តែម សុខុម

បាងកក: គោលនយោបាយចែកលុយឌីជីថលក្នុងម្នាក់ៗ១០.០០០បាត (២៨០ដុល្លារអាមេរិក) របស់បក្សភឿថៃ នឹងចាក់បញ្ចូលប្រាក់បន្ថែមយ៉ាងតិចជាង៥៦ពាន់លានដុល្លារអាមេរិក ចូលទៅក្នុងសេដ្ឋកិច្ច ហើយវានឹងរួមចំណែកជំរុញកំណើនផលទុនជាតិសរុប (GDP) យ៉ាងតិច៥%ក្នុងឆ្នាំ២០២៤។

អនុរដ្ឋមន្ត្រីក្រសួងហិរញ្ញវត្ថុថៃ លោក Julapun Amornvivat ថ្លែងថា ការចែកលុយក្រោមរូបភាពដាក់ពង្រាយកាបូបលុយឌីជីថល (Digital Wallet) យ៉ាងច្រើននេះនឹងជួយជំរុញសន្ទុះសេដ្ឋកិច្ច ក្រោយពីមានវិធានការជំរុញសេដ្ឋកិច្ចផ្សេងៗដូចជាការបង្កើតប្រាក់ចំណូលតាមរយៈការដំឡើងថ្លៃកសិផលជាដើម។ នេះបើយោងតាមកាសែត Bangkok Post ចុះផ្សាយកាលពីថ្ងៃព្រហស្បតិ៍ ទី៧ ខែកញ្ញា។

លោកបានបន្តថា “គោលនយោបាយនេះមានគោលបំណងជំរុញកំណើន GDP យ៉ាងតិច៥%ដែលយើងរំពឹងថានឹងសម្រេចបានក្នុងឆ្នាំ២០២៤”។

លោកបានបន្ថែមទៀតថា ការចែកលុយទាំងនេះនឹងធ្វើឱ្យលុយយ៉ាងច្រើនសន្ធឹកសន្ធាប់ធ្វើចរាចរលើទីផ្សារដែលស្មើយ៉ាងតិច៥៦ពាន់លានដុល្លារអាមេរិក។ អាករលើតម្លៃបន្ថែម (VAT) ប្រមាណ៨៤២លានដុល្លារអាមេរិក ត្រូវបានរំពឹងថានឹងប្រមូលបានពីការទិញទំនិញ និងសេវាកម្ម។

គម្រោងនេះមិនតម្រូវឱ្យមានការចុះឈ្មោះណាមួយនោះឡើយ ដោយអ្នកប្រើប្រាស់គ្រាន់តែត្រូវការទាញយកកម្មវិធីកាបូលុយឌីជីថល (Digtal Wallet App) ថ្នាក់ជាតិថ្មីដើម្បីទទួលបានចំណែកលុយរបស់ពួកគេជាការស្រេច។គម្រោងនេះនឹងត្រូវបានជំរុញដោយបច្ចេកវិទ្យា Blockchain ដែលមានសុវត្ថិភាពខ្ពស់ ដូច្នេះវានឹងស្ថិតក្រោមការតាមដានបានទាំងស្រុង។ លោក Julapun Amornvivat បានបន្តថា លក្ខខណ្ឌដើម្បីមានសិទ្ធិទទួលបានលុយ១០.០០០បាតនេះអាចកំណត់តាមអាយុ និងកម្រិតនៃការចំណាយជាក់ស្ដែងរបស់ពលរដ្ឋ។
គោលនយោបាយនេះត្រូវបានរំពឹងថានឹងដាក់ឱ្យដំណើរការនៅក្នុងត្រីមាសទី១ ដើមឆ្នាំ២០២៤៕ Bangkok Post៕

តែម សុខុម

រីយ៉ាដ: យោងតាមក្រុមហ៊ុនអង់គ្លេស Knight Frank ដែលជាក្រុមហ៊ុនប្រឹក្សាអចលនទ្រព្យឈានមុខគេក្នុងពិភពលោកឱ្យដឹងថា ប្រទេសអារ៉ាប៊ីសាអូឌីត នឹងក្លាយជាមជ្ឈមណ្ឌលសាងសង់ដ៏ធំបំផុតមួយក្នុងពិភពលោក។

នោះគឺដោយសារតែគម្រោងហេដ្ឋារចនាសម្ព័ន្ធ និងគម្រោងអចលនទ្រព្យនានាដែលមានទំហំសរុបរហូតដល់ទៅជាង១,២៥ទ្រីលានដុល្លារអាមេរិក កំពុងស្ថិតក្នុងដំណើរការធ្វើផែនការ ឬ អភិវឌ្ឍន៍។

របាយការណ៍ប្រចាំឆ្នាំដែលមានឈ្មោះថា Saudi Giga Projects (គម្រោងពាន់លានដុល្លារ នៅអារ៉ាប៊ីសាអូឌីត) របស់ក្រុមហ៊ុននេះបានធ្វើការកត់សម្គាល់ថា តម្លៃសរុបនៃគម្រោងហេដ្ឋារចនាសម្ព័ន្ធដែលត្រូវបានចាត់តាំង និងការអភិវឌ្ឍន៍អចលនទ្រព្យបានឈានដល់២៥០ពាន់លានដុល្លារ រួចទៅហើយ ខណៈគម្រោងធំៗជាច្រើនផ្សេងទៀតមិនទាន់ទទួលបានការអនុម័តពេញលេញ ឬ ផ្តល់កាលបរិច្ឆេទចាប់ផ្តើមការសាងសង់នៅឡើយ។

លោក Faisal Durrani ដែលជានាយក និងជាប្រធានផ្នែកស្រាវជ្រាវប្រចាំតំបន់មជ្ឈិមបូព៌ា និងអាហ្រ្វិកខាងជើងនៃក្រុមហ៊ុន Knight Frank បានលើកឡើងថា ខណៈឱសានវាទចក្ខុវិស័យឆ្នាំ២០៣០ (Vision 2030) កាន់តែខិតជិតមកដល់ ការអភិវឌ្ឍអចលនទ្រព្យរបស់ប្រទេសអារ៉ាប៊ីសាអូឌីត ដែលត្រូវបានចាត់ទុកថាធំបំផុតទូទាំងពិភពលោក កំពុងមានសន្ទុះកើនឡើង។

លោកបានបន្ថែមទៀតថា ចំនួនលំនៅឋានដែលបានគ្រោងទុកបានកើនឡើង៣០%ឈានដល់៦៦០.០០យូនីតកាលពីឆ្នាំមុន ដែលទំនងជាស្ថានការណ៍វិវឌ្ឍន៍វិជ្ជមានសម្រាប់អ្នកស្វែងរកទិញផ្ទះដែលត្រូវបានបន្ទុចបង្អាក់ដោយសារអចលនទ្រព្យហក់ឡើងថ្លៃកាលពីពេលថ្មីៗនេះ។

ដោយក្រឡេកមើលឱ្យកាន់តែកៀកទៅលើតំបន់ផ្សេងៗដែលកំពុងពន្លឿនសកម្មភាពសាងសង់ ការវិភាគរបស់ក្រុមហ៊ុន Knight Frank បានគូសបញ្ជាក់ថា តំបន់ភាគខាងលិចនៃប្រទេសអារ៉ាប៊ីសាអូឌីត បន្តដើរតួយ៉ាងសំខាន់នៅក្នុងផែនការផ្លាស់ប្តូរដ៏មានមហិច្ឆតារបស់ប្រទេសនេះ ជាមួយនឹងគម្រោងអចលនទ្រព្យមានតម្លៃ៦៨៧ពាន់លានដុល្លារ ដែលគ្រោងនឹងបញ្ចប់នៅដំណាច់ទសវត្សរ៍នេះ។

របាយការណ៍នេះក៏បានគូសបញ្ជាក់ពីគម្រោងនានាដូចជាគម្រោងទីក្រុងឆ្លាតវៃខ្នាតយក្ស NEOM តម្លៃ៥០០ពាន់លានដុល្លារ គម្រោង Turogina ដែលជាទីតាំងសម្រាប់រៀបចំព្រឹត្តិការណ៍ Asian Games ឆ្នាំ២០៣០ និងគម្រោងលើកោះ Senda Island ដែលជាគោលដៅទេសចរណ៍ដ៏លេចធ្លោមួយផងដែរ៕ Arab News៕

ដោយ: គង់ លាងហួរ

ហ្សាការតា: នាយករដ្ឋមន្ត្រីចិន លោក Li Qiang បានមានប្រសាសន៍ថា ទំនាក់ទំនងទ្វេរភាគីរវាងកម្ពុជា និងចិនបានទប់ទល់នឹងការប្រែប្រួលក្នុងទិដ្ឋភាពអន្តរជាតិ ហើយនៅតែមានភាពរឹងមាំ និងមិនអាចបំបែកបាន ដែលជាគំរូសម្រាប់ទំនាក់ទំនងអន្តរជាតិប្រភេទថ្មី។
នេះបើយោងតាមការចុះផ្សាយ ដោយសារពត៌មានរដ្ឋចិន Xinhua។

លោក Li Qiang បានមានប្រសាសន៍បែបនេះ ក្នុងឱកាសជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីថ្មីនៃកម្ពុជា កាលពីថ្ងៃពុធម្សិលមិញនេះនៅទីក្រុងហ្សាការតា។

ប្រមុខរដ្ឋាភិបាលទាំងពីរ បានជួបពិភាក្សាគ្នាក្រៅកិច្ចប្រជុំមេដឹកនាំស្តីពី កិច្ចសហប្រតិបត្តិការអាស៊ីបូព៌ា ដែលរៀបចំធ្វើឡើងនៅឯទីក្រុងហ្សាកាតា រួមមានកិច្ចប្រជុំកំពូលចិន-អាស៊ានលើកទី២៦ កិច្ចប្រជុំកំពូលអាស៊ានបូកបីលើកទី២៦ និងកិច្ចប្រជុំកំពូលអាស៊ីបូព៌ាលើកទី១៨។

លោក Li បានបន្តថា “ប្រទេសចិនគឺជាដៃគូ ដ៏គួរឱ្យទុកចិត្តបានរបស់កម្ពុជា ហើយតែងតែគាំទ្រកម្ពុជាយ៉ាងម៉ឺងម៉ាត់ ក្នុងការស្វែងរកមាគ៌ាអភិវឌ្ឍន៍ ដែលសមស្របនឹងលក្ខខណ្ឌជាតិរបស់ខ្លួន ការការពា​រអធិបតេយ្យភាពជាតិ សន្តិសុខ និងផលប្រយោជន៍នៃការអភិវឌ្ឍ”។

លោកបានអំពាវនាវឱ្យភាគីទាំងពីរ ពង្រឹងការផ្លាស់ប្តូរមិត្តភាព ពង្រឹងយុទ្ធសាស្ត្រអភិវឌ្ឍន៍បន្ថែមទៀត និងជំរុញការអភិវឌ្ឍន៍រួម។

លោក Li ក៏បានជំរុញឱ្យប្រទេសទាំង២ ទទួលយកការចរចា ក្នុងការចុះហត្ថលេខា លើផែនការសកម្មភាពថ្មី ដើម្បីកសាងសហគមន៍អនាគតរួមគ្នាចិន- កម្ពុជាដែលជាឱកាសមួយ និងរៀបចំផែនការគ្រប់ជ្រុងជ្រោយ សម្រាប់កិច្ចសហប្រតិបត្តិការ យុទ្ធសាស្ត្រគ្រប់ជ្រុងជ្រោយទ្វេរភាគី ដើម្បីរួមចំណែកដល់ភាពរុងរឿង ការអភិវឌ្ឍ និងស្ថេរភាពយូរអង្វែងរបស់កម្ពុជា។

លោក Li Qiang បានបន្ថែមថា ភាគីទាំងពីរគួរតែបន្តធ្វើការរួមគ្នា ដើម្បីការពារភាពជាកណ្តាលរបស់អាស៊ាន និងរក្សាកិច្ចសហប្រតិបត្តិការក្នុងតំបន់លើទិសដៅត្រឹមត្រូវ។

ជាការឆ្លើយតប សម្តេចធិបតី ហ៊ុន ម៉ាណែត បានមានប្រសាស​ន៍ថា ចាប់តាំងពីបានបង្កើតចំណងការទូតទ្វេរភាគី កាលពី៦៥ឆ្នាំមុន កិច្ចសហប្រតិបត្តិការ រវាងប្រទេសទាំងពីរទទួលបានផ្លែផ្កា ដោយសម្តេចបន្ថែមថា ប្រទេសចិនគឺជាមិត្តដ៏ល្អ និងជាដៃគូដ៏គួរឱ្យទុកចិត្តបានរបស់កម្ពុជា។

សម្តេចធិបតី ហ៊ុន ម៉ាណែត បញ្ជាក់ទៀតថា រដ្ឋាភិបាលថ្មីរបស់កម្ពុជា នឹងបន្តប្រកាន់ខ្ជាប់នូវគោលការណ៍ និងក្របខណ្ឌទំនាក់ទំនងកម្ពុជា-ចិន និងធ្វើការជាមួយភាគីចិន ដើម្បីជំរុញការអភិវឌ្ឍន៍ថ្មីនៃកិច្ចសហប្រតិបត្តិការទ្វេភាគីលើគ្រប់វិស័យ ដោយឈរលើមូលដ្ឋាននៃចំណងមិត្តភាពរបស់ប្រទេសទាំងពីរ ដែលរួមគ្នាកសាងឡើងដោយអតីតនាយករដ្ឋមន្ត្រីនៃកម្ពុជា សម្តេចតេជោហ៊ុន សែន និងប្រធានាធិបតីចិន លោកស៊ី ជីនពីង៕

ដោយ: គង់ លាងហួរ

ប៉េកាំងៈ ឧបនាយករដ្ឋមន្ត្រីចិនលោក He Lifeng បានអំពាវនាវដាក់លំនៅដ្ឋាន តម្លៃសមរម្យរបស់ប្រទេសចិន ឱ្យស្ថិតក្រោម “ការគ្រប់គ្រងបិទយ៉ាងតឹងរឹង” និងហាមមិនឱ្យលំនៅដ្ឋានទាំងនេះ ចុះបញ្ជីសម្រាប់ការជួញដូរ។

សេចក្តីអំពាវនាវនេះបានធ្វើឡើង ក្នុងគោលដៅដើម្បីជួយជំរុញដល់ការផ្គត់ផ្គង់រយៈពេលវែងសម្រាប់ផ្ទះតម្លៃទាប។

ទីក្រុងប៉េកាំងបាននិងកំពុងចាត់វិធានការ ដើម្បីបង្កើនការផ្គត់ផ្គង់លំនៅដ្ឋាន ដែលមានតម្លៃសមរម្យ ក្នុងរយៈពេលប៉ុន្មានឆ្នាំថ្មីៗនេះ ខណៈតម្លៃលំនៅដ្ឋានដ៏ខ្ពស់ នៅតាមបណ្តាទីក្រុងធំៗ បានបង្កជាឧបសគ្គសម្រាប់អ្នកទិញវ័យក្មេងជាច្រើន។

មន្ត្រីម្នាក់នៅក្រសួងលំនៅដ្ឋាន និងអភិវឌ្ឍន៍ទីក្រុង-ជនបទរបស់ប្រទេសចិន ធ្លាប់បានលើកឡើងកាលពីឆ្នាំមុនកន្លងទៅថា ប្រទេសចិននឹងផ្គត់ផ្គង់ផ្ទះជួលថ្មី ដែលមានតម្លៃទាបចំនួន៦,៥លានយូនីតបន្ថែម នៅតាមបណ្តាទីក្រុងធំៗចំនួន៤០ ចាប់ពីឆ្នាំ២០២១ រហូតដល់ឆ្នាំ២០២៥។

ប៉ុន្តែស្ថានការណ៍កាន់តែធ្ងន់ធ្ងរឡើង ដោយសារសេដ្ឋកិច្ចចិនដាំក្បាលចុះ និងប៉ះពាល់ដល់ការរំពឹងទុកផ្នែកការងារ និងប្រាក់ចំណូល ដែលនាំឱ្យប៉ះពាល់ ដល់សមត្ថភាពរបស់មនុស្សសាមញ្ញ ក្នុងការផ្តល់មូលនិធិទិញផ្ទះ។

លោកឧបនាយករដ្ឋមន្ត្រី He Lifeng បានថ្លែងក្នុងសន្និសីទមួយនៅទីក្រុងប៉េកាំងថា ការរៀបចំផែនការ និងការសាងសង់លំនៅដ្ឋាន ដែលមានតម្លៃថោកសមរម្យ នឹងជួយសម្រាលការលំបាក ផ្នែកលំនៅដ្ឋាននៅតាមទីក្រុងធំៗ ព្រមទាំងអាចជំរុញការវិនិយោគ និងការប្រើប្រាស់ផងដែរ។

ដោយសារការសាងសង់លំនៅដ្ឋាន តម្លៃសមរម្យជាគម្រោងមួយ ដែលមានលក្ខណៈជាប្រព័ន្ធ ពិបាក និងស្មុគស្មាញ លោក He បានជំរុញឱ្យមានការចាត់ចែង និងការគ្រប់គ្រងការចំណាយដ៏តឹងរ៉ឹង ដើម្បីរក្សាបាននូវល្បឿន នៃការសាងសង់ដ៏សមហេតុផល៕

ដោយ: គង់ លាងហួរ

អន្តរជាតិ: ធនាគារវិនិយោគអាមេរិកGoldman Sachs មានទំនុ កចិត្តកាន់តែខ្លាំងឡើងថា សេដ្ឋកិច្ចអាមេរិក នឹងប្រកាន់ខ្ជាប់ការថយចុះក្នុងកម្រិតមួយ ដែលអាចទទួលយកបាន (Soft Landing) ដែលមនុស្សជាច្រើនគិតថា ស្ទើរតែមិនអាចសម្រេចបាន។

យោងតាមរបាយការណ៍ស្រាវជ្រាវមួយ ដែលបានចេញផ្សាយកាលពីយប់ថ្ងៃចន្ទបង្ហាញថា ធនាគារ Goldman Sachs បានបន្ទាបការព្យាករណ៍ឱកាស ចំពោះវិបត្តិសេដ្ឋកិច្ចអាមេរិក ក្នុងរយៈពេល១២ខែបន្ទាប់ មកត្រឹមតែ១៥%ប៉ុណ្ណោះ។

ប្រូបាប៊ីលីតេ១៥%ថ្មីនេះ គឺធ្លាក់ចុះពីការព្យាករណ៍ពីមុនរបស់ធនាគារ Wall Street ចំនួន២០% និងទាបជាងការព្យាករណ៍៣៥% នៅក្នុងខែមីនា របស់ធនាគារ Goldman Sachs ដោយសារនៅពេលនោះវិបត្តិធនាគារបានផ្ទុះឡើង។

យោងតាមរបាយការណ៍ដែលមានចំណងជើងថា “Soft Landing Summer” បានគូសបញ្ជាក់អំពីសូចនាករសេដ្ឋកិច្ចនានាជាបន្តបន្ទាប់ ដែលលើកទឹកចិត្តទៅលើអតិផរណា និងទីផ្សារការងារ ដែលនេះបង្ហាញថាសហរដ្ឋអាមេរិក នឹងជៀសផុតពីវិបត្តិសេដ្ឋកិច្ច។យោងតាមសារព័ត៌មានCNN បានឱ្យដឹងថា ការទាញទម្លាក់អតិផរណា ដោយមិនបង្កឱ្យសេដ្ឋកិច្ចធ្លាក់ចូលទៅក្នុងវិបត្តិ គឺជាអ្វីដែលគេហៅថា“soft landing”ហើយនេះជាអ្វី ដែលធនាគារកណ្តាលអាមេរិក (Fed)សម្រេចបានតែម្តងគត់ ក្នុងរយៈពេល៦០ឆ្នាំកន្លងមកនេះ។

លោក Jan Hatzius ប្រធានសេដ្ឋវិទូអាមេរិករបស់ធនាគារ Goldman បានសរសេរនៅក្នុងរបាយការណ៍ថា “យើងមិនយល់ស្របយ៉ាងខ្លាំងជាមួយនឹងគំនិតដែលថា គោលនយោបាយរូបិយវត្ថុនឹងជំរុញឱ្យសេដ្ឋកិច្ចឆ្ពោះទៅរកវិបត្តិ”។

លោកបន្តថា “តាមពិតទៅយើងគិតថាការអូសទាញ ឬផលប៉ះពាល់ពីការរឹតបន្តឹង គោលនយោបាយរូបិយវត្ថុនឹងបន្តថយចុះ មុនពេលវារលាយបាត់ទាំងស្រុង នៅដើមឆ្នាំ២០២៤ខាងមុខ”។

លោក Hatzius បានបន្ថែមថា ធនាគារ Goldman Sachs មានទំនុកចិត្តកាន់តែខ្លាំងឡើងថា ការដំឡើងអត្រាការប្រាក់របស់ធនាគារ Fedគឺចប់ហើយ ស្របពេលដែលភាពអត់ការងារធ្វើ មានការកើនឡើង ប្រាក់ឈ្នួលកើនយឺត និងអតិផរណាថយចុះ៕

តែម សុខុម

សិង្ហបុរី: ក្រុមអ្នកជំនាញសេដ្ឋកិច្ចក្នុងវិស័យឯកជនបានទម្លាក់ការព្យាកររបស់ខ្លួនសម្រាប់កំណើនសេដ្ឋកិច្ចរបស់ប្រទេសសិង្ហបុរី ក្នុងឆ្នាំ២០២៣ មកនៅត្រឹម១% ដោយធ្លាក់ចុះពីការព្យាករមុននេះក្នុងខែមិថុនា ក្នុងរង្វង់១,៤%។

បរិយាកាសកំណើនខាងក្រៅធ្លាក់ចុះត្រូវបានចាត់ទុកថាជាហានិភ័យធ្លាក់ចុះកំពូល ដោយក្រុមអ្នកជំនាញសេដ្ឋកិច្ចក៏បានចង្អុលបង្ហាញពីសម្ពាធអតិផរណា និងការធ្លាក់ចុះនៃកំណើនសេដ្ឋកិច្ចក្នុងប្រទេសចិន ផងដែរ។

លទ្ធផលនៃការរកឃើញទាំងនេះត្រូវបានចេញផ្សាយកាលពីថ្ងៃពុធ ទី៦ ខែកញ្ញា នៅក្នុងការស្ទង់មតិចុងក្រោយបង្អស់របស់អាជ្ញាធររូបិយវត្ថុសិង្ហបុរី (MAS) ទៅលើអ្នកព្យាករណ៍អាជីព។ ក្រុមអ្នកជំនាញសេដ្ឋកិច្ច និងអ្នកវិភាគសរុបចំនួន២២រូបបានឆ្លើយនៅក្នុងការស្ទង់មតិនេះ។

ការព្យាករអំពីកំណើន១%នៅក្នុងការស្ទង់មតិចុងក្រោយនេះគឺស្ថិតក្នុងរង្វង់ នៃការព្យាករផលទុនជាតិសរុប (GDP) របស់ក្រសួងពាណិជ្ជកម្ម និងឧស្សាហកម្មចន្លោះពី០,៥%ទៅ១,៥%។

ការស្ទង់មតិរបស់អាជ្ញាធររូបិយវត្ថុសិង្ហបុរី (MAS) បង្ហាញថា វិស័យផលិតកម្មដែលជាសូចនាករសេដ្ឋកិច្ចដ៏សំខាន់មួយត្រូវបានរំពឹងថានឹងធ្លាក់ចុះ៤,៤%ក្នុងឆ្នាំនេះ បើធៀបនឹងការព្យាករមុននេះថានឹងធ្លាក់ចុះ១,៣%។

យោងតាមសន្ទស្សន៍អ្នកគ្រប់គ្រងការទិញ (Purchasing Managers’ Index) បង្ហាញថា ទិន្នផលផលិតកម្មរបស់ប្រទេសសិង្ហបុរី ដែលគ្របដណ្ដប់ប្រមាណ១ភាគ៥នៃ GDP របស់ប្រទេសនេះបានធ្លាក់ចុះប្រហែលមួយឆ្នាំមកហើយ ស្របពេលមានតម្រូវការទូទាំងពិភពលោកធ្លាក់ចុះ៕ CNA៕

ដោយ: គង់ លាងហួរ

ប៉េកាំង: កាសែត Wall Street Journal បានរាយការណ៍ ដោយដកស្រង់សម្តីរបស់មនុស្ស ដែលដឹងអំពីបញ្ហាមកថា ប្រទេសចិនបានបញ្ជាមន្ត្រី នៅទីភ្នាក់ងាររដ្ឋាភិបាលកណ្តាល មិនឱ្យប្រើប្រាស់ទូរស័ព្ទ iPhone របស់ក្រុមហ៊ុនអាមេរិក Apple និងឧបករណ៍ម៉ាកបរទេសផ្សេងទៀត សម្រាប់ធ្វើការងារ ឬនាំឧបករណ៍ទាំងនោះ ចូលក្នុងការិយាល័យ។

កាសែត WSJ បានរាយការណ៍ថា បទបញ្ជានេះត្រូវបានផ្តល់ឱ្យដោយថ្នាក់លើដល់បុគ្គលិករបស់ពួកគេ ក្នុងរយៈពេលប៉ុន្មានសប្តាហ៍ថ្មីៗនេះ ហើយវាមិនច្បាស់ថា បទបញ្ជានេះត្រូវបានចែកចាយទូលំទូលាយប៉ុណ្ណានោះទេ។

ការហាមឃាត់នេះ ធ្វើឡើងនៅមុនព្រឹត្តិការណ៍ Apple ដែលគ្រោងរៀបចំនៅសប្តាហ៍ក្រោយ ដែលអ្នកវិភាគជឿថា នឹងនិយាយអំពីការចេញលក់ទូរសព្ទ iPhone ស៊េរីថ្មី និងអាចបង្កឱ្យមានការព្រួយបារម្ភ ក្នុងចំណោមបណ្តាក្រុមហ៊ុនបរទេស ដែលកំពុងប្រតិបត្តិការនៅក្នុងប្រទេសចិន ស្របពេលដែលភាពតានតឹងរវាងចិន និងអាមេរិកកំពុងឡើងកំដៅ។ របាយការណ៍របស់កាសែត WSJ មិនបានបញ្ចេញឈ្មោះក្រុមហ៊ុនផលិតទូរស័ព្ទដៃ ផ្សេងទៀតក្រៅពី Apple នោះទេ។ យ៉ាងណាមិញ ក្រុមហ៊ុនយក្ស Apple និងការិយាល័យព័ត៌មានក្រុមប្រឹក្សារដ្ឋចិន ដែលមានតួនាទីដោះស្រាយសំណួរប្រព័ន្ធផ្សព្វ​ផ្សា​យ តំណាងឱ្យរដ្ឋាភិបាលចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់កាសែត Reuters នោះទេ។

អស់រយៈពេលជាងមួយទសវត្សរ៍មកនេះ ប្រទេសចិនបាននិងកំពុងខិតខំកាត់បន្ថយ ការពឹងផ្អែកលើបច្ចេកវិទ្យាបរទេស ដោយស្នើឱ្យក្រុមហ៊ុនពាក់ព័ន្ធរបស់រដ្ឋ ដូចជា ធនាគារប្តូរទៅប្រើប្រាស់កម្មវិធីsoftware ក្នុងស្រុក និងលើកកម្ពស់ការផលិតបន្ទះឈីប ក្នុងស្រុក៕

ដោយៈ​គង់ ហ្វីអូណា

        ភ្នំពេញៈ  ការឈានជើងចូលផ្សារហ៊ុនដំបូងគេរបស់ក្រុមហ៊ុនJS Land Plc បានក្លាយជាការចាប់អារម្មណ៍មួយ ក្នុងទីផ្សារអចលនទ្រព្យកម្ពុជា។

ដូចក្រុមហ៊ុនដទៃទៀតដែរ JS Land Plc ជា​ក្រុមហ៊ុន​អភិវឌ្ឍន៍​អចលនទ្រព្យ​ បាន​រាយការណ៍​ពី​ការធ្លាក់ចុះ​ នៃ​ប្រតិបត្តិការ​អាជីវក​ម្ម​នៅក្នុង​ត្រីមាស​ទី​២ ចំពេល​មានការ​ធ្លាក់ចុះ​សកម្មភាព​សំណង់ និង​អចលនទ្រព្យ ​ដែលនាំឱ្យ​មានការ​ផ្គត់ផ្គង់​លើស​តម្រូវការ​ទីផ្សារ​។​

ក្រុមហ៊ុន JS Land Plc បាន​ក្លាយជា​ក្រុមហ៊ុន​ទី​២ ដែល​បាន​ចុះបញ្ជី​លើ​ទីផ្សារ​កំណើន របស់​ផ្សា​រមូល​ប​ត្រ​កម្ពុជា (CSX) កាលពី​ថ្ងៃទី​១០ ខែកុម្ភៈ ឆ្នាំ​២០២២ ដោយ​ប្រមូល​មូលនិធិ​បាន៤៨,៨៤៩ពាន់​លាន​រៀល (១២ លាន​ដុល្លារ​)​។​យោងតាម​ឯកសារ​របស់​ក្រុមហ៊ុន​ផ្ញើ​ទៅ CSX កាលពី​ថ្ងៃទី​៣១ ខែសីហា នៅ​ត្រីមាស​ទី​២ ឆ្នាំ​២០២៣ ក្រុមហ៊ុនJS LAND Plc បាន​រាយការណ៍​ពី​ការខាតបង់​ សរុប​ជាង២,១២៤ពាន់​លាន​រៀល កើនឡើង ១៨៥,៤៦ ភាគរយ​ ធៀប​នឹង​ត្រីមាស​ដូចគ្នា​ កាលពី​ឆ្នាំ​២០២២​។

គិត​ត្រឹម​ក្នុង​ចុង​ការិយបរិច្ឆេទ​នា​ថ្ងៃទី​៣០ ខែមិថុនា ឆ្នាំ ២០២៣ ក្រុមហ៊ុន​ មានទ្រព្យ​សកម្ម​សរុប​ជាង៨២ពាន់​លាន​រៀល កើនឡើង ១៩,៣៤ ភាគរយ​ និង​មូលនិធិ​សរុប​ជាង៤,៧៦៧ ពាន់​លាន​រៀល ធ្លាក់ចុះ៤១,៨៤ ភាគរយ​។​

​លោក កូយ ឡេ​សាន ប្រធាន​ប្រតិបត្តិក្រុមហ៊ុនJS Land Plc​ បានឱ្យដឹង​នៅក្នុង​ឯកសារ​របស់ខ្លួន កាលពីចុងខែសីហា​ថា របាយការណ៍​ប្រចាំត្រីមាស​ទី​២​របស់​ក្រុមហ៊ុន​JS Land PLC ចាប់ពី​ថ្ងៃទី​១ ខែមេសា ឆ្នាំ​២០២៣ ដល់​ថ្ងៃទី ៣០ ខែមិថុនា ឆ្នាំ​២០២៣ ជា​ពេលវេលា​ដ៏​ពិបាក ប៉ុន្តែ​ជា​ត្រីមាស​ទី​២ គួរឱ្យ​ពេញចិត្ត​សម្រាប់​ក្រុមហ៊ុន​។

លោក​បន្តថា​ “​យើង​មិនអាច​សម្រេចបាន​ផែនការ​នេះ​ទេ ប្រសិ​នបើ​គ្មាន​ការជឿទុកចិត្ត​របស់​អ្នក ​លើ​ចក្ខុវិស័យ​របស់​យើង និង​ការវិនិយោគ​ជា​បន្ត ​នៅក្នុង​កំណើន​អាជីវកម្ម​របស់​យើង ដែល​ពិតជា​មានតម្លៃ​មិនអាច​កាត់ថ្លៃ​បាន​”។​

លោក​បានឱ្យដឹងថា កាលពី​ថ្ងៃទី​៩ ខែមិថុនា ឆ្នាំ​២០២៣ កិច្ចប្រជុំ​ម្ចាស់​ភាគហ៊ុន​ទូទៅ ​ប្រចាំឆ្នាំ​លើកដំបូង​របស់​ក្រុមហ៊ុន បានប្រ​កាស​លទ្ធផល​ហិរញ្ញវត្ថុ​ឆ្នាំ​២០២២ និង​ផែនការ​សម្រាប់​ឆ្នាំនេះ​។ នៅក្នុង​កិច្ចប្រជុំ​នោះ ក្រុមហ៊ុន​បានលើកឡើង​ ពី​បញ្ហា​ប្រឈម​ទាំង​ខាងក្នុង និង​ខាងក្រៅ និង​យុទ្ធសាស្ត្រ​របស់​ក្រុមហ៊ុន ​ដើម្បី​ជម្នះ​បញ្ហា​ប្រឈម​ទាំងនេះ ជាមួយនឹង​ផែនការអាជីវកម្ម​រយៈ​ពេល​វែង និង​រយៈពេល​ខ្លី​របស់ខ្លួន​។​

លោក​ថ្លែងថា​ “​យើង​ជឿជាក់​យ៉ាង​មុតមាំ​ថា គំនិត​ផ្តួចផ្តើម​ទាំងអស់នេះ ​នឹង​រួមចំណែក​យ៉ាងសំខាន់ ​ដល់​ការរីកចម្រើន​របស់​ក្រុមហ៊ុន”​។ លោកបន្តថា “យើង​ពិតជា​រំភើប​ក្នុងការ​ប្រកាសថា គម្រោង​Garden Residency 2 ត្រូវបាន​បញ្ចប់ ហើយ​យើង​សម្រេចបាន​នូវ​ចំណុច​សំខាន់​នេះ​មុន​កាលកំណត់​”​។

លោក​បញ្ជាក់ថា ​អចលនទ្រព្យ​នេះ ​នឹង​រួចរាល់​សម្រាប់​ការ​ប្រគល់ជូន​អ្នកទិញ​ក្នុង​ត្រីមាស​ទី​៣ ឆ្នាំ​២០២៣​។ យើង​ប្តេជ្ញា​រក្សា​នូវ​សម្ទុះ​នៃ​កំណើន និង​ខិតខំ​ប្រឹងប្រែង ​ដើម្បី​ផ្តល់នូវ​លទ្ធផល​កាន់តែ​ប្រសើរ​ថែមទៀត នៅក្នុង​ត្រីមាស​ទី៣​។​

ប្រភព​ចំណូល​ចម្បង​របស់​ក្រុមហ៊ុន ​គឺ​បានមកពី​ការលក់​គម្រោង​ខុន​ដូ​ដែល​​បាន​អភិវឌ្ឍន៍រួច​។ ប្រាក់ចំណូល​ទាំងអស់​ត្រូវ​បានទទួល​ស្គាល់​ក្នុងពេល​មួយ ​នៅពេល​ផ្ទេរកម្មសិទ្ធិ​ នៃ​អគារ​លំនៅឋាន​ទៅឱ្យ​អតិថិជន​។ នេះ​បើ​យោងតាម​ឯកសារ​របស់​ក្រុមហ៊ុន​។​

​ឯកសារ​នេះ​បន្តថា ទីផ្សារ​ខុន​ដូ​ក្នុងប្រទេស​កម្ពុជា​ មានកា​រ​ប្រឈម​ខ្លាំង​ ដោយសារ​ការផ្គត់ផ្គង់​ខុន​ដូ​ចំនួន​ច្រើន ​ក្នុង​រាជធានី​ភ្នំពេ​ញ​។ ដើម្បី​កាត់បន្ថយ​ហានិភ័យ​ នៃ​ការកាន់កាប់​អចលនទ្រព្យ​ដែល​មិនបាន​លក់ ក្រុមហ៊ុន JS LAND តែងតែ​ផ្សព្វផ្សាយ​ផលិតផល​យ៉ាងសកម្ម​ ដោយ​បង្ហាញ​កញ្ចប់​ដ៏​គួរឱ្យ​ទាក់ទាញ​ថ្មីៗ ជាមួយនឹង​គម្រោង​ទូទាត់​ដែលមាន​តម្លៃ​សមរម្យ ដើម្បី​សម្រេចបាន​នូវ​គោលដៅ​លក់​។​

យោងតាម​ឯកសារ​នេះ គិត​ត្រឹម​ថ្ងៃទី​៣០ ខែមិថុនា ឆ្នាំ​២០២៣ ក្រុមហ៊ុន JS LAND បាន​រាយការណ៍​ថា មិនមាន​ការលក់​អចលនទ្រព្យ​នោះទេ ដោយសារ​ប្រាក់ចំណូល​ទាំងអស់ ​នឹងត្រូវ​ទទួល​ស្គាល់​នៅពេល​ណាមួយ ​នៅពេល​ផ្ទេរកម្មសិទ្ធិ​នៃ​យូ​នី​ត​លំនៅឋាន ​ទៅឱ្យ​អតិថិជន​។

ទោះជា​យ៉ាងណាក៏ដោយ គម្រោង The Garden Residency 2 សម្រេចបាន​ការលក់​ស​រុ​ប​ជាង៧៧ភាគរយ​រួចហើយ​ នៅក្នុង​ត្រីមាស​ទី​២ ក្នុង​ឆ្នាំ​២០២៣​។ ក្នុង​រយៈពេល​ដូចគ្នានេះ ក្រុមហ៊ុនបាន​រាយការណ៍​ពី​ប្រាក់ចំណូល ​ផ្សេងទៀត​ជាង៤៣,៨ លាន​រៀល​។​

ក្រុមហ៊ុន​ក៏បាន​ចង្អុល​បង្ហាញថា គិត​ត្រឹម​ថ្ងៃទី​៣០ ខែមិថុនា ឆ្នាំ​២០២៣ គម្រោងThe Garden Residency 2 បានសម្រេច​ការងារ​ស​រុ​ប​ចំនួន៧៨,១៥ ភាគរយ​ហើយ​៕