ដោយៈ គង់ សូរិយា
ភ្នំពេញៈ រាជធានី ខេត្តចំនួន៨នៅកម្ពុជា នៅតែជាភូមិសាស្រ្តមានសក្តានុពលលើការវិនិយោគ ដោយសារភាពងាយស្រួលហេដ្ឋារចនាសម្ព័ន្ឋ ការតភ្ជាប់ និងប្រជាជនរស់នៅច្រើន។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ដែលបានចេញផ្សាយ កាលពីសប្តាហ៍មុនបានបង្ហាញថា គម្រោងវិនិយោគថ្មីៗ និងគម្រោងពង្រីកផលិតកម្មសរុប ៥៣គម្រោង ដែលមានទុនវិនិយោគ សរុបជាង១ពាន់លានដុល្លារ (អាមេរិក) ត្រូវបានរាជរដ្ឋាភិបាលកម្ពុជាអនុម័ត នៅក្នុងខែសីហាឆ្នាំ២០២៤ ដែលសកម្មភាពនេះ នឹងចូលរួមចំណែកក្នុងការលើកកម្ពស់ សមត្ថភាពផលិតកម្មក្នុងស្រុក និងជំរុញការនាំចេញទំនិញផលិតនៅកម្ពុជា ទៅទីផ្សារអន្តរជាតិកាន់តែច្រើន។
-->
ក្នុងចំណោមទុនវិនិយោគទាំងអស់ ការវិនិយោគរបស់វិនិយោគិនចិន ឈរនៅលេខ១ ដោយមានចំណែកប្រមាណ ៨៤,៧២ភាគរយ និងវិនិយោគិនក្នុងស្រុក ៩,១២ភាគរយ ក្រៅពីនោះ ជាការវិនិយោគមកពីប្រទេសសិង្ហបុរី, កោះ Samoa, ហូឡង់, ម៉ាឡេស៊ី និងអាមេរិក។
យោងតាមCDCបានឲ្យដឹងទៀតថា គម្រោងវិនិយោគទាំងអស់នោះ គឺមាននៅក្នុងតំបន់សេដ្ឋកិច្ចពិសេស (SEZ) និងក្រៅតំបន់សេដ្ឋកិច្ចពិសេស ដូចជា គម្រោងបង្កើតតំបន់សេដ្ឋកិច្ចពិសេស (ស្រែអំបិល), គម្រោងបង្កើតរោងចក្រផលិត សម្បកកង់រថយន្ត រោងចក្រផលិតភេសជ្ជៈ, សណ្ឋាគារ … និងគម្រោងពង្រីករោងចក្រផលិតចំណីសត្វ ជាដើម។
គម្រោងទាំងនោះ មានភាគច្រើនមាន នៅក្នុងខេត្តព្រះសីហនុ, កំពង់ស្ពឺ, ស្វាយរៀង, កោះកុង, រាជធានីភ្នំពេញ, កណ្តាល,តាកែវ និងខេត្តក្រចេះជាដើម។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានមានប្រសាសន៍ឲ្យដឹងថា បើទោះបី ស្ថានភាពសេដ្ឋកិច្ចពិភពលោកឆ្នាំ២០២៤ នៅតែបន្តទទួលរងផលអវិជ្ជមាន ពីវិបត្តិកូវីដ១៩ និងការផ្ទុះសង្គ្រាម រវាងបណ្តាប្រទេសមួយចំនួន ក៏ប្រទេសកម្ពុជា នៅតែអាចមានសមត្ថភាព ក្នុងការទាក់ទាញអ្នកវិនិយោគឱ្យមកបើកអាជីវកម្ម និងពង្រីកផលិតកម្មជាបន្តបន្ទាប់។
លោកបន្តថា “កំណើនវិនិយោគ គឺបញ្ជាក់ពីភាពល្អប្រសើរនៃកត្តានយោបាយក្នុងស្រុក និងកត្តាទីផ្សារនាំចេញទៅលក់នៅទីផ្សារអន្តរជាតិ”។លោកបន្ថែមថា “នេះជាមោទនភាពមួយរបស់រដ្ឋាភិបាល និងប្រជាជនកម្ពុជា។ មូលហេតុដែលអ្នកវិនិយោគមកបណ្តាក់ទុននៅកម្ពុជា គឺដោយសារពួកគេមើលឃើញសក្តានុពល ដូចជា កត្តាស្ថិរភាពនយោបាយសន្តិសុខនិងទំនាក់ទំនងល្អជាមួយប្រទេស/ទីផ្សារអន្តរជាតិនានា”។
អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា លោក ជា វុទ្ធី បានថ្លែងក្នុងវេទិកាវិនិយោគលើវិស័យឧស្សាហកម្ម លើបច្ចេកវិទ្យាទំនើបថ្មីៗក្នុងខេត្តព្រះសីហនុ កាលពីចុងខែមីនា ឆ្នាំ២០២៤ បានលើកឡើងថា កំណើននៃគម្រោងវិនិយោគទាំងថ្មី និងចាស់គឺបានដើរតួនាទីយ៉ាងសំខាន់ ក្នុងការរុញច្រានឧស្សាហូបនីយកម្មនៅកម្ពុជា។
លោកបន្តថា គម្រោងវិនិយោគចិនមួយចំនួន បានរួមចំណែកជំរុញឧស្សាហកម្មប្រតិគមន៍ (backward linkages) តាម រយៈការកាត់បន្ថយ ការនាំចូលវត្ថុធាតុដើម ពីក្រៅប្រទេសដោយតភ្ជាប់ ជាមួយសហគ្រាសផ្គត់ផ្គង់ក្នុងស្រុក ដូចជា គម្រោងវិនិយោគផលិតសម្បក កង់រថយន្តរបស់ក្រុមហ៊ុនចិននៅខេត្តស្វាយរៀង ដែលវត្ថុធាតុដើម១០០ភាគរយ ជាជ័រកៅស៊ូដែលត្រូវបានទិញក្នុងស្រុក”។
លោកបន្តថា ក្នុងក្របខណ្ឌវិនិយោគ យោងតាមការកត់ត្រារបស់ក្រុមប្រឹក្សាអភិវឌ្ឍន៍កម្ពុជា ចិន គឺជាប្រភពទុនវិនិយោគបរទេសធំជាងគេរបស់កម្ពុជា ដែលរួមចំណែកប្រមាណ ៨៨ភាគរយ នៃទុនវិនិយោគបរទេស សរុបក្នុងឆ្នាំ២០២៣។
ទុនវិនិយោគពីប្រទេសចិន បានកើនឡើងពីប្រមាណ១,៧ប៊ី(ពាន់)លានដុល្លារអាមេរិក នៅឆ្នាំ២០២២ ដល់ប្រមាណ ៣,២ប៊ី(ពាន់)លានដុល្លារអាមេរិកនៅឆ្នាំ២០២៣។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជាបានបង្ហាញថា ចាប់ពីខែមករា ដល់ខែសីហាឆ្នាំ២០២៤ ការនាំចេញ -នាំចូលទំនិញរបស់កម្ពុជា ជាមួយទីផ្សារអន្តរជាតិមានទឹកប្រាក់ សរុប៣៦,៤៨ពាន់លានដុល្លារ កើនឡើង១៦,៥ភាគរយ បើធៀបរយៈពេលដូចគ្នាក្នុងឆ្នាំ២០២៣ ក្នុងនោះទំនិញកម្ពុជានាំចេញ មានទឹកប្រាក់១៧,៥៨ពាន់លានដុល្លារ កើន ១៦,៧ភាគរយ និង ទំនិញនាំចូល១៨,៩ពាន់លានដុល្លារកើន១៦,២ភាគរយ៕
