ដោយៈ ជេស៊ីកា
ភ្នំពេញៈ វានឹងជាព្រឹត្តិការណ៍ដ៏គួរឲ្យរំភើបមួយសំរាប់កម្ពុជា នៅពេលប្រទេសនេះបានទទួលសិទ្ឋ ធ្វើជាម្ចាស់ផ្ទះរៀបចំកីឡាស៊ីហ្គេមនាឆ្នាំ២០២៣ខាងមុខ។
មន្រ្តីជំនាញរបស់គណៈកម្មាធិការជាតិ រៀបចំការប្រកួតកីឡា ស៊ីហ្គេម លើកទី៣២ ឆ្នាំ ២០២៣ (CAMSOC) លោក វ៉ាត់ ចំរើន បានអះអាងថា កម្ពុជា ទទួលបានជោគជ័យបន្ថែមទៀត ទៅលើការកំណត់វិញ្ញាសារ ដែលត្រូវបានដាក់ឱ្យប្រកួតក្នុងស៊ីហ្គេមឆ្នាំ២០២៣ ហើយការលក់សិទ្ធិទូរទស្សន៍ ក៏កម្ពុជាទទួលបានការគាំទ្របន្ថែម ពីតំណាងប្រទេសទាំងអស់នៅអាស៊ានផងដែរ។
ជាប្រធានប្រតិភូកម្ពុជា ដែលបានទៅចូលរួមក្នុងកិច្ចប្រជុំក្របខ័ណ្ឌលេខាធិការដ្ឋាននៃសហព័ន្ធកីឡាអាស៊ីអាគ្នេយ៍ នៅទីក្រុងបាងកក ប្រទេសថៃ កាលពីសប្តាហ៍មុន លោក វ៉ាត់ ចំរើន បានថ្លែងថា យើងបានបង្ហាញទៅគ្រប់ប្រទេស អំពីការត្រៀមប្រភេទវិញ្ញាសាជាង៦០០ ហើយក្នុងវិញ្ញាសាទាំងអស់ហ្នឹង មានការជជែកវែកញែកគ្នា ដោយវិញ្ញាសាភាគច្រើន បានទទួលការគាំទ្រពីបណ្ដាប្រទេសទាំងអស់ គឺនៅមានវិញ្ញាសាតិចតួចទេ ដែលគេស្នើសុំឱ្យយើងមានការពិចារណាឡើងវិញ។
លោក វ៉ាត់ ចំរើន បានបន្ថែមថា “ក្នុងនាមជាម្ចាស់ផ្ទះ យើងបានយកសំណូមពររបស់គេ មកធ្វើការជាមួយសហព័ន្ធកីឡាជាតិ មួយចំនួនរបស់យើងឡើងវិញ”។ លោកបន្តថា “នេះជាអ្វីដែលយើងបានខិតខំប្រឹងប្រែង ដើម្បីធ្វើការតស៊ូមតិបន្ដ តែវឌ្ឍនភាពរបស់យើង បានដើរទៅមុខយ៉ាងរលូន ព្រោះយើងបានសុំឱ្យប្រទេសទាំងអស់ គាំទ្រកម្ពុជានិងជួយកម្ពុជា ឱ្យធ្វើការប្រកួតទទួលបានជោគជ័យ”។
ប្រទេសទាំងអស់ បានសន្យានឹងជួយដល់កម្ពុជា ដែលខិតខំប្រឹងប្រែង ក្នុងការធ្វើម្ចាស់ផ្ទះស៊ីហ្គេម លើកដំបូងនេះ ឱ្យបានជោគជ័យ។
សម្រាប់វិញ្ញាសាជាង ៦០០ ដែលបានកំណត់នេះ គឺផ្តោតការប្រកួតប្រជែងនៅលើប្រភេទវិញ្ញាសាចំនួន៣៩ និងកីឡាសម្ដែង១ប្រភេទ ដែលត្រូវបានសម្រេចដាក់ក្នុងស៊ីហ្គេម ឆ្នាំ ២០២៣។
នៅក្នុងកិច្ចប្រជុំក្របខ័ណ្ឌលេខាធិការដ្ឋាន នៃសហព័ន្ធកីឡាស៊ីហ្គេម អង្គប្រជុំរបស់អាស៊ាន ក៏បានពិភាក្សាបន្ថែមលើការរៀបចំ ឱ្យមានការលក់សិទ្ធិទូរទស្សន៍ ក្រោមគំនិតផ្ដួចផ្ដើមដំបូងគេរបស់កម្ពុជានៅស៊ីហ្គេម ឆ្នាំ ២០២៣ ហើយគំនិតនេះ ទទួលបានការគាំទ្រពីប្រទេសជាសមាជិក ដោយគេបានចាត់ទុកថា “ជារបត់ថ្មី ដើម្បីជាគំរូសម្រាប់ស៊ីហ្គេម ជាបន្តបន្ទាប់ទៀត”។
លោកវ៉ាត់ ចំរើន បានបញ្ជាក់ថា ការរៀបចំឱ្យមានការលក់សិទ្ធិទូរទ ស្សន៍នេះ ត្រូវបានប្រទេសទាំងអស់ចាត់ទុកថា ជារបត់នៃការផ្លាស់ប្ដូរមួយដ៏សំខាន់ ក្នុងប្រវត្តិសាស្ត្ររបស់ស៊ីហ្គេម ព្រោះមានតែកម្ពុជាទេ ដែលអាចធ្វើជាគំរូ ក្នុងការលក់សិទ្ធិទូរទស្សន៍នេះ ដើម្បីឱ្យស៊ីហ្គេមបន្ដៗទៀត យកជាមេរៀន បទពិសោធន៍ ទាំងការផលិតឱ្យមានគុណភាព និងការផ្ដល់នូវតម្លាភាព ក្នុងការចែករំលែកភាគលាភ នៃការលក់សិទ្ធិទូរទស្សន៍ ចំពោះស៊ីហ្គេមនៅកម្ពុជានេះ៕