ដោយគង់ សូរិយា
ភ្នំពេញ៖ អភិបាលរាជធានីភ្នំពេញ លោកឃួង ស្រេងនឹងចូលរួមបើកការដ្ឋានសាងសង់សាលពិព៌ណតម្លៃ១៨លានដុល្លារអាមេរិក ដែលមានស្តង់ដាលំដាប់អន្តរជាតិនៅថ្ងៃទី៣១ មិនាស្អែកនេះ។
អគ្គនាយករងក្រុមហ៊ុនOCICលោកទូច សំណាងបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២៩មិនាកន្លងមកថា ការបើកការដ្ឋានសាងសង់សាលពិព៌ណតម្លៃ១៨លានដុល្លារអាមេរិកនេះ នឹងធ្វើឡើងនៅម៉ោង៩ព្រឹក នាថ្ងៃទី៣១មិនាខាងមុខនេះ។ សាលពិព៌ណដែលស្ថិតក្នុងទីក្រុងរណបនេះ សម្រាប់រៀបចំសន្និសីទ កិច្ចប្រជុំ និងសាលសំរាប់រៀបចំអាពាហ៍ពិពាហ៍ផងដែរ។
លោកបន្តថា “តាមគំរោងសាលពិព៌ណដ៏ធំនេះ នឹងធ្វើជាទីតាំងសំរាប់រៀបចំកិច្ចប្រជុំកំពូលអាស៊ី អឺរ៉ុប ដែលកម្ពុជានឹងធ្វើម្ចាស់ផ្ទះនៅឆ្នាំ២០២០ខាងមុខនេះ”។
ទីក្រុងរណបជ្រោយចង្វារមានផ្ទៃដីសរុប១១០ហិកតា ជាទីក្រុងថ្មីមួយដែលក្រុមហ៊ុនOCICគ្រោងរៀបចំជាSmart City និងប្រែក្លាយតំបន់នេះជាមជ្ឈមណ្ឌលពាណិជ្ជកម្មលំដាប់អន្តរជាតិមួយ ដែលគ្រោងចំណាយទុនវិនិយោគ រហូតដល់ជាង៣០០០លានដុល្លារអាមេរិក។
លោកទូច សំណាងបានបន្តថា ការសាងសង់សាលពិព៌ណដែលមានទទឹង៨០ម៉ែត្រ និងបណ្តោយ២៤០ម៉ែត្រនេះបាន និងកំពុងចាប់ផ្តើមហើយ និងគ្រោងបញ្ចប់នៅពាក់កណ្តាលឆ្នាំ២០២០ខាងមុខនេះ។ សាលពិព៌ណលំដាប់អន្តរជាតិនេះ មានទំហំជាង៣ម៉ឺនម៉ែត្រការ៉េ ក្នុងនោះ១ម៉ឺនម៉ែត្រការ៉េស្ថិតនៅក្រោមដី៕
