ដោយគង់ សូរិយា
ភ្នំពេញ៖ ក្រុមហ៊ុនធំមួយមកពីទីក្រុងហុងកុង បានសម្រេចទិញដីដើម្បីសាងសង់អាគារកប់ពពក កំពស់៦៩ជាន់នៅទីក្រុងកោះពេជ្រនាពេលឆាប់ៗខាងមុខនេះ។
យោងតាមប្រភពគួរឲ្យទុកចិត្ត ដែលជាក្រុមហ៊ុនកំពុងអភិវឌ្ឍន៍ទីក្រុងកោះពេជ្របានមានប្រសាសន៍ឲ្យដឹងកាលពីថ្ងៃទី១ មេសាកន្លងមកថា រហូតមកទល់ពេលនេះ ក្រុមហ៊ុនមានមូលដ្ឋាននៅទីក្រុងហុងកុងបានចុះហត្ថលេខាទិញដី នៅទីក្រុងកោះពេជ្ររួចហើយ ដើម្បីសាងសង់អាគារពាណិជ្ជកម្មកប់ពពកមួយ ដែលមានកំពស់៦៩ជាន់ ហើយគំរោងនេះនឹងប្រកាសនៅកំឡុងខែឧសភាខាងមុខនេះ។
លោកបន្តថា “តាមខ្ញុំដឹងទីតាំងរបស់គំរោងនេះ ស្ថិតនៅក្បែរស្ពាននាគភ្លោះនៅចំណុចក្បាលកោះពេជ្រ ព្រោះក្រុមហ៊ុនបានស៊ីញ៉េទិញដីនៅទីនោះរួមហើយ”។លោកបន្តថា “វាទំនងជាអាគារពាណិជកម្មចម្រុះ ដែលរួមមានការិយាល័យ សណ្ឋាគារ ខុនដូជាដើម”។
ទោះជាយ៉ាងណាលោក សុំមិនបញ្ចេញអត្តសញ្ញាណក្រុមហ៊ុននោះឡើយ ប៉ុន្តែតាមប្រភពពីក្រុមហ៊ុនអចលនទ្រព្យអន្តរជាតិមួយបានឲ្យដឹងថា ក្រុមហ៊ុនគ្រោងអភិវឌ្ឍន៍គំរោងនេះជាក្រុមហ៊នធំមួយ ដែលបានចុះបញ្ជីរនៅផ្សារហ៊ុននាទីក្រុងហុងកុង។ ក្រុមហ៊ុននោះជាក្រុមហ៊ុនMorgan Ford។
ថ្នាក់ដឹកនាំក្រុមហ៊ុនMorgan Fordមិនបានឆ្លើយតបតាមអ៊ីម៉េល ដើម្បីធ្វើអត្ថាធិប្បាយនៅឡើយទេ៕
