ដោយ គង់ សូរិយា
ភ្នំពេញ៖ ទន្ទឹមនឹងការរីកចម្រើនវិស័យសំណង់ និងអចលនទ្រព្យបានធ្វើឲ្យទីក្រុងភ្នំពេញមានការផ្លាស់ប្តូរមុខមាត់យ៉ាងលឿន ជាក់ស្តែងសំណង់ខ្ពស់ៗនៅរាជធានីភ្នំពេញបានកើនដល់១២៧៥អាគារ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ដែលបានដាក់បង្ហាញក្នុងសន្និបាតក្រសួងនាព្រឹកថ្ងៃទី២៤ ធ្នូនេះបានឲ្យដឹងថា សំណង់ខ្ពស់ៗដែលមានកំពស់ចាប់ពី៤ជាន់ឡើងទៅមានចំនួន១២៧៥អាគារ ប៉ុន្តែបើគិតតែឆ្នាំ២០១៨នេះ សំណង់អាគារខ្ពស់ៗដែលបានសាងសង់ចាប់ពី៥ជាន់ឡើងទៅ មានចំនួន១១០អាគារ។
ជាមួយនឹងការរីកចម្រើននេះ ទុនវិនិយោគក្នុងវិស័យនេះ មានទំហំទឹកប្រាក់រាប់ពាន់លានដុល្លារ ដោយឆ្នាំ២០១៨នេះទុនវិនិយោគ ក្នុងវិស័យសំណង់មានទំហំ៥២០០លានដុល្លារ ថយចុះ១២០០លានដុល្លារធៀបនឹងឆ្នាំមុន ដែលមានទុនវិនិយោគរហូតដល់៦៤០០លានដុល្លារអាមេរិក។
ការរីកចម្រើនក្នុងវិស័យនេះ កើតឡើងដោយកត្តាសំខាន់ៗជាច្រើន រួមមានកត្តាសន្តិភាព ស្ថេរភាពនយោបាយ កំនើនសេដ្ឋកិច្ចរ៉ឹងមាំដែលកម្ពុជាសម្រេចបានកំនើនជាង៧ភាគរយក្នុងរយៈពេលជាង២ទសវត្សរ៍ ប្រព័ន្ឋច្បាប់វិនិយោគមានភាពទាក់ទាញ និងកម្ពុជាជាទីផ្សារថ្មីដែលមានការរីកចម្រើនលឿន ដោយផ្តល់ឲ្យអ្នកវិនិយោគទទួលបានផលចំណេញច្រើនពីការវិនិយោគរបស់ពួកគេ៕