ដោយ: គង់ លាងហួរ

តូក្យូ: ប្រទេសជប៉ុគ្រោងបន្ធូរបន្ថយច្បាប់ព្រំដែន សម្រាប់ភ្ញៀវទេសចរចិននៅដើមខែមេសា ដោយអនុញ្ញាតឱ្យចូល ដោយគ្មានការធ្វើតេស្តមេរោគជាមុន ប្រសិនបើពួកគេត្រូវបាន ចាក់វ៉ាក់សាំងយ៉ាងហោចណាស់ចំនួន៣ដងរួចមក។

នេះបើយោងតាមការចុះផ្សាយ ដោយបណ្តាញសារព័ត៌មាន Fuji News (FNN) បានរាយការណ៍ឱ្យដឹង កាលពីថ្ងៃព្រហស្បតិ៍ ទី៣០ ខែមីនា។

វិធានការនេះអាចត្រួសត្រាយផ្លូវ សម្រាប់ការវិលត្រឡប់មកវិញនៃភ្ញៀវទេសចរចិនកាន់តែច្រើន ដែលធ្លាប់បានទៅទស្សនាប្រទេសជប៉ុនក្នុងចំនួនដ៏ច្រើន មុនពេលការរីករាលដាលនៃជំងឺកូវីដ-១៩ ក្នុងឆ្នាំ ២០២០ និងជួយកសាងឡើងវិញ នូវឧស្សាហកម្មទេសចរណ៍ ដែលជាសសរស្តម្ភនៃសេដ្ឋកិច្ចជាតិ។

ភ្ញៀវទេសចរចិនបច្ចុប្បន្ន ត្រូវឆ្លងកាត់ការធ្វើតេស្តរកមេរោគមុនពេលមកដល់ប្រទេសជប៉ុន និងបង្ហាញភស្តុតាងថា ពួកគេមិនបានឆ្លងមេរោគ ប៉ុន្តែវិធានការនេះនឹងត្រូវផ្លាស់ប្តូរ ដើម្បីផ្គូផ្គងលក្ខណៈវិនិច្ឆ័យសម្រាប់ភ្ញៀវ មកពីបណ្តាប្រទេសផ្សេងទៀត ដោយបង្ហាញភស្តុតាងថា ពួកគេបានចាក់វ៉ាក់សាំង៣ដងឬច្រើនជាងនេះ។

សារពត៌មាន FNN បានរាយការណ៍ឱ្យដឹងទៀតថា ការផ្លាស់ប្តូរនេះ អាចចូលជាធរមានចាប់ពីដើម ខែមេសាខាងមុខនេះ ដោយដកស្រង់ប្រភពរដ្ឋាភិបាល ទោះបីជាការធ្វើតេស្តចៃដន្យ នៅពេលមកដល់អាចនៅតែធ្វើឡើងយ៉ាងណាក្តី។

ចំនួនភ្ញៀវទេសចរទៅកាន់ប្រទេសជប៉ុន បានកើនឡើងក្នុងរយៈពេលប៉ុន្មានខែថ្មីៗនេះ ប៉ុន្តែទីភ្នាក់ងារទេសចរណ៍ជាតិបានអះអាងថា តួលេខកាលពីខែមុន នៅតែធ្លាក់ចុះ៤៦ភាគរយ បើធៀបនឹងខែកុម្ភៈ ឆ្នាំ២០១៩៕

ដោយៈ សុខុម

ភ្នំពេញ: មន្រ្តីជាន់ខ្ពស់ក្រសួងពាណិជ្ជកម្ម បាននិយាយកាលពីថ្ងៃសុក្រ ទី៣១ ខែមីនា ថា ពិព័រណ៍ចិន-អាស៊ាន (China-ASEAN Expo) លើកទី២០ ដែលនឹងធ្វើឡើងក្នុងពេលដ៏ខ្លីខាងមុខ គឺជាវេទិកាដ៏មានសារៈសំខាន់មួយ សម្រាប់ពាណិជ្ជកម្ម និងការវិនិយោគរវាងប្រទេសចិន និងអាស៊ាន។

ពិព័រណ៍នេះដែលរួមជាមួយ នឹងព្រឹត្តិការណ៍បន្ទាប់បន្សំមួយចំនួនទៀតដូចជាវេទិកាធុរកិច្ច ការវិនិយោគ និងទេសចរណ៍កម្ពុជា-ចិន (Cambodia-China Business, Investment and Tourism Forum) និងវេទិកាធុរកិច្ច និងវិនិយោគចិន-អាស៊ាន (China-ASEAN Business and Investment Forum) នឹងប្រព្រឹត្តទៅចាប់ពីថ្ងៃទី១៦ ខែកញ្ញា ដល់ថ្ងៃទី២០ ខែកញ្ញា នៅទីក្រុងណាននីង (Nanning) នៃតំបន់ស្វយ័តគ័ងស៊ី ជ័ង (Guangxi Zhuang) ប្រទេសចិន ភាគខាងត្បូង។

ក្រសួងពាណិជ្ជកម្មបានចេញសេចក្តីថ្លែងការណ៍ថា “ដើម្បីស្តារ និងលើកកម្ពស់សកម្មភាពធុរកិច្ច និងការវិនិយោគក្នុងយុគសម័យក្រោយវិបត្តិកូវីដ-១៩ ក្រសួងពាណិជ្ជកម្មក្នុងនាម ជាសហអ្នករៀបចំពិព័រណ៍នេះ សូមគោរពអញ្ជើញពាណិជ្ជករ សហគ្រិន អ្នកវិនិយោគ អ្នកផ្តល់សេវាកម្ម និងផលិតករមកចូលរួមក្នុងពិព័រណ៍នេះ”។

សេចក្ដីថ្លែងការណ៍ដដែលគូសបញ្ជាក់ថា ពិព័រណ៍នេះនឹងជាឱកាសដ៏ល្អសម្រាប់ពាណិជ្ជករកម្ពុជា ក្នុងការតភ្ជាប់ឡើងវិញជាមួយពាណិជ្ជករចិន និងអាស៊ាន។

លោកឈួន ដារ៉ា រដ្ឋមន្រ្តីប្រតិភូអមនាយករដ្ឋម​ន្រ្តី និងជារដ្ឋលេខាធិការក្រសួងពាណជ្ជកម្មមានប្រសាសន៍ថា ពិព័រណ៍នេះគឺជាព្រឹត្តិការណ៍ពាណិជ្ជកម្ម ប្រចាំឆ្នាំដ៏ធំបំផុតរវាងប្រទេសចិន និងអាស៊ាន ហើយថា វាបានទាក់ទាញអ្នកតាំងពិព័រណ៍ និងអ្នកទស្សនាកាន់តែច្រើនក្នុងរយៈពេលប៉ុន្មានឆ្នាំចុងក្រោយនេះ។

លោក ឈួន ដារ៉ា បានលើកឡើងក្នុងវេទិកានាពេលថ្មីៗនេះថា “ពិព័រណ៍នេះ នឹងជាឱកាសដ៏ល្អសម្រាប់ផលិតផលកម្ពុជា ចូលទៅកាន់ទីផ្សារចិន និងអាស៊ាន។ វាក៏ជាឱកាសដ៏ល្អមួយ ក្នុងការទាក់ទាញអ្នកវិនិយោគពីប្រទេសចិន និងអាស៊ាន មកកាន់កម្ពុជាបន្ថែមទៀតផងដែរ”៕ Xinhua៕

ដោយៈ វឌ្ឍនៈ

ភ្នំពេញៈ ខេត្តកណ្ដាលជាខេត្ត ដែលព័ទ្ធជុំវិញរាជធានីភ្នំពេញ និងមានចំងាយមិនឆ្ងាយពីរាជធានីភ្នំពេញ ដោយបច្ចុប្បន្នមានប្រជាជនជាច្រើនបានទៅរស់នៅក្នុងខេត្តនេះ ក្នុងនោះក៏មានប្រជាពលរដ្ឋដែលធ្វើការនៅភ្នំពេញ ហើយបានត្រលប់ទៅសម្រាកនៅផ្ទះ នៅពេលយប់ដែរ។

លំហូរប្រជាសាស្រ្តនេះ បានជំរុញឱ្យកំណើនប្រជាជនក្នុងខេត្តកណ្ដាលកាន់ច្រើន និងធ្វើឱ្យវិនិយោគិន ចូលទៅបណ្ដាក់ទុនវិនិយោគកាន់តែច្រើនផងដែរ។

លោកគង់ សោភ័ណ្ឌ អភិបាលខេត្តកណ្ដាលបានមានប្រសា​សន៍ថា បច្ចុប្បន្ននេះ ខេត្តកណ្ដាលបាន និងកំពុងសាងសង់ហេដ្ឋារចនាសម្ព័ន្ធថ្មីៗជាច្រើន ហើយការសាងសង់ហេដ្ឋារចនាសម្ព័ន្ធនេះដែរ ក៏ត្រៀមឆ្លើយតប ទៅនឹងកំណើនប្រជាជន ដែលនឹងទៅរស់នៅក្នុងខេត្តកណ្ដាល ហើយលោកក៏បានអំពាវនាវឱ្យប្រជាជនមិនថា នៅភ្នំពេញ ឬមកបណ្ដាខេត្តនានា អាចចូលមករស់នៅក្នុងខេត្តកណ្ដាលបន្ថែមទៀត ពីព្រោះថានៅពេលមានមនុស្ស ទៅរស់នៅកាន់តែច្រើន នឹងមានការវិនិយោគឬ ក៏ដូចជាការអភិវឌ្ឍបន្ថែមទៀត។

លោកបន្តថា “ខេត្តកណ្ដាលអាចចាត់ទុក ជាខេត្តដែលមានចំនួនប្រជាជនច្រើនជាងគេ បន្ទាប់ពីរាជធានីភ្នំពេញ ហើយការអភិវឌ្ឍក្នុងខេត្តកណ្ដាល ក៏ឃើញថាមានច្រើនផងដែរ”។លោកបន្តថា “មានការអភិវឌ្ឍលើគម្រោងលំនៅឋាន និងមានការអភិវឌ្ឍទៅតំបន់ពាណិជ្ជកម្មបានកើនឡើងជាបន្ត​បន្ទាប់ផងដែរ”។

លោកគង់ សោភ័ណ្ឌបានបន្តថា អ្វីដែលពិសេសនោះ ខេត្តកណ្ដាល មានក្រុងរហូតដល់ទៅ៤ ដូចជា ក្រុងតាខ្មៅ ក្រុងសំពៅពូន និងក្រុងអរិយក្សត្រ និងក្រុងឧត្តុងម៉ែជ័យ ដែលការបង្កើតក្រុងថ្មីៗនេះ នឹងទាក់ទាញមនុស្សទៅរស់នៅកាន់តែច្រើន និងទាក់ទាញការអភិ​វឌ្ឍលើគម្រោងផ្សេងៗកាន់តែច្រើន ។

លោកឧកញ៉ាបណ្ឌិតគីម ហ៊ាង ប្រធានក្រុមហ៊ុន KW Cambodia បានលើកឡើងកន្លងមកថា ខេត្តកណ្ដាល ជាខេត្តមួយមានអំណាចទិញអចលនទ្រព្យ ជាពិសេសលំនៅឋានខ្លាំង បន្ទាប់ពីភ្នំពេញ ពីព្រោះថានៅពេលភ្នំពេញ កាន់តែចង្អៀតលើការអភិវឌ្ឍ នោះវិនិយោគិន នឹងចាប់ផ្ដើមសម្លឹងមើលតំបន់ណា ដែលជិតៗភ្នំពេញ ហើយពេលនោះដែរអ្នកទិញ ចង់មិនចង់បើសិនជាគាត់ចង់បានលំនៅឋាន ដែលមានតម្លៃសមរម្យ គឺគាត់នឹងស្វែងរកទិញលំនៅឋាននៅតំបន់នោះ ។

ជាការកត់សម្គាល់ មានក្រុមហ៊ុនអភិវឌ្ឍន៍លំនៅឋានជាច្រើនបាននិងកំពុងអភិវឌ្ឍន៍ សម្រាប់ផ្គត់ផ្គង់ជូនអតិថិជនរបស់ខ្លួន ក្នុងនោះដែរប៉ែកខាងត្បូងនៃភ្នំពេញ នៅស្រុកកណ្ដាលស្ទឹងក៏ឃើញថា ដោយមានគម្រោងអភិវឌ្ឍន៍ ព្រលានយន្តហោះអន្តរជាតិតេជោ គម្រោងផ្លូវក្រវ៉ាត់ក្រុងទី៣ជាដើម។

ក្រៅពីនោះតំបន់ប៉ែកខាងកើតភ្នំពេញ ក៏កំពុងមានសក្ដានុពលក្នុងការអភិវឌ្ឍលំនៅឋានដែរ ដោយមានក្រុមហ៊ុនអភិវឌ្ឍមួយចំនួនបាននិងកំពុងអនុវត្តន៍ គម្រោងរបស់ខ្លួនជាបន្តបន្ទាប់ផងដែរ៕

 ដោយៈ គង់ សូរិយា

       ភ្នំពេញៈ សេចក្តីព្រាងច្បាប់ស្តីពីប្រព័ន្ធទឹកកខ្វក់” ត្រូវបានលើកយកមកពិនិត្យពិភាក្សា ដើម្បីពន្លឿននីតិវិធីជំហានបន្ទាប់ ក្នុងការដាក់ឆ្លងក្រុមប្រឹក្សាអ្នកច្បាប់ និងត្រៀមសម្រាប់ការបញ្ជូនទៅគណៈរដ្ឋមន្ត្រី។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនកាលពីថ្ងៃទី៣០ មិនា បានអញ្ជើញដឹកនាំកិច្ចប្រជុំពិនិត្យពិភាក្សាលើ “សេចក្តីព្រាងច្បាប់ស្តីពីប្រព័ន្ធទឹកកខ្វក់” ដោយមានការចូលរួមពីសំណាក់ថ្នាក់ដឹកនាំ និងមន្ត្រីជំនាញពាក់ព័ន្ធជាច្រើនរូប។

កិច្ចប្រជុំនាឱកាសនេះ ត្រូវបានរៀបចំឡើងក្នុងគោលបំណងបន្តពិនិត្យពិភាក្សា និងឆ្លងខ្លឹមសារ “សេចក្តីព្រាងច្បាប់ស្តីពីប្រព័ន្ធទឹកកខ្វក់” ដោយច្របាច់បញ្ចូលគ្នា រវាងសេចក្តីព្រាងច្បាប់ដែលតាក់តែងដោយក្រុមការងារជំនាញរបស់ក្រសួង និងសេចក្តីព្រាងច្បាប់ដែលសិក្សាដោយ JICA សំដៅឱ្យមានអត្ថន័យគ្រប់ជ្រុងជ្រោយ បង្ការនូវកង្វះខាតត្រង់ចំណុចសំខាន់ៗដែលគួរមាន ដើម្បីធានាដល់ការអភិវឌ្ឍការគ្រប់គ្រងទឹកកខ្វក់ ឱ្យកាន់តែមានភាពប្រសើរឡើង ព្រមទាំងអាចផ្តល់ឧត្តមប្រយោជន៍ជារួម ស្របទៅតាមការរីកចម្រើនរបស់សង្គមជាតិ និងកំណើនប្រជាជនផងដែរ។

លោកទេសរដ្ឋមន្ត្រីស៊ុន ចាន់ថុល បានថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងសមាជិកក្រុមការងារគ្រប់រូប ដែលបានខិតខំប្រែងប្រែង សិក្សាស្រាវជ្រាវយ៉ាងយកចិត្តទុកដាក់ខ្ពស់ក្នុងការរៀបចំ តាក់តែងសេចក្តីព្រាងច្បាប់នេះឡើង និងបានណែ​នាំឱ្យក្រុមការងារបច្ចេកទេស ធ្វើបច្ចុប្បន្នភាពឯកសារនេះទៅតាមស្មារតីអង្គប្រជុំ និងបន្តនីតិវិធីជំហានបន្ទាប់ ក្នុងការដាក់ឆ្លងក្រុមប្រឹក្សាអ្នកច្បាប់ដើម្បីពិនិត្យ មុននឹងបញ្ជូនទៅគណៈរដ្ឋមន្ត្រីប្រជុំអនុម័ត៕

       ដោយៈ គង់ សូរិយា

       ព្រៃវែងៈ ជាមួយនឹងផែនការលើកកំពស់សេដ្ឋកិច្ច និងស្តង់ដារស់នៅបែបស៊ីវិល័យ អ្នកវិនិយោគគំរោងមង្គលវីឡា ព្រៃវែងបុរីបាននិងកំពុងពន្លឿនការសាងសង់គំរោង ដើម្បីឆ្លើយតបនឹងតម្រូវការអតិថិជន។

បច្ចុប្បន្នអ្នកអភិវឌ្ឍន៍គំរោងនេះ បាននិងកំពុងសាងសង់គំរោង​ ដំណាក់កាលទី១ នៅលើផ្ទៃដីជាង 20ហត្ថ ក្នុងចំណោមទំហំផ្ទៃដីសរុបជាង50ហិកតា។

គំរោងនេះ មានផ្ទះអាជីវកម្ម១៤០ល្វែង បានសាងសង់៣៥ល្វែង ដែលលក់ក្នុងតម្លៃចាប់ពី៣៤,០០០ដុល្លារអាមេរិក។ ជាមួយគ្នានេះ ដីឡូត៍ខ្នាតផ្ទះវីឡាលម្ហែ ទំហំចាប់ពី១៦គុណនឹង២២ម៉ែត្រ ដែល​រហូតមកទល់ពេលនេះ ក្រុមហ៊ុនបានអភិវឌ្ឍន៍ជាង១00ឡូត៍រួចហើយ។

ជាមួយគ្នានេះ គំរោងមង្គលវិឡាព្រៃវែងបុរី ក៏បាននិងកំពុងសាងសង់ និងរៀបចំរម្យណីយដ្ឋានបឹងស្នេហ៍ថ្មី ស្ថិតលើផ្ទៃដីជាង១០ហត្ថ បច្ចុប្បន្នអភិវឌ្ឍន៍បាន៤០ភាគរយ ដែលប្រជាពលរដ្ឋអាចជិះទូក ស្ទូចត្រី បោះតង់ និងរៀបចំកម្មវិធីជួបជុំផ្សេងៗ (ប្រជាពលរដ្ឋអាចមកលេងកំសាន្តដោយសេរី និងឥតគិតថ្លៃ)។

លោកឌិន សុមេធារិទ្ឋអ្នកអភិវឌ្ឍន៍មង្គលវីឡា ព្រៃវែងបុរីបានមាន​ប្រសាសន៍ឲ្យដឹងថា ការអភិវឌ្ឈន៍គំរោងនេះឡើង ក្នុងគោលដៅបង្កើនភាពទាក់ទាញ និងជម្រុញសេដ្ឋកិច្ចមូលដ្ឋាន ដោយយើងបាន​និងកំពុងអភិវឌ្ឈន៍គំរោងចម្រុះ រួមមាន ផ្សារសហគមន៍ ផ្សារទំនើបបែប​សហគមន៍ កន្លែងលេងកំសាន្តសម្រាប់ប្រជាជនមូលដ្ឋាន ក៏ដូចជាបង្កើតឲ្យមានសកម្មភាពអាជីវកម្មនៅក្នុងគំរោងនេះ។

លោកបន្តថា “ស្រុកស្វាយអន្ទរ ខេត្តព្រៃវែងកំពុងរីកចម្រើន សេដ្ឋកិច្ចរបស់ប្រជាពលរដ្ឋមូលដ្ឋាន កំពុងមានភាពប្រសើរឡើង ហេ​តុនេះ ទើបយើងចង់ផ្តល់លំនៅដ្ឋាន និងស្តង់ដារស់នៅជាលក្ខណៈ​បុរីដល់ប្រជាពលរដ្ឋដូចនៅរាជធានីភ្នំពេញផងដែរ”៕