ដោយ៖ ដួង ចន្ទ្រា
ភ្នំពេញ៖ យុគសម័យប្រើប្រាស់បច្ចេកវិទ្យា បាននិងកំពុងផ្លាស់ប្តូរនិន្នាការជាច្រើនក្នុងពិភពលោក ក្នុងនោះក៏មានការផ្លាស់ប្តូរប្រព័ន្ឋទូទាត់សាច់ប្រាក់ផងដែរ ខណៈដែលប្រជាជនក្នុងពិភពលោកកាន់តែច្រើនឡើងៗ ភ្ជាប់បច្ចេកវិទ្យាទៅនឹងជីវិតរស់នៅរបស់ខ្លួន។
ទូរសព្ទដៃគ្រប់ដណ្ដប់លើជីវិតរស់នៅក្នុងប្រទេសចិន ហើយប្រជាជនចិនរាប់រយលាននាក់ ប្រើប្រាស់ទូរសព្ទដៃសម្រាប់និយាយជាមួយមិត្តភ័ក្ត តាមដានព័ត៌មាន និងបង់ថៃ្លរាល់មុខទំនិញទាំងអស់ រាប់ចាប់ពីទំនិញប្រើប្រាស់សម្រាប់តម្រូវការមូលដ្ឋានរហូតដល់ទំនិញប្រណីតៗ នៅតាមហាងជាក់ស្ដែង និងតាម Online ជាក់ស្តែងក្នុងថ្ងៃបញ្ចុះថ្លៃពិសេសនៅប្រទេសចិន កាលពីថ្ងៃទី 11 ខែវិច្ឆិកា កន្លងទៅនេះ ការទិញទំនិញមានទំហំទឹកប្រាក់រហូតដល់ទៅជាង២៥ ពាន់លានដុល្លារក្នុងមួយថ្ងៃ ហើយក្នុងនោះជាងពាក់កណ្ដាល ត្រូវបានធ្វើឡើងតាមរយៈទូរសព្ទដៃ។
-->
នេះជាលើកដំបូងហើយ ដែលទូរសព្ទដៃបានឈានមុខកុំព្យូទ័រក្នុងការទិញទំនិញតាម Online ក្នុងពិធីបុណ្យលក់ទំនិញ ។
ក្នុងសង្គមមួយដែលសាច់ប្រាក់ កំពុងបាត់បង់ប្រជាប្រិយភាព នៅពេលនេះ សូម្បីការផ្ដល់ប្រាក់ទឹកតែឲ្យទៅបុគ្គលិក ឬការផ្ដល់ប្រាក់កាសដល់អ្នកខ្វះខាត អាចធ្វើទៅបានតាមរយៈប្រព័ន្ធឌីជីថលថែទៀតផង។ ខណៈដែលមានមនុស្សជាច្រើនទូទាត់ទំនិញ ឬសេវាដោយប្រើប្រាស់កំពូលកម្មវិធី ដូចជា កម្មវិធី Alipay ដែលមានអ្នកប្រើប្រាស់ជាង៧០០លាននាក់ ឬកម្មវិធី WeChat នៅពេលនេះចំនួនមនុស្ស ដែលព្រមទទួលយកការទូទាត់តាមកម្មវិធីបែបនេះ តាមរយៈការប្រើប្រាស់កូដ QR ក៏មានការកើនឡើងផងដែរ។
កម្មវិធីបែបនេះអនុញ្ញាតឲ្យបុគ្គលគ្រប់រូប ដែលមានទូរសព្ទដៃមួយ និងកូដQRមួយ ទទួលបានថ្លៃទូទាត់ ទំនិញ ឬក៏សេវានានា ដែលមានន័យថា បុគ្គលគ្រប់រូបអាចក្លាយជាពាណិជ្ជករម្នាក់បាន ប្រសិនបើពួកគេមានរបស់សម្រាប់លក់។អត្ថប្រយោជន៍ពីបច្ចេកវិទ្យានេះ កំពុងមានប្រជាប្រិយភាពខ្លាំងឡើង នៅបណ្តាប្រទេសផ្សេងៗទៀត ក្រៅពីប្រទេសចិនផងដែរ។
នៅក្នុងទីក្រុង ញ៉ូវ យ៉ក ដែលជាមជ្ឈមណ្ឌលហិរញ្ញវត្ថុរបស់សហរដ្ធអាមេរិក ការទូទាត់ប្រាក់ តាមរយៈ កម្មវិធី WeChat របស់ប្រទេសចិន បច្ចុប្បន្ននេះត្រូវបានប្រើប្រាស់ក្នុងការជិះតាក់ស៊ី និងនៅតាមហាងទំនិញនានាទូទាំងក្រុង។ ទីក្រុងធំៗដទៃទៀតដូចជា Las Vegas ក៏កំពុងចាប់ផ្ដើមប្រើប្រាស់បចេ្ចកវិទ្យានេះដែរ។ សម្រាប់ប្រទេសឥណ្ឌា ជាប្រទេសដែលមានប្រជាជនច្រើនជាងគេបំផុតលំដាប់ទីពីរក្នុងពិភពលោក បន្ទាប់ពីប្រទេសចិន ការទូទាត់ដោយមិនប្រើសាច់ប្រាក់ក៏កំពុងចាប់ផ្ដើមពេញនិយមផងដែរ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ជាធនាគារធំជាងគេទី១នៅកម្ពុជា និងកំពុងបោះទុនវិនិយោគលើប្រព័ន្ឋបច្ចេកវិទ្យា ដើម្បីទូទាត់សាច់ប្រាក់ដល់អតិថិជនបានថ្លែងថា បច្ចេកវិទ្យាកំពុងចូលមកក្នុងវិស័យហិរញ្ញវត្ថុ និងជីវិតរបស់យើង ហេតុនេះទើបយើងវិនិយោគលើប្រព័ន្ឋនេះ ដើម្បីសម្រួល និងផ្តល់ភាពងាយស្រួលដល់អតិថិជនរបស់យើង ក៏ដូចជា សម្រួលដល់ដំណើរការធនាគាររបស់យើង។
លោកបន្តថា “ប្រព័ន្ឋបច្ចេកវិទ្យាបាន និងកំពុងធ្វើឲ្យនិន្នាការទូទាត់សាច់ប្រាក់កាន់តែមានភាពផ្លាស់ប្តូរជាវិជ្ជមាន ព្រោះប្រជាពលរដ្ឋមិនចាំបាច់កាន់សាច់ប្រាក់ទេ ពួកគេអាចប្រើប្រាស់បច្ចេកវិទ្យានានា ដើម្បីទូទាត់សាច់ប្រាក់របស់ពួកគេ។
លោកឆារស៍ វ៉ាន់ប្រធានស្តីទីសមាគមធនាគារកម្ពុជាបានថ្លែងថា បច្ចេកវិទ្យាកំពុងផ្លាស់ប្តូរនិន្នាការទូទាត់សាច់ប្រាក់តាមបែបប្រពៃណី ទៅជាការទូទាត់សាច់ប្រាក់តាមរយៈបច្ចេកវិទ្យា ដែលនិន្នាការនេះកំពុងរីកចម្រើននៅប្រទេសនានាក្នុងពិភពលោក ពិសេសប្រទេសចិន ដែលពួកគេអាចប្រើប្រាស់ប្រព័ន្ឋបច្ចេកវិទ្យាកាន់តែច្រើន ហើយកម្ពុជាកំពុងចាប់ផ្តើមទទួលយកនិន្នាការថ្មីនេះ ដែលផ្តល់ផលប្រយោជន៍យ៉ាងច្រើនដល់ប្រជាពលរដ្ឋ និងវិស័យហិរញ្ញវត្ថុ។
លោកបន្តថា “ប្រជាជនមិនចាំបាច់កាន់លុយតាមខ្លួនទេ ពួកគេអាចប្រើប្រាស់ការទូទាត់តាមរយៈកម្មវិធីទូរស័ព្ទ ដើម្បីទូទាត់លើការទិញទំនិញរបស់ខ្លួននៅតាមទីផ្សារនានានិងប្រព័ន្ឋទូទាត់ដទៃទៀត”៕
