អគារខ្ពស់ៗជាច្រើនលេចចេញជារូបរាងនៅក្នុងក្រុងភ្នំពេញ។ រូបថត៖ ម៉ៃ វីរៈ
ដោយៈ រ៉ាណេត
ភ្នំពេញៈ វត្តមានអាគារកប់ពពគ ដែលបាននិងកំពុងលូតលាស់ឡើងជារៀងរាល់ថ្ងៃ កំពុងផ្លាស់ប្តូរមុខមាត់ប្រទេសនេះ និងធ្វើឲម្យពិភពលោកស្គាល់កម្ពុជាកាន់តែច្បាស់ និងកាន់តែទុកចិត្តមកលើកម្ពុជា ប៉ុន្តែសំណួរដែលមានការចោទសួរមួយគឺថា តើការសាងសង់អាគារខ្ពស់ៗ នៅរាជធានីភ្នំពេញនេះពិតជាធ្វើឡើងនៅទីតាំងស័ក្តិសម ដែលនឹងមិនមានបញ្ហាផ្នែកនគរូបនីយកម្មនាពេលអនាគតឬទេ?។
សំណង់អគារខ្ពស់ៗដែលជាមជ្ឈមណ្ឌលពាណិជ្ជកម្ម អគារស្នាក់នៅសហកម្មសិទ្ធិ (ខុនដូ) អាផាតមិន ជាដើម សុទ្ធតែត្រូវបានសាងសង់ឡើងក្រោមលក្ខខណ្ឌមួយចំនួនដែលត្រូវបានកំណត់ និងអនុញ្ញាតពីក្រសួង ក៏ដូចជាស្ថាប័នពាក់ព័ន្ធដូចខាងក្រោម។
-->
អ្នកវិភាគមួយចំនួនបានលើកឡើងថា វត្តមានអគារខ្ពស់ៗហាក់មិនត្រូវបានអនុញ្ញាតឱ្យសាងសង់នៅតាមតំបន់មួយចំនួន ដែលមានហេដ្ឋារចនាសម្ព័ន្ធ ឬផ្លូវថ្នល់តូចៗនោះទេ ដោយហេតុថា វិសាលភាពនៃសំណង់អគារ ដែលមានមនុស្សចេញចូលច្រើនអាចបង្កផលវិបាកដល់ការកកស្ទះក្នុងការធ្វើដំណើរជាដើម។ ការលើកឡើងនេះត្រូវបានអ្នកជំនាញផ្នែកច្បាប់សំណង់ពន្យល់ថា ហាក់មិនត្រឹមត្រូវនោះទេ ផ្ទុយទៅវិញវត្តមាននៃសំណង់អគារខ្ពស់ៗទាំងនេះ បានចូលរួមក្នុងការលើកកម្ពស់សោភ័ណភាពក្នុងតំបន់ ជាពិសេសបានបង្កើនចំណូលដល់សេដ្ឋកិច្ចជាតិផងដែរ។
លោកសាស្ត្រាចារ្យ ទួស សាភឿន អគ្គលេខាធិការរងគណៈកម្មការស្ថាបត្យកកម្ពុជា-អាស៊ាន បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៦ ខែមិថុនានេះថា នៅក្នុងប្រទេសកម្ពុជា មិនទាន់មានច្បាប់ណាមួយដែលចែងថា គេមានដីហើយ មិនអនុញ្ញាតឱ្យសាងសង់អគារខ្ពស់ៗនោះទេ។ លោកបានបន្តទៀតថា សម្រាប់ការអភិវឌ្ឍ ឬការសាងសង់សំណង់អគារគ្រប់ប្រភេទ ជាពិសេសអគារដែលមានកម្ពស់ៗច្រើនជាន់គឺត្រូវបានរដ្ឋាភិបាលលើកទឹកចិត្ត និងជម្រុញបន្ថែម។
លោកបានបន្តទៀតថា “នៅក្នុងច្បាប់សាងសង់សំណង់អគារខ្ពស់ៗ ត្រូវបានក្រសួងកំណត់ ឱ្យមានការបែងចែកគម្លាត ដែលជាទីធ្លានៅជុំវិញបរិវេណនៃតួអគារទាំងមូល ទាំងផ្នែកខាងមុខ ខាងក្រោយ និងចំហៀង ដើម្បីធានារក្សាបាននូវបរិយាកាសល្អ បរិស្ថានស្អាត និងមានតំបន់បៃតង ដើម្បីលើកកម្ពស់សោភ័ណភាពឱ្យកាន់តែស្រស់ស្អាត”។ លោកបន្ថែមថា “ម្ចាស់កម្មសិទ្ធិដីសុទ្ធតែអាចមានសិទ្ធិសាងសង់ សំណង់អគារខ្ពស់ៗបានទាំងអស់គ្នា លើកលែងតែតំបន់ហាមឃាត់មួយចំនួនដូចជា បរិវេណជុំវិញព្រះបរមរាជវាំង ជុំវិញវិមានឯករាជ្យ តំបន់វត្តភ្នំ ក៏ដូចជាតំបន់ទីស្ដីការគណៈរដ្ឋមន្ត្រីជាដើម ដែលត្រូវបានកំណត់ពីរយៈកម្ពស់នៃអគារដែលអាចសាងសង់”។
ទោះជាយ៉ាងណាធនាគារពិភពលោកប្រចាំកម្ពុជា បានបញ្ចេញរបស់ការណ៍របស់ខ្លួនកាលពីឆ្នាំមុនថា តំបន់មួយចំនួនដូចជា តំបន់បឹងកេងកង១ មិនស័ក្តិសមសំរាប់សាងសង់អាគារខ្ពស់ៗនោះទេ ដោយសារបញ្ហាហេដ្ឋារចនាសម្ព័ន្ឋ ដែលធ្វើឲ្យលំហូរចរាចរណ៍នៅតំបន់នេះមានសភាពកាន់តែអាក្រក់នាពេលអនាគត។
យ៉ាងណាក៏ដោយ នាយិកាក្រុមហ៊ុនអចលនទ្រព្យ Century 21 Cambodia លោកស្រី Grace Rachny Fong បានមានប្រសាសន៍ឲ្យដឹងផងដែរថា គ្រប់ការសាងសង់អគារទាំងអស់ សុទ្ធតែត្រូវបានអនុញ្ញាតពីក្រសួង និងស្ថាប័នពាក់ព័ន្ធទាំងអស់ បន្ទាប់ពីបានសិក្សាលម្អិតពីផលវិជ្ជមាន និងអវិជ្ជមានរួចរាល់។ លោកស្រីបន្តទៀតថា ជាទូទៅអគារដែលមានកម្ពស់ចាប់ពី៧ជាន់ឡើងទៅ ត្រូវបានរាប់ថាជាប្រភេទសំណង់អគារដែលខ្ពស់។
លោកស្រីបានបន្តថា “មុនពេលចាប់ផ្តើមសាងសង់ អ្នកអភិវឌ្ឍសុទ្ធតែដាក់លិខិតស្នើសុំសិទ្ធិសាងសង់ទៅដល់ក្រសួងរៀបចំដែនដី នគរូបនីយកម្ម និងសំណង់ ក៏ដូចជាស្ថាប័នពាក់ព័ន្ធ ដើម្បីទទួលបានមន្ត្រីជំនាញរបស់ក្រសួងចុះធ្វើការសិក្សាលម្អិត និងសមស្របទៅតាមលក្ខខណ្ឌនៃច្បាប់សាងសង់ទាំងអស់”។ លោកស្រីបន្តទៀតថា“សំខាន់បំផុតអ្នកអភិវឌ្ឍចាំបាច់ធានាបានគុណភាពសំណង់ និងបរិយាកាសជុំវិញឱ្យល្អ លើកលែងតែអ្នកអភិវឌ្ឍមួយចំនួនតូច ដែលមានគំនិតអវិជ្ជមានចង់ចំណេញច្រើន ពីផ្ទៃអគារដែលធ្វើការសាងសង់បំពាននឹងច្បាប់សាងសង់ ដូចជាការគេងលើចំណែកទីធ្លាជុំវិញតួអគារជាដើម”។
លោកស្រី Grace Rachnyបានបន្តថា ជាក់ស្ដែងដូចជាតំបន់បឹងកេងកង១ ដែលបច្ចុប្បន្នបានក្លាយជាតំបន់ពាណិជ្ជកម្មចំរុះ ដែលពោរពេលទៅដោយសំណង់អគារធំៗ និងខ្ពស់ៗ រួចទៅហើយ។ បឹងកេងកង១គឺត្រូវបានគេចាត់ទុកថាជាតំបន់ពាណិជ្ជកម្មក្នុងតំបន់ពិសេស ដោយសារតែមានអគារការិយាល័យជាច្រើនម៉ឺនយូនីត ដែលមនុស្សជាច្រើនប្រមូលផ្តុំនៅទីនេះ ហើយនៅពេលខាងមុខនេះ នឹងមានវត្តមានរបស់សំណង់អគារខ្ពស់ៗជាច្រើនទៀត ខណៈដែលបច្ចុប្បន្នអគារមួយចំនួនកំពុង តែសម្រុកសាងសង់បញ្ចប់គម្រោងរបស់ខ្លួន។
ចំណែកប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានមានប្រសាសន៍ផងដែរថា វត្តមានអគារខ្ពស់ៗគ្រប់ប្រភេទ សុទ្ធបានចូលរួមក្នុងការបង្កើនសេដ្ឋកិច្ចជាតិទាំងអស់ ដែលត្រូវបានលើកទឹកចិត្តក្នុងការសាងសង់។
ទោះជាយ៉ាងណាលោកបានស្នើឲ្យមានការពិចារណា ចំពោះទីតាំងដែលត្រូវសាងសង់អគារខ្ពស់ៗ ក៏ត្រូវពិចារណាទៅលើបញ្ហាហេដ្ឋារចនាសម្ព័ន្ធ ដូចជា ផ្លូវថ្នល់ចេញចូលជាដើម ចៀសវាងមានបញ្ហាណាមួយកើតឡើងមិនអាចសង្គ្រោះបាន ដូចជាករណីគ្រោះអគ្គីភ័យជាដើម។
លោកបន្តថា “ករណីអាគារខ្ពស់ៗដែលរាំងស្ទះច្រកចេញចូល ហាក់មានតិចតួចបំផុត ព្រោះម្ចាស់អគារ ក៏ដូចជាអ្នកអភិវឌ្ឍសុទ្ធតែបានសិក្សាលម្អិតពីផលវិជ្ជមាន និងអវិជ្ជមាន ដែលពួកគេមិនយកទុនវិនិយោគ ធ្វើឱ្យទៅជារឿងខាតបង់ក្រោយពេលសាងសង់នោះទេ”៕
