ដោយ វុត្ថា
ភ្នំពេញ៖ សម្តេចតេជោហ៊ុន សែន នាយករដ្ឋមន្ត្រីនៃប្រទេសកម្ពុជា នឹងអញ្ជើញកាត់ខ្សែបូរ បើកឱ្យដំណើរការផ្លូវការនូវស្ពានមិត្តភាពកម្ពុជា-ជប៉ុន(ស្ពានជ្រោយចង្វារទី ១) នៅថ្ងៃស្អែកនេះ ដើម្បីជាការដូចូលឆ្នាំប្រពៃណីជាតិខ្មែរខាងមុខនេះ សម្រាប់បងប្អូនប្រជាពលរដ្ឋខ្មែរធ្វើដំណើរឆ្លងកាត់ ទៅកាន់ស្រុកដំណើតដោយពុំមានការកកស្ទះចរាចរណ៍។
សម្តេចតេជោ នៅក្នុងពិធីសម្ពោធដាក់ឱ្យដំណើរការជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពត សាងសង់ឡើងក្រោមជំនួយរបស់រដ្ឋាភិបាលជប៉ុន នៅថ្ងៃទី២ ខែមេសា ឆ្នាំ២០១៩នេះ ដោយសម្តេចបានសម្តែងការអបអរសាទរ ចំពោះសមិទ្ធិផលស្ពានជ្រោយចង្វារទី១ ដែលត្រូវបានកែលម្អ និងជុសជុលហើយ នឹងត្រូវបើកឱ្យដំណើរការនៅថ្ងៃស្អែកនេះផងដែរ។
សម្តេចតេជោក៏អរគុណចំពោះរដ្ឋាភិបាលជប៉ុនផងដែរ ដែលបានជួយជួសជុល ក៏ដូចជាកសាងថ្មីផងដែរនូវស្ពានជ្រោយចង្វារនេះ សម្រាប់ឱ្យប្រជាពលរដ្ឋបានប្រើប្រាស់ឡើងវិញ ជាពិសេសមុនឱកាសមុនបុណ្យចូលឆ្នាំថ្មីខាងមុខ។
សម្តេចបន្តថា “ខ្ញុំនឹងកាត់ខ្សែបូរដឹកនាំប្រជាពលរដ្ឋ ដើរឆ្លងកាត់ស្ពាននេះ ដោយថ្មើរជើង ពីត្រើយម្ខាងទៅត្រើយម្ខាងទៀត”។
ស្ពានមិត្តភាពកម្ពុជា-ជប៉ុន ឬស្ពានជ្រោយចង្វារទី១មានប្រវែង៩៧១មែត្រ ទទឹង១៣ម៉ែត្រ ស្ថិតនៅតាមបណ្តោយផ្លូវជាតិលេខ ៦A ក្នុងភូមិសាស្ត្រទឹកដី រាជធានីភ្នំពេញ ត្រូវបានសាងសង់ និងសម្ភោធឱ្យប្រើប្រាស់ក្នុងឆ្នាំ១៩៦៣ ក្រោមហិរញ្ញប្បទានឥត សំណងរបស់ប្រទេសជប៉ុន។
ស្ពាននេះត្រូវបានខូចខាតដោយសង្គ្រាមស៊ីវិលនៅកម្ពុជា និងត្រូវបានសាងសង់ឡើងវិញនៅឆ្នាំ១៩៩២ ដោយប្រទេសជប៉ុន ហើយត្រូវបានប្តូរឈ្មោះទៅជាស្ពានមិត្តភាពកម្ពុជា-ជប៉ុន ដោយព្រះមហាវិរៈក្សត្រ សម្ដេចព្រះបាទព្រះបរមរតនកោដ្ឋ នរោត្ដម សីហនុ។
ដោយសារស្ពាននេះមានអាយុកាលដ៏ចំណាស់ ហើយស្របពេលកំណើនសេដ្ឋកិច្ច និងរំហូរចរាចរណ៍ កើនឡើងជាលំដាប់ ស្ពាននេះតម្រូវឱ្យមានការជួសជុលឡើងវិញជាបន្ទាន់ ដោយចំណាយថវិកាអស់ប្រមាណ ៣០លានដុល្លារអាមេរិក ក្រោមហិរញ្ញប្បទានឥតសំណងរបស់រដ្ឋាភិបាលជប៉ុន ដែលបានចាប់ផ្តើមបើកការដ្ឋានសាងសង់នៅថ្ងៃទី១៥ ខែកញ្ញា ឆ្នាំ២០១៧៕
