ភ្នំពេញ៖ សម្ដេចធិបតី ហ៊ុន ម៉ាណែត បានឲ្យដឹងថា គម្រោងសាងសង់ស្ពានព្រែកប្រាដែលកម្ពុជាបានចរចាជាមួយភាគីចិនរួចរាល់ គ្រោងនឹងបុកគ្រឹះសាងសង់នៅក្នុងឆ្នាំ២០២៣នេះ។

«ស្ពានព្រែកប្រា ដែលបានចរចារួចហើយ គ្រោងប្រហែលជាអាចបុកគ្រឹះក្នុងឆ្នាំនេះ»។ នេះជាប្រសាសន៍របស់សម្ដេចធិបតី។ថ្លែងក្នុងពិធីពិធីសម្ពោធដាក់ឲ្យប្រើប្រាស់ជាផ្លូវការស្ពានបេតុងខ្សែកាបកោះពេជ្រ- កោះនរា នារសៀលថ្ងៃទី១៥ ខែវិច្ឆិកា ២០២៣សម្ដេនាយករដ្ឋមន្ដ្រី បានគូសបញ្ជាក់ថា កម្ពុជាគ្រោងសាងសង់ស្ពានចំនួនបីខ្សែបន្ថែមទៀត គឺខ្សែធំស្ពានមិត្តភាពកម្ពុជាកូរ៉េ ដែលតភា្ជប់ពីតំបន់ផ្សាររាត្រីទៅតំបន់អរិយក្សត្រ ស្ពានព្រែកប្រា និងស្ពានមេគង្គក្រោម(ចាក់អង្រែលើ)។ជាមួយគ្នានេះ សម្ដេចធិបតី ហ៊ុន ម៉ាណែត រំពឹងថា ក្រោយការសង់ស្ពានឆ្លងទន្លេទាំងនេះរួចរាល់ ស្ពានទាំងនោះនឹងជួយជំរុញសេដ្ឋកិច្ចទិសខាងកើត បន្ថែមពីលើផ្លូវជាតិលេខ៦អាបន្តទៀត។

សូមរំឭកថា កម្ពុជា-ចិន បានចុះហត្ថលេខាលើកិច្ចព្រមព្រៀងឥណទានសម្បទានសម្រាប់គម្រោងសាងសង់ស្ពានទន្លេព្រែកប្រា កាលពីថ្ងៃទី១៧ ខែកញ្ញា ឆ្នាំ២០២៣។

គម្រោងស្ពាននេះ នឹងធ្វើឲ្យប្រសើរ ឡើងនូវបណ្តាញហេដ្ឋារចនាសម្ព័ន្ធផ្លូវថ្នល់ក្នុងរាជធានីភ្នំពេញ និងលើកកម្ពស់ការអភិវឌ្ឍសេដ្ឋកិច្ច សង្គម និងទេសចរណ៍ ព្រមទាំងជាផ្នែកមួយជួយកាត់បន្ថយ ការកកស្ទះចរាចរណ៍ផងដែរ។ គម្រោងស្ពាននេះ ត្រូវបានសិក្សាបញ្ចប់ដោយក្រុមហ៊ុនចិន Shanghai Construction Group Co.,Ltd. (SCG) ដែលទទួលបានថវិកាពីរដ្ឋាភិបាលចិន។ ស្ពានឆ្លងពីចាក់អង្រែទៅព្រែកប្រានេះ ស្ថិតនៅខណ្ឌមានជ័យ មានប្រវែងបណ្ដោយជាង៨០០ម៉ែត្រ បែងចែក ដល់ទៅ៤គន្លង (២ទៅ -២មក) ដើម្បីកុំឲ្យស្ទះចរាចរណ៍លើស្ពាន។ គម្រោងស្ពានព្រែកប្រានេះដែរ មានតម្លៃ ប្រមាណ៦០លានដុល្លារអាម៉េរិក។ នេះបើយោងតាមក្រសួងសាធារណការ និងដឹកជញ្ជូន៕

        ដោយៈ គង់ សូរិយា

        ភ្នំពេញៈ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំ ដល់លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ សិក្សារៀបចំភូមិសាស្ត្ររាជធានីភ្នំពេញ ដោយចែកជាតំបន់បៃតង តំបន់អាជីវកម្ម និងតំបន់កម្សាន្តសប្បាយដាច់ៗពីគ្នា។

សម្តេចធិបតី ថ្លែងបែបនេះ ពេលអញ្ជើញសម្ពោធប្រើប្រាស់ជាផ្លូវការស្ពានកោះនរា និងស្ពាននាគភ្លោះកោះនរា ភ្ជាប់ពីគម្រោងកោះនរា ទៅកាន់ផ្លូវជាតិលេខ១” កាលពីរសៀលថ្ងៃទី១៥ ខែវិច្ឆិកា ឆ្នាំ២០២៣។

សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា “ខ្ញុំបានឲ្យឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី ពិនិត្យមើលតំបន់Zoningផង បានន័យថា តំបន់ណាដែលអភិវឌ្ឍន៍ថ្មីជាពិសេស បើតំបន់នោះជាផ្ទះរស់នៅ ​សូមកុំបើកអាជីវកម្ម ដែលមានការប៉ះពាល់រំខាន”។ សម្តេចបន្តថា “​តំបន់ណាធ្វើអាជីវកម្ម សម្រាប់តែធ្វើអាជីវកម្ម។ ​​តំបន់បៃតង នៅក្នុងហ្នឹងគួរមានប៉ុន្មានភាគរយ សម្រាប់ប្រជាពលរដ្ឋរបស់យើង។ ក្រុងភ្នំពេញយើងធំ ប៉ុន្តែធំមិនទាន់អស់សក្តានុពលទេ នៅរីកទៀត ស្រូបទាំងចំនួនមនុស្ស និងដី”។

សម្តេចធិបតី មានប្រជាពលរដ្ឋជាច្រើនសុខចិត្តទិញផ្ទះ នៅក្នុងបុរី ដែលមានតម្លៃថ្លៃ ព្រោះផ្ទះនោះមានលក្ខណៈងាយស្រួល ក្នុងការរស់នៅ ដូចជា មានផ្លូវធំ តំបន់រស់នៅបៃតង និងតំបន់អាជីវកម្ម ដែលនៅដាច់ពីគ្នា។
សម្តេចធិបតី ក៏ចង់ឲ្យការអភិវឌ្ឍថ្មី និងការពង្រីកតំបន់រាជធានីភ្នំពេញ ត្រូវគិតគូរពីបញ្ហានេះ ដោយមិនត្រូវឲ្យតំបន់រស់នៅរបស់ប្រជាពលរដ្ឋ ឡូកឡំនឹងតំបន់អាជីវកម្មនោះទេ។

សម្តេចធិបតីនាយករដ្ឋមន្ត្រី បានថ្លែងទៀតថា នៅពេលប្រជាពលរដ្ឋមានជីវភាពធូរធា អ្វីដែលពួកគាត់គិតជាចម្បង គឺការស់នៅងាយស្រួល និងផាសុកភាព៕

ដោយ: គង់ លាងហួរ
អន្តរជាតិ: កាសែត Reuters បានរាយការណ៍ដោយដកស្រង់ពីសារព័ត៌មាន Bloomberg និងមនុស្សដែលដឹងពីបញ្ហា ឱ្យដឹងថា ប្រទេសចិនគ្រោងនឹងផ្តល់ហិរញ្ញប្បទានយ៉ាងហោចណាស់១៣៧,២២ពាន់លានដុល្លារ សម្រាប់ការជួសជុលភូមិក្នុងទីក្រុង និងសាងសង់លំនៅដ្ឋានតម្លៃសមរម្យ។

ធនាគារប្រជាជនចិន (PBOC) គ្រោងនឹងចាក់បញ្ចូលមូលនិធិទាំងនេះជាដំណាក់កាលៗតាមរយៈបណ្តាធនាគារគោលនយោបាយនានា ដើម្បីជំរុញឱ្យបណ្តាគ្រួសារមានធនធានហិរញ្ញវត្ថុគ្រប់គ្រាន់ដើម្បីទិញផ្ទះ។

បើគិតពីផ្ទៃខាងក្នុងអគារ(floor area)ការលក់អចលនទ្រព្យក្នុងប្រទេសចិនបានធ្លាក់ចុះ៦,៨ភាគរយ ក្នុងរយៈពេល១០ខែដំបូងធៀបនឹងរយៈពេលដូចគ្នាកាលពីឆ្នាំមុន បន្ទាប់ពីធ្លាក់ចុះ៧,៥ភាគរយ ក្នុងរយៈ ពេល៩ខែដំបូង ឆ្នាំនេះ ដែលបង្ហាញថាវិស័យអចលនទ្រព្យរបស់ប្រទេសចិនមិនទាន់ស្ទុះងើបឡើងវិញនៅឡើយទេ។

ការវិនិយោគលើអចលនទ្រព្យក្នុងរយៈពេល១០ខែដំបូង ឆ្នាំ២០២៣ បានធ្លាក់ចុះ៩,៣ភាគរយធៀបនឹងឆ្នាំមុន បន្ទាប់ពីបានធ្លាក់ចុះ៩,១ភាគរយនៅក្នុងខែមករាដល់ខែកញ្ញា។ នេះបើយោងតាមទិន្នន័យពីការិយាល័យស្ថិតិជាតិ (NBS) ដែលបានចេញផ្សាយនៅថ្ងៃពុធនេះ។

ការចាប់ផ្តើមសាងសង់ថ្មី ដែលវាស់វែងដោយផ្ទៃខាងក្នុងអគារបានធ្លាក់ចុះ២៣,២ភាគរយធៀបនឹងរយៈពេល១០ខែដំបូងដូចគ្នាកាលពីឆ្នាំមុន បន្ទាប់ពីធ្លាក់ចុះ២៣,៤ភាគរយក្នុងរយៈពេលប្រាំបួនខែដំបូង ឆ្នាំនេះ។

ចំណែក មូលនិធិ ដែលរៃអង្គាសដោយអ្នកអភិវឌ្ឍន៍អចលនទ្រព្យរបស់ប្រទេសចិនបានធ្លាក់ចុះ១១,០ភាគរយធៀបនឹងរយៈពេល១០ខែដំបូងដូចគ្នាកាលពីឆ្នាំមុន បន្ទាប់ពីធ្លាក់ចុះ១៣,៥ភាគរយនៅក្នុងខែមករាដល់ខែកញ្ញា៕

ដោយៈ ជេស៊ីកា

        ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានបង្ហើបពីគំរោង សាងសង់អាគារខ្ពស់កប់ពពក និងជាអាគារខ្ពស់ជាងគេ នៅទីក្រុងកោះនរានាពេលអនាគត។

សម្តេចបានថ្លែងបែបនេះ ក្នុងឱកាសសម្ភោធដាក់ឲ្យប្រើប្រាស់ជាផ្លូវការនូវស្ពានយោងដោយខ្សែកាប តភ្ជាប់រវាងទីក្រុងកោះពេជ្រ និងទីក្រុងកោះនរា កាលពីថ្ងៃទី១៥ វិច្ឆិកាកន្លងមកនេះ។

សម្តេចបានបន្តថា ការអភិវឌ្ឍនៅតំបន់កោះនរា គឺដើម្បីបែងចែកនូវផលសេដ្ឋកិច្ច ដល់ប្រជាពលរដ្ឋទូទៅទាំងអស់ មិនមែនសម្រា ប់តែអ្នកឧកញ៉ា ពុង ឃាវសែ ឬក្រុមមនុស្សមួយក្ដាប់តូចនោះទេ។

សម្ដេចធិបតីហ៊ុន ម៉ាណែត បានបញ្ជាក់ថា ការអភិវឌ្ឍដែលមានន័យបំផុត គឺការអភិវឌ្ឍដែលបានផលប្រយោជន៍ ទៅដល់ប្រជាពល​រដ្ឋទូទៅទាំងអស់ ហើយកោះនរានេះទៀតសោត ប្រៀបដូចជាការជប់ដីដែលត្រូវបានលុបបាត់ ហើយធ្វើឲ្យរីកឡើងវិញកាន់ខ្ពស់សម្រាប់ប្រជាពលរដ្ឋគ្រប់រូប។

សម្ដេចធិបតី នាយករដ្ឋមន្ដ្រីបានបន្តថា តំបន់កោះនរា នឹងត្រូវអភិវឌ្ឍន៍ជាបន្ដបន្ទាប់ មិនចាញ់តំបន់កោះពេជ្រនោះទេ ពោលនឹងបង្កើតទៅជាតំបន់សេដ្ឋកិច្ច ឧស្សាហកម្ម ទៅតាមអ្វីដែលបានគ្រោងទុក។

ទាក់ទងគំរោងសាងសង់អាគារកប់ពពក នៅទីក្រុងកោះនរា ថ្នាក់ដឹកនាំជាន់ខ្ពស់ក្រុមហ៊ុនOCIC បានបង្ហើបឲ្យដឹងថា គំរោងសាងសង់អាគារកំពស់ប្រមាណ៦០០ម៉ែត្រនេះ ត្រូវបានរៀបចំឌីសាញរួចហើយ ដោយក្រុមហ៊ុនឌីសាញដ៏ល្បីល្បាញFoster & Partnerរបស់ចក្រភពអង់គ្លេស ដែលជាក្រុមហ៊ុនបានឌីសាញ ព្រលានយន្តហោះ និងអាគារល្បីៗនៅលើពិភពលោក រួមទាំងព្រលានយន្តហោះអន្តរជាតិ តេជោ ក្រុងតាខ្មៅផងដែរ។

អគ្គនាយករងក្រុមហ៊ុនOCIC លោកទូច សំណាងធ្លាប់បានបង្ហើបឲ្យដឹងថា វាជាគំរោងដ៏អស្ចារ្យមួយនាពេលអនាគត ដែលនឹងលេចរូបរាងនៅក្បាលទីក្រុងកោះនរា ប៉ុន្តែការសាងសង់នឹងចាប់ផ្តើមនៅពេលណា លោកមិនទាន់អាចបញ្ជាក់បាននៅឡើយទេ។

លោកបន្តថា “ការសាងសង់អាគារនេះ លឿនឬយឺតវាអាស្រ័យ​លើស្ថានភាពសេដ្ឋកិច្ច និងទីផ្សារជាក់ស្តែងនាពេលខាងមុខ”៕

(ភ្នំពេញ)៖ អ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC នៅថ្ងៃទី១៥ ខែវិច្ឆិកា ឆ្នាំ២០២៣នេះ បានបញ្ជាក់ឲ្យដឹងថា គម្រោងទីក្រុងរណប «កោះនរា» អាចនឹងបញ្ចប់ការសាងសង់ នៅក្នុងឆ្នាំ២០២៥ខាងមុខនេះ ខណៈការចំណាយរបស់ក្រុមហ៊ុនសម្រាប់គម្រោងកោះនរា ចាប់ពីដំបូង រហូតមកដល់ពេលនេះអស់ជាង ៣០០លានដុល្លារហើយ។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែលអ្នកឧកញ៉ា ពុង ឃាវសែ អញ្ជើញចូលរួមក្នុងពិធីសម្ពោធប្រើប្រាស់ជាផ្លូវការ «ស្ពានកោះនរា និងស្ពាននាគភ្លោះកោះនរា ភ្ជាប់ពីគម្រោងកោះនរា ទៅកាន់ផ្លូវជាតិលេខ១» ក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នារសៀលថ្ងៃទី១៥ ខែវិច្ឆិកា ឆ្នាំ២០២៣។អ្នកឧកញ៉ា ពុង ឃាវសែ បានបញ្ជាក់យ៉ាងដូច្នេះថា «ការចំណាយរបស់ក្រុមហ៊ុនសម្រាប់គម្រោងកោះនរា ចាប់ពីដំបូងរហូតមកដល់ពេលនេះ ក្រុមហ៊ុនបានចំណាយជាង ៣០០លានដុល្លាររួចមកហើយ និងត្រូវចំណាយខ្ទង់រយលានដុល្លារបន្ថែមទៀត ដើម្បីឲ្យគម្រោងទីក្រុងរណបកោះនរានេះ អាចបញ្ចប់ការសាងសង់ហេដ្ឋារចនាសម្ព័ន្ធទាំងអស់ នៅក្នុងឆ្នាំ២០២៥ខាងមុខ មិនរាប់បញ្ចូលការសាងសង់អគារ»។

ទន្ទឹមគ្នានេះ អ្នកឧកញ៉ា ពុង ឃាវសែ បានលើកឡើងថា ការចាប់ផ្តើមសាងសង់ទីក្រុងរណបកោះនរា និងស្ពានទាំង២នេះ គឺស្របពេលគ្នានៃការរីករាលដាលនៃជំងឺ (COVID-19) ដែលជាពេលមានផល ប៉ះពាល់យ៉ាងខ្លាំង ដល់គ្រប់វិស័យទូទាំងពិភពលោក ក្នុងនោះក៏មានវិស័យសាងសង់ផងដែរ។ តែដោយមានការយកចិត្តទុកដាក់ខ្ពស់ពីរាជរដ្ឋាភិបាល ជាពិសេស ក្រោមការដឹកនាំដ៏ច្បាស់លាស់ប្រកប ដោយគតិបណ្ឌិតរបស់ សម្តេចតេជោ លើវិធានការគ្រប់គ្រង ទប់ស្កាត់នៃជំងឺ COVID-19 ដ៏ល្អបំផុត និងយុទ្ធនាការចាក់វ៉ាក់សាំង ជូនប្រជាពលរដ្ឋទូទៅ និងកម្មករបានទាន់ពេលវេលា បានធ្វើឲ្យការ សាងសង់នានា លើគម្រោងអភិវឌ្ឍទីក្រុងរណបកោះនរា អាចប្រព្រឹត្តទៅតាម ផែនការ និងជាពិសេស ការសាងសង់ស្ពានកោះនរា និងស្ពាននាគភ្លោះកោះនរានេះ អាចសម្រេចបានមុន ផែនការដែលបានគ្រោងទុកថែមទៀត។អ្នកឧកញ៉ា ពុង ឃាវសែ បានឲ្យដឹងថា ដើម្បីរៀបចំទីក្រុងរណបកោះនរា ឲ្យក្លាយជា Smart City, ក្រុមហ៊ុន OCIC បានធ្វើការសាងសង់ ហេដ្ឋារចនាសម្ព័ន្ធដូចខាងក្រោម ៖

* ស្ពានកោះនរា និងស្ពាននាគភ្លោះកោះនរា ដែលសម្ភោធជាផ្លូវការនៅថ្ងៃនេះ
* សាងសង់បេតុងច្រាំងទន្លេ ប្រវែងសរុប៨,២០០ម៉ែត្រ
* ប្រព័ន្ធលូបង្ហូរក្រោមដី២ប្រភេទ គឺលូទឹកភ្លៀង និងលូទឹកកខ្វក់ ដែលជាប្រព័ន្ធលូទំនើប ហើយងាយស្រួលគ្រប់គ្រង និងមិនប៉ះពាល់ដល់បរិស្ថាន និងទន្ល
* ប្រព័ន្ធទឹកស្អាត៖ ប្រព័ន្ធបំពង់ក្រោមដី សម្រាប់អគ្គីសនី និងខ្សែកាបអុបទិក
* អំពូលភ្លើងបំភ្លឺផ្លូវប្រភេទសូឡា ចំនួន៥០០បង្គោល
* ប្រព័ន្ធ Camera សុវត្ថិភាព សម្រាប់គ្រប់គ្រងសណ្តាប់ធ្នាប់ និងសន្តិសុខ
* ស្ថានីយបូមទឹក ការអភិវឌ្ឍន៍ទីក្រុងរណបកោះនរា តម្រូវឲ្យមានការប្តូរទីតាំងស្ថានីយ បូមទឹកនិរោធ របស់រដ្ឋាករទឹកស្វ័យតភ្នំពេញ។ ក្រុមហ៊ុន OCIC បានឯកភាពសាងសង់ ស្ថានីយបូមទឹកឆៅថ្មី ដោយបង្កើនទំហំពី ២៦ម៉ឺនm/ថ្ងៃ ទៅដល់ ៣៩ម៉ឺន m/ថ្ងៃ ដើម្បីឲ្យ ស្របតាមផែនការរបស់រដ្ឋាករទឹកស្វ័យតភ្នំពេញ ទៅថ្ងៃខាងមុខ។

ក្រុមហ៊ុន OCIC ក៏បានសាងសង់ «ឧទ្យាននរា» ដែលមានប្រវែង៤,២០០ម៉ែត្រ ស្របតាមទន្លេ មេគង្គក្រោម ដែលជាសួនច្បារដ៏ស្រស់ស្អាត និងវែងជាងគេ ក្នុងស្រុកនាពេលបច្ចុប្បន្ន និងមាន ប្រជាពលរដ្ឋប្រមាណជា៥,០០០ទៅ១០,០០០នាក់ មកកម្សាន្តជារៀងរាល់ថ្ងៃ។

បន្ថែមពីនោះទៀត អ្នកឧកញ៉ា ពុង ឃាវសែ បានឲ្យដឹងថា តាមអនុសាសន៍ដ៏ខ្ពង់ខ្ពស់របស់ សម្ដេចតេជោ អំពីយុទ្ធសាស្ត្រ «យកស្លឹកត្នោត ខ្ចប់ស្ករត្នោត» និង «យកក្រុង ចិញ្ចឹមក្រុង សាលារាជធានីភ្នំពេញ បានប្រើប្រាស់ថវិកាដែលបានមកពីការអភិវឌ្ឍកោះនរានេះ មកធ្វើការអភិវឌ្ឍន៍គម្រោងនានា នៅរាជធានីភ្នំពេញ មានដូចជា៖

* សាងសង់ស្ពានអាកាស សម្ដេច គង់ សំអុល ចំណុចប្រសព្វមហាវិថីសហព័ន្ធរុស្សី និងផ្លូវ២០០៤
* សាងសង់ស្ពានអាកាស ព្រះមុនីវង្ស ស្ថិតនៅចំណុចផ្លូវប្រសព្វមហាវិថីសម្តេចតេជោ និងផ្លូវ២៧
* សាងសង់ស្ពានអាកាស ឫស្សីកែវ ស្របតាមបណ្ដោយផ្លូវជាតិលេខ៥
* សាងសង់ស្ពានអាកាស បេតុងខ្សែកាបឫស្សីកែវ ប្រវែង៨០០ម៉ែត្រ។

អ្នកឧកញ៉ា ពុង ឃាវសែ ក៏បានឲ្យដឹងផងដែរថា ក្នុងអំឡុងពេលដ៏មមាញឹកខ្លាំងនេះទីក្រុងរណបកោះនរា បានបង្កើនកន្លែងការងារដល់ប្រជាពលរដ្ឋយ៉ាងច្រើនដូចជា៖

* បុគ្គលិក វិស្វករ សន្តិសុខ ជាង៥០០នាក់ កំពុងបំពេញការងារ, ដែលមានការចំណាយ លើប្រាក់បៀរវត្ស ជាង៣០ម៉ឺនដុល្លារក្នុងមួយខែ និងមានតម្រូវការបន្ថែមទៀត
* កម្លាំងកម្មករ និងជាងប្រមាណ១,២០០នាក់ កំពុងបំពេញការងារសព្វថ្ងៃ និងការចំណាយ លើប្រាក់បៀរវត្ស ប្រហែល៥០ម៉ឺនដុល្លារ ក្នុងមួយខែ៕

ដោយ: គង់ លាងហួរ

អន្តរជាតិ: កាលពីថ្ងៃទី១៣ ខែវិច្ឆិកា  រថភ្លើងដឹកអ្នកដំណើរឆ្លងកាត់ព្រំដែន ដែលតភ្ជាប់ពីទីក្រុងវៀងច័ន្ទ របស់ប្រទេសឡាវ ទៅកាន់រដ្ឋធានីប៉េកាំង របស់ប្រទេសចិន ត្រូវបានបើកដាក់ឱ្យដំណើរការជាផ្លូវការហើយ។

យោងតាមគេហទំព័ររដ្ឋាភិបាល របស់ប្រទេសចិនបានបង្ហាញឱ្យដឹងថា ការធ្វើដំណើរទៅមករវាងទីក្រុងវៀងចន្ទន៍ និងទីក្រុងប៉េកាំង នឹងត្រូវចំណាយរយៈពេលរហូតដល់១៥ថ្ងៃ ដែលគ្របដណ្តប់ចម្ងា​យធ្វើដំណើរប្រហែល៣.៦៦០គីឡូម៉ែត្រ។

ខ្សែរថភ្លើងនេះ នឹងត្រូវធ្វើដំណើរឆ្លងកាត់ តំបន់ទេសចរណ៍នានា ក្នុងប្រទេសចិន ដូចជា ទីក្រុង Xishuangbanna ក្នុងខេត្ត Yunnan និងទីក្រុងChibi ក្នុងខេត្តHubei ព្រមទាំងឆ្លងកាត់តំបន់ទេសចរណ៍នានា ក្នុងប្រទេសឡាវ ដូចជាទីក្រុង Luang Prabang និងទីក្រុង Vang Vieng ផងដែរ។រថភ្លើងវៀងច័ន្ទន៍ -ប៉េកាំង បានចេញដំណើរជាលើកដំបូងកាលពីថ្ងៃចន្ទដើមសប្តាហ៍ ពីស្ថានីយ៍រថភ្លើងFengtai ក្នុងប្រទេសចិន ហើយវានឹងធ្វើដំណើរបន្ត តាមរយៈបណ្តាញខ្សែរថភ្លើងប៉េកាំង-ក្វាងចូវ និងខ្សែរថភ្លើងសៀងហៃ-គុនមីង។

បន្ទាប់ពីធ្វើដំណើរទៅដល់ទីក្រុងគុនមីង រថភ្លើងវៀងច័ន្ទន៍-ប៉េកាំង នឹងឆ្លងកាត់ព្រំដែនរវាងប្រទេសទាំង២ ចូលទៅក្នុងបណ្តាញផ្លូវដែកឡាវ-ចិន(LCR) ដែលតភ្ជាប់ពីទីក្រុងគុនមីង ទៅកាន់រដ្ឋធានីវៀងច័ន្ទ។

ភាពជោគជ័យនេះ បានទាក់ទាញចំណាប់អារម្មណ៍ របស់អាជ្ញាធរទេសចរណ៍នៃប្រទេសថៃ ដែលគ្រោងនឹងដាក់បញ្ចូលបណ្តាញផ្លូវដែកឡាវ-ចិន (LCR)  ទៅក្នុងទិសដៅយុទ្ធសាស្ត្រឆ្នាំ២០២៤របស់ខ្លួន ខណៈគំនិតផ្តួចផ្តើមនេះត្រូវបានគេរំពឹងថា នឹងអាចបើកឱកាសថ្មីៗ សម្រាប់វិស័យទេសចរណ៍ឆ្លងព្រំដែន និងជំរុញកំណើនសេដ្ឋកិច្ចរវាងប្រទេសជិតខាងទាំង២៕

ដោយៈ តែម សុខុម
ហាណូយៈ ក្រុមហ៊ុនសាងសង់ហេដ្ឋារចនាសម្ព័ន្ធនានា ក្នុងប្រទេសវៀតណាម បានជាប់ផុងក្នុងបំណុលគរដូចភ្នំ ដែលពេលនេះមានទំហំដល់ទៅ៣ដង បើធៀបនឹងដើមទុនរបស់ក្រុមហ៊ុនទាំងនោះ។

តួយ៉ាង Vinaconex ដែលជាក្រុមហ៊ុនសាងសង់ អគារអាផាតម៉ិន និងស្ពានជំពាក់បំណុល ចំនួន៨២០,២៨លានដុល្លារអាមេរិក គិតត្រឹមខែកញ្ញា ដែលច្រើនជាដើមទុនរបស់ខ្លួនទ្វេរដង។ នេះបើយោងតាមសារព័ត៌មាន VN Express ចុះផ្សាយកាលពីថ្ងៃអង្គារ ទី១៤  ខែវិច្ឆិកា។

ក្រុមហ៊ុននេះត្រូវបង់ការប្រាក់ ប្រមាណ៩៨.៥០០ដុល្លារអាមេរិក ក្នុងមួយថ្ងៃគិតត្រឹមខែកញ្ញា ឆ្នាំនេះ។ ក្រុមហ៊ុន Construction Corporation No. 1 ដែលសាងសង់រោងចក្រថាមពលអគ្គិសនី និងរោងចក្រជំពាក់បំណុលប្រមាណ៤៤០លានដុល្លារអាមេរិក គិតត្រឹមដំណាច់ខែកញ្ញា ដែលជិតស្មើ៣ដងបើធៀបនឹងដើមទុនរបស់ខ្លួន។ក្រុមហ៊ុន Tascon បានជំពាក់បំណុលកាន់តែច្រើនឡើង ដោយបំណុលរបស់ខ្លួន បានកើនឡើង៧៩%ក្នុងឆ្នាំនេះ ឈានដល់ប្រមាណ៥៥០លានដុល្លារអាមេរិក ខណៈក្រុមហ៊ុនDeo Ca Group បានរាយការណ៍ថា បំណុលរបស់ខ្លួនមានទំហំ១,១៤ពាន់លានដុល្លារអាមេរិក។

ទោះជាយ៉ាងណា មួយចំនួនធំនៃក្រុមហ៊ុនទាំងនេះ កំពុងព្យាយា​មធ្វើអ្វីដែលខ្លួនឯងធ្វើបាន ដើម្បីកាត់បន្ថយកម្រិតបំណុលរបស់ខ្លួន។ ជាក់ស្ដែង ក្រុមហ៊ុន Construction Corporation No. 1 បាននិយាយកាលពីខែសីហា ថា ខ្លួននឹងទូទាត់សងថ្លៃសញ្ញាប័ណ្ណប្រមា​ណ១០៩លានដុល្លារអាមេរិក ដែលដល់ពេលត្រូវទូទាត់ក្នុងឆ្នាំនេះ។

អំឡុងខែដដែលនេះ ក្រុមហ៊ុន Deo Ca Group បានបោះផ្សាយភាគហ៊ុនលក់ឱ្យទៅម្ចាស់ភាគហ៊ុន ដែលមានស្រាប់ដើម្បីប្រមូលដើមទុនឱ្យបាន ប្រមាណ៣៤លានដុល្លារអាមេរិក ដើម្បីយកទៅទូទាត់សងបំណុល។ ទន្ទឹមនេះ ក្រុមហ៊ុន Ho Chi Minh City Infrastructure Investment កំពុងមានគម្រោងបោះ ផ្សាយសញ្ញាប័ណ្ណប្រមាណ២៨៧លានដុល្លារអាមេរិក ដើម្បីកាត់បន្ថយបំណុលរបស់ខ្លួន៕VN Express៕

ដោយៈ គង់ សូរិយា

        ភ្នំពេញៈ ការបង់ពន្ឋលើវិស័យអចលនទ្រព្យ បាននិងកំពុងក្លាយជាអ្វី ដែលរដ្ឋាភិបាលបាននិងកំពុងយកចិត្តទុកដាក់។ តើវិស័យនេះមានពន្ឋអ្វីខ្លះ?។

១. ពន្ធលើអចលនទ្រព្យ
ពន្ធលើអចលនទ្រព្យត្រូវបានកំណត់តាមអត្រា ០.១%នៃមូលដ្ឋានគិតពន្ធ។ មូលដ្ឋានគិតពន្ធគឺជាតម្លៃ៨០%តម្លៃអចលនទ្រព្យ ហើយដែលអនុញ្ញាតឲ្យកាត់បន្ថយនូវទឹកប្រាក់ចំនួន ១០០លានរៀល។ ចំណែកតម្លៃអចលនទ្រព្យវិញ ត្រូវកំណត់ដោយគណៈកម្មការវាយតម្លៃអចលនទ្រព្យ ហើយអ្នកទាំងអស់គ្នាអាចចូលមើលតាមតំណនេះបាន។
ប្រាក់ពន្ធលើអចលនទ្រព្យត្រូវបង់ = [(តម្លៃអចលនទ្រព្យ x ៨០%) – ១០០,០០០,០០០៛] x ០.១%

ឧទាហរណ៍ថា អ្នកមានដីមួយកន្លែងទំហំ២០មx៣០ម (៦០០ម៉ែត្រការ៉េ) និងមានផ្ទះល្វែងសាងសង់ ពីលើទំហំ៧មx២០ម(១៤០ម៉ែត្រការ៉េ)ចំនួន១ជាន់។ សម្រាប់តម្លៃដីនៅតំបន់នោះ មានតម្លៃ២៥០ដុល្លារ/ម៉ែត្រការ៉េ និងតម្លៃផ្ទះ២០០ដុល្លារ/ម៉ែត្រការ៉េ។
-តម្លៃដីសរុប ៦០០x២៥០=១៥០,០០០ ដុល្លារ
-តម្លៃផ្ទះសរុប ១៤០x២០០=២៨,០០០ដុល្លារ
ដូច្នេះ តម្លៃអចលនទ្រព្យសរុបគឺ ១៥០,០០០ ដុល្លារ+២៨,០០០ដុល្លារ=១៧៨,០០០ដុល្លារ។
ប្រាក់ដែលត្រូវបង់ពន្ធគឺ [(១៧៨,០០០x៨០%)-២៥,០០០$]x០.១%=១៤២.៤ដុល្លារ។

២. ពន្ធប្រថាប់ត្រា
ពន្ធប្រថាប់ត្រាត្រូវកំណត់តាមអត្រា៤% ចំពោះការផ្ទេរកម្មសិទ្ធិអចលនទ្រព្យ ឬការផ្ទេរសិទ្ធិកាន់កាប់ដីដែល គ្មានសំណង់ក្រោមរូបភាពជាការលក់ ការដោះដូរ ការទទួលអំណោយ ការដាក់ភាគទុនក្រុមហ៊ុន។ ពន្ធប្រថាប់ត្រាត្រូវបានបង់ ដោយអ្នកទទួលកម្មសិទ្ធិ ទទួលសិទ្ធិកាន់កាប់ដីធ្លី ដែលគ្មានសំណង់ គិតជាសមាមាត្រ លើតម្លៃពិតប្រាកដនៃទ្រព្យសម្បត្តិ នាថ្លៃផ្ទេរកម្មសិទ្ធិនិងសិទ្ធិកាន់កាប់។ បច្ចុប្បន្ន ពន្ធនេះ ត្រូវបានលើកលែង សម្រាប់អចលនទ្រព្យតម្លៃទាបជាង៧ម៉ឺនដុល្លារ ដល់ខែធ្នូ ឆ្នាំ២០២១ នេះ។

៣. ពន្ធលើដីធ្លីមិនបានប្រើប្រាស់
ពន្ធនេះកំណត់លើដីដែលគ្មានសំណង់ និងដីដែលមានសំណង់បោះបង់ស្ថិតក្នុងទីក្រុងនានា និងក្នុងតំបន់ទាំងឡាយដែលកំណត់ដោយគណៈកម្មការវាយតម្លៃដីមិនបានប្រើប្រាស់ នឹងត្រូវជាប់ពន្ធចំនួន២% លើមូលដ្ឋានកំណត់ពន្ធ។ ដោយឡែក បើដីនោះមានការដាំដំណាំពេញ គឺមិនជាប់ពន្ធនេះទេ។ មួយវិញទៀត បើអ្នកជាប់ពន្ធដីមិនបានប្រើប្រាស់ហើយ អ្នកមិនជាប់ពន្ធអចលនទ្រព្យ ០.១% ទេ។

៤. ពន្ធលើចំណេញមូលធន
ពន្ធនេះនឹងចាប់ផ្ដើមអនុវត្ដនាដើមឆ្នាំ២០២៤ខាងមុខ ទៅលើរាល់ផលចំណេញ ពីការលក់អចលទ្រព្យទូទៅ ដែលនឹងត្រូវបង់ពន្ធ២០% លើចំណែក២០%នៃតម្លៃអចលទ្រព្យដែលបានលក់។ ឧទាហរណ៍ បើអ្នកលក់ដី១កន្លែងបានតម្លៃ៥០ម៉ឺនដុល្លារ នោះមិនមែនបង់ពន្ធ ២០%នៃ ៥០ម៉ឺនដុល្លារទេ គឺបង់តែ ២០% នៃចំណែក២០% នៃតម្លៃដីសរុបនោះឬ ២០% នៃ ១០

ម៉ឺនដុល្លារ។ ដូច្នេះអ្នកនឹងត្រូវបង់ពន្ធ លើប្រាក់ចំណេញមូលធននេះ២ម៉ឺនដុល្លារប៉ុណ្ណោះ។ ចំពោះការផ្ទេរអចលនទ្រព្យរវាងសាច់ញាតិ ដែលមានការលើកលែងនៅក្នុងពន្ធប្រថាប់ត្រា ក៏នឹងទទួលបានការលើកលែងលើពន្ធលើចំណេញមូលធននេះផងដែរ៕