ដោយ: គង់ លាងហួរ

ហាណូយ: ក្រុមហ៊ុនអាកាសចរណ៍Vietnam Airlines បានផ្លាស់ប្តូរប្រតិបត្តិការរបស់ខ្លួន ទៅកាន់អាកាសយានដ្ឋានអន្តរជាតិសៀមរាបអង្គរ ក្នុងខេត្តសៀមរាប ខណៈដែលអាកាសយានដ្ឋានសៀមរាបចាស់ ត្រូវបានបិទជាផ្លូវការនៅថ្ងៃទី១៦ ខែតុលា។

អាកាសយានដ្ឋានអន្តរជាតិសៀមរាប អង្គរ បច្ចុប្បន្នជាអាកាសយានដ្ឋានធំជាងគេនៅកម្ពុជា ដែលមានសមត្ថភាពអាចបម្រើអ្នកដំណើរបានរហូតដល់ទៅ៧លាននាក់ ក្នុងដំណាក់កាលដំបូង។
អាកាសយានដ្ឋាននេះ ស្ថិតនៅចម្ងាយប្រហែល៥៥គីឡូម៉ែត្រពីបេះដូងនៃខេត្តសៀមរាប និងប្រហែល៤០គីឡូម៉ែត្រពីរមណីយដ្ឋានអង្គរ ដែលធ្វើឱ្យវាកាន់តែងាយស្រួល សម្រាប់អ្នកធ្វើដំណើរទៅកាន់តំបន់កណ្តាល និងតំបន់ទេសចរណ៍ផ្សេងៗ។អាកាសយានដ្ឋានអន្តរជាតិសៀមរាប អង្គរ (SAI) ដែលមានផ្លូវរត់ប្រវែង៣.៦០០ម៉ែត្រ គឺជាអាកាសយានដ្ឋានអន្តរជាតិកម្រិត 4E ដែលអាចទទួលជើងហោះហើរ ចម្ងាយឆ្ងាយមកពីជុំវិញពិភពលោក។

អាកាសយានដ្ឋាន​នេះ ​នឹង​អាច​ទទួល​អ្នក​ដំណើរ​តាម​យន្តហោះ​ចំនួន៧លាន​នាក់ ​ក្នុង​មួយ​ឆ្នាំ​ចាប់ពី​ឆ្នាំ២០២៤ និង​រហូត​ដល់១២លាន​នាក់​ក្នុង​មួយ​ឆ្នាំ​ចាប់ពី​ឆ្នាំ ២០៤០។ជាមួយគ្នានេះ ក្រុមហ៊ុនអាកាសចរណ៍Vietnam Airlines បានសហការជាមួយអង្គភាពគ្រប់គ្រង នៃអាកាសយានដ្ឋានអន្តរជាតិសៀមរាប អង្គរលើហេដ្ឋារចនាសម្ព័ន្ធ និងការតភ្ជាប់បច្ចេកវិទ្យា ដូចជាប្រព័ន្ធ check-in ការឡើងយន្តហោះ និងសេវាកម្មលើដីផ្សេងទៀត ដើម្បីធានាបាននូវបទពិសោធន៍ដ៏ងាយស្រួល និងរហ័សសម្រាប់អ្នកដំណើរ៕

ដោយៈ ជេស៊ីកា

        ប៉េកាំងៈ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចូលរួមជាអធិបតីភាព ក្នុងពិធីចុះហត្ថលេខាលើឯកសារសំខាន់ៗមួយចំនួន រវាងរាជរដ្ឋាភិបាលកម្ពុជា ជាមួយក្រុមហ៊ុន វិស័យឯកជន នៃសាធារណរដ្ឋប្រជាមានិតចិន។

ក្នុងចំណោមកិច្ចព្រៀមព្រៀងទាំងនោះរួមមាន  ទី១ ពិធីចាប់ផ្ដើមជាផ្លូវការនៃភាពជាដៃគូ eWPT Cambodia ។ ទី២ ពិធីចុះហត្ថលេខារវាង ក្រសួងប្រៃសណីយ៍ និងទូរគមនាគមន៍ នៃព្រះរាជាណាចក្រកម្ពុជា និងក្រុមហ៊ុន ហួវៃ ថេកណូឡជី ខូអិលធីឌី (Huawei Technologies Co., Ltd.) ។ ទី៣ ពិធីចុះហត្ថលេខា កិច្ចព្រមព្រៀងក្របខ័ណ្ឌគម្រោងផ្លូវនាវាចរណ៍ “ ព្រែកជីកហ្វូណនតេជោ “ រវាងរាជរដ្ឋាភិបាលនៃកម្ពុជា និងសាជីវកម្មស្ពាន និងថ្នល់ចិន។

គំរោងព្រែកជីកហ្វូណនតេជោ ត្រូវបានក្រសួងសាធារណៈការនិងដឹកជញ្ជូនប្រកាសថា បានបញ្ចប់ការសិក្សា១០០ភាគរយហើយ ដោយមិនមានផលប៉ះពាល់បរិស្ថាន និងលំហូរទឹកនោះឡើយ។ គំរោងជាប្រវត្តិសាស្រ្ត ដ៏មានសារៈសំខាន់នេះ មានប្រវែង១៨០គីឡូម៉ែត្រ និងគ្រោងចំណាយថវិកាសាងសង់ប្រមាណ១៧០០លានដុល្លារអាមេរិក៕

ដោយៈ ជេស៊ីកា

        ប៉េកាំងៈ  ក្នុងជំនួបជាមួយថ្នាក់ដឹកនាំក្រុមហ៊ុនChina Railway Construction Corporation (CRCC), សម្តេចធិបតី ហ៊ុន ម៉ាណែត បានសង្កត់ធ្ងន់លើទិសដៅ នៃការអភិវឌ្ឍប្រព័ន្ធផ្លូវដែកកម្ពុជា ដើម្បីឱ្យមានសមត្ថភាពគ្រប់ដណ្តប់ទូទាំងប្រទេស។

ការលើកឡើងនេះ បានធ្វើកាលពីព្រឹកថ្ងៃទី១៧ ខែតុលា ឆ្នាំ២០២៣ ក្នុងឱកាស ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអនុញ្ញាតឱ្យលោកវ៉ាង ជៀនភីង (Wang Jianping) ប្រធានក្រុមប្រឹក្សាភិបាលក្រុមហ៊ុនChina Railway Construction Corporation (CRCC) ចូលជួបសម្តែងការគួរសម ក្នុងឱកាសនៃការចូលរួមក្នុង “វេទិកាខ្សែក្រវាត់ និងផ្លូវ លើកទី៣” នៅរដ្ឋធានីប៉េកាំង សាធារណរដ្ឋប្រជាមានិតចិន។

ក្នុងឱកាសនោះ លោកប្រធានក្រុមប្រឹក្សាភិបាល ក៏បានជម្រាបជូន សម្តេចធិបតី អំពីការវិវឌ្ឍរីកចម្រើនរបស់ក្រុមហ៊ុននៅកម្ពុជា ដោយគិតមកដល់ពេលបច្ចុប្បន្ននេះ ក្រុមហ៊ុនCRCC មានគម្រោងវិនិយោគសរុបចំនួន៥៣ ជាមួយនឹងដើមទុនប្រមាណ៥.៣០០លានដុល្លារអាមេរិក។ចំពោះទិសដៅអនាគត ក្រុមហ៊ុនក៏មានផែនការវិនិយោគលើគម្រោងធំៗចំនួន៣បន្ថែមទៀត រួមមានទី១ មជ្ឈមណ្ឌលគ្រប់គ្រងប្រព័ន្ធទិន្នន័យ សម្រាប់គាំទ្រដល់រដ្ឋាភិបាលអេឡិចត្រូនិក ទី២ គម្រោ​ងផ្លូវដែកតភ្ជាប់ភ្នំពេញ-សៀមរាប និងភ្នំពេញ-ប៉ោយប៉ែត និងទី៣ គម្រោងផ្គត់ផ្គង់ទឹកស្អាត តាមបណ្តាខេត្តស្របដងទន្លេមេគង្គ។

ជាការឆ្លើយតប សម្តេចធិបតី បានសម្តែងនូវក្តីរីករាយស្វាគមន៍ចំពោះជំនួបជាមួយថ្នាក់ដឹកនាំរបស់ក្រុមហ៊ុន CRCC នាឱកាសនេះ ព្រមទាំងបានថ្លែងអំណរគុណ និងគាំទ្រចំពោះគម្រោងវិនិយោគនានារបស់ក្រុមហ៊ុននៅកម្ពុជា ជាពិសេសការវិនិយោគ ក្នុងប្រព័ន្ធផ្គត់ផ្គង់ទឹកស្អាត និងប្រព័ន្ធផ្លូវដែក ដែលជាផ្នែកមួយដ៏សំខាន់នៃការពង្រឹងវិស័យឡូជីស្ទីក ព្រមទាំងលើកទឹកចិត្តឱ្យបន្តពង្រីក ការវិនិយោគទៅលើវិស័យផ្សេងៗទៀត ដែលក្រុមហ៊ុនមានបទពិសោធន៍ និងមានលទ្ធភាព។ទាក់ទងនឹងការអភិវឌ្ឍប្រព័ន្ធផ្លូវដែក ដើម្បីឱ្យមានសមត្ថភាពគ្រប់ដណ្តប់ទូទាំងប្រទេស សម្តេចធិបតីនាយករដ្ឋមន្ត្រី បានសង្កត់ធ្ងន់លើគោលដៅចំនួនពីរ ទី១ ការពិនិត្យលទ្ធភាពលើការជួសជុល និងទំនើបកម្មផ្លូវដែកដែលមានស្រាប់ និងទី២ ការសិក្សាលើការតភ្ជាប់ប្រព័ន្ធផ្លូវដែកពីភ្នំពេញ- បាវិត និងប៉ោយប៉ែត-សៀមរាប ក៏ដូចជាការតភ្ជាប់រហូតដល់ព្រំដែនវៀតណាម ដោយឆ្លងកាត់ខេត្តស្ទឹងត្រែង និងខេត្តមណ្ឌលគិរី៕

ដោយ: គង់ លាងហួរ
អន្តរជាតិ: យោងតាមការស្ទង់មតិមួយបានបង្ហាញថា ភាពតាន តឹងផ្នែកនយោបាយ និងបញ្ហាសេដ្ឋកិច្ចកំពុងធ្វើឱ្យទំនុកចិត្តរបស់ក្រុមហ៊ុនអាជីវកម្មអាមេរិក ដែលកំពុងប្រតិបត្តិការនៅក្នុងប្រទេសចិនមានការធ្លាក់ចុះយ៉ាងខ្លាំង។

ការស្ទង់មតិខាងលើរៀបចំធ្វើឡើង ដោយសភាពាណិជ្ជកម្មអាមេរិក (AmCham) ប្រចាំនៅទីក្រុងសៀងហៃ ទៅលើអ្នកឆ្លើយសំណួរចំនួន៣២៥រូប។

ការស្ទង់មតិរកឃើញថា ចំនួនក្រុមហ៊ុនដែលមានសុទិដ្ឋិនិយមអំពីទស្សនវិស័យរយៈពេល៥ឆ្នាំ របស់ពួកគេនៅក្នុងប្រទេសចិនបានដាំក្បាលចុះដល់កម្រិតទាបបំផុតមិនធ្លាប់មាន។

តួយ៉ាង ភាគរយនៃក្រុមហ៊ុនអាមេរិក ដែលនៅតែបន្តមានសុទិដ្ឋិ និយមលើទស្សនវិស័យអាជីវកម្ម រយៈពេល៥ឆ្នាំនៅប្រទេសចិន បានធ្លាក់ចុះមកត្រឹម៥២%។ នេះបើយោងតាមការស្ទង់មតិប្រចាំឆ្នាំដែលចេញផ្សាយ ដោយសភាពាណិជ្ជកម្មអាមេរិក (AmCham) ប្រចាំនៅទីក្រុងសៀងហៃ។

តួលេខនេះគឺជាកម្រិតទាបបំផុត ចំពោះសុទិដ្ឋិនិយមរបស់ក្រុមហ៊ុនអាមេរិកនៅក្នុងប្រទេសចិន គិតចាប់តាំងពីរបាយការណ៍ប្រចាំឆ្នាំរបស់សភាពាណិជ្ជកម្ម AmCham Shanghai ត្រូវបានចងក្រងឡើងជាលើកដំបូងនៅក្នុងឆ្នាំ១៩៩៩។

ភាព​តានតឹង​រវាង​មហាអំណាច​ពិភពលោក​ នៅតែ​ជា​ក្តីកង្វល់​សម្រាប់​ក្រុមហ៊ុន​អាមេរិកជាច្រើន ដោយ​ភាព​តានតឹង​រវាង​សហរដ្ឋអាមេរិក​ និង​ចិន​ត្រូវបាន​គេលើក​ឡើង​ថា​ ជា​បញ្ហា​ប្រឈម​ដ៏កំពូល។

ទន្ទឹមគ្នានេះ ភាពមិនច្បាស់លាស់អំពីតម្លាភាព នៃបរិយាកាសបទប្បញ្ញត្តិរបស់ប្រទេសចិន ក៏បានកើនឡើងផងដែរ ខណៈ១/៣នៃអ្នកឆ្លើយសំណួរក្នុងការស្ទង់មតិខាងលើ បានរាយការណ៍ថា គោលនយោបាយ និងបទប្បញ្ញត្តិរបស់ចិន ចំពោះក្រុមហ៊ុនបរទេសបានវិវឌ្ឍកាន់តែអាក្រក់កាលពីឆ្នាំ២០២២កន្លងទៅ៕

ដោយ: គង់ លាងហួរ

អន្តរជាតិ: តម្លៃជួលផ្ទះអាជីវកម្ម នៅទីក្រុងហូជីមិញបានដាំក្បាលចុះ៣០% គិតមកទល់ពេលនេះ ក្នុងឆ្នាំនេះ ប៉ុន្តែនៅតែមានទីតាំងជាច្រើនត្រូវបានបិទ ដោយសារតែខ្វះអ្នកជួល ស្របពេលដែលមានការលំបាកផ្នែកសេដ្ឋកិច្ច។

កាលពីពេលថ្មីៗនេះ អ្នកនាង Lan បានជួលផ្ទះអាជីវកម្មរបស់គាត់ ក្នុងខណ្ឌ១ ទីក្រុងហូជីមិញ ជាមួយតម្លៃ៦៥លានដុង ក្នុងមួយខែ ពោលគឺដាំក្បាលចុះ២៦% បើធៀបនឹងមុនផ្ទុះជំងឺកូវីដ-១៩ បន្ទាប់ពីគាត់បានទុកផ្ទះនោះចោល អស់រយៈពេល២ខែ ដោយសារមិនអាចរកអ្នកជួលបាន។

អ្នកនាងអះអាងថា “ប្រសិនបើខ្ញុំមិនបញ្ចុះថ្លៃទេ ទាំងអ្នកជួល ទាំងខ្ញុំនឹងជួបការលំបាក ហើយខ្ញុំនឹងមិនមានអ្នកជួលទេ ខណៈពេលដែលពួកគេនឹងមិនមានធនធានគ្រប់គ្រាន់ ដើម្បីបន្តអាជីវកម្មរបស់ខ្លួន”។

ផ្ទះអាជីវកម្មនោះស្ថិត​នៅលើផ្លូវ Le Thi Rieng ហើយធ្លាប់​ពោរពេញ​ទៅ​ដោយ​ហាង​ធ្វើ​សក់ ស្ប៉ា​ក្រចក និង​ហាង​លក់​គ្រឿង​សម្អាង ប៉ុន្តែ​ឥឡូវ​នេះ​ ផ្លូវនេះហាក់​ដូច​ជា​ស្ងាត់​ឈឹង ខណៈ​អាជីវកម្ម​ជា​ច្រើន​បាន​បិទ​ទ្វារ​ក្នុង​រយៈ​ពេល​៣ឆ្នាំ​ចុង​ក្រោយ​នេះ។

ចំណែក ផ្ទះអាជីវកម្មមួយ ដែលស្ថិតនៅលើផ្លូវ Cach Mang Thang Tam ខណ្ឌ១ ទីក្រុងហូជីមិញ ធ្លាប់ដាក់ជួលក្នុងតម្លៃ២០០លានដុងក្នុងមួយខែ មុនផ្ទុះជំងឺរាតត្បាត ប៉ុន្តែពេលនេះ តម្លៃជួលត្រូវបានបញ្ចុះ៣៥% មកនៅសល់ត្រឹមតែ១៣០លានដុងប៉ុណ្ណោះ ក្នុងមួយខែ។

ជាមួយគ្នានេះ ផ្ទះអាជីវកម្មជាច្រើន ដែលមានកំពស់ចាប់ពី២ ឬ៣ជាន់ នៅក្នុងទីក្រុងហូជីមិញ កំពុងស្ថិតក្នុងស្ថានភាពដូចគ្នា ដែលមានអត្រាទំនេរទុកចោលខ្ពស់ អស់ជាច្រើនខែកន្លងមកហើយ៕

ដោយ: គង់ លាងហួរ
អន្តរជាតិ: បណ្តាម្ចាស់សណ្ឋាគារ និងសហគ្រិនទេសចរណ៍នៅទីក្រុងឈៀងម៉ៃ កំពុងអំពាវនាវឱ្យរដ្ឋាភិបាលបង្កើនការគ្រប់គ្រងកាំភ្លើង ដើម្បីធានាសុវត្ថិភាព បន្ទាប់ពីមានការបាញ់ប្រហារនៅផ្សារទំនើប Siam Paragon កាលពីថ្ងៃទី៣ ខែតុលា ដែលបានប៉ះពាល់ដល់ទំនុកចិត្តរបស់ភ្ញៀវទេសចរចិនចំពោះប្រទេសថៃ។

ភ្ញៀវទេសចរប្រហែល៦០.០០០នាក់មកពីប្រទេសចិនបានលុបចោលការធ្វើដំណើររបស់ពួកគេទៅកាន់ប្រទេសថៃ បន្ទាប់ពីមានការបាញ់ប្រហារនៅផ្សារ Siam Paragon ដែលបានសម្លាប់មនុស្ស៣នាក់ ក្នុងនោះមានភ្ញៀវទេសចរចិនម្នាក់ និង៤នាក់ទៀតបានរងរបួស។

យោងតាមទិន្នន័យពីក្រុមហ៊ុនគ្រប់គ្រងព្រលានយន្តហោះ Airports of Thailand បានបង្ហាញថា ចំនួននៃការមកដល់របស់ភ្ញៀវទេសចរចិនបានធ្លាក់ចុះ៩,២% ពី៦៥០.០០០នាក់ មកនៅត្រឹម៥៩០.០០០នាក់ បន្ទាប់ពីកើតឧប្បត្តិហេតុនេះ។លោក Chutidech Promkaewngarm ជំនួយការអ្នកគ្រប់គ្រងនៅក្រុមហ៊ុន Standard Tour Co Ltd បានប្រាប់កាសែតបាងកកប៉ុស្តិ៍ថា ការស្លាប់របស់ស្ត្រីជនជាតិចិនក្នុងអំឡុងពេលបាញ់ប្រហារនឹងប៉ះពាល់ដល់ទំនុកចិត្តរបស់ភ្ញៀវទេសចរជាបណ្តោះអាសន្ន។

លោកបានអះអាងថា អ្នកនិយមលេងអុីនធឺណិតនៅប្រទេសចិនជាច្រើនបានបង្ហោះថា ពួកគេនឹងមិនទៅលេងប្រទេសណា ដែលការកាន់កាប់កាំភ្លើងជារឿងមិនខុសច្បាប់នោះទេ ខណៈដែលសាក្សីនៅកន្លែងកើតហេតុបានចែករំលែកបទពិសោធន៍របស់ពួកគេនៅលើប្រព័ន្ធផ្សព្វផ្សាយសង្គមចិន Weibo ថា ការធ្វើដំណើរលើកដំបូងរបស់ពួកគេទៅកាន់ប្រទេសថៃក៏ជាលើកចុងក្រោយរបស់ពួកគេផងដែរ។លោក Paisarn Sukcharoen ប្រធានសមាគមសណ្ឋាគារថៃភាគខាងជើងបានលើកឡើងថា “ឧបទ្ទវហេតុនេះបានធ្វើឱ្យមានការព្រួយបារម្ភដល់ប្រតិបត្តិករទេសចរណ៍និងសហគ្រិនដែលអាជីពរបស់ពួកគេពឹងផ្អែកលើវិស័យទេសចរណ៍ ហើយជាង៣០% នៃការកក់សណ្ឋាគារត្រូវបានពន្យារពេលភ្លាមៗ បន្ទាប់មានរឿងនេះ”៕

រដ្ឋធានីប៉េកាំង សាធារណរដ្ឋប្រជាមានិតចិន រសៀលថ្ងៃអង្គារ ទី១៧ តុលា ២០២៣ ពិធីចុះអនុស្សរណៈនៃការយោគយល់គ្នា និងកិច្ចព្រមព្រៀង រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន លើឯកសារសំខាន់ៗមួយចំនួនដូចខាងក្រោម៖
១ អនុស្សរណៈនៃការយោគយល់គ្នាស្តីពីការរួម គ្នាជំរុញគម្រោងគន្លឹះវង់ទី៣ សម្រាប់កិច្ច សហប្រតិបត្តិការសមត្ថភាពផលិត និងការ វិនិយោគ កម្ពុជា-ចិន
២ អនុស្សរណៈនៃការយោគយល់គ្នា ស្តីពីការ បង្កើតយន្តការការងារសម្រាប់ការអនុវត្ត គម្រោងផែនការកិច្ចសហប្រតិបត្តិការទ្វេភាគី ដើម្បីរួមគ្នាកសាងខ្សែក្រវាត់សេដ្ឋកិច្ចផ្លូវ សូត្រ និងផ្លូវសូត្រសមុទ្រសតវត្សរ៍ទី២១
៣ អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការវិនិយោគលើការអភិវឌ្ឍបៃតង និងកាបូនទាប
៤ កិច្ចព្រមព្រៀងឥណទានសម្បទានសម្រាប់ ហិរញ្ញប្បទានលើគម្រោងសាងសង់ខ្សែបញ្ជូនអគ្គិសនីជនបទ ដំណាក់កាលទី៨
៥ លិខិតប្តូរសារសម្រាប់ការសិក្សាសមិទ្ធិលទ្ធភាពគម្រោងជួសជុលប្រាសាទព្រះវិហារ ក្នុងក្របខ័ណ្ឌហិរញ្ញប្បទានឥតសំណងពីរដ្ឋាភិបាលចិន
៦ កំណត់ហេតុនៃកិច្ចប្រជុំ ស្តីពីការសិក្សា សមិទ្ធិលទ្ធភាពនៅលើទីតាំងរបស់គម្រោងផ្លូវជនបទ ជំហាន៣ នៅព្រះរាជាណាចក្រកម្ពុជា ក្នុងក្របខ័ណ្ឌហិរញ្ញប្បទានឥតសំណងពីរដ្ឋាភិបាល នៃសាធារណរដ្ឋប្រជាមានិតចិន។
៧ អនុស្សរណៈនៃការយោគយល់ ស្តីពីការ បង្កើតយន្តការកិច្ចសហប្រតិបត្តិការផ្លូវរថភ្លើង កម្ពុជា-ចិន ។
៨ អនុស្សរណៈនៃការយោគយល់គ្នា ស្តីពី កិច្ចសហប្រតិបត្តិការរួមគា្នក្នុងការសាងសង់ សួនឧស្សាហកម្មចិន-កម្ពុជា រវាង ក្រសួងពាណិជ្ជកម្មនៃព្រះរាជាណាចក្រកម្ពុជា និង អាជ្ញាធរតំបន់ស្វយ័តជនជាតិជាំងក្វាងស៊ី នៃសាធារណរដ្ឋប្រជាមានិតចិន។

ដោយៈ គង់ សិរីជេស៊ីកា

        ប៉េកាំងៈ ក្នុងដំណើរអញ្ជើញទៅចូលរួមខួបលើកទី១០ នៃការបង្កើតគំនិតផ្តួចផ្តើមខ្សែក្រវ៉ាត់ និងផ្លូវនៅប្រទេសចិន សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា បានអនុញ្ញាត្តឲ្យក្រុ​មហ៊ុនចិនធំៗជាច្រើនចូលជួបសម្តែងការគួរសម និងពិភាក្សាការងារ។

នៅថ្ងៃទី១៦ តុលា ម្សិលម៉ិញនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អនុញ្ញាតអោយ លោក ចូវ ឡី (Zuo Lei) ប្រធានក្រុមប្រឹក្សាភិបាលក្រុមហ៊ុនChina Datang Co.,Ltd. ចូលសម្តែងការគួរសម និងពិភាក្សាការងារ ។
នៅថ្ងៃដដែលនេះសម្តេចបានអនុញ្ញាត្តឲ្យ លោក កឺ ហាវជែវ (Ge HaiJiao) ប្រធានក្រុមប្រឹក្សាភិបាលនៃធនាគារចិនគ្រុប ចូលសម្តែងការគួរសម និងពិភាក្សាការងារ ។ នេះគឺជាជំនួបទី៣ ក្នុងថ្ងៃទី១ នៃការអញ្ជើញដល់សាធារណរដ្ឋប្រជាមានិតចិន ដើម្បីចូលរួមវេទិកាខ្សែក្រវាត់ និងផ្លូវលើកទី៣ (3o BRF) សម្រាប់កិច្ច សហប្រតិបត្តិការអន្តរជាតិ ក្រោមមូលបទ “កិច្ចសហប្រតិបត្តិការខ្សែក្រវាត់ និងផ្លូវ ប្រកបដោយគុណភាព ខ្ពស់ ៖ រួមគ្នាដើម្បីការអភិវឌ្ឍ និងវិបុលភាពរួម”។

ក្នុងជំនួបជាបន្តបន្ទាប់នោះ សម្តេចធិបតីបានជួបជាមួយថ្នាក់ដឹកនាំក្រុមហ៊ុនCMECរបស់ចិន ដែលគ្រោងវិនិយោគទឹកប្រាក់ប្រមាណ៣,០០០ លានដុល្លារអាមេរិក លើវិស័យថាមពលហ្គាសនៅកម្ពុជា។ នៅក្នុងជំនួបនៅថ្ងៃទី១៧  តុលា ​ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោក វ័ង ប៉ូ (Wang Bo) ប្រធានក្រុមប្រឹក្សាភិបាលក្រុមហ៊ុន China Machinery Engineering Corporation (CMEC) នាព្រឹកថ្ងៃទី១៧ ខែតុលា ឆ្នាំ២០២៣នេះ ក្នុងឱកាសដែល សម្ដេចធិបតី អញ្ជើញចូលរួមក្នុង “វេទិកាខ្សែក្រវាត់ និងផ្លូវ លើកទី៣” នៅរដ្ឋធានីប៉េកាំង សាធារណរដ្ឋប្រជាមានិតចិន លោក Wang Bo បានគោរពជម្រាប សម្ដេចធិបតី ថា ក្នុងរយៈពេល១០ឆ្នាំបន្តទៅមុខ ក្រុមហ៊ុន CMEC គ្រោងនឹងសហការវិនិយោគរួម ជាមួយក្រុមហ៊ុនកម្ពុជាចំនួនពីរ ក្នុងទំហំទឹកប្រាក់ប្រ​មាណ៣,០០០លានដុល្លារអាមេរិក លើវិស័យថាមពលហ្គាសនៅកម្ពុជា។ក្រុមហ៊ុន CMEC ជាបុត្រសម្ព័ន្ធរបស់ក្រុមហ៊ុនSINOMACH ដែលមានជំនាញក្នុងវិស័យទឹកស្អាត ថាមពល និងហេដ្ឋារចនាសម្ព័ន្ធ ហើយបានធ្វើការវិនិយោគ ក្នុងគម្រោងជាច្រើននៅកម្ពុជា។

នៅក្នុងឱកាសដ៏កម្រនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា អនុញ្ញាតឱ្យ លោក លី ខ័រ (Li Kuo) ប្រធានក្រុមហ៊ុន China Metro Group ចូលជួបសម្តែងការគួរសម និងពិភាក្សាការងារនៅថ្ងៃដដែលផងដែរ។
ជាមួយគ្នានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក៏បានអនុញ្ញាតឱ្យ លោក វ៉ាង ជៀនភីង (Wang Jianping) ប្រធានក្រុមប្រឹក្សាភិបាលក្រុមហ៊ុន China Railway Construction Corporation ចូលជួបសម្តែងការគួរសម និងពិភាក្សាការងារផងដែរនៅថ្ងៃដដែលនេះ។ ទន្ទឹងនឹងពេលជាមួយគ្នានេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអនុញ្ញាតអោយ ឯកឧត្តម ខាង ហ៊ូពាវ (Kang Hubiao) ប្រធានក្រុមប្រឹក្សាភិបាលគណៈកម្មការនាយកក្រុមហ៊ុន Genertec International Holding Co., Ltd.  ចូលជួបសម្ដែងការគួរសម និងពិភាក្សាការងារ៕