ភ្នំពេញ៖ នៅព្រឹកថ្ងៃទី២៦ ខែធ្នូ ឆ្នាំ២០២៥ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជេីញជួបជុំប្រជាពលរដ្ឋកម្ពុជាស្លូតត្រង់ជាច្រើន មានទាំងចាស់ជរា ស្ត្រីមានផ្ទៃពោះ កុមារ ក្នុងពិធីសំណេះសំណាល សួរសុខទុក្ខ និងចែកអំណោយជូនប្រជាពលរដ្ឋភៀសសឹក មកពីបណ្តាខេត្តជាប់ព្រំដែនកម្ពុជា-ថៃ ដែលរងការឈ្លានពានពីកងទ័ពថៃ ។

លោកជំទាវបណ្ឌិត បានពាំនាំប្រសាសន៍ផ្តាំផ្ញេីសួរសុខទុក្ខដ៏ខ្ពង់ខ្ពស់បំផុត និងដោយក្តីបារម្ភបំផុតរបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្តេចមហាបវរធិបតី ហ៊ុន ម៉ាណែត ជូនប្រជាពលរដ្ឋភៀសសឹកគ្រប់រូប និងថែមទាំងបាននាំយកអំណោយដ៏ថ្លៃថ្លាបំផុតរបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិតផ្ទាល់ ប្រគល់ជូនជនភៀសសឹកគ្រប់ៗរូប ដើម្បីប្រើប្រាស់ និងសម្រួលជីវភាពរស់នៅប្រចាំថ្ងៃ។

ស្ថិតក្នុងឱកាសនេះដែរ លោកជំទាវបណ្ឌិត សូមថ្លែងអំណរគុណយ៉ាងជ្រាលជ្រៅជូនសប្បុរសជនឆ្ងាយជិតទាំងអស់ដែលបានឧបត្ថម្ភជាច្រេីន រួមចំណែកជាមួយរាជរដ្ឋាភិបាល និងសូមអំពាវនាវឱ្យបន្តផ្តល់ជូនជំនួយមនុស្សធម៌នេះបន្ថែមទៀតក្នុងស្មារតីខ្មែរតែមួយ ខ្មែរជួយខ្មែរ។

ក្នុងវេលាយ៉ាងលំបាកនេះ រាជរដ្ឋាភិបាលដៃម្ខាងប្រយុទ្ធទប់ទល់នឹងសត្រូវឈ្លានពាន រីឯម្ខាងទៀតបាននិងកំពុងជួយសង្រ្គោះដល់ជនភៀសសឹកជាច្រេីន៕

ដោយៈ គង់ សូរិយា

    ព្រះសីហនុៈ របាយការណ៍បានឲ្យដឹងថា ក្នុងរយៈពេល២ឆ្នាំ ខេត្តព្រះសីហនុបានទទួលទុនវិនិយោគរហូតដល់៧៩៧១លានដុល្លារអាមេរិក​ ជាមួយគំរោងអភិវឌ្ឍន៍ជាង៦០០ និងអាចបង្កើតការងារបានជាង៥ម៉ឺននាក់។

ព័ត៌មាននេះត្រូវបានលើកឡើង នៅពេលលោកបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ នារសៀលថ្ងៃទី២៥ ខែធ្នូ ឆ្នាំ២០២៥ បានដឹកនាំកិច្ចប្រជុំបូកសរុប និងវាយតម្លៃការអនុវត្ត “កម្មវិធីពិសេសជំរុញការវិនិយោគក្នុងខេត្តព្រះសីហនុ” ក្នុងឆ្នាំ២០២៥ ដោយមានការអញ្ជើញចូលរួមពីលោក ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ព្រមទាំងតំណាងក្រសួង-ស្ថាប័នពាក់ព័ន្ធជាច្រើនរូប។

លោកបណ្ឌិតសភាចារ្យបានបញ្ជាក់ឲ្យដឹងថា ក្នុងរយៈពេល២ឆ្នាំគឺ ២០២៤-២០២៥, ក្រុមការងារបានសម្រេចជាគោលការណ៍ផ្ដល់ការលើកទឹកចិត្ត ការអនុគ្រោះ ការសម្រួលនីតិវិធី និងការសម្របសម្រួលដោះស្រាយវិវាទចំនួន៤១២គម្រោង ជាមួយទុនវិនិយោគប្រមាណ៧៩៧១លានដុល្លារអាមេរិក ដោយអាចបង្កើតការងារបានប្រមាណ៥២,០០០កន្លែង។

ដោយឡែកក្នុងឆ្នាំ ២០២៥ ក្រុមការងារបានសម្រេចផ្តល់គោលការណ៍លើកទឹកចិត្តពិសេសចំនួន១៩៩ គម្រោងស្មើនឹង១៣៣% លើសគោលដៅសូចនាករ សមិទ្ធកម្មដែលបានកំណត់ត្រឹម ១៥០គម្រោង ក្នុងនោះគម្រោងពាក់ព័ន្ធនឹងអគារ កំពុងជាប់គាំងចំនួន៩២គម្រោង គម្រោងពុំពាក់ព័ន្ធនឹងអគារជាប់គាំង (គម្រោងថ្មី) ចំនួន៩០ គម្រោង, ការពង្រីកគម្រោង ចំនួន៩គម្រោង និងគម្រោងវិនិយោគ/ធុរកិច្ចដែលមានស្រាប់ចំនួន៨គម្រោង ដោយគ្របដណ្តប់លើវិស័យអចលនទ្រព្យ ឧស្សាហកម្ម ទេសចរណ៍ អប់រំ ។ល។

ក្រៅពីនេះ ក្រុមការងារបានអនុវត្តវិធានការនានា ដោយរលូន ស្របតាមកម្មវិធីពិសេស ដោយមានកិច្ចសហការខ្ពស់ និង ការចូលរួមយ៉ាងសកម្ម របស់ក្រសួង-ស្ថាប័ន និង រដ្ឋបាលខេត្តព្រះសីហនុ ស្របតាមអភិក្រម “ជវភាពនៃប្រព័ន្ធតួអង្គតែមួយ”។

លោកបណ្ឌិតសភាចារ្យ បានមានប្រសាសន៍បន្ថែមថា ដោយផ្អែកលើកិច្ចខិតខំប្រឹងប្រែង និងលទ្ធផលសម្រេចបានទំាងនេះ រាជរដ្ឋាភិបាលបានសម្រេចបន្តអនុវត្តន៍កម្មវិធីពិសេសនេះ រយៈពេល២ឆ្នាំបន្ថែមទៀត រហូតដល់ដំណាច់ឆ្នាំ ២០២៧។

សម្រាប់រយៈពេល២ឆ្នាំ (២០២៤-២០២៥) ក្នុងចំណោម ៤១២ គម្រោង ដែលបានទទួលគោលការណ៍លើកទឹកចិត្តពិសេស គម្រោងដែលបញ្ចប់ការសាងសង់ ជួសជុលនិង/ឬកែលម្អរួចរាល់មាន១៣៤ គម្រោងស្មើនឹង៣៣%, គម្រោងដែលកំពុងអនុវត្តការសាងសង់ ជួសជុល និង/ឬកែលម្អ មាន១៦២គម្រោង ស្មើនឹង៣៩%, និង គម្រោងដែលមិនទាន់ចាប់ផ្ដើមដំណើរការសាងសង់ ជួសជុល និង/ឬ កែលម្អ មាន ១១៦ គម្រោង ស្មើនឹង ២៨%។

បណ្ឌិតសភាចារ្យបានវាយតម្លៃខ្ពស់ និងថ្លែងអំណរគុណចំពោះលោក ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ដែលបានផ្តល់កិច្ចសហការខ្ពស់ ថ្នាក់ដឹកនាំ មន្ត្រីរាជការនៃក្រសួង-ស្ថាប័នពាក់ព័ន្ធ រដ្ឋបាលខេត្តព្រះសីហនុ និង លេខាធិការដ្ឋានក្រុមការងារ ដែលបានបំពេញបេសកកម្ម យ៉ាងសកម្ម និងប្រកបដោយការទទួលខុសត្រូវខ្ពស់ ក្នុងរយៈពេល ២ ឆ្នាំ (២០២៤-២០២៥) កន្លងមកនេះ ។

លទ្ធផលដែលសម្រេចបាននេះ ជាពិសេសការដោះស្រាយគម្រោងអគារជាប់គាំង និងការកសាងទំនុកចិត្តជូនវិនិយោគិន គឺកើតចេញពីកិច្ចសហការគ្នាជាធ្លុងមួយ ដែលក្នុងនោះ ក្រសួង-ស្ថាប័ន បានផ្តល់ការអនុគ្រោះ និងភាពបត់បែន រដ្ឋបាលខេត្ត បានជួយសម្របសម្រួលដោះស្រាយបញ្ហាប្រឈមនៅនឹងកន្លែង យ៉ាងមានប្រសិទ្ធភាពនិងលេខាធិការដ្ឋានក្រុមការងារ បានដើរតួជាសេនាធិការ និងច្រកចេញចូលតែមួយយ៉ាងសកម្ម៕

ដោយៈ ម៉ាណា

    ភ្នំពេញៈ ក្រសួងសាធារណការ និងដឹកជញ្ជូណនបានបើកកិច្ចប្រជុំប្រកាសសមាសភាពអង្គភាពគ្រប់គ្រង គម្រោងសាងសង់ផ្លូវជាតិលេខ៤៣។

ផ្លូវជាតិលេខ៤៣ តភ្ជាប់ពីតំបន់ត្រែងត្រយឹង ផ្លូវជាតិលេខ៤-ទ្វារថ្មី ផ្លូវជាតិលេខ៣) ក្រោមក្របខ័ណ្ឌឥណទានសម្បទានពីមូលនិធិសាអូឌីតសម្រាប់ការអភិវឌ្ឍ។

លោកជំទាវ មឹន មាណវី រដ្ឋលេខាធិការ និងជានាយកគម្រោង ដឹកនាំកិច្ចប្រជុំស្តី ប្រកាសសមាសភាពនៃអង្គភាព គ្រប់គ្រងគម្រោង(PMU) សម្រាប់គម្រោងសាងសង់ផ្លូវជាតិលេខ៤៣ (ត្រែងត្រយឹង ផ្លូវជាតិលេខ៤-ទ្វារថ្មី ផ្លូវជាតិលេខ៣) ក្រោមក្របខ័ណ្ឌឥណទានសម្បទានពីមូលនិធិសាអូឌីត សម្រាប់ការអភិវឌ្ឍ (Saudi Fund for Development-SFD)  ដោយមានការចូលរួមពី ថ្នាក់ដឹកនាំក្រសួង លោកប្រធានមន្ទីរសាធារណរការ និងដឹកជញ្ជូនខេត្តកំពង់ស្ពឺ-ខេត្តកំពត និងមន្ត្រីជំនាញពាក់ព័ន្ធក្រោមឱវាទក្រសួងជាច្រើនរូប។

កិច្ចប្រជុំនេះ រៀបចំឡើងក្នុងគោលបំណង ដើម្បីប្រកាសអំពីសមា​សភាពសមាជិក សមាជិកាគម្រោង និងការបែងចែកតួនាទីភារកិច្ច និងការទទួលខុសត្រូវ គ្រប់គ្រងគម្រោង(PMU)គម្រោងសាងសង់ផ្លូវជាតិលេខ៤៣ (ត្រែងត្រយឹង ផ្លូវជាតិលេខ៤-ទ្វារថ្មី ផ្លូវជាតិលេខ៣) និងពិនិត្យពិភាក្សាលើរបាយការណ៍បឋម លើការសិក្សាសមិទ្ធិលទ្ធភាពលើការកែសម្រួល ប្រមូលផ្តុំធាតុចូលថ្មីៗបន្ថែម សំ​ដៅ​ជំរុញឱ្យការអនុវត្តគម្រោងនេះ ទទួលបានលទ្ធផលល្អ ប្រកប​ដោយប្រសិទ្ធភាពខ្ពស់តាមការប្រគល់ជូនរបស់ថ្នាក់ដឹកនាំ៕