ដោយ៖ សហការី

ខេត្តព្រះសីហនុ៖ ព្រឹកថ្ងៃទី២៤ ខែវិច្ឆិកា ឆ្នាំ២០២៥ លោក ឯម ភាព អភិបាលរងខេត្តព្រះសីហនុ បានអញ្ជើញចូលរួមកិច្ចប្រជុំក្រុមការងារ ដើម្បីពិនិត្យលើការស្នើការលើកទឹកចិត្ត ការអនុគ្រោះការសម្រួលនីតិវិធី និងការសម្របសម្រួលដោះស្រាយវិវាទរបស់គម្រោងវិនិយោគ និង ធុរកិច្ចក្នុងខេត្តព្រះសីហនុ ក្រោមអធិបតីភាព ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ។

ជាលទ្ធផល អង្គប្រជុំបានសម្រេចជាគោលការណ៍ផ្តល់ការលើកទឹកចិត្តពិសេសជូនគម្រោងចំនួន ១៩ ដែលមានទុនវិនិយោគប៉ាន់ស្មានសរុប ២៧៦ លានដុល្លារអាមេរិក និង អាចបង្កើតការងារប្រមាណ ១ ៨៤៥ កន្លែង ក្នុងនោះ គម្រោងពាក់ព័ន្ធនឹងអគារកំពុងជាប់គាំង ចំនួន ៧ និងគម្រោងថ្មី ចំនួន ១២ ។ គម្រោងទាំងនេះ រួមមានគម្រោងសណ្ឋាគារ អគារពហុមុខងារ រោងចក្រផលិតឧបករណ៍ជួសជុលរថយន្ត សិប្បកម្មផលិតក្តារបន្ទះ រោងច្រកផលិតគ្រឿងសង្ហារឹម រោងចក្រផលិតដំណាប់ផ្លែឈើ និងកែច្នៃគ្រាប់ធញ្ញជាតិ និង គម្រោងរោងចក្រផលិតទឹកស្អាត និង ផ្គត់ផ្គង់អគ្គិសនី។

សូមជម្រាបជូនថា ចាប់តាំងពីឆ្នាំ ២០២៤ រហូតដល់ខែតុលា ឆ្នាំ២០២៥ ក្រុមការងារបានសម្រេចជាគោលការណ៍ផ្តល់ការលើកទឹកចិត្តពិសេស ជូនគម្រោងចំនួន ៣៩២ ដែលមានទុនវិនិយោគប៉ាន់ស្មានសរុប ៧ ៨៧១ លានដុល្លារអាមេរិក និងប៉ាន់ស្មានអាចបង្កើតការងារបាន ៥០ ៦៧០ កន្លែង ក្នុងនោះ គម្រោងពាក់ព័ន្ធនឹងអគារកំពុងជាប់គាំងមាន ចំនួន ១៨៦ គម្រោងថ្មីមាន ចំនួន ១៦៦ គម្រោងពង្រីកមានចំនួន ២៥ និង គម្រោងមានស្រាប់ចំនួន ១៥។

ឯកឧត្តមបណ្ឌិតសភាចារ្យ បានវាយតម្លៃខ្ពស់ និង ថ្លែងអំណរគុណដល់ក្រុមការងារ ដែលបានបន្តអនុវត្តកម្មវិធីពិសេសនេះ យ៉ាងសស្រាក់សស្រាំប្រកបដោយទំនួលខុសត្រូវខ្ពស់ និងប្រកាន់ខ្ជាប់នូវអភិក្រម «ជវភាពនៃប្រព័ន្ធតួអង្គតែមួយ» ក្នុងរយៈពេលជិត ២ ឆ្នាំកន្លងមកនេះ។ ជាមួយនេះឯកឧត្តមបណ្ឌិតសភាចារ្យ បានគូសបញ្ជាក់អំពីកិច្ចសហការយ៉ាងសកម្មរវាងក្រសួងស្ថាប័នពាក់ព័ន្ធដែលបានបង្កើន និង ពង្រឹងការវិនិយោគនៅក្នុងខេត្តព្រះសីហនុ តាមរយៈការងារគន្លឹះចំនួន ៤ ៖ ១). ការលើកទឹកចិត្តផ្នែកពន្ធ និងការសម្របសម្រួលផ្នែករដ្ឋបាល ២). ការជំរុញការវិនិយោគប្រកបដោយគុណភាព ៣). ការប្រើប្រាស់កម្លាំងពលកម្មក្នុងស្រុក និងការផ្ទេរជំនាញ និង ៤). ការប្រើប្រាស់វត្ថុធាតុដើមក្នុងស្រុក។លើសពីនេះឯកឧត្តមបណ្ឌិតសភាចារ្យ បានគូសបញ្ជាក់អំពីចំណុចពិសេស នៃកម្មវិធីពិសេសរបស់រាជរដ្ឋាភិបាល ដែលត្រូវអនុវត្តជាគំរូ សម្រាប់ទាក់ទាញ និងថែទាំវិនិយោគ ដើម្បីចូលរួមចំណែកអភិវឌ្ឍខេត្តព្រះសីហនុ ឱ្យក្លាយទៅជាទីតាំងវិនិយោគពហុបំណង និងប្រកបដោយយុទ្ធសាស្ត្រ។

ដោយៈ ម៉ាលីនណា

    ពោធិ៍សាត់ៈ រដ្ឋាភិបាលបាននិងកំពុងអភិវឌ្ឍន៍ទំនប់ទឹកធំជាងគេនៅទូទាំងប្រទេស ដែលគិតមកទល់ពេលនេះ ការសាងសង់សម្រេចបានប្រមាណ៤០ភាគរយហើយ។

យោងតាមព័ត៌មានផ្លូវការ ដែលបានបង្ហោះដោយសម្តេចមហាបវរធិបតីហ៊ុន ម៉ាណែទនាយករដ្ឋមន្រ្តីនៃកម្ពុជា កាលពីថ្ងៃទី២៤ វិច្ឆិកាបានឲ្យដឹងថា គម្រោងអភិវឌ្ឍន៍ទំនប់អាងទឹកលេខ២ អាចមានសមត្ថភាពស្តុកទឹក បានប្រមាណ​៨៦០លានម៉ែត្រគូប នឹងក្លាយជាអាងស្តុកទឹកដែលធំជាងគេនៅកម្ពុជា​ មានទីតាំងស្ថិតនៅលើស្ទឹងប្រម៉ោយ ក្នុងឃុំរកាត ស្រុកភ្នំក្រវាញ ខេត្តពោធិ៍សាត់។

ទំនប់អាងទឹកលេខ២ នឹងផ្ដល់នូវអត្ថប្រយោជន៍សំខាន់ៗមួយចំនួន រួមមាន ទី១/ អាចស្តុកទឹកបាន៨៦០លានម៉ែត្រគូប និងអាចស្រោចស្រពលើផ្ទៃដីចំនួន២៦២,៥០០ហិកតា ដែលនឹងផ្តល់ទឹកប្រើប្រាស់គ្រប់គ្រាន់ ពង្រីកវិសាលភាពវិស័យកសិកម្ម បន្ថែមទាំងរដូវប្រាំង និងរដូវវស្សា។

ទី២/ កាត់បន្ថយបាននូវការជន់លិចលង់ នៅផ្នែកខាងក្រោមទំន ប់ក្នុងភូមិសាស្ត្រខេត្តពោធិ៍សាត់ ដែលតែងតែបង្កគ្រោះមហន្តរាយកន្លងមក។

ទី៣/ បញ្ចៀសបាននូវការខូចខាតប្រព័ន្ធធារាសាស្រ្ត និងហេដ្ឋារចនាសម្ព័ន្ធនានា ដែលបណ្តាលមកពីទឹកជំនន់ និងទី៤ ក្លាយជាតំបន់ទេសចរណ៍ធម្មជាតិដ៏មានសក្តានុពល ។

គិតត្រឹមចុងខែវិច្ឆិកា ឆ្នាំ២០២៥ គម្រោងនេះសម្រេចបានប្រមា​ណ៤០% ដោយបានចាប់ផ្តើមអនុវត្តន៍ក្នុងខែមករា ឆ្នាំ២០២៥ ហើយគ្រោងបញ្ចប់នៅក្នុងខែធ្នូ ឆ្នាំ២០២៧៕

តើផ្លែឈើមានសារៈប្រយោជន៍បែបណាសម្រាប់សុខភាពរបស់អ្នកហេតុអ្វីត្រូវទទួលទានវារាល់ថ្ងៃ?

    ដោយៈ ម៉ាណា

    ភ្នំពេញៈ ការញ៉ាំផ្លែឈើជាទម្លាប់ប្រចាំថ្ងៃ ពិតជាល្អណាស់សម្រា​ប់សុខភាពរបស់អ្នក ព្រោះផ្លែឈើផ្តល់នូវសារធាតុចិញ្ចឹមសំខាន់ៗដែលរាងកាយរបស់អ្នកត្រូវការជារៀងរាល់ថ្ងៃ។

ហេតុអ្វីបានជាផ្លែឈើល្អសម្រាប់សុខភាពរបស់អ្នក

1. សម្បូរវីតាមីន

ផ្លែឈើផ្តល់វីតាមីនដូចជា៖

• វីតាមីនC (ក្រូច ផ្លែត្របែក ម្នាស់) ដែលជួយជំរុញភាពស៊ាំ។
• វីតាមីន A (ស្វាយ ផ្លែល្ហុង) ល្អសម្រាប់ភ្នែក និងស្បែក
• វីតាមីនB មានសារធាតុជួយផលិតថាមពល

2. សម្បូរជាតិសរសៃ

ជាតិសរសៃជួយ៖

• ធ្វើអោយប្រសើរឡើងនូវការរំលាយអាហារ
• ការពារការទល់លាមក
• គ្រប់គ្រងជាតិស្ករក្នុងឈាម
• កាត់បន្ថយកូឡេស្តេរ៉ុល

3. សារធាតុប្រឆាំងអុកស៊ីតកម្មខ្លាំង

ផ្លែឈើដូចជាផ្លែប៊ឺរី ផ្លែស្រកានាគ ផ្លែត្របែក និងទំពាំងបាយជូរជួយ៖

• ប្រឆាំងនឹងការរលាក
• កាត់បន្ថយការខូចខាតកោសិកា
• បន្ថយភាពចាស់

4. ល្អសម្រាប់សុខភាពបេះដូង

ផ្លែឈើជាច្រើនជួយគាំទ្រដល់បេះដូង ដែលមានសុខភាពល្អ ជាពិសេស៖

• ចេក (ប៉ូតាស្យូម)
• ផ្លែបឺរ (ខ្លាញ់ដែលមានសុខភាពល្អ)
• ទំពាំងបាយជូរ (សារធាតុប្រឆាំងអុកស៊ីតកម្ម)

5. ជួយគ្រប់គ្រងទម្ងន់

ផ្លែឈើមានកាឡូរីទាប និងសម្បូរជាតិទឹក  ដែលជួយអ្នកឱ្យមានអារម្មណ៍ឆ្អែត ប៉ុន្តែមិនឡើងទម្ងន់។

ប្រភេទផ្លែឈើល្អបំផុតដែលលោក អ្នកត្រូវញ៉ាំជាប្រចាំ

• ផ្លែស្វាយ
• ចេក
• ផ្លែល្ហុង
• ផ្លែស្រកានាគ
• ស្វាយ
• ក្រូច
• ផ្លែប៉ោម
• ឪឡឹក

តើត្រូវញ៉ាំផ្លែឈើប៉ុន្មានក្នុងមួយថ្ងៃ?

យោងតាមរបាយការណ៍របស់ អង្គការសុខភាពពិភពលោកណែនាំដូចជា

លោក អ្នកគួរពិសារឬទទួលទានចំនួន២ ទៅ៣ចំណែកក្នុងមួយថ្ងៃ។

១ ចំណែក ≈ ផ្លែប៉ោម ១ ផ្លែ ចេក ១ ផ្លែ ឬផ្លែឈើហាន់ ១ ពែង)៕

ក្រុមប្រឹក្សាអភិវឌ្ឍន៍កម្ពុជា៖ នាព្រឹកថ្ងៃចន្ទ ទី២៤ ខែវិច្ឆិកា ឆ្នាំ២០២៥ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានទទួលជួបគណៈប្រតិភូមជ្ឈមណ្ឌលស្រាវជ្រាវសេដ្ឋកិច្ចអាស៊ាននិងអាស៊ីបូព៌ា (ERIA) ដឹកនាំដោយលោក YAMADA Yasuhiro មន្ត្រីជាន់ខ្ពស់ផ្នែកគោលនយោបាយ ដើម្បីធ្វើការរាយការណ៍ជូនអំពីវឌ្ឍនភាពនៃការសិក្សាសមិទ្ធិលទ្ធភាព នៃគម្រោងអភិវឌ្ឍន៍តំបន់សេដ្ឋកិច្ចពិសេសបៃតង កម្ពុជា-ជប៉ុន។

ជំនួបនេះបានគូសបញ្ជាក់ពីកិច្ចខិតខំប្រឹងប្រែងរួមគ្នារវាងរាជរដ្ឋាភិបាលកម្ពុជា និង ERIA ក្នុងការជំរុញការអភិវឌ្ឍន៍សេដ្ឋកិច្ចប្រកបដោយចីរភាព និងបរិស្ថានល្អ ដែលស្របទៅតាមយុទ្ធសាស្ត្របញ្ចកោណរបស់កម្ពុជា។ ភាគីទាំងពីរបានពិភាក្សាផ្លាស់ប្ដូរទស្សនៈយ៉ាងស៊ីជម្រៅលើចំណុចគន្លឹះនានា ដើម្បីធានាថា គម្រោងអភិវឌ្ឍន៍តំបន់សេដ្ឋកិច្ចពិសេសបៃតងនេះ នឹងអាចរួមចំណែកទាក់ទាញការវិនិយោគផ្ទាល់ពីបរទេសប្រកបដោយគុណភាពខ្ពស់ ព្រមទាំងផ្ដល់នូវឱកាសការងារ និងការផ្ទេរបច្ចេកវិទ្យាទំនើបពាក់ព័ន្ធ ដែលនឹងចូលរួមជំរុញកំណើនសេដ្ឋកិច្ចជាតិស្របតាមស្តង់ដារអភិវឌ្ឍន៍បៃតងជាសកល។

ឆ្លៀតក្នុងឱកាសនេះ លោកឧបនាយករដ្ឋមន្ត្រី បានគូសបញ្ជាក់អំពីកាលានុវត្តភាពថ្មីនៃការវិនិយោគនៅកម្ពុជា ជាពិសេស ភាពជោគជ័យនៃកិច្ចព្រមព្រៀងពាណិជ្ជកម្មបដិការជាមួយសហរដ្ឋអាម៉េរិក ដោយបានបញ្ជាក់ថា កម្ពុជាគឺជាប្រទេសដំបូងគេបង្អស់លើពិភពលោកដែលបានចុះហត្ថលេខាលើកិច្ចព្រមព្រៀងពាណិជ្ជកម្មបដិការនេះជាមួយអាម៉េរិក ដែលបានផ្ដល់ភាពច្បាស់លាស់ និងទំនុកចិត្តខ្ពស់សម្រាប់វិនិយោគិនបរទេស រួមទាំងវិនិយោគិនជប៉ុនផងដែរ ក្នុងការនាំចេញផលិតផលទៅកាន់ទីផ្សារដ៏ធំរបស់សហរដ្ឋអាម៉េរិក។ បន្ថែមពីនេះ លោកក៏បានគូសបញ្ជាក់ពីសារៈសំខាន់ជាយុទ្ធសាស្ត្រនៃ គម្រោងព្រែកជីកហ្វូណនតេជោ ដែលនឹងចូលរួមចំណែកយ៉ាងសំខាន់ក្នុងការសម្រួលលំហូរភស្តុភារកម្ម កាត់បន្ថយថ្លៃដើមដឹកជញ្ជូន និងធានាបាននូវការតភ្ជាប់ផ្លូវទឹកប្រកបដោយប្រសិទ្ធភាព។

លោកឧបនាយករដ្ឋមន្ត្រី បានធ្វើការវាយតម្លៃខ្ពស់ចំពោះការគាំទ្រ និងការចូលរួមយ៉ាងសកម្មរបស់ ERIA ក្នុងការសិក្សាដ៏មានសារៈសំខាន់នេះ ដែលនឹងក្លាយជាមូលដ្ឋានគ្រឹះសម្រាប់ការសម្រេចចិត្តលើការអនុវត្តគម្រោងនាពេលអនាគត ព្រមទាំងបានសម្តែងនូវអំណរគុណចំពោះកិច្ចសហប្រតិបត្តិការដ៏ល្អរបស់ ERIA និងបានលើកទឹកចិត្តឱ្យក្រុមការងារបន្តកិច្ចសហការឱ្យបានជិតស្និទ្ធជាមួយក្រុមប្រឹក្សាអភិវឌ្ឍន៍កម្ពុជា ដើម្បីឱ្យគម្រោងនេះអាចបន្តបោះជំហានទៅមុខដោយរលូន និងប្រកបដោយប្រសិទ្ធភាពខ្ពស់៕

ដោយៈ គង់ សូរិយា

    ភ្នំពេញៈ ប្រតិភូវិនិយោគមកពីទីក្រុងរួយលី ខេត្តយូណានប្រទេ​សចិនបានបង្ហាញពីចំណាប់អារម្មណ៍ លើការវិនិយោគនៅកម្ពុជា។

ព័ត៌មាននេះត្រូវបានលើកឡើងនៅពេល អ្នកឧកញ៉ា លី ឃុនថៃ អនុប្រធានសភាពាណិជ្ជកម្មកម្ពុជា តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានទទួលជួបពិភាក្សាការងារជាមួយ គណៈប្រតិភូទីក្រុងរួយលី (Ruili) ខេត្តយូណាន ប្រទេសចិន ដែលដឹកនាំដោយ លោកម៉ៅ ស៊ាវ (Mao Xiao) លេខាធិការនៃគណៈកម្មាធិការទីក្រុងរួយលី និងជាសមាជិកគណៈកម្មាធិការអចិន្ត្រៃយ៍នៃតំបន់ស្វយ័តតឺហុង ដៃ និងជីងផ (Dehong Dai and Jingpo)។

ក្នុងឱកាសនៃជំនួបពិភាក្សានោះ លោក ម៉ៅ ស៊ាវ បានបញ្ជាក់ថា គោលបំណងសំខាន់នៃដំណើរទស្សនកិច្ចមកកម្ពុជា គឺដើម្បីស្វែងយល់ពីកាលានុវត្តភាពវិនិយោគ គោលនយោបាយលើកទឹកចិត្តរបស់រាជរដ្ឋាភិបាលកម្ពុជា ក៏ដូចជា ស្ថានភាពនៃកម្លាំងពលកម្ម និងទីតាំងសក្តានុពលសម្រាប់បង្កើតរោងចក្រ។

លោកសង្កេតឃើញថា ក្នុងរយៈពេលប៉ុន្មានឆ្នាំចុងក្រោយនេះ មានកំណើនវិនិយោគិនចិន មកកម្ពុជាគួរឱ្យកត់សម្គាល់ ក្នុងនោះវិនិយោគិនទីក្រុងរួយលី ក៏កំពុងសម្លឹងមើលទីផ្សារថ្មីនៅអាស៊ីអាគ្នេយ៍ រួមមានទាំងកម្ពុជាផងដែរ។ ទន្ទឹមនឹងនេះ ដំណើរទស្សនកិច្ចរបស់គណៈប្រតិភូ ក៏មានគោលដៅចូលរួមផ្សព្វផ្សាយ និងលើកកម្ពស់គោលនយោបាយ “ផ្លូវមួយ ខ្សែក្រវាត់មួយ” ផងដែរ។

ជាកិច្ចឆ្លើយតប អ្នកឧកញ៉ា លី ឃុនថៃ បានស្វាគមន៍យ៉ាងកក់ក្តៅចំពោះដំណើរទស្សនកិច្ច របស់គណៈប្រតិភូទីក្រុងរួយលីមកកាន់ព្រះរាជាណាចក្រកម្ពុជា។

អ្នកឧកញ៉ា បានគូសបញ្ជាក់ពី “មិត្តភាពដែកថែប” ដ៏យូរអង្វែងរវាងកម្ពុជា និងចិន ដោយកត់សម្គាល់ថា ទំនាក់ទំនងនេះបានរីកចម្រើនទៅជាភាពជាដៃគូ យុទ្ធសាស្ត្រគ្រប់ជ្រុងជ្រោយ។ ក្នុងនោះ ទីក្រុងរួយលី គឺជាច្រកទ្វារយុទ្ធសាស្រ្តដ៏សំខាន់ របស់ប្រទេសចិនទៅកាន់តំបន់អាស៊ីអាគ្នេយ៍ និងជាតំណភ្ជាប់សេដ្ឋកិច្ចដ៏សំខាន់នៅក្នុងច្រករបៀងសេដ្ឋកិច្ចរវាងប្រទេសទាំងពីរ។

អ្នកឧកញ៉ាបានចាត់ទុកកិច្ចប្រជុំនេះថា “ជាជំហានដ៏សំខាន់មួយក្នុងការអនុវត្តចក្ខុវិស័យរួម សម្រាប់កិច្ចសហប្រតិបត្តិការសេដ្ឋកិច្ចប្រក​បដោយគុណភាពខ្ពស់”។

បន្ថែមពីនេះ អ្នកឧកញ៉ា ក៏បានអញ្ជើញអ្នកវិនិយោគមកពីក្រុងរួយលី ឱ្យមកទាញយកអត្ថប្រយោជន៍ ពីបរិយាកាសធុរកិច្ចអំណោយផលរបស់កម្ពុជា ដែលមានស្ថិរភាពនយោបាយ កម្លាំងពលកម្មវ័យក្មេងដែលមានសមត្ថភាពប្រកួតប្រជែង និងជាច្រកចូលយុទ្ធសាស្ត្រទៅកាន់ទីផ្សារអាស៊ានដ៏ទូលំទូលាយ។

កិច្ចពិភាក្សាបានផ្តោតសំខាន់ លើការស្វែងរកកាលានុវត្តភាព និងកិច្ចសហប្រតិបត្តិការ លើវិស័យសក្តានុពលនានា ជាពិសេសវិស័យ៖ ១. អេឡិចត្រូនិក និងទូរគមនាគមន៍ ២. វាយនភណ្ឌ និងកាត់ដេរ ៣. កសិកម្មទំនើប ៤. ទេសចរណ៍ ៥. វិស័យកម្មន្តសាល៕

ដោយៈ ម៉ាលីនណា

    ភ្នំពេញៈ ក្រុមមន្រ្តីជំនាញកម្ពុជា និងអូស្រ្តាលី បានបើកកិច្ចប្រជុំពិនិត្យ ពិភាក្សាជាមួយក្រុមការងារបច្ចេកទេស លើសេចក្តីព្រាងការធ្វើបច្ចុប្បន្នភាពបទដ្ឋានបច្ចេកទេស សម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ជាមួយក្រុមការងារបច្ចេកទេស P4I & Austroads នៃប្រទេសអូស្រ្តាលី។

កិច្ចប្រជុំនេះធ្វើឡើងក្រោមអធិបតីភាព លោកយិត បុណ្ណា រដ្ឋលេ​ខា​ធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យពិភាក្សា និងបិទកម្មវិធីបេសកកម្មទី១២ ជាមួយ(Steering Committee) និងក្រុមការងារបច្ចេកទេស (Technical Working Group) លើសេចក្តីព្រាងការធ្វើបច្ចុប្បន្នភាព បទដ្ឋានបច្ចេកទេស សម្រាប់ប្រើប្រាស់ ក្នុងវិស័យហេដ្ឋារចនាសម្ព័ន្ធផ្លូវថ្នល់ ជាមួយក្រុមការងារបច្ចេកទេស P4I & Austroads នៃប្រទេសអូស្រ្តាលី ដោយមានការចូលរួមពីថ្នាក់ដឹកនាំក្រសួង និងមន្រ្តីបច្ចេកទេសផងដែរ។

កិច្ចប្រជុំនេះត្រូវបានរៀបចំឡើង ក្នុងគោលបំណងដើម្បីពិភាក្សាទៅលើបទដ្ឋានបច្ចេកទេសថ្មី ដែលចេញពីចំណងកិច្ចសហប្រតិបត្តិការរវាងកម្ពុជា-អូស្ត្រាលី និងកិច្ចខិតខំប្រឹងប្រែងរួមគ្នា ក្នុងការរៀបចំកែសម្រួល និងធ្វើបច្ចុប្បន្នភាពបទដ្ឋានបច្ចេកទេស តាំងពីឆ្នាំ២០០០ ដើមី្បឆ្លើយតប នឹងតម្រូវការនាពេលបច្ចុប្បន្ន ក្នុងវិស័យហេដ្ឋារចនាសម្ព័ន្ធផ្លូវ និងស្ពានក្នុងព្រះរាជាណាចក្រកម្ពុជា។

ជាមួយគ្នានោះផងដែរ លោករដ្ឋលេខាធិការ បានថ្លែងអំណរគុណ ដល់ការខិតខំប្រឹងប្រែងរបស់ក្រុមការងារ និងមន្រ្តីបច្ចេកទេសទាំងអស់ ព្រមទាំងក្រុមការងារបច្ចេកទេស P4I & Austroads នៃប្រទេសអូស្រ្ដាលី ដែលបានសហការគ្នាយ៉ាងជិតស្និទ្ធ ក្នុងគោលដៅសម្រេចឱ្យបាន នូវការរៀបចំបទដ្ឋានបច្ចេកទេស សម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ប្រកបដោយគុណភាព និងប្រសិទ្ធភាពខ្ពស់៕