ដោយ ស៊ីវ ម៉េង
ភ្នំពេញ៖ តំបន់ភ្នំប្រសិទ្ឋត្រូវបានអ្នកជំនាញយល់ឃើញថា ជាតំបន់សមស្របសំរាប់សាងសង់លំនៅដ្ឋាន និងមជ្ឈមណ្ឌលពាណិជ្ជកម្មនាពេលអនាគត ដោយសារកត្តាអំណោយផលជាច្រើន។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិត គីម ហ៊ាង បានថ្លែងឲ្យដឹងកាលពីពេលថ្មីៗនេះថា តំបន់ភ្នំប្រសិទ្ធមានសក្តានុពល ខ្ពស់ក្នុងការវិនិយោគលើវិស័យអចលនទ្រព្យនាពេលអនាគត ដោយសារតំបន់នេះមានទីតាំងមិនឆ្ងាយពីទីក្រុង ជាតំបន់ដែលមានសណ្ឋានដីខ្ពស់ ដីសល់ទំនេរច្រើន ដែលងាយស្រូលក្នុងការរៀបចំទីក្រុងនាពេលអនាគត។
លោកបន្តថា “ខ្ញុំគិតថាតំបន់នេះនឹងមានការរីកចម្រើននាពេលអនាគត ដោយសារលក្ខខ័ណ្ឌខាងលើ និងស្ថានភាពអាកាសធាតុល្អ និងហេដ្ឋារចនាសម្ព័ន្ឋងាយតភ្ជាប់ជាមួយក្រុងភ្នំពេញ។លោកបន្តថា “វាជាតំបន់ដែលមានសណ្ឋានដីល្អ ខ្ពស់មិនប្រឈមមុខនឹងការលិចទឹក ពិសេសតំបន់នេះមានរមណីយដ្ឋានព័ទ្ឋជុំវិញ ដែលអំណោយផលដល់ការរស់នៅនិងការកម្សាន្ត។
អគ្គនាយកក្រុមហ៊ុន Premium housing Co, Ltd លោក ម៉ាន់ ច័ន្ទឌី ដែលបានបោះទុនជិត ១លានដុល្លារ ដើម្បីទិញដីពុះឡូត៍លក់ជាមួយដៃគូរបស់ខ្លួនបានថ្លែងឲ្យផងដែរថា តំបន់នេះកាន់តែខិតមកកៀករាជធានីភ្នំពេញហើយ ដោយសារដីស្ថិតក្នុងស្រុកអង្គស្នួលនេះ ស្ថិតនៅជាប់ជាមួយខ័ណ្ឌព្រែកព្នៅ និងខ័ណ្ឌពោធិសែនជ័យ ដែលជាខ័ណ្ឌបង្កើតថ្មីនៅរាជធានីភ្នំពេញ។ លោកបន្តថា តំបន់នេះមានចម្ងាយ២០គីឡូម៉ែត្រប៉ុណ្ណោះពីរាជធានីភ្នំពេញ ដែលជាតំបន់កំពុងមានការអភិវឌ្ឍយ៉ាងឆាប់រហ័ស ដោយសារមានផ្លូវបេតុង និងមានភ្លើងអគ្គិសនីតចូលដល់បណ្តើរៗហើយ ប៉ុន្តែបណ្តាញទឹកស្អាតមិនទាន់ភ្ជាប់នៅឡើយទេ។
លោកបន្តថា “ដោយសារមើលឃើញស្ថានភាពបែបនេះ ទើបលោកវិនិយោគពុះដីឡូត៍នៅតំបន់នេះ ដោយចាប់យកអតិថិជនជាអ្នកមានប្រាក់ចំណូលទាប និងមធ្យម ព្រោះដីមួយឡូត៍មានតំលៃចាប់ពី២៧០០ដុល្លារ -៥០០០ដុល្លារប៉ុណ្ណោះ។
លោក ផិត សិរីវឌ្ឍន៍ ប្រធានក្រុមប្រឹក្សាភិបាលក្រុមហ៊ុន WHP Realty Co, Ltd បានថ្លែងថា លោកកំពុងសិក្សាដីមួយចំនួន ដើម្បីផ្តល់ឲ្យក្រុមអ្នកវិនិយោគបរទេស ដោយសារលោកមើលឃើញសក្តានុពលមួយចំនួននៅតំបន់នេះ នាពេលអនាគត ទី១ តំបន់កប់ស្រូវដែលនៅជាប់គ្នានឹងតំបន់នេះ កំពុងមានការអភិវឌ្ឍយ៉ាងឆាប់រហ័ស ទី២ គំរោងទីក្រុងបៃតងមួយ នឹងឆាប់ផ្តើមនៅតំបន់នេះក្នុងពេលឆាប់ៗ ទី៣ មានគំរោងអភិវឌ្ឍន៍របស់ឧកញ៉ាជាច្រើននៅតំបន់នេះ ដូចជា ក្រុមហ៊ុន ING CITY, 7NG និងដីរបស់លោកឧកញ៉ាលី យ៉ុងផាត់ ដែលធ្វើឲ្យលោកគិតថាតំបន់នេះ នឹងក្លាយជាទីក្រុងថ្មីមួយនាពេលអនាគតឆាប់ៗនេះ។
លោកបន្តថា “ការពង្រីកផ្លូវជាតិលេខ៥ និងការអភិវឌ្ឍនៅតាមបណ្តោយផ្លូវនេះ នឹងអាចធ្វើឲ្យតំបន់ភ្នំរាប និងភ្នំបាសិទ្ឋនឹងរីកចំរើនលឿននាពេលអនាគត ព្រោះហេដ្ឋារចនាសម្ព័ន្ឋនៅតំបន់នេះកំពុងត្រូវបានរៀបចំ។ លោកបន្តថា “តំលៃដីសមរម្យនៅតំបន់នេះ ក៏អាចទាក់ទាញអ្នកវិនិយោគអាចមានលទ្ឋភាពបោះទុនផងដែរ”៕
