ដោយ គង់ សូរិយា
ភ្នំពេញ៖ ពិព័រណ៍លំនៅដ្ឋាន និង LIFE STYLE លើកដំបូងត្រូវបានអ្នករៀបចំកម្មវិធីនេះថា នឹងទាក់ទាញអ្នកចូលរួមរាប់ម៉ឺននាក់ ដោយសារវាជាឱកាសដែលអ្នកស្វែងរកទិញអចលនទ្រព្យនឹងទទួលបានការបញ្ចុះតម្លៃច្រើន។
លោក ម៉ឹក ចិន្តា ស្ថាបនិកគេហទំព័រ Realestate.com.kh បានមានប្រសាសន៍ក្នុងសន្និសីទសារព័ត៌មាននាព្រឹកថ្ងៃទី៣ មេសានេះថា ក្រុមហ៊ុនប្រមាណ ១០០នឹងចូលរួមតាំងពិព័រណ៍ ដែលនឹងចាប់ផ្តើមពីថ្ងៃទី២៦ ដល់២៧មេសាខាងមុខនេះ ក្នុងនោះមានក្រុមហ៊ុនសាងសង់លំនៅដ្ឋាន អ្នកលក់ដីឡូត៍ និងផលិតផលទាក់ទងនឹងវិស័យលំនៅដ្ឋានជាច្រើនទៀត។
-->
លោកបន្តថា “ព្រឹត្តិការណ៍នេះ នឹងផ្តល់ឱ្យអ្នកចូលរួមនូវការបញ្ចុះតម្លៃពិសេស ហើយពួកគេក៏ទទួលបានចំណេះដឹងថ្មីៗពីការទិញលក់អចលនទ្រព្យ ពីវាគ្មិនជំនាញៗដែលមានបទពិសោធន៍ច្រើនក្នុងវិស័យនេះផងដែរ”។
អគ្គនាយកនៃ realestate.com.kh លោក Tom OSullivan បានមានប្រសាសន៍ឱ្យដឹងផងដែរថា ព្រឹត្តិការណ៍នេះ ជាការជំរុញការផ្សព្វផ្សាយពីសក្តានុពលក្នុងវិស័យសំណង់ និងអចលទ្រព្យរបស់ប្រទេសកម្ពុជាទៅកាន់ពិភពលោកផងដែរ ពិសេសយើងផ្តោតការផ្សព្វផ្សាយលើអ្នកមានជីវភាពមធ្យម ដែលនៅមានតម្រូវការលំនៅដ្ឋានច្រើនក្នុងប្រទេសកម្ពុជា។
លោកបន្តថា “គោលបំណងនៃពិព័រណ៍អចលនទ្រព្យនៅពេលខាងមុខនេះ ដើម្បីលើកកម្ពស់វិស័យអចលនទ្រព្យនៅកម្ពុជា ទាំងសម្រាប់ទីផ្សារក្នុងស្រុកនិងលើឆាកអន្តរជាតិ”។ លោកបន្តថា “វេទិកានេះនឹងប្រមូលផ្តុំនូវគម្រោងអចលនទ្រព្យថ្មីៗ ល្អៗ ព្រមទាំងក្រុមហ៊ុនផ្សេងៗទៀតដែលមានឥទ្ឋិពល និងដើរតួនាទីសំខាន់ក្នុងទីផ្សារកម្ពុជា”៕
