ដោយ: គង់ លាងហួរ
អន្តរជាតិ: ភាគហ៊ុនរបស់ក្រុមហ៊ុនលំដាប់់យក្សអាមេរិក Apple បានធ្លាក់ថ្លៃយ៉ាងគំហុក បន្ទាប់ពីមានរបាយការណ៍មួយចេញផ្សាយថា ប្រទេសចិនគ្រោងហាមមិនឱ្យមន្ត្រីរដ្ឋាបាលរបស់ខ្លួនប្រើប្រាស់ទូរសព្ទ Iphone ដើម្បីបំពេញការងារ។

បន្ទាប់ពីចេញផ្សាយដំណឹងនេះរួចមក គេសង្កេតឃើញថា ត្រឹម តែរយៈពេល២ថ្ងៃប៉ុណ្ណោះ វាបាន បណ្តាល ឱ្យ ភាគ ហ៊ុន របស់ ក្រុមហ៊ុន Apple ធ្លាក់ថ្លៃ២,៩% ឬគិតជាទឹកប្រាក់ប្រមាណ២០០ពាន់លានដុល្លារអាមេរិក គិតត្រឹមថ្ងៃទី៧ ខែកញ្ញា។

ទាក់ទិននឹងរឿងនេះដែរ អ្នកវិនិយោគកំពុងសម្តែងការព្រួយបារម្មណ៍ចំពោះសមត្ថភាពរបស់ក្រុមហ៊ុន Apple ក្នុងការធ្វើអាជីវកម្មនៅក្នុងប្រទេសចិន ដែលជាប្រទេសមានសេដ្ឋកិច្ចធំបំផុតលំដាប់ទី២នៅលើពិភពលោក បន្ទាបពីសហរដ្ឋអាមេរិក។ ប្រទេសចិនគឺជាទីផ្សារបរទេសដ៏ធំបំផុតសម្រាប់លក់ផលិតផលរបស់ក្រុមហ៊ុន Apple ហើយប្រាក់ចំណូលពីការលក់នៅប្រទេសចិនតំណាងឱ្យប្រហែលមួយភាគប្រាំនៃប្រាក់ចំណូលសរុបរបស់ក្រុមហ៊ុនខ្នាតយក្សមួយនេះកាលពីឆ្នាំមុន។

ក្រុមអ្នកវិភាគនៅក្រុមហ៊ុនស្រាវជ្រាវ TechInsights បានប៉ាន់ប្រមាណថា ការលក់ទូរសព្ទ iPhone នៅក្នុងប្រទេសចិន មានបរិមាណច្រើនជាងនៅសហរដ្ឋអាមេរិកទៅទៀត កាលពីត្រីមាសមុន។  ជាមួយគ្នានេះ ក្រុមហ៊ុន Apple ក៏ផលិតទូរស័ព្ទiPhone ភាគច្រើនរបស់ខ្លួនក្នុងរោងចក្រនៅប្រទេសចិន ផងដែរ។

លោក Brandon Nispel អ្នកវិភាគនៅក្រុមហ៊ុន KeyBanc Capital បានសរសេរក្នុងកំណត់ត្រាថា ក្រុមហ៊ុន Apple ក៏ដើរតួនាទីយ៉ាងសំខាន់នៅក្នុងសេដ្ឋកិច្ចរបស់ប្រទេសចិនផងដែរ។លោកបានបន្តថា “ដោយសារតែតួនាទីដ៏សំខាន់នោះហើយ ទើបក្រុមហ៊ុន Apple ត្រូវបានគេចាត់ទុកជា ក្រុមហ៊ុនមួយដ៏មានសុវត្ថិភាពពីការរឹតបន្តឹងរបស់រដ្ឋាភិបាលចិន”។

ទោះបីជាយ៉ាងនេះក្តី លោក Brandon បានសរសេរបន្ថែមថា “ដំណឹងថ្មីៗនេះចំពោះការហាមឃាត់មិនឱ្យមន្ត្រីរដ្ឋាភិបាលប្រើប្រាស់ទូរសព្ទ Iphone បានស្តែងឱ្យឃើញនូវសំណួរដ៏សំខាន់មួយថា តើរដ្ឋាភិបាលចិនកំពុងផ្លាស់ប្តូរជំហររបស់ខ្លួនមែនឬ?”៕

ដោយ: គង់ លាងហួរ
ហ្សាការតា: ការិយាល័យប្រធានាធិបតីកូរ៉េខាងត្បូងបានរាយការណ៍មកថា ប្រធានាធិបតីកូរ៉េខាងត្បូងលោក Yoon Suk Yeol និង សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឯកភាពគ្នា ដើម្បីពង្រីកពាណិជ្ជកម្មទ្វេរភាគី ដោយប្រើប្រាស់យ៉ាងសកម្មនូវកិច្ចព្រមព្រៀងពាណិជ្ជកម្មសេរី ដែលបានចូលជាធរមាននាពេលថ្មីៗនេះ។

នេះបើយោងតាមសារពត៌មានកូរ៉េ Yonhap ចុះផ្សាយនៅថ្ងៃទី៧ ខែកញ្ញា កន្លងមកនេះ។ ថ្នាក់ដឹកនាំទាំងពីរបានរៀបចំកិច្ចប្រជុំជាមួយគ្នាជាលើកដំបូង នៅក្រៅកិច្ចប្រជុំកំពូលអាស៊ានប្រចាំឆ្នាំ ដែលរៀបចំនៅទីក្រុងហ្សាការតា ប្រទេសឥណ្ឌូនេសុី ដោយឆ្លៀតឱកាសនោះ លោក Yoon បានសម្តែងនូវការអបអរសាទរចំពោះសម្តេចធិបតី ហ៊ុន ម៉ាណែត ក្នុងការចូលកាន់តំណែងជានាយករដ្ឋមន្ត្រីកាលពីខែសីហាកន្លងទៅ។

ការិយាល័យប្រធានាធិបតីកូរ៉េបានបញ្ជាក់នៅក្នុងសេចក្តីប្រកាសព័ត៌មានមួយថា ភាគីទាំងពីរបានឯកភាពប្រើប្រាស់យ៉ាងសកម្មនូវកិច្ចព្រមព្រៀង FTA កូរ៉េខាងត្បូង-កម្ពុជា ដែលបានចូលជាធរមានកាលពីខែធ្នូ ឆ្នាំមុន និងកិច្ចព្រមព្រៀងគយដែលបានចុះហត្ថលេខាកាលពីខែមេសា ដើម្បីបង្កើនពាណិជ្ជកម្មទ្វេរភាគី។ជាក់ស្តែង ទំហំពាណិជ្ជកម្មទ្វេរភាគីរវាងប្រទេសកូរ៉េខាងត្បូង និងកម្ពុជា បានហក់ឡើងដល់កម្រិតខ្ពស់បំផុតចំនួន១,០៥ពាន់លានដុល្លារអាមេរិកកាលពីឆ្នាំមុន។

លោក Yoon បានសង្កត់ធ្ងន់ថា ការបាញ់បង្ហោះនាពេលថ្មីៗនេះចំពោះអ្វីដែលទីក្រុងសេអ៊ូលអះអាងថា ជាផ្កាយរណប របស់កូរ៉េខាងជើង គឺជាការរំលោភយ៉ាងច្បាស់ទៅលើដំណោះស្រាយជាច្រើន របស់ក្រុមប្រឹក្សាសន្តិសុខនៃអង្គការសហប្រជាជាតិ។

ទាក់ទិននឹងរឿងនេះ លោក Yoon បានស្នើសុំការយកចិត្តទុកដាក់ និងការគាំទ្រពីសម្តេចធិបតី ហ៊ុន ម៉ាណែត ចំពោះការឆ្លើយតបយ៉ាងម៉ឺងម៉ាត់របស់សហគមន៍អន្តរជាតិទៅលើការអភិវឌ្ឍ និងការបង្ករឿងនុយក្លេអ៊ែរ និងមីស៊ីលរបស់ប្រទេសកូរ៉េខាងជើង៕

ដោយ: គង់ លាងហួរ
អន្តរជាតិ: គណៈកម្មការទន្លេមេគង្គ(MRC) បានចេញផ្សាយរបាយការណ៍ប្រចាំឆ្នាំ២០២២ របស់ខ្លួនដែលចងក្រងនូវសមិទ្ធិផលជាច្រើនក្នុងឆ្នាំកន្លងមក និងបញ្ហាប្រឈមសំខាន់ៗ ដែលទាមទារការយកចិត្តទុកដាក់ជាពិសេស។

នេះបើយោងតាមសារពត៌មានThe Nation ចុះផ្សាយនៅថ្ងៃព្រហស្បតិ៍ ទី៧ ខែកញ្ញា ឆ្នាំ២០២៣។

របាយការណ៍ប្រចាំឆ្នាំ២០២២របស់ MRC រៀបរាប់អំពីការកែលម្អជាក់ស្តែងនៅទូទាំងអាងទន្លេមេគង្គ ដែលសម្រេចបានតាមរយៈកិច្ចខិតខំប្រឹងប្រែងរួមគ្នា និង “ការទូតទឹក” រវាងបណ្តាប្រទេសសមាជិកដូចជា កម្ពុជា ឡាវ ថៃ វៀតណាម និងដៃគូនានា។

ក្នុងចំណោមសមិទ្ធិផលសំខាន់ៗជាច្រើនដែលសម្រេចបានកាលពីឆ្នាំមុន រួមមានដូចជា គោលការណ៍ណែនាំសម្រាប់ការរចនាទំនប់វារីអគ្គិសនី និងផលប៉ះពាល់បរិស្ថានឆ្លងដែន ដើម្បីសម្រួលដល់ចលនារបស់ត្រី និងលំហូរដីល្បាប់ ការបង្កើតច្បាប់ នាវាចរណ៍ ថ្មី ដើម្បី ជំរុញ សុវត្ថិភាពទន្លេ ការបង្កើតឧបករណ៍ច្នៃប្រឌិតដើម្បីព្យាករទឹកជំនន់ និងគ្រោះរាំងស្ងួតឱ្យកាន់តែប្រសើរ ព្រមទាំងបង្កើតស្ថានីយ៍ត្រួតពិនិត្យថ្មីមួយ នៅចុងខាងជើងនៃអាងទន្លេមេគង្គ។

សមិទ្ធិផលធំៗផ្សេងទៀត រួមមានដូចជា ការចាប់ផ្តើមនៃការសិក្សារួមគ្នា រួមជាមួយនឹងកិច្ចសហប្រតិបត្តិការឡានឆាង-មេគង្គ ដើម្បីអភិវឌ្ឍការយល់ដឹងរួមគ្នាអំពីការប្រែប្រួលរបបលំហូរទឹក។

MRC បានចាប់ផ្តើមអនុវត្តគោលការណ៍ណែនាំស្តីពីការវាយតម្លៃផលប៉ះពាល់បរិស្ថានឆ្លងដែន ឬហៅកាត់ថា TbEIA រួចមកហើយ ខណៈដែលការសិក្សារួមគ្នាបានបញ្ចប់ដំណាក់កាលដំបូងទី១របស់ខ្លួន។

ចំណែក លទ្ធផលសិក្សានឹងត្រូវបានចែករំលែកឱ្យដឹងនៅក្នុងវេទិកាអ្នកពាក់ព័ន្ធថ្នាក់តំបន់លើកទី១៣ ដែលគ្រោងនឹងប្រព្រឹត្តទៅនៅថ្ងៃទី៥ ខែតុលា ឆ្នាំ២០២៣ នៅទីក្រុងហ្លួងប្រាបាង ប្រទេសឡាវ។

របាយការណ៍ប្រចាំឆ្នាំនេះពិពណ៌នាអំពីរបៀបដែលអាទិភាពយុទ្ធសាស្ត្រទាំង៥របស់អង្គការ ដូចជា ៖ បរិស្ថាន សង្គម សេដ្ឋកិច្ច បម្រែបម្រួលអាកាសធាតុ និងកិច្ចសហប្រតិបត្តិការ មិនត្រឹមតែផ្តល់អត្ថប្រយោជន៍ដល់ប្រជាជនមេគង្គរាប់លាននាក់ប៉ុណ្ណោះទេ ប៉ុន្តែថែមទាំងរួមចំណែកដល់ការសម្រេចបាននូវគោលដៅចំនួន១០ ក្នុងចំណោមគោលដៅអភិវឌ្ឍន៍ប្រកបដោយចីរភាពទាំង១៧ របស់សហគមន៍អន្តរជាតិផងដែរ។

ទោះបីជាសម្រេចបានសមិទ្ធិផលសំខាន់ធំៗ និងចំណុចវិជ្ជមានទាំងនេះយ៉ាងណាក្តី ប៉ុន្តែអាងទន្លេមេគង្គនៅតែជួបប្រទះបញ្ហាប្រឈមមួយចំនួន ដែលត្រូវដោះស្រាយ និងទាមទារការយកចិត្តទុកដាក់ជាពិសេស។

ជាក់ស្តែង លោក អានុល័ក គិធិឃួន (Anouak Kittikhoun) នាយកប្រតិបត្តិលេខាធិការដ្ឋាននៃ គណៈកម្មការទន្លេមេគង្គ ហៅកាត់ថា MRC ធ្លាប់បានរៀបរាប់ពីការប្រឈមរបស់ទន្លេមេគង្គ ដែលមាន និន្នាការដ៏គួរឱ្យព្រួយបារម្ភ ដោយផ្តោតលើទិដ្ឋភាពសំខាន់ៗចំនួន៥ រួមមាន៖ របបលំហូរទឹក កំណកកករ ការជ្រៀតចូលរបស់ទឹកប្រៃ ការបំពុលដោយប្លាស្ទីកនិងទឹកជំនន់ និងគ្រោះរាំងស្ងួត ដែលបង្កឡើងពីការប្រែប្រួលអាកាសធាតុ។

ដូចដែលលោក Kittikhoun បានបញ្ជាក់នៅក្នុងរបាយការណ៍ប្រចាំឆ្នាំ បញ្ហាប្រឈមទាំងនេះឆ្លងកាត់ព្រំដែនដោយធម្មជាតិ ដូច្នេះវាទាមទារឱ្យមានកិច្ចសហប្រតិបត្តិការបន្តដើម្បីដោះស្រាយពួកគេក្នុងចំណោមបណ្តាប្រទេសជាប់ទន្លេមេគង្គ៕

តែម សុខុម

តូក្យូ: មូលនិធិសិង្ហបុរី ដែលមានឈ្មោះថា GIC កំពុងពិចារណាលក់អគារការិយាល័យខ្ពស់កប់ពពកលំដាប់កំពូលមួយនៅទីក្រុងតូក្យូ ប្រទេសជប៉ុន ហើយពេលនេះមានអ្នកចាប់អារម្មណ៍ចង់ទិញយកអគារនេះ។ នេះបើយោងតាមសារព័ត៌មាន Japan Times ចុះផ្សាយកាលពីថ្ងៃពុធ ទី៦ ខែកញ្ញា។

ប្រភពច្បាស់ការបានទម្លាយឱ្យដឹងថា អគារការិយាល័យ Shiodome City Center ដែលមានកម្ពស់៤៣ជាន់នៅក្នុងសង្កាត់ពាណិជ្ជកម្មកណ្តាលក្រុងតូក្យូ ខាងលើនេះអាចលក់បានថ្លៃយ៉ាងតិច២ពាន់លានដុល្លារ។

ប្រសិនបើឈានដល់កិច្ចព្រមព្រៀងទិញលក់មែននោះ វានឹងក្លាយជាប្រតិបត្តិការទិញលក់អគារការិយាល័យដ៏ថ្លៃបំផុតមិនធ្លាប់មាននៅក្នុងប្រទេសជប៉ុន។

ផែនការលក់អគារការិយាល័យកប់ពពកនេះធ្វើឡើង ខណៈមានការរំពឹងទុកថានឹងមានការផ្គត់ផ្គង់ការិយាល័យថ្មីៗនៅក្នុងទីក្រុងតូក្យូ ដោយអគារកប់ពពកជាច្រើននឹងត្រូវបើកសម្ពោធក្នុងរយៈពេល២ឆ្នាំខាងមុខ ដែលអាចធ្វើឱ្យវិនិយោគិនលែងសូវចង់បានអគារដ៏ធំបែបនេះ។

នៅទូទាំងពិភពលោក បណ្ដាវិនិយោគិនក៏កំពុងជៀសវាងមិនទិញការិយាល័យផងដែរដោយសារអត្រាគ្មានអ្នកជួលកើនឡើងខ្ពស់ជាប្រវត្តិសាស្ត្រនៅក្នុងទីក្រុងធំៗ។

មូលនិធិ GIC បានស្នើសុំឱ្យក្រុមហ៊ុន Mitsubishi UFJ Trust and Banking Corporation និងក្រុមហ៊ុនផ្ដល់សេវាអចលនទ្រព្យ Jones Lang LaSalle (JLL) ជួយផ្តល់ការប្រឹក្សាលើការលក់នេះ។

ប្រភពដដែលបានបញ្ជាក់ថា មូលនិធិសិង្ហបុរី GIC កំពុងស្វះស្វែងរៀបចំការដេញថ្លៃនៅចុងឆ្នាំនេះ ហើយនឹងបញ្ចប់ប្រតិបត្តិការទិញលក់នេះនៅដើមឆ្នាំ២០២៤៕ Japan Times៕

ដោយៈគង់ សូរិយា
ព្រះសីហនុៈ តើស្ថានភាពនៃវិស័យអាកាសចរណ៍ នៅខេត្តព្រះសីហនុបែបណា ខណៈដែលភ្ញៀវទេសចរណ៍ជាតិ អន្តរជាតិកើនឡើងក្នុងកម្រិតតិចតួច។
អភិបាលរងខេត្តព្រះសីហនុ លោកឡុង ឌីម៉ង់បានមានប្រសាសន៍ឲ្យដឹងកាលពីដើមសប្តាហ៍នេះថា អាកាសយានដ្ឋានកងកេង ខេត្តព្រះសីហនុ មានការចុះចតយន្តហោះនៅមានកម្រិតនៅឡើយ ដោយមួយថ្ងៃមានយន្តហោះចំនួន២បានចុះចត គឺក្រុមហ៊ុនអាកាសចរណ៍ក្នុងស្រុក និងក្រុមហ៊ុនអាកាសចរណ៍អន្តរជាតិ។

លោកបន្តថា “ស្ថានភាពនេះ មិនបានធ្វើឲ្យមានលំហូរភ្ញៀវទេសចរណ៍អន្តរជាតិ មកទស្សនាខេត្តព្រះសីហនុ កើនឡើងយ៉ាងគំហុកនោះទេ”។
ព្រលានយន្តហោះកងកេង ក្រុងព្រះសីហនុបាននិងកំពុងមានការពង្រីកផ្លូវរត់ជាបន្តបន្ទាប់ ដើម្បីធ្វើយ៉ាងណាឲ្យព្រលាននេះទទួលការចុះចតយន្តហោះខ្នាតធំៗបាន។
ជាមួយគ្នានេះ ព្រលានយន្តហោះខេត្តសៀមរាប ក៏ទទួលបានការចុះចតយន្តហោះនៅមានកម្រិតផងដែរ៕

(ភ្នំពេញ)៖ ប្រធានាធិបតីសាធារណរដ្ឋកូរ៉េ (កូរ៉េខាងត្បូង) លោក យូន ស៊ក យ៉ល (Yoon Sok Yeol) បានសន្យាពិចារណា បង្កើនកូតា ពោលគឺបង្កើនចំនួនពលករខ្មែរចូលទៅធ្វើការនៅប្រទេសកូរ៉េឱ្យបានកាន់តែច្រើន ថែមទៀត។

ការសន្យារបស់លោកប្រធានាធិបតី បានធ្វើឡើងនៅក្នុងជំនួបពិភាក្សាការងារជាមួយ សម្តេច មហា បវរធិបតី ហ៊ុន ម៉ាណែត នៅទីក្រុងហ្សាកាតា ប្រទេសឥណ្ឌូនេស៊ី កាលពីថ្ងៃទី៧ ខែកញ្ញា ឆ្នាំ២០២៣។
ទន្ទឹមនឹងការសន្យាបង្កើនកូតាពលករខ្មែរចូលទៅធ្វើការនៅប្រទេសកូរ៉េខាងត្បូងហើយនោះ លោកប្រធានាធិបតីកូរ៉េខាងត្បូង ក៏បានសន្យាបន្តលើកទឹកចិត្តក្រុមហ៊ុនកូរ៉េ ឱ្យមកវិនិយោគ នៅ កម្ពុជា ជាពិសេសក្នុងវិស័យបច្ចេកវិទ្យាឌីជីថល។
ក្នុងឱកាសនោះ សម្តេចធិបតី ហ៊ុន ម៉ាណែត បានអរគុណរដ្ឋាភិបាលកូរ៉េខាងត្បូង ដែលបាន យក ចិត្តទុកដាក់ ចំពោះពលករកម្ពុជា កំពុងស្នាក់នៅ និងធ្វើការងារនៅកូរ៉េ។

សូមបញ្ជាក់ថា គោលនយោបាយស្វះស្វែងរកការងារធ្វើជូនប្រជាពលរដ្ឋ គឺជានយោបាយ អាទិភាព មួយ។ សម្រាប់ការងារទៀតសោតមិនថានៅក្នុងប្រទេស ឬក្រៅប្រទេសនោះទេ ឱ្យតែ អាចផ្តល់ប្រាក់ឈ្នួលល្អប្រសើរ ផ្តល់ចំណូលទ្រទ្រង់ជីវភាពជូនប្រជាពលរដ្ឋ គឺរាជ រដ្ឋាភិបាល តែង ស្វះស្វែងរកជូនប្រជាពលរដ្ឋធ្វើ។

សម្រាប់ប្រទេសកូរ៉េខាងត្បូង គឺជាប្រទេសផ្តល់លក្ខខណ្ឌការងារល្អប្រសើរ ហើយផ្តល់នូវ ប្រាក់ ឈ្នួលខ្ពស់ បានរួមចំណែកធ្វើឱ្យជីវភាពពលករកម្ពុជាបានល្អប្រសើរ។ សម្រាប់ប្រទេសកូរ៉េខាង ត្បូង មិនត្រឹមតែកម្ពុជានោះទេ ដែលបានបញ្ជូនពលរដ្ឋទៅធ្វើការនៅទីនោះ មានប្រទេសក្នុង តំបន់អាស៊ីជាច្រើនបាននាំគ្នាសុំការអនុញ្ញាតពីកូរ៉េបញ្ជូនពលរដ្ឋទៅធ្វើការ។
យោងតាមរបាយការណ៍របស់ក្រសួងការងារ បានឱ្យដឹងថា ពលករខ្មែរដែលបម្រើការងារ នៅកូរ៉េខាងត្បូង មានចំនួនប្រមាណ ៥ម៉ឺននាក់៕

ដោយ: គង់ លាងហួរ
ក្រុងប៉េកាំងៈ ធនាគាររដ្ឋធំៗចំនួនបីរបស់ប្រទេសចិនបានអះអាងនៅថ្ងៃព្រហស្បតិ៍នេះថា ពួកគេនឹងចាប់ផ្តើមបញ្ចុះអត្រាការប្រាក់លើកម្ចីទិញផ្ទះដែលមានស្រាប់សម្រាប់ការទិញផ្ទះលើកដំបូង។

ធនាគារទាំងបីនោះ រួមមានដូចជា ធនាគារឧស្សាហកម្ម និងពាណិជ្ជកម្មនៃប្រទេសចិន (ICBC) ធនាគារកសិកម្មនៃប្រទេសចិន និងធនាគារ Bank of China Ltd (BOC)។

ចំណាត់ការនេះគឺជាវិធានការគាំទ្រមួយក្នុងចំណោមវិធានការគាំទ្រជាច្រើនទៀត ដែលទីក្រុងប៉េកាំងបានដាក់ចេញ ក្នុងរយៈពេលប៉ុន្មានសប្តាហ៍ថ្មីៗនេះ ដើម្បីស្តារវិស័យអចលនទ្រព្យ ដែលកំពុងជាប់ផុងក្នុងវិបត្តិ និងស្របពេលមានក្តីបារម្ភកាន់តែខ្លាំងអំពីសុខភាពរបស់សេដ្ឋកិច្ចចិន។

ធនាគារទាំង៣ខាងលើបានបញ្ជាក់នៅក្នុងសេចក្តីថ្លែងការណ៍ថា អត្រាការប្រាក់លើប្រាក់កម្ចីទិញផ្ទះដំបូងដែលមានស្រាប់នឹងត្រូវបានបញ្ចុះ ឬកាត់បន្ថយដល់កម្រិតមួយសមស្រប នៅពេលណាដែលផ្ទះមួយត្រូវបានគេទិញ។

យោងតាមធនាគារទាំង៣នេះបានឱ្យដឹងទៀតថា ការកាត់បន្ថយអត្រាការប្រាក់នេះនឹងចូលជាធរមាននៅថ្ងៃទី២៥ ខែកញ្ញាឆាប់ៗខាងមុខ។

យោងតាមការចុះផ្សាយដោយសារពត៌មាន Reuters បានបង្ហាញថា ប្រាក់កម្ចីទិញផ្ទះសរុបនៅប្រទេសចិនមានចំនួន៣៨,៦ពាន់ពាន់លានយ័ន (ប្រហែល៥,៣ពាន់ពាន់លានដុល្លារអាមេរិក) នៅចុងខែមិថុនា ឆ្នាំ២០២៣នេះ៕

ដោយ: គង់ លាងហួរ
ភ្នំពេញ: ការតភ្ជាប់រាជធានីភ្នំពេញ ជាមួយកំពង់ផែទឹកជ្រៅអន្តរជាតិក្នុងខេត្តព្រះសីហនុ តាមរយៈផ្លូវល្បឿនលឿនភ្នំពេញ-ព្រះសីហនុដំបូង មិនត្រឹមតែជួយសម្រួលដល់ការដឹកជញ្ជូនប៉ុណ្ណោះទេ ប៉ុន្តែថែមទាំងសន្សំសំចៃពេលវេលា និងថវិកាសម្រាប់អ្នកធ្វើដំណើរផងដែរ។

វិនិយោគដោយសាជីវកម្មផ្លូវ និងស្ពានចិន (CRBC) ជាមួយនឹងទឹកប្រាក់ចំនួន២ពាន់លានដុល្លារអាមេរិក ផ្លូវល្បឿនលឿនប្រវែង១៨៧គីឡូម៉ែត្រនេះត្រូវបានបើកឱ្យប្រើប្រាស់ជាសាធារណៈកាលពីថ្ងៃទី១ ខែតុលា ឆ្នាំ២០២២ បន្ទាប់ពីចំណាយពេលសាងសង់អស់ជាង៣ឆ្នាំ។

អ្នកនាង សារ៉េត ស្រីពេជ្រ វ័យ២៩ឆ្នាំ ជាអ្នកគ្រប់គ្រងនៅស្ថានីយ៍គិតលុយរបស់ផ្លូវល្បឿនលឿនភ្នំពេញ-ព្រះសីហនុបានលើកឡើងថា ផ្លូវល្បឿនលឿននេះអាចឱ្យមនុស្សម្នាធ្វើដំណើរបានលឿន និងងាយស្រួល។

អ្នកនាងបានប្រាប់សារពត៌មាន Xinhua ថា “ពីមុនយើងធ្វើដំណើរតាមផ្លូវជាតិលេខ៤ ដែលត្រូវចំណាយពេល រហូតដល់ទៅ៥ម៉ោងប៉ុន្តែ ឥឡូវនេះ ដោយសារធ្វើដំណើរតាមផ្លូវល្បឿនលឿន យើងត្រូវចំណាយពេលតែ២ម៉ោងប៉ុណ្ណោះ”។

អ្នកនាងបានបន្តថា “អ្នកបើកបរទាំងអស់តែងតែនិយាយថា ដោយសារមានផ្លូវល្បឿនលឿន Expressway ការធ្វើដំណើររបស់ពួកគេមានភាពងាយស្រួល ព្រមទាំងអាចសន្សំប្រាក់ និងកាត់បន្ថយពេលវេលាធ្វើដំណើរផងដែរ”។

អ្នកនាងបានបញ្ជាក់ថា ការធ្វើដំណើរតាមរថយន្តតូចៗដូចជារថយន្តលក្ខណៈគ្រួសារពីភ្នំពេញ ទៅ កាន់ខេត្ត ព្រះសីហនុលើផ្លូវល្បឿនលឿន ឥឡូវ នេះមាន តម្លៃត្រឹមតែ១១,៩៧ដុល្លារ ប៉ុណ្ណោះ។

អ្នកគ្រប់គ្រងរូបនេះបន្ថែមថា “សម្រាប់រថយន្តកុងតឺន័រ ពីមុនរត់ពីភ្នំពេញទៅខេត្តព្រះសីហនុ និងត្រឡប់មកវិញ ត្រូវប្រើពេលយូរណាស់ ពោលគឺប្រើពេលមួយ ឬពីរថ្ងៃ ប៉ុន្តែដោយសារមានផ្លូវល្បឿនលឿន ទើបពួកគេអាចធ្វើដំណើរបានពីរទៅបីដងក្នុងមួយថ្ងៃ។ ដូច្នេះវាកាត់បន្ថយពេលវេលា និងអនុញ្ញាតឱ្យពួកគេដឹកជញ្ជូនទំនិញបាន លឿននិងងាយស្រួល”។

រដ្ឋលេខាធិការក្រសួងពាណិជ្ជកម្មកម្ពុជា លោក ប៉ែន សុវិជាតិ មានប្រសាសន៍ថា ផ្លូវល្បឿនលឿន គឺជាផ្លែផ្កានៃកិច្ចសហប្រតិបត្តិការជិតស្និទ្ធរវាងកម្ពុជា និងចិន ក្រោមក្របខណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវ (BRI)។

លោក ប៉ែន សុវិជាតិ បានបញ្ជាក់ប្រាប់សារពត៌មាន Xinhua កាលពីថ្ងៃអង្គារថា “ផ្លូវល្បឿនលឿនភ្នំពេញ-ព្រះសីហនុ ជួយសម្រួលការកកស្ទះចរាចរណ៍ សន្សំសំចៃពេលវេលាធ្វើដំណើរ និងកាត់បន្ថយថ្លៃដឹកជញ្ជូន”។

លោកបានបន្ថែមថា “ផ្លូវនេះដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ច និងទេសចរណ៍របស់ប្រទេសកម្ពុជា ដោយសារវាតភ្ជាប់រាជធានីភ្នំពេញទៅនឹងកំពង់ផែសមុទ្រខេត្តព្រះសីហនុដ៏ធំរបស់កម្ពុជា”៕