ដោយៈ គង់ សូរិយា

        ភ្នំពេញៈ ប្រធានរដ្ឋសភានៃសាធារណៈរដ្ឋកូរ៉េ លោក គីម ជីនផ្យូ (Kim Jin-pyo) បានបង្ហើបឲ្យដឹងថា នាពេលថ្មីៗនេះ ការវាយតម្លៃលើគម្រោង នៃការសាងសង់ស្ពានមិត្តភាពកម្ពុជា-កូរ៉េ (ភ្នំពេញ-អរិយក្សត្រ)ទើបបានបញ្ចប់ ហើយការសាងសង់នឹងចាប់ផ្តើមនាពេលឆាប់ៗខាងមុខ។

ការលើកឡើងបែបនេះ របស់ប្រធានរដ្ឋសភាកូរ៉េ បានធ្វើឡើងនៅក្នុងជំនួបពិភាក្សាការងារ ជាមួយសម្តេចវិបុលសេនាភក្តី សាយ ឈុំ ប្រមុខរដ្ឋស្តីទីកម្ពុជា។ ជំនួបនេះបានធ្វើឡើងកាលពីចុងសប្តាហ៍មុន។

លោកគីម ជីនផ្យូ បានសម្តែងសុទិដ្ឋិនិយមថា “ស្ពាននេះនឹងជួយរួមចំណែកដល់ការអភិវឌ្ឍរបស់កម្ពុជា និងជានិមិត្តរូបនៃមិត្តភាពកម្ពុជា-កូរ៉េ”។ លោកបន្ថែមថា “ប្រទេសទាំងពីរនឹងបន្តពង្រីកកិច្ចសហប្រតិបតិ្តការឱ្យកាន់តែរឹងមាំ ដើម្បីទាក់ទាញក្រុមហ៊ុនកូរ៉េមកវិនិយោគនៅកម្ពុជា និងបន្តពង្រីកលើវិស័យនានាបន្ថែមទៀត ហើយកិច្ចសហប្រតិបតិ្តការដ៏រឹងមាំរវាងប្រទេសទាំងពីរ នឹងរួមចំណែកដល់សន្តិភាព ស្ថិរភាព និងអភិវឌ្ឍនៅតំបន់អាស៊ាន ក៏ដូចជាតំបន់មេគង្គផងដែរ”។

ប្រធានរដ្ឋសភាកូរ៉េ ក៏បានវាយតម្លៃខ្ពស់ចំពោះការអភិវឌ្ឍយ៉ាងឆាប់រហ័សរបស់កម្ពុជា ទាំងផ្នែកសេដ្ឋកិច្ច នយោបាយ និងសង្គម។
លោកមានជំនឿជឿជាក់ថា “កម្ពុជានឹងសម្រេចបានការរីកចម្រើ​នសេដ្ឋកិច្ចកាន់តែរឹងមាំ និងជោគជ័យគ្រប់ផ្នែកថែមទៀត ដូចដែលបានសម្រេច កាលពីពេលកន្លងមកក្រោមការដឹកនាំ របស់សម្តេចតេជោ ជាមួយនឹងការគាំទ្រ ពីអង្គការនីតិប្បញ្ញត្តិនៃប្រទេសទាំងពីរ”។

ជាមួយគ្នានោះ លោកជឿជាក់ថា ថ្នាក់ដឹកនាំវ័យក្មេងរបស់កម្ពុជានាពេលបច្ចុប្បន្ន នឹងនាំកម្ពុជាធ្វើឱ្យសម្រេចនូវគោលដៅ ប្រែក្លាយកម្ពុជា ទៅជាប្រទេសមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលកម្រិតខ្ពស់ឆ្នាំ២០៥០។ទន្ទឹមនឹងនេះដែរ ប្រធានរដ្ឋសភាកូរ៉េ បានបញ្ជាក់អំពីបំណងរបស់រដ្ឋាភិបាល និងសភាកូរ៉េ ក្នុងការបន្តពង្រឹងទំនាក់ទំនង និងកិច្ចសហប្រតិបតិ្តការល្អ ជាមួយកម្ពុជាកាន់តែរឹងមាំ ដោយចាត់ទុកកម្ពុជាជាដៃគូសំខាន់ក្នុងក្របខ័ណ្ឌអាស៊ាន-កូរ៉េ និងជាប្រទេសដៃគូ ODA ដ៏សំខាន់។

លោកបញ្ជាក់ថា “ដើម្បីសម្រេចគោលដៅទាំងនេះ ប្រទេសទាំងពីរត្រូវតែលើកកម្ពស់ទំនាក់ទំនង និងកិច្ចប្រតិបតិ្តការឱ្យកាន់តែស៊ីជម្រៅ តាមរយៈការផ្លាស់ប្តូរដំណើរទស្សនកិច្ច របស់ថ្នាក់ដឹកនាំនៃប្រទេសទាំងពីរ”។

សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី បានសម្តែងនូវការពេញចិត្ត ដោយមើលឃើញទំនាក់ទំនង រវាងប្រទេសទាំងពីរបន្តរីកចម្រើនជាបន្តបន្ទាប់។ ការរីកចម្រើននេះ ស្តែងឡើងតាមរយៈការផ្លាស់ប្តូររវាងប្រជាជន និងប្រជាជន ការគាំទ្រគ្នាទៅវិញទៅមកលើកិច្ចសហប្រតិបត្តិការអន្តរជាតិ សំដៅរួមចំណែកកសាងសន្តិភាព សន្តិសុខ ស្ថិរភាព ការអភិវឌ្ឍក្នុងតំបន់ និងសកលលោក។

ក្នុងនាមប្រជាជនកម្ពុជា សម្តេចប្រមុខរដ្ឋស្តីទីបានថ្លែងអំណរគុណរដ្ឋាភិបាល និងប្រជាជនកូរ៉េ ដែលបានផ្តល់ជំនួយអភិវឌ្ឍផ្លូវការ ហិរញ្ញប្បទានឥតសំណង ហិរញ្ញប្បទានសម្បទាន ចាប់តាំងពីឆ្នាំ១៩៩៧។ ជាការកត់សម្គាល់ ក្រោមគោលនយោបាយភាគខាងត្បូងថ្មីបូក (New Southern Policy Plus) កម្ពុជាជាប្រទេសអាទិភាពសម្រាប់ផ្តល់ជំនួយអភិវឌ្ឍន៍ផ្លូវការ។នៅឆ្នាំ២០២២ក​ន្លងមក កម្ពុជាជាប្រទេសទទួលបានជំនួយច្រើនជាងគេ ក្នុងចំណោមប្រទេសដៃគូអភិវឌ្ឍន៍របស់កូរ៉េ ក្នុងទឹកប្រាក់ចំនួន១៥០លានដុល្លារអាមេរិក។

សម្តេចប្រមុខរដ្ឋស្តីទី បានគូសបញ្ជាក់ថា លំហូវិនិយោគដោយផ្ទាល់ពីសាធារណរដ្ឋកូរ៉េ និងទេសចរណ៍កូរ៉េ បានដើរតួនាទីដ៏សំខាន់ក្នុងរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា កាត់បន្ថយភាពក្រក្រី លើកកម្ពស់ជីវភាពរស់នៅ របស់ប្រជាជនកម្ពុជាកាន់តែល្អប្រសើរ។

សម្តេចប្រមុខរដ្ឋស្តីទី បានសម្តែងនូវការអបអរសាទរ ​ចំពោះការសម្រេចនូវសមិទ្ធផលសង្គម-សេដ្ឋកិច្ចដ៏ធំធេងរបស់សាធារណរដ្ឋកូរ៉េ ក្រោមការដឹកនាំរបស់ប្រធានាធិបតី និងថ្នាក់ដឹកនាំកូរ៉េ នឹងបន្តសម្រេចបានជោគជ័យ ក្នុងការអភិវឌ្ឍសង្គម-សេដ្ឋកិច្ច ប្រកបដោយវិបុលភាព វឌ្ឍនភាព និងសុភមង្គល។ កម្ពុជាចាត់ទុកការរីកចម្រើនរបស់សាធារណរដ្ឋកូរ៉េ ជាការរីកចម្រើនរបស់កម្ពុជា និងជាការរីកចម្រើនរួមរបស់តំបន់ និងបានរួមចំណែកយ៉ាងសំខាន់ ដល់ការនាំមក នូវសន្តិភាព សន្តិសុខ ស្ថិរភាពក្នុងតំបន់ និងអន្តរជាតិ៕

ដោយៈ គង់ ម៉ាលីនណា

        កំពង់ស្ពឺៈ សម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងថា ក្នុងឋានៈជាអ្នកដឹកនាំប្រទេសកើតចេញពីការគាំទ្ររបស់ប្រជាពលរដ្ឋនោះ សម្តេចនឹងប្រឹងប្រែងបម្រើជាតិ និងប្រជាពលរដ្ឋ។

សម្តេចធិបតីបានថ្លែងបែបនេះ ក្នុងពិធីសំណេះសំណាលជាមួ​យកម្មករ និយោជិតនៅខេត្តកំពង់ស្ពឺនាព្រឹកថ្ងៃទី៩ កញ្ញានេះ។
សម្តេចបញ្ជាក់ថា សមិទ្ធផលជោគជ័យ នៃបេសកកម្មការងាររបស់ម្តេចនៅឥណ្ឌូនេស៊ី គឺជាសមិទ្ធផលសម្រាប់ប្រជាពលរដ្ឋខ្មែរទាំងមូល មិនមែនជាសមិទ្ធផលផ្ទាល់ខ្លួនរបស់សម្តេចនោះឡើយ។
សម្តេចធិបតីហ៊ុន ម៉ាណែត បានថ្លែងថា កិច្ចប្រជុំកំពូលនៅឥណ្ឌូនេស៊ី មមាញឹកខ្លាំងរហូតដាច់បាយក៏មាន។ ក្នុងនោះសម្តេចធិបតី បានស្រកអស់មួយគីឡូក្រាម។
សម្តេចធិបតី ហ៊ុន ម៉ាណែត បានថ្លែងថា ការអញ្ជើញទៅប្រជុំនៅឥណ្ឌូនេស៊ី មិនមែនទៅដើម្បីសម្ញែងនោះទេ គឺជាបេសកកម្មដើម្បីប្រយោជន៍ជាតិ។

សម្តេចធិបតី ហ៊ុន ម៉ាណែតបន្តថា រាល់ជំនួបជាមួយមិត្តភក្តិបរទេសនៅឥណ្ឌូនេស៊ី ទទួលសម្តេចក្នុងឋានៈនាយករដ្ឋមន្ត្រី អត់មានមេដឹកនាំណាមិនទទួលស្គាល់នោះឡើយ។
សម្តេចធិបតីហ៊ុន ម៉ាណែត បានថ្លែងថា បេសកកម្មរបស់សម្តេចនៅប្រទេសឥណ្ឌូនេស៊ី ក៏ដើម្បីបង្ហាញជំហររបស់កម្ពុជា លើបញ្ហានានាទាំងក្នុងតំបន់ និងលើពិភពលោក៕

        ដោយៈ គង់ សូរិយា

        កំពង់ស្ពឺៈ សម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងថា ដំណើរទៅកាន់ឥណ្ឌូនេស៊ី សម្តេចទាញប្រយោជន៍ផ្នែកសេដ្ឋកិច្ចបានច្រើនណាស់ រួមមាន ការលើកអង្ករឱ្យឥណ្ឌូនេស៊ី បាន ២៥ម៉ឺនតោនក្នុងមួយឆ្នាំ, បើកការហោះហើរជាមួយឥណ្ឌូនេស៊ី ហ្វីលីពិន និងការសាងសង់បណ្តាញបញ្ជូនថាមពលទៅសិង្ហបុរី។

សម្តេចធិបតី ហ៊ុន ម៉ាណែត បានថ្លែងបែបនេះ ក្នុងជំនួបជាមួយកម្មករ និយោជិតជាង១៨០០០នាក់ នៅខេត្តកំពង់ស្ពឺនាព្រឹកថ្ងៃទី៩ កញ្ញានេះ។

សម្តេចបន្តថា សម្តេចក៏បានជជែកជាមួយចិន ជប៉ុន និងកូរ៉េខាងត្បូង ដើម្បីបើកទីផ្សារពាណិជ្ជកម្ម ក្នុងនោះហ្វីលីពិន គ្រោងទិញអង្ករពីកម្ពុជាផងដែរ។

សម្តេចធិបតីហ៊ុន ម៉ាណែត បានបន្តទៀតថា ក្នុងជំនួបជាមួយប្រធានាធិបតីកូរ៉េខាងត្បូង សម្តេចបានស្នើឱ្យកូរ៉េបង្កើនកូតាការងារសម្រាប់ពលករកម្ពុជា។សម្តេចធិបតី ហ៊ុន ម៉ាណែតបានបញ្ជាក់ទៀតថា “ក្នុងឋានៈជានាយករដ្ឋមន្ត្រី គឺសម្តេចត្រូវគិតគូរ ចំពោះផលប្រយោជន៍របស់ប្រជាជន”៕

តែម សុខុម

ភ្នំពេញ: កម្ពុជា បាននាំចេញផលិតផល ទៅក្រៅប្រទេសក្នុងទំហំទឹកប្រាក់១៥,៧ពាន់លានដុល្លារអាមេរិក ក្នុងរយៈពេល៨ខែដើមឆ្នាំ២០២៣ ដោយកើនឡើង០,៣% បើធៀបនឹង១៥,៦៤ពាន់លានដុល្លារអាមេរិក ដែលសម្រេចបានក្នុងរយៈពេលដូចគ្នា កាលពីឆ្នាំមុន។

របាយការណ៍របស់អគ្គនាយកដ្ឋានគយ និងរដ្ឋាករបានចេញផ្សាយនៅថ្ងៃសុក្រ ទី៨ ខែកញ្ញា នេះថា ការនាំចេញរបស់កម្ពុជា ទៅកាន់ប្រទេសចិន បានកើនឡើង១៦,៨% ឈានដល់៩៤០លានដុល្លារអាមេរិក អំឡុងពីខែមករា ដល់ខែសីហា ឆ្នាំនេះ បើធៀបនឹង៨០៤,៦លានដុល្លារអាមេរិក ដែលសម្រេចបានក្នុងរយៈពេលដូចគ្នាកាលពីឆ្នាំមុន។

របាយការណ៍ដដែលបង្ហាញថា ប្រទេសចិន គឺជាគោលដៅនាំចេញធំបំផុតទី៣សម្រាប់កម្ពុជា បន្ទាប់ពីសហរដ្ឋអាមេរិក និងប្រទេសវៀតណាម។

ទំនិញសំខាន់ៗដែលកម្ពុជា បាននាំចេញរួមមានសម្លៀកបំពាក់ ស្បែកជើង ទំនិញធ្វើដំណើរ កង់ និងកសិផលមួយចំនួនដូចជាអង្ករ កៅស៊ូ ដំឡូងមី ចេក ស្វាយ និងមៀនជាដើម។

លោក ប៉ែន សុវិជាតិ រដ្ឋលេខាធិការក្រសួងពាណិជ្ជកម្មមានប្រ​សា​សន៍ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បានរួមចំណែកយ៉ាងខ្លាំងក្លា នៅក្នុងការជួយជំរុញកំណើនពាណិជ្ជកម្មរបស់កម្ពុជា៕ Xinhua៕

ដោយ: គង់ លាងហួរ

អន្តរជាតិ: អ្នកនាង Coline Aguirre ដែលជាជនជាតិបារាំង បានលង់ស្រលាញ់ប្រទេសជប៉ុន និងវប្បធម៌របស់ប្រទេសនេះ បន្ទាប់ពីគាត់បានចំណាយរយៈពេលមួយឆ្នាំ រស់នៅទីនោះក្នុងនាមជានិស្សិតផ្លាស់ប្តូរការសិក្សាកាលពី៨ឆ្នាំមុន។

អ្នកនាងបានទិញផ្ទះក្នុងក្តីស្រមៃ នៅប្រទេសជប៉ុន នៅពេលដែលឱកាសទិញផ្ទះទំហំ៣០០ម៉ែត្រការ៉េ ដែលមានទីតាំងស្ថិតនៅចំកណ្តាលខេត្តNara ក្នុងតម្លៃត្រឹមតែ៤,៩លានយ៉េន (៣៣.០០០ដុល្លារ) បានមកដល់។

ដោយសារមានប្រាក់សន្សំគ្រប់គ្រាន់ នៅក្នុងគណនីធនាគារ អ្នកនាងAguirre បានទិញផ្ទះ ដែលគេទុកចោលអស់ជាច្រើនឆ្នាំ កាលពីឆ្នាំ២០២១។ ផ្ទះនោះ មានអាយុកាលប្រហែល១សតវត្សរ៍ ព្រមទាំងមានសួនច្បារចំនួនពីរ ប៉ុន្តែវាទាមទារការជួសជុលនិងរៀបចំឡើងវិញ។

អ្នកនាងបាន​មានប្រសាសន៍ថា “នៅ​ប្រទេស​បារាំង ប្រសិន​បើ​ខ្ញុំ​ចង់​បាន​យានដ្ឋាន​តូច​មួយ ខ្ញុំ​នឹង​ត្រូវ​ចំណាយ​ប្រាក់ចំនួន€១០០.០០០ (ប្រហែល១០៨.០០០ដុល្លារអាមេរិក)”។ អ្នកនាងបញ្ជា​ក់​​ទៀតថា “ខ្ញុំ​នឹង​ជួសជុល​របស់របរជា​ច្រើន នៅក្នុងផ្ទះចាស់នោះ ប៉ុន្តែ​ថ្លៃចំណាយនៅ​តែ​ទាប ​ជាងតម្លៃផ្ទះ​នៅ​ប្រទេសបារាំង”។

ដោយសារការធ្វើដំណើរមកកាន់ផ្ទះនោះ ចំណាយពេលត្រឹមតែមួយម៉ោងកន្លះពីទីក្រុងក្យូតូ និងចំណាយពេល២ម៉ោងពីអាកាសយានដ្ឋានអន្តរជាតិ ដូច្នេះអ្នកនាងសង្ឃឹមថា នៅពេលដែលការជួសជុលត្រូវបានបញ្ចប់រួចរាល់ គាត់នឹងផ្តល់នូវបន្ទប់គេងពីរ ឬបីសម្រាប់ទទួលភ្ញៀវ និងដើម្បីរកប្រាក់ចំណូលផងដែរ។

អ្នកនាង Aguirre បានបន្ថែមថា “ប្រហែលជារយៈពេល១០ឆ្នាំខាងមុខ ខ្ញុំចង់ប្រែក្លាយផ្ទះនេះ ទៅជាសណ្ឋាគារមួយ ហើយខ្ញុំនឹងមិនចាំបាច់រស់នៅក្នុងផ្ទះនេះទៀតទេ ហើយអ្នកផ្សេងទៀតអាចគ្រប់គ្រងផ្ទះនេះបាន ហើយវានឹងគ្រាន់តែជាអចលនទ្រព្យ បែបវិនិយោគប៉ុណ្ណោះ”។

លើសពីនេះទៀត ប្រជាពលរដ្ឋហុងកុងជាច្រើន ក៏មានការចាប់អារម្មណ៍ ក្នុងការទិញផ្ទះដែលគេបោះបង់ចោល នៅប្រទេសជប៉ុនទាំងនេះផងដែរ។

លោក Kazuaki Nebu ប្រធានផ្នែកអចលនទ្រព្យប្រចាំក្រុមហ៊ុន IQI Japan បានលើកឡើងថា “ហេតុផលមួយ ក្នុងចំណោមហេតុផលទូទៅច្រើនបំផុត ដែលពលរដ្ឋហុងកុងចង់ទិញផ្ទះ ដែលគេបោះបង់ចោលនៅប្រទេសជប៉ុន គឺដើម្បីប្រែក្លាយផ្ទះទាំងនោះទៅជាផ្ទះសម្រាកបែបវិស្សមកាល សម្រាប់ក្រុម​ហ៊ុនកក់​កន្លែង​ស្នាក់នៅ​តាមអនឡាញ Airbnbs។

លោកបន្ថែមថា “ពួកគេអាចរស់នៅក្នុងតំបន់មួយ ដ៏ស្រស់ស្អាតនៃប្រទេសជប៉ុន នៅក្នុងផ្ទះបែបប្រពៃណី និងទទួលបានប្រាក់ចំណូ​លពីភ្ញៀវថែមទៀត ហើយវា​ជា​ការ​សម្រេច​ក្តី​សុបិន​ សម្រាប់​មនុស្ស​ជា​ច្រើន”៕

តែម សុខុម

ប៉េកាំងៈ ណានជីង (Nanjing) បានក្លាយជាទីក្រុងដ៏ធំទី១ របស់ប្រទេសចិន ដែលបានលុបចោលការរឹតបន្តឹងលើការទិញផ្ទះ ខណៈក្រុមមន្ត្រីបង្កើតគោលនយោបាយខំពុងប្រឹងប្រែងបញ្ឈប់វិបត្តិកាន់តែជ្រៅនៅក្នុងវិស័យអចលនទ្រព្យដ៏ធំសម្បើម ដែលកំពុងជះផលប៉ះពាល់ខ្លាំងមកលើសេដ្ឋកិច្ចចិន ទាំងមូល។

អាជ្ញាធរនៃប្រទេសចិន ដែលជាសេដ្ឋកិច្ចធំបំផុតទី២ របស់ពិភពលោកក្នុងរយៈពេលប៉ុន្មានសប្តាហ៍ចុងក្រោយនេះបានដាក់ចេញវិធានការជាបន្តបន្ទាប់ ដូចជាការបន្ធូរបន្ថយវិធាននៃការខ្ចីប្រាក់ជាដើមដើម្បីជួយស្រោចស្រង់វិស័យអចលនទ្រព្យជាប់ផុងក្នុងបំណុល ដែលគ្របដណ្ដប់១ភាគ៤នៃសកម្មភាពសេដ្ឋកិច្ចរបស់ប្រទេសចិន។

ទោះជាយ៉ាងណា ក្រុមអ្នកវិភាគបានលើកឡើងថា វិធានការទាំងនេះទំនងជាមិនអាចស្ដារការដាំក្បាលចុះនៃវិស័យអចលនទ្រព្យចិន បានឡើយ។

ទីភ្នាក់ងារព័ត៌មាន Reuters បានចុះផ្សាយកាលពីសប្តាហ៍មុនថា ទីក្រុងនានាដូចជាក្រុងប៉េកាំង ក្រុងសៀងហៃ និងក្រុងស៊ឹនជិន (Shenzhen) ជាដើមអាចនឹងបន្ធូរបន្ថយការរឹតបន្តឹងលើការទិញលំនៅឋាន ដែលជាផ្នែកមួយ នៃកិច្ចខិតខំប្រឹងប្រែងរបស់ក្រុមនិយ័តកររួមទាំងក្រសួងលំនៅឋាន ធនាគារកណ្តាល និងនិយ័តករហិរញ្ញវត្ថុផងដែរក្នុងរយៈពេលជាច្រើនខែមកនេះ។

ណានជីង ដែលស្ថិតក្នុងចំណោមទីក្រុងធំបំផុតទាំង១០របស់ប្រទេសចិន បានចេញសេចក្តីជូនដំណឹងមួយកាលពីល្ងាចថ្ងៃព្រហស្បតិ៍ ទី៧ ខែកញ្ញា ថា ខ្លួននឹងអនុញ្ញាតឱ្យប្រជាជនទិញអាផាតម៉ិនដោយមិនចាំបាច់បង្ហាញភ័ស្តុតាងបញ្ជាក់ពីសិទ្ធិស្របច្បាប់នៅក្នុងទិញផ្ទះក្នុងសង្កាត់ចំនួន៤។

តាមការរំពឹងទុក ទីក្រុងផ្សេងៗទៀតទំនងជាអនុវត្តតាមទីក្រុងដែលមានប្រជាជនរស់នៅប្រមាណ៩,៥លាននាក់នេះនៅក្នុងការបន្ធូរបន្ថយរាល់ការរឹតបន្តឹង៕ Reuters៕

តែម សុខុម

សិង្ហបុរី: អាជ្ញាធរទីផ្សារថាមពលសិង្ហបុរី (EMA) កាលពីថ្ងៃសុក្រ ទី៨ ខែកញ្ញា បានអនុម័តឱ្យក្រុមហ៊ុនចំនួន៥នាំចូលអគ្គិសនីកាបូនទាបចំនួន២ជីហ្គាវ៉ាត់ (GW) ពីប្រទេសឥណ្ឌូនេស៊ី។

ការអនុម័តនេះធ្វើឡើងក្រោយពីក្រុមហ៊ុនថាមពលសិង្ហបុរី Keppel Energy កាលពីខែមីនា ដើមឆ្នាំនេះទទួលបានការអនុម័តពីអាជ្ញាធរទីផ្សារថាមពល (EMA) ដើម្បីនាំចូលអគ្គិសនី១ជីហ្គាវ៉ាត់ (GW) ពីកម្ពុជា ទៅកាន់ប្រទេសសិង្ហបុរី តាមរយៈខ្សែកាបក្រោមបាតសមុទ្រថ្មីដែលមានប្រវែងជាង១.០០០គីឡូម៉ែត្រ បន្ទាប់ពីសិង្ហបុរី និងកម្ពុជា បានចុះ MoU ស្តីពីកិច្ចសហប្រតិបត្តិការថាមពលកាលពីខែតុលា ឆ្នាំ២០២២។

ក្រុមហ៊ុនទាំង៥ដែលគ្រប់គ្រងគម្រោងទាំងនេះរួមមានក្រុមហ៊ុន Pacific Medco Solar ក្រុមហ៊ុន Adaro Solar International ក្រុមហ៊ុន EDP Renewables APAC ក្រុមហ៊ុន Vanda RE និងក្រុមហ៊ុន Keppel Energy។

ក្រុមហ៊ុនទាំងនេះទទួលបានការអនុម័តឱ្យនាំចូលអគ្គិសនីក្នុងចំណែកម្នាក់ៗ០,៦ជីហ្គាវ៉ាត់ ០,៤ជីហ្គាវ៉ាត់ ០,៤ជីហ្គាវ៉ាត់ ០,៣ជីហ្គាវ៉ាត់ និង០,៣ជីហ្គាវ៉ាត់។

អាជ្ញាធរទីផ្សារថាមពលសិង្ហបុរី (EMA) និយាយថា ជាមួយនឹងគម្រោងទាំងនេះ រោងចក្រផលិតថាមពលពន្លឺព្រះអាទិត្យ (Solar PV) និងប្រព័ន្ធផ្ទុកថាមពលអាគុយ (BESS) នឹងត្រូវបានបង្កើតឡើងនៅក្នុងប្រទេសឥណ្ឌូនេស៊ី ហើយថា ពួកគេមាននឹងមានគោលដៅចាប់ផ្តើមប្រតិបត្តិការពាណិជ្ជកម្មចាប់ពីចុងឆ្នាំ២០២៧ តទៅ។

អាជ្ញាធរនេះបានគូសបញ្ជាក់ថា ប្រទេសសិង្ហបុរី មានមហិច្ឆតានាំចូលថាមពលអគ្គិសនីកាបូនទាបរហូតដល់ទៅ៤ជីហ្គាវ៉ាត់ (GW) នៅត្រឹមឆ្នាំ២០៣៥៕ CNA៕

ដោយៈ គង់ សូរិយា

        ភ្នំពេញៈ ក្រសួង​ធនធានទឹក និង​ឧតុនិយម បានដាក់​ចេញ ផែន​ការ​រំដោះ​ជំនន់​ ទឹកភ្លៀង​ឱ្យបាន​លឿន​បំផុត ចេញពី​ភូមិ​សា​ស្ត្រ​រាជធានី​ភ្នំពេញ។

ជំនន់ទឹកភ្លៀងនេះ នឹងបង្ហូរទៅតាម​គ្រប់​ប្រឡាយ ព្រែក អូរ ស្ទឹង ទន្លេ និង​តាម​គ្រប់​ច្រក​ចេញពី​រាជធានី​ភ្នំពេញ ​ដែល​ធានា​យ៉ាងណា​កុំឱ្យ​មានការ​ជន់​លិច​នៅពេល​មាន​ភ្លៀង​នា​រដូវវស្សា​។​

យោងតាម​ការចេញផ្សាយរ​បស់​ក្រសួង​ធនធានទឹក និង​ឧតុនិយ​ម កាលពីថ្ងៃទី​៦ ខែកញ្ញា លោក ចាន់ ស៊ី​ណាត រដ្ឋលេខាធិការ​ក្រសួង​ធនធានទឹក និង​ឧតុនិយម បាន​ដឹកនាំ​កិច្ចប្រជុំ​បន្ទាន់ ពី​ការងារ​រំដោះ​ទឹកជំនន់​នេះ ដោយបាន​ចាត់វិធានការ​អនុវត្ត​ភ្លាមៗ រួម​ទាំង​មាន​កិច្ចសហការ​ ជាមួយនឹង​ក្រសួង​សេដ្ឋកិច្ច និង​ហិរញ្ញវត្ថុ និង​បណ្តា​ដៃគូ​អភិវឌ្ឍន៍​ជាច្រើន​ទៀត ក្នុងការ​ដោះស្រាយ​មិនឱ្យ​រាជធានី​ភ្នំពេញ​ទទួលរង​គ្រោះ​ហានិភ័យ ដោយសារ​ទឹកជំនន់​ក្នុង​គ្រប់​រដូវវស្សា នៅក្នុង​អាណត្តិ​ទី​៧ នៃ​រាជរដ្ឋាភិបាល​នេះ​ទេ​។​

​ការដាក់​ចេញ​ផែនការ​នេះ ក្នុង​គោល​ដៅ​ដើម្បី​ឈានទៅ​អនុវត្ត​ផែនការ ការងារ​រយៈពេល​មធ្យ​ម​ដោយ​ធ្វើ​ទំនើបកម្ម ​វិស្វកម្ម​លើ​ប្រព័ន្ធ​ដោះ​​ទឹក​ទាំងឡាយ​ ដើម្បី​បញ្ចប់​ជំនន់​គ្រប់​ប្រភេទ ​ក្នុង​ទីក្រុង​ភ្នំពេញ និង​ទីក្រុង​រណប​។​

លោកចាន់ ស៊ី​ណាត ក៏បាន​ចាត់​ឱ្យ​មន្ត្រី​ជំនាញ​របស់​ក្រសួង និង​មន្ទីរ​ធនធានទឹក​ខេត្តកំពង់ស្ពឺ និង​ខេត្តកណ្តាល​ សហការគ្នា​ធ្វើ​ការបើក​មុខទឹក​ទាំង​អស់ ចាប់ពី​តំបន់​ផ្នែក​ខាងលើ កំពង់ទួល​ទឹកថ្លា ទៅ​ទល់នឹង​តំបន់​រលាំង​​ជ្រៃ ​ទាំងសងខាង​ដោយ​កាត់បន្ថយ​បរិមាណ​ទឹក​ក្នុង​ចំនួន​១៣០០ ​ម៉ែត្រគុប ​ក្នុង​១​វិនាទី កុំ​ឱ្យមក​កៀក​នឹង​រាជធានី​ភ្នំពេញ ចូលដល់​តំបន់ X1 ជន់​លិច​តំបន់​ព្រលានយន្តហោះ​ថ្មី និង​ជន់​លិច​ផ្លូវ​ក្រវាត់ក្រុង​ទី៣​។

លោកបានបញ្ជាក់​ថា ​ចំពោះមុខ​នេះ ក្រសួង​ធនធានទឹក និង​ឧតុនិយម នឹងត្រូវ​ចាត់​ឱ្យ​ដំណើរការ​ឡើងវិញ ​លើ​ប្រព័ន្ធ​ប្រឡាយ​៩២ ប្រព័ន្ធ​ប្រឡាយ​៩៤ ប្រព័ន្ធ​ប្រឡាយ​៩៦ ​ប្រព័ន្ធ​ប្រឡាយ​ខ្សាច់ ដែល​ត្រូវ​ជួយ​រំដោះ​ទឹក​ឱ្យបាន​លឿន​បំផុត ចេញពី​បណ្តា​តំបន់​ទាំងអស់​ដែល​នៅ​កៀក​នឹង​រាជធានី​ភ្នំពេញ​។​

កាលពី​ចុងខែ​សីហា ឆ្នាំ ​២០២៣ ​អភិបាល​រាជ​ធានី​ភ្នំពេញ លោក ឃួ​ង ស្រេង បាន​កោះហៅ​មន្ត្រី​ជំនាញ អាជ្ញា​ធរ​ខណ្ឌ​ទាំង​១៤​ និង​មន្ទីរ​ពាក់​ព័ន្ធ​មក​ប្រជុំពិភាក្សា ​ដើម្បី​រៀបចំ​ផែនការ​បន្ត​ដោះស្រាយ​ប្រព័ន្ធ​ដោះ​ទឹក​ ដោយ​បង្កើតជា​គម្រោង​ធំ​មួយ​ ស្នើ​ទៅ​រាជរដ្ឋាភិបាល​ដើម្បី​សម្រេច​ដាក់ចេញ​អនុវត្ត​ដោះ​ស្រាយ ​ឱ្យបាន​យូរអង្វែង​ចន្លោះ​ពី​ ១៥ ​ទៅ​ ២០​ ឆ្នាំ​។

លោកបញ្ជាក់​ថា ការងារ​នេះ​រាជ​រដ្ឋា​ភិ​បាល ក៏​នឹង​ពិនិត្យ​បញ្ហា​លិច​លង់ នៅ​តំបន់​សណ្ត​ស្ទឹង​ព្រែក​​ត្នោត​ផងដែរ ដើម្បី​រកម​ធ្យោ​បាយ​ដោះស្រាយ​ឱ្យបាន​ល្អ​ ចៀស​វាង​ការ​ជន់​លិច​ដោយ​ជំនន់​ទឹកភ្លៀង​»​។

យោងតាម​របាយការណ៍​របស់​មន្ទីរ​សាធារណការ​ និង​ដឹកជញ្ជូន រាជធានី​ភ្នំពេញ ការដោះស្រាយ​បញ្ហា​លិចលង់​ ដោយ​ជំនន់​ទឹក​ភ្លៀង គិត​មកដល់ ពេលនេះ ​គឺ​បាន​ស្ថាបនា​ប្រព័ន្ធ​លូ​បាន​ជាង​៩២៤​ គីឡូម៉ែត្រ ហើយនឹង​គ្រោង​បន្ត​ស្ថាបនា​ជា​បន្តបន្ទាប់​ទៀត​។

ជាមួយគ្នានេះ អាជ្ញាធរ​ពាក់ព័ន្ធ បាន​ដោះស្រាយ​បញ្ហា​លិចលង់បាន​៣៩​កន្លែង​។ ក្នុងភូមិ​សាស្ត្រ​រាជធានី​ភ្នំពេញ មកដល់​ឆ្នាំ​២០២៣ ​នេះ មាន​ស្ថានីយ​បូមទឹក​ជាង១០​កន្លែង ត្រូវបាន​ដំឡើង និង​បាននិងកំពុង​ដើរតួនាទី​យ៉ាងសំខាន់ ​ក្នុងការ​បូម​រំដោះ​ទឹក ​ដើម្បី​ដោះស្រាយ​បញ្ហា​ការលិចលង់​ដោយ​ជំនន់​ទឹកភ្លៀង​៕