ដោយ គង់ សូរិយា
ភ្នំពេញ៖ អ្នកវិនិយោគអចលនទ្រព្យហុងកុង បានចាប់ផ្តើមវិនិយោគលើបុរីជាលើកដំបូងនៅទីក្រុងភ្នំពេញ ស្របពេលដែលទីផ្សារលំនៅដ្ឋានលក្ខណៈបុរីនៅជាប់ដីនៅតែមានតម្រូវការខ្ពស់នៅកម្ពុជា។
នាយកក្រុមហ៊ុន Penta Global Ltd លោក Nixon Lee បានមានប្រសាសន៍ឲ្យដឹង ក្នុងពិធីសម្ពោធជាផ្លូវការបុរីសូឡី៨៨ កាលពីដើមសប្តាហ៍នេះថា Penta Global Limited “Penta” គឺជាក្រុមហ៊ុនអភិវឌ្ឍន៍អន្តរជាតិ ដែលមានទីតាំងនៅទីក្រុងហុងកុង និងបានបើកដំណើរការដោយស្ថាបនិក៦រូប ដែលមានបទពិសោធន៍ខ្ពស់ ក្នុងវិស័យអចលនទ្រព្យ នៅទីក្រុងហុងកុង សហរដ្ឋអាមេរិក ចិន ប្រទេសថៃ ប្រទេសម៉ាឡេស៊ី និងកោះតៃវ៉ាន់។ នៅក្នុងឆ្នាំថ្មីនេះ Penta នឹងផ្តោតទៅលើប្រទេស ដែលស្ថិតនៅក្នុងខ្សែក្រវ៉ាត់មួយផ្លូវមួយ ហើយប្រទេសកម្ពុជា គឺជាជំហានដំបូងនៅក្នុងគម្រោងរបស់ Penta។
គំរោងនេះវិនិយោគដោយក្រុមហ៊ុន Penta Global Limited ហើយគំរោងនេះស្ថិតនៅតាមបណ្តោយផ្លូវវេងស្រេង សង្កាត់ចោមចៅ ខ័ណ្ឌពោធិសែនជ័យ ក្រុងភ្នំពេញ។
លោក Nixon Lee បានបន្តថា Penta បានជ្រើស រើសប្រទេសកម្ពុជា ដើម្បីចាប់ផ្តើមអភិវឌ្ឍន៍គោលនយោបាយ និងសេដ្ឋកិច្ច ការបើកទូលាយខាងលំហូររូបិយប័ណ្ណបរទេស និងតម្រូវការគេហដ្ឋានខ្ពស់ សម្រាប់មនុស្សជំនាន់ក្រោយ។
លោកបន្តថា ការងាកមកវិនិយោគលើគម្រោងបុរីនេះ ព្រោះក្រុមហ៊ុនចង់ទាញយកចំណែកទីផ្សារ ពីអតិថិជនចិន និងកម្ពុជា ដែលចង់វិនិយោគឬចង់បានលំនៅឋានស្នាក់នៅ ដែលមានគុណភាព បរិយាកាសល្អ អាចងាកមកចាប់អារម្មណ៍លើគម្រោងនេះ។
លោក Sunny Yung អ្នករៀបចំគម្រោងនេះបានមានប្រសាសន៍ឲ្យដឹងផងដែរថា បុរី Soleil 88 គឺត្រូវបានកសាងឡើង ជាប្រភេទផ្ទះបែបទីក្រុងចំនួន៨៨ផ្ទះ ក្នុងគម្រោងអភិវឌ្ឍន៍នេះ ក៏មានរៀបចំឱ្យមានជាសួនច្បារ ហេដ្ឋាចនាសម្ព័ន្ធល្អ និងការការពារសុវត្ថិខ្ពស់សម្រាប់ការស្នាក់នៅ។ លោកបានបន្ថែមថា ក្រុមហ៊ុនមានផ្ទះចំនួន២ប្រភេទ គឺផ្ទះដែលមានកម្ពស់៣ជាន់ និងផ្ទះដែលមានកម្ពស់៤ជាន់៕
