សន្និបាតសហគ្រិនចិនបង្ហាញថា ការវិនិយោគពីបណ្ដាក្រុមហ៊ុន សហគ្រាសបរទេស នៅក្នុងប្រទេសថៃនៅមានកម្រិត បើធៀបនឹងបណ្ដាប្រទេសជិតខាងក្នុងតំបន់អាស៊ាន

ដោយៈ សុខុម

បាងកក: ការវិនិយោគបរទេសនៅប្រទេសថៃនៅមានកម្រិត បើធៀបនឹងបណ្ដាប្រទេសជិតខាងក្នុងតំបន់អាស៊ាន ដូចជា វៀតណាម និងម៉ាឡេស៊ី ដែលបានងើបឡើងវិញលឿនជាងគេ ចាប់តាំងពីវិបត្តិកូវីដ-១៩។ នេះបើតាមសារព័ត៌មាន The Nation ចុះផ្សាយកាលពីថ្ងៃច័ន្ទ ទី២៦ ខែមិថុនា។

សូម្បីសន្និបាតសហគ្រិនចិនទូទាំងពិភពលោក (World Chinese Entrepreneurs Convention) លើកទី១៦ ដែលរៀបចំឡើងនៅប្រទេសថៃ ចាប់ពីថ្ងៃទី២៤ ដល់ថ្ងៃទី២៦ ខែមិថុនា បង្ហាញថា ការវិនិយោគពីបណ្ដាក្រុមហ៊ុន សហគ្រាសបរទេស នៅក្នុងប្រទេសថៃ មានតិចតួចណាស់។

វិបត្តិកូវីដ-១៩ បានធ្វើឱ្យដាំក្បាលចុះយ៉ាងខ្លាំង នូវពាណិជ្ជកម្ម និងការវិនិយោគទូទាំងពិភពលោក រួមទាំងការវិនិយោគផ្ទាល់ពីបរទេស (FDI) នៅក្នុងប្រទេសថៃផងដែរ។

ខណៈពិភពលោកងើបឡើងវិញ ប្រទេសថៃនៅពេលនេះកំពុងប្រកួតប្រជែង ជាមួយបណ្តាប្រទេសផ្សេងៗទៀត ក្នុងតំបន់អាស៊ាន ដើម្បីទាក់ទាញការវិនិយោគ ពីបណ្ដាក្រុមហ៊ុនពហុជាតិសាស្ត្រ ក្នុងវិស័យបច្ចេកវិទ្យា ហើយជាលទ្ធផលបង្ហាញថា ប្រទេសថៃកំពុងតែចាញ់ការប្រកួតប្រជែងនេះ។

សូម្បីអំឡុងពេលនៃការរីករាលដាលវីរុសកូវីដ-១៩ បណ្ដាប្រទេសផ្សេងៗក្នុងតំបន់អាស៊ាន បានបន្តទាក់ទាញការវិនិយោគយ៉ាងរឹងមាំ។ ជាឧទាហរណ៍ ក្រុមហ៊ុន Samsung បានសម្រេចចិត្តបោះទុនវិនិយោគយ៉ាងច្រើនសន្ធឹកសន្ធាប់ នៅប្រទេសវៀតណាម បន្ទាប់ពីការចរចាគ្នារយៈពេលយ៉ាងយូរ ដើម្បីជម្រះរាល់ឧបសគ្គដែលរាំងស្ទះ។

ក្រុមហ៊ុនខ្នាតយក្សរបស់កូរ៉េខាងត្បូងមួយនេះ បានប្រកាសកាលពីខែធ្នូ ថា ខ្លួននឹងបង្កើនការវិនិយោគសរុបរបស់ខ្លួន លើការផលិតទូរស័ព្ទស្មាតហ្វូន និងគ្រឿងអេឡិចត្រូនិកពី១៨ពាន់លានដុល្លារអាមេរិក ទៅ២០ពាន់លានដុល្លារអាមេរិក។

និយាយពីប្រទេសម៉ាឡេស៊ីវិញ ការវិនិយោគផ្ទាល់ពីបរទេស (FDI) របស់ខ្លួនកាលពីឆ្នាំមុនបានឈាន ដល់កម្រិតខ្ពស់បំផុតមិនធ្លាប់មាន ដែលមានទំហំទឹកប្រាក់រហូតដល់១៥,៩១ពាន់លានដុល្លារ ក្នុងឆ្នាំ២០២២ ទោះបីជាជួបស្ថានភាពកូវីដ-១៩ យ៉ាងណាក្ដី។

សាជីវកម្មអភិវឌ្ឍន៍ពាណិជ្ជកម្ម ក្រៅប្រទេសម៉ាឡេស៊ី (Malaysia External Trade Development Corporation) បានរាយការណ៍ថា ប្រទេសម៉ាឡេស៊ី មានសេដ្ឋកិច្ចរីកចម្រើនលឿនជាងគេបំផុតក្នុងតំបន់អាស៊ាន ដែលធ្វើឱ្យប្រទេសនេះ ក្លាយជាទីផ្សារឈានមុខគេសម្រាប់ការវិនិយោគ។

កត្តាទាំងនេះបង្ហាញថា សេដ្ឋកិច្ចម៉ាឡេស៊ី កំពុងងើបឡើងវិញយ៉ាងឆាប់រហ័សពីផលប៉ះពាល់នៃវិបត្តិកូវីដ-១៩។សន្និបាតសហគ្រិនចិនទូទាំងពិភពលោកលើកទី១៦ ដែលបានប្រារពធ្វើនៅទីក្រុងបាងកក ត្រូវបានរៀបចំឡើងដោយផ្នែកឯកជនដែលតំណាងដោយសភាពាណិជ្ជកម្មថៃ -ចិន ដើម្បីទាក់ទាញការវិនិយោគពីក្រុមហ៊ុនសហគ្រាសចិន ទូទាំងពិភពលោក។ សន្និបាតនេះគឺជាឱកាសដ៏មានសារៈសំខាន់ ស្របពេលប្រទេសទាំងពីរធ្វើឱ្យប្រតិបត្តិការនានាវិលទៅរកសភាពធម្មតាឡើងវិញ បន្ទាប់ពីវិបត្តិកូវីដ-១៩។

ទោះជាយ៉ាងណា វាជាការសោកស្តាយដែលព្រឹត្តិការណ៍បែបនេះ បានធ្វើឡើងអំឡុងពេលប្រទេសថៃ កំពុងជាប់គាំងនយោបាយ ដោយដំណើរការនៃបង្កើតរដ្ឋាភិបាលថ្មី បន្ទាប់ពីការបោះឆ្នោតកាលពីខែឧសភា កំពុងរអាក់រអូល និងមិនទាន់បញ្ចប់នៅឡើយ៕ The Nation៕

សម្តេចតេជោជំរុញឱ្យក្រសួងពន្លឿនការការបង្កើត តុលាការពាណិជ្ជកម្ម និងដំណើរការឱ្យបានឆាប់ក្នុងឆ្នាំនេះ

ដោយ: គង់ លាងហួរ
ភ្នំពេញ: សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានជំរុញឲ្យក្រសួងយុត្តិធម៌ ពន្លឿនការបង្កើត តុលាការពាណិជ្ជកម្ម និងដំណើរការឲ្យបានឆាប់ក្នុងឆ្នាំនេះ ដើម្បីធានាដល់ការដោះស្រាយវិវាទពាណិជ្ជកម្ម និងដើម្បីកែលម្អបរិយាកាស វិនិយោគ និងធុរកិច្ចនៅកម្ពុជា។

សម្ដេចតេជោ បានមានប្រសាសន៍នៅក្នុងពិធីសម្ពោធអគារថ្មីសម្រាប់តុលាការយុត្តិធម៌ ស្ថិតក្នុងសង្កាត់ព្រែកតាសេក ខណ្ឌជ្រោយចង្វាថា ក្រសួងយុត្តិធម៌បានបង្កើតក្របខ័ណ្ឌច្បាប់សម្រាប់តុលាការពាណិជ្ជកម្មប្រកបដោយគុណភាព និងតម្លាភាព ដើម្បីបង្កើនទំនុកចិត្តលើការវិនិយោគ និងអាជីវកម្ម។ សម្តេចតេជោ បានមានប្រសាសន៍បន្តថា “សម្តេចស្នើឱ្យមានការខិតខំប្រឹងប្រែងដើម្បីជំរុញឱ្យមានការចេញច្បាប់ស្តីពីតុលាការពាណិជ្ជកម្មនៅអាណត្តិក្រោយនៃរដ្ឋាភិបាលថ្មី”។

យោងតាមក្រសួងយុត្តិធម៌បានឱ្យដឹងថា ការបង្កើតតុលាការឯកទេសនឹងបង្កើនទំនុកចិត្តរបស់អ្នកវិនិយោគតាមរយៈការលើកកម្ពស់គុណភាពនៃសេវាកម្មក្នុងការដោះស្រាយសំណុំរឿង ដែលរួមចំណែកកាត់បន្ថយការកកស្ទះក្នុងសំណុំរឿងតុលាការតាមរយៈនីតិវិធីកាន់តែលឿនរហ័សជាងមុន។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា (CCC) បានមានប្រសាសន៍ថា នៅពេលបើកដំណើរការ តុលាការពាណិជ្ជកម្មនឹងដំណើរការវិវាទពាណិជ្ជកម្មរបស់ខ្លួនក្នុងទីក្រុងភ្នំពេញ ដាច់ដោយឡែកពីតុលាការព្រហ្មទណ្ឌ។ ចំណែកខេត្តដែលមាន ករណីវិវាទពាណិជ្ជកម្មច្រើន នឹងត្រូវពិចារណា ដើម្បីបង្កើតតុលាការពាណិជ្ជកម្មផងដែរ។ បច្ចុប្បន្ន វិវាទធុរកិច្ចនៅកម្ពុជាត្រូវបានដោះស្រាយជាចម្បងតាមរយៈមជ្ឈមណ្ឌលមជ្ឈត្តកម្មពាណិជ្ជកម្មជាតិខណៈវិវាទធ្ងន់ធ្ងរ ត្រូវកាត់ក្តីតាមតុលាការព្រហ្មទណ្ឌ។

ទន្ទឹមគ្នានេះ សភាពាណិជ្ជកម្មកម្ពុជា (CCC) និងក្រសួងយុត្តិធម៌កំពុងធ្វើការដើម្បីធ្វើឱ្យតុលាការពាណិជ្ជកម្មដំណើរការវិវាទពាណិជ្ជកម្មប្រកបដោយតម្លាភាព។

លោកឧកញ៉ា លឹម ហេង បន្ថែមទៀតថា “ប្រសិនបើកម្ពុជាមានតុលាការពាណិជ្ជកម្មនោះវា នឹងជួយជំរុញឱ្យមានការវិនិយោគបន្ថែមទៀត ដោយសារក្រុមអ្នកធុរកិច្ចអាចមានទំនុកចិត្តលើប្រព័ន្ធយុត្តិធម៌របស់យើង”។

លោក កើត រិទ្ធ រដ្ឋមន្ត្រីក្រសួងយុត្តិធម៌បានមានប្រសាសន៍ថា ការបង្កើតតុលាការពាណិជ្ជកម្មមានសារៈសំខាន់ណាស់ក្នុងការពង្រឹងទំនុកចិត្តក្នុងការដោះស្រាយវិវាទពាណិជ្ជកម្ម និងការលើកកម្ពស់បរិយាកាសវិនិយោគដ៏អំណោយផលនៅកម្ពុជា៕

CDCអនុម័តទុនវិនិយោគជិត៥៥លានដុល្លារលើគំរោងបង្កើតរោងចក្រ សហគ្រាសចំនួន៩ទីតាំង

ដោយៈ គង់ សូរិយា

ភ្នំពេញៈ រដ្ឋាភិបាលដែលមានក្រុមប្រឹក្សាអភិវឌ្ឍន៍កម្ពុជា(CDC) ជាសេនាធិការបានអនុម័ត គំរោងវិនិយោគលើរោងចក្រ សហគ្រាសចំនួន៩ ដែលមានទីតាំងនៅខេត្តកំពង់ស្ពឺ តាកែវ ខេត្តស្វាយរៀង កណ្តាល និងរាជធានីភ្នំពេញ។

យោងតាមសេចក្តីប្រកាសព៌តមានរបស់CDC បានបង្ហាញថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម

ទី១ ក្រុមហ៊ុន“ KITCHEN BRIGHTS (CAMBODIA) INDUSTRIAL CO., LTD” គម្រោងបង្កើតរោងចក្រផលិតសម្ភារៈផ្ទះបាយ ដែលមានទីតាំងវិនិយោគស្ថិតនៅភូមិបន្លាស្អិត ឃុំរលាំងចេក ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ ៩,៧លានដុល្លារអាមេរិក និងអាចបង្កើតការងារបានចំនួន ១.៤១៤កន្លែង។

ទី២ ក្រុមហ៊ុន-“FRESH SOURCE INTERNATIONAL (CAMBODIA) CO., LTD” គម្រោងបង្កើតរោងចក្រផលិតអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៣ ភូមិចមពល ឃុំពពេល ស្រុកត្រាំកក់ ខេត្តតាកែវ ក្នុងទុនវិនិយោគចំនួន ៦លានដុល្លារអាម៉េរិក និងអាចបង្កើតការងារបានចំនួន៤៦៥កន្លែង។

ទី៣ ក្រុមហ៊ុន“YANGJIE OUTDOOR MANUFACTURING (CAMBODIA) CO., LTD” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ ក្នុងទុនវិនិយោគចំនួន៥,២លានដុល្លារអាម៉េរិក និងអាចបង្កើតការងារបានចំនួន១.៥៣១កន្លែង។

ទី៤ ក្រុមហ៊ុន “X J X INDUSTRIAL CO., LTD” គម្រោងបង្កើតរោងចក្រផលិតគ្រឿងបន្សំសម្លៀកបំពាក់ ស្បែកជើង និងកាបូប ដែលមានទីតាំងវិនិយោគស្ថិតនៅភូមិអង្គសុគន្ធា ឃុំមហាឫស្សី ស្រុកគងពិសី ខេត្តកំពង់ស្ពឺ ក្នុងទុនវិនិយោគចំនួន ៥,២លានដុល្លារអាមេរិក និងអាចបង្កើតការងារបានចំនួន៤៨៥កន្លែង។

ទី៥-ក្រុមហ៊ុន “CAMBODIAN XIN HUANG MING GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគ ស្ថិតនៅសួនឧស្សាហកម្មកាណាស៊ីធី ផ្លូវវេងស្រេង ភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគចំនួន៥,១លានដុល្លារអាម៉េរិក និងអាចបង្កើតការងារបានចំនួន ១.១៤១កន្លែង។

ទី៦-ក្រុមហ៊ុន“L&G PACKAGING MATERIALS CO., LTD” គម្រោងបង្កើតរោងចក្រផលិតក្រដាសទ្រនាប់ពុម្ព (សម្លៀកបំពាក់-ស្បែកជើង-កាបូប) ក្រដាសម៉ាកឃឺ និងក្រដាសវេចខ្ចប់ ដែលមានទីតាំងវិនិយោគស្ថិតនៅភូមិព្រៃបឹង ឃុំបែកចាន ស្រុកអង្គស្នួល កណ្តាល ក្នុងទុនវិនិយោគចំនួន៥,១លានដុល្លារអាមេរិក និងអាចបង្កើតការងារបានចំនួន ៦៤៧កន្លែង។

ទី៧-ក្រុមហ៊ុន “OPTIMA GARMENT (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ២ ភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ ក្នុងទុនវិនិយោគចំនួន៥,១លានដុល្លារអាមេរិក និងអាចបង្កើតការងារបានចំនួន១.២២៦កន្លែង។

ទី៨ ក្រុមហ៊ុន- “LINGRICH BICYCLE (CAMBODIA) CO., LTD.” គម្រោងបង្កើតរោងចក្រផលិតទោចក្រយាន ទោចក្រយានអគ្គិសនី គ្រឿងបង្គុំទោចក្រយាន និងគ្រឿងបន្លាស់ទោចក្រយានគ្រប់ប្រភេទ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស តាយសេង ក្រុងបាវិត, ខេត្តស្វាយរៀង, ក្នុងទុនវិនិយោគ ប្រមាណ៧,២លានដុល្លារអាមេរិក និងអាចបង្កើតការងារបានចំនួន ៦.២៥០កន្លែង។

ទី៩-ក្រុមហ៊ុន “LATIDO ELECTRICAL CO., LTD.” គម្រោងបង្កើតរោងចក្រផលិតគ្រឿងអគ្គិសនី និងគ្រឿងបង្គុំបរិក្ខារអគ្គិសនីគ្រប់ប្រភេទ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ហាយ-ផាក ខេត្តស្វាយរៀង, ក្នុងទុនវិនិយោគប្រមាណ ៦,២លានដុល្លារអាម៉េរិក និងអាចបង្កើតការងារបានចំនួន៦៩០កន្លែង៕

ក្រុមហ៊ុន AEON ប្រកាសបើកដំណើរការគម្រោងស្ដុកទំនិញរបស់ខ្លួននៅក្នុងខេត្ដព្រះសីហនុ

ដោយៈ ច្រាយ ចំណាន

ព្រះសីហនុៈ ក្រោយបើកការដ្ឋានសាងសង់ អស់រយៈពេលប្រមាណ១ឆ្នាំ ពេលនេះគម្រោងសាងសង់ឃ្លាំង ស្ដុកទំនិញរបស់ក្រុមហ៊ុន អ៊ីអន ម៉ល (ខេមបូឌា) ឡូជី ផ្លាស ឯ.ក បានប្រកាសបើកដំណើរការគម្រោងដំណាក់កាលទី១ហើយ។ នេះបើយោងតាមការចុះផ្សាយពីក្រុមហ៊ុននៅថ្ងៃទី២៦ ខែមិថុនា ឆ្នាំ២០២៣។

នៅក្នុងការចុះផ្សាយនោះ ក្រុមហ៊ុនបានបញ្ជាក់ថា “ក្រុមហ៊ុន អ៊ីអន ម៉ល (ខេមបូឌា) ឡូជី ផ្លាស ឯ.ក មានសេចក្តីសោមនស្សរីករាយក្នុងការប្រកាសបើកដំណើរការ ជាផ្លូវការនូវភណ្ឌាគាដំណាក់កាលទី១ នៃអ៊ីអន ម៉ល ឡូជី ផ្លាស ភណ្ឌាគាដឹកជញ្ជូនតំបន់ពាណិជ្ជកម្មសេរី ក្រុងព្រះសីហនុ (FTZ Logistics Center) ដែលនឹងបម្រើជាមូលដ្ឋានសម្រាប់អាជីវកម្មភស្តុភារថ្មីបស់ខ្លួន”។

លក្ខណៈពិសេសនៃឃ្លាំងស្កុកទំនិញថ្មីនេះ មានដូចជា ទី១.សារពើភ័ណ្ឌសម្រាប់អនិវាសនជន ទី២. ប្រតិបត្តិការយ៉ាងរលូនចាប់ពីដំណើរការត្រួតពិនិត្យពន្ធគយ រហូតដល់ការដឹកជញ្ជូនទៅដល់ភណ្ឌាគា ទី៣. ទីតាំងដែលមានសក្តានុពល សម្រាប់អភិវឌ្ឍជាភណ្ឌាគាក្នុងការដឹកជញ្ជូនទំនិញ។

ក្រុមហ៊ុនបន្ដថា “តាមរយៈការខិតខំប្រឹងប្រែងទាំងនេះ យើងរួមចំណែក ក្នុងការអភិវឌ្ឍប្រទេសជាតិបន្ថែមទៀត ការធ្វើឱ្យប្រសើរឡើងនឹងផ្តល់នូវភាពងាយស្រួល សម្រាប់អតិថិជនរបស់យើង ដោយផ្តល់ឱកាសអាជីវកម្ម និងសេវាកម្មដល់អាជីវកម្មជាច្រើនប្រភេទ រួមទាំងអាជីវកម្មរបស់យើងផងដែរ”។

គម្រោងមជ្ឈមណ្ឌលស្ដុកទំនិញរបស់ក្រុមហ៊ុន អ៊ីអន ម៉ល (ខេមបូឌា) ឡូជី ផ្លាស ឯ.ក នេះបានបើកការដ្ឋានសាងសង់កាលពីថ្ងៃទី១១ ខែឧសភា ឆ្នាំ២០២២៕

គម្រោងសាងសង់ផ្លូវ50C ភ្ជាប់ពីខេត្តកំពង់ឆ្នាំង ទៅខេត្តកំពង់ធំ នឹងបើកការរដ្ឋានសាងសង់នៅឆ្នាំ2024

ដោយៈ គង់ សូរិយា

កំពង់ឆ្នាំងៈលើកឡើងក្នុងឱកាស ដឹកនាំក្រុមការងារចុះត្រូតពិនិត្យកំពង់ផែពហុបំណង និងមជ្ឈមណ្ឌលភស្តុភារកម្ម នៅស្រុកំពង់លែង នាថ្ងៃទី២៦ ខែមិថុនា ឆ្នាំ២០២៣នេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ផ្លូវ៥០សេ ភ្ជាប់ពីខេត្តកំពង់ឆ្នាំង ទៅខេត្តកំពង់ធំ និងបើកការរដ្ឋានសាងសង់នៅឆ្នាំ២០២៤ខាងមុខនេះ។

លោកទេសរដ្ឋមន្ត្រី ស៊ុន ចាន់ថុល បានឱ្យដឹងថា គម្រោងសិក្សាផ្លូវ៥០C គឺបានសិក្សាចប់សព្វគ្រប់អស់ហើយ ទាំងផ្នែកបរិស្ថាន ជល់ផល គឺមិនមានផលប៉ះពាល់អ្វីនោះទេ។ ដូចនេះសម្តេចតេជោ ហ៊ុន សែន លោកបានមានប្រសាសន៍ថា ឆ្នាំ២០២៤ នឹងរៀបចំបើកការដ្ឋានសាងសង់ផ្លូវ៥០C ភ្ជាប់ពីកំពង់ឆ្នាំង ទៅខេត្តកំពង់ធំនេះ។

បន្ថែមពីនេះដែរលោកទេសរដ្ឋមន្ត្រី ស៊ុន ចាន់ថុល ក៏បានលើកឡើងផងដែរ ពីកំពង់ផែពហុបំណង របស់ផ្នែកឯកជនមួយដែលបានសាងសង់នៅជាប់ផ្លូវ៥០Cនេះ ដើម្បីនាំយកទំនិញ នាំយកផលិត ផលទេសចរណ៍ និងផលិតផលរ៉ែ យកទៅលក់នៅក្នុងទីផ្សារក្នុងស្រុក និងទៅផ្សារអន្តជាតិ ហើយការសាងសង់កំពង់ផែនេះ ពិតជាស៊ីចង្វាក់គ្នាជាមួយនឹងផ្លូវ៥០Cនេះផងដែរ។

លោកទេសរដ្ឋមន្ត្រីបានឱ្យដឹងទៀតថា ក្រោយការសាងសង់ផ្លូវ៥០Cសាងសង់រួច កសិកផលរបស់ប្រជាពលរដ្ឋពីខាងខេត្តព្រះវិហារ អាចមកតាមខេត្តកំពង់ធំ ចូលតាមផ្លូវ៥០C និងបន្តចូលក្នុងកំពង់ផែពហុបំណងមួយនេះ ដើម្បីអាចបន្តដឹកតាមកប៉ាល់ តាមព្រែកជីក ហ្វូណនតេជោ ឆ្ពោះទៅកាន់សមុទ្រ និងបន្តទៅក្រៅប្រទេសបានតែម្តង។លោកទេសរដ្ឋមន្ត្រី ស៊ុន ចាន់ថុលបានបញ្ជាក់ថា ប្រព័ន្ធហេដ្ឋារចនាសម្ព័ន្ធ បានដើរតួនាទីសំខាន់ណាស់ ប្រៀបតាមនឹងសរសៃឈាមសេដ្ឋកិច្ចជាតិ ដូចនេះការដាក់ទុនក្នុងការសាងសង់ផ្លូវ គឺដើម្បីជម្រុញ ក្នុងការអភិវឌ្ឍសេដ្ឋកិច្ចជាតិ ឱ្យកាន់តែមានភាពរីកចំរើនថែមទៀត ក្នុងនោះដែរក្រសួង ក៏នឹងនៅតែបន្តខិតខំកសាងប្រព័ន្ធហេដ្ឋារចនាសម្ព័ន្ធ ដើម្បីសម្រួលដល់ការដឹកជញ្ជូន ឱ្យបានកាន់តែល្អប្រសើរថែមទៀត។

បើតាមការបញ្ជាក់របស់លោកទេសរដ្ឋមន្ត្រី ស៊ុន ចាន់ថុល គម្រោងសាងសង់ផ្លូវ៥០C នឹងសាងសង់ជាផ្លូវបេតុងកៅស៊ូ(AC) និងមានលូជាង១០០កន្លែង មានស្ពានដើម្បីបើកមុខទឹក ឱ្យត្រីឆ្លងកាន់ និងសម្រាប់ប្រជាពលរដ្ឋអាចអ៊ំទូកឆ្លងកាត់ ហើយផ្លូវនេះក៏នឹងមានការតភ្ជាប់ជាមួយនឹងស្ពានដ៏វែងមួយ មានប្រវែងរហូតដល់៤គីឡូ ម៉ែត្រ ជាស្ពានដ៏វែងជាងគេនៅកម្ពុជាផងដែរ៕

ពលរដ្ឋហុងកុងសម្រុកទិញផ្ទះល្វែងនៅប្រទេសហ្វីលីពីន ដោយសារហេតុផលចំនួន២

ដោយ: គង់ លាងហួរ

អន្តរជាតិ: លោក Garry Yau នាយកប្រតិបត្តិរបស់ក្រុមហ៊ុនអចលនទ្រព្យ ដែលមានមូលដ្ឋាននៅប្រទេសចិនដីគោក តែងតែចង់វិនិយោគទៅលើផ្ទះល្វែងផ្សេងទៀត នៅតំបន់អាស៊ីអាគ្នេយ៍ ប៉ុន្តែទីផ្សារភាគច្រើនក្នុងតំបន់ បានធ្វើឱ្យគាត់មានការភ្ញាក់ផ្អើល។

ទោះជាយ៉ាងណាក្តី ឱកាសមួយបានកើតមានឡើង នៅពេលដែលលោកបានរកឃើញថា ជាមួយការចំណាយប្រាក់ប្រហែល២,២៩លានដុល្លារហុងកុង (២៩២.០០០ដុល្លារអាមេរិក) គាត់អាចទិញយូនីតលំនៅដ្ឋានចំនួន៣ នៅក្នុងតំបន់ទីក្រុងពេញនិយមចំនួន២នៅក្នុងប្រទេសហ្វីលីពីន ដែលបានបំពេញតាមតម្រូវការវិនិយោគរបស់គាត់។ឥឡូវនេះគាត់ និងប្រពន្ធរបស់គាត់ គឺជាម្ចាស់យូនីតចំនួនពីរនៅ Avida Towers Asten ក្នុងទីក្រុងMakati ដែលជាមជ្ឈមណ្ឌលហិរញ្ញវត្ថុរបស់ប្រទេសហ្វីលីពីន និងមួយយូនីតទៀតនៅ Avida Towers Riala ក្នុងទីក្រុងCebu ដែលជាគោលដៅទេសចរណ៍ដ៏ពេញនិយមមួយ។

លោក Yau ដែលបានទិញផ្ទះល្វែងនៅក្រុង Johor Bahru ក្នុងប្រទេសម៉ាឡេស៊ី ក្នុងតម្លៃ១,៥លានរីងហ្គីត (៣២២.០០០ដុល្លារអាមេរិក) ក្នុងឆ្នាំ២០២២ បានប្រាប់កាសែត South China Morning Post ថា “ខ្ញុំគិតថា មានសក្តានុពលល្អ នៅក្នុងប្រទេសហ្វីលីពីន ខណៈចំនួនទឹកប្រាក់ក្នុងការវិនិយោគ នៅហ្វីលីពីនគឺមានតម្លៃថោកជាង បើធៀបនឹងទីក្រុងកំពូលៗផ្សេងទៀតក្នុងតំបន់”។ទំនុកចិត្តរបស់លោក Yau ត្រូវបានជំរុញដោយការព្យាករណ៍កំណើន និងដំណើរការរបស់សេដ្ឋកិច្ចហ្វីលីពីននាពេលថ្មីៗនេះ។ យោងតាមការព្យាកររបស់ធនាគារអភិវឌ្ឍន៍អាស៊ី (ADB) បានឱ្យដឹងថា កំណើនសេដ្ឋកិច្ចហ្វីលីពីន នឹងកើនឡើង៦ភាគរយនៅឆ្នាំ២០២៣នេះ និង៦,២ភាគរយនៅឆ្នាំ២០២៤ ដែលធ្វើឱ្យហ្វីលីពីនក្លាយជាប្រទេស ដែលមានកំណើនសេដ្ឋកិច្ចដ៏លឿនបំផុតទីពីរ នៅក្នុងតំបន់ បន្ទាប់ពីប្រទេសវៀតណាម។

ពលរដ្ឋហុងកុងជាច្រើន ស្ថិតក្នុងចំណោមអ្នកវិនិយោគអចលនទ្រព្យអន្តរជាតិ ដែលងាកទៅរកទីផ្សារថ្មី បន្ទាប់ពីការកើនឡើងអត្រាការប្រាក់នៅក្នុងទីក្រុង ក៏ដូចជា ការលក់ផ្ទះធ្លាក់ចុះ ដែលបានធ្វើឱ្យការវិនិយោគ នៅក្នុងស្រុកមិនសូវមានភាពទាក់ទាញ។

ទន្ទឹមគ្នានេះ លោក Yau មិនមែនជាជនជាតិហុងកុងតែម្នាក់គត់ ដែលកំពុងស្វែងរកតម្លៃ នៅក្នុងទីផ្សារអចលនទ្រព្យហ្វីលីពីននោះទេ។ ជាក់ស្តែង ក្រុមហ៊ុនអភិវឌ្ឍមួយ ដែលមានមូលដ្ឋាននៅទីក្រុង Makati ប្រទេសហ្វីលីពីនបានរាយការណ៍ថា យូនីតដែលលក់ទៅឱ្យពលរដ្ឋហុងកុង គិតចាប់ពីដើមឆ្នាំនេះរហូតដល់បច្ចុប្បន្ន មានចំនួនច្រើនជាងមុន៦ដង នៃចំនួនសរុបប្រចាំឆ្នាំ២០២២កន្លងទៅ៕

កំពង់ផែពហុបំណងនៅខេត្តកំពង់ឆ្នាំងនឹងបំពាក់ប្រព័ន្ធបច្ចេកវិទ្យាឌីជីថលក្នុងការគ្រប់គ្រងប្រតិបត្តិការដឹកជញ្ជូន

ដោយៈ គង់ សូរិយា

កំពង់ឆ្នាំងៈ ប្រព័ន្ធបច្ចេកវិទ្យាឌីជីថល គ្រប់គ្រងប្រតិបត្តិការដឹកជញ្ជូនទំនិញចូលកំពង់ផែ ផ្តល់ឱ្យនូវតម្លាភាព ក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ ព្រមទាំងកាត់បន្ថយការដឹកជញ្ជូនលើសកម្រិតកំណត់យ៉ាងមានប្រសិទ្ធភាព។

នេះជាការលើកឡើងរបស់ លោកទេសរដ្ឋមន្រ្តីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូ ចុះពិនិត្យកំពង់ផែពហុបំណង និងមណ្ឌលភស្តុភារកម្មកំពង់ឆ្នាំងកាលពីថ្ងៃទី២៦ មិថុនាកន្លងមកនេះ។បច្ចុប្បន្ននេះ កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង បានត្រៀមខ្លួនរួចរាល់ សម្រាប់បើកប្រតិបត្តិការដឹកជញ្ជូន និងនាំចេញជាផ្លូវការ នាពេលឆាប់ខាងមុខ។ កំពង់ផែពហុបំណង និងមណ្ឌលភស្តុភារកម្មនេះ បានរៀបចំបំពាក់នូវឧបករណ៍បច្ចេកវិទ្យាបញ្ញាសិប្បនិម្មិត និងប្រព័ន្ធកត់ត្រារថយន្តដឹកជញ្ជូនដោយស្វ័យប្រវត្តិ Smart Truck Monitoring System (STM) ដែលមានលក្ខណៈងាយស្រួល សម្រាប់គ្របគ្រង តាមដាន និងត្រួតពិនិត្យរបាយការណ៍។

ប្រព័ន្ធនេះត្រូវបានដឹកនាំរៀបចំដោយ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូនដែលអាចកត់ត្រាព័ត៌មាន ចូល ចេញបរិវេណកំពង់ផែពហុបំណង និងមណ្ឌលភស្តុភារកម្មកំពង់ឆ្នាំង។ប្រព័ន្ធនេះមានសមត្ថភាព កត់ត្រា និងគណនាទម្ងន់ទំនិញ និងចេញវិក្កយបត្រដឹកជញ្ជូន QR Code បានភ្លាមៗ ព្រមទាំងផ្តល់ជូនរបាយការណ៍យ៉ាងសុក្រិត្យ ព្រមទាំងអាចចែករំលែកទិន្នន័យ ជូនក្រសួងស្ថាប័ន្ធពាក់ព័ន្ធ តាមរយៈប្រព័ន្ធបច្ចេកវិទ្យារបស់ក្រសួងសាធារណការ និងដឹកជញ្ជូន។

ថ្លែងក្នុងឱកាសចុះបំពេញបេសកកម្មការងារ នាឱកាសនោះលោកទេសរដ្ឋមន្ត្រីស៊ុន ចាន់ថុលបានមានប្រសាសន៍ថា ទំនើបកម្មប្រព័ន្ធបច្ចេកវិទ្យាឌីជីថល ក្នុងការគ្រប់គ្រងប្រតិបត្តិការដឹកជញ្ជូនទំនិញចូលកំពង់ផែមួយនេះបាន និងកំពុងនាំមកនូវប្រសិទ្ធភាពការងារ កាត់បន្ថយការដឹកជញ្ជូន លើសទម្ងន់កម្រិតដោយច្បាប់ ជាពិសេសផ្តល់ឱ្យនូវតម្លាភាព ក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ។ លោកបន្តថា ការរៀបចំឱ្យបង្កើតកំពង់ផែពហុបំណង និងមណ្ឌលភស្តុភារកម្មនេះឡើង គឺក្នុងបំណងជំរុញការដឹកជញ្ជូន និងនាំចេញកសិផលពីខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ទៅកាន់ទីផ្សារជាតិ និងអន្តរជាតិតាមរយៈផ្លូវទឹក ដោយកាត់បន្ថយការចំណាយពេលវេលា និងសោហ៊ុយក្នុងការដឹកជញ្ជូន ជាពិសេសគឺកាត់បន្ថយការដឹកជញ្ជូនធុនធ្ងន់តាមផ្លូវថ្នល់ ដែលជាមូលហេតុនាំឱ្យផ្លូវថ្នល់ងាយរងការខូចខាត។

ម្យ៉ាងវិញទៀតការសាងសង់កំពង់ផែ និងមណ្ឌលភស្តុភារកម្មនេះ ក៏បានផ្ដល់ឱកាសការងារដល់ប្រជាពលរដ្ឋ ដែលរស់នៅក្នុងខេត្តកំពង់ឆ្នាំង និងតំបន់ជុំវិញទៀតផង៕

ផ្សារទំនើបបែបសហគមន៍ថ្មីមួយនឹងដែលមានវត្តមាននៅលើមហាវិថី សម្តេចតេជោគ្រោងបើកដំណើរការឆាប់ៗនេះហើយ

ដោយៈ ជេស៊ីកា

ភ្នំពេញៈ ផ្សារទំនើបបែបសហគមន៍មួយ នឹងលេចឡើងនៅលើមហាវិថីសម្តេចតេជោ ឬផ្លូវ៦០ម៉ែត្រនាពេលខាងមុខនេះ ស្របពេលតំបន់នេះកំពុងរីកចម្រើន លើទីផ្សារលំនៅដ្ឋានប្រណីតៗ និងផ្សារទំនើបធំៗចំនួន២បាននិងកំពុងបើកដំណើរការ។

ផ្សារបែបសហគមន៍នេះ ត្រូវបានដាក់ឈ្មោះ “Meanchey Avenue”ដូចគ្នានឹងឈ្មោះបុរីមានជ័យ ដែលបាននិងកំពុងរៀបចំដំណើរការសាងសង់ នៅលើមហាវិថីសម្តេចតេជោ និងមានទីតាំងនៅកៀកនឹងផ្សារទំនើបAEON Mall3 ។ផ្សារទំនើបមានជ័យ អាវឺន្យូ មានចំណតធំទូលាយ ដែលមានចំណតជាង 1000។

តាមប្រភពព៌តមានច្បាស់ការណ៍បានបង្ហាញថា ផ្សារទំនើបបែបសហគមន៍ជាកម្មសិទ្ឋរបស់ លោកជំទាវ អ្នកឧកញ៉ា សុទ្ធី ម៉ូនីកា និងបុរីមានជ័យ ជាកម្មសិទ្ឋរបស់ អ្នកឧកញ៉ា លឹម រស់។

ផ្សារបែបសហគមន៍នេះ មានទីតាំងនៅផ្នែកខាងស្តាំដៃ នៃភ្លើងសញ្ញាចរាចរណ៍ នៃចំណុចផ្លូវបំបែកជាបួន ដែលឈមគ្នានឹងទីតាំងតាំងបង្ហាញរថយន្តប្រណីតMercedes’s និងជាផ្លូវ៤០ម៉ែត្រ ដែលតភ្ជាប់ទៅកាន់ផ្លូវជាតិលេខ២ និងភ្ជាប់ទៅកាន់តំបន់អភិវឌ្ឍន៍របស់ក្រុមហ៊ុនChip Mong Land៕

Prawit-led panel okays EIA for Surat Thani-Hat Yai railway, Chiang Rai reservoir

The National Environment Committee has approved the environmental impact assessments (EIA) for the construction of the Surat Thani-Hat Yai double-track railway and a reservoir in Chiang Rai.

The committee, chaired by outgoing Deputy PM General Prawit Wongsuwan, on Monday approved the EIA study for the 57.38-billion-baht double-track railway.

The project is part of the Transport Ministry’s development of a double-track railway from Surat Thani to the Hat Yai junction in Songkhla.

The committee also approved the EIA to build a reservoir in Chiang Rai’s Mae Fah Luang district, as well as the revision of air-quality control standards for power plants to control the release of exhaust and fine dust pollution.

The panel also endorsed the 2022 report on pollution nationwide, which concluded that the quality of sea and freshwater resources as well as underground water had improved. It also claimed that the level of air pollution had also improved.

The committee also learned that communities nationwide had started separating toxic waste from recyclable waste, but the amount of toxic waste has increased.
The report stated that the quantity of infectious garbage has also risen but is being disposed of properly.

Source: The Nation

ឥណ្ឌូនេស៊ីប្រកាសដកហូតការចូលទឹកដីរបស់ខ្លួនដោយគ្មានទិដ្ឋាការសម្រាប់បណ្តាប្រទេសមិនមែនសមាជិកអាស៊ាន

ដោយ: គង់ លាងហួរ

ហ្សាការតា: រដ្ឋាភិបាលឥណ្ឌូនេស៊ី បានផ្អាកការចូលដោយគ្មានទិដ្ឋាការ សម្រាប់ពលរដ្ឋនៃប្រទេស និងដែនដីចំនួន១៥៩ ដោយលើកឡើងពីការព្រួយបារម្ភ អំពីសណ្តាប់ធ្នាប់សាធារណៈ និងការឆ្លងជំងឺដែលអាចកើតមាន។

ក្រសួងច្បាប់ និងសិទ្ធិមនុស្សក្នុងប្រទេសឥណ្ឌូនេស៊ី បានចេញក្រឹត្យមួយកាលពីដើមខែនេះ ដែលលុបចោលការចូល ដោយគ្មានទិដ្ឋាការ សម្រាប់ប្រទេសមិនមែនសមាជិកអាស៊ាន ដែលឥឡូវចូលជាធរមាន។

ចំណាត់ការនេះ ធ្វើឡើងបន្ទាប់ពីអាជ្ញាធរ បើកការបង្រ្កាបភ្ញៀវទេសចរណ៍ ដែលប្រព្រឹត្តទង្វើមិនសមរម្យជាមួយមន្ត្រី ប្រព្រឹត្តបទឧក្រិដ្ឋ ជិះម៉ូតូអត់ពាក់មួកសុវត្ថិភាព ឬថតស្រាតថតរូបនៅកន្លែងពិសិដ្ឋ។
យោងតាមសេចក្តីថ្លែងការណ៍របស់ក្រសួងបានឱ្យដឹងថា ក៏មានហានិភ័យ នៃជំងឺដែលបង្កឡើងដោយមនុស្ស មកពីប្រទេសដែលមិនត្រូវបានទទួលស្គាល់ថា គ្មានជំងឺដោយអង្គការសុខភាពពិភពលោកផងដែរ។ ដូច្នេះឥឡូវនេះ អ្នកទេសចរទាំងអស់ ត្រូវតែទទួលបានទិដ្ឋា ការពីបេសកកម្មឥណ្ឌូនេស៊ីនៅក្រៅប្រទេស ឬតាមអ៊ីនធឺណិត។

ក្រសួងបានបន្ថែមថា “តាមរយៈការបញ្ឈប់ជាបណ្តោះអាសន្នលើការចូលទស្សនាដោយគ្មានទិដ្ឋាការ រដ្ឋាភិបាលក៏គ្រោងកាត់បន្ថយហានិភ័យ ដែលអាចកើតមានទាក់ទងនឹងបុគ្គល ដែលចូលមកប្រទេសឥណ្ឌូនេស៊ី ដោយមិនមានការត្រួតពិនិត្យ និងឯកសារត្រឹមត្រូវផងដែរ”។

ប្រទេសឥណ្ឌូនេស៊ី បានលើកលែងតម្រូវការទិដ្ឋាការ សម្រាប់អ្នកធ្វើដំណើរមកពីប្រទេសចំនួន១៦៩ រួមទាំងប្រទេសអាស៊ានចំនួន១០ ចាប់តាំងពីឆ្នាំ២០១៦។ ទោះបីជាយ៉ាងណាក្តី ការលើកលែងទិដ្ឋាការនេះ ត្រូវបានផ្អាកសម្រាប់ប្រទេសទាំងអស់ លើកលែងតែប្រទេសអាស៊ានទាំង១០ប៉ុណ្ណោះ៕

1...884885886...3,256 Page 885 of 3,256