ដោយៈ និស្ស័យ

   អាមររិកៈ ទិន្នន័យចុងក្រោយពី Freddie Mac បង្ហាញថា អត្រាការប្រាក់កម្ចីទិញផ្ទះរយៈពេល៣០ ឆ្នាំស្ថិតនៅកម្រិតប្រហែល ៧,២៨​% ដែលជាកម្រិតខ្ពស់បំផុតចាប់តាំងពីចុងឆ្នាំ២០២៣ មក។

កត្តានេះកំពុងរារាំងអ្នកទិញ មិនឱ្យចូលក្នុងទីផ្សារ និងធ្វើឱ្យបរិមាណនៃការលក់ធ្លាក់ចុះ។

ទន្ទឹមនឹងនេះ តម្លៃផ្ទះមិនបានធ្លាក់ចុះខ្លាំងនោះទេ ដោយសារម្ចាស់ផ្ទះដែលមានស្រាប់ជាច្រើន បានជាប់កិច្ចសន្យាអត្រាការប្រាក់កម្ចីទាប ហើយមិនចង់លក់ផ្ទះរបស់ខ្លួន។

Zillow ប៉ាន់ប្រមាណថា តម្លៃផ្ទះក្នុងខែកញ្ញាមានការកើនឡើងត្រឹមតែប្រហែល១% ប៉ុណ្ណោះបើធៀបនឹងឆ្នាំមុន ខណៈដែលចំនួនផ្ទះសម្រាប់លក់ (inventory)មានការកើនឡើង ២,៥% បើធៀបនឹងឆ្នាំមុន ប៉ុន្តែនៅតែទាបជាងកម្រិតមុន ពេលមានជំងឺរាតត្បាតចំនួន ១៦,១%។

ចំណុចសំខាន់គឺសហរដ្ឋអាមេរិក កំពុងវិវត្តទៅជាទីផ្សារលំនៅដ្ឋានពីរផ្សេងគ្នា ដោយតំបន់ Midwest និង Northeast៖ មានភាពរឹងមាំគួរសម។

ការផ្គត់ផ្គង់មានកម្រិតបានជួយរក្សាតម្លៃផ្ទះ។ រដ្ឋ Illinois, Connecticut, Indiana, New Jersey និងOhio ស្ថិតក្នុងចំណោមរដ្ឋដែលមានកំណើនតម្លៃប្រចាំឆ្នាំខ្លាំងជាងគេ។

ចំណែកតំបន់Sunbelt និងភាគខាងលិច (West)៖ មានសម្ពាធខ្លាំងជាង។រដ្ឋ Texas, Washington និង Hawaii បានបង្ហាញពីការធ្លាក់ចុះតម្លៃប្រចាំឆ្នាំ ខណៈដែលរដ្ឋ Arizona, Nevada, Oregon និងColorado មានតម្លៃស្ទើរតែមិនប្រែប្រួល។ ការកើនឡើងនៃការសាងសង់ និងចំនួនផ្ទះសម្រាប់លក់ បានផ្តល់ឱ្យអ្នកទិញនូវអំណាចក្នុងការចរចាកាន់តែច្រើន។

វិស័យអចលនទ្រព្យពាណិជ្ជកម្ម មានភាពគួរឱ្យចាប់អារម្មណ៍ជាង
នេះគឺជាផ្នែកមួយដែលខ្ញុំមើលឃើញថាមានសញ្ញាវិជ្ជមាន។

ក្រុមហ៊ុនCBRE រំពឹងថា ទំហំនៃការវិនិយោគលើអចលនទ្រព្យពាណិជ្ជកម្មនៅសហរដ្ឋអាមេរិក នឹងកើនឡើងប្រហែល១៦% នៅឆ្នាំ ២០២៦។ ការវិនិយោគលើវិស័យឧស្សាហកម្ម និងភស្តុភារកម្ម (logistics)លំនៅដ្ឋានរួម (multifamily) ហាងលក់រាយ និងការិយាល័យ ត្រូវបានរំពឹងថានឹងមានភាពប្រសើរឡើង ទោះបីជាវិស័យការិយាល័យនៅតែមានភាពខុសគ្នា នៃលទ្ធផលយ៉ាងខ្លាំងក៏ដោយ៕

ដោយៈ ចំណាន

   ភ្នំពេញៈ វាប្រៀបបាននឹងខ័ណ្ឌមួយ ដែលតែងតែទទួលបានផលប្រយោជន៍លឿនជាងគេ ពីការអភិវឌ្ឍនៅរាជធានីភ្នំពេញ ស្របពេលចំនួនប្រជាជនបន្តកើនឡើងនៅទីក្រុងនេះ។

អ្នកជំនាញបានលើកឡើង ពីការផ្តល់អាទិភាពដល់ដីដែលមានផ្លូវតភ្ជាប់ស្រាប់ និងស្ថិតនៅជិតសហគមន៍ ដែលមានប្រជាជនរស់នៅ សាលារៀន តំបន់ពាណិជ្ជកម្ម និងកន្លែងការងារ ជាជាងដីដែលគ្រាន់តែផ្សព្វផ្សាយថា “នៅជិតព្រលានយន្តហោះ” ប៉ុណ្ណោះ។

ការវិភាគទីផ្សារបច្ចុប្បន្ន ក៏បានសង្កត់ធ្ងន់ដូចគ្នាដែរទៅ លើការតភ្ជាប់ និងតម្រូវការជាក់ស្តែងសម្រាប់ការរស់នៅ ឬអាជីវកម្ម ជាជាងគ្រាន់តែគិតគូរពីចម្ងាយ ទៅកាន់ព្រលានយន្តហោះតែមួយមុខ។

ជាមួយនឹងចក្ខុវិស័យនេះ អ្នកអភិវឌ្ឍន៍ទីក្រុងVictoria​Parkland បានជ្រើសរើសទីក្រុងនេះ ជាតំបន់អភិវឌ្ឍន៍បែបស៊ីវិល័យមួយ។

លោកបណ្ឌិតតេង រិទ្ធីអគ្គនាយកក្រុមហ៊ុនVictoria Parkland បានសម្លឹងទៅមុខជាមួយចក្ខុវិស័យ និងសុទិដ្ឋិនិយមខ្ពស់សម្រាប់អនាគត។

លោកបានមានប្រសាសន៍ថា “សម្លឹងទៅអនាគត យើងជឿជាក់ពីគុណតម្លៃគម្រោងរបស់យើង ដែលផ្តោតលើការកសាងគុណតម្លៃ មិនមែនលក់តែដីនោះទេ”។លោកបន្ថែមថា “ផែនការរបស់យើងគឺប្រែក្លាយតំបន់នេះ ជាCBDថ្មីមួយ សម្រាប់ភាគខាងត្បូងរាជធានី ជាតំបន់មានសក្តានុពលពលងាយតភ្ជាប់ ជាមួយបណ្តាញហេដ្ឋារចនាសម្ព័ន្ធសំខាន់ៗជាច្រើន”។

Victoria Parkland មានទីតាំងនៅភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល ជាតំបន់មួយដែលកំពុងទទួលបានការចាប់អារម្មណ៍ខ្លាំងពីអ្នកវិនិយោគដីធ្លី និងអភិវឌ្ឍន៍គម្រោងផ្សេងៗ។

ជាមួយគ្នានេះ ការវាយតម្លៃជាយុទ្ធសាស្ត្ររបស់អ្នកជំនាញ បានលើកជាអនុសាសន៍ថា ប្រសិនបើអ្នកកំពុងពិចារណា លើតំបន់អភិវឌ្ឍន៍(growth corridor) នៃតំបន់ភ្នំពេញ និងតំបន់ជុំវិញ (Greater Phnom Penh)សម្រាប់ឆ្នាំ២០៣០ ខ្ញុំនឹងចាត់ទុកក្រុងតាខ្មៅ តភ្ជាប់ទៅកាន់ស្រុកកណ្តាលស្ទឹង ទៅកាន់ព្រលានយន្តហោះ ជាមួយខណ្ឌកំបូលនិងតំបន់ភាគខាងត្បូងរាជធានីភ្នំពេញថា ជាតំបន់ដែលគួរតាមដានយ៉ាងយកចិត្តទុកដាក់។

សម្រាប់ការវិនិយោគលើដីធ្លី (land banking) ចាប់អារម្មណ៍ខ្លាំងជាងទៅលើទីតាំងនៅតាខ្មៅ ឬខេត្តកណ្តាលដែលមានការតភ្ជាប់ល្អ និងមានសក្តានុពលអភិវឌ្ឍន៍ក្នុងរយៈពេល៥ ទៅ១០ ឆ្នាំខាងមុខ។

ក្រុងតាខ្មៅនឹងកាន់តែមានទំនាក់ទំនង យ៉ាងជិតស្និទ្ធជាមួយប្រព័ន្ធសេដ្ឋកិច្ចទីក្រុង ដែលតភ្ជាប់រវាងភ្នំពេញ និងព្រលានយន្តហោះតេជោ ហើយឱកាសដ៏ល្អបំផុតទំនងជា នឹងស្ថិតនៅក្នុងវិស័យលំនៅឋាន សេវាកម្មពាណិជ្ជកម្ម និងវិស័យដឹកជញ្ជូន (logistics)ជាជាងការសាងសង់ខុនដូប្រណីតៗ៕

ដោយ: សហសេវិក
អន្តរជាតិ: តម្លៃអចលនទ្រព្យនៅប្រទេសមីយ៉ាន់ម៉ាបានកើនឡើងយ៉ាងខ្លាំងចាប់តាំងពីការដណ្តើមអំណាចដោយយោធា។ របាយការណ៍ស្តីពីស្ថានភាពសេដ្ឋកិច្ចមីយ៉ាន់ម៉ារបស់ធនាគារពិភពលោក ប្រចាំខែមិថុនា ឆ្នាំ២០២៦ បានបញ្ជាក់ថា តម្លៃអចលនទ្រព្យបានកើនឡើង ៤ ដង។

ជាឧទាហរណ៍ អ្នកម៉ៅការម្នាក់នៅទីក្រុង Yangon បានទិញអាផាតមុិនមួយដែលមានទំហំ ៨៤ ម៉ែត្រការ៉េក្នុងឆ្នាំ ២០២១ ក្នុងតម្លៃ ៧៥ លានគ្យាត (Kyats) (ប្រហែល៣០.០០០ដុល្លារបើគិតតាមអត្រាប្តូរប្រាក់បច្ចុប្បន្ន)។ បច្ចុប្បន្ននេះ អាផាតមុិននោះមានតម្លៃប្រហែល ៣០០ លានគ្យាត។

ការកើនឡើងយ៉ាងគំហុកនៃតម្លៃអចលនទ្រព្យក៏កំពុងរាលដាលទៅដល់ដីទំនេរផងដែរ។ ការធ្លាក់ចុះនៃសេដ្ឋកិច្ចរបស់ប្រទេសមីយ៉ាន់ម៉ា អត្រាអតិផរណាខ្ពស់ ការរឹតបន្តឹងការនាំចូល កង្វះខាតរូបិយប័ណ្ណបរទេស និងជម្លោះដែលកំពុងបន្តកើតមាន បានធ្វើឱ្យការធ្វើអាជីវកម្មជួបការលំបាក។

នៅពេលដែលការនាំចូលកាន់តែមានការលំបាក ហើយអាជីវកម្មជួបការលំបាកក្នុងការស្វែងរកទំនិញសម្រាប់លក់ ពាណិជ្ជករ និងម្ចាស់អាជីវកម្មជាច្រើនបានចាប់ផ្តើមវិនិយោគប្រាក់ដែលនៅសល់របស់ពួកគេទៅលើដីធ្លីវិញ ជំនួសឱ្យការទិញទំនិញ។

ភ្នាក់ងារអចលនទ្រព្យបានឱ្យដឹងថា តម្លៃអចលនទ្រព្យមានស្ថុិរភាពល្អគួរសមក្នុងឆ្នាំ ២០២២ ប៉ុន្តែក្រោយមកបានចាប់ផ្តើមហក់ឡើងថ្លៃយ៉ាងឆាប់រហ័ស ប្រហែល ៤០% ទៅ ៦០% ក្នុងមួយឆ្នាំនៅតំបន់មួយចំនួន។ ជាលទ្ធផល តម្លៃអចលនទ្រព្យមួយចំនួនបានកើនឡើង ៤ ដងចាប់តាំងពីឆ្នាំ ២០២១ មក៕