ដោយវុត្ថា
ព្រះសីហនុ៖ រដ្ឋបាលខេត្តព្រះសីហនុបានចាប់ផ្តើរៀបចំកែលម្អសួនច្បារចំនួន ០៤កន្លែង ក្នុងក្រុងព្រះសីហនុ ដើម្បីលើកស្ទួយសោភ័ណ្ឌក្នុងទីប្រជុំជនក្រុងឱ្យកាន់តែមានភាពទាក់ទាញ និងបម្រើឱ្យផលប្រយោជន៍សាធារណៈ។
សួនទាំង០៤កន្លែងនោះរួមមាន ៖
-តាំងទី១ សួនច្បារកូនសោរនៅក្បែរវិមានឯករាជ្យ សង្កាត់លេខ៣ ក្រុងព្រះសីហនុ។
-ទីតាំងទី២ សួនច្បារនៅក្បែរអតីតមហោស្រព សង្កាត់លេខ២ ក្រុងព្រះសីហនុ ។
-ទីតាំងទី៣ សួនច្បារកន្ទុយនាគ នៅសង្កាត់លេខ៤ ក្រងព្រះសីហនុ ។
-ទីតាំងទី៤ សួនកុមារនៅឆ្នេរអូរឈើទាល សង្កាត់លេខ៤ កែលំអឱ្យទៅជាសួនកុមារថ្មី និងបន្ថែមឧបករណ៍ សម្រាប់កុមារតូចៗលេងកម្សាន្ត។
គម្រោងកែលម្អសួនច្បារកូនសោរនេះ ជាគម្រោងទី១ ដែលត្រូវចាប់ផ្តើមធ្វើមុនគេ បន្ទាប់មកនឹងធ្វើការកែលម្អសួនច្បារផ្សេងៗទៀតជាបន្តបន្ទាប់ ។
លោក យន្ត មីន អភិបាលខេត្តព្រះសីហនុ បានឱ្យដឹងថា ចំពោះការកែលម្អសួនច្បារកូនសោរនេះ ជាគម្រោងទី១ ដែលត្រូវចាប់ផ្តើមធ្វើមុនគេ រួចនឹងបន្តធ្វើការកែលម្អសួនច្បារផ្សេងៗទៀតទៅផែនការដែលបានគ្រោងទុក។
លោក ក៏បានអំពាវនាវស្នើសុំមតិយោបល់ពីបងប្អូនប្រជាពលរដ្ឋចំពោះការរៀបចំនេះ និងលើកទឹកចិត្តដល់ស្ថាបត្យករកម្ពុជាដែលមានចំណាប់អារម្មណ៍ក្នុងការជួយផ្តល់គំនិតល្អ ដើម្បីរចនាសួនទាំងនេះអោយកាន់តែមានភាពទាក់ទាញផងដែរ។
ពិធីសែនព្រេន បើកការដ្ឋានគម្រោងកែលម្អសួនច្បារកូនសោរ ស្ថិតនៅភូមិ២ សង្កាត់៣ ក្រុងព្រះសីហនុ ត្រូវបានរៀបចំធ្វើនៅថ្ងៃទី២២ ខែកុម្ភៈ ឆ្នាំ២០១៩ ក្រោមអធិតីភាព លោក ហៀក ហ៊ីមុល្លី អភិបាលរងខេត្ត តំណាងអភិបាល នៃគណៈអភិបាលខេត្ត ៕
