ដោយៈ ម៉ាណា
ប្រទេសចិនៈ ការសិក្សាថ្មីមួយបានរកឃើញថា កំណើនសេដ្ឋកិច្ចរបស់ប្រទេសចិន ត្រូវបានគេរំពឹងថា នឹងនៅតែរក្សាបាននូវស្ថេរភាពពេញមួយឆ្នាំ២០២៥ និងដល់ឆ្នាំ២០២៦។
កំណើនប្រាក់ចំណូលគ្រួសារដែលមានកម្រិតទាប ផលប៉ះពាល់អវិជ្ជមាននៃអចលនទ្រព្យ និងបរិយាកាសពាណិជ្ជកម្មសកល ដែលមិនប្រាកដប្រជានឹងរឹតត្បិតតម្រូវការក្នុងស្រុក និងដាក់បន្ទុកលើការនាំចេញ និងការវិនិយោគផលិតកម្ម នេះបើយោងតាមរបាយការណ៍ពិគ្រោះយោបល់ប្រចាំឆ្នាំ ២០២៥ ដែលចេញផ្សាយដោយការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ស្តីពីផែនការស្តារសេដ្ឋកិច្ចក្រោយជំងឺកូវីដ-១៩ របស់ប្រទេសចិន។
របាយការណ៍នេះ ផ្អែកលើដំណើរទស្សនកិច្ច ពិគ្រោះយោបល់ប្រចាំឆ្នាំរបស់AMRO ទៅកាន់ប្រទេសចិនក្នុងខែសីហា-កញ្ញា ឆ្នាំ២០២៥ ហើយរួមបញ្ចូលទិន្នន័យ និងព័ត៌មានដែលមានរហូតដល់ថ្ងៃទី១៥ ខែកញ្ញា បានចេញមកជាមួយ នឹងការរកឃើញសំខាន់ៗមួយចំនួន។
យោងតាមរបាយការណ៍ ការវិនិយោគលើហេដ្ឋារចនាសម្ព័ន្ធ និងការគាំទ្រសារពើពន្ធជាបន្តបន្ទាប់របស់ប្រទេសចិនត្រូវបានគេរំពឹងថានឹងជួយជំរុញកំណើន។ កំណើនផលិតផលក្នុងស្រុកសរុប (GDP) ត្រូវបានព្យាករថានឹងមានចំនួន៥,០ភាគរយ នៅឆ្នាំ២០២៥ និង ៤,៦ ភាគរយនៅឆ្នាំ២០២៦ ដោយអតិផរណាជារួមនៅតែថេរនៅឆ្នាំ២០២៥ និងកើនឡើងដល់ ០,៤ ភាគរយនៅឆ្នាំ២០២៦។
វិស័យថ្មីៗកំពុងកើនឡើង
វិស័យដែលកំពុងរីកចម្រើន របស់ប្រទេសចិនទទួលបានសន្ទុះក្នុងការចំណាយ លើវិស័យកំណើនប្រពៃណី ដោយវិស័យថ្មីៗកំពុងពង្រីកយ៉ាងឆាប់រហ័ស វិស័យទាំងនោះនៅតែមានទំហំតូច និងប្រមូលផ្តុំ ដែលកំណត់ការបង្កើតការងារយ៉ាងទូលំទូលាយ កំណើនប្រាក់ចំណូល និងការកើនឡើងនៃការប្រើប្រាស់។
តម្រូវការក្នុងស្រុកត្រូវបានរារាំង ដោយការកាត់បន្ថយបំណុលរបស់គ្រួសារ និងរដ្ឋាភិបាលមូលដ្ឋាន ដោយសារការធ្លាក់ចុះ នៃអចលនទ្រព្យយូរអង្វែង បានធ្វើឱ្យតារាងតុល្យការគ្រួសារចុះខ្សោយ និងធ្វើឱ្យប៉ះពាល់ ដល់ប្រាក់ចំណូលរបស់រដ្ឋាភិបាលមូលដ្ឋាន។
ការកើនឡើងនៃវិស័យសេដ្ឋកិច្ចថ្មី បាននាំមកនូវបញ្ហាប្រឈមផ្ទាល់ខ្លួន រួមទាំងហានិភ័យនៃការផ្គត់ផ្គង់លើសវដ្ត (risks of cyclical oversupply) ការប្រកួតប្រជែងតម្លៃកាន់តែខ្លាំង និងសម្ពាធគាំពារនិយមនៅក្នុងទីផ្សារក្រៅប្រទេស។
ការកើនឡើងនៃតម្លៃម្ហូបអាហារ
នៅឆ្នាំ២០២៤ ទោះបីជាមានការធ្លាក់ចុះសេដ្ឋកិច្ចពាក់កណ្តាលឆ្នាំក៏ដោយ ការកែតម្រូវគោលនយោបាយនៅក្នុងខែកញ្ញាបានគាំទ្រដល់កំណើននៅចុងឆ្នាំ។
ជាលទ្ធផល កំណើនបានងើបឡើងវិញ ដោយបង្កើនល្បឿនដល់៥,៤ភាគរយ ទាំងនៅក្នុងត្រីមាសទី៤ និងត្រីមាសទី១ ឆ្នាំ២០២៥ មុនពេលថយចុះបន្តិចមកត្រឹម ៥,២ ភាគរយនៅត្រីមាសទី២ ដែលយោងតាមរបាយការណ៍ គឺជាលទ្ធផលនៃកញ្ចប់ជំរុញសេដ្ឋកិច្ចដ៏ទូលំទូលាយ ដែលរួមមានការបន្ធូរបន្ថយរូបិយវត្ថុ ការពង្រីកសារពើពន្ធ និងវិធានការអចលនទ្រព្យគោលដៅ។
ការប្រើប្រាស់ឯកជន ដែលជំរុញដោយការឧបត្ថម្ភធនសារពើពន្ធតាមរយៈកម្មវិធីពាណិជ្ជកម្មទំនិញអ្នកប្រើប្រាស់ (consumer goods trade-in programs) មានចំនួនជាងពាក់កណ្តាលនៃកំណើនGDP ពិតប្រាកដនៅក្នុងឆមាសទីមួយ ឆ្នាំ២០២៥។ កម្លាំងនាំចេញ ដែលមានជំនួយពីការដឹកជញ្ជូនជាមុន មុនពេលការដំឡើងពន្ធរបស់សហរដ្ឋអាមេរិក ដែលនឹងកើតឡើង ក៏បានគាំទ្រដល់ការងើបឡើងវិញផងដែរ។
ទោះជាយ៉ាងណាក៏ដោយ អតិផរណានៅតែទាបនៅឆ្នាំ២០២៥ ដោយសន្ទស្សន៍តម្លៃទំនិញ ប្រើប្រាស់បានធ្លាក់ចុះ០,១ ភាគរយធៀបនឹងរយៈពេលមួយឆ្នាំ ក្នុងរយៈពេលប្រាំបីខែដំបូង ខណៈដែលអតិផរណាស្នូលបានកើនឡើងត្រឹមតែ ០,៥ ភាគរយប៉ុណ្ណោះ ទោះបីជាមានការកើនឡើងតិចតួចក៏ដោយ។
ភាពទន់ខ្សោយផ្នែករចនាសម្ព័ន្ធ
វិស័យអចលនទ្រព្យមិនទាន់ងើបឡើងវិញ ពីការធ្លាក់ចុះនៅឡើយទេ ដែលឆ្លុះបញ្ចាំងទាំងការកែតម្រូវរចនាសម្ព័ន្ធ និងការធ្លាក់ចុះមួយរយៈពេល (cyclical weakness)។ តម្រូវការថយចុះដោយសារការផ្គត់ផ្គង់លើស ការថយចុះនៃទំនុកចិត្តអ្នកប្រើប្រាស់ និងវិបត្តិរបស់អ្នកអភិវឌ្ឍន៍។
ស្តុក (Inventories) បានបន្តកើនឡើងនៅក្នុងឆមាសទីមួយនៃឆ្នាំ២០២៥ ជាពិសេសនៅតំបន់ជាយក្រុង និងតំបន់ដាច់ស្រយាល។ វិធានការគោលនយោបាយ ដូចជាការបង់រំលោះទាប(lower down payments) អត្រាការប្រាក់បញ្ចាំទាប ការពង្រីកឥណទានដល់គម្រោងដែលអាចសម្រេចបាន និងការទិញស្តុកដែលមិនទាន់លក់របស់រដ្ឋាភិបាលមូលដ្ឋាន បាននាំឱ្យមានការងើបឡើងវិញបន្តិចបន្តួចនៃការលក់។ ទោះជាយ៉ាងណាក៏ដោយ ការងើបឡើងវិញជារួមត្រូវបានគេរំពឹងថានឹងនៅតែមានល្បឿនយឺត។
ការធ្លាក់ចុះនៃអចលនទ្រព្យនេះ បានបង្ហាញពីភាពងាយរងគ្រោះនៅក្នុងគំរូសារពើពន្ធ ដែលផ្អែកលើដីធ្លីរបស់រដ្ឋាភិបាលមូលដ្ឋាន។ ខណៈពេលដែលជំហរ សារពើពន្ធនៅឆ្នាំ២០២៥ ត្រូវបានវាយតម្លៃថាជាការពង្រីក ជាមួយនឹងឱនភាពបឋម ដែលត្រូវបានកែតម្រូវកើនឡើង ០,៦ ភាគរយនៃផលិតផលក្នុងស្រុកសរុប ដោយកម្លាំងសារពើពន្ធទាំងមូលត្រូវបានរងផលប៉ះពាល់ ដោយសមត្ថភាពមានកម្រិតរបស់រដ្ឋាភិបាលមូលដ្ឋាន។
ការរឹតបន្តឹងផ្នែកហិរញ្ញវត្ថុអចលនទ្រព្យ និងរដ្ឋាភិបាលថ្នាក់ក្រោមជាតិទាំងនេះ បានកំណត់ទំនុកចិត្តរបស់អ្នកប្រើប្រាស់ ដែលបណ្តាលមកពីការរំពឹងទុកចំណូលខ្សោយ និងការខាតបង់ទ្រព្យសម្បត្តិទាក់ទងនឹងអចលនទ្រព្យ។
ខណៈពេលដែលការប្រើប្រាស់ក្នុងមនុស្សម្នាក់ (per capita consumption) បានកើនឡើង៥,៣ភាគរយ ធៀបនឹងរយៈពេលមួយឆ្នាំ នៅក្នុងឆមាសទីមួយនៃឆ្នាំ២០២៥ ដែលគាំទ្រដោយការជំរុញគោលនយោបាយ ដូចជា កម្មវិធីជួញដូរទំនិញប្រើប្រាស់ វិធានការទាំងនេះភាគច្រើនដាក់សម្ពាធ លើតម្រូវការសម្រាប់ទំនិញប្រើប្រាស់បានយូរ ហើយទំនងជាមិនអាចរក្សាសន្ទុះបានទេ។
វិស័យខាងក្រៅរបស់ប្រទេសចិន
ទោះបីជាមានភាពតានតឹង ពាណិជ្ជកម្មកើនឡើងក៏ដោយ វិស័យខាងក្រៅរបស់ប្រទេសចិន នៅតែមានភាពធន់នៅឆ្នាំ២០២៥។ ការនាំចេញទំនិញបានកើនឡើងយ៉ាងខ្លាំង ដែលជំរុញដោយរថយន្តអគ្គិសនី គ្រឿងបន្លាស់រថយន្ត និងតម្រូវការខ្លាំងពីទីផ្សារ ក្រៅពីសហរដ្ឋអាមេរិក ខណៈដែលការនាំចូលយឺតយ៉ាវ បានពង្រីកអតិរេកពាណិជ្ជកម្មដល់កម្រិតខ្ពស់បំផុត។ ឱនភាពពាណិជ្ជកម្មសេវាកម្ម បានវិលត្រឡប់មកកម្រិតមុនជំងឺកូវីដវិញ ចំពេលមានការងើបឡើងវិញ នៃវិស័យទេសចរណ៍ក្រៅប្រទេស និងការកើនឡើងនៃការទូទាត់ សម្រាប់កម្មសិទ្ធិបញ្ញា និងសេវាកម្មធានារ៉ាប់រង។
លំហូរចូលFDI នៅតែបន្ត ប៉ុន្តែបានផ្លាស់ប្តូរកាន់តែខ្លាំងឡើងឆ្ពោះទៅរកវិស័យបច្ចេកវិទ្យាខ្ពស់ និងវិស័យដែលគាំទ្រដោយគោលនយោបាយ។ លំហូរចេញហិរញ្ញវត្ថុដ៏ធំ និងជាប់លាប់បានជំរុញឱ្យតុល្យភាពនៃការទូទាត់ ធ្លាក់ចូលទៅក្នុងឱនភាព ទោះបីជាទុនបម្រុងប្តូរប្រាក់បរទេស នៅតែមានស្ថេរភាពប្រហែល៣,៣ ទ្រីលានដុល្លារអាមេរិកក៏ដោយ។
ការវិនិយោគលើហេដ្ឋារចនាសម្ព័ន្ធ
កំណើនត្រូវបានគេរំពឹងថា នឹងនៅតែមានស្ថេរភាពពេញមួយឆ្នាំ២០២៥ និងឆ្នាំ២០២៦។ ទោះបីជាមានកំណើនប្រាក់ចំណូលគ្រួសារទាប និងផលប៉ះពាល់អវិជ្ជមាន នៃទ្រព្យសម្បត្តិអចលនទ្រព្យ និងបរិយាកាសពាណិជ្ជកម្មសកល មិនប្រាកដប្រជាក៏ដោយ ការវិនិយោគលើហេដ្ឋារចនាសម្ព័ន្ធ និងការគាំទ្រសារពើពន្ធជាបន្តបន្ទាប់ ត្រូវបានគេរំពឹងថានឹងជួយទ្រទ្រង់កំណើន។
កំណើនGDP ត្រូវបានព្យាករថានឹងមានចំនួន៥ភាគរយ នៅឆ្នាំ២០២៥ និង ៤,៦ ភាគរយនៅឆ្នាំ២០២៦ ជាមួយនឹងអតិផរណាជារួមនៅតែថេរនៅឆ្នាំ ២០២៥ និងកើនឡើងដល់០,៤ ភាគរយនៅឆ្នាំ២០២៦។
ហានិភ័យចំពោះទស្សនវិស័យសេដ្ឋកិច្ច
បញ្ហាប្រឈមក្នុងស្រុក រួមមាន ការងើបឡើងវិញយឺតយ៉ាវក្នុងវិស័យអចលនទ្រព្យ ការកើនឡើងនៃភាពតានតឹងផ្នែកហិរញ្ញវត្ថុលើរដ្ឋាភិបាលមូលដ្ឋានមួយចំនួន ភាពទន់ខ្សោយជាប់លាប់ នៅក្នុងផ្នែកខ្លះនៃវិស័យសាជីវកម្ម និងគុណភាពទ្រព្យសកម្មកាន់តែយ៉ាប់យ៉ឺន ក្នុងចំណោមធនាគារខ្នាតតូច និងមធ្យមមួយចំនួន។
នៅខាងក្រៅ ភាពតានតឹងផ្នែកភូមិសាស្ត្រនយោបាយ និងជម្លោះពាណិជ្ជកម្មកើនឡើង អាចធ្វើឱ្យកំណើនសេដ្ឋកិច្ចសកលថយចុះ និងធ្វើឱ្យការបែកបាក់ផ្នែកភូមិសាស្ត្រសេដ្ឋកិច្ចកាន់តែខ្លាំង។
សមត្ថភាពរបស់ប្រទេសចិន ក្នុងការទ្រទ្រង់ការងើបឡើងវិញ និងសម្រេចបាននូវគោលដៅ កំណើនរយៈពេលមធ្យម ទៅរយៈពេលវែងរបស់ខ្លួន នឹងអាស្រ័យលើការផ្លាស់ប្តូរ ដោយជោគជ័យនៃគំរូកំណើនរយៈពេលខ្លី និងមធ្យមរបស់ខ្លួន៕
