ដោយ វុត្ថា
ភ្នំពេញ៖ វិស័យសំណង់ និងអលនទ្រព្យនៅរយៈពេល៣ខែនៃដើមឆ្នំា ២០១៩ នេះមានដំណើរការល្អប្រសើរ ជាមួយលំហូរទុនរបស់អ្នកវិនិយោគក្រៅប្រទេសនៅតែបន្តមកកាន់កម្ពុជា ហើយគម្រោងមួយចំនួនដែលពន្យាពេលសាងសង់ក្នុងឆ្នាំ២០១៨ កន្លងមក ក៏ត្រូវចាប់ផ្តើមដំណើរការឡើងវិញ។ នេះបើតាមការឱ្យដឹងពី អ្នកនាង អាន សុធីតា នាយិការប្រចាំប្រទេសនៃក្រុមហ៊ុន CBRE ប្រចាំនៅកម្ពុជា។
អ្នកនាងបានមានប្រសាសន៍ឱ្យដឹងតាមទូរស័ព្ទនាល្ងាចថ្ងៃទី២៨ មិនាកន្លងមកថា នៅដើមឆ្នាំនេះ ទីផ្សារការិយាល័យនៅតែដំណើរការធម្មតា អាគារជួលក៏ដូចគ្នាដែរ ហើយ លំនៅដ្ឋានបែបសហកម្មសិទ្ឋ (ខុនដូ) មានការលក់ដាច់ច្រើនជាងមុនដោយសារតែមានតម្លៃសមរម្យ ពោលគឺមានតម្លៃ២០០០ ដុល្លារក្នុងមួយម៉ែត្រការ៉េ ។ មិនត្រឹមតែប៉ុណ្ណោះ អ្នកស្រីមើលឃើញថា រយៈពេល៣ខែមកនេះ មានប្រជាជនខ្មែរទិញលំនៅដ្ឋានខុនដែរច្រើន ដោយសារតែស្ថានភាពតម្លៃសមរម្យ។
អ្នកស្រីបន្តថា “សម្រាប់ស្ថានភាពទីផ្សារអចលនទ្រព្យនៅក្នុងឆ្នាំ ២០១៩នេះ មានលក្ខណៈល្អប្រសើរជាងឆ្នាំ២០១៨ ពោលដោយសារតែឆ្នាំ២០១៨ មានភាពរអាក់រអ៊ួលព្រោះវាជាឆ្នាំបោះឆ្នោត”។
យោងតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់បានបង្ហាញកន្លងមកថា ទុនវិនិយោគក្នុងវិស័យសំណង់ នៅប្រទេសកម្ពុជាគិតចំពោះត្រឹមតែខែមករា នៃឆ្នាំ២០១៩ មានទុនវិនិយោគរហូតដល់ទៅប្រមាណ ៨២៩លានដុល្លារអាមេរិក កើនឡើង១៧៨% បើប្រៀបធៀបទៅនឹងរយៈពេលដូចគ្នានៅឆ្នាំ២០១៨។
ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ាបានមានប្រសាសន៍កន្លងមកថា ការអភិវឌ្ឍអចលនទ្រព្យ និងសំណង់បានក្លាយជាសសរស្តម្ភស្នូល ដែលជំរុញកំណើនសេដ្ឋកិច្ចកម្ពុជា។ ជាក់ស្តែង ទុនវិនិយោគក្នុងវិស័យសំណង់ក្នុងរយៈពេល១០ឆ្នាំ គិតពី២០១០ ដល់២០១៩ មានទុនប្រមាណ ៤៣,៨៩៦ លានដុល្លារសហរដ្ឋអាមេរិក។
លោកបន្តទៀតថា “ក្រុមហ៊ុនសាងសង់ និងក្រុមហ៊ុនសិក្សាគម្រោងប្លង់ ដែលមានអាជ្ញាបណ្ណ មានចំនួន២៣០៧ ក្រុមហ៊ុនមានស្ថាបត្យករប្រមាណជាង២៥០០នាក់ និងមានវិស្វករប្រមាណជាង៣០,០០០ នាក់”។
លោករដ្ឋមន្ត្រីបន្ថែមថា ជាមួយនឹងការរីកចម្រើន ដែលកំពុងមានសន្ទុះដ៏លឿននេះ ក៏មើលឃើញពីតម្រូវការវិនិយោគជាច្រើន មានជាអាទិ៍ ការអភិវឌ្ឍសំណង់លំនៅឋាន សំណង់ពាណិជ្ជកម្ម សំណង់សេវាកម្ម សំណង់ឧស្សាហកម្ម សំណង់ហេដ្ឋារចនាសម្ព័ន្ធរូបវ័ន្ត និងបរិស្ថាន សេដ្ឋកិច្ច សង្គម ពិសេសការអភិវឌ្ឍលំនៅឋានតម្លៃសមរម្យ បណ្តាញផ្លូវ ការផ្គត់ផ្គង់ទឹកស្អាត អគ្គិសនី ប្រព័ន្ធលូនិងប្រព័ន្ធការពារទឹកជំនន់ ស្ថានីយប្រព្រឹត្តកម្មទឹកកខ្វក់ ការគ្រប់គ្រងសំណល់រឹងនិងរាវ លំហសាធារណៈនិងផ្ទៃបៃតង បរិក្ខាទីក្រុង ជាដើម៕
