ដោយ: គង់ លាងហួរ

ភ្នំពេញ: សម្តេចតេជោហ៊ុន សែននាយករដ្ឋមន្ត្រីនៃកម្ពុជា បានរំលឹកសារជាថ្មីអំពីសារៈសំខាន់ នៃការបង្កើនចំនួនអ្នកបច្ចេកទេស និងកម្មករជំនាញ ដើម្បីទាក់ទាញគម្រោងវិនិយោគ បច្ចេកវិទ្យាទំនើបថ្មីៗមកកាន់កម្ពុជា។

សម្តេចតេជោនាយករដ្ឋមន្រ្តីបានមានប្រសាសន៍ថា ការបណ្តុះបណ្តាលវិជ្ជាជីវៈ និងបច្ចេកទេសមានសារៈសំខាន់ ក្នុងការកសាងសមត្ថភាពនិស្សិតឱ្យក្លាយជាអ្នកបច្ចេកទេស និងកម្មករជំនាញ។

ដើម្បីគាំទ្រដល់ការងារនេះ រដ្ឋាភិបាលបានរៀបចំផែនការផ្តល់ការបណ្តុះបណ្តាលដល់ជនក្រីក្រ ប្រមាណ១,៥លាននាក់ យុវជនក្នុងវិជ្ជាជីវៈ និងជំនាញដូនតា ដូចជា តម្បាញ ចម្លាក់ និងគំនូរជាដើម។

សម្តេចបាន​បន្ត​ថា​ “នៅ​ពេល​ដែល​យើង​មាន​កម្លាំង​ពលកម្ម ​ជំនា​ញ និង​អ្នក​បច្ចេកទេស​ច្រើន យើង​អាច​ទាក់ទាញ​គម្រោង​វិនិយោគ​បច្ចេកវិទ្យា​លំដាប់​ខ្ពស់​មក​កាន់កម្ពុជា​”។

សម្តេចតេជោអះអាងថា “ការ​បណ្ដុះបណ្ដាល​វិជ្ជាជីវៈ និង​បច្ចេក​ទេស​នឹង​ជួយ​ដល់សិស្សានុសិស្ស ​មកពី​គ្រួសារ​ក្រីក្រ​ឱ្យរក​ការងារ​បានងាយស្រួល​ជាមួយ​នឹង​ប្រាក់​ខែ​ដ៏សមរម្យ”។

ស្ថាប័នអប់រំ និងបណ្តុះបណ្តាលបច្ចេកទេស និងវិជ្ជាជីវៈសំខាន់ៗរបស់រដ្ឋ រួមមាន វិទ្យាស្ថានជាតិពហុបច្ចេកទេសកម្ពុជា (NPIC) វិទ្យាស្ថានជាតិពាណិជ្ជសាស្ត្រ (NIB) វិទ្យាស្ថានជាតិបណ្តុះបណ្តាលបច្ចេកទេស (NTTI) វិទ្យាស្ថានពហុបច្ចេកទេសព្រះកុសុមៈ (PPI) ជាដើម។

កម្ពុជាបានទាក់ទាញការវិនិយោគទ្រព្យសកម្ម ថេរចំនួន៤,៦៨ពាន់លានដុល្លារក្នុងឆ្នាំ២០២២ កើនឡើង៧,៥ភាគរយពី៤,៣៥ពាន់លានដុល្លារកាលពីឆ្នាំ២០២១។ នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា(CDC)។

កាលពីឆ្នាំមុន វិនិយោគិនបរទេសសំខាន់ៗនៅកម្ពុជាមានប្រភពមកពីប្រទេសចិន ជប៉ុន កោះកៃម៉ាន ប្រទេសថៃ និងសិង្ហបុរី ដោយបន្ថែមថា គម្រោងវិនិយោគបានផ្តោតលើវិស័យកសិកម្ម និងកសិឧស្សាហកម្ម ផលិតកម្ម ទេសចរណ៍ និងហេដ្ឋារចនាសម្ព័ន្ធ រួមទាំងវិស័យផ្សេងៗទៀត៕

ដោយៈ វឌ្ឍនៈ

ភ្នំពេញៈ កិច្ចប្រជុំពេញអង្គគណៈរដ្ឋមន្ត្រី ដឹកនាំដោយសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជានៅព្រឹកថ្ងៃទី៣១ មីនា ២០២៣ បានសម្រេចអនុម័តទាំងស្រុង លើសំណើរសុំពិនិត្យសម្រេច លើគម្រោងវិនិយោគវិស័យថាមពលចំនួន៥ ។ នេះបើតាមលោកផៃ ស៊ីផាន ប្រធានអង្គភាពអ្នកនាំពាក្យទីស្ដីការគណៈរដ្ឋមន្ត្រីនៅព្រឹកថ្ងៃទី៣១ មីនា ២០២៣នេះ។

លោកបានឱ្យដឹងថា គម្រោងទាំង៥ ដែលបានអនុម័តក្នុងកិច្ចប្រជុំពេញអង្គនេះ រួមមាន គម្រោងវារីអគ្គិសនីស្ទឹងឬស្សីជ្រុំកណ្ដាល និងវារីអគ្គិសនីស្ទឹងវាយថ្ម កំបុតផ្គួបគ្នា១គម្រោង និងគម្រោងស្ថានីយអគ្គិសនីពន្លឺព្រះអាទិត្យ៤គម្រោង ក្នុងនោះមាន នៅខេត្តពោធិ៍សាត់ ១គម្រោង ខេត្តកំពង់ឆ្នាំង១គម្រោង ខេត្តស្វាយរៀង១គម្រោង និងខេត្តព្រៃវែង១គម្រោង ។

របៀបវារៈនៃកិច្ចប្រជុំនាពេញអង្គគណៈរដ្ឋមន្ត្រី នៅសប្តាហ៍នេះ រួមមាន មានរបៀបវារៈចំនួន៦ រួមមាន ទី១-សេចក្តីព្រាងផែនការជាតិទសវត្សរ៍សកម្មភាព សុវត្ថិភាពចរាចរណ៍ផ្លូវគោក ឆ្នាំ២០២១-២០៣០។ ទី២-សេចក្តីព្រាងច្បាប់ស្តីពីសារពើពន្ធ។ ទី៣-សេចក្តីព្រាងច្បាប់ស្តីពីលទ្ធកម្មសាធារណៈ។

ទី៤-ការអភិវឌ្ឍគម្រោងវារីអគ្គិសនីស្ទឹងឬស្សីជ្រុំ កណ្ដាលអានុ​ភាព៧០មេហ្គាវ៉ាត់ នៅស្រុកមណ្ឌលសីមា និងគម្រោងវារីអគ្គិសនីស្ទឹងវាលថ្មកំបុតអានុភាព១០០មេហ្គាវ៉ាត់ នៅស្រុកថ្មបាំង ខេត្តកោះ​កុងផ្គួបគ្នា។ ទី៥- គម្រោងវិនិយោគស្ថានីយផលិតអគ្គិសនី ដើរដោយថាមពលពន្លឺព្រះអាទិត្យអានុភាព១៥០មេហ្គាវ៉ាត់ ខេត្តពោធិ៍សាត់, អានុភាព៦០មេហ្គាវ៉ាត់ ខេត្តកំពង់ឆ្នាំង អានុភាព៦០មេហ្គាវ៉ាត់ ខេត្តស្វាយរៀង និងអានុភាព៨០មេហ្គាវ៉ាត់ ខេត្តព្រៃវែង។

៦-បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញត្តិ លើសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងស្តីពី ពាណិជ្ជកម្មតាមព្រំដែន រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារ​ណរដ្ឋសង្គមនិយមវៀតណាម៕

សុខុម

បាងកក: ក្រុមហ៊ុន Siam Makro Plc ដែលជាប្រតិបត្តិករផ្សារទំនើប Makro និងផ្សារទំនើប Lotus បានលៃទុកដើមទុនចន្លោះពី៧៤០លានដុល្លារ ទៅ៨០៣,៥លានដុល្លារអាមេរិក នៅឆ្នាំនេះដើម្បីពង្រីកអាជីវកម្មលក់រាយ និងលក់បោះដុំរបស់ខ្លួន។

លោក Saowaluck Thithapant ប្រធាននាយកប្រតិបត្តិក្រុមហ៊ុន Siam Makro លើកឡើងថា ការស្ទុះងើបឡើងនៃសេដ្ឋកិច្ច និងទេសចរណ៍បន្ទាប់ពីការបើកប្រទេសថៃ ឡើងវិញពេញលេញ នឹងជះផលជាវិជ្ជមានដល់អាជីវកម្មលក់ដុំ និងរាយ ក៏ដូចជាសណ្ឋាគារ ភោជនីយដ្ឋាន និងឧស្សាហកម្មចំណីអាហារដែលជាមូលដ្ឋានអតិថិជនរបស់ក្រុមហ៊ុននេះផងដែរ។ នេះបើយោងតាមសារព័ត៌មាន Bangkok Post ចុះផ្សាយកាលពីថ្ងៃព្រហស្បតិ៍ ទី៣០ ខែមីនា។

ក្នុងនោះ ទុនចន្លោះពី៣៨៤លានដុល្លារ ទៅ៤១២លានដុល្លារ គឺសម្រាប់អាជីវកម្មលក់បោះដុំនៃផ្សារទំនើប Makro ខណៈទុនចន្លោះពី៣៥៧លានដុល្លារ ទៅ៣៩២លានដុល្លារ សម្រាប់អាជីវកម្មលក់រាយនៃផ្សារទំនើប Lotus រួមទាំងការពង្រីកសាខា និងការអភិវឌ្ឍមជ្ឈមណ្ឌលចែកចាយ ប្រព័ន្ធឌីជីថល និងអាជីវកម្មថ្មីៗផងដែរ។

ក្នុងឆ្នាំ២០២៣ នេះ ផ្សារទំនើប Makro គ្រោងនឹងបើកសាខាថ្មីចំនួន១២សាខាក្នុងប្រទេសថៃ និងពី៤ទៅ៦សាខាក្នុងប្រទេសផ្សេងទៀតដែលផ្សារទំនើប Makro មានវត្តមានអាជីវកម្មរួចហើយ តួយ៉ាងដូចនៅកម្ពុជា ជាដើម។

ចំពោះអាជីវកម្មលក់រាយនៃផ្សារទំនើប Lotus ខ្លួនគ្រោងនឹងបើកផ្សារទំនើបពី១៣ទៅ១៨សាខាក្នុងប្រទេសថៃ និងម៉ាឡេស៊ី ព្រមទាំងសាខា Go Fresh នៃផ្សារទំនើប Lotus ពី១០០ទៅ១៥០សាខាផងដែរ៕ Bangkok Post៕

ដោយ៖ វឌ្ឍនៈ

ភ្នំពេញ ៖ គម្រោងកសាងព្រលានយន្ត ហោះថ្មី នៅក្នុងស្រុកកណ្តាលស្ទឹង ខេត្តកណ្តាល សម្រេចការសាងសង់បានជាង៤០ភាគរយហើយមកដល់ពេលនេះ។

នៅក្នុងសន្និសីទជោគជ័យរយៈពេល ៥ ឆ្នាំនាព្រឹកថ្ងៃទី៣០ខែមីនានេះ លោកនូវប៉េង ច័ន្ទតារា អភិបាលរងខេត្តកណ្តាលបានបញ្ជាក់ថា គម្រោងសាងសង់ព្រលានយន្តហោះតេជោនៅស្រុកកណ្ដាលស្ទឹង វឌ្ឍនភាពគិតមកដល់ពេលនេះ សម្រេចបាន ៤៤,៣ ភាគរយហើយ។

ដោយឡែកជុំវិញការដោះស្រាយទំនាស់ដីធ្លីពាក់ព័ន្ធនិងគម្រោងអភិវឌ្ឍព្រលានថ្មីនេះ លោកបានបញ្ជាក់ថា លើផ្ទៃដីសរុប ២៦០០ ហិកតា សម្រេចបាន ៦៣,១ ភាគរយ ស្មើ ១៦៤០ ហិកតា។ ក្នុងនោះដីដែលត្រូវដោះស្រាយបន្តជាមួយប្រជាពលរដ្ឋមានជាង៣០២ ហិតា ត្រូវ ១១ភាគរយ។

លោកលើកឡើងថា ទិដ្ឋភាពដីនៅគម្រោងអភិវឌ្ឍព្រលានថ្មីនេះ បែងចែកជាពីរ មួយដីទិញដោយក្រុមហ៊ុននិងមួយទៀតជាដីរូបវន្តបុគ្គលដែលប្រជាពលរដ្ឋគ្រប់គ្រង។ ដីដែលគ្រប់គ្រងដោយក្រុមហ៊ុនមិនពិបាកដោះស្រាយទេ ដែលសរុបមានជាង ៦៥៧ ហិកតា ត្រូវ ២៥,២៦ភាគរយ ។ អ្វីត្រូវដោះស្រាយបន្តជាមួយប្រជាពលរដ្ឋលើទំហំដីជាង ៣០២ ហិកតា ដោយអាជ្ញាធរកំពុងព្យាយាមរកដំណោះស្រាយ ដោយមានការដឹកនាំសម្របសម្រួលពីក្រសួងដែនដីនគរូបនីយកម្មនិងសំណង់ផ្ទាល់។

ទាក់ទងគម្រោងអភិវឌ្ឍព្រលានយន្តហោះនេះដែរ លោកនូវប៉េង ច័ន្ទតារា បានបញ្ជាក់ទៀតថា ក៏ត្រូវមានការសាងសង់ផ្លូវតភ្ជាប់មួយចំនួនទៀត គឺផ្លូវចូលព្រលានដែលតភ្ជាប់ផ្លូវជាតិលេខ២និងពីមហាវិថីសម្តេចតេជោដែលមានប្រវែង១៣,៥ គីឡូម៉ែត្របច្ចុប្បន្នសម្រេចបានជាង៣៥ភាគរយហើយ។

អាកាសយានដ្ឋានអន្តរជាតិតេជោក្រុងតាខ្មៅ បានដំណើរការសាងសង់ជាង ២ ឆ្នាំ ដែលបោះទុនវិនិយោគប្រមាណ២ពាន់លានដុល្លារ។ ព្រលានយន្តហោះនេះគ្រោងបញ្ចប់ដំណាក់កាលទី១ នៅឆ្នាំ២០២៤ និងដាក់ឲ្យដំណើរការនៅឆ្នាំ២០២៥។
ព្រលានយន្តហោះអន្តរជាតិថ្មីនេះ កម្រិត4Fនឹងប្រើប្រាស់ជំនួសព្រលានយន្តហោះអន្តរជាតិភ្នំពេញ ខណៈវិសាលភាពព្រលានថ្មី មានភាពធំទូលាយ អាចកម្រិតយន្តហោះធំៗ ចុះចតបាន។ អាកាសយានដ្ឋានអន្តរជាតិតេជោនៅខេត្តកណ្តាល សាងសង់មានភូមិសាស្ត្រ នៅក្នុងខេត្តកណ្តាល ជាប់ខេត្តតាកែវ និងមានចម្ងាយប្រមាណ២០គីឡូម៉ែត្រពីរាជធានីភ្នំពេញ៕

ដោយ: គង់ លាងហួរ
អន្តរជាតិ: ក្រុមហ៊ុន Alibaba Group គ្រោងនឹងបែងចែកអាជីវកម្មរបស់ខ្លួនទៅជាអង្គភាពសំខាន់ៗចំនួន៦ ដែលគ្របដណ្តប់លើ e-commerce រហូតដល់ cloud ក្នុងការរៀបចំរចនាសម្ព័ន្ធឡើងវិញដ៏ធំបំផុតក្នុងប្រវត្តិសាស្រ្តរយៈពេល២៤ឆ្នាំ។

ក្រុមហ៊ុន Alibaba បានរាយការណ៍ឱ្យដឹងកាលពីថ្ងៃអង្គារ ទី២៨ ខែមីនានេះថា អង្គភាពអាជីវកម្មចំនួន៥នឹងស្វែងរកការរៃអង្គាសប្រាក់ ឬការបោះផ្សាយ​លក់​មូលបត្រ​កម្មសិទ្ធិ​ជា​សាធារណៈ​លើកដំបូង។

អង្គភាពទាំង៦នោះរួមមាន Cloud Intelligence Group Taobao Tmall Commerce Group Local Services Group Cainiao Smart Logistics Group Global Digital Commerce Group និង Digital Media and Entertainment Group ហើយអង្គភាពនីមួយៗនឹងត្រូវគ្រប់គ្រងដោយនាយកប្រតិបត្តិ និងក្រុមប្រឹក្សាភិបាលរបស់ខ្លួន។

លោក Daniel Zhang នឹងបន្តធ្វើជាប្រធាន និងជានាយកប្រតិបត្តិនៃក្រុមហ៊ុន Alibaba Group (BABA) ហើយក្នុងពេលដំណាលគ្នាលោកក៏បម្រើជានាយកប្រតិបត្តិនៃអង្គភាព Cloud Intelligence Groupផងដែរ។

ព័ត៌មាននៃការរៀបចំរចនាសម្ព័ន្ធឡើងវិញបានកើតឡើងមួយថ្ងៃបន្ទាប់ពីស្ថាបនិកក្រុមហ៊ុន Alibaba លោក Jack Ma ត្រូវបានគេប្រទះឃើញនៅសាលាបឋមសិក្សាមួយក្នុងទីក្រុង Hangzhou ដែលជាការបង្ហាញខ្លួនជាសាធារណៈលើកដំបូងរបស់លោកនៅក្នុងប្រទេសចិនដីគោកក្នុងរយៈពេលជាងមួយឆ្នាំកន្លងមកនេះ។

តម្លៃផ្សារហ៊ុន​ដែល​បានចុះ​បញ្ជី​នៅ​សហរដ្ឋអាមេរិក​របស់ក្រុមហ៊ុនខ្នាតយក្ស Alibaba បាន​ហក់ឡើងថ្លៃរហូតដល់ទៅ៨ភាគរយ បន្ទាប់​ពី​លេចឮព័ត៌មាននេះ៕

សុខុម

ហាណូយ: ក្រសួងដឹកជញ្ជូនវៀតណាម បានទម្លាយឱ្យដឹងថា ប្រទេសនេះគ្រោងនឹងបោះទុនរហូតដល់ទៅ១៣,៣ពាន់លានដុល្លារអាមេរិក ដើម្បីអភិវឌ្ឍប្រព័ន្ធកំពង់ផែសមុទ្ររបស់ខ្លួននៅឆ្នាំ២០៣០។

យោងតាមសារព័ត៌មាន Vietnam News ចុះផ្សាយនៅថ្ងៃព្រហស្បតិ៍ ទី៣០ ខែមីនា នេះឱ្យដឹងថា ជាពិសេស ទុនវិនិយោគ៧៨%នឹងត្រូវបម្រុងទុកសម្រាប់ការអភិវឌ្ឍកំពង់ផែ ហើយសល់ប៉ុន្មានបម្រុងទុកសម្រាប់ហេដ្ឋារចនាសម្ព័ន្ធសមុទ្រ។

នៅឆ្នាំ២០២៤ វៀតណាម នឹងផ្ដោតទៅលើការធ្វើឱ្យប្រសើរឡើងនូវបណ្តាញនាវាចរណ៍សម្រាប់ឱ្យកប៉ាល់ធំៗចូលទៅកាន់ទន្លេ Hau ទន្លា Van Uc និងទន្លេ Chanh បានកាន់តែងាយស្រួល។

លើសពីនេះក៏នឹងមានការវិនិយោគទៅលើការអភិវឌ្ឍអំពូលភ្លើងសមុទ្រនៅតាមកោះ និងប្រជុំកោះដែលស្ថិតក្រោមអធិបតេយ្យភាពរបស់វៀតណាម និងហេដ្ឋារចនាសម្ព័ន្ធសម្រាប់សុវត្ថិភាពនាវាចរណ៍ ការសាងសង់ស្ថានីយព័ត៌មានតំបន់ឆ្នេរ មជ្ឈមណ្ឌលរុករក និងជួយសង្គ្រោះ និងការិយាល័យតំណាងរដ្ឋបាលដែនសមុទ្រ Nha Trang នៅ Trường Sa។

នៅឆ្នាំ២០៣០ ការវិនិយោគនេះនឹងផ្តោតលើការសាងសង់ទំនប់បាំងរលកសមុទ្រនៅកំពង់ផែ Vung Ang (ខេត្តតាយនិញ) ប្រព័ន្ធទំនប់បាំងរលកសមុទ្រនៅកំពង់ផែ Cua Viet និងកំពង់ផែ Cua Gianh ព្រមទាំងធ្វើឱ្យប្រសើរឡើងនូវផ្លូវទឹក Cam Pha ផ្លូវទឹក Ba Ngoi ផ្លូវទឹក Hon La ផ្លូវទឹក Tran Die ផ្លូវទឹក Diem Dien និងផ្លូវទឹក Van Uc ផងដែរ។

សេវាចរាចរណ៍កប៉ាល់ (VTS) នឹងត្រូវដំឡើងសម្រាប់ផ្លូវទឹក Hon Gai – Cai Lan និងផ្លូវទឹកចូលទៅកាន់ទន្លេ Hau៕ Vietnam News៕