ដោយៈ រ៉ាណេត
ភ្នំពេញៈ តំបន់ស្ថិតនៅប៉ែកខាងលិចរាជធានីភ្នំពេញ ដែលភាគច្រើននៅក្នុងខណ្ឌដង្កោ ត្រូវបានក្រុមអ្នកជំនាញធ្វើការព្យាករណ៍ពីចរន្តនៃការទិញ–លក់ និងតម្រូវការនៃការប្រើប្រាស់ដី នៅតែអាចបន្តភាពល្អប្រសើរ ជាមួយនឹងកំណើនតម្លៃតិចតួច ប៉ុន្តែសម្រាប់តំបន់មួយចំនួនទៀតដែលស្ថិតក្នុង និងជាយក្រុងអាចនឹងជួបសភាពទ្រឹងមួយរយៈ។
ចាប់តាំងពីអំឡុងចុងឆ្នាំ២០១៩ រហូតមក សម្រាប់ការទិញ–លក់ អចលនទ្រព្យ ក៏ដូចជាវិស័យដីធ្លី ស្ទើរគ្រប់តំបន់នៅទូទាំងរាជធានីភ្នំពេញ ហាក់មានសភាពស្ងប់ស្ងាត់បន្តិច ប៉ុន្តែសម្រាប់ដើមឆ្នាំ២០២០នេះ តំបន់មួយចំនួនដែលស្ថិតនៅជាយក្រុង អាចនឹងមានភាពល្អប្រសើរឡើងវិញ ជាពិសេសនៅប៉ែកខាងលិចក្រុង ដែលនឹងមានតម្រូវការប្រើប្រាស់ដីសម្រាប់វិស័យលំនៅដ្ឋានកម្រិតទាបលក្ខណៈឯកជន។
អគ្គនាយកក្រុមហ៊ុនអចលនទ្រព្យ Easy Property Investment Co.,Ltd លោក ម៉ម សិរីបញ្ញា បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី២៨ ខែមករា ឆ្នាំ២០២០កន្លងមកថា ចាប់តាំងពីអំឡុងពាក់កណ្តាលឆ្នាំ២០១៩ រហូតមក សកម្មភាពនៃការទិញ–លក់ អចលនទ្រព្យ ក៏ដូចជាវិស័យដីធ្លីនៅស្ទើរគ្រប់ទីកន្លែង ជាពិសេសនៅតំបន់ក្រុងហាក់មានភាពស្ងប់ស្ងាត់បន្តិច ប៉ុន្តែសម្រាប់ឆ្នាំ២០២០នេះ អាចនឹងការប្រែប្រួលបន្តិច។
លោកបន្តទៀតថា “នៅដើមឆ្នាំ២០២០នេះ យើងឃើញមានសកម្មភាពទិញ–លក់ នៅតំបន់មួយចំនួនចាប់ផ្តើមមានសកម្មភាពឡើងវិញ ដែលខុសពីឆ្នាំកន្លងទៅមានភាពស្ងប់ស្ងាត់” ។លោកបន្តថា “ការទិញ–លក់ នៅពេលនេះភាគច្រើនឃើញក្នុងរូបភាពជាដីឡូតិ៍ ជាពិសេសនៅតាមជាយក្រុង ហើយតំបន់ដែលមានសកម្មភាពផុសផុលជាងគេ គឺស្ថិតប៉ែកខាងលិចក្រុងដដែល ដោយសារតែតំបន់នេះ មានការអភិវឌ្ឍហេដ្ឋារចនាសម្ព័ន្ធច្រើនងាយស្រួលចេញចូលក្រុង ហើយក៏មានកំណើនប្រជាជនចូលទៅរស់នៅតំបន់នេះច្រើន ដែលជំរុញឱ្យតម្រូវការ និងការអភិវឌ្ឍលំនៅដ្ឋាន”។
លោកបញ្ជាក់ថា ជាធម្មតានៅពេលដែលមានតម្រូវការប្រើប្រាស់ដី មិនថាក្នុងទ្រង់ទ្រាយតូច ឬធំនោះទេ តម្លៃនឹងកើនឡើងទៅតាមហ្នឹង ដែលថ្លៃឬថោកអាស្រ័យលើតម្រូវការជាក់ស្តែង និងការចរចា។
លើកឡើងស្រដៀងគ្នាខាងលើនេះ លោកឧកញ៉ា តេង រិទ្ធី អគ្គនាយកក្រុមហ៊ុនអចលនទ្រព្យ Investment Group បានមានប្រសាសន៍ថា “តាមមើលឃើញរបស់ខ្ញុំមិនថាតំបន់ក្នុងក្រុង ឬជាយក្រុងនោះទេ ការទិញ–លក់ នៅតែមានសកម្មភាពធម្មតា ទាស់ត្រង់ថា តម្លៃមិនអាចឡើងច្រើននោះទេ ពោលគឺមានភាពប្រហាក់ប្រហែលគ្នានឹងឆ្នាំចាស់កន្លងទៅ”។
លោកឧកញ៉ាបានមានប្រសាសន៍បញ្ជាក់ថា “តម្លៃដីនៅក្នុងក្រុងភ្នំពេញ ស្ទើរតែគ្មានឱកាសឡើងទៀតទេសម្រាប់ឆ្នាំ២០២០នេះ ដោយសារតែកាលពីឆ្នាំកន្លងទៅតម្លៃបានឡើងខ្ពស់ស្ទើរដល់ពិដានរួចទៅហើយ ប៉ុន្តែវាក៏មិនធ្លាក់ចុះវិញនោះដែរ”។ លោកបន្តថា “គម្រោងអភិវឌ្ឍន៍ដែលត្រូវប្រើប្រាស់ដី ដែលមានទំហំធំៗនៅត្រឹមដើមឆ្នាំ២០២០នេះ នៅមិនទាន់ឃើញមានថ្មីនោះទេ ពោលគឺមានតែគម្រោងចាស់ដែលបន្សល់ទុកកាលពីឆ្នាំមុនៗ ដែលសង់មិនទាន់រួចរាល់តែប៉ុណ្ណោះ ប៉ុន្តែសម្រាប់នៅតំបន់ជាយក្រុងអាចមានឱកាសច្រើន ជាពិសេសនៅប៉ែកខាងលិចក្រុង”។
លោកឧកញ៉ាបានបញ្ជាក់ថា នៅតំបន់ខាងលិចក្រុង មានហេដ្ឋារចនាសម្ព័ន្ធធំៗច្រើន ដែលក្រៅពីផ្លូវសម្ដេចតេជោ ៦០ម៉ែត្រ នៅមានផ្លូវ៥០ម៉ែត្រ ផ្លូវ៣០ម៉ែត្រ និងផ្លូវសំខាន់ៗជាច្រើនទៀត ងាយស្រួលក្នុងការចេញចូលក្រុង ចេញទៅតាមបណ្តាខេត្តផ្សេងៗចេញទៅតាមផ្លូវជាតិលេខ១ ផ្លូវជាតិ២ ផ្លូវជាតិលេខ៣ និងភ្ជាប់ទៅកាន់ផ្លូវជាតិលេខ៤។ ក្រៅពីនេះ នៅមានគម្រោងធំៗជាច្រើនទៀត ដូចជាគម្រោងបុរី គម្រោងបណ្តុំផ្ទះល្វែង គម្រោងសាងសង់ផ្សារទំនើបធំៗចំនួន៣ គម្រោងមជ្ឈមណ្ឌលអគារពាណិជ្ជកម្មដ៏ធំរបស់ក្រុមចិន ជាពិសេសនៅមានគម្រោងសាងសង់ព្រលានយន្តអន្តរជាតិភ្នំពេញថ្មី ដែលកំពុងចាប់ផ្តើមដំណើរការរបស់ក្រុមហ៊ុន OCIC ជាដើម។
លោកឧកញ៉ាបានសង្កត់ធ្ងន់ថា “មិនលើសពីពាក់កណ្តាកឆ្នាំ២០២០នោះទេ ភាពពុះកញ្ជ្រលនៃការទិញ–លក់នៅតំបន់ខាងលើនេះ អាចនឹងកើតមានសាជាថ្មី ខណៈដែលពេលនេះ គេនៅរង់ចាំមើលពីស្ថានភាពសង្គមជាក់ស្ដែង ដែលកំពុងកើតមានថា តើអាចប្រែទៅជាល្អប្រសើរបានកម្រិតណាតែប៉ុណ្ណោះ”៕
