ដោយ រ៉ាណេត
ភ្នំពេញ៖ ស្របពេលក្រុមហ៊ុនអចលនទ្រព្យកើនឡើង ការប្រកួតប្រជែងក៏កើនឡើងព្រមគ្នាផងដែរ ដែលបច្ចុប្បន្នមានក្រុមហ៊ុនប្រមាណ២០០ កំពុងប្រកួតប្រជែងក្នុងវិស័យនេះ។
ការបង្កើតជាក្រុមហ៊ុនភ្នាក់ងារក្នុងវិស័យអចលនទ្រព្យនេះ មានភាពងាយស្រួល ប៉ុន្តែត្រូវធ្វើដូចម្ដេច ដើម្បីអាចឈជើងប្រកួតប្រជែង នៅលើទីផ្សារបានប្រកបដោយភាពជោគជ័យបានជារឿងសំខាន់មួយ។
អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) ដែលទទួលបានពានរង្វាន់ប្រចាំក្នុងនាមជាក្រុមហ៊ុនឆ្នើម លោកឧកញ៉ា នួន រិទ្ធី បានបង្ហើបឱ្យដឹងពីគន្លឹះដែលអាចឈរជើងក្នុងវិស័យនេះថា ការបង្កើតជាក្រុមហ៊ុនភ្នាក់ងារអចលនទ្រព្យ មនុស្សភាគច្រើនសុទ្ធតែអាចមានលទ្ធភាពបង្កើតបាន ព្រោះតែមិនតម្រូវឱ្យមានការចំណាយទុនច្រើនសន្ធឹកសន្ធាប់ ដូចការបង្កើតក្រុមហ៊ុនជំនួញទូទៅនោះទេ ដែលសូម្បីតែអ្នកខ្លះមានចំនួនសមាជិតត្រឹម២-៣នាក់ ក៏អាចបង្កើតជាក្រុមហ៊ុនភ្នាក់ងារទទួលប្រឹក្សាជាមួយអតិថិជនបានដែរ។
លោកឧកញ៉ាបន្តថា “ការបង្កើតវាងាយស្រួលនោះទេ ប៉ុន្តែបញ្ហាសួរត្រង់ថាក្រុមហ៊ុនដែលបង្កើតទាំងនោះ អាចមានលទ្ធភាពធ្វើការប្រកួតប្រជែង ដើម្បីទទួលបានអតិថិជនជាមួយបណ្តាក្រុមហ៊ុននានាបានដែរឬទេ ជារឿងដែលត្រូវឆ្លើយ”។ លោកបន្តថា មានលទ្ធភាព ឬមិនអាច ត្រូវសួរលើខ្លួនឯងជាមុនសិនថា តើបានស្គាល់ពីខ្លួនយើងច្បាស់ដែរ ឬទេ មានចំណូលចិត្ត មានចំណេះដឹង និងជំនាញផ្នែកវិស័យអចលនទ្រព្យបានកម្រិតណា ហើយតើផ្នែកណាមួយក្នុងវិស័យនេះដែលយើងចង់ចាប់ធ្វើជាគោលដៅ”។
លោក នួន រិទ្ឋី បានបន្តទៀតថា ក្រោយពេលដែលបានដឹង និងចំណុចទាំងអស់ដូចបានរៀបរាប់ខាងលើនេះ ត្រូវមានភាពអំណត់ព្យាយាម បង្កើនសមត្ថភាពពាក់អាជីពដែលខ្លួនកំពុងធ្វើប្រកបដោយវិជ្ជាជីវៈ ដែលប្រាកដថាល្អឥតខ្ចោះចំពោះការផ្តល់សេវាទៅអតិថិជនរបស់ខ្លួន។ បន្ថែមពីនេះត្រូវមានការយល់ដឹងឱ្យស៊ីជម្រៅពាក់ព័ន្ធ ទៅនឹងផ្នែកច្បាប់ដែលពាក់ព័ន្ធ ជៀសវាងផ្តល់ហានិភ័យ ឬការខាតបង់ប្រយោជន៍ដោយប្រការណាមួយទៅដល់អតិថិជនរបស់ខ្លួន។
លោកបន្តថា “អ្វីដែលសំខាន់បន្ថែមពីនេះ ភាពស្មោះត្រង់ ការដាក់ខ្លួនឱ្យអតិថិជនរបស់ខ្លួនប្រើប្រកបដោយទំនុកចិត្ត ដែលទាំងអស់នេះវាជាចំណុចដ៏ពិសេសមួយ ដែលអាចចងចិត្ត និងផ្ដល់ភាពក់ក្ដៅទៅដល់អតិថិជន”៕
