ដោយៈ ហ្វីអូណា

        ភ្នំពេញៈ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោកW.Patrick Murphy បានបង្ហាញពីការកត់សម្គាល់នូវវឌ្ឍនភាពនៃការស្តារឡើងវិញ យ៉ាងឆាប់រហ័សនូវសេដ្ឋកិច្ចកម្ពុជា អាស្រ័យការគ្រប់គ្រង់បានយ៉ាងល្អនូវជំងឺកូវីដ-១៩ អត្រានៃការវ៉ាក់សាំងខ្ពស់ ដែ​លធានាឱ្យមានការបើកដំណើរការសង្គម សេដ្ឋកិច្ចឡើងវិញបានពេញលេញយ៉ាងឆាប់រហ័ស។

ជាមួយគ្នានេះ ការធ្វើឱ្យប្រសើរឡើងនូវលក្ខខណ្ឌការងារ សេរីភាពអង្គការវិជ្ជាជីវ: សិទ្ធការងារ និងការផ្តល់នូវកិច្ចគាំពារសង្គម តាមរយ:កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលទាំងនេះសុទ្ធតែជាកត្តាទាក់ទាញ់វិនិយោគទុន និងការបញ្ជាទិញទំនិញពីកម្ពុជាទៅទីផ្សារសហរដ្ឋអាមេរិក បើទោះជានៅមានកង្វល់ និងបញ្ហាសេសសល់ខ្លះ ដែលភាគីទាំងពីរកំពុងរួមគ្នា ក្នុងការស្វែងរកដំណោះស្រាយក៏ដោយ។ការបញ្ជាក់នេះធ្វើឡើង ក្នុងជំនួបពិភាក្សាការងាររវាងលោក បណ្ឌិតអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមួយឯកឧត្តមឯកអគ្គរដ្ឋទូតPatric Murphy កាលពីព្រឹកថ្ងៃទី៥ ខែកក្កដា ឆ្នាំ២០២៣ នៅទីស្ដីការក្រសួងការងារ។

លោកឯកអគ្គរដ្ឋទូត ក៏បានសម្ដែងនូវការពេញចិត្ត ចំពោះការលើកឡើងរបស់ឯកឧត្តមរដ្ឋមន្ត្រី អ៊ិត សំហេង ដែលបានលើកឡើងពីវឌ្ឍនភាព របស់គម្រោងរោងចក្រកាន់តែប្រសើរនៅកម្ពុជា (BFC) ដែលជំរុញឱ្យការបញ្ជាទិញ ពីទីផ្សារសហរដ្ឋអាមេរិកកាន់តែមានកំណើន កំណើននេះគឺកើនទាំងបរិមាណផលិតផលវាយនភណ្ឌ សម្លៀកបំពាក់ ស្បែកជើង ទំហំពាណិជ្ជកម្ម និងបន្ថែមនូវការនាំចេញផលិតផលកាបូប និងសម្ភារធ្វើដំណើរទៀតផង។កម្ពុជាបានខិតខំទាញបានផលប្រយោជន៍ ពីពាណិជ្ជកម្មកម្ពុជា-អាមេរិក បានចំណាត់ថ្នាក់ជាប្រទេសទី៤ ដែលនាំចេញទៅទីផ្សារអាមេរិក និងជាប្រទេសចំណាត់ថ្នាក់ទី៣ ដែលទទួលអត្ថប្រយោជន៍ប្រព័ន្ធអនុគ្រោះពាណិជ្ជកម្ម (GSP) ពីសហរដ្ឋអាមេរិក។

នាជំនួបនោះផងដែរ ភាគីទាំងពីរបានពិភាក្សាលើការពង្រឹងកិច្ចសហប្រតិបត្តិការ សំដៅពង្រឹងពង្រីកទំនាក់ទំនងកម្ពុជា -អាមេរិកឱ្យកាន់តែមានលក្ខណ:គ្រប់ជ្រុងជ្រោយ ដើម្បីបង្កើនវិនិយោគទុនរបស់ខ្លួននៅកម្ពុជាក្នុងវិស័យជាច្រើនទៀត។

ទន្ទឹមនឹងនេះភាគីទាំងពីរ បានពិភាក្សាលើអនុសាសន៍មួយចំនួន ដូចជាករណីពលកម្មកុមារ អំពើជួញដូរមនុស្ស ការធ្វើអធិការកិច្ចទីភ្នាក់ងារបញ្ជូនពលករ ដើម្បីធានាសិទ្ធិ និងផលប្រយោជន៍ស្របច្បាប់របស់ពលករ ការធានានិរន្តរភាពនៃក្រុមប្រឹក្សាអាជ្ញាកណ្តាល និងការបន្តធ្វើឱ្យប្រសើរឡើង នូវសិទ្ធិសេរីភាពអង្គការវិជ្ជាជីវ: និងបន្តអនុ​លោមភាពស្របតាមបទដ្ឋានការងារអន្តរជាតិ ដែលប្រទេសកម្ពុជាបានផ្តល់សច្ចាប័ន។

ភាគីអាមេរិក នឹងផ្តល់កិច្ចសហប្រតិបត្តិការជាច្រើនទៀត ពិសេ​សលើវិស័យបណ្តុះបណ្តាលជំនាញវិជ្ជាជីវ: ដើម្បីរួមចំណែកអភិវឌ្ឍធនធានមនុស្សនៅកម្ពុជា៕

        ដោយៈ គង់ សូរិយា

        កណ្តាលៈ ជាស្រុកមួយមានភូមិសាស្រ្តជាប់មាត់ទន្លេរ និងកៀកជាមួយរាជធានីភ្នំពេញ ស្រុកល្វាឯមបាននិងកំពុងទទួលបានសមិទ្ឋផលជាច្រើនពីរដ្ឋាភិបាល និងទាក់ទាញគំរោងអភិវឌ្ឍន៍ពីវិស័យឯកជនជាច្រើន។

ស្រុកល្វាឯម បាននិងកំពុងប្រែក្លាយមុខមាត់ថ្មី ពីស្រុកកូនពៅ នៃខេត្តកណ្ដាល ដែលអភិវឌ្ឍន៍ក្រោយគេ ក្លាយជាទីក្រុងរណបថ្មីឆាប់ៗខាងមុខនេះ ក្រោយដំណើរការអភិវឌ្ឍន៍ មានសន្ទុះហក់ឡើងខ្លាំងជាងគេ ពោលគឺមានថ្នាក់ ដឹកនាំរាជរដ្ឋាភិបាល ប្រធានក្រុមការងារថ្នាក់ជាតិ ថ្នាក់ដឹកនាំខេត្ត និងអភិបាលស្រុកផ្ទាល់ បានខិតខំតស៊ូស្វិតស្វាញអភិវឌ្ឍន៍ស្រុកល្វាឯមឲ្យសន្ទុះលូតលាស់បានលឿន។ស្រុកមួយនេះ អាចចាត់ទុកជាតំបន់មុខស្រួច ត្រូវអភិវឌ្ឍន៍ឲ្យបានខ្លាំង និងលឿនបំផុត ក្រោយស្រុកនេះស្ថិតចំចំណុច នៃការស្ថាបនាផ្លូវល្បឿនលឿនភ្នំពេញ-ក្រុងបាវិត ហើយតភ្ជាប់ស្ពានកាត់ទន្លេមេគង្គក្រោម និងស្ពានកាត់ពី ជ្រោយចង្វារ បុកមកល្វាឯមថែមទៀត ដែលការណ៍នេះ ហាក់ជំរុញដល់ស្រុកល្វាឯម កែប្រែមុខមាត់៣៦០ដឺក្រេ។

អភិបាលស្រុកល្វាឯម លោកកន សុខកាយបានមានប្រសាសន៍ឲ្យដឹងកាលពីម្សិលម៉ិញនេះថា ស្រុកល្វាឯមបានកែប្រែមុខមាត់ថ្មីយ៉ាងឆាប់រហ័ស ខណៈដែលផ្លូវទាំងឡាយធ្លាប់តែជាផ្លូវដី តែឥលូវបានកែប្រែជាបេតុង កៅស៊ូ គ្រួសក្រហមប្រមាណជា៩០%ហើយ ខណៈគោលនយោបាយទឹក ផ្លូវ ភ្លើង ត្រូវបានផ្ដល់ជូនពលរដ្ឋស្រុកល្វាឯមបានគ្រប់គ្រាន់។ស្រុកមានរោងចក្រផលិតអគ្គិសនី តម្លៃវាល់លានដុល្លារ មានទឹកស្អាត មានបង្គន់អនាម័យគ្រប់ផ្ទះ មានផ្សារ សាលារៀន មន្ទីរពេទ្យ សាខាកាកបាទក្រហម។ ជាមួយគ្នានេះ ការដាក់ភ្លើងសូឡា បានចំនួន២,០០០ដើមជាដើម។

លោកអភិបាលស្រុកថ្លែងបន្តថា ស្រុកមានផែនការទាក់ទាញវិនិយោគិនមកបណ្ដាក់ទុន នៅស្រុកបានយ៉ាងច្បាស់លាស់ ពោលគឺសម្របសម្រួលបង្កភាពងាយស្រួល ជាពិសេសសម្រាប់ការមកបណ្ដាក់ទុនវិនិយោគផ្សេងៗ នៅស្រុកល្វាឯម ដោយចាត់ឲ្យមន្ត្រីទាំងអស់ពីមូលដ្ឋាន ត្រូវបង្កភាពងាយស្រួលដល់ការវិនិយោគទាំងអស់។

មិនត្រឹមតែប៉ុណ្ណោះ លោកអភិបាលស្រុក ក៏បានលើកឡើងពីការគិតគូរពង្រឹងប្រព័ន្ធអប់រំ កីឡា អាហាររូបករណ៍ផងដែរ ដោយមួយឆ្នាំ លោកអគ្គបណ្ឌិតសភាចារ្យ អូនព័ន្ធ មុនីរ័ត្ន ផ្ដល់អាហាររូបករណ៍ពី ៥០នាក់ទៅ៦០នាក់ ហើយគិតដល់បច្ចុប្បន្ន និស្សិតបសរុបដែលបានសិក្សាមានជាង ៣០០កន្លែងមកហើយ។

ជាមួយគ្នានេះ អាជ្ញាធរក៏បានកសាងសួនច្បារ តារាងបាល់ទះ និងក្លឹបការ៉ាត់តេជាដើម ដែលមានសិស្សកំពុងហ្វឹកហាត់ចំនួន៥០នាក់​ ធ្លាប់ប្រកួតថ្នាក់ជាតិ និងប្រកួតស៊ីហ្គេមបានមេដាយប្រាក់ទៀតផង។ រៀបចំកសាងទីតាំងសម្រាប់កងកម្លាំងទាំង៣ ហើយថែមទាំងរៀបចំកន្លែងពិសោធន៍ សម្រាប់ចិញ្ចឹមមាន់បែបបច្ចេកទេស ដល់បងប្អូនប្រជាពលរដ្ឋផងដែរ។

លោកអភិបាលស្រុក បានលើកឡើងពីគុណបំណាច់យ៉ាងធំធេងរបស់សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា ដែលបានខិតខំកសាងសន្តិភាពយាងលំបាក ដឹកនាំប្រទេសពីបាតដៃទទេ ពីផេះផង់ មកស្គាល់ពីរសជាតិសេចក្ដីសុខសប្បាយ រីករាយ រុងរឿង រីកចម្រើន សេដ្ឋកិច្ចរីកលូតលាស់ ពលរដ្ឋមានជីវភាពធូរធាឡើងៗ ហើយលោកប្ដេជ្ញាកៀរគរសមាជិក សមាជិកា និងពលរដ្ឋទូទាំងស្រុកល្វាឯមឲ្យគាំទ្រ និងបោះឆ្នោតជូនគណបក្សប្រជាជនកម្ពុជា ដែលមានសម្តចតេជោ ហ៊ុន សែន ជានាយករដ្ឋមន្រ្តីសម្រាប់នីតិកាលទី៧ នៃ​រដ្ឋសភា និងគាំទ្រលោកបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រ្តីសម្រាប់ពេលអនាគត។លោកអគ្គបណ្ឌិតសភាចារ្យអូន ព័ន្ឋមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានថ្លែងថា ស្រុកល្វាឯមនឹងក្លាយជាទីក្រុងរណបថ្មីមួយទៀត នៅកៀករាជធានីភ្នំពេញ នាពេលអនាគត៕

ដោយ: គង់ លាងហួរ
សៀមរាប: ឧទ្យានបុរាណវិទ្យាអង្គរដ៏ល្បីល្បាញរបស់កម្ពុជាទទួលបានភ្ញៀវទេសចរបរទេសចំនួន៣៨៥.៧៦៩នាក់ក្នុងឆមាសទីមួយ ឆ្នាំ២០២៣នេះ ពោលគឺកើនឡើង៥៤៣ភាគរយពីចំនួនត្រឹមតែ៥៩.៩៨៣នាក់ក្នុងរយៈពេលដូចគ្នាកាលពីឆ្នាំមុន។

យោងតាមសេចក្តីថ្លែងការណ៍របស់ក្រុមហ៊ុន Angkor Enterprise ដែលគ្រប់គ្រងដោយរដ្ឋបានឱ្យដឹងថា ឧទ្យានបុរាណនេះរកចំណូលបាន១៧,៨៧លានដុល្លារអាមេរិកពីការលក់សំបុត្រ ក្នុងអំឡុងខែមករាដល់ខែមិថុនា ឆ្នាំនេះ ពោលគឺកើនឡើង៦៣៨ភាគរយពី២,៤២លានដុល្លារក្នុងរយៈពេលដូចគ្នាកាលពីឆ្នាំមុន។សេចក្តីថ្លែងការណ៍ដដែលបានបន្ថែមថា នៅក្នុងខែមិថុនា ឧទ្យាននេះបានស្វាគមន៍ជនបរទេសចំនួន៤១.០១២នាក់ ដែលក្រុមហ៊ុនអាចរកប្រាក់ចំណូលបាន១,៨លានដុល្លារពីការលក់សំបុត្រ។

ដោយស្ថិតនៅភាគពាយព្យនៃខេត្តសៀមរាប ឧទ្យានបុរាណវិទ្យាអង្គរ ដែលបានចុះក្នុងបញ្ជីបេតិកភណ្ឌពិភពលោករបស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) ក្នុងឆ្នាំ១៩៩២ គឺជាគោលដៅទេសចរណ៍ដ៏ពេញនិយមបំផុតនៅក្នុងប្រទេសកម្ពុជា។កាលពីដើមសប្តាហ៍នេះ រដ្ឋមន្ត្រីក្រសួងទេសចរណ៍ លោក ថោង ខុន បានមានប្រសាសន៍ថា កម្ពុជាបានទាក់ទាញភ្ញៀវទេសចរអន្តរជាតិចំនួន២,៥៧លាននាក់នៅក្នុងឆមាសទី១ នៃឆ្នាំនេះ ដែលកើនឡើង៤០៩ភាគរយពីចំនួនត្រឹមតែ៥០៦.៧៦២នាក់ ធៀបនឹងរយៈពេលដូចគ្នាកាលពីឆ្នាំមុន។

លោកបានមានប្រសាសន៍ថា “ផ្អែកលើការព្យាករចុងក្រោយរបស់យើង កម្ពុជានឹងអាចទទួលបានភ្ញៀវទេសចរបរទេសរហូតដល់៥លាននាក់នៅឆ្នាំ២០២៣នេះ”។
លោករដ្ឋមន្ត្រីបានបន្ថែមទៀតថា “ការបើកដំណើរការឡើងវិញរបស់ប្រទេសចិននៅដើមឆ្នាំនេះ បានបញ្ចូលកម្លាំងរុញច្រានដល់កំណើនវិស័យទេសចរណ៍របស់កម្ពុជា ហើយកម្ពុជាត្រូវបានគេរំពឹងថា នឹងអាចស្វាគមន៍ភ្ញៀវទេសចរចិនបានចន្លោះពី៨០០.០០០នាក់ រហូតទៅដល់១លាននាក់នៅក្នុងឆ្នាំនេះ”៕

ដោយៈ តែម សុខុម

បាងកក: ក្រុមហ៊ុនថាមពល TPC Power Holding (TPCH) ដែលចុះបញ្ជីនៅផ្សារភាគហ៊ុនថៃ កំពុងសម្លឹងរកឱកាសបោះទុនវិនិយោគ លើថាមពលកកើតឡើងវិញនៅកម្ពុជា ដោយគ្រោងអភិវឌ្ឍស្ថានីយថាមពលសូឡា (ពន្លឺព្រះអាទិត្យ) ដែលមានសមត្ថភាពផលិតថាមពល១៨០មេហ្គាវ៉ាត់នៅកម្ពុជា។

បុត្រសម្ព័ន្ធផលិតថាមពលកកើតឡើងវិញ នៃក្រុមហ៊ុនសំណង់ថៃ Polycons Plc នេះរំពឹងថា ប្រាក់ចំណូលរបស់ខ្លួន នឹងកើនឡើងពី៣០%ទៅ៤០%នៅឆ្នាំ២០២៣ ធៀបនឹងប្រាក់ចំណូល៧៧លានដុល្លារអាមេរិក ដែលខ្លួនទទួលបានកាលពីឆ្នាំមុន ដោយសារកំណើន នៃការគ្រប់គ្រងរោងចក្រ ថាមពលមានប្រសិទ្ធភាពជាងមុន។ នេះបើយោងតាមកាសែត Bangkok Post ចុះផ្សាយកាលពីថ្ងៃទី៤ ខែកក្កដា។លោក Cherdsak Wattanavijitkul ប្រធានក្រុមហ៊ុន TPCH លើកឡើងថា ប្រាក់ចំណេញសុទ្ធ គួរតែលើសពីកម្រិតខ្ពស់បំផុតមិនធ្លាប់មានជាង១០លានដុល្លារអាមេរិកក្នុងឆ្នាំ២០១៩។ នៅក្នុងឆ្នាំ២០២២ ប្រាក់ចំណេញសុទ្ធរបស់ក្រុមហ៊ុននេះ មានចំនួន៥លានដុល្លារអាមេរិក។

លោក Cherdsak Wattanavijitkul និយាយថា ប្រភពចម្បងនៃប្រាក់ចំណូលរបស់ក្រុមហ៊ុន គឺបានមកពីរោងចក្រថាមពលជីវម៉ាស់ Pracharat Biomass Mae Lan ដែលបានចាប់ផ្តើមដំណើរការអាជីវកម្មកាលពីថ្ងៃទី០១ ខែមិថុនា។ក្រុមហ៊ុន TPCH មានគោលបំណងបង្កើន សមត្ថភាពផលិតថាមពលសរុបរបស់ខ្លួនពី១៦៣មេហ្គាវ៉ាត់ ឱ្យឈានដល់៥០០មេហ្គាវ៉ាត់នៅត្រឹមឆ្នាំ២០២៥៕ Bangkok Post៕

ដោយ: គង់ លាងហួរ

ភ្នំពេញ: សហព័ន្ធស្រូវអង្ករកម្ពុជា (CRF) បានស្វែងរកកិច្ចសហប្រតិបត្តិការ ជាមួយក្រុមហ៊ុនពាណិជ្ជ កម្មអេឡិចត្រូនិកយក្សរបស់ប្រទេសចិនAlibaba ដើម្បីបើកទីផ្សារអង្ករកម្ពុជា នៅលើវេទិកា Alibaba។

លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) បានមានប្រសាសន៍ថា អនុប្រធានCRF លោកយន់ ហុង បានជួបពិភាក្សាជាមួយលោកChhay Meng អ្នកគ្រប់គ្រងប្រតិបត្តិការរបស់ Alibaba ប្រចាំប្រទេសកម្ពុជា នៅរាជធានីភ្នំពេញកាលពីសប្តាហ៍មុន ដើម្បីពិភាក្សាអំពីកិច្ចសហប្រតិបត្តិការនេះ។លោកបានមានប្រសាសន៍ថា “កិច្ចពិភាក្សានេះ ផ្តោតលើការនាំចេញ និងទីផ្សារអង្ករកម្ពុជានៅលើវេទិកា Alibaba ដែលជាគេហទំព័រពាណិជ្ជកម្មអេឡិចត្រូនិក ដ៏ល្បីល្បាញនៅក្នុងប្រទេសចិន និងហាងពាក់ព័ន្ធនានារបស់Alibaba ហើយយើង​នឹង​ធ្វើការ​រួមគ្នា ​ដើម្បី​ផ្សព្វ ផ្សាយ​អង្ករ​កម្ពុជា​ឱ្យ​បានទូលំទូលាយ​ដល់​អតិថិជនចិន​”។​ទន្ទឹមគ្នានេះ ប្រទេស​ចិន​គឺជា​ទីផ្សារ​ នាំ​ចេញ​អង្ករ​ធំ​ជាង​គេ​របស់​កម្ពុជា។

CRF បានអះអាងថា កម្ពុជាបាននាំចេញអង្ករចំនួន១១៨.០៤១តោនទៅកាន់ប្រទេសចិន ក្នុងរយៈពេល៥ខែដំបូងនៃឆ្នាំនេះ ដែលបង្កើតប្រាក់ចំណូល បាន៧៧,៤លានដុល្លារអាមេរិក ដោយបន្ថែមថា ទីផ្សាររបស់ប្រទេសចិន រួមចំណែក៤២ភាគរយ នៃបរិមាណនាំចេញអង្ករសរុបរបស់កម្ពុជា។

លោកឧកញ៉ាចាន់ សុខឃាំងប្រធាន CRF បានលើកឡើងកាលពីពេលថ្មីៗនេះថា  ប្រទេសចិនគឺជាទីផ្សារដ៏ធំ សម្រាប់អង្ករកម្ពុជា ហើយសហព័ន្ធ នឹងធ្វើការជាមួយក្រសួងពាណិជ្ជកម្ម ដើម្បីធានាថា ការលក់អង្ករប្រចាំឆ្នាំ ទៅកាន់ប្រទេសចិន អាចកើនដល់៤០០.០០០តោនក្នុងមួយឆ្នាំ៕

ដោយ: គង់ លាងហួរ

អន្តរជាតិ: យោងតាមការចុះផ្សាយ ដោយសារពត៌មានវៀតណាម VNEpress កាលពីថ្ងៃទី២ ខែកក្កដា បានឱ្យដឹងថា ប្រទេសម៉ាឡេស៊ី គ្រោងនឹងពិនិត្យឡើងវិញ នូវកម្មវិធីទិដ្ឋាការរយៈពេល១០ឆ្នាំរបស់ខ្លួន នៅក្នុងរយៈពេលពីរខែខាងមុខនេះ។

រដ្ឋមន្ត្រីម៉ាឡេស៊ីបានអះអាងថា វាអាចចំណាយពេលរហូតដល់ទៅ៨សប្តាហ៍ ដើម្បីទទួលបានការយល់ព្រមពីរដ្ឋាភិបាល មុនពេលលក្ខខណ្ឌចុងក្រោយ លើកម្មវិធី Malaysia My Second Home អាចត្រូវបានបញ្ចប់សព្វគ្រប់។កម្មវិធីទិដ្ឋាការ ដែលត្រូវបានបង្កើតឡើង កាលពីឆ្នាំ២០០២ អនុញ្ញាតឱ្យជនបរទេស អាចស្នាក់នៅក្នុងប្រទេសម៉ាឡេស៊ី បានរហូតដល់ទៅ១០ឆ្នាំ។

កាលពីខែសីហា ឆ្នាំ២០២១ រដ្ឋាភិបាលម៉ាឡេស៊ីបានដាក់លក្ខខណ្ឌយ៉ាងតឹងរ៉ឹង ដោយតម្រូវឱ្យអ្នកដាក់ពាក្យសុំ ផ្តល់នូវភស្តុតាងបញ្ជាក់ ទ្រព្យសកម្មរបស់ពួកគេ ចំនួន១,៥លានរីងហ្គីត (៣៣៨.០០០ដុល្លារអាមេរិក) និងភស្តុតាងប្រាក់ចំណូលប្រចាំខែអប្បបរមាចំនួន៤០.០០០រីងហ្គីត។

ទ្រព្យសកម្មរាវ ឬ Liquid assets គឺជាទ្រព្យដែលអ្នកអាចបម្លែងទៅជាសាច់ប្រាក់បានងាយស្រួល ក្នុងរយៈពេលខ្លី (លក់ប្ដូរយកលុយ) ដោយមិនខាតបង់ ឬខាតតែបន្តិចបន្តួច។ឧទាហរណ៍ដូចជា លុយក្នុងកុងធនាគារ បណ្ណបំណុល ឬភាគហ៊ុន ។ល។ ដែលសុទ្ធសឹងតែអាចប្តូរ ទៅជាលុយបានងាយស្រួល និងក្នុងរយៈពេលខ្លី។កាលពីមុន បេក្ខជនដាក់ពាក្យស្នើសុំទិដ្ឋាការស្នាក់នៅ គ្រាន់តែតម្រូវឱ្យមានប្រាក់សន្សំ ចន្លោះពី៣០០.០០០រីងហ្គីត និង៥០០.០០០រីងហ្គីតតែប៉ុណ្ណោះ។

ទន្ទឹមគ្នានេះ សមាគម និងអ្នកជំនាញជាច្រើន បានអំពាវនាវឱ្យ   រដ្ឋាភិបាលម៉ាឡេស៊ី ដោះស្រាយបញ្ហាក្នុងកម្មវិធីទិដ្ឋាការ រយៈពេល១០ឆ្នាំរបស់ខ្លួនឱ្យបានឆាប់រហ័ស ដើម្បីជួយបង្កើនប្រាក់ចំណូលរបស់រដ្ឋាភិបាល និងជំរុញទីផ្សារលំនៅដ្ឋានដែលបាននៅទ្រឹង៕