើងពីសារៈសំខាន់នៃប្រព័ន្ធបញ្ជរតែមួយជាតិ ក្នុងការបង្កើនប្រសិទ្ធភាព និងស័ក្តិសិទ្ធភាពនៃការអនុវត្តការងារ ពាក់ព័ន្ធនឹងទំនិញនាំចេញ-នាំចូល សំដៅចូលរួមចំណែកក្នុងកិច្ច សម្រួលពាណិជ្ជកម្មអន្តរជាតិ និងការបំពេញ កាតព្វកិច្ចកម្ពុជាក្នុងក្របខណ្ឌអាស៊ាន ស្របតាមផែនការយុទ្ធសាស្រ្ត និងគោលនយោបាយរបស់រាជរដ្ឋាភិបាល៕

        ដោយៈ គង់ សូរិយា

        ភ្នំពេញៈ ក្រុងបាវិតនឹងរះ​ឡើងជាថ្មី លើវិស័យអចលនទ្រព្យ និងសំណង់ ខណៈផ្លូវល្បឿនលឿនភ្នំពេញ បាវិតបញ្ចប់នាពេលខាងមុខ។

ជាមួយគ្នានេះ ផែនទីផ្លូវល្បឿនលឿនខ្សែទី២របស់កម្ពុជា តភ្ជាប់ពី ភ្នំពេញ-ក្រុងបាវិតតម្លៃ១.៦៣៨ពាន់លានដុល្លារអាមេរិក ក្រោមទម្រង់វិនិយោគសាងសង់-ប្រតិបត្តិការ-ផ្ទេរ(BOT) ដែលមានរយៈពេលប្រតិបត្តិការចំនួន៥០ឆ្នាំ និងស្ពានឆ្លងកាត់ទន្លេមេគង្គ គ្រោងចំណាយថវិកាសរុប ប្រមាណ២៣២,៥៨លានដុល្លារអាមេរិក។

គម្រោងទាំងពីរនេះ នឹងអនុវត្តការសាងសង់ ដោយក្រុមហ៊ុនសា​ជីវកម្មស្ពាន និងថ្នល់ចិន(CRBC) ប្រើប្រាស់រយៈពេលសាងសង់ចំនួន៤៨ខែ គ្រោងនឹងបញ្ចប់នៅក្នុងអំឡុងឆ្នាំ២០២៧។

ផ្លូវល្បឿនលឿនភ្នំពេញ បាវិត ជាផ្លូវហាយវេអាស៊ាន ដែលតភ្ជាប់ពីផ្លូវជាតិលេខ៥ កាត់រាជធានីភ្នំពេញ ឆ្ពោះទៅកាន់ក្រុងបាវិត មុនបន្តតភ្ជាប់ ជាមួយផ្លូវល្បឿនលឿនប្រទេសវៀតណាម។

ការអភិវឌ្ឍផ្លូវនេះ ស្ថិតនៅក្នុងផែនការយុទ្ឋសាស្រ្តអភិវឌ្ឍន៍ត្បូង ត្បូងរបស់អាស៊ាន ដើម្បីសមាហរណកម្មសេដ្ឋកិច្ច សង្គម វប្បធ៌មរបស់អាស៊ាន។

លោកឧកញ៉ាឃាង ពុទ្ឋីប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា បានមានប្រសាសន៍នាពេលកន្លងមកថា ទីផ្សារអចលនទ្រព្យក្រុងបាវិត នឹងមានការរីកចម្រើននាពេលអនាគតកាន់តែខ្លាំង ដោយសារក្រុងបាវិតស្ថិត នៅក្នុងគោលនយោបាយអភិវឌ្ឍន៍វិស័យឧស្សាហកម្ម របស់រាជរដ្ឋាភិបាលឆ្នាំ២០១៥ ២០២៥ដើម្បីប្រែក្លាយទីក្រុងនេះ ជាHub of Industrial Zone។

ក្រុងបាវិតនឹងកាន់តែទាក់ទាញ ដោយសារកត្តាភូមិសាស្រ្ត ស្ថិតនៅចំណុចកណ្តាលទីក្រុងធំពីរ គឺរាជធានីភ្នំពេញ និងក្រុងហូ ជីម៉ិញប្រទេសវៀតណាម៕

ដោយ: គង់ លាងហួរ

អន្តរជាតិ: ប្រទេសដាណឺម៉ាក និងប្រទេសអាល្លឺម៉ង់ នឹងត្រូវបានតភ្ជាប់គ្នាក្នុងពេលឆាប់ៗនេះ តាមរយៈផ្លូវរូងក្រោមទឹក ដែលមានប្រវែងចំនួន១៨គីឡូម៉ែត្រ។ នេះបើយោងតាមសារពត៌មាន Euronews។

ផ្លូវរូងក្រោមទឹកដែលមានឈ្មោះថា Fehmarnbelt នឹងក្លាយជាបណ្តាញផ្លូវរថភ្លើង និងផ្លូវល្បឿនលឿនប្រភេទ Motorway ក្រោមទឹកដ៏វែងបំផុតរបស់ពិភពលោក នៅពេលដែលគម្រោងនេះ ត្រូវបានបញ្ចប់សាងសង់រួចរាល់ នៅត្រឹមឆ្នាំ២០២៩ខាងមុខ។

គម្រោងតម្លៃ១០ពាន់លានអឺរ៉ូនេះ (ប្រហែល១០,៩ពាន់លានដុល្លារ)  ដែលឆ្លងកាត់សមុទ្របាល់ទិក និងត្រូវបានគេស្គាល់ថា ជាខ្សែក្រវ៉ាត់ Fehmarn នឹងតភ្ជាប់ទីក្រុង Rødbyhavn នៅលើកោះ Lolland របស់ប្រទេសដាណឺម៉ាក និងទីក្រុងPuttgarden នៅភាគខាងជើងនៃប្រទេសអាល្លឺម៉ង់។

ផ្លូវរូងក្រោមទឹកនេះ មានឈ្មោះជាផ្លូវការថា Fehmarnbelt Fixed Link ដែលនឹងមានផ្លូវល្បឿនលឿនប្រភេទ Motorway ចំនួនពីរគន្លង និងផ្លូវដែកអគ្គិសនីចំនួនពីរខ្សែ។

ការធ្វើដំណើរឆ្លងកាត់ផ្លូវនេះ នឹងចំណាយពេល៧នាទីតាមរយៈរថភ្លើង និង១០នាទីតាមរយៈថយន្ត។ ចំណែក ពេលវេលាធ្វើដំណើរតាមរថភ្លើងពីទីក្រុង Hamburg ក្នុងប្រទេសអាល្លឺម៉ង់ ទៅកាន់រដ្ឋធានី Copenhagen ក្នុងប្រទេសដាណឺម៉ាក នឹងត្រូវកាត់បន្ថយពីប្រហែល៥ម៉ោងមកនៅត្រឹមតិចជាង៣ម៉ោង។

ការតភ្ជាប់ផ្លូវនេះ នឹងជំនួសសេវាកម្មសាឡាង ដ៏មមាញឹកមិនគួរឱ្យជឿ ដែលដឹកអ្នកដំណើររាប់លាននាក់ក្នុងមួយឆ្នាំ ដែលនឹងជួយកាត់បន្ថយពេលវេលាធ្វើដំណើរជិតមួយម៉ោង។

គំនិតនៃការតភ្ជាប់អាល្លឺម៉ង់ជាមួយដាណឺម៉ាក ជាមួយនឹងផ្លូវរូងក្រោមទឹកមិនមែនជារឿងថ្មីទេ។ ជាក់ស្តែង បន្ទាប់ពីរៀបចំផែនការរយៈពេល១០ឆ្នាំ ការសាងសង់កំណាត់ផ្លូវខាងដាណឺម៉ាក បានចាប់ផ្តើមនៅឆ្នាំ២០២០  ហើយបន្ទាប់មក ការសាងសង់កំណាត់ផ្លូវខាងអាល្លឺម៉ង់បានចាប់ផ្តើមឡើងនៅឆ្នាំ២០២១។

ការសាងសង់ផ្លូវរូងក្រោមទឹកនេះ នឹងត្រូវចំណាយថវិកាសរុបចំនួន១០ពាន់លានអឺរ៉ូ ដោយសហភាពអឺរ៉ុប បានរួមចំណែកផ្តល់ថវិកាចំនួន១,១ពាន់លានអឺរ៉ូ សម្រាប់ស្ថាបនាគម្រោងនេះ៕

ដោយ: គង់ លាងហួរ

ភ្នំពេញ: ក្រុមហ៊ុន AirAsia Cambodia ដែលជាបុត្រសម្ព័ន្ធរបស់ក្រុមហ៊ុនអាកាសចរណ៍ Air Asia ត្រូវបានគេរំពឹងថា នឹងចាប់ផ្តើមបើកប្រតិបត្តិការ នៅពាក់កណ្តាលឆ្នាំ២០២៤នេះ ដែលយឺតជាងការគ្រោងទុកដំបូងចំនួន៦ខែ។

ជាមួយគ្នានោះ ក្រុមហ៊ុនអាកាសចរណ៍ Air Asia ដែលមានមូលដ្ឋាននៅប្រទេសម៉ាឡេស៊ីមួយនេះ ត្រូវបានរំពឹងថា នឹងបើកដំណើរការក្រុមហ៊ុនអាកាសចរណ៍ មួយផ្សេងទៀតនៅក្នុងតំបន់។ នេះបើយោងតាមសារពត៌មាន Flight Global។

បន្ទាប់ពីការចេញផ្សាយលទ្ធផលប្រចាំឆ្នាំ របស់ក្រុមហ៊ុនមេ Capital A រួចមក  ក្រុមហ៊ុនអាកាសចរណ៍ AirAsia មិនបានបញ្ជាក់ពីប្រទេស ដែលខ្លួនមានបំណងបង្កើតបុត្រសម្ព័ន្ធថ្មីនោះទេ។ ប៉ុន្តែ ក្រុម​ហ៊ុននេះ​ធ្លាប់​បាន​បញ្ជាក់​ថា​ ខ្លួននឹង​ផ្តោត​លើ​បណ្តាប្រទេស​អាស៊ាន។

នេះមិនមែនជាលើកទីមួយឡើយ ដែលក្រុមហ៊ុនអាកាសចរណ៍ បានទម្លាយឱ្យដឹង អំពីគោលបំណងរបស់ខ្លួន ក្នុងការបង្កើតអង្គភាពថ្មីៗនៅក្នុងតំបន់អាស៊ាន។

តួយ៉ាង នៅក្នុងខែកុម្ភៈ ឆ្នាំ២០២៣  លោក Tony Fernandes ប្រធានក្រុមហ៊ុន Capital A បានលើកឡើងថា ក្រុមហ៊ុនរបស់លោក គ្រោងបង្កើតបុត្រសម្ព័ន្ធ ចំនួន២បន្ថែមទៀតនៅក្នុងតំបន់ ហើយព័ត៌​មានលម្អិត នឹងបញ្ចេញឱ្យដឹងនៅចុងឆ្នាំ២០២៤។

ទន្ទឹមនឹងនេះ ក្រុមហ៊ុនអាកាសចរណ៍ AirAsia Cambodia ដែលជាបុត្រសម្ព័ន្ធទី៥ របស់ក្រុមហ៊ុន AirAsia ដើមឡើយ គ្រោងនឹងចាប់ផ្តើមប្រតិបត្តិការនៅចុងឆ្នាំ២០២៣។ ប៉ុន្តែផែនការត្រូវបានពន្យា​ពេលមកទល់បច្ចុប្បន្ននេះ  ខណៈក្រុមហ៊ុនមិនបានបង្ហាញឱ្យដឹងពីមូលហេតុនោះទេ។

ម្យ៉ាងវិញទៀត ក្រុមហ៊ុនAirAsia Group កាន់កាប់ភាគហ៊ុនចំនួន៥១% នៅក្នុងក្រុមហ៊ុនអាកាសចរណ៍ AirAsia Cambodia  ខណៈដែលក្រុមហ៊ុនកម្ពុជា Sivilai Asia កាន់កាប់ភាគហ៊ុនដែលនៅសេសសល់៕

ដោយៈ គង់ ម៉ាលីនណា

        ភ្នំពេញៈ លោកឈៀង អគ្គនាយកនៃអគ្គនាយកដ្ឋានភស្តុភារកម្មក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យពិភាក្សាវឌ្ឍនភាពការងារសិក្សាសមិទ្ធិលទ្ធភាព គម្រោងអភិវឌ្ឍន៍មជ្ឈមណ្ឌលភស្តុភារកម្ម ក្រុងព្រះសីហនុ។

កិច្ចប្រជុំនេះមានការអញ្ជើញចូលរួមដោយផ្ទាល់ និងតាមរយៈវីដេអូពីចម្ងាយ មានអង្គភាពពាក់ព័ន្ធចំណុះក្រសួងសាធារណការ និងដឹកជញ្ជូន កំពង់ផែស្វយ័តព្រះសីហនុ រដ្ឋលេខាធិការដ្ឋានអាកាសចរណ៍ស៊ីវិល អគ្គនាយកដ្ឋានភាពជាដៃគូរវាងរដ្ឋ និងឯកជន ក្រសួងសេដ្ឋកិច្ច និងហិរញ្ញវត្ថុ និងសាជីវកម្មហិរញ្ញវត្ថុអន្តរជាតិ(IFC) (International Finance Corporation)។

គោលបំណងនៃកិច្ចប្រជុំធ្វើឡើង ដើម្បីត្រួតពិនិត្យ (១) លើលទ្ធផលបឋមនៃការជ្រើសរើសទីតាំងគម្រោង ដោយផ្អែកលើវិធីសាស្ត្រវិភាគមានលក្ខណៈវិនិច្ឆ័យចម្រុះ MCA (Multi-Criteria Analysis) ដែលបានបង្ហាញដោយក្រុមការងារ IFC និង (២) ពិភាក្សាប្រមូលធាតុចូលពីភាគីពាក់ព័ន្ធ ដើម្បីបំពេញបន្ថែមនូវកង្វះខ្វះខាត នៃការសិក្សា ធ្វើយ៉ាងណាឱ្យមានភាពច្បាស់លាស់ត្រឹមត្រូវ និងសង្គតិភាព។

លោកឈៀង ពេជ្រអគ្គនាយក នៃអគ្គនាយកដ្ឋានភស្តុភារកម្មក្រសួងសាធារណៈការ និងដឹកជញ្ជូនក៏បានស្នើឱ្យ IFC ជំរុញការរៀបចំសិក្សាករណីអាជីវកម្ម (Business Case Study) លើទីតាំងទាំងបីដែលត្រូវបានធ្វើចំណាត់ថ្នាក់ក្នុងការជ្រើសរើសសម្រាប់ការសិក្សាបន្ត។

លោករំពឹងថា ការសិក្សា Business Case Study ទាំងបីទីតាំងអាចនឹងត្រូវបញ្ចប់ក្នុងខែមេសា ឆ្នាំ២០២៤ ដើម្បីក្រសួងអាចបន្តនីតិវិធី សម្រាប់ការជ្រើសរើសទីតាំងសមសម្រប ដើម្បីធ្វើការអភិវឌ្ឍនាពេលខាងមុខ៕

ដោយៈ គង់ ហ្វីអូណា

        ភ្នំពេញៈ ក្រុមហ៊ុនអាកាសចរណ៍ឡាវ Lao Airline នឹងដាក់ដំណើរការនូវជើងហោះហើរត្រង់ រវាងរដ្ឋធានី វៀងចន្ទន៍ (Vientiane​) របស់ឡាវ និងរាជធានីភ្នំពេញ នៃប្រទេសកម្ពុជា។

ជើងហោះហើរនេះ នឹងចាប់ពីថ្ងៃទី១៩ ខែមីនានេះតទៅ។ ការដាក់ដំណើរការនូវជើងហោះហើរត្រង់នេះ ត្រូវបានគេដឹងថា ធ្វើឡើងក្នុងគោលបំណង ជួយជម្រុញដល់វិស័យទេសចរណ៍ និងការវិនិយោគបន្ថែម នៅក្នុងប្រទេសតែមួយគត់ ដែលគ្មានព្រំដែនសមុទ្រក្នុងតំបន់អាស៊ីអាគ្នេយ៍មួយនេះ។

ការហោះហើរត្រង់រវាងរដ្ឋធានីវៀងចន្ទន៍ និងរាជធានីភ្នំពេញនេះ គ្រោងនឹងដាក់ដំណើរការដំបូងចំនួន៣ដង ក្នុងមួយសប្តាហ៍ ពោលគឺនៅរៀងរាល់ថ្ងៃអង្គារ, ថ្ងៃព្រហស្បតិ៍ និងថ្ងៃសៅរ៍ ដោយរយៈពេលហោះហើរ មានថេរវេលាប្រហែល១,២០នាទីរសៀល។

តាមគម្រោងដំបូង ការធ្វើដំណើរហោះចេញពីរដ្ឋធានី វៀងចន្ទន៍ នឹងធ្វើឡើងនៅម៉ោង៨៖៣០នាទីព្រឹក ខណៈធ្វើដំណើរត្រឡប់ពីរាជធានីភ្នំពេញវិញ នៅវេលាម៉ោង១០៖៥០នាទីព្រឹក។

យោងតាមប្រភពពីវិទ្យុជាតិឡាវបានឱ្យដឹងថា ជើងហោះហើរបន្ថែម អាចនឹងត្រូវពិចារណានាពេលក្រោយ ដោយផ្អែកតាមតម្រូវការជាក់ស្ដែងនៃអ្នកដំណើរ។ កន្លងមក ការធ្វើដំណើរតាមផ្លូវអាកាសរវាងទីក្រុងធំបំផុតនៃប្រទេសទាំងពីរ (កម្ពុជា-ឡាវ) ភាគច្រើនត្រូវមានការចូលផ្លាស់ប្តូរជើងយន្តហោះ នៅអាកាសយានដ្ឋានរបស់ប្រទេសថៃ៕

        ដោយៈ និស្ស័យ

        អូស្រ្តាលីៈ ប្រមុខរដ្ឋាភិបាលកម្ពុជា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកផាម មិញជិញ នាយករដ្ឋមន្ត្រីវៀតណាម បានបន្តពិភាក្សាលើការពង្រឹង និងពង្រីកកិច្ចសហប្រតិបត្តិការលើវិស័យការពារជាតិ សន្តិសុខ ទេសចរណ៍ និងការតភ្ជាប់ហេដ្ឋារចនាសម្ព័ន្ធ។

ក្នុងជំនួបនាព្រឹកថ្ងៃទី៦ មិនា សម្តេចធិបតី ហ៊ុន ម៉ាណែត និងលោក ផាម មិញជិញ បានស្វាគមន៍គ្នា​ប្រកប​ដោយភាពកក់ក្តៅ និងដោយក្តីសោមនស្សរីករាយ។ លោក ផាម មិញជិញ បានអបអរសាទរកម្ពុជា​ចំពោះ​ជោគជ័យ លើការរៀបចំការបោះឆ្នោតជ្រើសតាំងសមា​ជិកព្រឹទ្ធសភា នីតិកាលទី៥ ក៏ដូចជាអបអរសាទរ​គណបក្សប្រជាជនកម្ពុជា ទទួលបានជ័យជម្នះលើការបោះឆ្នោត ដោយទទួលបាន៥៥អាសនៈ។

សម្តេចធិបតីហ៊ុន ម៉ាណែត បានស្វាគមន៍ដោយក្ដីរីករាយចំពោះជំនួបពិភាក្សាការងារទ្វេភាគី​ជាមួយ​ នាយក​រដ្ឋមន្ត្រីវៀតណាមជាថ្មីម្ដងទៀត។ សម្តេចធិបតី ចាត់ទុកជំនួបពិភាក្សា​ជាការពង្រឹងកិច្ចសហប្រតិ​បត្តិការ ដែលបានឯកភាពគ្នានាពេលកន្លងមក និងការបន្តពិភា​ក្សា លើកិច្ចសហប្រតិបត្តិការនាថ្ងៃអនាគត​បន្ថែមទៀត។

សម្តេចធិបតី និងនាយករដ្ឋមន្ត្រីវៀតណាម បានពិភាក្សាគ្នាផ្តោតជាសំខាន់លើវិស័យគន្លឹះ ដែលជាកម្មវត្ថុ​នៃ​ការពង្រឹង និងពង្រីកកិច្ចសហប្រតិបត្តិការបន្ថែម រវាងកម្ពុជា និងវៀតណាម ដែលរួមមានដូចជា៖ វិស័យ​ការពារជាតិ និងសន្តិសុខ វិស័យទេសចរណ៍ និងការតភ្ជាប់ហេដ្ឋារចនាសម្ព័ន្ធ ដូចជា ផ្លូវលឿន ភ្នំពេញ​-​បាវិត-ហូជីមិញជាដើម។

ក្នុងក្របខ័ណ្ឌនៃកិច្ចសហប្រតិបត្តិការការងារ ត្រីភាគីCLV, ថ្នាក់ដឹកនាំទាំងពីរ បានគូសបញ្ជាក់ថា ថ្ងៃ​ខាង​មុខ នឹងមានការរៀបចំកិច្ចប្រជុំកំពូល CLV លើកទី១២ ហើយបានលើកទឹកចិត្តឱ្យក្រសួង ស្ថាប័នមួយ​ចំនួន​ពង្រឹង និងពង្រីកកិច្ចសហប្រតិបត្តិការគ្នា ក្នុងក្របខ័ណ្ឌ CLV បន្ថែមទៀត។

ដោយឡែកក្នុងវិស័យទេសចរណ៍ ថ្នាក់ដឹកនាំទាំងពីរបានឯកភាពឱ្យក្រសួងទេសចរណ៍​បង្កើនកិច្ច​ពិភាក្សា ​ដើម្បីស្វែងរកឱកាសក្នុងការជំរុញកំណើនទេសចរណ៍ក្នុងប្រទេសទាំងបី។ ជាមួយគ្នានេះដែរ ថ្នាក់ដឹកនាំ​ទាំងពីរក៏បានពិភាក្សាគ្នា លើកិច្ចការមួយចំនួន ដែលជាផលប្រយោជន៍រួម សម្រាប់ប្រទេសកម្ពុជា និង​ប្រ​ទេស​វៀតណាមផងដែរ៕