ដោយ គង់ សូរិយា
ភ្នំពេញ៖ កំនើននៃប្រជាសាស្រ្ត និងហេដ្ឋារចនាសម្ព័ន្ឋកាន់តែប្រសើរបាននិងកំពុងទាក់ទាញអ្នកវិនិយោគបុរីនានា ចូលទៅវិនិយោគសាងសង់លំនៅដ្ឋានកាន់តែច្រើននៅតាមបណ្តោយផ្លូវជាតិលេខ៦អា។
ផ្លូវជាតិលេខ៦អា កំពុងទាក់ទាញការវិនិយោគបុរីកាន់តែច្រើន
ប្រធានផ្នែកលក់ និងទីផ្សារនៃបុរីវិមានភ្នំពេញមង្គលរតនៈ លោកស្រី ឆាយ ស៊ីណា បានមានប្រសាសន៍ឱ្យដឹងតាមទូរស័ព្ទ នាព្រឹកថ្ងៃទី៣មេសានេះថា ដោយសារការរីកចម្រើន លើវិស័យហេដ្ឋារចនាសម្ព័ន្ឋកាន់តែល្អប្រសើរ ពិសេសផ្លូវជាតិលេខ ៦អា ជាផ្លូវតភ្ជាប់ពីបណ្តាខេត្តជាច្រើនចូលមកកាន់រាជធានីភ្នំពេញ ទើបក្រុមហ៊ុន លី ហួរគ្រុប បានសម្រេចចិត្តវិនិយោគបុរីនៅតំបន់នេះ។ លោកស្រីបន្តថា បុរីវិមានភ្នំពេញមង្គលរតនៈ ស្ថិតនៅទីតាំងដ៏មានសក្តានុពលមួយ ដោយសារមានផ្សារព្រែកអញ្ចាញនៅក្បែរ និងប្រមូលផ្តុំដោយអាជីវកម្មចម្រុះ។
លោកស្រីបន្តមថា “ការរីកចម្រើននៃក្រុងភ្នំពេញ និងហេដ្ឋារចនាសម្ព័ន្ឋកាន់តែប្រសើរ បានលើកទឹកចិត្តអ្នកវិនិយោគបុរីលំនៅដ្ឋានកាន់តែច្រើន ទៅកាន់ជាយក្រុងភ្នំពេញដើម្បីឆ្លើយតបនឹងកំនើនតម្រូវការរបស់ប្រជាពលរដ្ឋ”។ លោកស្រីបន្តថា “ជាក់ស្តែងបុរីវិមានភ្នំពេញមង្គលរតនៈ បាននិងកំពុងបំពេញតាមការចង់បានរបស់ប្រជាពលរដ្ឋ ដោយយើងមានសាងសង់ផ្ទះចំនួន ៣០០០ខ្នង និងមានរៀបចំហេដ្ឋារចនាសម្ព័ន្ឋចាំបាច់សម្រាប់ប្រជាពលរដ្ឋ”។
ទីតាំងរបស់បុរីនេះ មានរួមបញ្ចូលនូវសួនច្បារ ក្លឹបហាត់ប្រាណ អាងហែលទឹក និងសាលសម្រាប់រៀបចំអាពាហ៍ពិពាហ៍ និងការជប់លៀងផ្សេងៗទៀត។
លោកស្រី ឆាយ ស៊ីណា បានបន្តថា លំនៅដ្ឋានក្នុងបុរីនេះមានតម្លៃចាប់ពី ៤៦,០០០ដុល្លារ រហូតដល់ ២១៦,០០០ដុល្លារអាមេរិក ដែលបច្ចុប្បន្នការលក់សម្រេចបានជោគជ័យ ដោយគម្រោងដំណាក់កាលទី១ បានលក់អស់ប្រមាណ ៥០ភាគរយហើយ។ ជាមួយនឹងការរីកចម្រើននៅតំបន់នេះ ផ្លូវជាតិលេខ៦អាក៏បាននិងកំពុងទាក់ទាញអ្នកវិនិយោគក្នុងស្រុក និងអន្តរជាតិចូលមកវិនិយោគសាងសង់បុរី និងមជ្ឈមណ្ឌលពាណិជ្ជកម្មកាន់តែច្រើនផងដែរ។
ដើម្បីអបអរសាទរ ពិធីបុណ្យចូលឆ្នាំថ្មី ប្រពៃណីខ្មែរ បុរីវិមានភ្នំពេញមង្គលរតនៈ បានលក់បញ្ចុះតម្លៃពី ៣ ទៅ ៨ភាគរយ ចាប់ពីថ្ងៃទី១ ដល់ ៣០ខែមេសា ឆ្នាំ ២០១៩ ហើយសម្រាប់អតិថិជនដែលចាប់អារម្មណ៍អាចទាក់ទងតាមរយៈលេខទូរស័ព្ទ 077 667 608 /085 756 666។
នាយិកាក្រុមហ៊ុន Century21 Cambodia អ្នកនាង Grace Rachny Fong បានមានប្រសាសន៍ឱ្យដឹងកាលពីពេលថ្មីៗនេះថា តំបន់ផ្លូវជាតិលេខ៦អា បានស្ថិតក្នុងក្រសែភ្នែកអ្នកវិនិយោគធំៗ ពិសេសអ្នកវិនិយោគមកពីប្រទេសចិនកាន់តែច្រើន ដោយសារតំបន់នេះមានការរីកចម្រើន និងមានហេដ្ឋារចនាសម្ព័ន្ឋល្អប្រសើរ ពិសេសតំបន់នេះជាទីតាំងនៃការវិនិយោគទីក្រុងចិន និងជាមជ្ឈមណ្ឌលពហុកីឡា ដែលកម្ពុជានឹងប្រារពព្រឹត្តិការណ៍កីឡាស៊ីហ្គេមនៅឆ្នាំ២០២៣ផងដែរ។
អ្នកនាងបន្តថា” តំបន់នេះនឹងកាន់តែរីកចម្រើនបន្ថែមទៀត ពិសេសកំនើនប្រជាសាស្រ្តនឹងកើនឡើងកាន់តែច្រើននាពេលអនាគត ដោយសារបុរីកាន់តែច្រើនកំពុងសាងសង់នៅតំបន់នេះ ហើយមជ្ឈមណ្ឌលពាណិជ្ជកម្មនានា នឹងសាងសង់កាន់តែច្រើននាពេលខាងមុខនេះ ដើម្បីឆ្លើយតបតម្រូវការ”៕
