ដោយ ស៊ីវ ម៉េង
ព្រះសីហនុ៖ ក្រុងព្រះសីហនុបានក្លាយជាប៉ូសសេដ្ឋកិច្ចទី២ យ៉ាងឆាប់រហ័សដោយគិតតែរយៈពេល១១ខែនៃឆ្នាំនេះ ទឹកប្រាក់វិនិយោគក្នុងវិស័យសំណង់មានទំហំទឹកប្រាក់រហូតដល់ជាង១០០០លានដុល្លារអាមេរិក កើនឡើងជាង១០០០ភាគរយ បើធៀបនឹងរយៈពេលដូចគ្នាឆ្នាំ២០១៧ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ដែលបានចែកផ្សាយក្នុងសន្និបាតបូកសរុបការងាររបស់ក្រសួងឆ្នាំ ២០១៨ និងលើកទិសដៅការងារ ឆ្នាំ២០១៩ នាព្រឹកថ្ងៃទី ២៤ ខែធ្នូ ឆ្នាំ ២០១៨ បង្ហាញថា វិស័យសំណង់នៅខេត្ត ព្រះសីហនុមានការហក់ឡើងជាខ្លាំង ដោយមានគំរោងវិនិយោគរហូតដល់២៩៧គម្រោង ស្មើនឹងផ្ទៃក្រឡាសំណង់ជាង១,៦លានម៉ែត្រការ៉េ។
របាយការណ៍ដដែលបានឲ្យដឹងថា បើគិតតែគម្រោងសំណង់មានការកើនឡើង ៥៨ភាគរយ និងមានទំហំក្រឡាផ្ទៃសំណង់មានការកើនឡើង១០២ភាគរយ និងទំហំទឹកប្រាក់វិញ មានការកើនឡើងរហូតដល់១១៤៧ភាគរយ។ តាមគម្រោងសំណង់អាគារទាំងនេះ មានសំណង់អាគារដែលមានកម្ពស់ចាប់ពី៥ជាន់ ដល់៤៣ជាន់ មានចំនួនរហូតដល់៦០គម្រោង។
ទុនវិនិយោគលើវិស័យសំណង់នៅកម្ពុជា ក្នុងឆ្នាំនេះមានទំហំទឹកប្រាក់៥២០០លានដុល្លារអាមេរិក ដែលមានចំនួន២៨៦៧គម្រោង លើផ្ទៃក្រឡាដីជាង១១ លានម៉ែត្រការ៉េ៕